Acts (Bohairic Coptic)

Coptic New Testament (Bohairic) · 1,006 sections

17.1
ⲉⲧⲁⲩⲥⲓⲛⲓ ⲉⲃⲟⲗ ϧⲉⲛϯⲁⲙⲫⲓⲡⲟⲗⲓⲥ ⲛⲉⲙϯⲁⲡⲟⲗⲗⲱⲛⲓⲁ ⲁⲩⲓ ⲉⲑⲉⲥⲥⲁⲗⲟⲛⲓⲕⲏ ⲡⲓⲙⲁ ⲉⲧⲉⲟⲩⲟⲛ ⲟⲩⲥⲩⲛⲁⲅⲱⲅⲏ ⲛϧⲏⲧϥ ⲛⲧⲉⲛⲓⲓⲟⲩⲇⲁⲓ .
Now when they had passed through Amphipolis and Apollonia, they came to Thessalonica, where there was a Jewish synagogue.
17.2
ⲕⲁⲧⲁϯⲥⲩⲛⲏⲑⲓⲁ ⲇⲉ ⲛⲧⲉⲡⲁⲩⲗⲟⲥ ⲁϥϣⲉ ⲉϧⲟⲩⲛ ϣⲁⲣⲱⲟⲩ ⲟⲩⲟϩ ⲛⲁϥⲥⲁϫⲓ ⲛⲉⲙⲱⲟⲩ ⲉⲃⲟⲗ ϧⲉⲛⲛⲓⲅⲣⲁⲫⲏ ϣⲁⲅ ⲛⲥⲁⲃⲃⲁⲧⲟⲛ
Paul, as was his custom, went in to them, and for three Sabbath days reasoned with them from the Scriptures,
17.3
ⲉϥⲟⲩⲟⲛϩ ⲉⲃⲟⲗ ⲟⲩⲟϩ ⲉϥⲭⲱ ϧⲁⲧⲟⲧⲟⲩ ϫⲉϩⲱϯ ⲛⲧⲉⲡⲭⲣⲓⲥⲧⲟⲥ ϭⲓⲙⲕⲁϩ ⲟⲩⲟϩ ⲛⲧⲉϥⲧⲱⲛϥ ⲉⲃⲟⲗ ϧⲉⲛⲛⲏ ⲉⲧⲙⲱⲟⲩⲧ ⲟⲩⲟϩ ϫⲉⲫⲁⲓ ⲡⲉ ⲓⲏⲥⲟⲩⲥ ⲡⲭⲣⲓⲥⲧⲟⲥ ⲫⲁⲓ ⲁⲛⲟⲕ ⲉϯϩⲓⲱⲓϣ ⲙⲙⲟϥ ⲛⲱⲧⲉⲛ .
explaining and demonstrating that the Christ had to suffer and rise again from the dead, and saying, 'This Jesus, whom I proclaim to you, is the Christ.'
17.4
ⲟⲩⲟϩ ϩⲁⲛⲟⲩⲟⲛ ⲇⲉ ⲉⲃⲟⲗ ⲛϧⲏⲧⲟⲩ ⲁⲩⲛⲁϩϯ ⲟⲩⲟϩ ⲁⲩⲱⲡ ⲉⲡⲁⲩⲗⲟⲥ ⲛⲉⲙⲥⲓⲗⲁⲥ ⲛϫⲉⲟⲩⲙⲏϣ ⲉϥⲟϣ ⲛⲧⲉⲛⲏ ⲉⲧⲉⲣⲥⲉⲃⲉⲥⲑⲉ ⲛⲧⲉⲛⲓⲟⲩⲉⲓⲛⲓⲛ ϩⲁⲛϩⲓⲟⲙⲓ ⲇⲉ ⲛⲧⲉⲛⲓϩⲟⲩⲁϯ ⲛϩⲁⲛⲕⲟⲩϫⲓ ⲁⲛ .
Some of them were persuaded, and joined Paul and Silas, of the devout Greeks a great multitude, and not a few of the chief women.
17.5
ⲁⲩⲭⲟϩ ⲇⲉ ⲛϫⲉⲛⲓⲓⲟⲩⲇⲁⲓ ⲟⲩⲟϩ ⲁⲩϭⲓ ⲛϩⲁⲛⲣⲱⲙⲓ ⲉⲩϩⲱⲟⲩ ⲛⲧⲉⲛⲓⲁⲅⲟⲣⲣⲉⲟⲥ ⲟⲩⲟϩ ⲉⲧⲁⲩⲑⲟⲩⲉⲧ ⲟⲩⲙⲏϣ ⲁⲩϣⲑⲟⲣⲧⲉⲣ ⲛϯⲡⲟⲗⲓⲥ ⲟⲩⲟϩ ⲁⲩⲓ ⲉϩⲣⲉⲛⲡⲏⲓ ⲛⲓⲁⲥⲥⲱⲛ ⲉⲩⲕⲱϯ ⲛⲥⲱⲟⲩ ⲛⲥⲉⲉⲛⲟⲩ ⲉⲃⲟⲗ ϩⲁⲡⲓⲙⲏϣ .
But the unpersuaded Jews took along some wicked men from the marketplace, and gathering a crowd, set the city in an uproar. Assaulting the house of Jason, they sought to bring them out to the people.
17.6
ⲉⲧⲉⲙⲡⲟⲩϫⲉⲙⲟⲩ ⲇⲉ ⲁⲩⲱϣϯ ⲛⲓⲁⲥⲥⲱⲛ ⲉⲃⲟⲗ ⲛⲉⲙϩⲁⲛⲕⲉⲥⲛⲏⲟⲩ ϣⲁⲛⲓⲁⲣⲭⲱⲛ ⲛⲧⲉϯⲡⲟⲗⲓⲥ ⲉⲩⲱϣ ⲉⲃⲟⲗ ϫⲉⲛⲁⲓ ⲛⲉⲛⲏ ⲉⲧⲁⲩϣⲑⲟⲣⲧⲉⲣ ⲛϯⲟⲓⲕⲟⲩⲙⲉⲛⲏ ⲟⲩⲟϩ ⲥⲉϣⲟⲡ ⲧⲁⲓ
When they didn't find them, they dragged Jason and certain brothers before the rulers of the city, crying, 'These who have turned the world upside down have come here also,
17.7
ⲉⲁ ⲓⲁⲥⲥⲱⲛ ϣⲟⲡⲟⲩ ⲉⲣⲟϥ ⲟⲩⲟϩ ⲛⲁⲓ ⲧⲏⲣⲟⲩ ⲥⲉϯ ⲉϧⲟⲩⲛ ⲉϩⲣⲉⲛⲛⲓϩⲱⲛ ⲛⲧⲉⲡⲟⲩⲣⲟ ⲉⲩϫⲱ ⲙⲙⲟⲥ ϫⲉϥϣⲟⲡ ⲛϫⲉⲕⲉⲟⲩⲣⲟ ⲓⲏⲥⲟⲩⲥ .
whom Jason has received. These all act contrary to the decrees of Caesar, saying that there is another king, Jesus!'
