Pseudo Theophilus

Coptic literature (Coptic SCRIPTORIUM) · 444 sections

repentence.continence:92
ⲛⲧⲉⲩⲛⲟⲩ ⲉⲧⲙⲙⲁⲩ ϣⲁⲣⲉⲛⲁⲅⲅⲉⲗⲟⲥ ⲛⲧⲟⲣⲅⲏ ⲉⲧϩⲓϫⲛⲛⲕⲟⲗⲁⲥⲓⲥ ϣⲁⲩⲥⲱⲛϩ ⲛⲛⲉⲯⲩⲭⲏ ⲛⲛⲣⲉϥⲣⲛⲟⲃⲉ ⲛⲥⲉⲛⲟϫⲟⲩ ⲉⲛⲧⲁⲣⲧⲁⲣⲟⲥ ⲛⲁⲙⲛⲧⲉ · ⲛⲥⲉⲧⲁϣⲟ ⲛⲛⲉⲩⲃⲁⲥⲁⲛⲟⲥ ⲉⲡⲉϩⲟⲩⲟ ·
repentence.continence:93
ⲁⲩⲱ ⲉⲛϣⲁⲛϩⲓⲥⲉ ⲉⲛⲣⲓⲙⲉ ⲛⲓⲙ ⲡⲉⲧⲛⲁⲥⲱⲧⲙ ⲉⲣⲟⲛ ·
repentence.continence:94
ⲏ ⲛⲓⲙ ⲡⲉⲧⲛⲁϣⲁⲛⲁϩⲧⲏϥ ϩⲁⲣⲟⲛ ⲙⲡⲙⲁ ⲉⲧⲙⲙⲁⲩ ·
repentence.continence:95
ⲏ ⲛⲓⲙ ⲡⲉⲧⲛⲁϫⲓ ⲛⲛⲉⲛⲣⲙⲉⲓⲟⲟⲩⲉ ⲛⲧⲟⲟⲧⲛ ⲛϥϫⲓⲧⲟⲩ ⲉⲛⲧⲟⲡⲟⲥ ⲛⲧⲙⲛⲧϣⲁⲛϩⲧⲏϥ ·
repentence.continence:96
ⲏ ⲛⲓⲙ ϩⲛⲛⲉⲧⲟⲩⲁⲁⲃ ⲡⲉⲧⲛⲁⲡⲁϩⲧϥ ⲙⲡⲛⲟⲩⲧⲉ ⲉϫⲛⲧⲉⲛⲑⲗⲓⲯⲓⲥ ⲙⲛⲧⲉⲛⲁⲛⲁⲅⲕⲏ ⲉⲧⲛⲛϩⲏⲧⲥ ·
repentence.continence:97
ⲉϣⲱⲡⲉ ⲉⲛϣⲁⲛⲙⲟⲩ ⲉⲙⲡⲛⲙⲉⲧⲁⲛⲟⲉⲓ ⲉϫⲛⲛⲉⲛⲛⲟⲃⲉ ·
repentence.continence:98
ⲛⲉⲧⲉⲙⲡⲛⲣϩⲱⲃ ⲇⲉ ⲉⲣⲟⲟⲩ ⲙⲡⲉⲓⲙⲁ ⲉⲛϣⲟⲟⲡ ϩⲙⲡⲥⲱⲙⲁ · ⲉⲛⲁϩⲉ ⲉⲣⲟⲟⲩ ⲧⲱⲛ ⲉⲧⲣⲉⲩⲃⲟⲏⲑⲉⲓ ⲉⲣⲟⲛ ϩⲙⲡⲙⲁ ⲉⲧⲙⲙⲁⲩ ·
repentence.continence:99
ⲙⲛϩⲁⲧ ⲟⲩⲇⲉ ⲙⲛⲛⲟⲩⲃ ⲙⲛⲙⲁ ⲛⲉⲗⲟⲟⲗⲉ
repentence.continence:100
ⲟⲩⲇⲉ ϭⲉ ⲕⲧⲏⲥⲓⲥ ⲛⲁϣⲃⲟⲏⲑⲉⲓ ⲉⲣⲟⲛ ⲙⲡⲙⲁ ⲉⲧⲙⲙⲁⲩ ·
repentence.continence:101
ⲟⲩⲇⲉ ⲙⲛⲟⲩⲉⲓⲱⲧ ⲛⲁϣⲓⲛⲉ ⲛⲥⲁϣⲏⲣⲉ ⲙⲡⲙⲁ ⲉⲧⲙⲙⲁⲩ ·
repentence.continence:102
ⲟⲩⲇⲉ ⲙⲛⲙⲁⲁⲩ ⲛⲁϣⲓⲛⲉ ⲛⲥⲁϣⲉⲉⲣⲉ ⲟⲩⲇⲉ ⲙⲛϣⲏⲣⲉ ⲛⲁϣⲃⲟⲏⲑⲉⲓ ⲉⲛⲉϥⲉⲓⲟⲧⲉ ·
repentence.continence:103
ⲟⲩⲇⲉ ⲙⲛⲟⲩⲥⲟⲛ ⲛⲁϣⲃⲟⲏⲑⲉⲓ ⲉⲡⲉϥⲥⲟⲛ ·
repentence.continence:104
ⲙⲛⲗⲁⲁⲩ ϩⲛⲛⲁⲓ ⲛⲁϣⲱⲡⲉ ⲛⲥⲱⲧⲉ ⲛⲧⲉⲛⲯⲩⲭⲏ ⲛⲉⲃⲓⲏⲛ ·
