Amphitruo

Perseus Latin · Perseus Latin · 1,409 sections

1.1.447
sed quom cogito, equidem certo idem sum qui semper fui.
1.1.448
novi erum, novi aedis nostras; sane sapio et sentio.
1.1.449
non ego illi obtempero quod loquitur. pultabo foris.
1.1.450
Quó agis te?
1.1.450b
Domum.
1.1.450c
Quadrigas si nunc inscendas Iovis
1.1.451
atque hinc fugias, ita vix poteris effugere infortunium.
1.1.452
Nonne erae meae nuntiare quod erus meus iussit licet?
1.1.453
Tuae si quid vis nuntiare: hanc nostram adire non sinam.
1.1.454
nam si me inritassis, hodie lumbifragium hinc auferes.
1.1.455
Abeo potius. di immortales, obsecro vostram fidem,
1.1.456
ubi ego perii? ubi immutatus sum? ubi ego formam perdidi?
1.1.457
an egomet me illic reliqui, si forte oblitus fui?
1.1.458
nám hic quidem omnem imaginem meam, quae antehac fuerat, possidet.
1.1.459
vivo fit quod numquam quisquam mortuo faciet mihi.
1.1.460
ibo ad portum atque haec uti sunt facta ero dicam meo;
1.1.461
nisi etiam is quoque me ignorabit: quod ille faxit Iuppiter,
1.1.462
ut ego hodie ráso capite calvos capiam pilleum.—
1.2.463
Bene próspere hoc hodie operis processit mihi:
1.2.464
amovi a foribus maximam molestiam,
1.2.465
patri ut liceret tuto illam amplexarier.
1.2.466
iam ille illuc ad erum cum Amphitruonem advenerit,
1.2.467
narrabit servom hinc sese a foribus Sosiam
1.2.468
amovisse; ille adeo illum mentiri sibi
1.2.469
credet, neque credet huc profectum, ut iusserat.
1.2.470
erroris ambo ego illos et dementiae
1.2.471
complebo atque omnem Amphitruonis familiam,
1.2.472
adeo usque, satietatem dum capiet pater
1.2.473
illius quám amat. igitur demum omnes scient
1.2.474
quae facta. denique Alcumenam Iuppiter
1.2.475
redigét antiquam coniugi in concordiam.
1.2.476
nam Amphitruo actutum uxori turbas conciet
1.2.477
atque insimulabit eam probri; tum meus pater
1.2.478
eam séditionem illi in tranquillum conferet.
1.2.479
nunc de Alcumena dudum quod dixi minus,
1.2.480
hodie illa pariet filios geminos duos
1.2.481
alter decumo post mense nascetur puer
1.2.482
quam seminatust, alter mense septumo;
1.2.483
eorum Ámphitruonis alter est, alter Iovis:
1.2.484
verum minori puero maior est pater,
1.2.485
minor maiori. iamne hoc scitis quid siet?
1.2.486
sed Alcumenae huius honoris gratia
1.2.487
pater curavit uno ut fetu fieret,
1.2.488
uno ut labore absolvat aerumnas duas.
1.2.489
et ne in suspicione ponatur stupri
1.2.490
et clandestina ut celetur consuetio.
1.2.491
quamquam, ut iam dudum dixi, resciscet tamen
1.2.492
Amphitruo rem omnem. quid igitur? nemo id probro
1.2.493
profecto ducet Alcumenae; nam deum
1.2.494
non par videtur facere, delictum suom
1.2.495
suamque ut culpam expetere in mortalem ut sinat.
1.2.496
orationem comprimam: crepuit foris.
1.2.497
Amphitruo subditivos eccum exit foras
1.2.498
cum Alcumena uxore usuraria.
1.3.499
Béne vale, Alcumena, cura rem communem, quod facis;
1.3.500
atque inperce quaeso: menses iam tibi esse actos vides.
1.3.501
mihi necesse est ire hinc; verum quod erit natum tollito.
1.3.502
Quid istuc est, mi vir, negoti, quod tu tam subito domo
1.3.503
abeas?
1.3.503b
Edepol haud quod tui me neque domi distaedeat;
1.3.504
sed ubi summus imperator non adest ad exercitum,
1.3.505
citius quod non facto est usus fit quam quod facto est opus.
1.3.506
Nimis hic scitust sycophanta, qui quidem meus sit pater.
1.3.507
observatote eum, quam blande mulieri palpabitur.
1.3.508
Ecastor te experior quanti facias uxorem tuam.
1.3.509
Satin habes, si feminarum nulla est quam aeque diligam?
1.3.510
Edepol ne illa si istis rebus te sciat operam dare,
1.3.511
ego faxim ted Amphitruonem esse malis, quam Iovem.
1.3.512
Experiri istuc mavellem me quam mi memorarier.
1.3.513
prius abis quam lectus ubi cubuisti concaluit locus.
1.3.514
heri venisti media nocte, nunc abis. hocin placet?
1.3.515
Accedam atque hanc appellabo et subparasitabor patri.
1.3.516
numquam edepol quemquam mortalem credo ego uxorem suam
1.3.517
sic ecflictim amare, proinde ut hic te ecflictim deperit.
1.3.518
Carnufex, non ego te novi? ábin e conspectu meo?
1.3.519
quid tibi hanc curatio est rem, verbero, aut muttitio?
1.3.520
quoii ego iam hoc scipione—
1.3.520b
Ah noli.
1.3.520c
Muttito modo.
1.3.521
Nequiter paene expedivit prima parasitatio.
1.3.522
Verum quod tu dicis, mea uxor, non te mi irasci decet.
1.3.523
clanculum abii a legione: operam hanc subrupui tibi,
1.3.524
ex me primo ut prima scires, rem ut gessissem publicam.
1.3.525
ea tibi omnia enarravi. nisi te amarem plurimum,
1.3.526
non facerem.
1.3.526b
Facitne ut dixi? timidam palpo percutit.
1.3.527
Nunc, ne legio persentiscat, clam illuc redeundum est mihi,
1.3.528
ne me uxorem praevertisse dicant prae re publica.
1.3.529
Lacrimantem ex abitu concinnas tu tuam uxorem.
1.3.529b
Tace,
1.3.530
ne corrumpe oculos, redibo actutum.
1.3.530b
Id actutum diu est.
1.3.531
Non ego te hic lubens relinquo neque abeo abs te.
1.3.531b
Sentio,
1.3.532
nam qua nocte ad me venisti, eadem abis.
1.3.532b
Cur me tenes?
1.3.533
tempus est: exire ex urbe prius quam lucescat volo.
1.3.534
nunc tibi hanc pateram, quae dono mi illi ob virtutem data est,
1.3.535
Pterela rex qui potitavit, quem ego mea occidi manu,
1.3.536
Alcumena, tibi condono.

Perseus Latin. CTS URN phi0119.phi001.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.