17.8
ⲁⲩϣⲑⲟⲣⲧⲉⲣ ⲇⲉ ⲙⲡⲓⲙⲏϣ ⲛⲉⲙⲛⲓⲁⲣⲭ ⲱⲛ ⲛⲧⲉϯⲡⲟⲗⲓⲥ ⲉⲩⲥⲱⲧⲉⲙ ⲉⲛⲁⲓ .
The multitude and the rulers of the city were troubled when they heard these things.
17.9
ⲟⲩⲟϩ ⲉⲧⲁⲩϭⲓ ⲙⲡⲉⲧⲥⲉⲙⲡϣⲁ ⲛⲧⲉⲛⲓⲁⲥⲥⲱⲛ ⲛⲉⲙⲛⲓⲕⲉⲥⲱϫⲡ ⲁⲩⲭⲁⲩ ⲉⲃⲟⲗ .
When they had taken security from Jason and the rest, they let them go.
17.10
ⲛⲓⲥⲛⲏⲟⲩ ⲇⲉ ⲥⲁⲧⲟⲧⲟⲩ ⲁⲩⲧⲫⲉ ⲡⲁⲩⲗⲟⲥ ⲉⲃⲟⲗ ⲛⲉⲙⲥⲓⲗⲁⲥ ⲛϫⲱⲣϩ ⲉϩⲣⲏⲓ ⲉⲃⲉⲣⲟⲓⲁ ⲛⲑⲱⲟⲩ ⲇⲉ ⲉⲧⲁⲩⲓ ⲙⲙⲁⲩ ⲁⲩϣⲉ ⲉϧⲟⲩⲛ ⲉϯⲥⲩⲛⲁⲅⲱⲅⲏ ⲛⲧⲉⲛⲓⲓⲟⲩⲇⲁⲓ .
The brothers immediately sent Paul and Silas away by night to Beroea. When they arrived, they went into the Jewish synagogue.
17.11
ⲛⲁⲓ ⲇⲉ ⲛⲉϩⲁⲛⲉⲩⲅⲉⲛⲏⲥ ⲛⲉⲉϩⲟⲧⲉ ⲛⲏ ⲉⲧϧⲉⲛⲑⲉⲥⲥⲁⲗⲟⲛⲓⲕⲏ ⲛⲁⲓ ⲉⲧⲁⲩϣⲉⲡ ⲡⲓⲥⲁϫⲓ ⲉⲣⲱⲟⲩ ϧⲉⲛⲣⲱⲟⲩⲧϥ ⲛϩⲏⲧ ⲛⲓⲃⲉⲛ ⲉⲩϧⲟⲧϧⲉⲧ ⲙⲙⲏⲛⲓ ϧⲉⲛⲛⲓⲅⲣⲁⲫⲏ ϫⲉⲁⲛ ⲛⲁⲓ ϣⲟⲡ ⲙⲡⲁⲓⲣⲏϯ .
Now these were more noble than those in Thessalonica, in that they received the word with all readiness of the mind, examining the Scriptures daily to see whether these things were so.
17.12
ⲟⲩⲙⲏϣ ⲙⲉⲛ ⲟⲩⲛ ⲉⲃⲟⲗ ⲛϧⲏⲧⲟⲩ ⲁⲩⲛⲁϩϯ ⲛⲉⲙϩⲁⲛⲕⲉⲟⲩⲟⲛ ⲉⲃⲟⲗ ϧⲉⲛⲛⲓⲟⲩⲉⲓⲛⲓⲛ ⲛϩⲓⲟⲙⲓ ⲛⲉⲩⲥⲭⲏⲙⲱⲛ ⲛⲉⲙϩⲁⲛⲕⲉⲣⲱⲙⲓ ⲛϩⲁⲛⲕⲟⲩϫⲓ ⲁⲛ .
Many of them therefore believed; also of the prominent Greek women, and not a few men.
17.13
ⲉⲧⲁⲩⲉⲙⲓ ⲇⲉ ⲛϫⲉⲛⲓⲓⲟⲩⲇⲁⲓ ⲛⲧⲉⲑⲉⲥⲥⲁⲗⲟⲛⲓⲕⲏ ϫⲉⲁⲡⲁⲩⲗⲟⲥ ϩⲓⲱⲓϣ ϧⲉⲛⲧⲕⲉⲃⲉⲣⲟⲓⲁ ⲙⲡⲓⲥⲁϫⲓ ⲛⲧⲉⲫⲛⲟⲩϯ ⲁⲩⲓ ⲉⲡⲓⲕⲉⲙⲁ ⲉⲧⲉⲙⲙⲁⲩ ⲉⲩⲕⲓⲙ ⲛⲛⲓⲙⲏϣ ⲉⲩϣⲑⲟⲣⲧⲉⲣ ⲙⲙⲱⲟⲩ .
But when the Jews of Thessalonica had knowledge that the word of God was proclaimed by Paul at Beroea also, they came there likewise, agitating the multitudes.
17.14
ⲧⲟⲧⲉ ⲥⲁⲧⲟⲧⲟⲩ ⲁⲩⲧⲫⲉ ⲡⲁⲩⲗⲟⲥ ⲉⲃⲟⲗ ⲛϫⲉⲛⲓⲥⲛⲏⲟⲩ ⲉⲑⲣⲉϥϣⲉ ⲉϫⲉⲛⲫⲓⲟⲙ ⲁⲩⲥⲱϫⲡ ⲇⲉ ⲙⲙⲁⲩ ⲛϫⲉⲥⲓⲗⲁⲥ ⲛⲉⲙⲧⲓⲙⲟⲑⲉⲟⲥ .
Then the brothers immediately sent out Paul to go as far as to the sea, and Silas and Timothy still stayed there.
17.15
ⲛⲏ ⲇⲉ ⲉⲛⲁⲩⲧⲫⲟ ⲙⲡⲁⲩⲗⲟⲥ ⲉⲃⲟⲗ ⲁⲩⲉⲛϥ ⲉϩⲣⲏⲓ ⲉⲁⲑⲏⲛⲛⲁⲥ ⲟⲩⲟϩ ⲉⲧⲁⲩϭⲓ ⲉⲛⲧⲟⲗⲏ ⲉϭⲓⲡϣⲓⲛⲓ ⲛⲛⲓⲥⲛⲏⲟⲩ ⲥⲓⲗⲁⲥ ⲛⲉⲙⲧⲓⲙⲟⲑⲉⲟⲥ ϩⲓⲛⲁ ⲛⲥⲉⲓ ϩⲁⲣⲟϥ ⲛⲭⲱⲗⲉⲙ ⲁⲩⲓ ⲉⲃⲟⲗ ⲁⲩϣⲉ ⲛⲱⲟⲩ
But those who escorted Paul brought him as far as Athens. Receiving a commandment to Silas and Timothy that they should come to him very quickly, they departed.