repentence.continence:105
ⲁⲗⲗⲁ ⲉⲣⲉⲡⲟⲩⲁ ⲡⲟⲩⲁ ⲛⲁϥⲓ ϩⲁⲧⲉϥⲉⲧⲡⲱ · ϩⲛⲛⲕⲟⲗⲁⲥⲓⲥ ⲉⲧϥ ⲛϩⲏⲧⲟⲩ ·
repentence.continence:106
ⲁⲩⲱ ⲟⲛ ⲁϥⲟⲩⲱ ⲉϥϫⲱ ⲙⲙⲟⲥ ⲛϭⲓⲡⲥⲱⲧⲏⲣ ϫⲉⲡⲉⲧⲙⲉⲛⲉⲓⲱⲧ ϩⲓⲙⲁⲁⲩ ⲛϩⲟⲩⲉ ⲉⲣⲟⲓ · ϥⲙⲡϣⲁ ⲙⲙⲟⲓ ⲁⲛ ·
repentence.continence:107
ⲁⲩⲱ ⲡⲉⲧⲛⲁⲕⲁϣⲏⲣⲉ ⲁⲛ ⲛⲥⲱϥ ϩⲓϣⲉⲉⲣⲉ ⲛϥϥⲓ ⲙⲡⲉϥⲥⲧⲁⲩⲣⲟⲥ ⲛϥⲟⲩⲁϩϥ ⲛⲥⲱⲓ ϥⲙⲡϣⲁ ⲙⲙⲟⲓ ⲁⲛ ·
repentence.continence:108
ⲁⲩⲱ ϥⲛⲁⲕⲗⲏⲣⲟⲛⲟⲙⲉⲓ ⲁⲛ ⲛⲧⲙⲛⲧⲣⲣⲟ ⲛⲙⲡⲏⲩⲉ :
repentence.continence:109
ⲱ ϫⲉⲟⲩϩⲟⲧⲉ ⲛⲁϣ ⲛϭⲟⲧ ⲡⲉ ϩⲉ ⲉϩⲣⲁⲓ ⲉⲛϭⲓϫ ⲙⲡⲛⲟⲩⲧⲉ ⲉⲧⲟⲛϩ · ⲙⲡⲛⲁⲩ ⲙⲡⲉⲛϭⲙⲡϣⲓⲛⲉ ·
repentence.continence:110
ϥϩⲉⲣⲙⲏⲛⲉⲩⲉ ⲛⲁⲛ ⲙⲡϣⲁϫⲉ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ · ⲉϥϫⲱ ⲙⲙⲟⲥ ϫⲉⲡⲧⲁⲗⲁⲓⲡⲱⲣⲟⲥ ⲁⲛⲟⲕ ⲡⲣⲱⲙⲉ ⲛⲓⲙ ⲡⲉⲧⲛⲁϣⲛⲁϩⲙⲉⲧ ⲉⲃⲟⲗ ϩⲙⲡⲥⲱⲙⲁ ⲙⲡⲓⲙⲟⲩ ·
repentence.continence:111
ⲱ ⲧⲉⲓⲛⲟϭ ⲛϩⲟⲧⲉ ⲙⲛⲧⲉⲓⲛⲟϭ ⲛⲑⲗⲓⲯⲓⲥ ⲉⲧⲛⲁϣⲱⲡⲉ ⲙⲯⲩⲭⲏ ⲛⲓⲙ ⲙⲡⲛⲁⲩ ⲉⲧⲟⲩⲛⲁⲉⲓⲛⲉ ⲙⲙⲟⲟⲩ ⲉϩⲣⲁⲓ ϩⲛⲛⲉⲛⲙⲉⲗⲟⲥ ·
repentence.continence:112
ⲙⲡⲛⲁⲩ ⲉⲣⲉⲡⲛⲟϭ ⲛϩⲗⲟⲥⲧⲛ ⲛⲕⲁⲕⲉ ⲛⲁϩⲱⲃⲥ ⲉⲃⲟⲗ ⲉϫⲱⲛ · ⲉϥⲟ ⲛⲕⲁⲕⲉ ϩⲓⲣⲛⲛⲉⲛⲃⲁⲗ · ⲉϥⲡⲟⲣϣ ⲉⲃⲟⲗ ⲉϫⲙⲡⲟⲩⲟⲉⲓⲛ ⲧⲏⲣϥ ·
repentence.continence:113
ⲙⲡⲉⲛϩⲏⲧ ⲡⲉϣⲧⲟⲣⲧⲣ ⲙⲙⲁⲧⲉ ⲛⲛⲉⲛⲧⲁⲩⲉⲓ ⲛⲥⲱⲛ ⲙⲛⲧϩⲟⲧⲉ ⲛⲧⲉⲩⲙⲟⲣⲫⲏ ·
repentence.continence:114
ⲥⲉⲣⲱϣⲉ ⲉⲣⲟⲛ · ⲙⲛⲡⲉⲕⲣⲟⲙⲣⲙ ⲛⲧⲉⲩϩⲓⲕⲱⲛ ·
repentence.continence:115
ⲁⲩⲱ ⲡⲉϩⲣⲟϫⲣⲉϫ ⲛⲛⲉⲩⲟⲃϩⲉ · ⲙⲛⲡϭⲱⲛⲧ ⲛⲛⲉⲩⲃⲁⲗ · ⲙⲛⲡⲛⲟⲉⲓⲛ ⲛⲛⲉⲩⲙⲉⲗⲟⲥ ·
repentence.continence:116
