Aulularia

Perseus Latin · Perseus Latin · 1,014 sections

2.2.257b
Ita di faxint. illud facito ut memineris,
2.2.258
convenisse ut ne quid dotis mea ad te afferret filia.
2.2.259
Memini.
2.2.259b
At scio quo vos soleatis pacto perplexarier:
2.2.260
pactum non pactum est, non pactum pactum est, quod vobis lubet.
2.2.261
Nulla controversia mihi tecum erit. sed nuptias
2.2.262
num quae causa est quin faciamus hodie?
2.2.262b
Immo edepol optuma.
2.2.263
Ibo igitur, parabo. numquid me vis?
2.2.263b
Istuc. ei et vale.
2.2.264
Heus, Pythodice, sequere propere me ad macellum strenue.—
2.2.265
Illic hinc abiit. di immortales, obsecro, aurum quid valet.
2.2.266
credo ego illúm iam inaudivisse mi esse thensaurum domi.
2.2.267
id inhiat, ea affinitatem hanc obstinavit gratia.
2.3.268
ubi tu es, quae deblateravisti iam vicinis omnibus,
2.3.269
meae me filiae daturum dotem? heus, Staphyla, te voco.
2.3.270
ecquid audis? vascula intus pure propera atque elue:
2.3.271
filiam despondi ego: hodie huic nuptum Megadoro dabo.
2.3.272
Di bene vortant. verum ecastor non potest, subitum est nimis.
2.3.273
Tace atque abi. curata fac sint cum a foro redeam domum;
2.3.274
atque aedis occlude; iám ego hic adero.—
2.3.274b
Quid ego nunc agam?
2.3.275
nunc nobis prope adest exitium, mi atque erili filiae,
2.3.276
nunc probrum atque partitudo prope adest ut fiat palam;
2.3.277
quod celatum atque occultatum est usque adhuc, nunc non potest.
2.3.278
ibo intro, ut erus quae imperavit facta, cum veniat, sient.
2.3.279
nam ecastor malum maerore metuo ne mixtum bibam.—
2.4.280
Postquam óbsonavit erus et conduxit coquos
2.4.281
tibicinasque hasce apud forum, edixit mihi
2.4.282
ut dispertirem obsonium hic bifariam.
2.4.283
Me quidem hercle, dicam tibi palam, non divides;
2.4.284
si quo tu totum me ire vis, operam dabo.
2.4.285
Bellum et pudicum vero prostibulum popli.
2.4.286
post si quis vellet, te haud non velles dividi.
2.4.287
Atque ego istuc, Anthrax, alio vorsum dixeram,
2.4.288
non istuc quo tu insimulas. sed erus nuptias
2.4.289
meus hodie faciet.
2.4.289b
Cuius ducit filiam?
2.4.290
Vicini huius Euclionis senis e proximo.
2.4.291
ei adeo obsoni hinc iussit dimidium dari,
2.4.292
cocum alterum itidemque alteram tibicinam.
2.4.293
Nempe huc dimidium dicis, dimidium domum?
2.4.294
Nempe sícut dicis.
2.4.294b
Quíd? hic non poterat de suo
2.4.295
senex óbsonari filiai nuptiis?
2.4.296
Vah.
2.4.296b
Quid negotist?
2.4.296c
Quid negoti sit rogas?
2.4.297
pumex non aeque est aridus atque hic est senex.
2.4.298
Ain tandem?
2.4.298b
Ita esse ut dixi. tute existuma:
2.4.299
suam rem periisse seque eradicarier.
2.4.300
quin divom atque hominum clamat continuo fidem,
2.4.301
de suo tigillo fumus si qua exit foras.
2.4.302
quin cum it dormitum, follem obstringit ob gulam.
2.4.303
Cur?
2.4.303b
Ne quid animae forte amittat dormiens.
2.4.304
Etiamne obturat inferiorem gutturem,
2.4.305
ne quid animai forte amittat dormiens?
2.4.306
Haec mihi te ut tibi med aequom est, credo, credere.
2.4.307
Immo equidem credo.
2.4.307b
At scin etiam quo modo?
2.4.308
aquam hercle plorat, cum lavat, profundere.
2.4.309
Censen talentum magnum exorari pote
2.4.310
ab istóc sene ut det, qui fiamus liberi?
2.4.311
Famem hercle utendam si roges, numquam dabit.
2.4.312
quin ipsi pridem tonsor unguis dempserat:
2.4.313
collegit, omnia abstulit praesegmina.
2.4.314
Edepol mortalem parce parcum praedicas.
2.4.315
Censen vero esse parcum et misere vivere?
2.4.316
pulmentum pridem éi eripuit miluos:
2.4.317
homo ad praetorem plorabundus devenit;
2.4.318
infit ibi postulare plorans, eiulans,
2.4.319
ut sibi liceret miluom vadarier.
2.4.320
sescenta sunt quae memorem, si sit otium.
2.4.321
sed uter vestrorum est celerior? memora mihi.
2.4.322
Ego, et multo melior.
2.4.322b
Cocum ego, non furem rogo.
2.4.323
Cocum ergo dico.
2.4.323b
Quid tu ais?
2.4.323c
Sic sum ut vides.
2.4.324
Cocus ille nundinalest, in nonum diem
2.4.325
solet ire coctum.
2.4.325b
Tun, trium litterarum homo,
2.4.326
me vituperas? fur.
2.4.326b
Etiam fur, trifurcifer.
2.5.327
Tace nunciam tu, atque agnum hinc uter est pinguior
2.5.328
cape atque abi intro ad nos.
2.5.328b
Licet.—
2.5.328c
Tu, Congrio,
2.5.328a
quem illic reliquit agnum, eum sume atque abi
2.5.329
intro illuc, et vos illum sequimini.
2.5.330
vos ceteri ite huc ad nos.
2.5.330b
Hercle iniuria
2.5.331
dispertivisti: pinguiorem agnum isti habent.
2.5.332
At nunc tibi dabitur pinguior tibicina.
2.5.333
i sane cum illo, Phrugia. tu autem, Eleusium,
2.5.334
huc intro abi ad nos.
2.5.334b
O Pythodice subdole,
2.5.335
hucine detrusti me ad senem parcissimum?

Perseus Latin. CTS URN phi0119.phi003.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.