Heptateuchos

Corpus Scriptorum Ecclesiasticorum Latinorum · Corpus Scriptorum Ecclesiasticorum Latinorum · 5,575 sections

gen.500
accipit optatum toto pro munere fratrem.
gen.501
mox sopita deus inlustrans corda prophetae
gen.502
praecipit. ut cuncta uacuet formidine pectus,
gen.503
quandoquidem inuictae tutus sit tegmine dextrae.
gen.504
ille alacer concessa sibi licentia fatur:
gen.505
"Quid mihi pro tanta praestant tua dona loquella?
gen.506
nam coniuncta quatit fessum longaeua senectus,
gen.507
nec datur emeritum post mortem linquere natum.
gen.508
et quia nobilibus thalamis mihi germina non sunt,
gen.509
degener heres erit nobis, quem serua creauit."
gen.510
confirmat uatem dominus, dum talia fatur:
gen.511
"Ne time confidens; seruus tibi non erit heres.
gen.512
nam si nosse ualet numero carentia quisquam
gen.513
sidera uel totas pelagi percurrere harenas,
gen.514
is poterit prolem solus numerare putando,
gen.515
quae praestanda tibi est, totus qua tenditur orbis,
gen.516
nasceturque tuo de semine, qui tua cernat
gen.517
filius atque etiam natus sit regis aeterni:
gen.518
namque ego sum dominus caelorum conditor, et te
gen.519
auxilio tutum Chaldaea ex gente reduxi."
gen.520
credidit ista senex nec quidquam defore uerbis
gen.521
metitur domini sincero acumine cordis
gen.522
subnixusque rogat, placidis dum supplicat orsis,
gen.523
signa dei quae mente gerat, quae corde sequatur,
gen.524
munere pro tanto, quo natum gignat inerti
gen.525
corpore, iam gelidis decursa ob tempora membris.
gen.526
admonitus uitulam trimi iam temporis aptat,
gen.527
coniungens alacrem torua cum fronte iuuencum,
gen.528
uerbecem caprumque dehinc hirtamque capellam,
gen.529
columbas pariles, simili cum turture iunctas.
gen.530
corpora mox pecudum gemina in diuortia findit,
gen.531
iulaesas tota dimittens carne uolucres;
gen.532
omnia disponit sacrisque altaribus aptat.
gen.533
seque locat propter, sensu uersutus et aure.
gen.534
ecce autem prima sub tempora noctis opacae
gen.535
candida sanctifici terrentur pectora uatis
gen.536
nigrantesque ruunt confusa luce tenebrae.
gen.537
his super attonitus domini solacia sumit,
gen.538
dum noua uenturae praenoscit semina gentis,
gen.539
per uarios casus duro sub rege locandae
gen.540
Aegypti, cui nomen erit Pharaonis acerbi.
gen.541
"Namque quater centum dominis subiecta per annos
gen.542
seruiet, ad terras rursus reuocanda feraces;
gen.543
ac uice mutata, quae quondam serua tremebat,
gen.544
sceptra reget, ualida gentes uirtute cohercens.
gen.545
at tu, cum fuerit metati terminus aeui,
gen.546
sedibus in patriis functus mandabere busto.
gen.547
nam populus infensa sibi de sede reuulsus
gen.548
huc ueniet, domibus ueterum donandus auorum.
gen.549
nam qua Niliacis gaudet nunc incola terris
gen.550
et celer Euphratis Syrorum praenatat orbes,
gen.551
Cenaeos populos Cenezaeosque tenebunt,
gen.552
Chedmoneos, Chettos iuncta cum gente Phereza.
gen.553
et Raphana, cui manus est Iebusa cohaerens,
gen.554
dilectaque sibi pellentur sede Chananni.
gen.555
quin et Amorraeus, Gergesso extrusus amico,
gen.556
semianimis possessa dabit uenientibus arua."
gen.557
quae cum sancta dei prompsissent uerba prophetae,
gen.558
sole sub occiduo clarum dat fulmine signum.
gen.559
nam uelut undanti ferueret flamma camino,
gen.560
caesarum pecudum uisa est delambere carnes.
gen.561
Interea steriles iam pridem fessa per annos
gen.562
perdiderat etiam uotum iam Sarra parentis,
gen.563
et quia praegelida partum non poneret aluo,,
gen.564
ad secunda suum coepit lactare) maritum ;
gen.565
gaudia et inflexum cogit consortia seruae
gen.566
noscere, quo saltim genitor sit pignore uili.
gen.567
ilicet in thalamos Aegyptia ducitur Agar,
gen.568
Ismahelumque nothum fecunda gignit ab aluo.
gen.569
quae cum seruili dominam contemneret astu.
gen.570
uerberibus duris adflicta et saucia fugit.
gen.571
ac dum uicino tegeret se deuia fonte,
gen.572
nuntius aetherio descendit culmine caeli
gen.573
consultamque prius dominorum mittit ad aedes,
gen.574
quin etiam multo gaudentem munere donat.
gen.575
quae quia conspicuo fulgentem lumine sanctum
gen.576
uiderat, a simili narrauit nomine fontem.
gen.577
iamque nouem denos nouiesque exegerat annos
gen.578
Abramus uates, cum se iam iamque parentem
gen.579
agnoscit nati magno de munere dandi,
gen.580
testamenta dei cui sunt concordia summi,
gen.581
gentibus innumeris genitor ductorque futurus.
gen.582
percipiens placidas per grandia tempora sedes.
gen.583
quin etiam solito de nomine grandior exit,
gen.584
dura decus adiectum uocalis littera ducit,
gen.585
et Sara quae fuerat, mandatur Sarra uocari.
gen.586
quin etiam patris Ismahelus pro prece diues,
gen.587
bis senos princeps populos generatque regitque.
gen.588
post haec gesta senex. cum sol octauus adesset,
gen.589
maribus exhibitis adimit praeputia ferro.
gen.590
adiungens pariter quoscumque ex plebe seorsa.
gen.591
inde ubi iam tempus promissi muneris instat,
gen.592
soluitur in tremulos uultu crispante cachinnos,
gen.593
dum tacitus secum promissa ingentia uoluit:
gen.594
"Posse deum credes, quidquid non extitit umquam,
gen.595
condere et infractos robur generare per artus?"
gen.596
Scandebat medium iam sol flagrantior axem,
gen.597
magnificusque senex frigus captabat in umbra,
gen.598
cum subito iuuenes pariter tris adfore cernit.
gen.599
sedulus in cunctos unum plus ambit et orat.

Corpus Scriptorum Ecclesiasticorum Latinorum. CTS URN stoa0104c.stoa001.opp-lat1. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.