ⲙⲛⲧϭⲓⲛⲙⲟⲟϣⲉ ⲛⲛⲉⲩⲟⲩⲉⲣⲏⲧⲉ · ⲙⲛⲡϩⲙϩⲙ ⲛⲛⲉⲩⲥⲡⲟⲧⲟⲩ ·
repentence.continence:117
ⲙⲛⲧϩⲉ ⲧⲏⲣⲥ ⲉⲧⲟⲩⲟ ⲛⲟⲩⲁϩⲓⲏⲧ ⲉϩⲟⲩⲛ ⲉⲣⲟⲛ · ⲉϩⲛⲁⲩ ⲉⲟⲙⲕⲛ ·
repentence.continence:118
ⲉⲛϣⲁⲛⲛⲁⲩ ⲉⲛⲁⲓ ⲧⲏⲣⲟⲩ ⲙⲡⲉⲛⲙⲧⲟ ⲉⲃⲟⲗ · ⲟⲩ ⲡⲉⲧⲛⲛⲁϫⲟⲟϥ ⲏ ⲟⲩ ⲡⲉⲧⲛⲛⲁⲧⲁⲩⲟϥ ·
repentence.continence:119
ⲏ ⲉⲣⲉⲧⲉⲛⲧⲁⲡⲣⲟ ⲛⲁϣⲁϫⲉ ⲛⲁϣ ⲛϩⲉ · ⲉⲛⲁϣⲡⲱⲧ ⲉⲧⲱⲛ ·
repentence.continence:120
ⲏ ⲉⲛⲁϩⲟⲡⲛ ⲛⲁϣ ⲙⲙⲁ · ⲙⲛⲧϩⲉ ⲅⲁⲣ ⲛⲣⲃⲟⲗ ⲉⲛⲉⲩϭⲓϫ ·
repentence.continence:121
ⲟⲩⲇⲉ ⲙⲛⲧϩⲉ ⲙⲡⲱⲧ ⲥⲁⲗⲁⲁⲩ · ⲛⲥⲁⲛⲁϩⲣⲙⲡϩⲟ ⲙⲡⲛⲟⲩⲧⲉ ·
repentence.continence:122
ϥⲥⲏϩ ⲅⲁⲣ ϫⲉⲉⲓⲛⲁⲡⲱⲧ ⲉⲧⲱⲛ ⲥⲁⲃⲟⲗ ⲙⲡⲉⲕϩⲟ ·
repentence.continence:123
ⲏ ⲉⲓⲛⲁⲡⲱⲧ ⲉⲧⲱⲛ ⲥⲁⲃⲟⲗ ⲙⲡⲉⲕⲡⲛⲉⲩⲙⲁ ·
repentence.continence:124
ⲙⲁⲣⲛⲉⲓⲙⲉ ϭⲉ ⲟⲩⲛ ϫⲉⲁϣ ⲛⲉ ⲛⲡⲁϩⲣⲉ ⲉⲧⲛⲁⲑⲉⲣⲁⲡⲉⲩⲉ ⲙⲡⲉⲓⲛⲟϭ ⲛϣⲱⲛⲉ ·
repentence.continence:125
ⲏ ⲟⲩ ⲡⲉⲧⲛⲁϩⲱⲃⲥ ⲉⲃⲟⲗ ⲉϫⲛⲧⲉⲓⲛⲟϭ ⲙⲡⲗⲏⲅⲏ ⲛⲧⲉⲓⲙⲓⲛⲉ ·
repentence.continence:126
ⲙⲛϩⲁⲧ ⲟⲩⲇⲉ ⲙⲛⲛⲟⲩⲃ · ⲙⲛⲭⲣⲏⲙⲁ ⲙⲛⲙⲛⲧⲣⲙⲙⲁⲟ ·
repentence.continence:127
ⲙⲛⲗⲁⲁⲩ ⲅⲁⲣ ϩⲛⲛⲁⲓ ⲛⲁϣⲣⲡⲁϩⲣⲉ ⲉⲣⲟⲛ ·
repentence.continence:128
ⲟⲩⲇⲉ ⲡⲕⲟⲥⲙⲟⲥ ⲧⲏⲣϥ ⲙⲛⲛⲉⲧⲛϩⲏⲧϥ ⲛⲁϣⲃⲟⲏⲑⲉⲓ ⲉⲣⲟⲛ ⲁⲛ ·
repentence.continence:129
ⲧⲛⲛⲁϩⲉ ⲅⲁⲣ ⲁⲛ ⲉⲡⲁϩⲣⲉ ⲉⲑⲉⲣⲁⲡⲉⲩⲉ ⲙⲙⲟⲛ ⲉⲓⲙⲏⲧⲓ ⲉⲡⲉϣⲗⲏⲗ ⲙⲛⲧⲛⲏⲥⲧⲉⲓⲁ ⲙⲛⲡⲧⲃⲃⲟ ·
repentence.continence:130
ⲛⲁⲓ ⲅⲁⲣ ⲛⲧⲉⲓⲙⲓⲛⲉ ⲛⲉⲧⲉⲩⲛϣϭⲟⲙ ⲙⲙⲟⲟⲩ ⲉϩⲱⲃⲥ ⲉⲃⲟⲗ ⲉϫⲱⲛ ⲙⲡⲛⲁⲩ ⲛⲧⲉⲛⲁⲛⲁⲅⲕⲏ ·
repentence.continence:131
ⲙⲁⲣⲛⲣⲡⲙⲉⲉⲩⲉ ⲙⲡϫⲟⲉⲓⲥ ⲙⲡⲧⲏⲣϥ ⲓⲏⲥⲟⲩⲥ ⲡϣⲏⲣⲉ ⲙⲡⲛⲟⲩⲧⲉ ⲉⲧⲟⲛϩ ·
