Acts (Bohairic Coptic)

Coptic New Testament (Bohairic) · 1,006 sections

19.39
ⲓⲥϫⲉ ⲇⲉ ⲁⲣⲉⲧⲉⲛⲕⲱϯ ⲛⲥⲁⲕⲉϩⲱⲃ ϧⲉⲛϯⲉⲕⲕⲗⲏⲥⲓⲁ ⲛⲛⲟⲙⲓⲙⲟⲛ ⲉⲩⲉⲃⲟⲗϥ ⲉⲃⲟⲗ .
But if you seek anything about other matters, it will be settled in the regular assembly.
19.40
ⲕⲉ ⲅⲁⲣ ⲧⲉⲛⲉⲣⲕⲩⲛⲇⲓⲛⲉⲩⲓⲛ ⲉⲑⲣⲟⲩⲉⲣⲕⲁⲧⲏ ⲅⲟⲣⲓⲛ ⲉⲣⲟⲛ ⲉⲑⲃⲉⲡⲓϣⲑⲟⲣⲧⲉⲣ ⲛⲧⲉⲫⲟⲟⲩ ⲙⲙⲟⲛ ϩⲗⲓ ⲛⲗⲱⲓϫⲓ ϣⲟⲡ ⲑⲁⲓ ⲉⲧⲉⲟⲩⲟⲛ ϣϫⲟⲙ ⲙⲙⲟⲛ ⲉϯⲗⲟⲅⲟⲥ ⲉⲑⲃⲏⲧⲥ ϧⲁⲡⲓϣⲑⲟⲣⲧⲉⲣ . ⲟⲩⲟϩ ⲛⲁⲓ ⲉⲧⲁϥϫⲟⲧⲟⲩ ⲁϥⲭⲱ ⲛϯⲉⲕⲕⲗⲏⲥⲓⲁ ⲉⲃⲟⲗ .
For indeed we are in danger of being accused concerning this day's riot, there being no cause. Concerning it, we wouldn't be able to give an account of this commotion.'
20.1
ⲙⲉⲛⲉⲛⲥⲁⲑⲣⲉϥⲟⲩⲱ ⲇⲉ ⲛϫⲉⲡⲓϣⲑⲟⲣⲧⲉⲣ ⲁⲡⲁⲩⲗⲟⲥ ⲟⲩⲱⲣⲡ ⲛⲥⲁⲛⲓⲙⲁⲑⲏⲧⲏⲥ ⲟⲩⲟϩ ⲁϥϯⲛⲟⲙϯ ⲛⲱⲟⲩ ⲁϥⲉⲣⲁⲥⲡⲁⲍⲉⲥⲑⲉ ⲙⲙⲱⲟⲩ ⲁϥⲓ ⲉⲃⲟⲗ ⲉϣⲉ ⲉⲧⲙⲁⲕⲉⲇⲟⲛⲓⲁ .
After the uproar had ceased, Paul sent for the disciples, took leave of them, and departed to go into Macedonia.
20.2
ⲉⲧⲁϥⲥⲓⲛⲓ ⲉⲃⲟⲗ ϧⲉⲛⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲉⲧⲁϥϯⲛⲟⲙϯ ⲛⲱⲟⲩ ϧⲉⲛⲟⲩⲥⲁϫⲓ ⲉϥⲟϣ ⲁϥⲓ ⲉϯⲉⲗⲗⲁⲥ .
When he had gone through those parts, and had encouraged them with many words, he came into Greece.
20.3
ⲉⲧⲁϥⲉⲣ ⲅⲇⲉ ⲛⲁⲃⲟⲧ ⲙⲙⲁⲩ ⲁϥϣⲱⲡⲓ ⲛϫⲉⲟⲩⲥⲟϭⲛⲓ ⲉϥϩⲱⲟⲩ ⲉⲑⲃⲏⲧϥ ⲉⲃⲟⲗ ϩⲓⲧⲉⲛⲛⲓⲓⲟⲩⲇⲁⲓ ⲉϥⲛⲁⲓ ⲉϩⲣⲏⲓ ⲉⲧⲥⲩⲣⲓⲁ ⲁϥϣⲱⲡⲓ ⲛϫⲉⲟⲩⲥⲟϭⲛⲓ ⲉⲑⲣⲉϥⲕⲟⲧϥ ⲉⲃⲟⲗ ϧⲉⲛⲧⲙⲁⲕⲉⲇⲟⲛⲓⲁ .
When he had spent three months there, and a plot was made against him by Jews as he was about to set sail for Syria, he determined to return through Macedonia.
20.4
ⲛⲁϥⲛⲉⲙⲁϥ ⲇⲉ ⲡⲉ ⲛϫⲉⲥⲱⲥⲓⲡⲁⲧⲣⲟⲥ ⲛⲧⲉⲡⲩⲣⲣⲟⲥ ⲡⲓⲣⲉⲙⲃⲉⲣⲟⲓⲁ ⲛⲁⲑⲉⲥⲥⲁⲗⲟⲛⲓⲕⲏ ⲇⲉ ⲁⲣⲓⲥⲧⲁⲣⲭⲟⲥ ⲛⲉⲙⲥⲉⲕⲟⲩⲛⲑⲟⲥ ⲛⲉⲙⲅⲁⲓⲟⲥ ⲡⲓⲣⲉⲙⲧⲉⲣⲃⲏ ⲛⲉⲙⲧⲓⲙⲟⲑⲉⲟⲥ ⲛⲁϯⲁⲥⲓⲁ ⲇⲉ ⲧⲩⲭⲓⲕⲟⲥ ⲛⲉⲙⲧⲣⲟⲫⲏⲙⲟⲥ .
These accompanied him as far as Asia: Sopater of Beroea; Aristarchus and Secundus of the Thessalonians; Gaius of Derbe; Timothy; and Tychicus and Trophimus of Asia.
20.5
ⲛⲁⲓ ⲇⲉ ⲉⲧⲁⲩⲉⲣϣⲟⲣⲡ ⲉⲣⲟⲛ ⲁⲩⲟϩⲓ ⲛⲁⲛ ϧⲉⲛⲧⲣⲱⲁⲥ .
But these had gone ahead, and were waiting for us at Troas.
20.6
ⲁⲛⲟⲛ ⲇⲉ ⲙⲉⲛⲉⲛⲥⲁⲛⲓⲉϩⲟⲟⲩ ⲛⲧⲉⲛⲓⲁⲧϣⲉⲙⲏⲣ ⲁⲛⲉⲣϩⲱⲧ ⲉⲃⲟⲗ ϧⲉⲛⲫⲓⲗⲓⲡⲡⲟⲓⲥ ⲟⲩⲟϩ ⲁⲛⲓ ϣⲁⲣⲱⲟⲩ ⲉⲧⲣⲱⲁⲥ ⲙⲡⲉⲛⲉ ⲟⲩⲟϩ ⲁⲛϣⲱⲡⲓ ⲙⲙⲁⲩ ϧⲁⲧⲟⲧⲟⲩ ⲛⲍ ⲛⲉϩⲟⲟⲩ .
We sailed away from Philippi after the days of Unleavened Bread, and came to them at Troas in five days, where we stayed seven days.
20.7
ϧⲉⲛⲫⲟⲩⲁⲓ ⲇⲉ ⲛⲧⲉⲛⲓⲥⲁⲃⲃⲁⲧⲟⲛ ⲉⲧⲁⲛⲑⲱⲟⲩϯ ⲉⲫⲱϣ ⲛⲟⲩⲱⲓⲕ ⲛⲁϥⲥⲁϫⲓ ⲛϫⲉⲡⲁⲩⲗⲟⲥ ⲛⲉⲙⲱⲟⲩ ⲉϥⲛⲁⲓ ⲉⲃⲟⲗ ⲉⲡⲉϥⲣⲁⲥϯ ⲛⲁϥⲫⲱⲣϣ ⲇⲉ ⲙⲡⲓⲥⲁϫⲓ ⲉⲃⲟⲗ ϣⲁⲧⲫⲁϣⲓ ⲙⲡⲓⲉϫⲱⲣϩ .
On the first day of the week, when the disciples were gathered together to break bread, Paul talked with them, intending to depart on the next day, and continued his speech until midnight.
20.8
ⲛⲉ ⲟⲩⲟⲛ ⲟⲩⲙⲏϣ ⲇⲉ ⲛⲗⲁⲙⲡⲁⲥ ϧⲉⲛⲡⲓⲙⲁ ⲉⲧⲥⲁⲡϣⲱⲓ ⲡⲓⲙⲁ ⲉⲛⲁⲩⲑⲟⲩⲏⲧ ⲛϧⲏⲧϥ .
There were many lights in the upper chamber where we were gathered together.
20.9
ⲛⲁϥϩⲉⲙⲥⲓ ⲇⲉ ⲡⲉ ⲛϫⲉⲟⲩϧⲉⲗϣⲓⲣⲓ ⲉⲡⲉϥⲣⲁⲛ ⲡⲉ ⲉⲩⲧⲩⲭⲟⲥ ϩⲓϫⲉⲛⲡⲓϣⲟⲩϣⲧ ⲉϥⲟⲃϣ ϧⲉⲛⲟⲩⲛⲓϣϯ ⲛⲉⲛⲕⲟⲧ ⲉⲣⲉⲡⲁⲩⲗⲟⲥ ⲇⲉ ⲥⲁϫⲓ ⲁⲡⲓⲉⲛⲕⲟⲧ ⲥⲟⲕϥ ⲛϩⲟⲩⲟ ⲁϥϩⲉⲓ ⲉⲡⲉⲥⲏⲧ ϧⲉⲛϯⲙⲁϩⲅϯ ⲛⲟⲩⲁϩⲙⲓ ⲟⲩⲟϩ ⲁⲩϥⲓⲧϥ ⲉϥⲙⲱⲟⲩⲧ .
A certain young man named Eutychus sat in the window, weighed down with deep sleep. As Paul spoke still longer, being weighed down by his sleep, he fell down from the third story, and was taken up dead.
20.10
ⲁϥⲓ ⲇⲉ ⲉⲡⲉⲥⲏⲧ ⲛϫⲉⲡⲁⲩⲗⲟⲥ ⲁϥϩⲓⲧϥ ⲉϧⲣⲏⲓ ⲉϫⲱϥ ⲟⲩⲟϩ ⲉⲧⲁϥⲙⲟⲗϫϥ ⲉϧⲏⲧϥ ⲡⲉϫⲁϥ ϫⲉⲙⲡⲉⲣϣⲑⲟⲣⲧⲉⲣ ⲧⲉϥⲯⲩⲭⲏ ⲅⲁⲣ ⲛϧⲏⲧϥ .
