Pseudo Theophilus

Coptic literature (Coptic SCRIPTORIUM) · 444 sections

repentence.continence:192
ⲡⲉϫⲁϥ ϫⲉⲡⲉⲧⲙⲉ ⲙⲙⲟⲓ ⲙⲁⲣⲉϥⲁⲡⲁⲣⲛⲁ ⲙⲙⲟϥ ⲛϥϥⲓ ⲙⲡⲉϥⲥⲧⲁⲩⲣⲟⲥ ⲛϥⲟⲩⲁϩϥ ⲛⲥⲱⲓ ·
repentence.continence:193
ϥⲥⲟⲟⲩⲛ ϩⲱⲱϥ ⲟⲛ ⲛϭⲓⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ⲡⲁⲩⲗⲟⲥ ⲙⲡⲧⲁⲉⲓⲟ ⲙⲡⲉⲥⲧⲁⲩⲣⲟⲥ ·
repentence.continence:194
ⲉⲧⲃⲉⲡⲁⲓ ϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉⲛⲉ ϣⲱⲡⲉ ⲁⲛⲟⲕ ⲉⲧⲣⲁϣⲟⲩ ⲙⲙⲟⲓ ⲉⲓⲙⲏⲧⲓ ϩⲙⲡⲉⲥⲥⲧⲁⲩⲣⲟⲥ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ : ⲡⲁⲓ ⲛⲧⲉⲩⲥⲧⲁⲩⲣⲟⲩ ⲛⲁⲓ ⲙⲡⲕⲟⲥⲙⲟⲥ ⲉⲃⲟⲗ ϩⲓⲧⲟⲟⲧϥ ⲁⲩⲱ ⲁⲛⲟⲕ ϩⲱⲱⲧ ⲟⲛ ⲙⲡⲕⲟⲥⲙⲟⲥ ·
repentence.continence:195
ⲁⲩⲱ ⲟⲛ ϥϫⲱ ⲙⲙⲟⲥ ϫⲉⲁⲩⲥⲧⲁⲩⲣⲟⲩ ⲙⲙⲟⲓ ⲙⲛⲡⲉⲭⲣⲓⲥⲧⲟⲥ :
repentence.continence:196
ⲁⲛⲟⲕ ⲇⲉ ϯⲟⲛϩ ⲁⲛ ⲡⲉⲭⲣⲓⲥⲧⲟⲥ ⲇⲉ ⲟⲛϩ ⲛϩⲏⲧ ·
repentence.continence:197
ⲁⲩⲱ ⲟⲛ ϫⲉⲁϫⲛϩⲓⲥⲉ ⲟⲩⲁⲧϭⲟⲙ ⲡⲉ ⲣⲁⲛⲁϥ ⲙⲡⲛⲟⲩⲧⲉ ·
repentence.continence:198
ⲁⲩⲱ ⲟⲛ ϫⲉⲉϣϫⲉ ⲧⲉⲧⲛϣⲡϩⲓⲥⲉ ⲛⲙⲙⲁϥ ⲉⲓⲉ ⲧⲛⲛⲁⲣⲣⲣⲟ ⲛⲙⲙⲁϥ ·
repentence.continence:199
ⲉⲧⲃⲉⲡⲁⲓ ϭⲉ ⲱ ⲛⲁⲙⲉⲣⲁⲧⲉ ⲙⲁⲣⲛⲛⲏⲫⲉ ⲛⲧⲛⲣⲟⲉⲓⲥ ϫⲉⲡⲉⲛⲁⲛⲧⲓⲇⲓⲕⲟⲥ ⲡⲇⲓⲁⲃⲟⲗⲟⲥ ⲙⲟⲟϣⲉ ⲉⲃⲏⲑⲗⲉⲉⲙ ⲛⲧϩⲉ ⲛⲓⲙⲟⲩⲓ · ⲉϥϣⲓⲛⲉ ⲛⲥⲁⲟⲩⲱⲙⲕ ⲛⲛⲉⲛⲯⲩⲭⲏ ·
repentence.continence:200
