Curculio

Perseus Latin · Perseus Latin · 995 sections

2.1.220
nam iam quasi zona liene cinctus ambulo,
2.1.221
geminos in ventre habere videor filios.
2.1.222
nil metuo nisi ne medius disrumpar miser.
2.1.223
Si recte facias, Phaedrome, auscultes mihi
2.1.224
atque istam exturbes ex animo aegritudinem.
2.1.225
paves, parasitus quia non rediit Caria:
2.1.226
adferre argentum credo; nam si non ferat,
2.1.227
tormento non retineri potuit ferreo,
2.1.228
quin reciperet se huc esum ad praesepem suam.
2.1.229
Quis hic est qui loquitur?
2.1.229b
Quoiam vocem ego audio?
2.1.230
Estne hic Palinurus Phaedromi?
2.1.230b
Quis hic est homo
2.1.231
cum collativo ventre atque oculis herbeis?
2.1.232
de forma novi, de colore non queo
2.1.233
novisse. iam iam novi: leno est Cappadox.
2.1.234
congrediar.
2.1.234b
Salve, Palinure.
2.1.234c
O scelerum caput,
2.1.235
salveto. quid agis?
2.1.235b
Vivo.
2.1.235c
Nempe ut dignus es.
2.1.236
sed quid tibi est?
2.1.236b
Lien enecat, renes dolent,
2.1.237
pulmones distrahuntur, cruciatur iecur,
2.1.238
radices cordis pereunt, hirae omnes dolent.
2.1.239
Tum te igitur morbus agitat hepatiarius.
2.1.240
Facile est miserum inridere.
2.1.240b
Quin tu aliquot dies
2.1.241
perdura, dum intestina exputescunt tibi,
2.1.242
nunc dum salsura sat bonast: si id feceris,
2.1.243
venire poteris intestinis vilius.
2.1.244
Lien díerectust.
2.1.244b
Ambula, id lieni optumumst.
2.1.245
Aufér istaec, quaeso, atque hoc responde quod rogo.
2.1.246
potin cóniecturam facere, si narrem tibi
2.1.247
hac nocte quod ego somniavi dormiens?
2.1.248
Vah, solus hic homost qui sciat divinitus.
2.1.249
quin coniectores a me consilium petunt:
2.1.250
quod eis respondi, ea omnes stant sententia.
2.2.251
Palinure, quid stas? quin depromuntur mihi
2.2.252
quae opus súnt, parasito ut sit paratum prandium,
2.2.253
quom veniat?
2.2.253b
Mane sis, dum huic conicio somnium.
2.2.254
Tute ipse, si quid somniasti, ad me refers.
2.2.255
Fateór.
2.2.255b
Abi, déprome.
2.2.255c
Age tu interea huic somnium
2.2.256
narra, meliorem quam ego sum suppono tibi.
2.2.257
nam quod scio omne ex hoc scio.
2.2.257b
Operam ut det.
2.2.257c
Dabit.—
2.2.258
Facit hic quod pauci, ut sit magistro óbsequens.
2.2.259
da mi igitur operam.
2.2.259b
Tam etsi non novi, dabo.
2.2.260
Hac nocte in somnis visus sum viderier
2.2.261
procul sedere longe a me Aesculapium,
2.2.262
neque eum ad me adire neque me magni pendere
2.2.263
visumst.
2.2.263b
Item alios deos facturos scilicet:
2.2.264
sane illi inter se congruont concorditer.
2.2.265
nihil est mirandum, melius si nil fit tibi,
2.2.266
namque incubare satius te fuerat Iovi,
2.2.267
qui tibi auxilio in iure iurando fuit.
2.2.268
Siquidem íncubare vélint qui periuraverint,
2.2.269
locus nón praeberi potis est in Capitolio.
2.2.270
Hoc animum advorte: pacem ab Aesculapio
2.2.271
petas, ne forte tibi évenat magnum malum,
2.2.272
quod in quiete tibi portentumst.
2.2.272b
Bene facis.
2.2.273
ibo atque orabo.—
2.2.273b
Quae res male vortat tibi.—
2.2.274
Pro di immortales, quem conspicio? quis illic est?
2.2.275
estne hic parasitus qui missust in Cariam?
2.2.276
heus Phaedrome, exi, exi, exi, inquam, ocius.
2.2.277
Quid istíc clamorem tollis?
2.2.277b
Parasitum tuom
2.2.278
video currentem ellum usque in plátea ultima.
2.2.279
hinc auscultemus quid agat.
2.2.279b
Sane censeo.
2.3.280
Dáte viam mihi, nóti atque ignoti, dúm ego hic officiúm meum
2.3.281
facio: fugite omnes, abite et de via decedite,
2.3.282
ne quem in cursu capite aut cubito aut pectore offendam aut genu.
2.3.283
ita nunc subito, propere et celere obiectumst mihi negotium,
2.3.284
nec homo quisquamst tám opulentus, qui mi obsistat in via,
2.3.285
nec strategus nec tyrannus quisquam, nec agoranomus,
2.3.286
nec demarchus nec comarchus, nec cum tanta gloria,
2.3.287
quin cadat, quin capite sistat in via de semita.
2.3.288
tum isti Graeci palliati, capite operto qui ambulant,
2.3.289
qui incedunt suffarcinati cum libris, cum sportulis,
2.3.290
constant, conferunt sermones inter sese drapetae,
2.3.291
obstant, obsistunt, incedunt cum suis sententiis,
2.3.292
quos semper videas bibentes esse in thermipolio,
2.3.293
ubi quid subripuere: operto capitulo calidum bibunt,
2.3.294
tristes atque ebrioli incedunt: eos ego si offendero,
2.3.295
ex unoquoque eorum exciam crépitum polentarium.
2.3.296
tum isti qui ludunt datatim servi scurrarum in via,
2.3.297
et datores et factores omnis subdam sub solum.
2.3.298
proin se domi contineant , vitent infortunio.
2.3.299
Recte hic monstrat, si imperare possit. nam ita nunc mos viget,

Perseus Latin. CTS URN phi0119.phi008.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.