Paul went down, and fell upon him, and embracing him said, 'Don't be troubled, for his life is in him.'
20.11
ⲉⲧⲁϥϣⲉ ⲇⲉ ⲉϩⲣⲏⲓ ⲟⲩⲟϩ ⲉⲧⲁϥⲫⲱϣ ⲙⲡⲓⲱⲓⲕ ⲟⲩⲟϩ ⲉⲧⲁϥϫⲉⲙϯⲡⲓ ⲁϥⲥⲱⲕ ⲙⲡⲓⲥⲁϫⲓ ϣⲁⲧⲉ ⲫⲟⲩⲱⲓⲛⲓ ⲓⲉⲃⲟⲗ ⲟⲩⲟϩ ⲡⲁⲓⲣⲏϯ ⲁϥⲓ ⲉⲃⲟⲗ .
When he had gone up, and had broken bread, and eaten, and had talked with them a long while, even until break of day, he departed.
20.12
ⲁⲩⲓⲛⲓ ⲇⲉ ⲙⲡⲓⲁⲗⲟⲩ ⲉϥⲱⲛϧ ⲟⲩⲟϩ ⲁⲩϭⲓ ⲛⲟⲩⲙⲉⲧⲑⲁⲧϩⲏⲧ ⲛⲟⲩⲕⲟⲩϫⲓ ⲁⲛ .
They brought the boy in alive, and were greatly comforted.
20.13
ⲁⲛⲟⲛ ⲇⲉ ⲁⲛⲁⲗⲏⲓ ⲛϣⲟⲣⲡ ⲉⲡⲓϫⲟⲉⲓ ⲁⲛⲓ ⲉϩⲣⲏⲓ ⲉⲁⲥⲥⲟⲥ ⲉⲛⲑⲱϣ ⲉⲧⲁⲗⲉ ⲡⲁⲩⲗⲟⲥ ⲙⲡⲓⲙⲁ ⲉⲧⲉⲙⲙⲁⲩ ⲛⲉⲁϥϩⲟⲛϩⲉⲛ ⲅⲁⲣ ⲉⲧⲟⲧⲉⲛ ⲙⲡⲁⲓⲣⲏϯ ⲉϥⲛⲁⲙⲟϣⲓ ⲛⲣⲁⲧϥ .
But we who went ahead to the ship set sail for Assos, intending to take Paul aboard there, for he had so arranged, intending himself to go by land.
20.14
ⲉⲧⲁϥϯⲙⲁϯ ⲇⲉ ⲉⲣⲟⲛ ϧⲉⲛⲁⲥⲥⲟⲥ ⲁⲛⲧⲁⲗⲟϥ ⲁⲛⲓ ⲉⲙⲓⲗⲓⲧⲓⲛⲏ .
When he met us at Assos, we took him aboard, and came to Mitylene.
20.15
ⲡⲉϥⲣⲁⲥϯ ⲇⲉ ⲁⲛⲉⲣϩⲱⲧ ⲉⲃⲟⲗ ⲙⲙⲁⲩ ⲁⲛϯⲙⲁϯ ⲙⲡⲉⲙⲑⲟ ⲛⲭⲓⲟⲥ ⲛϩⲁⲛⲁⲣⲟⲩϩⲓ ⲇⲉ ⲁⲛⲓ ⲉⲥⲁⲙⲟⲥ ⲙⲉⲛⲉⲛⲥⲱϥ ⲁⲛⲓ ⲉⲙⲓⲗⲏⲧⲟⲥ .
Sailing from there, we came the following day opposite Chios. The next day we touched at Samos and stayed at Trogyllium, and the day after we came to Miletus.
20.16
ⲛⲉ ⲁϥⲑⲱϣ ⲅⲁⲣ ⲛϫⲉⲡⲁⲩⲗⲟⲥ ⲉⲉⲣϩⲱⲧ ⲉⲃⲟⲗ ϩⲓⲧⲉⲛⲉⲫⲉⲥⲟⲥ ϩⲟⲡⲱⲥ ϫⲉⲛⲛⲉϥⲱⲥⲕ ϧⲉⲛϯⲁⲥⲓⲁ ⲛⲁϥⲓⲏⲥⲟⲩⲥ ⲅⲁⲣ ⲡⲉ ϩⲓⲛⲁ ⲓⲥϫⲉ ⲟⲩⲟⲛ ϣϫⲟⲙ ⲛⲧⲉϥⲉⲣ ⲡⲉϩⲟⲟⲩ ⲛϯⲡⲉⲛⲧⲏ ⲕⲟⲥⲧⲏ ϧⲉⲛⲓⲉⲣⲟⲥⲁⲗⲏⲙ .
For Paul had determined to sail past Ephesus, that he might not have to spend time in Asia; for he was hastening, if it were possible for him, to be in Jerusalem on the day of Pentecost.
20.17
ⲉⲃⲟⲗ ⲇⲉ ϧⲉⲛⲙⲓⲗⲏⲧⲟⲥ ⲁϥⲟⲩⲱⲣⲡ ⲉⲉⲫⲉⲥⲟⲥ ⲁϥⲙⲟⲩϯ ⲉⲛⲓⲡⲣⲉⲥⲃⲩⲧⲉⲣⲟⲥ ⲛⲧⲉϯⲉⲕⲕⲗⲏⲥⲓⲁ .
From Miletus he sent to Ephesus, and called to himself the elders of the assembly.
20.18
ⲉⲧⲁⲩⲓ ⲇⲉ ϣⲁⲣⲟϥ ⲡⲉϫⲁϥ ⲛⲱⲟⲩ ϫⲉⲛⲑⲱⲧⲉⲛ ⲧⲉⲧⲉⲛⲥⲱⲟⲩⲛ ϫⲉⲓⲥϫⲉⲛ ⲡⲓⲉϩⲟⲟⲩ ⲛϩⲟⲩⲓⲧ ⲉⲧⲁⲓⲓ ⲉϯⲁⲥⲓⲁ ϫⲉⲁⲓϣⲱⲡⲓ ⲛⲉⲙⲱⲧⲉⲛ ⲛⲁϣ ⲛⲣⲏϯ ⲙⲡⲁⲓⲥⲏⲟⲩ ⲧⲏⲣϥ .
When they had come to him, he said to them, 'You yourselves know, from the first day that I set foot in Asia, how I was with you all the time,
20.19
ⲉⲓⲟⲓ ⲙⲃⲱⲕ ⲙⲡϭⲟⲓⲥ ϧⲉⲛⲑⲉⲃⲓⲟ ⲛϩⲏⲧ ⲛⲓⲃⲉⲛ ⲛⲉⲙϩⲁⲛⲉⲣⲙⲱⲟⲩⲓ ⲛⲉⲙⲛⲓⲡⲓⲣⲁⲥⲙⲟⲥ ⲉⲧⲁⲩⲓ ⲉϩⲣⲏⲓ ⲉϫⲱⲓ ϧⲉⲛⲛⲓⲥⲟϭⲛⲓ ⲉⲧϩⲱⲟⲩ ⲛⲧⲉⲛⲓⲓⲟⲩⲇⲁⲓ .
serving the Lord with all humility, with many tears, and with trials which happened to me by the plots of the Jews;
20.20
ⲙⲫⲣⲏϯ ⲉⲧⲉⲙⲡⲓϩⲉⲡ ϩⲗⲓ ϧⲉⲛⲛⲏ ⲉⲧⲉⲣⲛⲟϥⲣⲓ ⲛⲟⲩϣⲉⲛ ⲧⲁⲙⲱⲧⲉⲛ ⲉⲣⲱⲟⲩ ⲛⲉⲙⲉϯⲥⲃⲱ ⲛⲱⲧⲉⲛ .
how I didn't shrink from declaring to you anything that was profitable, teaching you publicly and from house to house,
20.21
ⲉⲓⲉⲣⲙⲉⲑⲣⲉ ⲛⲇⲏⲙⲟⲥⲓⲁ ⲛⲉⲙⲕⲁⲧⲁⲏⲓ ⲛⲛⲓⲓⲟⲩⲇⲁⲓ ⲛⲉⲙⲛⲓⲟⲩⲉⲓⲛⲓⲛ ⲛϯⲙⲉⲧⲁⲛⲟⲓⲁ ⲛⲧⲉⲫⲛⲟⲩϯ ⲛⲉⲙⲡⲓⲛⲁϩϯ ⲉⲡⲉⲛϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ .
testifying both to Jews and to Greeks repentance toward God, and faith toward our Lord Jesus.
20.22
ⲟⲩⲟϩ ϯⲛⲟⲩ ϩⲏⲡⲡⲉ ⲁⲛⲟⲕ ⲉⲓⲥⲟⲛϩ ϧⲉⲛⲡⲓⲡⲛⲉⲩⲙⲁϯⲛⲁϣⲉ ⲛⲏⲓ ⲉⲓⲉⲣⲟⲥⲁⲗⲏⲙ ϯⲥⲱⲟⲩⲛ ⲁⲛ ⲙⲡⲉⲑⲛⲁⲓ ⲉϧⲟⲩⲛ ⲉϩⲣⲁⲓ ⲛϧⲏⲧⲥ .
Now, behold, I go bound by the Spirit to Jerusalem, not knowing what will happen to me there;
20.23
ⲡⲗⲏⲛ ⲡⲓⲡⲛⲉⲩⲙⲁⲉⲑⲟⲩⲁⲃ ϥⲉⲣⲙⲉⲑⲣⲉ ⲛⲏⲓ ⲕⲁⲧⲁⲡⲟⲗⲓⲥ ⲉϥϫⲱ ⲙⲙⲟⲥ ϫⲉⲥⲉⲟϩⲓ ⲛⲁⲕ ⲛϫⲉϩⲁⲛⲥⲛⲁⲩϩ ⲛⲉⲙϩⲁⲛⲑⲗⲩⲯⲓⲥ .
except that the Holy Spirit testifies in every city, saying that bonds and afflictions wait for me.
20.24
ⲁⲗⲗⲁ ⲧⲁⲯⲩⲭⲏ ϯⲭⲱ ⲙⲙⲟⲥ ⲁⲛ ϫⲉⲥⲧⲁⲓⲏⲟⲩⲧ ⲛⲧⲟⲧϧⲉⲛϩⲗⲓ ⲛⲥⲁϫⲓ ϣⲁϯϫⲱⲕ ⲙⲡⲁⲇⲣⲟⲙⲟⲥ ⲉⲃⲟⲗ ⲛⲉⲙϯⲇⲓⲁⲕⲟⲛⲓⲁ ⲑⲏ ⲉⲧⲁⲓϭⲓⲧⲥ ⲛⲧⲉⲛⲡϭⲟⲓⲥ ⲓⲏⲥⲟⲩⲥ ⲉⲉⲣⲙⲉⲑⲣⲉ ⲙⲡⲓⲉⲩⲁⲅⲅⲉⲗⲓⲟⲛ ⲛⲧⲉⲡⲓϩⲙⲟⲧ ⲛⲧⲉⲫⲛⲟⲩϯ .