ⲉϥⲟⲩⲱϣ ⲉⲁⲁⲛ ⲛϣⲙⲙⲟ ⲉⲛⲉⲓⲛⲟϭ ⲛⲁⲅⲁⲑⲟⲛ ·
repentence.continence:201
ⲛⲁⲓⲁⲧⲟⲩ ϭⲉ ⲛⲉⲧⲛⲁⲁϩⲉⲣⲁⲧⲟⲩ ⲉⲣⲟϥ ⲉⲩϫⲟⲟⲣ · ϩⲛⲧⲡⲓⲥⲧⲓⲥ · ϫⲉⲛⲧⲟⲟⲩ ⲛⲉⲧⲛⲁϫⲓⲉⲟⲟⲩ ⲙⲛⲓⲏⲥⲟⲩⲥ ·
repentence.continence:202
ⲕⲁⲧⲁⲧϩⲉ ⲉⲛⲧ ⲁϥϫⲟⲟⲥ ϫⲉⲛⲧⲱⲧⲛ ⲛⲉⲛⲧⲁⲩϩⲩⲡⲟⲙⲓⲛⲉ ⲛⲙⲙⲁⲓ ϩⲛⲛⲁⲡⲉⲓⲣⲁⲥⲙⲟⲥ ·
repentence.continence:203
ⲁⲛⲟⲕ ϩⲱ ϯⲥⲙⲓⲛⲉ ⲙⲙⲟⲥ ⲛⲙⲙⲏⲧⲛ ⲕⲁⲧⲁⲧϩⲉ ⲛⲧⲁⲡⲁⲉⲓⲱⲧ ⲥⲙⲓⲛⲉ ⲛⲙⲙⲁⲓ ⲛⲟⲩⲙⲛⲧⲣⲣⲟ ϫⲉⲧⲉⲧⲛⲛⲁⲟⲩⲱⲙ ⲧⲉⲧⲛⲥⲱ ⲛⲙⲙⲁⲓ ϩⲓϫⲛⲧⲁⲧⲣⲁⲡⲉⲍⲁ ϩⲛⲧⲁⲙⲛⲧⲣⲣⲟ ·
repentence.continence:204
ⲱ ⲛⲁⲓⲁⲧϥ ⲙⲡⲉⲛⲧⲁϥϣⲡϩⲓⲥⲉ ϩⲛϩⲉⲛⲛⲏⲥⲧⲉⲓⲁ ⲙⲛϩⲉⲛϣⲗⲏⲗ ⲙⲛϩⲉⲛⲟⲩϣⲏ ⲛⲣⲟⲉⲓⲥ ⲙⲛϩⲉⲛⲁϣⲁϩⲟⲙ · ϫⲉϥⲛⲁⲛⲟϫϥ ⲛϥⲟⲩⲱⲙ ⲛϥⲥⲱ ϩⲙⲡⲇⲉⲓⲡⲛⲟⲛ ⲛⲛⲉⲧⲟⲩⲁⲁⲃ ⲛⲟⲩⲡⲁⲣϩⲏⲥⲓⲁ ·
repentence.continence:205
ⲛⲁⲓⲁⲧϥ ⲙⲡⲉⲛⲧⲁϥϣⲱⲡⲉ ⲛⲛⲁⲏⲧ · ⲉϥⲙⲉ ⲙⲡⲉⲧϩⲓⲧⲟⲩⲱϥ ϩⲛⲟⲩⲁⲅⲁⲡⲏ ⲛⲧⲉⲡⲛⲟⲩⲧⲉ · ϫⲉϥⲛⲁϣⲱⲡⲉ ⲉⲩⲥⲟⲗⲥⲗ ⲙⲙⲟϥ ϩⲛⲕⲟⲩⲛϥ ⲛⲁⲃⲣⲁϩⲁⲙ ϩⲛⲧⲙⲛⲧⲣⲣⲟ ⲛⲙⲡⲏⲩⲉ ·
repentence.continence:206
ⲛⲁⲓⲁⲧϥ ⲙⲡⲉⲛⲧⲁϥⲥⲉⲓ ⲛⲣⲓⲙⲉ ⲉϫⲛⲛⲉϥⲛⲟⲃⲉ ⲉⲛⲧⲁϥⲁⲁⲩ ϫⲉϥⲛⲁⲣⲃⲟⲗ ⲉⲡⲙⲁ ⲙⲡⲣⲓⲙⲉ ⲙⲛⲡϭϩϭϩ ⲛⲛⲟⲃϩⲉ ·
repentence.continence:207
ⲛⲁⲓⲁⲧϥ ⲙⲡⲉⲛⲧⲁϥⲣϩⲏⲃⲉ ⲉϫⲛⲛⲉϥⲛⲟⲃⲉ ϫⲉⲉϥⲛⲁⲉⲩⲫⲣⲁⲛⲉ ⲙⲡⲛⲟⲩⲧⲉ ⲙⲛⲛⲉϥⲁⲅⲅⲉⲗⲟⲥ ϩⲙⲡⲁⲓⲱⲛ ⲙⲡⲟⲩⲟⲉⲓⲛ ·
repentence.continence:208
ⲛⲁⲓⲁⲧϥ ⲙⲡⲉⲛⲧⲁϥϯ ⲙⲡⲉϥⲟⲉⲓⲕ ⲙⲡⲉⲧϩⲕⲁⲉⲓⲧ ϫⲉϥⲛⲁⲥⲉⲓ ⲙⲡⲟⲉⲓⲕ ⲙⲡⲱⲛϩ ϩⲛⲙⲡⲏⲩⲉ ·
