Amphitruo

Perseus Latin · Perseus Latin · 1,409 sections

1.3.536b
Facis ut alias res soles.
1.3.537
ecastor condignum donum, qualest qui donum dedit.
1.3.538
Immo sic: condignum donum, qualest cui dono datumst.
1.3.539
Pergin autem? nonne ego possum, furcifer, te perdere?
1.3.540
Noli amabo, Amphitruo, irasci Sosiae causa mea.
1.3.541
Faciam ita ut vis.
1.3.541b
Ex amore hic admodum quam saevos est.
1.3.542
Numquid vis?
1.3.542b
Vt quom absim mé ames, me tuam te absente tamen.
1.3.543
Eamus, Amphitruo. lucescit hoc iam.
1.3.543b
Abi prae, Sosia,
1.3.544
iam ego sequar. numquid vis?
1.3.544b
Etiam: ut actutum advenias.
1.3.544c
Licet,
1.3.545
prius tuá opinione híc adero: bonum ánimum habe.—
1.3.546
nunc te, nox, quae me mansisti, mitto uti cedas die,
1.3.547
ut mortalis inlucescat luce clara et candida.
1.3.548
atque quanto, nox, fuisti longior hac proxuma,
1.3.549
tanto brevior dies ut fiat faciam, ut aeque disparet.
1.3.550
sed dies e nocte accedat. ibo et Mercurium sequar.—
2.1.551
Age í tu secúndum.
2.1.551b
Sequór, subsequór te.
2.1.552
Scelestissimum te arbitror.
2.1.552b
Nam quam ob rem?
2.1.553
Quia id quod neque est neque fuit neque futurum est
2.1.554
mihi praedicas.
2.1.554b
Eccere, iam tuatim
2.1.555
facis tu, ut tuis nulla apud te fides sit.
2.1.556
Quid est? quo modo? iam quidem hercle ego tibi istam
2.1.557
scelestam, scelus, linguam abscidam.
2.1.557b
Tuos sum,
2.1.558
proinde ut commodumst et lubet quidque facias;
2.1.559
tamen quin loquar haec uti facta sunt hic,
2.1.560
numquam ullo modo me potes deterrere.
2.1.561
Scelestissime, audes mihi praedicare id,
2.1.562
domi te esse nunc, qui hic ades?
2.1.562b
Vera dico.
2.1.563
Malum quod tibi di dabunt, atque ego hodie
2.1.564
dabo.
2.1.564b
Istuc tibist in manu, nam tuos sum.
2.1.565
Tun me, verbero, audes erum ludificari?
2.1.566
tune id dicere audes, quod nemo umquam homo antehac
2.1.567
vidit nec potest fieri, tempore uno
2.1.568
homo idem duobus locis ut simul sit?
2.1.569
Profecto ut loquor res ita est.
2.1.569b
Iuppiter te
2.1.570
perdat.
2.1.570b
Quid mali súm, ere, tua ex re promeritus?
2.1.571
Rogasne, improbe, etiam, qui ludos facis me?
2.1.572
Meritó maledicás mihi, si id ita factum est.†
2.1.573
verum haud mentior, resque uti facta dico.
2.1.574
Homo hic ébrius est, ut opínor.
2.1.575
Útinam ita essem.
2.1.575b
Optás quae facta.
2.1.575c
Égone?
2.1.575d
Tu istic. úbi bibisti?
2.1.576
Nusquam equidem bibi.
2.1.576b
Quid hoc sithominis?
2.1.576c
equidem decies dixi:
2.1.577
domi ego sum, inquam, écquid audis? et apud te adsum Sosia idem.
2.1.578
satin hoc plane, satin diserte, ere, nunc videor
2.1.579
tibi locutus esse?
2.1.579b
Vah,
2.1.580
ápage te a me.
2.1.580b
Quíd est negoti?
2.1.581
Péstis te tenet.
2.1.581b
Nám quor istuc
2.1.582
dicis? equidem valeo et salvos
2.1.583
sum recte, Amphitruo.
2.1.583b
At te ego faciam
2.1.584
hodie proinde ac meritus es,
2.1.584a
ut minus valeas et miser sis,
2.1.584b
salvos domum si rediero: iam
2.1.585a
sequere sis, erum qui ludificas
2.1.585b
dictis delirantibus,
2.1.586
qui quoniam erus quod imperavit neglexisti persequi,
2.1.587
nunc venis etiam ultro inrisum dominum: quae neque fieri
2.1.588
possunt neque fando umquam accepit quisquam profers, carnifex;
2.1.589
quoius ego hodie in tergum faxo ista expetant mendacia.
2.1.590
Amphitruo, miserrima istaec miseria est servo bono,
2.1.591
apud erum qui vera loquitur, si id vi verum vincitur.
2.1.592
Quo id, malum, pacto potest nam (mecum argumentis puta)
2.1.593
fieri, nunc uti tu et hic sis et domi? id dici volo.
2.1.594
Sum profecto et hic et illíc. hoc cuivis mirari licet,
2.1.595
neque tibi istuc mirum mágis videtur quam mihi.
2.1.596
Quo modo?
2.1.596b
Nihilo, inquam, mirum magis tibi istuc quam mihi;
2.1.597
neque, ita me di ament, credebam primo mihimet Sosiae,
2.1.598
donec Sosia illic egomet fecit sibi uti crederem.
2.1.599
ordine omne, uti quicque actum est, dúm apud hostis sedimus,
2.1.600
edissertavit. tum formam una abstulit cum nomine.
2.1.601
neque lac lactis magis est simile quam ille ego similest mei.
2.1.602
nam ut dudum ante lucem a portu me praemisisti domum—
2.1.603
Quid igitur?
2.1.603b
Prius multo ante aedis stabam quam illo adveneram.
2.1.604
Quas, malum, nugás? satin tu sanus es?
2.1.604b
Sic sum ut vides.
2.1.605
Huic homini nescio quid est mali mala obiectum manu,
2.1.606
postquam a me abiit.
2.1.606b
Fateor, nam sum obtusus pugnis pessume.

Perseus Latin. CTS URN phi0119.phi001.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.