But these things don't count; nor do I hold my life dear to myself, so that I may finish my race with joy, and the ministry which I received from the Lord Jesus, to fully testify to the Good News of the grace of God.
20.25
ⲟⲩⲟϩ ϯⲛⲟⲩ ϩⲏⲡⲡⲉ ⲁⲛⲟⲕ ϯⲉⲙⲓ ϫⲉⲧⲉⲧⲉⲛⲛⲁⲩ ⲉⲡⲁϩⲟ ⲁⲛ ϫⲉⲛⲑⲱⲧⲉⲛ ⲧⲏⲣⲟⲩ ⲛⲏ ⲉⲧⲁⲓⲥⲓⲛⲓ ⲛϧⲏⲧⲟⲩ ⲉⲓϩⲓⲱⲓϣ ⲛϯⲙⲉⲧⲟⲩⲣⲟ ⲛⲧⲉⲫⲛⲟⲩϯ .
'Now, behold, I know that you all, among whom I went about preaching the Kingdom of God, will see my face no more.
20.26
ⲉⲑⲃⲉⲫⲁⲓ ϯⲉⲣⲙⲉⲑⲣⲉ ⲛⲱⲧⲉⲛ ϧⲉⲛⲡⲁⲓⲉϩⲟⲟⲩ ⲛⲧⲉⲫⲟⲟⲩ ϫⲉϯⲟⲩⲁⲃ ⲁⲛⲟⲕ ⲉⲃⲟⲗ ϩⲁⲡⲉⲧⲉⲛⲥⲛⲟϥ ⲧⲏⲣⲟⲩ .
Therefore I testify to you this day that I am clean from the blood of all men,
20.27
ⲟⲩ ⲅⲁⲣ ⲙⲡⲓϩⲟⲡⲧ ⲉϣⲧⲉⲙⲧⲁⲙⲱⲧⲉⲛ ⲉⲫⲟⲩⲱϣ ⲧⲏⲣϥ ⲙⲫⲛⲟⲩϯ .
for I didn't shrink from declaring to you the whole counsel of God.
20.28
ⲙⲁϩⲑⲏⲧⲉⲛ ⲉⲣⲱⲧⲉⲛ ⲛⲉⲙⲡⲓⲟϩⲓ ⲧⲏⲣϥ ⲉⲧⲁ ⲡⲓⲡⲛⲉⲩⲙⲁⲉⲑⲟⲩⲁⲃ ⲭⲁ ⲑⲏⲛⲟⲩ ⲛⲉⲡⲓⲥⲕⲟⲡⲟⲥ ⲛϧⲏⲧϥ ⲉⲁⲙⲟⲛⲓ ⲛϯⲉⲕⲕⲗⲏⲥⲓⲁ ⲛⲧⲉⲡϭⲟⲓⲥ ⲑⲏ ⲉⲧⲁϥϫⲫⲟⲥ ⲉⲃⲟⲗ ϩⲓⲧⲉⲛⲡⲉϥⲥⲛⲟϥ ⲙⲙⲓⲛⲙⲙⲟϥ .
Take heed, therefore, to yourselves, and to all the flock, in which the Holy Spirit has made you overseers, to shepherd the assembly of the Lord and God which he purchased with his own blood.
20.29
ⲁⲛⲟⲕ ⲇⲉ ϯⲉⲙⲓ ϫⲉⲙⲉⲛⲉⲛⲥⲁⲑⲣⲓϣⲉ ⲛⲏⲓ ⲥⲉⲛⲁⲓ ⲉϧⲟⲩⲛ ⲉⲣⲱⲧⲉⲛ ⲛϫⲉϩⲁⲛⲟⲩⲱⲛϣ ⲉⲩϩⲟⲣϣ ⲛⲥⲉⲛⲁϯⲁⲥⲟ ⲁⲛ ⲉⲡⲓⲟϩⲓ .
For I know that after my departure, vicious wolves will enter in among you, not sparing the flock.
20.30
ⲟⲩⲟϩ ⲥⲉⲛⲁⲧⲱⲟⲩⲛ ⲛϫⲉϩⲁⲛⲣⲱⲙⲓ ⲉⲃⲟⲗ ϧⲉⲛⲑⲏⲛⲟⲩ ⲉⲩϫⲱ ⲛϩⲁⲛⲥⲁϫⲓ ⲉⲩⲫⲱⲛϩ ⲉⲑⲣⲟⲩⲥⲱⲕ ⲛⲛⲓⲙⲁⲑⲏⲧⲏⲥ ⲥⲁⲙⲉⲛϩⲏⲟⲩ .
Men will arise from among your own selves, speaking perverse things, to draw away the disciples after them.
20.31
ⲉⲑⲃⲉⲫⲁⲓ ⲟⲩⲛ ⲣⲱⲓⲥ ⲉⲣⲱⲧⲉⲛ ⲉⲣⲉⲧⲉⲛⲓⲣⲓ ⲙⲫⲙⲉⲩⲓ ϫⲉⲁⲓⲉⲣ ⲅϯ ⲛⲣⲟⲙⲡⲓ ⲙⲡⲓⲭⲁⲧⲟⲧ ⲉⲃⲟⲗ ⲙⲡⲓⲉϩⲟⲟⲩ ⲛⲉⲙⲡⲓⲉϫⲱⲣϩ ⲉⲓϯⲥⲃⲱ ⲙⲫⲟⲩⲁⲓ ⲫⲟⲩⲁⲓ ⲙⲙⲱⲧⲉⲛ ϧⲉⲛϩⲁⲛⲉⲣⲙⲱⲟⲩⲓ .
Therefore watch, remembering that for a period of three years I didn't cease to admonish everyone night and day with tears.
20.32
ⲟⲩⲟϩ ϯⲛⲟⲩ ϯⲭⲱ ⲙⲙⲱⲧⲉⲛ ϧⲁⲧⲉⲛⲡϭⲟⲓⲥ ⲛⲉⲙⲡⲥⲁϫⲓ ⲛⲧⲉⲡⲉϥϩⲙⲟⲧ ⲫⲏ ⲉⲧⲉⲟⲩⲟⲛ ϣϫⲟⲙ ⲙⲙⲟϥ ⲉⲑⲱϣ ⲟⲩⲟϩ ⲉϯⲕⲗⲏⲣⲟⲛⲟⲙⲓⲁ ϧⲉⲛⲛⲏ ⲉⲧⲁⲩⲧⲟⲩⲃⲱⲟⲩ ⲧⲏⲣⲟⲩ .
Now, brothers, I entrust you to God, and to the word of his grace, which is able to build up, and to give you the inheritance among all those who are sanctified.
20.33
ⲟⲩϩⲁⲧ ⲓⲉ ⲟⲩⲛⲟⲩⲃ ⲓⲉ ⲟⲩϩⲃⲱⲥ ⲙⲡⲓⲉⲣⲉⲡⲓⲑⲩⲙⲓⲛ ⲉⲟⲩⲟⲛ ⲙⲙⲱⲟⲩ .
I coveted no one's silver, or gold, or clothing.
20.34
ⲛⲑⲱⲧⲉⲛ ⲧⲉⲧⲉⲛⲥⲱⲟⲩⲛ ϫⲉⲛⲁϫⲓϫ ⲛⲁⲓ ⲁⲩϣⲉⲙϣⲓ ⲛⲧⲁⲭⲣⲓⲁ ⲛⲉⲙⲛⲏ ⲉⲑⲛⲉⲙⲏⲓ .
You yourselves know that these hands served my necessities, and those who were with me.
20.35
ⲁⲓⲧⲁⲙⲱⲧⲉⲛ ⲉϩⲱⲃ ⲛⲓⲃⲉⲛ ϫⲉⲥϣⲉ ⲛϧⲟⲥⲓ ⲙⲡⲁⲓⲣⲏϯ ⲛⲧⲉⲛϯⲧⲟⲧⲟⲩ ⲛⲛⲏ ⲉⲧϣⲱⲛⲓ ⲛⲧⲉⲧⲉⲛⲉⲣⲫⲙⲉⲩⲓ ⲛⲛⲓⲥⲁϫⲓ ⲛⲧⲉⲡϭⲟⲓⲥ ⲓⲏⲥⲟⲩⲥ ϫⲉⲛⲑⲟϥ ⲁϥϫⲟⲥ ϫⲉⲟⲩⲙⲉⲧⲙⲁⲕⲁⲣⲓⲟⲥ ⲧⲉ ⲙⲁⲗⲗⲟⲛ ⲉϯ ⲉϩⲟⲧⲉ ⲉϭⲓ .
In all things I gave you an example, that so laboring you ought to help the weak, and to remember the words of the Lord Jesus, that he himself said, 'It is more blessed to give than to receive.''
20.36
ⲟⲩⲟϩ ⲛⲁⲓ ⲉⲧⲁϥϫⲟⲧⲟⲩ ⲁϥϩⲓⲧϥ ⲉϫⲉⲛⲛⲉϥⲕⲉⲗⲓ ⲛⲉⲙⲱⲟⲩ ⲧⲏⲣⲟⲩ ⲁⲩⲉⲣⲡⲣⲟⲥⲉⲩⲭ ⲉⲥⲑⲉ .
When he had spoken these things, he knelt down and prayed with them all.
20.37
ⲁϥϣⲱⲡⲓ ⲇⲉ ⲛϫⲉⲟⲩⲛⲓϣϯ ⲛⲣⲓⲙⲓ ⲛⲧⲱⲟⲩ ⲧⲏⲣⲟⲩ ⲟⲩⲟϩ ⲁⲩϩⲓⲧⲟⲩ ⲉϧⲣⲏⲓ ⲉϫⲉⲛⲧⲛⲁϩⲃⲓ ⲙⲡⲁⲩⲗⲟⲥ ⲟⲩⲟϩ ⲁⲩϯⲫⲓ ⲉⲣⲱϥ
They all wept a lot, and fell on Paul's neck and kissed him,
20.38
ⲉⲩⲟⲓ ⲛⲙⲕⲁϩ ⲛϩⲏⲧ ⲙⲁⲗⲓⲥⲧⲁ ⲉⲑⲃⲉⲡⲓⲥⲁϫⲓ ⲉⲧⲁϥϫⲟϥ ϫⲉⲥⲉⲛⲁⲛⲁⲩ ⲉⲡⲁϩⲟ ⲁⲛ ϫⲉⲛⲁⲩⲧⲫⲟ ⲇⲉ ⲙⲙⲟϥ ⲉϫⲉⲛⲡⲓϫⲟⲉⲓ .
sorrowing most of all because of the word which he had spoken, that they should see his face no more. And they accompanied him to the ship.