repentence.continence:132
ⲡⲉⲛⲧⲁϥⲡⲗⲁⲥⲥⲉ ⲛⲛⲓϥⲉ ⲛⲓⲙ ·
repentence.continence:133
ⲁⲩⲱ ⲙⲡⲏⲩⲉ ⲙⲛⲡⲕⲁϩ · ⲧϩⲁⲗⲁⲥⲥⲁ ⲙⲛⲛⲓⲉⲣⲱⲟⲩ ·
repentence.continence:134
ⲡϫⲟⲉⲓⲥ ⲛⲛⲉⲧϩⲛⲙⲡⲏⲩⲉ ⲙⲛⲛⲉⲧϩⲓϫⲙⲡⲕⲁϩ ⲡⲉⲧⲉⲧⲱϥ ⲧⲉ ⲧⲉⲝⲟⲩⲥⲓⲁ ⲙⲁⲩⲁⲁϥ · ⲉϥϣⲟⲟⲡ ϩⲙⲡⲉⲓⲱⲧ · ⲉⲣⲉⲡⲉⲓⲱⲧ ϣⲟⲟⲡ ⲛϩⲏⲧϥ ·
repentence.continence:135
ⲉϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉⲡⲁⲉⲓⲱⲧ ⲙⲁⲧⲟⲩϫⲟⲓ ⲉⲃⲟⲗ ϩⲛⲧⲉⲓⲟⲩⲛⲟⲩ ·
repentence.continence:136
ⲁⲩⲱ ⲟⲛ ϫⲉⲡⲁⲉⲓⲱⲧ ⲉϣϫⲉ ⲟⲩⲛϣϫⲟⲙ ⲙⲁⲣⲉⲡⲉⲓⲁⲡⲟⲧ ⲥⲁⲁⲧ ·
repentence.continence:137
ⲡⲗⲏⲛ ⲙⲁⲣⲉⲡⲉⲕⲟⲩⲱϣ ϣⲱⲡⲉ ⲡⲱⲓ ⲁⲛ ·
repentence.continence:138
ⲉⲛⲉϥϣⲗⲏⲗ ⲇⲉ ϣⲁⲁϣⲟⲙⲛⲧ ⲛⲥⲟⲡ ⲉϥϫⲱ ⲙⲙⲟⲥ ϫⲉⲉϣϫⲉ ⲡⲉⲕⲟⲩⲱϣ ⲡⲉ ⲡⲁⲓ ⲙⲁⲣⲉϥϣⲱⲡⲉ ·
repentence.continence:139
ϭⲱϣⲧ ⲛⲧⲉⲧⲛⲛⲁⲩ ⲉⲡⲉⲓϣⲁϫⲉ ⲛϩⲟⲧⲉ ⲛⲧⲁⲡϫⲟⲉⲓⲥ ⲙⲡⲧⲏⲣϥ ϫⲟⲟϥ ⲉⲛⲉϥⲣϩⲟⲧⲉ ⲁⲛ ϩⲏⲧϥ ⲙⲡⲙⲟⲩ · ⲛⲧⲟϥ ⲅⲁⲣ ⲡⲉⲧⲟ ⲛⲉⲝⲟⲩⲥⲓⲁ ⲙⲡⲙⲟⲩ ·
repentence.continence:140
ⲁⲩⲱ ⲛⲧⲟϥ ⲡⲉⲧⲟ ⲛϫⲟⲉⲓⲥ ⲉⲣⲟϥ ·
repentence.continence:141
ⲁⲗⲗⲁ ⲉⲃⲟⲗ ϫⲉⲟⲩⲛⲟⲩⲧⲉ ⲉϥϣⲟⲟⲡ ϩⲛⲟⲩⲉⲟⲟⲩ ⲉϥϫⲟⲥⲉ · ⲉⲁϥϣⲱⲡⲉ ϩⲛⲟⲩⲥⲙⲟⲧ ⲛⲑⲃⲃⲓⲟ ⲛⲣⲱⲙⲉ · ⲉⲧⲣⲉϥϫⲓϯⲡⲉ ⲙⲡⲙⲟⲩ ϩⲁⲡⲧⲏⲣϥ ·
repentence.continence:142
ⲛⲉⲥⲡⲣⲉⲡⲉⲓ ⲅⲁⲣ ⲛⲁϥ ⲡⲉ ·
repentence.continence:143
ⲁⲩⲱ ⲥⲉⲛⲁⲡⲁⲣⲁⲇⲓⲇⲟⲩ ⲙⲙⲟϥ ⲉⲛϭⲓϫ ⲛⲛⲣⲉϥⲣⲛⲟⲃⲉ ·
repentence.continence:144
ⲉⲧⲃⲉⲡⲁⲓ ⲁϥⲧⲁⲙⲉⲟⲩⲟⲛ ⲛⲓⲙ ϫⲉⲟⲩⲛⲟϭ ⲧⲉ ⲧⲁⲛⲁⲅⲕⲏ ⲙⲡⲙⲟⲩ ⲉⲧⲛⲁⲉⲓ ⲉϩⲣⲁⲓ ⲉϫⲙⲯⲩⲭⲏ ⲛⲓⲙ ⲛⲣⲱⲙⲉ ⲙⲡⲛⲁⲩ ⲙⲡⲉⲩϭⲙⲡϣⲓⲛⲉ ·