17.16
ⲡⲁⲩⲗⲟⲥ ⲇⲉ ⲛⲁϥϧⲉⲛ ⲁⲑⲏⲛⲛⲁⲥ ⲉϥⲥⲟⲙⲥ ⲉⲃⲟⲗ ϧⲁϫⲱⲟⲩ ⲁϥϫⲱⲛⲧ ⲇⲉ ⲛϫⲉⲡⲉϥⲡⲛⲉⲩⲙⲁⲛϧⲣⲏⲓ ⲛϧⲏⲧϥ ⲉϥⲛⲁⲩ ⲉϯⲡⲟⲗⲓⲥ ⲉⲥⲟϣ ⲙⲙⲉⲧϣⲁⲙϣⲉ ⲓⲇⲱⲗⲟⲛ .
Now while Paul waited for them at Athens, his spirit was provoked within him as he saw the city full of idols.
17.17
ⲛⲁϥⲥⲁϫⲓ ⲙⲉⲛ ⲟⲩⲛ ϧⲉⲛϯⲥⲩⲛⲁⲅⲱⲅⲏ ⲛⲧⲉⲛⲓⲓⲟⲩⲇⲁⲓ ⲛⲉⲙⲛⲏ ⲉⲧⲉⲣⲥⲉⲃⲉⲥⲑⲉ ⲛⲉⲙⲟⲩⲟⲛ ⲛⲓⲃⲉⲛ ⲉⲧⲉϣⲁⲩⲑⲱⲟⲩϯ ⲙⲙⲏⲛⲓ ϩⲓϯⲁⲅⲟⲣⲁ .
So he reasoned in the synagogue with the Jews and the devout persons, and in the marketplace every day with those who met him.
17.18
ϩⲁⲛⲟⲩⲟⲛ ⲇⲉ ⲉⲃⲟⲗ ϧⲉⲛⲛⲓⲉⲡⲓⲕⲟⲩⲣⲓⲟⲥ ⲛⲉⲙⲛⲓⲥⲧⲟⲓⲭⲟⲥ ⲙⲫⲓⲗⲟⲥⲟⲫⲟⲥ ⲛⲁⲩϯ ⲟⲩⲃⲏϥ ⲟⲩⲟϩ ϩⲁⲛⲕⲉⲭⲱⲟⲩⲛⲓ ⲛⲁⲩϫⲱ ⲙⲙⲟⲥ ϫⲉⲟⲩ ⲡⲉⲧⲉϥⲟⲩⲱϣ ⲉϫⲟϥ ⲛϫⲉⲡⲁⲓⲥⲡⲉⲣⲙⲟⲗⲟⲅⲟⲥ ϩⲁⲛⲕⲉⲭⲱⲟⲩⲛⲓ ⲇⲉ ⲛⲁⲩϫⲱ ⲙⲙⲟⲥ ϫⲉⲟⲩⲣⲉϥϩⲓⲱⲓϣ ⲡⲉ ⲛⲧⲉϩⲁⲛⲇⲁⲓⲙⲱⲛ ⲛϣⲉⲙⲙⲟ ϫⲉⲛⲁϥϩⲓⲱⲓϣ ⲛⲱⲟⲩ ⲡⲉ ⲛⲓⲏⲥⲟⲩⲥ ⲛⲉⲙⲧⲉϥⲁⲛⲁⲥⲧⲁⲥⲓⲥ .
Some of the Epicurean and Stoic philosophers also were conversing with him. Some said, 'What does this babbler want to say?' Others said, 'He seems to be advocating foreign deities,' because he preached Jesus and the resurrection.
17.19
ⲁⲩⲁⲙⲟⲛⲓ ⲇⲉ ⲙⲙⲟϥ ⲁⲩⲉⲛϥ ⲉϧⲟⲩⲛ ⲉⲡⲓⲁⲣⲓⲟⲡⲁⲅⲟⲥ ⲉⲩϫⲱ ⲙⲙⲟⲥ ϫⲉⲟⲩⲟⲛ ϣϫⲟⲙ ⲙⲙⲟⲛ ⲉⲉⲙⲓ ϫⲉⲧⲁⲓⲥⲃⲱ ⲙⲃⲉⲣⲓ ⲟⲩ ⲧⲉ ⲉⲧⲉⲕⲥⲁϫⲓ ⲙⲙⲟⲥ .
They took hold of him, and brought him to the Areopagus, saying, 'May we know what this new teaching is, which is spoken by you?
17.20
ⲕⲓⲛⲓ ⲛϩⲁⲛⲥⲁϫⲓ ⲛϣⲉⲙⲙⲟ ⲉϧⲟⲩⲛ ⲉⲛⲉⲛⲙⲁϣϫ ⲧⲉⲛⲟⲩⲱϣ ⲉⲉⲙⲓ ϫⲉⲟⲩ ⲛⲉⲛⲁⲓ .
For you bring certain strange things to our ears. We want to know therefore what these things mean.'
17.21
ⲛⲓⲁⲑⲏⲛⲛⲉⲟⲥ ⲇⲉ ⲧⲏⲣⲟⲩ ⲛⲉⲙⲛⲓϣⲉⲙⲙⲱⲟⲩ ⲉⲑⲛⲏⲟⲩ ⲙⲙⲁⲩ ⲛⲁⲩⲥⲣⲱϥⲧ ⲉϩⲗⲓ ⲁⲛ ⲡⲉ ⲉⲃⲏⲗ ⲉⲥⲁϫⲓ ⲛⲉⲙⲉⲥⲱⲧⲉⲙ ⲉϩⲱⲃ ⲙⲃⲉⲣⲓ .
Now all the Athenians and the strangers living there spent their time in nothing else, but either to tell or to hear some new thing.
17.22
ⲁϥⲟϩⲓ ⲇⲉ ⲉⲣⲁⲧϥ ⲛϫⲉⲡⲁⲩⲗⲟⲥ ϧⲉⲛⲧⲙⲏϯ ⲙⲡⲓⲁⲣⲓⲟⲡⲁⲅⲟⲥ ⲡⲉϫⲁϥ ⲛⲓⲣⲱⲙⲓ ⲛⲓⲁⲑⲏⲛⲛⲉⲟⲥ ⲕⲁⲧⲁϩⲱⲃ ⲛⲓⲃⲉⲛ ϯⲛⲁⲩ ⲉⲣⲱⲧⲉⲛ ϫⲉⲧⲉⲧⲉⲛⲟⲓ ⲛⲣⲉϥϣⲁⲙϣⲉ ⲓϧ ⲛϩⲟⲩⲟ .
Paul stood in the middle of the Areopagus, and said, 'You men of Athens, I perceive that you are very religious in all things.