21.1
ⲁⲥϣⲱⲡⲓ ⲇⲉ ⲉⲧⲁⲛϫⲱⲟⲩⲛ ⲉⲃⲟⲗ ⲁⲛⲫⲱⲣϫ ⲉⲃⲟⲗ ⲙⲙⲱⲟⲩ ⲁⲛⲉⲣϩⲱⲧ ⲉⲛⲥⲱⲟⲩⲧⲉⲛ ⲁⲛⲓ ⲉϩⲣⲏⲓ ⲉⲕⲱ ⲡⲉϥⲣⲁⲥϯ ⲇⲉ ⲁⲛⲓ ⲉⲣⲟⲇⲟⲥ ⲟⲩⲟϩ ⲉⲃⲟⲗ ⲙⲙⲁⲩ ⲁⲛⲓ ⲉⲡⲁⲧⲁⲣⲁ .
When it happened that we had parted from them and had set sail, we came with a straight course to Cos, and the next day to Rhodes, and from there to Patara.
21.2
ⲟⲩⲟϩ ⲉⲧⲁⲛϫⲓⲙⲓ ⲛⲟⲩϫⲟⲉⲓ ⲉϥⲛⲁⲉⲣϫⲓⲛⲓⲟⲣ ⲉϯⲫⲟⲓⲛⲓⲕⲏ ⲁⲛⲁⲗⲏⲓ ⲁⲛϫⲱⲟⲩⲛ ⲉⲃⲟⲗ .
Having found a ship crossing over to Phoenicia, we went aboard, and set sail.
21.3
ⲉⲧⲁⲛⲛⲁⲩ ⲇⲉ ⲉⲕⲩⲡⲣⲟⲥ ⲁⲛⲥⲟϫⲡⲥ ⲥⲁϫⲁϭⲏ ⲙⲙⲟⲛ ⲁⲛⲉⲣϩⲱⲧ ⲉⲧⲥⲩⲣⲓⲁ ⲟⲩⲟϩ ⲁⲛⲓ ⲉⲧⲩⲣⲟⲥ ⲛⲁⲣⲉⲡⲓϫⲟⲉⲓ ⲅⲁⲣ ⲛⲁϩⲓⲟⲩⲓ ⲙⲡⲉϥⲁⲟⲩⲓⲛ ⲙⲙⲁⲩ .
When we had come in sight of Cyprus, leaving it on the left hand, we sailed to Syria, and landed at Tyre, for there the ship was to unload her cargo.
21.4
ⲉⲧⲁⲛϫⲓⲙⲓ ⲇⲉ ⲛⲛⲓⲙⲁⲑⲏⲧⲏⲥ ⲁⲛϣⲱⲡⲓ ⲙⲙⲁⲩ ϧⲁⲧⲟⲧⲟⲩ ⲛⲍ ⲛⲉϩⲟⲟⲩ ⲛⲁⲓ ⲉⲧⲉⲛⲁⲩϫⲱ ⲙⲙⲟⲥ ⲙⲡⲁⲩⲗⲟⲥ ⲉⲃⲟⲗ ϩⲓⲧⲉⲛⲡⲓⲡⲛⲉⲩⲙⲁⲉϣⲧⲉⲙⲑⲣⲉϥϣⲉ ⲉϩⲣⲏⲓ ⲉⲓⲉⲣⲟⲥⲁⲗⲏⲙ .
Having found disciples, we stayed there seven days. These said to Paul through the Spirit, that he should not go up to Jerusalem.
21.5
ⲁⲥϣⲱⲡⲓ ⲇⲉ ⲉⲧⲁⲛϫⲱⲕ ⲛⲛⲓⲉϩⲟⲟⲩ ⲉⲃⲟⲗ ⲁⲛⲓ ⲉⲃⲟⲗ ⲁⲛⲙⲟϣⲓ ⲉⲩⲧⲫⲟ ⲙⲙⲟⲛ ⲉⲃⲟⲗ ⲧⲏⲣⲟⲩ ⲛⲉⲙϩⲁⲛⲕⲉϩⲓⲟⲙⲓ ⲛⲉⲙⲛⲟⲩϣⲏ ⲣⲓ ϣⲁⲥⲁⲃⲟⲗ ⲛϯⲡⲟⲗⲓⲥ ⲟⲩⲟϩ ⲁⲛϩⲓⲧⲉⲛ ϩⲓϫⲉⲛⲛⲉⲛⲕⲉⲗⲓ ϩⲓϫⲉⲛⲡⲓⲭⲣⲟ ⲁⲛⲉⲣⲡⲣⲟⲥⲉⲩⲭ ⲉⲥⲑⲉ
When it happened that we had accomplished the days, we departed and went on our journey. They all, with wives and children, brought us on our way until we were out of the city. Kneeling down on the beach, we prayed.
21.6
ⲟⲩⲟϩ ⲁⲛⲉⲣⲁⲡⲟⲧⲁⲍⲉⲥⲑⲉ ⲉⲃⲟⲗ ϩⲁⲛⲉⲛⲉⲣⲏⲟⲩ ⲁⲛⲁⲗⲏⲓ ⲉⲡⲓϫⲟⲉⲓ ⲛⲏ ⲇⲉ ⲁⲩⲕⲟⲧⲟⲩ ⲉⲛⲏ ⲉⲧⲉⲛⲟⲩⲟⲩ .
After saying goodbye to each other, we went on board the ship, and they returned home again.
21.7
ⲁⲛⲟⲛ ⲇⲉ ⲁⲛⲉⲣϩⲱⲧ ⲉⲃⲟⲗ ϧⲉⲛⲧⲩⲣⲟⲥ ⲁⲛⲓ ⲉϩⲣⲏⲓ ⲉⲡⲧⲟⲗⲉⲙⲁⲓⲥ ⲟⲩⲟϩ ⲉⲧⲁⲛⲉⲣⲁⲥⲡⲁⲍⲉⲥⲑⲉ ⲛⲛⲓⲥⲛⲏⲟⲩ ⲁⲛϣⲱⲡⲓ ϧⲁⲧⲟⲧⲟⲩ ⲛⲟⲩⲉϩⲟⲟⲩ .
When we had finished the voyage from Tyre, we arrived at Ptolemais. We greeted the brothers, and stayed with them one day.
21.8
ⲡⲉϥⲣⲁⲥϯ ⲇⲉ ⲉⲧⲁⲛⲓ ⲉⲃⲟⲗ ⲁⲛⲓ ⲉⲕⲉⲥⲁⲣⲓⲁ ⲟⲩⲟϩ ⲉⲧⲁⲛϣⲉ ⲉϧⲟⲩⲛ ⲉⲡⲏⲓ ⲙⲫⲓⲗⲓⲡⲡⲟⲥ ⲡⲓⲣⲉϥϩⲓϣⲉⲛⲛⲟⲩϥⲓ ⲉⲟⲩⲁⲓ ⲡⲉ ⲉⲃⲟⲗ ϧⲉⲛⲡⲓⲍ ⲁⲛϣⲱⲡⲓ ϧⲁⲧⲟⲧϥ .
On the next day, we, who were Paul's companions, departed, and came to Caesarea. We entered into the house of Philip the evangelist, who was one of the seven, and stayed with him.
21.9
ⲫⲁⲓ ⲇⲉ ⲛⲉⲟⲩⲟⲛ ⲛⲧⲁϥ ⲙⲙⲁⲩ ⲛⲇ ⲛϣⲉⲣⲓ ⲙⲡⲁⲣⲑⲉⲛⲟⲥ ⲉⲩⲉⲣⲡⲣⲟⲫⲏⲧⲉⲩⲓⲛ .
Now this man had four virgin daughters who prophesied.
21.10
ⲉⲧⲁⲛϣⲱⲡⲓ ⲇⲉ ⲙⲙⲁⲩ ⲛⲟⲩⲙⲏϣ ⲛⲉϩⲟⲟⲩ ⲁϥⲓ ⲛϫⲉⲟⲩⲁⲓ ⲉⲃⲟⲗ ϧⲉⲛϯⲓⲟⲩⲇⲉⲁ ⲉⲟⲩⲡⲣⲟⲫⲏⲧⲏⲥ ⲡⲉ ⲉⲡⲉϥⲣⲁⲛ ⲡⲉ ⲁⲅⲁⲃⲟⲥ .
As we stayed there some days, a certain prophet named Agabus came down from Judea.
21.11
ⲟⲩⲟϩ ⲉⲧⲁϥⲓ ϣⲁⲣⲟⲛ ⲁϥⲱⲗⲓ ⲛϯⲍⲱⲛⲏ ⲛⲧⲉⲡⲁⲩⲗⲟⲥ ⲁϥⲙⲟⲩⲣ ⲛⲛⲉϥϫⲓϫ ⲛⲉⲙⲛⲉϥϭⲁⲗⲁⲩϫ ⲡⲉϫⲁϥ ⲛⲁⲓ ⲛⲉⲛⲏ ⲉⲧⲉϥϫⲱ ⲙⲙⲱⲟⲩ ⲛϫⲉⲡⲓⲡⲛⲉⲩⲙⲁⲉⲑⲟⲩⲁⲃ ϫⲉⲡⲓⲣⲱⲙⲓ ⲉⲧⲉⲫⲱϥ ⲡⲉ ⲡⲁⲓⲙⲟϫϧ ⲥⲉⲛⲁⲥⲟⲛϩϥ ⲙⲡⲁⲓⲣⲏϯ ϧⲉⲛⲓⲉⲣⲟⲥⲁⲗⲏⲙ ⲛϫⲉⲛⲓⲓⲟⲩⲇⲁⲓ ⲟⲩⲟϩ ⲥⲉⲛⲁⲧⲏ ⲓϥ ⲉϧⲣⲏⲓ ⲉⲛⲉⲛϫⲓϫ ⲛϩⲁⲛⲉⲑⲛⲟⲥ .
Coming to us, and taking Paul's belt, he bound his own feet and hands, and said, 'Thus says the Holy Spirit: 'So will the Jews at Jerusalem bind the man who owns this belt, and will deliver him into the hands of the Gentiles.''
21.12
ⲉⲧⲁⲛⲥⲱⲧⲉⲙ ⲇⲉ ⲉⲛⲁⲓ ⲛⲁⲛϯϩⲟ ⲡⲉ ⲁⲛⲟⲛ ⲛⲉⲙⲛⲓⲥⲛⲏⲟⲩ ⲛⲧⲉⲡⲓⲙⲁ ⲉⲧⲉⲙⲙⲁⲩ ⲉϣⲧⲉⲙⲧⲣⲉϥϣⲉ ⲉϩⲣⲏⲓ ⲉⲓⲉⲣⲟⲥⲁⲗⲏⲙ .
When we heard these things, both we and they of that place begged him not to go up to Jerusalem.
21.13
ⲧⲟⲧⲉ ⲁϥⲉⲣⲟⲩⲱ ⲛϫⲉⲡⲁⲩⲗⲟⲥ ϫⲉⲟⲩ ⲡⲉⲧⲉⲧⲉⲛⲣⲁ ⲙⲙⲟϥ ⲉⲣⲉⲧⲉⲛⲣⲓⲙⲓ ⲟⲩⲟϩ ⲉⲣⲉⲧⲉⲛϯⲙⲕⲁϩ ⲙⲡⲁϩⲏⲧ ⲁⲛⲟⲕ ⲅⲁⲣ ⲟⲩ ⲙⲟⲛⲟⲛ ⲉⲥⲟⲛϩⲧ ⲁⲗⲗⲁ ϯⲥⲉⲃⲧⲱⲧ ⲉⲙⲟⲩ ϧⲉⲛⲓⲉⲣⲟⲥⲁⲗⲏⲙ ⲉϩⲣⲏⲓ ⲉϫⲉⲛⲫⲣⲁⲛ ⲙⲡϭⲟⲓⲥ ⲓⲏⲥⲟⲩⲥ .
Then Paul answered, 'What are you doing, weeping and breaking my heart? For I am ready not only to be bound, but also to die at Jerusalem for the name of the Lord Jesus.'
21.14
ⲉⲧⲉⲙⲡⲉ ⲡⲉϥϩⲏⲧ ⲇⲉ ⲑⲱⲧ ⲁⲛⲭⲁⲣⲱⲛ ⲉⲛϫⲱ ⲙⲙⲟⲥ ϫⲉⲡⲉⲧⲉϩⲛⲁϥ ⲙⲡϭⲟⲓⲥ ⲙⲁⲣⲉϥϣⲱⲡⲓ .
When he would not be persuaded, we ceased, saying, 'The Lord's will be done.'
21.15
ⲙⲉⲛⲉⲛⲥⲁⲛⲁⲓⲉϩⲟⲟⲩ ⲇⲉ ⲉⲧⲁⲛⲥⲉⲃⲧⲱⲧⲉⲛ ⲛⲁⲛⲛⲁ ⲉϩⲣⲏⲓ ⲉⲓⲉⲣⲟⲥⲁⲗⲏⲙ .
After these days we took up our baggage and went up to Jerusalem.
21.16
ⲁⲩⲓ ⲇⲉ ⲛⲉⲙⲁⲛ ⲉⲃⲟⲗ ϧⲉⲛⲕⲉⲥⲁⲣⲓⲁ ⲛϫⲉϩⲁⲛⲟⲩⲟⲛ ⲉⲃⲟⲗ ϧⲉⲛⲛⲓⲙⲁⲑⲏⲧⲏⲥ ⲉⲁⲩⲓⲛⲓ ⲙⲫⲏ ⲉⲧⲉⲛⲛⲁϫⲱⲓⲗⲓ ⲉⲣⲟϥ ⲟⲩⲁⲓ ϫⲉⲛⲁⲥⲥⲱⲛ ⲟⲩⲕⲩⲡⲣⲓⲟⲥ ⲟⲩⲁⲣⲭⲉⲟⲥ ⲙⲙⲁⲑⲏⲧⲏⲥ .
Some of the disciples from Caesarea also went with us, bringing one Mnason of Cyprus, an early disciple, with whom we would stay.
21.17
ⲉⲧⲁⲛⲓ ⲇⲉ ⲉϩⲣⲏⲓ ⲉⲓⲉⲣⲟⲥⲁⲗⲏⲙ ⲁⲩϣⲟⲡⲧⲉⲛ ⲉⲣⲱⲟⲩ ϧⲉⲛⲟⲩⲣⲁϣⲓ ⲛϫⲉⲛⲓⲥⲛⲏⲟⲩ .
When we had come to Jerusalem, the brothers received us gladly.
21.18
ⲡⲉϥⲣⲁⲥϯ ⲇⲉ ⲁϥⲓ ⲛϫⲉⲡⲁⲩⲗⲟⲥ ⲛⲉⲙⲁⲛ ϣⲁⲓⲁⲕⲱⲃⲟⲥ ⲁⲩⲓ ⲇⲉ ϩⲁⲣⲟϥ ⲛϫⲉⲛⲓⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ .
The day following, Paul went in with us to James; and all the elders were present.
21.19
ⲟⲩⲟϩ ⲉⲧⲁϥⲉⲣⲁⲥⲡⲁⲍⲉⲥⲑⲉ ⲙⲙⲱⲟⲩ ⲛⲁϥⲥⲁϫⲓ ϧⲁⲧⲟⲧⲟⲩ ⲕⲁⲧⲁⲟⲩⲁⲓ ⲟⲩⲁⲓ ⲛⲛⲏ ⲉⲧⲁ ⲫⲛⲟⲩϯ ⲁⲓⲧⲟⲩ ϧⲉⲛⲛⲓⲉⲑⲛⲟⲥ ⲉⲃⲟⲗ ϩⲓⲧⲉⲛⲧⲉϥⲇⲓⲁⲕⲟⲛⲓⲁ .
When he had greeted them, he reported one by one the things which God had worked among the Gentiles through his ministry.
21.20
ⲛⲑⲱⲟⲩ ⲇⲉ ⲉⲧⲁⲩⲥⲱⲧⲉⲙ ⲁⲩϯⲱⲟⲩ ⲙⲫⲛⲟⲩϯ ⲡⲉϫⲱⲟⲩ ⲇⲉ ⲛⲁϥ ϫⲉⲭⲛⲁⲩ ⲡⲉⲛⲥⲟⲛ ϫⲉⲟⲩⲟⲛ ⲟⲩⲏⲣ ⲛⲑⲃⲁ ⲉⲃⲟⲗ ϧⲉⲛⲛⲓⲓⲟⲩⲇⲁⲓ ⲉⲁⲩⲛⲁϩϯ ⲟⲩⲟϩ ϩⲁⲛⲣⲉϥⲭⲟϩ ⲧⲏⲣⲟⲩ ⲛⲉⲛⲧⲉⲡⲓⲛⲟⲙⲟⲥ .
They, when they heard it, glorified God. They said to him, 'You see, brother, how many thousands there are among the Jews of those who have believed, and they are all zealous for the law.
21.21
ⲁⲩⲧⲁⲙⲱⲟⲩ ⲇⲉ ⲉⲑⲃⲏⲧⲕ ϫⲉⲕϯⲥⲃⲱ ⲛⲛⲓⲓⲟⲩⲇⲁⲓ ⲉⲧϧⲉⲛⲛⲓⲉⲑⲛⲟⲥ ⲉⲑⲣⲟⲩϩⲉⲛⲟⲩ ⲥⲁⲃⲟⲗ ⲙⲙⲱⲩⲥⲏⲥ ⲉⲕϫⲱ ⲙⲙⲟⲥ ϫⲉⲙⲡⲉⲣⲥⲟⲩⲃⲉ ⲛⲉⲧⲉⲛϣⲏⲣⲓ ⲟⲩⲇⲉ ⲙⲡⲉⲣⲙⲟϣⲓ ⲕⲁⲧⲁⲛⲓⲥⲩⲛⲏⲑⲓⲁ .
They have been informed about you, that you teach all the Jews who are among the Gentiles to forsake Moses, telling them not to circumcise their children neither to walk after the customs.
21.22
ⲟⲩ ϫⲉⲡⲁⲛⲧⲟⲥ ⲥⲉⲛⲁⲥⲱⲧⲉⲙ ϫⲉⲁⲕⲓ .
What then? The assembly must certainly meet, for they will hear that you have come.
21.23
ⲫⲁⲓ ⲟⲩⲛ ⲁⲣⲓⲧϥ ⲉⲧⲉⲛⲛⲁϫⲟϥ ⲛⲁⲕ ⲟⲩⲟⲛⲧⲁⲛ ⲛⲇ ⲛⲣⲱⲙⲓ ⲉⲟⲩⲟⲛ ⲛⲧⲱⲟⲩ ⲛⲟⲩⲉⲩⲭⲏ ⲉⲃⲟⲗ ϩⲓⲧⲟⲧⲟⲩ .
Therefore do what we tell you. We have four men who have taken a vow.
21.24
ϭⲓ ⲛⲛⲁⲓ ⲙⲁⲧⲟⲩⲃⲟⲕ ⲛⲉⲙⲱⲟⲩ ⲟⲩⲟϩ ϭⲉ ⲇⲁⲡⲁⲛⲏ ⲉⲃⲟⲗ ⲉⲣⲱⲟⲩ ϩⲓⲛⲁ ⲛⲥⲉϧⲉⲕ ϫⲱⲟⲩ ⲟⲩⲟϩ ⲉⲩⲉⲉⲙⲓ ⲧⲏⲣⲟⲩ ϫⲉⲛⲏ ⲉⲧⲁⲩϫⲟⲧⲟⲩ ⲉⲑⲃⲏⲧⲕ ϩⲁⲛϩⲗⲓ ⲛⲉⲁⲗⲗⲁ ϫⲉⲕϯⲙⲁϯ ϩⲱⲕ ⲉⲁⲣⲉϩ ⲉⲡⲓⲛⲟⲙⲟⲥ .
Take them, and purify yourself with them, and pay their expenses for them, that they may shave their heads. Then all will know that there is no truth in the things that they have been informed about you, but that you yourself also walk keeping the law.
21.25
ⲉⲑⲃⲉⲛⲓⲉⲑⲛⲟⲥ ⲇⲉ ⲉⲧⲁⲩⲛⲁϩϯ ⲁⲛⲟⲛ ⲁⲛⲟⲩⲱⲣⲡ ⲉⲁⲛϯϩⲁⲡ ⲉⲑⲣⲟⲩⲁⲣⲉϩ ⲉⲣⲱⲟⲩ ⲉⲃⲟⲗ ϩⲁⲛⲓϣⲱⲧ ⲛⲓⲇⲱⲗⲟⲛ ⲛⲉⲙⲛⲓⲥⲛⲟϥ ⲛⲉⲙⲛⲓⲱϫϩ ⲛⲉⲙϯⲡⲟⲣⲛⲉⲓⲁ .