repentence.continence:145
ⲡⲉϩⲟⲟⲩ ⲅⲁⲣ ⲉⲧⲙⲙⲁⲩ ⲟⲩϩⲟⲟⲩ ⲡⲉ ⲛⲑⲗⲓⲯⲓⲥ ϩⲓⲁⲛⲁⲅⲕⲏ ϩⲓⲁϣⲁϩⲟⲙ ϣⲁⲛⲧⲛⲡⲁⲣⲁⲅⲉ ⲙⲡⲉⲓⲛⲟϭ ⲛⲕⲓⲛⲇⲩⲛⲟⲥ ⲉⲧⲙⲉϩ ⲛϩⲟⲧⲉ ·
repentence.continence:146
ⲉⲛⲉⲛⲧⲁⲛⲕⲁⲙⲉⲧⲁⲛⲟⲓⲁ ⲅⲁⲣ ⲛⲁⲛ ⲡⲉ ⲛϣⲃⲏⲣⲣϩⲱⲃ ϣⲁⲃⲟⲗ ⲛⲉⲛⲁϩⲉ ⲉⲣⲟⲥ ⲡⲉ ⲛⲧⲉⲩⲛⲟⲩ ⲛⲧⲛϫⲟⲟⲩⲥ ⲉⲣⲁⲧϥ ⲙⲡⲛⲟⲩⲧⲉ ⲡⲉⲓⲱⲧ ⲛⲧⲙⲛⲧⲁⲅⲁⲑⲟⲥ ⲛϥⲛⲁϩⲙⲛ ϩⲛⲛⲉⲓⲁⲛⲁⲅⲕⲏ ⲧⲏⲣⲟⲩ ⲙⲛⲛⲉⲓⲑⲗⲓⲯⲓⲥ ⲉⲧϩⲓϫⲱⲛ ·
repentence.continence:147
ⲛⲥϥⲓⲧⲛ ⲛⲧⲟⲟⲧⲟⲩ ⲛⲉⲓⲁⲅⲅⲉⲗⲟⲥ ⲛⲟⲩⲁϩⲓⲏⲧ ⲛⲁⲧⲛⲁ ·
repentence.continence:148
ⲉⲛⲉⲛⲧⲁⲛⲕⲁⲡⲉⲑⲃⲃⲓⲟ ⲛⲁⲛ ⲡⲉ ⲛϣⲃⲣⲣϩⲱⲃ ·
repentence.continence:149
ⲉⲛⲉϥⲛⲁⲗⲟ ⲁⲛ ⲡⲉ ⲉϥⲡⲁϩⲧ ⲙⲡⲛⲟⲩⲧⲉ ϣⲁⲛⲧϥⲧⲛⲛⲟⲟⲩ ⲛϥϫⲓⲧⲛ ϩⲛⲟⲩⲣⲁϣⲉ ⲉⲡⲧⲟⲡ ⲛⲛⲉⲧⲟⲩⲁⲁⲃ ·
repentence.continence:150
ϩⲙⲡⲕⲁϩ ⲛⲛⲉⲧⲟⲛϩ · ⲉⲛⲉⲛⲧⲁⲛⲕⲁⲧⲁⲅⲁⲡⲏ ⲛⲁⲛ ⲡⲉ ⲛϣⲃⲣⲣϩⲱⲃ ·
repentence.continence:151
ⲛⲉⲩⲛⲁⲗⲟ ⲁⲛ ⲡⲉ ⲉⲩⲡⲁⲣⲁⲕⲁⲗⲉⲓ ⲙⲡⲛⲁϩⲏⲧ ⲡⲉⲓⲱⲧ ⲛⲧⲙⲛⲧϣⲁⲛϩⲧⲏϥ ϣⲁⲛⲧϥ ϫⲟⲟⲩ ⲛⲥⲱⲛ ⲛⲥⲉϫⲓⲧⲛ ϩⲛⲟⲩⲣⲁϣⲉ ⲉϩⲟⲩⲛ ⲉⲛⲧⲟⲡⲟⲥ ⲉⲧⲧⲁⲓⲏⲩ ⲛⲧⲉϩⲓⲉⲣⲟⲩⲥⲁⲗⲏⲙ ⲛⲧⲡⲉ · ⲛⲥⲉⲧⲁⲁⲛ ⲛⲇⲱⲣⲟⲛ ⲙⲡⲙⲉⲣⲓⲧ ·
repentence.continence:152
ⲉϣⲱⲡⲉ ⲇⲉ ⲙⲛⲧⲁⲛ ⲗⲁⲁⲩ ϩⲛⲛⲁⲓ ⲉⲩϣⲟⲟⲡ ⲛⲁⲛ ⲛϣⲃⲣⲣϩⲱⲃ ·
repentence.continence:153
ⲉⲓⲙⲉ ϫⲉⲉⲛϣⲁⲛϩⲓⲥⲉ ⲉⲛⲱϣ ⲉⲃⲟⲗ ϩⲛⲛⲕⲟⲗⲁⲥⲓⲥ ⲉⲛⲣⲓⲙⲉ ϩⲛⲟⲩⲙⲛⲧⲉⲃⲓⲏⲛ ⲧⲙ ⲧⲉ ⲗⲁⲁⲩ ⲛⲛⲁ ϣⲱⲡⲉ ⲛⲁⲛ ·
repentence.continence:154
ⲁⲗⲗⲁ ⲉⲣⲉⲛⲁⲅⲅⲉⲗⲟⲥ ⲛⲣⲉϥⲧⲓⲙⲱⲣⲓ ⲛⲁϭⲱⲛⲧ ⲉⲣⲟⲛ ⲡⲉ ⲛⲥⲉⲛⲉϭⲛⲟⲩϭⲛ ϩⲛⲟⲩⲙⲛⲧⲁⲧⲛⲁ ⲛⲥⲉⲧⲓⲙⲱⲣⲉⲓ ⲙⲙⲟⲛ ⲉⲡⲉϩⲟⲩⲟ ·
repentence.continence:155