17.23
ⲉⲓⲥⲓⲛⲓ ⲅⲁⲣ ⲟⲩⲟϩ ⲉⲧⲁⲓⲛⲁⲩ ⲉⲛⲏ ⲉⲧⲉⲧⲉⲛⲉⲣⲥⲉⲃⲉⲥⲑⲉ ⲙⲙⲱⲟⲩ ⲁⲓϫⲓⲙⲓ ⲛⲟⲩϣⲏ ⲟⲩⲓ ⲉⲥⲥϧⲏⲟⲩⲧ ⲉϩⲣⲏⲓ ϩⲓⲱⲧⲥ ϫⲉⲫⲛⲟⲩϯ ⲉⲧⲉⲛⲥⲱⲟⲩⲛ ⲙⲙⲟϥ ⲁⲛ ⲫⲏ ⲟⲩⲛ ⲉⲧⲉⲧⲉⲛⲉⲣⲥⲉⲃⲉⲥⲑⲉ ⲙⲙⲟϥ ⲧⲉⲧⲉⲛⲥⲱⲟⲩⲛ ⲙⲙⲟϥ ⲁⲛ ⲫⲁⲓ ⲁⲛⲟⲕ ⲉϯϩⲓⲱⲓϣ ⲙⲙⲟϥ ⲛⲱⲧⲉⲛ .
For as I passed along, and observed the objects of your worship, I found also an altar with this inscription: 'TO AN UNKNOWN GOD.' What therefore you worship in ignorance, this I announce to you.
17.24
ⲫⲛⲟⲩϯ ⲉⲧⲁϥⲑⲁⲙⲓⲉ ⲡⲓⲕⲟⲥⲙⲟⲥ ⲛⲉⲙϩⲱⲃ ⲛⲓⲃⲉⲛ ⲉⲧϣⲟⲡ ⲛϧⲏⲧϥ ⲫⲁⲓ ⲡⲉ ⲡϭⲟⲓⲥ ⲛⲧⲫⲉ ⲛⲉⲙⲡⲕⲁϩⲓ ⲛⲁϥϣⲟⲡ ⲁⲛ ϧⲉⲛϩⲁⲛⲉⲣⲫⲏⲟⲩⲓ ⲙⲙⲟⲩⲛⲕ ⲛϫⲓϫ .
The God who made the world and all things in it, he, being Lord of heaven and earth, doesn't dwell in temples made with hands,
17.25
ⲟⲩⲇⲉ ⲛⲉϣⲁⲩϣⲉⲙϣⲓ ⲙⲙⲟϥ ⲁⲛ ⲛϫⲉϩⲁⲛϫⲓϫ ⲛⲣⲱⲙⲓ ⲛϥⲉⲣⲭⲣⲓⲁ ⲁⲛ ⲛϩⲗⲓ ⲛⲑⲟϥ ⲡⲉⲧϯ ⲙⲡⲱⲛϧ ⲛⲉⲙⲫⲛⲓϥⲓ ⲛⲟⲩⲟⲛ ⲛⲓⲃⲉⲛ .
neither is he served by men's hands, as though he needed anything, seeing he himself gives to all life and breath, and all things.
17.26
ⲉⲁϥⲑⲁⲙⲓⲉ ϣⲗⲟⲗ ⲛⲓⲃⲉⲛ ⲛⲧⲉⲛⲓⲣⲱⲙⲓ ⲉⲃⲟⲗ ϧⲉⲛⲟⲩⲁⲓ ⲉⲑⲣⲟⲩϣⲱⲡⲓ ϩⲓϫⲉⲛⲡϩⲟ ⲙⲡⲕⲁϩⲓ ⲧⲏⲣϥ ⲉⲁϥⲑⲱϣ ⲛϩⲁⲛⲥⲏ ⲟⲩ ⲉⲩⲑⲏϣ ⲓⲥϫⲉⲛ ϣⲟⲣⲡ ⲛⲉⲙⲡⲓⲑⲱϣ ⲛⲧⲉⲡⲟⲩϫⲓⲛϣⲱⲡⲓ .
He made from one blood every nation of men to dwell on all the surface of the earth, having determined appointed seasons, and the boundaries of their dwellings,
17.27
ⲉⲑⲣⲟⲩⲕⲱϯ ⲛⲥⲁⲫⲛⲟⲩϯ ϫⲉϩⲁⲣⲁ ⲅⲉ ⲥⲉⲛⲁϫⲟⲙϫⲉⲙ ⲛⲥⲱϥ ⲛⲥⲉϫⲉⲙϥ ⲕⲉⲧⲟⲓ ϥⲟⲩⲏⲟⲩ ⲁⲛ ⲙⲡⲓⲟⲩⲁⲓ ⲡⲓⲟⲩⲁⲓ ⲙⲙⲟⲛ .
that they should seek the Lord, if perhaps they might reach out for him and find him, though he is not far from each one of us.
17.28
ⲁⲛⲱⲛϧ ⲅⲁⲣ ⲛϧⲏⲧϥ ⲟⲩⲟϩ ⲁⲛⲕⲓⲙ ⲟⲩⲟϩ ⲁⲛϣⲟⲡ ⲙⲫⲣⲏϯ ⲉⲧⲁⲩϫⲟⲥ ⲛϫⲉϩⲁⲛⲕⲉⲭⲱⲟⲩⲛⲓ ⲉⲃⲟⲗ ϧⲉⲛⲛⲓⲡⲟⲓⲧⲏⲥ ⲉⲧϧⲉⲛⲑⲏⲛⲟⲩ ϫⲉⲁⲛⲟⲛ ⲡⲉϥⲅⲉⲛⲟⲥ ⲅⲁⲣ .
'For in him we live, and move, and have our being.' As some of your own poets have said, 'For we are also his offspring.'
17.29
ⲉⲁⲛⲟⲛ ⲟⲩⲅⲉⲛⲟⲥ ⲟⲩⲛ ⲛⲧⲉⲫⲛⲟⲩϯ ⲥϣⲉ ⲛⲁⲛ ⲁⲛ ⲉⲑⲣⲉⲛⲙⲉⲩⲓ ⲉⲛⲟⲩⲃ ⲓⲉ ϩⲁⲧ ⲓⲉ ⲱⲛⲓ ⲙⲫⲱⲧϩ ⲛⲧⲉⲭⲛⲏ ⲓⲉ ⲙⲟⲕⲙⲉⲕ ⲛⲣⲱⲙⲓ ϫⲉⲁϥⲟⲛⲓ ⲙⲙⲱⲟⲩ ⲛϫⲉⲫⲛⲟⲩϯ .
Being then the offspring of God, we ought not to think that the Divine Nature is like gold, or silver, or stone, engraved by art and design of man.