But concerning the Gentiles who believe, we have written our decision that they should observe no such thing, except that they should keep themselves from food offered to idols, from blood, from strangled things, and from sexual immorality.'
21.26
ⲧⲟⲧⲉ ⲡⲁⲩⲗⲟⲥ ⲁϥϭⲓ ⲛⲛⲓⲣⲱⲙⲓ ϧⲉⲛⲡⲓⲉϩⲟⲟⲩ ⲉⲑⲛⲏⲟⲩ ⲁϥⲧⲟⲩⲃⲟϥ ⲛⲉⲙⲱⲟⲩ ⲁϥϣⲉ ⲉϧⲟⲩⲛ ⲉⲡⲓⲉⲣⲫⲉⲓ ⲉϥⲟⲩⲟⲛϩ ⲉⲃⲟⲗ ⲙⲡⲓϫⲱⲕ ⲉⲃⲟⲗ ⲛⲧⲉⲛⲓⲉϩⲟⲟⲩ ⲛⲧⲉⲡⲓⲧⲟⲩⲃⲟ ϣⲁⲧⲟⲩⲓⲛⲓ ⲛϯⲡⲣⲟⲥⲫⲱⲣⲁ ⲛⲧⲉⲡⲓⲟⲩⲁⲓ ⲡⲓⲟⲩⲁⲓ ⲙⲙⲱⲟⲩ ⲉϩⲣⲏⲓ ⲉϫⲱϥ .
Then Paul took the men, and the next day, purified himself and went with them into the temple, declaring the fulfillment of the days of purification, until the offering was offered for every one of them.
21.27
ⲉⲩⲛⲁϫⲱⲕ ⲇⲉ ⲉⲃⲟⲗ ⲛϫⲉⲡⲓⲍ ⲛⲉϩⲟⲟⲩ ⲉⲧⲁⲩⲛⲁⲩ ⲉⲣⲟϥ ⲛϫⲉⲛⲓⲓⲟⲩⲇⲁⲓ ⲛⲧⲉϯⲁⲥⲓⲁ ⲉϥϧⲉⲛ ⲡⲓⲉⲣⲫⲉⲓ ⲁⲩϣⲑⲟⲣⲧⲉⲣ ⲙⲡⲓⲙⲏ ϣⲧⲏⲣϥ ⲟⲩⲟϩ ⲁⲩⲓⲛⲓ ⲛⲛⲟⲩϫⲓϫ ⲉϩⲣⲏⲓ ⲉϫⲱϥ
When the seven days were almost completed, the Jews from Asia, when they saw him in the temple, stirred up all the multitude and laid hands on him,
21.28
ⲉⲩϫⲱ ⲙⲙⲟⲥ ϫⲉⲛⲓⲣⲱⲙⲓ ⲛⲓⲓⲥⲣⲁⲏⲗⲓⲧⲏⲥ ⲁⲣⲓⲃⲟⲏⲑⲓⲛ ⲫⲁⲓ ⲡⲉ ⲡⲓⲣⲱⲙⲓ ⲉⲧϯ ⲉϧⲟⲩⲛ ⲉϩⲣⲉⲛⲡⲓⲗⲁⲟⲥ ⲛⲉⲙⲡⲓⲛⲟⲙⲟⲥ ⲛⲉⲙⲡⲁⲓⲙⲁ ⲉϥϯⲥⲃⲱ ⲛⲟⲩⲟⲛ ⲛⲓⲃⲉⲛ ϧⲉⲛⲙⲁⲓ ⲛⲓⲃⲉⲛ ⲉⲧⲓ ⲇⲉ ⲛⲉⲙϩⲁⲛⲕⲉⲟⲩⲉⲓⲛⲓⲛ ⲉⲁϥⲉⲛⲟⲩ ⲉϧⲟⲩⲛ ⲉⲡⲓⲉⲣⲫⲉⲓ ⲟⲩⲟϩ ⲁϥⲥⲱϥ ⲙⲡⲓⲙⲁ ⲉⲑⲟⲩⲁⲃ .
crying out, 'Men of Israel, help! This is the man who teaches all men everywhere against the people, and the law, and this place. Moreover, he also brought Greeks into the temple, and has defiled this holy place!'
21.29
ⲛⲉ ⲁⲩⲉⲣϣⲟⲣⲡ ⲅⲁⲣ ⲡⲉ ⲛⲛⲁⲩ ⲉⲧⲣⲟⲫⲏ ⲙⲟⲥ ⲛⲉⲙⲁϥ ϧⲉⲛϯⲡⲟⲗⲓⲥ ⲡⲓⲣⲉⲙⲉⲫⲉⲥⲟⲥ ⲫⲁⲓ ⲛⲁⲩⲙⲉⲩⲓ ϫⲉⲁⲡⲁⲩⲗⲟⲥ ⲟⲗϥ ⲉϧⲟⲩⲛ ⲉⲡⲓⲉⲣⲫⲉⲓ .
For they had seen Trophimus, the Ephesian, with him in the city, and they supposed that Paul had brought him into the temple.
21.30
ⲁⲥⲕⲓⲙ ⲇⲉ ⲛϫⲉϯⲡⲟⲗⲓⲥ ⲧⲏⲣⲥ ⲟⲩⲟϩ ⲁϥϣⲱⲡⲓ ⲛϫⲉⲟⲩϭⲟϫⲓ ⲛⲧⲉⲡⲓⲗⲁⲟⲥ ⲧⲏⲣϥ ⲉⲩⲥⲟⲡ ⲟⲩⲟϩ ⲉⲧⲁⲩⲁⲙⲁϩⲓ ⲙⲡⲁⲩⲗⲟⲥ ⲁⲩⲥⲟⲕϥ ⲉⲃⲟⲗ ϧⲉⲛⲡⲓⲉⲣⲫⲉⲓ ⲟⲩⲟϩ ⲥⲁⲧⲟⲧⲟⲩ ⲁⲩⲙⲁϣⲑⲁⲙ ⲛⲛⲓⲣⲱⲟⲩ
All the city was moved, and the people ran together. They seized Paul and dragged him out of the temple. Immediately the doors were shut.
21.31
ⲉⲩⲕⲱϯ ⲇⲉ ⲛⲥⲁϧⲟⲑⲃϥ ⲁⲡⲓϣⲓⲛⲓ ⲇⲉ ϣⲉ ⲉϩⲣⲏⲓ ⲙⲡⲓⲭⲓⲗⲓⲁⲣⲭⲟⲥ ⲛⲧⲉϯⲥⲡⲓⲣⲁ ϫⲉⲁⲥϣⲑⲟⲣⲧⲉⲣ ⲧⲏⲣⲥ ⲛϫⲉⲓⲉⲣⲟⲥⲁⲗⲏⲙ .
As they were trying to kill him, news came up to the commanding officer of the regiment that all Jerusalem was in an uproar.
21.32
ⲥⲁⲧⲟⲧϥ ⲇⲉ ⲁϥϭⲓ ⲛϩⲁⲛⲙⲁⲧⲟⲓ ⲛⲉⲙϩⲁⲛⲉⲕⲁⲧⲟⲛⲧⲁⲣⲭⲟⲥ ⲁϥϭⲟϫⲓ ⲉϫⲱⲟⲩ ⲛⲑⲱⲟⲩ ⲇⲉ ⲉⲧⲁⲩⲛⲁⲩ ⲉⲛⲓⲙⲁⲧⲟⲓ ⲛⲉⲙⲡⲓⲭⲓⲗⲓⲁⲣⲭ ⲟⲥ ⲁⲩⲗⲟϫⲟⲩ ⲉⲩϩⲓⲟⲩⲓ ⲉⲡⲁⲩⲗⲟⲥ .
Immediately he took soldiers and centurions, and ran down to them. They, when they saw the chief captain and the soldiers, stopped beating Paul.
21.33
ⲧⲟⲧⲉ ⲉⲧⲁϥϧⲱⲛⲧ ⲉϧⲟⲩⲛ ⲛϫⲉⲡⲓⲭⲓⲗⲓⲁⲣⲭⲟⲥ ⲁϥⲁⲙⲟⲛⲓ ⲙⲙⲟϥ ⲟⲩⲟϩ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲥⲟⲛϩϥ ⲛϩⲁⲗⲩⲥⲓⲥ ⲃϯ ⲟⲩⲟϩ ⲛⲁϥϣⲓⲛⲓ ϫⲉⲛⲓⲙ ⲡⲉ ⲟⲩⲟϩ ϫⲉⲟⲩ ⲡⲉⲧⲁϥⲁⲓϥ .
Then the commanding officer came near, arrested him, commanded him to be bound with two chains, and inquired who he was and what he had done.
21.34
ϩⲁⲛⲕⲉⲭⲱⲟⲩⲛⲓ ⲇⲉ ⲛⲁⲩⲱϣ ⲉⲃⲟⲗ ⲉⲩϫⲱ ⲛⲕⲉϩⲱⲃ ⲉⲧⲉⲙⲡⲉϥϣϫⲉⲙϫⲟⲙ ⲇⲉ ⲛⲉⲙⲓ ⲉⲡⲓⲧⲁϫⲣⲟ ⲉⲑⲃⲉⲡⲓϣⲑⲟⲣⲧⲉⲣ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲟⲗϥ ⲉϩⲣⲏⲓ ⲉϯⲡⲁⲣⲉⲙⲃⲟⲗⲏ .
Some shouted one thing, and some another, among the crowd. When he couldn't find out the truth because of the noise, he commanded him to be brought into the barracks.
21.35
ϩⲟⲧⲉ ⲇⲉ ⲉⲧⲁϥⲁⲗⲏⲓ ⲉϩⲣⲏⲓ ⲉϫⲉⲛⲛⲓⲧⲱⲧⲉⲣ ⲁⲥϣⲱⲡⲓ ⲉⲑⲣⲟⲩⲧⲱⲟⲩⲛ ⲙⲙⲟϥ ⲛϫⲉⲛⲓⲙⲁⲧⲟⲓ ⲉⲑⲃⲉⲡϭⲓⲛϫⲟⲛⲥ ⲛⲧⲉⲡⲓⲙⲏϣ .
When he came to the stairs, it happened that he was carried by the soldiers because of the violence of the crowd;
21.36
ⲛⲁⲩⲙⲟϣⲓ ⲅⲁⲣ ⲛⲥⲱϥ ⲛϫⲉⲡⲓⲙⲏϣ ⲛⲧⲉⲡⲓⲗⲁⲟⲥ ⲉⲩⲱϣ ⲉⲃⲟⲗ ϫⲉⲁⲗⲓⲧϥ ⲙⲙⲁⲩ .
for the multitude of the people followed after, crying out, 'Away with him!'
