Cistellaria

Perseus Latin · Perseus Latin · 831 sections

2.3.619
ego eam proieci, ália mulier sustulit,
2.3.620
ego inspectavi. érus hanc duxit postibi.
2.3.621
eam núnc puellam filiam eius quaerimus.
2.3.622
quid nunc supina susum in caelum conspicis?
2.3.623
Ei nunciam istuc quo properabas, nil moror.
2.3.624
nunc intellexi.
2.3.624b
Dis hercle habeo gratiam,
2.3.625
nam ni intellexes, numquam, credo, amitteres.—
2.3.626
Nunc mihi bonae necessumst esse ingratiis,
2.3.627
quamquam esse nolo. rem palam esse intellego:
2.3.628
nunc egomet potius hanc inibo gratiam
2.3.629
ab illis, quam illaec me indicet. ibo domum,
2.3.630
atque ad parentes redducam Selenium.—
3.1.631
Rem élocuta sum tibi omnem; sequere hac me, Selenium,
3.1.632
ut eorum quoiam esse oportet te sis potius quam mea.
3.1.633
quamquam invita te carebo, ánimum ego inducam tamen
3.1.634
ut illud quem ad modum tuam in rem bene conducat consulam.
3.1.635
nam hic crepundia insunt, quibuscum te illa olim ad me detulit,
3.1.636
quae mihí dedit, parentes te ut cognoscant facilius.
3.1.637
accipe hanc cistellam, Halisca. ágedum pulta illas fores.
3.1.638
dic me orare ut aliquis intus prodeat propere ocius.
3.1.639
Recipe me ad te, Mors, amicum et benevolum.
3.1.639_640
Mater mea,
3.1.641
periimus miseraé.
3.1.641b
Vtrum hac me feriam an ab laeva latus?
3.1.642
Quid tibi est?
3.1.642b
Alcesimarchum non vides? ferrum tenet.
3.1.643
Ecquid agis? remorare. lumen linque.
3.1.643b
Amabo, accurrite,
3.1.644
ne se interemat.
3.1.644b
O Salute méa salus salubrior,
3.1.645
tu nunc, si ego volo seu nolo, sola me ut vivam facis.
3.1.646
Haud voluisti istuc severum facere.
3.1.646b
Nil mecum tibi,
3.1.647
mortuos tibi sum: hanc ut habeo certum est non amittere;
3.1.648
nam hercle iam ad me adglutinandam totam decretum est dare.
3.1.649
ubi estis, servi? occludite aedis pessulis, repagulis
3.1.650
ilico: hanc ego tetulero intra limen.—
3.1.650b
Abiit, abstulit
3.1.651
mulierem. ibo, persequar iam illum intro, ut haec ex me sciat
3.1.652
éadem, si possum tranquillum facere ex irato mihi.
4.1.653
Nullam ego me vidisse credo magis anum excruciabilem
4.1.654
quam illaec est, quae dudum fassa est mihi quaene infitias eat.
4.1.655
sed eccam eram video. sed quíd hoc est, haec quod cistella hic iacet
4.1.656
cum crepundiis? nec quemquam conspicor alium in via.
4.1.657
faciundum est puerile officium: conquiniscam ad cistulam.
4.1.658
Quid agis, Lampadio?
4.1.658b
Haec cistella numnam hinc ab nobis domo est?
4.1.659
nam hinc ab ostio iacentem sustuli.
4.1.659b
Quid nuntias
4.1.660
super anu?
4.1.660b
Scelestiorem in terra nullam esse alteram.
4.1.661
omnia infitiatur ea quae dudum confessa est mihi.
4.1.662
nam hercle ego quam illam anum inridere me ut sinam, satiust mihi
4.1.663
quovis exitio interire.
4.1.663b
Di, obsecro vostram fidem.
4.1.664
Quid deos obsecras?
4.1.664b
Servate nos.
4.1.664c
Quid est?
4.1.664d
Crepundia
4.1.665
haec sunt, quibuscum tu extulisti nostram filiolam ad necem.
4.1.666
Sanane es?
4.1.666b
Haec sunt profecto.
4.1.666c
Pergin?
4.1.666d
Haec sunt.
4.1.666e
Si mihi
4.1.667
alia mulier istoc pacto dicat, dicam esse ebriam.
4.1.668
Non ecastor falsa memoro.
4.1.668b
Nam, obsecro, unde haec gentium?
4.1.669
aut quis deus obiecit hanc ante ostium nostrum, quasi
4.1.670
dedita opera, in tempore ipso?
4.1.670b
Spes mihi sancta subveni.
4.2.671
Nisi quíd mi opis di dant, dísperii, neque unde aúxilium expetam hábeo.
4.2.672
itaque † petulantia mea me animi miseram habet.
4.2.673
quae in térgum meúm ne veniánt, male formído,
4.2.674
si era méa me sciát tam socórdem esse quám sum.
4.2.675
quamne ín manibus ténui atque accépi hic ante aédis
4.2.676
cistéllam, ubi ea sít nesció, nisi ut opínor
4.2.677
loca haec circiter excidit mihi.
4.2.678
mei hómines, mei spectátores, facite índicium, si quís vidit,
4.2.679
quis eam ábstulerit quisve sústulerit et utrum hác an illac iter ínstiterit.
4.2.680
non súm scitiór, quae hos rogem aút quae fatígem,
4.2.681
qui sémper maló muliebrí sunt lubéntes.
4.2.682
nunc véstigia híc si qua súnt noscitábo.
4.2.683
nam sí nemo hac praéter iít, postquam intro ábii,
4.2.684
cistélla hic iacéret. quid híc? perii, opínor.
4.2.685
actum ést, ilicét me infelícem et sceléstam.
4.2.686
nulla ést, neque ego sum úsquam. perdíta perdidít me.
4.2.687
sed pérgam ut coépi tamén, quaeritábo.
4.2.688
nam et intús paveo et foris fórmido,
4.2.688a
ita núnc utrubique metús me agitat.
4.2.689
ita súnt homines miseré miseri:
4.2.690
ílle nunc laétus est, quísquis est, qui íllam habet,
4.2.691
quaé neque illa ílli quicquam úsui et mi exítio est.
4.2.692
sed mémet morór, quom hoc agó setius.
4.2.693
Halísca, hoc age, ad térram aspice ét despice,
4.2.694
oculís investíges, astúte augura.
4.2.695
Era.
4.2.695b
Hém quid est?
4.2.695c
Haec ést.

Perseus Latin. CTS URN phi0119.phi007.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.