17.30
ⲛⲓⲥⲏⲟⲩ ⲙⲉⲛ ⲛⲧⲉϯⲙⲉⲧⲁⲧⲉⲙⲓ ⲁϥⲭⲁⲩ ⲉⲃⲟⲗ ⲛϫⲉⲫⲛⲟⲩϯ ϯⲛⲟⲩ ⲇⲉ ϥϩⲓⲱⲓϣ ⲛⲛⲓⲣⲱⲙⲓ ⲉⲧⲣⲉ ⲟⲩⲟⲛ ⲛⲓⲃⲉⲛ ⲉⲣⲙⲉⲧⲁⲛⲟⲓⲛ ϧⲉⲛⲙⲁⲓ ⲛⲓⲃⲉⲛ .
The times of ignorance therefore God overlooked. But now he commands that all people everywhere should repent,
17.31
ⲕⲁⲧⲁⲫⲣⲏϯ ϫⲉⲁϥⲥⲉⲙⲛⲉ ⲟⲩⲉϩⲟⲟⲩ ⲉϥⲛⲁϯϩⲁⲡ ⲉϯⲟⲓⲕⲟⲩⲙⲉⲛⲏ ⲛϧⲏⲧϥ ϧⲉⲛⲟⲩⲙⲉⲑⲙⲏⲓ ⲉⲃⲟⲗ ϩⲓⲧⲉⲛⲡⲓⲣⲱⲙⲓ ⲉⲧⲁϥⲑⲁϣϥ ⲉⲁϥϯ ⲙⲫⲛⲁϩϯ ⲛⲟⲩⲟⲛ ⲛⲓⲃⲉⲛ ⲉⲁϥⲧⲟⲩⲛⲟⲥϥ ⲉⲃⲟⲗ ϧⲉⲛⲛⲏ ⲉⲧⲙⲱⲟⲩⲧ .
because he has appointed a day in which he will judge the world in righteousness by the man whom he has ordained; of which he has given assurance to all men, in that he has raised him from the dead.'
17.32
ⲉⲧⲁⲩⲥⲱⲧⲉⲙ ⲇⲉ ϫⲉⲁⲛⲁⲥⲧⲁⲥⲓⲥ ⲛⲧⲉⲛⲓⲣⲉϥⲙⲱⲟⲩⲧ ϩⲁⲛⲟⲩⲟⲛ ⲙⲉⲛ ⲁⲩⲥⲱⲃⲓ ϩⲁⲛⲕⲉⲭⲱⲟⲩⲛⲓ ⲇⲉ ⲁⲩϫⲟⲥ ϫⲉⲉⲛⲉⲥⲱⲧⲉⲙ ⲉⲣⲟⲕ ⲉⲑⲃⲉⲫⲁⲓ .
Now when they heard of the resurrection of the dead, some mocked; but others said, 'We want to hear you again concerning this.'
17.33
ⲟⲩⲟϩ ⲡⲁⲓⲣⲏϯ ⲟⲛ ⲁⲡⲁⲩⲗⲟⲥ ⲓ ⲉⲃⲟⲗ ϧⲉⲛⲧⲟⲩϩⲙⲏϯ .
Thus Paul went out from among them.
17.34
ⲁⲩⲧⲟⲙⲟⲩ ⲇⲉ ⲉⲣⲟϥ ⲛϫⲉϩⲁⲛⲣⲱⲙⲓ ⲉⲁⲩⲛⲁϩϯ ⲛⲁⲓ ⲉⲧⲉⲛⲁⲣⲉ ⲇⲓⲟⲛⲏⲥⲓⲟⲥ ⲛϧⲏⲧⲟⲩ ⲡⲓⲁⲣⲓⲟⲡⲁⲅⲓⲧⲏⲥ ⲛⲉⲙⲟⲩⲥϩⲓⲙⲓ ⲉⲡⲉⲥⲣⲁⲛ ⲡⲉ ⲇⲁⲙⲁⲣⲓⲥ ⲛⲉⲙϩⲁⲛⲕⲉⲭⲱⲟⲩⲛⲓ ⲛⲉⲙⲱⲟⲩ .
But certain men joined with him, and believed, among whom also was Dionysius the Areopagite, and a woman named Damaris, and others with them.
18.1
ⲙⲉⲛⲉⲛⲥⲁⲛⲁⲓ ⲉⲧⲁϥⲓ ⲉⲃⲟⲗ ϧⲉⲛⲁⲑⲏⲛⲛⲏⲥ ⲁϥⲓ ⲉⲕⲟⲣⲓⲛⲑⲟⲥ .
After these things Paul departed from Athens, and came to Corinth.
18.2
ⲁϥϫⲓⲙⲓ ⲛⲟⲩⲓⲟⲩⲇⲁⲓ ⲉⲡⲉϥⲣⲁⲛ ⲡⲉ ⲁⲕⲩⲗⲗⲁⲥ ⲉⲟⲩⲡⲟⲛⲧⲓⲟⲥ ⲡⲉ ϧⲉⲛⲡⲉϥⲅⲉⲛⲟⲥ ⲉⲁϥⲓ ⲥⲁⲧⲟⲧϥ ⲉⲃⲟⲗ ϧⲉⲛϯϩⲩⲧⲁⲗⲓⲁ ⲛⲉⲙⲡⲣⲓⲥⲕⲩⲗⲗⲁ ⲧⲉϥⲥϩⲓⲙⲓ ϫⲉⲛⲉⲁϥⲟⲩⲁϩⲥⲁϩⲛⲓ ⲡⲉ ⲛϫⲉⲕⲗⲁⲩⲇⲓⲟⲥ ⲉⲧⲣⲉ ⲛⲓⲓⲟⲩⲇⲁⲓ ⲧⲏⲣⲟⲩ ⲫⲱⲣϫ ⲉⲃⲟⲗ ϧⲉⲛⲣⲱⲙⲏ ⲁϥⲓ ϣⲁⲣⲱⲟⲩ .
He found a certain Jew named Aquila, a man of Pontus by race, who had recently come from Italy, with his wife Priscilla, because Claudius had commanded all the Jews to depart from Rome. He came to them,
18.3
ⲟⲩⲟϩ ⲁϥϣⲱⲡⲓ ϧⲁⲧⲟⲧⲟⲩ ⲉⲑⲃⲉϫⲉⲟⲩϣⲫⲏⲣ ⲛⲧⲉⲭⲛⲏ ⲛⲧⲁϥ ⲡⲉ ⲟⲩⲟϩ ⲛⲁⲩⲉⲣϩⲱⲃ ⲡⲉ ⲛⲉϩⲁⲛⲣⲉϥⲑⲁⲙⲓⲉ ⲥⲕⲩⲛⲏ ⲅⲁⲣ ⲛⲉϧⲉⲛⲧⲟⲩⲧⲉⲭⲛⲏ .
and because he practiced the same trade, he lived with them and worked, for by trade they were tent makers.
18.4
ⲛⲁⲩⲥⲁϫⲓ ⲇⲉ ⲡⲉ ϧⲉⲛϯⲥⲩⲛⲁⲅⲱⲅⲏ ⲕⲁⲧⲁⲥⲁⲃⲃⲁⲧⲟⲛ ⲛⲓⲃⲉⲛ ⲟⲩⲟϩ ⲛⲁⲩⲑⲱⲧ ⲙⲡϩⲏⲧ ⲛⲛⲓⲓⲟⲩⲇⲁⲓ ⲛⲉⲙⲛⲓⲟⲩⲉⲓⲛⲓⲛ .
He reasoned in the synagogue every Sabbath, and persuaded Jews and Greeks.
18.5
ⲉⲧⲁⲩⲓ ⲇⲉ ⲉⲃⲟⲗ ϧⲉⲛⲧⲙⲁⲕⲉⲇⲟⲛⲓⲁ ⲛϫⲉⲥⲓⲗⲁⲥ ⲛⲉⲙⲧⲓⲙⲟⲑⲉⲟⲥ ⲛⲁϥⲙⲏⲛ ⲇⲉ ⲡⲉ ⲛϫⲉⲡⲁⲩⲗⲟⲥ ϧⲉⲛⲡⲓⲥⲁϫⲓ ⲉϥⲉⲣⲙⲉⲑⲣⲉ ⲛⲛⲓⲓⲟⲩⲇⲁⲓ ϫⲉⲡⲭⲣⲓⲥⲧⲟⲥ ⲡⲉ ⲓⲏⲥⲟⲩⲥ .
But when Silas and Timothy came down from Macedonia, Paul was compelled by the Spirit, testifying to the Jews that Jesus was the Christ.
18.6
ⲉⲩϯ ⲇⲉ ⲉϧⲟⲩⲛ ⲉϩⲣⲁϥ ⲟⲩⲟϩ ⲉⲩϫⲉⲟⲩⲁ ⲁϥⲛⲉϩ ⲛⲉϥϩⲃⲱⲥ ⲉⲃⲟⲗ ⲡⲉϫⲁϥ ⲛⲱⲟⲩ ϫⲉⲡⲉⲧⲉⲛⲥⲛⲟϥ ⲉϫⲉⲛⲧⲉⲧⲉⲛⲁⲫⲉ ϯⲟⲩⲁⲃ ⲁⲛⲟⲕ ⲓⲥϫⲉⲛ ϯⲛⲟⲩ ⲉⲓⲉϣⲉ ⲛⲏⲓ ⲉⲛⲓⲉⲑⲛⲟⲥ .
When they opposed him and blasphemed, he shook out his clothing and said to them, 'Your blood be on your own heads! I am clean. From now on, I will go to the Gentiles!'
18.7
ⲟⲩⲟϩ ⲉⲧⲁϥⲟⲩⲱⲧⲉⲃ ⲉⲃⲟⲗ ⲙⲙⲁⲩ ⲁϥⲓ ⲉⲡⲏⲓ ⲛⲟⲩⲁⲓ ⲉⲡⲉϥⲣⲁⲛ ⲡⲉ ⲧⲓⲧⲟⲥ ⲫⲁⲓ ⲟⲩⲡⲓⲥⲧⲟⲥ ⲉϥⲉⲣⲥⲉⲃⲉⲥⲑⲉ ⲙⲫⲛⲟⲩϯ ⲫⲁⲓ ⲉⲛⲁⲣⲉⲡⲉϥⲏⲓ ⲧⲟⲙⲓ ⲉϯⲥⲩⲛⲁⲅⲱⲅⲏ .
He departed there, and went into the house of a certain man named Justus, one who worshiped God, whose house was next door to the synagogue.
18.8
ⲕⲣⲓⲥⲡⲟⲥ ⲇⲉ ⲡⲓⲁⲣⲭⲏⲥⲩⲛⲁⲅⲱⲅⲟⲥ ⲁϥⲛⲁϩϯ ⲉⲡϭⲟⲓⲥ ⲛⲉⲙⲡⲉϥⲏⲓ ⲧⲏⲣϥ ⲟⲩⲟϩ ⲟⲩⲙⲏ ϣⲉⲃⲟⲗ ϧⲉⲛⲛⲓⲕⲟⲣⲓⲛⲑⲟⲥ ⲉⲩⲥⲱⲧⲉⲙ ⲛⲁⲩⲛⲁϩϯ ⲡⲉ ⲟⲩⲟϩ ⲛⲁⲩϭⲓⲱⲙⲥ .
Crispus, the ruler of the synagogue, believed in the Lord with all his house. Many of the Corinthians, when they heard, believed and were baptized.
18.9
ⲡⲉϫⲉ ⲡϭⲟⲓⲥ ⲇⲉ ⲙⲡⲁⲩⲗⲟⲥ ⲉⲃⲟⲗ ϩⲓⲧⲉⲛⲟⲩϩⲟⲣⲁⲙⲁ ϧⲉⲛⲡⲓⲉϫⲱⲣϩ ϫⲉⲙⲡⲉⲣⲉⲣϩⲟϯ ⲁⲗⲗⲁ ⲥⲁϫⲓ ⲟⲩⲟϩ ⲙⲡⲉⲣⲭⲁⲣⲱⲕ
The Lord said to Paul in the night by a vision, 'Don't be afraid, but speak and don't be silent;
18.10
ϫⲉⲁⲛⲟⲕ ϯⲭⲏ ⲛⲉⲙⲁⲕ ⲟⲩⲟϩ ⲛⲛⲉ ϩⲗⲓ ⲧⲱⲛϥ ⲉϩⲣⲏⲓ ⲉϫⲱⲕ ⲉϯⲙⲕⲁϩ ⲛⲁⲕ ϫⲉⲟⲩⲟⲛ ⲛⲧⲏⲓ ⲛⲟⲩⲛⲓϣϯ ⲛⲗⲁⲟⲥ ϧⲉⲛⲧⲁⲓⲡⲟⲗⲓⲥ .
for I am with you, and no one will attack you to harm you, for I have many people in this city.'
18.11
ⲁϥϩⲉⲙⲥⲓ ⲇⲉ ⲛⲟⲩⲣⲟⲙⲡⲓ ⲛⲉⲙⲛⲁⲃⲟⲧ ⲉϥϯⲥⲃⲱ ⲛϧⲏⲧⲟⲩ ⲙⲡⲓⲥⲁϫⲓ ⲛⲧⲉⲫⲛⲟⲩϯ .
He lived there a year and six months, teaching the word of God among them.
18.12
ⲅⲁⲗⲓⲱⲛ ⲇⲉ ⲉϥⲟⲓ ⲛⲁⲛⲑⲩⲡⲁⲧⲟⲥ ⲉϯⲁⲭⲁⲓⲁ ⲁⲩⲓ ⲛϫⲉⲛⲓⲓⲟⲩⲇⲁⲓ ⲉⲩⲥⲟⲡ ⲉϩⲣⲏⲓ ⲉϫⲉⲛⲡⲁⲩⲗⲟⲥ ⲟⲩⲟϩ ⲁⲩⲉⲛϥ ⲉⲡⲓⲙⲁ ⲛϯϩⲁⲡ
But when Gallio was proconsul of Achaia, the Jews with one accord rose up against Paul and brought him before the judgment seat,
18.13
ⲉⲩϫⲱ ⲙⲙⲟⲥ ϫⲉⲫⲁⲓ ⲑⲱⲧ ⲙⲡϩⲏⲧ ⲛⲛⲓⲣⲱⲙⲓ ⲉⲉⲣⲥⲉⲃⲉⲥⲑⲉ ⲙⲫⲛⲟⲩϯ ⲥⲁⲃⲟⲗ ⲙⲡⲓⲛⲟⲙⲟⲥ .
saying, 'This man persuades men to worship God contrary to the law.'
18.14
ⲉϥⲛⲁⲟⲩⲱⲛ ⲇⲉ ⲛⲣⲱϥ ⲛϫⲉⲡⲁⲩⲗⲟⲥ ⲡⲉϫⲉ ⲅⲁⲗⲓⲱⲛ ⲛⲛⲓⲓⲟⲩⲇⲁⲓ ϫⲉⲉⲛⲉ ⲟⲩⲟⲛ ϭⲓ ⲛϫⲟⲛⲥ ⲓⲉ ⲟⲩϩⲱⲃ ⲉϥϩⲱⲟⲩ ⲙⲡⲟⲛⲏⲣⲟⲛ ⲱ ⲛⲓⲓⲟⲩⲇⲁⲓ ⲕⲁⲗⲱⲥ ⲛⲁⲓⲛⲁⲉⲣⲁⲛⲉⲭⲉⲥⲑⲉ ⲙⲙⲱⲧⲉⲛ .
But when Paul was about to open his mouth, Gallio said to the Jews, 'If indeed it were a matter of wrong or of wicked crime, you Jews, it would be reasonable that I should bear with you;
18.15
ⲓⲥϫⲉ ⲇⲉ ϩⲁⲛⲍⲏⲧⲏⲙⲁ ⲛⲉⲉⲑⲃⲉ ⲟⲩⲥⲁϫⲓ ⲛⲉⲙϩⲁⲛⲣⲁⲛ ⲛⲉⲙⲡⲉⲧⲉⲛⲛⲟⲙⲟⲥ ⲉⲣⲉⲧⲉⲛⲉⲣⲱϣⲓ ⲛⲑⲱⲧⲉⲛ ϯⲟⲩⲱϣ ⲁⲛⲟⲕ ⲁⲛ ⲉⲉⲣⲣⲉϥϯϩⲁⲡ ⲛⲧⲉⲛⲁⲓ .
but if they are questions about words and names and your own law, look to it yourselves. For I don't want to be a judge of these matters.'
18.16
ⲟⲩⲟϩ ⲁⲩϩⲓⲧⲟⲩ ⲥⲁⲃⲟⲗ ⲙⲡⲓⲃⲏⲙⲁ .
He drove them from the judgment seat.
18.17
ⲁⲩⲁⲙⲟⲛⲓ ⲇⲉ ⲧⲏⲣⲟⲩ ⲛⲥⲱⲥⲑⲉⲛⲏⲥ ⲡⲓⲁⲣⲭⲏⲥⲩⲛⲁⲅⲱⲅⲟⲥ ⲁⲩϩⲓⲟⲩⲓ ⲉⲣⲟϥ ⲙⲡⲉⲙⲑⲟ ⲙⲡⲓⲃⲏⲙⲁ ⲟⲩⲟϩ ⲛⲁⲥⲉⲣⲙⲉⲗⲉⲥⲑⲉ ⲁⲛ ⲛⲅⲁⲗⲓⲱⲛ ⲉⲑⲃⲉϩⲗⲓ ⲛⲛⲁⲓ .
Then all the Greeks laid hold on Sosthenes, the ruler of the synagogue, and beat him before the judgment seat. Gallio didn't care about any of these things.
18.18
ⲡⲁⲩⲗⲟⲥ ⲇⲉ ⲉⲧⲁϥϣⲱⲡⲓ ⲛⲕⲉⲙⲏϣ ⲛⲉϩⲟⲟⲩ ϧⲁⲧⲉⲛⲛⲓⲥⲛⲏⲟⲩ ⲁϥⲉⲣⲁⲡⲟⲇⲁⲍⲉⲥⲑⲉ ⲛⲱⲟⲩ ⲁϥⲉⲣϩⲱⲧ ⲉⲧⲥⲩⲣⲓⲁ ⲉⲥⲛⲉⲙⲁϥ ⲛϫⲉⲡⲣⲓⲥⲕⲩⲗⲗⲁ ⲛⲉⲙⲁⲕⲩⲗⲗⲁⲥ ⲉⲁϥϣⲉⲡ ϫⲱϥ ϧⲉⲛⲕⲉⲛⲭⲣⲉⲉⲥ ⲛⲁϥϧⲉⲛ ⲟⲩⲉⲩⲭⲏ ⲅⲁⲣ ⲡⲉ .
Paul, having stayed after this many more days, took his leave of the brothers, and sailed from there for Syria, together with Priscilla and Aquila. He shaved his head in Cenchreae, for he had a vow.
18.19
ⲁϥⲓ ⲇⲉ ⲉⲉⲫⲉⲥⲟⲥ ⲟⲩⲟϩ ⲁϥⲥⲉϫⲡ ⲛⲏ ⲙⲙⲁⲩ ⲛⲑⲟϥ ⲇⲉ ⲉⲧⲁϥϣⲉ ⲉϧⲟⲩⲛ ⲉϯⲥⲩⲛⲁⲅⲱⲅⲏ ⲛⲁϥⲥⲁϫⲓ ⲛⲉⲙⲛⲓⲓⲟⲩⲇⲁⲓ .
He came to Ephesus, and he left them there; but he himself entered into the synagogue, and reasoned with the Jews.
18.20
ⲉⲩⲧⲱⲃϩ ⲇⲉ ⲙⲙⲟϥ ϩⲓⲛⲁ ⲛⲧⲉϥⲉⲣ ⲟⲩⲛⲓϣϯ ⲛⲥⲏⲟⲩ ϧⲁⲧⲟⲧⲟⲩ ⲙⲡⲉϥⲟⲩⲱϣ .
When they asked him to stay with them a longer time, he declined;
18.21
ⲁⲗⲗⲁ ⲁϥⲉⲣⲁⲡⲟⲇⲁⲍⲉⲥⲑⲉ ⲛⲱⲟⲩ ⲉⲁϥϫⲟⲥ ϫⲉϯⲛⲁⲕⲟⲧⲧ ϩⲁⲣⲱⲧⲉⲛ ϧⲉⲛⲡⲉⲧⲉϩⲛⲉ ⲫⲛⲟⲩϯ ⲁϥⲉⲣϩⲱⲧ ⲇⲉ ⲉⲃⲟⲗ ϧⲉⲛⲉⲫⲉⲥⲟⲥ
but taking his leave of them, and saying, 'I must by all means keep this coming feast in Jerusalem, but I will return again to you if God wills,' he set sail from Ephesus.
18.22
ⲉⲧⲁϥⲓ ⲇⲉ ⲉϩⲣⲏⲓ ⲉⲕⲉⲥⲁⲣⲓⲁ ⲟⲩⲟϩ ⲉⲧⲁϥⲉⲣⲁⲥⲡⲁⲍⲉⲥⲑⲉ ⲛϯⲉⲕⲕⲗⲏⲥⲓⲁ ⲁϥⲓ ⲉϩⲣⲏⲓ ⲉⲧⲁⲛⲧⲓⲟⲭⲓⲁ .
When he had landed at Caesarea, he went up and greeted the assembly, and went down to Antioch.
18.23
ⲟⲩⲟϩ ⲉⲧⲁϥⲉⲣⲟⲩⲥⲏⲟⲩ ⲙⲙⲁⲩ ⲁϥⲓ ⲉⲃⲟⲗ ⲉϥⲥⲓⲛⲓ ⲕⲁⲧⲁⲙⲁ ⲛⲧⲉϯⲭⲱⲣⲁ ⲛⲧⲉϯⲅⲁⲗⲁⲧⲓⲁ ⲛⲉⲙϯⲫⲣⲓⲕⲓⲁ ⲉϥⲧⲁϫⲣⲟ ⲛⲛⲓⲙⲁⲑⲏ ⲧⲏⲥ ⲧⲏⲣⲟⲩ .
Having spent some time there, he departed, and went through the region of Galatia, and Phrygia, in order, establishing all the disciples.
18.24
ⲛⲉ ⲟⲩⲟⲛ ⲟⲩⲓⲟⲩⲇⲁⲓ ⲇⲉ ⲡⲉ ⲡⲉϥⲣⲁⲛ ⲡⲉ ⲁⲡⲉⲗⲗⲏⲥ ⲉⲟⲩⲣⲉⲙⲣⲁⲕⲟϯ ⲡⲉ ϧⲉⲛⲡⲉϥⲅⲉⲛⲟⲥ ⲉⲟⲩⲣⲱⲙⲓ ⲡⲉ ⲛⲗⲟⲅⲓⲙⲟⲥ ⲉⲁϥⲉⲣⲕⲁⲧⲁⲛⲧⲁⲛ ⲉⲉⲫⲉⲥⲟⲥⲉ ⲟⲩⲟⲛ ϣϫⲟⲙ ⲙⲙⲟϥ ϧⲉⲛⲛⲓⲅⲣⲁⲫⲏ .
Now a certain Jew named Apollos, an Alexandrian by race, an eloquent man, came to Ephesus. He was mighty in the Scriptures.
18.25
ⲫⲁⲓ ⲛⲉⲁⲩⲉⲣⲕⲁⲑⲏⲕⲓⲛ ⲙⲙⲟϥ ⲉⲡⲓⲙⲱⲓⲧ ⲛⲧⲉⲡϭⲟⲓⲥ ⲟⲩⲟϩ ⲉϥϧⲏⲙ ϧⲉⲛⲡⲓⲡⲛⲉⲩⲙⲁⲛⲁϥⲥⲁϫⲓ ⲟⲩⲟϩ ⲛⲁϥϯⲥⲃⲱ ϧⲉⲛⲟⲩⲧⲁϫⲣⲟ ⲉⲑⲃⲉⲓⲏⲥⲟⲩⲥ ⲉⲡⲓⲱⲙⲥ ⲛⲧⲉⲓⲱⲁⲛⲛⲏⲥ ⲙⲙⲁⲩⲁⲧϥ ⲉⲧⲉϥⲥⲱⲟⲩⲛ ⲙⲙⲟϥ .
This man had been instructed in the way of the Lord; and being fervent in spirit, he spoke and taught accurately the things concerning Jesus, although he knew only the baptism of John.
18.26
ⲫⲁⲓ ⲇⲉ ⲁϥⲉⲣϩⲏⲧⲥ ⲛⲟⲩⲟⲛϩϥ ⲉⲃⲟⲗ ϧⲉⲛϯⲥⲩⲛⲁⲅⲱⲅⲏ ⲉⲧⲁⲩⲥⲱⲧⲉⲙ ⲉⲣⲟϥ ⲛϫⲉⲡⲣⲓⲥⲕⲩⲗⲗⲁ ⲛⲉⲙⲁⲕⲩⲗⲗⲁ ⲁⲩϣⲟⲡϥ ⲉⲣⲱⲟⲩ ⲟⲩⲟϩ ⲁⲩⲧⲁⲙⲟϥ ϧⲉⲛⲟⲩⲧⲁϫⲣⲟ ⲉⲡⲓⲙⲱⲓⲧ ⲛⲧⲉⲫⲛⲟⲩϯ .
He began to speak boldly in the synagogue. But when Priscilla and Aquila heard him, they took him aside, and explained to him the way of God more accurately.
18.27
ⲉϥⲟⲩⲱϣ ⲇⲉ ⲉⲓ ⲉⲃⲟⲗ ⲉϯⲁⲭⲁⲓⲁ ⲁⲩϯⲉⲣⲟⲩⲟⲧ ⲛⲁϥ ⲛϫⲉⲛⲓⲥⲛⲏⲟⲩ ⲁⲩⲥϧⲁⲓ ⲛⲛⲓⲙⲁⲑⲏⲧⲏⲥ ϫⲉⲛⲥⲉϣⲟⲡϥ ⲉⲣⲱⲟⲩ ⲫⲁⲓ ⲇⲉ ⲉⲧⲁϥⲓ ⲁϥⲉⲣ ⲟⲩⲛⲟϥⲣⲓ ⲉⲙⲁϣⲱ ⲛⲛⲏ ⲉⲧⲁⲩⲛⲁϩϯ ⲉⲃⲟⲗ ϩⲓⲧⲉⲛⲡⲓϩⲙⲟⲧ .
When he had determined to pass over into Achaia, the brothers encouraged him, and wrote to the disciples to receive him. When he had come, he greatly helped those who had believed through grace;
18.28
ⲛⲁϥⲥⲟϩⲓ ⲛⲛⲓⲓⲟⲩⲇⲁⲓ ϧⲉⲛⲟⲩⲧⲁϫⲣⲟ ⲛⲟⲩⲟⲛϩ ⲉⲃⲟⲗ ⲉϥⲧⲁⲙⲟ ⲙⲙⲱⲟⲩ ⲉⲃⲟⲗ ϧⲉⲛⲛⲓⲅⲣⲁⲫⲏ ϫⲉⲡⲭⲣⲓⲥⲧⲟⲥ ⲡⲉ ⲓⲏⲥⲟⲩⲥ .
for he powerfully refuted the Jews, publicly showing by the Scriptures that Jesus was the Christ.
19.1
ⲁⲥϣⲱⲡⲓ ⲇⲉ ