Hecyra

Perseus Latin · Perseus Latin · 1,064 sections

3.2.340
Ehem, Parmeno, tune hic eras? Perii, quid faciam misera?
3.2.341
Non visam uxorem Pamphili, cum in proximo hic sit aegra?
3.2.342
Non visas? ne mittas quidem visendi causa quemquam:
3.2.343
Nam qui amat cui odio ipsus est bis facere stulte duco:
3.2.344
Laborem inanem ipsus capit, et illi molestiam affert.
3.2.345
Tum autem filius introiit videre, ut venit, quid agat.
3.2.346
Quid ais? an venit Pamphilus?
3.2.346b
Venit.
3.2.346c
Dis gratiam habeo.
3.2.347
Hem, istoc verbo animus mihi rediit, et cura ex corde excessit.
3.2.348
Iam ea de causa maxime nunc huc introire nolo:
3.2.349
Nam si remittent quippiam Philumenae dolores,
3.2.350
Omnem rem narrabit, scio, continuo sola soli
3.2.351
Quae inter vos intervenit, unde ortum est initium irae.
3.2.352
Atque eccum video ipsum egredi: quam tristis est!
3.2.352b
O mi gnate.
3.2.353
Mea mater salve.
3.2.353b
Gaudeo venisse salvum: salvan
3.2.354
Philumena est?
3.2.354b
Meliuscula est.
3.2.354c
Utinam istuc ita Di faxint.
3.2.355
Quid tu igitur lacrimas? aut quid es tam tristis?
3.2.355b
Recte, mater.
3.2.356
Quid fuit tumulti? dic mihi: an dolor repente invasit?
3.2.357
Ita factum est.
3.2.357b
Quid morbi est?
3.2.357c
Febris.
3.2.357d
Quotidiana?
3.2.357e
Ita aiunt.
3.2.358
I sodes intro; consequar iam te, mea mater.
3.2.358b
Fiat.
3.2.359
Tu pueris curre Parmeno obviam, atque eis onera adiuta.
3.2.360
Quid? non sciunt ipsi viam domum qua redeant?
3.2.360b
Cessas?
3.3.361
Nequeo mearum rerum initium ullum invenire idoneum,
3.3.362
Unde exordiar narrare quae nec opinanti accidunt;
3.3.363
Partim quae perspexi his oculis, partim quae accepi auribus:
3.3.364
Qua me propter exanimatum citius eduxi foras.
3.3.365
Nam modo me intro ut corripui timidus, alio suspicans
3.3.366
Morbo me visurum affectam ac sensi esse uxorem; hei mihi!
3.3.367
Postquam me aspexere ancillae advenisse, ilico omnes simul
3.3.368
Laetae exclamant, Venit; id quod me repente aspexerant.
3.3.369
Sed continuo vultum earum sensi immutari omnium,
3.3.370
Quia tam incommode illis fors obtulerat adventum meum.
3.3.371
Una illarum interea propere praecucurrit nuntians
3.3.372
Me venisse: ego eius videndi cupidus recta consequor.
3.3.373
Postquam introii extemplo eius morbum cognovi miser;
3.3.374
Nam neque ut celari posset tempus spatium ullum dabat,
3.3.375
Neque voce alia ac res monebat ipsa poterat conqueri.
3.3.376
Postquam aspexi, O facinus indignum! inquam; et corripui ilico
3.3.377
Me inde lacrimans, incredibili re atque atroci percitus.
3.3.378
Mater consequitur: iam ut limen exirem ad genua accidit
3.3.379
Lacrimans misera: miseritum est. Profecto hoc sic est, ut puto:
3.3.380
Omnibus nobis ut res dant sese ita magni atque humiles sumus.
3.3.381
Hanc habere orationem mecum a principio institit:
3.3.382
O mi Pamphile, abs te quamobrem haec abierit causam vides;
3.3.383
Nam vitium est oblatum virgini olim ab nescio quo improbo:
3.3.384
Nunc huc confugit te atque alios partum ut celaret suum.
3.3.385
Sed cum orata eius reminiscor, nequeo quin lacrimem miser.
3.3.386
Quaeque fors fortuna est, inquit, nobis quae te hodie obtulit,
3.3.387
Per eam te obsecramus ambae, si ius, si fas est, uti
3.3.388
Adversa eius per te tecta tacitaque apud omnes sient.
3.3.389
Si unquam erga te animo esse amico sensti eam, mi Pamphile,
3.3.390
Sine labore hanc gratiam te ut sibi des pro illa nunc rogat.
3.3.391
Caeterum de reducenda id facias quod in rein sit tuam,
3.3.392
Parturire eam neque gravidam esse ex te solus conscius.
3.3.393
Nam aiunt tecum post duobus concubuisse eam mensibus:
3.3.394
Tum postquam ad te venit mensis agitur hic iam septimus;
3.3.395
Quod te scire ipsa indicate res. Nunc si potis est, Pamphile,
3.3.396
Maxime volo doque operam ut clam eveniat partus patrem,
3.3.397
Atque adeo omnes: sed si fieri id non potest quin sentiant,
3.3.398
Dicam abortum esse: scio nemini aliter suspectum fore
3.3.399
Quin, quod verisimile est, ex te recte eum natum putent.
3.3.400
Continuo exponetur: hic tibi nihil est quicquam incommodi;
3.3.401
Et illi miserae indigne factam iniuriam contexeris.
3.3.402
Pollicitus sum; et servare in eo certum est quod dixi fidem;
3.3.403
Nam de reducenda, id vero neutiquam honestum esse arbitror;
3.3.404
Nec faciam; etsi amor me graviter consuetudoque eius tenet.
3.3.405
Lacrimo, quae posthac futura est vita quum in mentem venit,
3.3.406
Solitudoque. O fortuna, ut nunquam perpetuo es bona!
3.3.407
Sed iam prior amor me ad hanc rem exercitatum reddidit,
3.3.408
Quem ego tum consilio missum feci: idem nunc huic operam dabo.
3.3.409
Adest Parmeno cum pueris: hunc minime est opus
3.3.410
In hac re adesse; nam olim soli credidi
3.3.411
Ea me abstinuisse in principio, cum data est.
3.3.412
Vereor, si clamorem eius hic crebro audiat,
3.3.413
Ne parturire intelligat: aliquo mihi est
3.3.414
Hinc ablegandus dum parit Philumena.
3.4.415
Ain tu tibi hoc incommodum evenisse iter?
3.4.416
Non hercle verbis, Parmeno, dici potest
3.4.417
Tantum quam re ipsa navigare incommodum est.
3.4.418
Itane est?
3.4.418b
O fortunate, nescis quid mali
3.4.419
Praeterieris qui nunquam es ingressus mare.
3.4.420
Nam alias ut omittam miserias, unam hanc vide:
3.4.421
Dies triginta aut plus eo in navi fui,
3.4.422
Cum interea semper mortem exspectabam miser;
3.4.423
Ita usque adversa tempestate usi sumus.
3.4.424
Odiosum.
3.4.424b
Haud clam me est: denique hercle aufugerim

Perseus Latin. CTS URN phi0134.phi005.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.