ⲉⲡⲉⲓⲇⲏ ⲙⲛⲧⲁⲩ ⲙⲙⲁⲩ ⲛⲧⲙⲛⲧⲛⲁⲏⲧ ⲉⲧⲣⲉⲩϣⲁⲛⲁϩⲧⲏⲩ ϩⲁⲛⲉⲯⲩⲭⲟⲟⲩⲉ · ⲁⲗⲗⲁ ϩⲉⲛⲟⲩⲁϩⲓⲏⲧ ⲛⲉ ⲛⲁⲧⲛⲁ ·
repentence.continence:156
ⲡⲉⲩϩⲱⲃ ϩⲱⲟⲩ ⲡⲉ ⲡⲁⲓ ⲉⲧⲣⲉⲩⲃⲁⲥⲁⲛⲓⲍⲉ ⲛⲛⲉⲯⲩⲭⲏ ⲛⲛⲣⲉϥⲣⲛⲟⲃⲉ ·
repentence.continence:157
ⲱ ⲟⲩϩⲟⲧⲉ ⲡⲉ ϩⲉ ⲉϩⲣⲁⲓ ⲉⲛⲧⲟⲡⲟⲥ ⲛⲁⲧϭⲙⲡⲉⲩϣⲓⲛⲉ ⲕⲁⲧⲁⲡⲉⲧⲥⲏϩ · ϫⲉⲉⲣⲉⲡⲉⲧⲉⲛϥⲣϩⲟⲧⲉ ⲁⲛ ⲛⲁϣⲱⲡⲉ ϩⲛϩⲉⲛⲙⲁ ⲉⲙⲡϣⲁ ⲉⲛⲉϩ ϭⲓⲛⲉ ⲁⲛ ⲙⲡⲉⲩϣⲓⲛⲉ ·
repentence.continence:158
ⲱ ⲟⲩⲙⲛⲧⲉⲃⲓⲏⲛ ⲛⲁϣ ⲛϭⲟⲧ ⲧⲉⲧⲛⲁⲧⲁϩⲉ ⲛⲁⲓ ⲉⲛⲧⲁⲩⲧⲁⲗⲉⲡⲣⲁⲛ ⲉⲧⲟⲩⲁⲁⲃ ⲉϩⲣⲁⲓ ⲉϫⲱⲟⲩ ϫⲉⲟⲩⲏⲏⲃ ϩⲓⲙⲟⲛⲁⲭⲟⲥ · ⲉⲩⲕⲁⲧⲁⲫⲣⲟⲛⲉⲓ ⲛⲛⲉⲛⲧⲟⲗⲏ ⲙⲡⲛⲟⲩⲧⲉ ·
repentence.continence:159
ⲛⲣⲉϥⲣⲛⲟⲃⲉ ⲉⲧϩⲛⲛⲕⲟⲗⲁⲥⲓⲥ ⲛⲁⲛⲉϭⲛⲟⲩϭⲟⲩ ⲛⲥⲉϫⲟⲟⲥ ⲛⲁⲩ ϫⲉⲉⲥⲧⲱ ⲁⲛⲟⲛ ϫⲉⲁⲛⲣⲛⲟⲃⲉ · ϫⲉⲉⲛϩⲙⲡⲣⲟⲟⲩϣ ⲛⲛⲉϩⲃⲏⲩⲉ ⲙⲡⲃⲓⲟⲥ ·
repentence.continence:160
ⲁⲛⲡⲗⲁⲛⲁ ϩⲙⲡⲥⲱⲣⲙ ⲛⲧϩⲩⲗⲏ ·
repentence.continence:161
ⲛⲧⲱⲧⲛ ϩⲱⲧⲧⲏⲩⲧⲛ ⲉⲧⲉⲧⲛⲣⲟⲩ ⲙⲡⲉⲓⲙⲁ ϩⲛⲛⲉⲓⲕⲟⲗⲁⲥⲓⲥ ⲛⲁⲧⲱϫⲛ ·
repentence.continence:162
ⲙⲏ ⲛⲧⲱⲧⲛ ⲁⲛ ⲛⲉⲧⲫⲟⲣⲉⲓ ⲙⲡⲉⲥⲭⲏⲙⲁ ⲛⲧⲙⲛⲧⲉⲩⲥⲉⲃⲏⲥ ϩⲙⲡⲕⲟⲥⲙⲟⲥ ·
repentence.continence:163
ⲱ ⲟⲩⲛⲟϭ ⲡⲉ ⲡϣⲓⲡⲉ ⲉⲧⲙⲙⲁⲩ · ⲉⲙⲛϩⲁⲏ ⲟⲩⲏϩ ⲛⲥⲱϥ ·
repentence.continence:164
ⲁⲗⲗⲁ ⲉϥⲙⲏⲛ ⲉⲃⲟⲗ ⲛϣⲁⲉⲛⲉϩ ·
repentence.continence:165
ⲛⲛⲉⲥϣⲱⲡⲉ ⲇⲉ ⲱ ⲛⲁⲙⲉⲣⲁⲧⲉ ⲉⲧⲣⲉⲡⲛⲟⲩⲧⲉ ⲕⲁⲧⲉⲓⲛⲟϭ ⲙⲙⲛⲧⲧⲁⲗⲁⲓⲡⲱⲣⲟⲥ ⲉⲧⲁϩⲟⲛ ·
repentence.continence:166
ⲁⲗⲗⲁ ⲙⲁⲣⲛⲁⲅⲱⲛⲓⲍⲉ ⲛⲧⲟϥ ϩⲛⲧⲉⲛϭⲟⲙ ⲧⲏⲣⲥ ⲉⲧⲣⲉⲛϫⲡⲟ ⲛⲁⲛ ⲙⲡⲛⲟϭ ⲛⲉⲟⲟⲩ ⲙⲡⲙⲁ ⲉⲧⲙⲙⲁⲩ ⲡⲁⲓ ⲉⲣⲉⲛⲉⲧⲟⲩⲁⲁⲃ ⲧⲏⲣⲟⲩ ⲫⲟⲣⲉⲓ ⲙⲙⲟϥ ·
repentence.continence:167