repentence.continence:209
ⲛⲁⲓⲁⲧϥ ⲙⲡⲉⲛⲧⲁϥϩⲱⲃⲥ ⲙⲡⲉⲧⲕⲏ ϩⲁϩⲏⲩ ϫⲉⲥⲉⲛⲁϩⲱⲃⲥ ⲉⲃⲟⲗ ⲉϫⲛⲛⲉϥⲛⲟⲃⲉ ⲙⲡⲉϩⲟⲟⲩ ⲙⲡϩⲁⲡ ·
repentence.continence:210
ⲛⲁⲓⲁⲧϥ ⲙⲡⲉⲧⲛⲁ ⲛⲛϩⲏⲕⲉ ϫⲉⲛⲧⲟϥ ⲡⲉⲧⲟⲩⲛⲁⲛⲁ ⲛⲁϥ ·
repentence.continence:211
ⲁⲩⲱ ϥⲛⲁⲣⲙⲡϣⲁ ⲛⲥⲱⲧⲙ ⲉⲧⲉⲓⲥⲙⲏ ⲛⲣⲁϣⲉ ϩⲓⲟⲩⲟⲩⲛⲟϥ ϫⲉⲁⲙⲏⲉⲓⲛ ⲛⲉⲧⲥⲙⲁⲙⲁⲁⲧ ⲛⲧⲉⲡⲁⲉⲓⲱⲧ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛⲧⲙⲛⲧⲣⲣⲟ ⲉⲛⲧⲁⲩⲥⲃⲧⲱⲧⲥ ⲛⲏⲧⲛ ϫⲓⲛⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ ·
repentence.continence:212
ⲁⲩⲱ ⲟⲛ ϥϫⲱ ⲙⲙⲟⲥ ϫⲉⲡⲉⲧⲛⲁⲧⲥⲉⲟⲩⲁ ⲛⲛⲉⲓⲕⲟⲩⲓ ⲛⲟⲩϫⲱ ⲙⲙⲟⲩ ⲛⲱⲣϣ ⲙⲙⲁⲧⲉ ϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲛⲛⲉϥⲥⲱⲣⲙ ⲛϭⲓⲡⲉϥⲃⲉⲕⲉ ·
repentence.continence:213
ⲛⲁⲓⲁⲧϥ ⲙⲡⲉⲛⲧⲁϥⲕⲱ ⲉⲃⲟⲗ ⲙⲡⲉⲧϩⲓⲧⲟⲩⲱϥ ϩⲙⲡⲧⲣⲉϥⲣⲛⲟⲃⲉ ⲉⲣⲟϥ · ϫⲉⲥⲉⲛⲁⲡⲱϩ ⲙⲡⲉⲭⲓⲣⲟⲅⲣⲁⲫⲟⲛ ⲉⲧⲉⲣⲟϥ ·
repentence.continence:214
ⲁⲩⲱ ⲟⲛ ⲉⲧⲁⲣⲟϥ ⲛⲟⲩⲟⲛ ⲛⲓⲙ ·
repentence.continence:215
ⲛⲁⲓⲁⲧⲟⲩ ⲛⲛⲉⲧⲛⲁⲣⲁⲙⲁⲣ ⲉⲧⲉⲕⲕⲗⲏⲥⲓⲁ ⲉϩⲧⲟⲟⲩⲉ ⲛⲣⲟⲩϩⲉ · ⲙⲙⲏⲛⲉ ·
repentence.continence:216
ⲛϩⲟⲩⲟ ⲇⲉ ⲙⲡⲛⲁⲩ ⲛϫⲓ ⲉⲃⲟⲗ ϩⲛⲙⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ ·
repentence.continence:217
ⲙⲡⲥⲱⲙⲁ ⲙⲛⲡⲉⲥⲛⲟϥ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ : ϫⲉϥⲛⲁϣⲱⲡⲉ ⲉϥⲧⲏϩ ⲙⲛⲛⲁⲅⲅⲉⲗⲟⲥ ϩⲣⲁⲓ ϩⲛⲙⲡⲏⲩⲉ ⲉϥⲛⲁⲩ ⲉⲣⲟⲟⲩ ⲛϩⲟ ϩⲓϩⲟ ·
repentence.continence:218
ⲉϥⲟⲩⲱϣⲃ ⲛⲙⲙⲁⲩ ⲛⲧⲁⲡⲣⲟ ϩⲓⲧⲁⲡⲣⲟ ϩⲛⲧⲉⲩⲁⲥⲡⲉ ϫⲉⲁⲗⲏⲗⲟⲩⲉⲓⲁ ·
repentence.continence:219
ⲉⲧⲃⲉⲡⲁⲓ ϭⲉ ⲱ ⲛⲁⲙⲉⲣⲁⲧⲉ ⲙⲡⲣⲧⲣⲉⲛϯϩⲓⲛⲏⲃ ⲛⲛⲉⲛⲃⲁⲗ ⲟⲩⲇⲉ ϩⲣⲉⲕⲣⲓⲕⲉ ⲛⲛⲉⲛⲃⲟⲩϩⲉ · ⲙⲡⲉϩⲟⲟⲩ ⲙⲛⲧⲉⲩϣⲏ ·
repentence.continence:220
ϫⲉⲕⲁⲥ ⲉⲕⲉⲣⲃⲟⲗ ⲉⲡⲉⲧϩⲟⲟⲩ ⲛⲓⲙ :
repentence.continence:221
ϥϭⲟⲣϭ ⲅⲁⲣ ⲉⲣⲟⲛ ⲛϭⲓⲡϫⲁϫⲉ ·
repentence.continence:222
ⲁⲩⲱ ϥⲛⲁⲉⲓ ⲛⲁⲛ ϩⲛⲟⲩⲙⲏⲏϣⲉ ⲛⲕⲟⲧⲥ · ⲉϥⲧⲙⲉⲓ ϩⲛⲟⲩⲁⲙⲉⲗⲓⲁ ϥⲛⲁⲉⲓ ϩⲛⲟⲩⲟⲃϣⲥ ·
repentence.continence:223
ⲉϥⲧⲙⲉⲓ ϩⲛⲟⲩⲙⲛⲧϫⲁⲥⲓϩⲏⲧ ·
repentence.continence:224
ϥⲛⲁⲉⲓ ϩⲛⲟⲩϭⲱⲛⲧ · ⲉϥⲧⲙⲉⲓ ϩⲛⲟⲩⲉⲟⲟⲩ ⲉϥϣⲟⲩⲉⲓⲧ ϥⲛⲁⲉⲓ ϩⲛⲟⲩⲡⲟⲣⲛⲉⲓⲁ · ⲉϥⲧⲙⲉⲓ ϩⲛⲟⲩⲕⲱϩ ϥⲛⲁⲉⲓ ϩⲛⲟⲩⲙⲟⲥⲧⲉ ·
repentence.continence:225
ϥⲧⲙⲉⲓ ϩⲛⲟⲩⲡⲟⲛⲏⲣⲓⲁ ⲉϥⲛⲁⲉⲓ ϩⲛⲟⲩⲕⲣⲙ · ⲉϥⲧⲙⲉⲓ ϩⲛⲟⲩϫⲓⲟⲩⲉ ϥⲛⲁⲉⲓ ϩⲛⲟⲩⲁⲛⲁϣ ⲛⲛⲟⲩϫ ⲙⲛϩⲉⲛϭⲟⲗ · ⲉϥⲧⲙⲉⲓ ϩⲛϩⲉⲛⲡⲁⲑⲟⲥ ·
repentence.continence:226
ϥⲛⲁⲉⲓ ϩⲛϩⲉⲛⲙⲉⲉⲩⲉ ⲉⲩϩⲟⲟⲩ ·
repentence.continence:227
ϩⲁⲡⲁⲝ ϩⲁⲡⲗⲱⲥ ϥⲛⲁⲕⲁⲧⲟⲟⲧϥ ⲉⲃⲟⲗ ⲁⲛ ⲛϭⲓⲡⲥⲁ ·
repentence.continence:228
ϥⲛⲁⲕⲟⲧⲥ ⲛⲥⲁⲥⲱⲣⲙ ϩⲏⲧ · ⲉϥⲛⲁⲕⲟⲧⲥ ⲉϩⲟⲩⲛ ⲉⲧⲙⲛⲧⲣϥϭⲱⲱⲙⲉ ϥϫⲟ ⲛⲧⲁⲙⲉⲗⲓⲁ ⲉϩⲣⲁⲓ ⲛϩⲏⲧⲥ · ϫⲉϩⲓⲧⲛⲧⲁⲙⲉⲗⲓⲁ ⲅⲁⲣ ⲉⲣⲉⲁⲙⲛⲧⲉ ϭⲱⲣϭ ·
repentence.continence:229
ⲙⲁⲣⲛⲣⲡⲙⲉⲉⲩⲉ ⲟⲩⲛ ⲛⲛⲉⲓⲡⲟⲗⲉⲙⲟⲥ ⲛⲧⲉⲓϭⲟⲧ ⲉⲧⲉⲣⲉⲡϫⲁϫⲉ ⲥⲱⲣ ⲙⲙⲟⲟⲩ ⲉⲃⲟⲗ ⲉⲣⲟⲛ ·
repentence.continence:230
ⲛⲧⲛϩⲟⲕ ⲛϩⲱⲱⲛ ϩⲛⲛϩⲟⲡⲗⲟⲛ ⲛⲧⲇⲓⲕⲁⲓⲟⲥⲩⲛⲏ · ⲉⲧⲉⲛⲁⲓ ⲛⲉ ⲟⲩϣⲗⲏⲗ · ⲟⲩⲛⲏⲥⲧⲉⲓⲁ · ⲟⲩⲧⲃⲃⲟ · ⲟⲩⲉⲓⲣⲏⲛⲏ · ⲟⲩⲁⲅⲁⲡⲏ · ⲟⲩⲑⲃⲃⲓⲟ · ⲟⲩⲙⲛⲧⲛⲁ · ⲟⲩⲙⲛⲧⲙⲁⲓⲛⲉⲛⲉⲣⲏⲩ · ⲟⲩϭⲓⲛϣⲁϫⲉ ⲉⲥϩⲟⲗϭ ⲙⲛⲣⲱⲙⲉ ⲛⲓⲙ ϩⲛϩⲟⲧⲉ ⲙⲡⲛⲟⲩⲧⲉ ·
repentence.continence:231
ⲛⲁⲓ ⲅⲁⲣ ⲛⲉⲧϯ ⲟⲩⲃⲉⲧⲉϥⲙⲛⲧⲥⲁⲕⲟⲧⲥ ⲛⲕⲣⲟϥ ·
repentence.continence:232
ⲛϩⲟⲩⲟ ⲇⲉ ⲧⲛⲣϩⲟⲧⲉ ϩⲁⲧϩⲏ .. ⲡⲙⲁ ⲛϯϩⲁⲡ ⲙⲡⲛⲟⲩⲧⲉ ⲉⲧϩⲁϩⲟⲧⲉ ⲛⲧⲛⲕⲱ ⲛⲥⲱⲛ ⲛⲛⲉϩⲃⲏⲩⲉ ⲙⲡⲕⲁⲕⲉ ⲛⲧⲛϯ ϩⲓⲱⲱⲛ ⲛⲛϩⲟⲡⲗⲟⲛ ⲙⲡⲟⲩⲟⲉⲓⲛ ·
repentence.continence:233
ϫⲉⲕⲁⲥ ⲉⲛⲕⲗⲏⲣⲟⲛⲟⲙⲉⲓ ⲙⲡⲙⲁ ⲛϣⲱⲡⲉ ⲛⲛⲉⲧⲟⲩⲁⲁⲃ ⲉⲧϩⲛ ⲙⲡⲏⲩⲉ ⲙⲛⲛϣⲏⲣⲉ ⲙⲡⲟⲩⲟⲉⲓⲛ ·
repentence.continence:234
ϩⲓⲧⲙⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ ⲡⲁⲓ ⲉⲃⲟⲗ ϩⲓⲧⲟⲟⲧϥ ⲡⲉⲟⲟⲩ ⲙⲡⲉⲓⲱⲧ ⲛⲙⲙⲁϥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϣⲁⲉⲛⲉⲓ ⲉⲛⲉϩ ϩⲁⲙⲏⲛ · ◈ — ◈ — ◈ — ◈ — ◈
repentence.continence:235
ⲁⲡⲁ ⲑⲉⲟⲫⲓⲗⲟⲥ ⲁⲣⲭⲏⲉⲡⲓⲥⲕⲟⲡⲟⲩ ·

Coptic SCRIPTORIUM, corpus pseudo.theophilus (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.