21.37
ⲉⲩⲛⲁⲉⲛϥ ⲇⲉ ⲉϧⲟⲩⲛ ⲉϯⲡⲁⲣⲉⲙⲃⲟⲗⲏ ⲡⲉϫⲉ ⲡⲁⲩⲗⲟⲥ ⲙⲡⲓⲭⲓⲗⲓⲁⲣⲭⲟⲥ ϫⲉⲁⲛ ⲥϣⲉ ⲛⲏⲓ ⲛⲧⲁϫⲉ ϩⲗⲓ ⲛⲁⲕ ⲛⲑⲟϥ ⲇⲉ ⲡⲉϫⲁϥ ⲛⲁϥ ϫⲉⲕⲥⲱⲟⲩⲛ ⲣⲱ ⲙⲙⲉⲧⲟⲩⲉⲓⲛⲓⲛ .
As Paul was about to be brought into the barracks, he asked the commanding officer, 'May I speak to you?' He said, 'Do you know Greek?
21.38
ϩⲁⲣⲁ ⲛⲑⲟⲕ ⲁⲛ ⲡⲉ ⲡⲓⲣⲉⲙⲛⲭⲏⲙⲓ ⲉⲧϧⲁϫⲱⲟⲩ ⲛⲛⲁⲓ ⲉϩⲟⲟⲩ ⲁⲕⲓⲣⲓ ⲛϩⲁⲛϣⲑⲟⲣⲧⲉⲣ ⲟⲩⲟϩ ⲁⲕϭⲓ ⲙⲡⲓⲇ ⲛϣⲟ ⲛⲣⲱⲙⲓ ⲛⲧⲉⲛⲓⲥⲓⲕⲁⲣⲓⲟⲥ ⲉⲃⲟⲗ ⲉⲡϣⲁϥⲉ .
Aren't you then the Egyptian, who before these days stirred up to sedition and led out into the wilderness the four thousand men of the Assassins?'
21.39
ⲡⲁⲩⲗⲟⲥ ⲇⲉ ⲡⲉϫⲁϥ ⲛⲁϥ ϫⲉⲁⲛⲟⲕ ⲙⲉⲛ ⲁⲛⲟⲕ ⲟⲩⲣⲱⲙⲓ ⲛⲓⲟⲩⲇⲁⲓ ⲟⲩⲣⲉⲙⲧⲁⲣⲥⲟⲥ ⲛⲧⲉϯⲕⲩⲗⲓⲕⲓⲁ ⲟⲩⲣⲉⲙⲙⲃⲁⲕⲓ ⲛⲧⲉⲟⲩⲃⲁⲕⲓ ⲉⲥⲟⲓ ⲛⲁⲧⲟⲩⲟⲛϩ ⲉⲃⲟⲗ ⲁⲛ ϯⲧⲱⲃϩ ⲟⲩⲛ ⲙⲙⲟⲕ ⲉⲑⲣⲉⲕⲟⲩⲁϩⲥⲁϩⲛⲓ ⲛⲏⲓ ⲛⲧⲁⲥⲁϫⲓ ⲛⲉⲙⲡⲁⲓⲗⲁⲟⲥ .
But Paul said, 'I am a Jew, from Tarsus in Cilicia, a citizen of no insignificant city. I beg you, allow me to speak to the people.'
21.40
ⲉⲧⲁϥⲟⲩⲁϩⲥⲁϩⲛⲓ ⲇⲉ ⲛⲁϥ ⲉⲣⲉⲡⲁⲩⲗⲟⲥ ⲟϩⲓ ⲉⲣⲁⲧϥ ϩⲓϫⲉⲛⲛⲓⲧⲱⲧⲉⲣ ⲁϥⲕⲓⲙ ⲛⲧⲉϥϫⲓϫ ⲟⲩⲃⲉ ⲡⲓⲗⲁⲟⲥ ⲉⲧⲁ ⲟⲩⲛⲓϣϯ ⲇⲉ ⲛⲭⲁⲣⲱϥ ϣⲱⲡⲓ ⲁϥⲱϣ ⲉⲃⲟⲗ ϧⲉⲛϯⲁⲥⲡⲓ ⲙⲙⲉⲧϩⲉⲃⲣⲉⲟⲥ ⲉϥϫⲱ ⲙⲙⲟⲥ .
When he had given him permission, Paul, standing on the stairs, beckoned with his hand to the people. When there was a great silence, he spoke to them in the Hebrew language, saying,
22.1
ⲛⲓⲣⲱⲙⲓ ⲛⲓⲥⲛⲏⲟⲩ ⲟⲩⲟϩ ⲛⲓⲓⲟϯ ⲥⲱⲧⲉⲙ ⲉⲧⲁⲁⲡⲟⲗⲟⲅⲓⲁ ⲉⲧⲉⲛⲧⲏⲓ ϣⲁⲣⲱⲧⲉⲛ ϯⲛⲟⲩ .
'Brothers and fathers, listen to the defense which I now make to you.'
22.2
ⲉⲧⲁⲩⲥⲱⲧⲉⲙ ⲇⲉ ϫⲉⲁϥⲉⲣⲟⲩⲱ ⲛⲱⲟⲩ ϧⲉⲛϯⲁⲥⲡⲓ ⲙⲙⲉⲧϩⲉⲃⲣⲉⲟⲥ ⲙⲁⲗⲗⲟⲛ ⲇⲉ ⲁⲩⲭⲁⲣⲱⲟⲩ ⲟⲩⲟϩ ⲡⲉϫⲁϥ
When they heard that he spoke to them in the Hebrew language, they were even more quiet. He said,
22.3
ϫⲉⲁⲛⲟⲕ ⲙⲉⲛ ⲁⲛⲟⲕ ⲟⲩⲣⲱⲙⲓ ⲛⲓⲟⲩⲇⲁⲓ ⲁⲩⲙⲁⲥⲧ ϧⲉⲛⲧⲁⲣⲥⲟⲥ ⲛⲧⲉϯⲕⲩⲗⲓⲕⲓⲁ ⲉⲁⲩϣⲁⲛⲟⲩϣⲧ ϧⲉⲛⲧⲁⲓⲡⲟⲗⲓⲥ ϧⲁⲧⲉⲛⲛⲉⲛϭⲁⲗⲁⲩϫ ⲛⲅⲁⲙⲁⲗⲓⲏⲗ ⲫⲁⲓ ⲉⲧⲁϥⲧⲥⲁⲃⲟⲓ ⲉⲡⲧⲁϫⲣⲟ ⲛⲧⲉⲫⲛⲟⲙⲟⲥ ⲛⲧⲉⲛⲉⲛⲓⲟϯ ⲉⲓⲟⲓ ⲛⲣⲉϥⲭⲟϩ ⲛⲧⲉⲫⲛⲟⲩϯ ⲕⲁⲧⲁⲫⲣⲏϯ ϩⲱⲧⲉⲛ ⲉⲧⲉⲧⲉⲛⲟⲓ ⲙⲙⲟⲥ ⲛⲑⲱⲧⲉⲛ ⲧⲏⲣⲟⲩ ⲙⲫⲟⲟⲩ .
'I am indeed a Jew, born in Tarsus of Cilicia, but brought up in this city at the feet of Gamaliel, instructed according to the strict manner of the law of our fathers, being zealous for God, even as you all are this day.
22.4
ⲉⲁⲓϭⲟϫⲓ ⲛⲥⲁⲡⲁⲓⲙⲱⲓⲧ ϣⲁⲉϧⲣⲏⲓ ⲉⲫⲙⲟⲩ ⲉⲓⲥⲱⲛϩ ⲛϩⲁⲛⲣⲱⲙⲓ ⲛⲉⲙϩⲁⲛϩⲓⲟⲙⲓ ⲉⲓϩⲓⲟⲩⲓ ⲙⲙⲱⲟⲩ ⲉⲡϣⲧⲉⲕⲟ .
I persecuted this Way to the death, binding and delivering into prisons both men and women.
22.5
ⲙⲫⲣⲏϯ ⲉⲧⲉⲡⲓⲁⲣⲭⲓⲉⲣⲉⲩⲥ ⲟⲓ ⲙⲙⲉⲑⲣⲉ ⲛⲏⲓ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲛⲏ ⲉⲧⲁⲓϭⲓ ⲉⲡⲓⲥⲧⲟⲗⲏ ⲛⲧⲟⲧⲟⲩ ϣⲁⲛⲓⲥⲛⲏⲟⲩ ⲛⲁⲓⲛⲁ ⲇⲉ ⲉⲇⲁⲙⲁⲥⲕⲟⲥ ⲉⲓⲛⲓ ⲛⲛⲓⲕⲉⲭⲱⲟⲩⲛⲓ ⲉⲧⲉⲙⲙⲁⲩ ⲉⲩⲥⲟⲛϩ ⲉϩⲣⲏⲓ ⲉⲓⲉⲣⲟⲥⲁⲗⲏⲙ ϩⲓⲛⲁ ⲛⲥⲉϯⲙⲕⲁϩ ⲛⲱⲟⲩ .
As also the high priest and all the council of the elders testify, from whom also I received letters to the brothers, and traveled to Damascus to bring them also who were there to Jerusalem in bonds to be punished.
22.6
ⲁⲥϣⲱⲡⲓ ⲇⲉ ⲙⲙⲟⲓ ⲉⲓⲙⲟϣⲓ ⲟⲩⲟϩ ⲉⲧⲁⲓϧⲱⲛⲧ ⲉⲇⲁⲙⲁⲥⲕⲟⲥ ⲙⲡⲕⲱϯ ⲙⲙⲉⲣⲓ ⲛⲟⲩϩⲟϯ ϧⲉⲛⲟⲩϩⲟϯ ⲁϥⲉⲣⲟⲩⲱⲓⲛⲓ ⲉϩⲣⲏⲓ ⲉϫⲱⲓ ⲛϫⲉⲟⲩⲛⲓϣϯ ⲛⲟⲩⲱⲓⲛⲓ ⲉⲃⲟⲗ ϧⲉⲛⲧⲫⲉ .
It happened that, as I made my journey, and came close to Damascus, about noon, suddenly there shone from the sky a great light around me.
22.7
ⲁⲓϩⲉⲓ ⲇⲉ ⲉⲡⲉⲥⲏⲧ ⲟⲩⲟϩ ⲁⲓⲥⲱⲧⲉⲙ ⲉⲟⲩⲥⲙⲏ ⲉⲥϫⲱ ⲙⲙⲟⲥ ⲛⲏⲓ ϫⲉⲥⲁⲟⲩⲗ ⲥⲁⲟⲩⲗ ⲁϧⲟⲕ ⲕϭⲟϫⲓ ⲛⲥⲱⲓ .