ϣⲗⲏⲗ ⲱ ⲛⲁⲙⲉⲣⲁⲧⲉ ⲉⲧⲣⲉⲛϫⲓⲧϥ ⲉⲃⲟⲗ ϫⲉⲟⲩⲉⲟⲟⲩ ⲡⲉ · ⲉϥⲙⲏⲛ ⲉⲃⲟⲗ ⲛϣⲁⲉⲛⲉϩ ·
repentence.continence:168
ⲙⲁⲣⲛⲙⲉⲧⲁⲛⲟⲉⲓ ⲟⲩⲛ ⲱ ⲛⲁⲙⲉⲣⲁⲧⲉ ·
repentence.continence:169
ⲁⲩⲱ ⲛⲁⲥⲛⲏⲩ ⲛⲧⲛϭⲱ ⲉⲛⲣⲓⲙⲉ ⲛⲛⲁⲩ ⲛⲓⲙ ·
repentence.continence:170
ⲙⲡⲉⲙⲧⲟ ⲉⲃⲟⲗ ⲙⲡⲥⲱⲧⲏⲣ ϣⲁⲛⲧⲉⲧⲉϥⲥⲙⲏ ⲧⲁϩⲟⲛ ϩⲛⲟⲩⲣⲁϣⲉ · ϫⲉⲛⲉⲧⲛⲛⲟⲃⲉ ⲕⲏ ⲛⲏⲧⲛ ⲉⲃⲟⲗ ·
repentence.continence:171
ⲡⲣⲓⲙⲉ ⲅⲁⲣ ⲛⲧⲙⲉⲧⲁⲛⲟⲓⲁ ϣⲁϥϯⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ ⲉⲧⲣⲉϥϭⲱϣⲧ ⲉϫⲱⲕ · ⲛϥⲛⲁ ⲛⲁⲕ ·
repentence.continence:172
ⲡⲣⲓⲙⲉ ⲛⲧⲙⲉⲧⲁⲛⲟⲓⲁ ⲡⲉ ϣⲁϥⲧⲣⲉⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲡⲱⲧ ⲉϩⲟⲩⲛ ⲉⲡⲣⲱⲙⲉ ⲛϥⲟⲩⲱϩ ⲛϩⲏⲧϥ ·
repentence.continence:173
ϩⲓⲧⲙⲡⲣⲓⲙⲉ ⲛⲧⲙⲉⲧⲁⲛⲟⲓⲁ ϣⲁⲣⲉⲡⲛⲟⲩⲧⲉ ⲧⲣⲉⲕⲣⲃⲣⲣⲉ ⲛⲕⲉⲥⲟⲡ · ⲛϥⲕⲧⲟ ⲛⲁⲕ ⲙⲡⲕⲁⲣⲡⲟⲥ ⲛⲛⲉⲕϩⲓⲥⲉ ⲉϥⲟⲩⲟϫ ·
repentence.continence:174
ⲙⲁⲣⲉⲣⲓⲙⲉ ⲅⲁⲣ ϣⲱⲡⲉ ⲭⲱⲣⲓⲥ ⲕⲱⲗϫ ⲛϩⲏⲧ ·
repentence.continence:175
ⲙⲁⲣⲉⲕⲱⲗϫ ⲇⲉ ⲛϩⲏⲧ ϣⲱⲡⲉ ⲛⲛⲉⲧⲉⲓⲣⲉ ⲙⲡⲉⲩⲃⲓⲟⲥ ϩⲛⲟⲩⲥⲡⲁⲧⲁⲗⲓⲁ ⲙⲛⲟⲩϫⲓϩⲣⲁϥ ·
repentence.continence:176
ⲟⲩⲇⲉ ⲙⲁⲣⲉⲙⲉⲧⲁⲛⲟⲓⲁ ⲟⲩⲱϩ ϩⲙⲡⲣⲱⲙⲉ ⲉⲧⲥⲁⲛⲁϣⲧ ϩⲛⲧⲁⲡⲁⲧⲏ ·
repentence.continence:177
ⲁⲗⲗⲁ ϩⲓⲧⲙⲡϩⲓⲥⲉ ⲛⲧⲛⲏⲥⲧⲉⲓⲁ ⲙⲛⲡⲉⲑⲕⲟ ⲛⲧⲥⲁⲣⲝ ·
repentence.continence:178
ϣⲁⲣⲉⲡⲉⲕϩⲏⲧ ⲑⲃⲃⲓⲟ ⲛⲅϣⲓⲛⲉ ⲛⲥⲁⲧⲙⲉⲧⲁⲛⲟⲓⲁ · ⲛⲅⲁϣⲁϩⲟⲙ ⲉϫⲛⲛⲉⲕⲛⲟⲃⲉ ·
repentence.continence:179
ⲧⲉⲛⲟⲩ ϭⲉ ⲱ ⲛⲁⲙⲉⲣⲁⲧⲉ ⲙⲁⲣⲛϥⲓ ⲡⲣⲟⲟⲩϣ ϩⲁⲡⲉⲛⲱⲛϩ ⲛⲛⲁⲩ ⲛⲓⲙ ϩⲱⲥ ⲉⲩⲥⲟⲡⲥ ⲙⲙⲟⲛ ⲉⲃⲟⲗ ϩⲓⲧⲙⲡϫⲟⲉⲓⲥ ⲉⲣⲡⲓⲥⲧⲟⲥ ·
repentence.continence:180
ϭⲱϣⲧ ⲉⲡⲉⲛϫⲟⲉⲓⲥ ⲁⲩⲱ ⲡⲉⲛⲥⲱⲧⲏⲣ ⲓⲏⲥⲟⲩⲥ ϫⲉⲁϥϣⲡⲟⲩⲏⲣ ϩⲓⲥⲉ ϩⲁⲣⲟⲛ ·
repentence.continence:181
ⲟⲩ ⲅⲁⲣ ⲡⲉ ⲡⲡⲉⲧϩⲟⲟⲩ ⲉⲛⲧⲁϥⲁⲁϥ ·
repentence.continence:182
ⲏ ⲛⲓⲙ ϩⲙⲡⲥⲱⲛⲧ ⲧⲏⲣϥ ⲡⲉⲧⲛⲁϫⲡⲓⲟϥ ⲉⲧⲃⲉⲛⲟⲃⲉ ·
repentence.continence:183
ⲁⲗⲗⲁ ⲛⲧⲁϥϣⲉⲡⲛⲁⲓ ⲧⲏⲣⲟⲩ ⲉⲧⲃⲏⲏⲧⲛ ⲁⲛⲟⲛ ⲛⲣⲉϥⲣⲛⲟⲃⲉ ϫⲉϫⲉⲕⲁⲥ ⲉϥⲉⲭⲁⲣⲓⲍⲉ ⲛⲁⲛ ⲙⲡⲉⲓⲛⲟϭ ⲛⲟⲩϭⲁⲓ ⲛⲧⲉⲧⲙⲉⲧⲁⲛⲟⲓⲁ ·
repentence.continence:184
ⲙⲁⲣⲉⲛⲃⲁⲗ ⲙⲡⲉⲧⲛϩⲏⲧ ⲉⲓⲱⲣϩ ⲛⲛⲉⲓϥⲧ ⲉⲧⲟϥⲧ ⲉⲛⲉϥϭⲓϫ ⲉⲧⲟⲩⲁⲁⲃ · ⲉϥⲁϣⲉ ⲉⲡϣⲉ ⲙⲡⲉⲥⲧⲁⲩⲣⲟⲥ ϩⲁⲛⲉⲛⲛⲟⲃⲉ ·
repentence.continence:185
ⲙⲛⲡⲉϥⲥⲡⲓⲣ ⲉⲛⲧⲁⲩⲕⲟⲟⲛⲥϥ ⲛⲟⲩⲗⲟⲛⲭⲏ ⲉϥϣⲟⲩⲟ ⲉⲃⲟⲗ ⲛⲟⲩⲥⲛⲟϥ ⲙⲛⲟⲩⲙⲟⲟⲩ · ⲙⲛⲡⲕⲁϣⲉ ⲛⲧⲁⲩⲣⲱϩⲧ ⲙⲙⲟϥ ⲉϫⲛⲧⲉϥⲁⲡⲉ ·
repentence.continence:186
ⲙⲛⲡϩⲩⲡⲏⲣⲉⲧⲏⲥ ⲛⲁⲧϣⲓⲡⲉ ⲉⲛⲧⲁϥϩⲓⲟⲩⲉ ⲉϩⲟⲩⲛ ϩⲙⲡⲉϥϩⲟ ·
repentence.continence:187
ⲛⲉϥⲕⲁⲣⲁⲉⲓⲧ ⲡⲉ ·
repentence.continence:188
ⲁⲩⲱ ⲉⲛⲉϥⲟⲃⲉ ϩⲓⲡⲉⲥⲧⲁⲩⲣⲟⲥ · ⲉⲙⲡⲟⲩϣⲁⲛⲁϩⲧⲏⲩ ϩⲁⲣⲟϥ ·
repentence.continence:189
ⲁⲗⲗⲁ ⲛⲧⲁⲩⲣⲡⲕⲉⲥⲟϥ ⲛⲟⲩϩⲙϫ ⲙⲛⲟⲩⲥⲓϣⲉ ϩⲙⲡⲉϥⲉⲓⲃⲉ ·
repentence.continence:190
ϩⲙⲡⲧⲣⲉϥϫⲉⲕⲛⲁⲓ ⲧⲏⲣⲟⲩ ⲉⲃⲟⲗ ⲉϥϥⲓ ⲉⲣⲟϥ ϩⲛⲟⲩⲙⲛⲧϩⲁⲣϣϩⲏⲧ ·
repentence.continence:191
ⲙⲛⲟⲩⲙⲛⲧⲙⲁⲓⲣⲱⲙⲉ ⲉϥⲟⲩⲱϣ ⲉⲧⲣⲉⲛϣⲱⲡⲉ ⲛⲁϥ ⲛⲕⲟⲓⲛⲱⲛⲟⲥ · ϩⲛⲛⲉϥϩⲓⲥⲉ ϫⲉⲕⲁⲥ ⲉⲛⲁⲕⲗⲏⲣⲟⲛⲟⲙⲉⲓ ⲛⲙⲙⲁϥ ⲉⲧⲉϥⲙⲛⲧⲣⲣⲟ ⲉⲧϩⲛⲙⲡⲏⲩⲉ :

Coptic SCRIPTORIUM, corpus pseudo.theophilus (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.