I fell to the ground, and heard a voice saying to me, 'Saul, Saul, why are you persecuting me?'
22.8
ⲁⲛⲟⲕ ⲇⲉ ⲁⲓⲉⲣⲟⲩⲱ ϫⲉⲛⲑⲟⲕ ⲛⲓⲙ ⲡϭⲟⲓⲥ ⲡⲉϫⲁϥ ⲇⲉ ⲛⲏⲓ ϫⲉⲁⲛⲟⲕ ⲡⲉ ⲓⲏⲥⲟⲩⲥ ⲡⲓⲛⲁⲍⲱⲣⲉⲟⲥ ⲫⲏ ⲛⲑⲟⲕ ⲉⲧⲉⲕϭⲟϫⲓ ⲛⲥⲱϥ .
I answered, 'Who are you, Lord?' He said to me, 'I am Jesus of Nazareth, whom you persecute.'
22.9
ⲛⲏ ⲇⲉ ⲉⲛⲁⲩⲛⲉⲙⲏⲓ ⲛⲁⲩⲛⲁⲩ ⲙⲉⲛ ⲉⲡⲓⲟⲩⲱⲓⲛⲓ ⲙⲡⲟⲩⲥⲱⲧⲉⲙ ⲇⲉ ⲉⲧⲥⲙⲏ ⲙⲡⲉⲧⲥⲁϫⲓ ⲛⲉⲙⲏⲓ .
'Those who were with me indeed saw the light and were afraid, but they didn't understand the voice of him who spoke to me.
22.10
ⲡⲉϫⲏⲓ ⲇⲉ ϫⲉⲟⲩ ⲡⲉϯⲛⲁⲁⲓϥ ⲡϭⲟⲓⲥ ⲡϭⲟⲓⲥ ⲇⲉ ⲡⲉϫⲁϥ ⲛⲏⲓ ϫⲉⲧⲱⲛⲕ ⲙⲁϣⲉ ⲛⲁⲕ ⲉϩⲣⲏⲓ ⲉⲇⲁⲙⲁⲥⲕⲟⲥ ⲟⲩⲟϩ ⲥⲉⲛⲁⲥⲁϫⲓ ⲛⲉⲙⲁⲕ ⲙⲙⲁⲩ ⲉⲑⲃⲉϩⲱⲃ ⲛⲓⲃⲉⲛ ⲉⲧⲁⲩⲑⲁϣⲟⲩ ⲛⲁⲕ ⲉⲑⲣⲉⲕⲁⲓⲧⲟⲩ .
I said, 'What shall I do, Lord?' The Lord said to me, 'Arise, and go into Damascus. There you will be told about all things which are appointed for you to do.'
22.11
ⲁⲥϣⲱⲡⲓ ⲇⲉ ⲛϯⲛⲁⲩ ⲙⲃⲟⲗ ⲁⲛ ⲛⲧⲉⲛⲡⲱⲟⲩ ⲙⲡⲓⲟⲩⲱⲓⲛⲓ ⲉⲧⲉⲙⲙⲁⲩ ⲁⲩⲁⲙⲟⲛⲓ ⲇⲉ ⲛⲧⲁϫⲓϫ ⲛϫⲉⲛⲏ ⲉⲑⲛⲉⲙⲏⲓ ⲁⲓⲓ ⲉⲇⲁⲙⲁⲥⲕⲟⲥ .
When I couldn't see for the glory of that light, being led by the hand of those who were with me, I came into Damascus.
22.12
ⲟⲩⲁⲓ ⲇⲉ ϫⲉⲁⲛⲁⲛⲓⲁⲥ ⲟⲩⲣⲱⲙⲓ ⲉϥⲉⲣϩⲟϯ ⲕⲁⲧⲁⲡⲓⲛⲟⲙⲟⲥ ⲉⲩⲉⲣⲙⲉⲑⲣⲉ ϧⲁⲣⲟϥ ⲛϫⲉⲛⲓⲓⲟⲩⲇⲁⲓ ⲧⲏⲣⲟⲩ ⲉⲧϣⲟⲡ ⲙⲙⲁⲩ .
One Ananias, a devout man according to the law, well reported of by all the Jews who lived in Damascus,
22.13
ⲉⲧⲁϥⲓ ⲇⲉ ϣⲁⲣⲟⲓ ⲟⲩⲟϩ ⲉⲧⲁϥⲟϩⲓ ⲉⲣⲁⲧϥ ⲡⲉϫⲁϥ ⲛⲏⲓ ϫⲉⲥⲁⲟⲩⲗ ⲡⲁⲥⲟⲛ ⲁⲛⲁⲩ ⲙⲃⲟⲗ ⲁⲛⲟⲕ ⲇⲉ ϩⲱ ϧⲉⲛϯⲟⲩⲛⲟⲩ ⲉⲧⲉⲙⲙⲁⲩ ⲁⲓⲥⲟⲙⲥ ⲉⲣⲟϥ .
came to me, and standing by me said to me, 'Brother Saul, receive your sight!' In that very hour I looked up at him.
22.14
ⲛⲑⲟϥ ⲇⲉ ⲡⲉϫⲁϥ ϫⲉⲫⲛⲟⲩϯ ⲛⲧⲉⲛⲉⲛⲓⲟϯ ⲁϥⲉⲣϣⲟⲣⲡ ⲛⲥⲱⲧⲡⲕ ⲉⲉⲙⲓ ⲉⲡⲉⲧⲉϩⲛⲁϥ ⲟⲩⲟϩ ⲉⲛⲁⲩ ⲉⲡⲓⲑⲙⲏⲓ ⲟⲩⲟϩ ⲉⲥⲱⲧⲉⲙ ⲉⲟⲩⲥⲙⲏ ⲉⲃⲟⲗ ϧⲉⲛⲣⲱϥ .
He said, 'The God of our fathers has appointed you to know his will, and to see the Righteous One, and to hear a voice from his mouth.
22.15
ϫⲉⲭⲛⲁϣⲱⲡⲓ ⲛⲁϥ ⲙⲙⲉⲑⲣⲉ ϧⲁⲧⲉⲛⲣⲱⲙⲓ ⲛⲓⲃⲉⲛ ⲉⲑⲃⲉⲛⲏ ⲉⲧⲁⲕⲛⲁⲩ ⲉⲣⲱⲟⲩ ⲟⲩⲟϩ ⲉⲧⲁⲕⲥⲟⲑⲙⲟⲩ .
For you will be a witness for him to all men of what you have seen and heard.
22.16
ⲟⲩⲟϩ ϯⲛⲟⲩ ⲟⲩ ⲡⲉⲧⲉⲕⲛⲁⲁⲓϥ ⲧⲱⲛⲕ ϭⲓⲱⲙⲥ ⲟⲩⲟϩ ϫⲟⲕⲙⲉⲕ ⲉⲃⲟⲗ ϧⲉⲛⲛⲉⲕⲛⲟⲃⲓ ⲉⲕⲧⲱⲃϩ ⲙⲡⲉϥⲣⲁⲛ .
Now why do you wait? Arise, be baptized, and wash away your sins, calling on the name of the Lord.'
22.17
ⲁⲥϣⲱⲡⲓ ⲇⲉ ⲉⲧⲁⲓⲕⲟⲧⲧ ⲉⲓⲉⲣⲟⲥⲁⲗⲏⲙ ⲟⲩⲟϩ ⲉⲓⲉⲣⲡⲣⲟⲥⲉⲩⲭⲉⲥⲑⲉ ϧⲉⲛⲡⲓⲉⲣⲫⲉⲓ ⲁⲓϣⲱⲡⲓ ϧⲉⲛⲟⲩⲧⲱⲙⲧ .
'It happened that, when I had returned to Jerusalem, and while I prayed in the temple, I fell into a trance,
22.18
ⲁⲓⲛⲁⲩ ⲉⲣⲟϥ ⲉϥϫⲱ ⲙⲙⲟⲥ ⲛⲏⲓ ϫⲉⲁⲙⲟⲩ ⲛⲭⲱⲗⲉⲙ ⲉⲃⲟⲗ ϧⲉⲛⲓⲉⲣⲟⲥⲁⲗⲏⲙ ϫⲉⲟⲩⲏⲓ ⲥⲉⲛⲁϭⲓ ⲙⲉⲧⲙⲉⲑⲣⲉ ⲛⲧⲟⲧⲕ ⲁⲛ ⲉⲑⲃⲏⲧ .
and saw him saying to me, 'Hurry and get out of Jerusalem quickly, because they will not receive testimony concerning me from you.'
22.19
ⲁⲛⲟⲕ ϩⲱ ⲡⲉϫⲏⲓ ϫⲉⲡϭⲟⲓⲥ ⲛⲑⲱⲟⲩ ⲥⲉⲉⲙⲓ ϫⲉⲛⲁⲓϩⲓⲟⲩⲓ ⲉⲡϣⲧⲉⲕⲟ ⲟⲩⲟϩ ⲛⲁⲓϩⲓⲟⲩⲓ ⲕⲁⲧⲁⲥⲩⲛⲁⲅⲱⲅⲏ ⲛⲛⲏ ⲉⲑⲛⲁϩϯ ⲉⲣⲟⲕ .
I said, 'Lord, they themselves know that I imprisoned and beat in every synagogue those who believed in you.
22.20
ⲟⲩⲟϩ ϩⲟⲧⲉ ⲉⲩⲛⲁⲫⲱⲛ ⲉⲃⲟⲗ ⲙⲡⲥⲛⲟϥ ⲛⲥⲧⲉⲫⲁⲛⲟⲥ ⲡⲉⲕⲙⲁⲣⲧⲩⲣⲟⲥ ⲁⲛⲟⲕ ϩⲱ ⲛⲁⲓⲟϩⲓ ⲉⲣⲁⲧⲉⲓϯⲙⲁϯ ⲟⲩⲟϩ ⲛⲁⲓⲁⲣⲉϩ ⲉⲛⲓϩⲃⲱⲥ ⲛⲧⲉⲛⲏ ⲉⲛⲁⲩϧⲱⲧⲉⲃ ⲙⲙⲟϥ .
When the blood of Stephen, your witness, was shed, I also was standing by, and consenting to his death, and guarding the cloaks of those who killed him.'

Bohairic Coptic New Testament, Coptic SCRIPTORIUM (github.com/CopticScriptorium/corpora, corpus bohairic.nt). Coptic text from Marcion / Hany Takla; annotation by Nina Speranskaja, Nicholas Wagner and Amir Zeldes. English is the World English Bible (public domain), aligned by Coptic SCRIPTORIUM. Licence: CC-BY 4.0. Source.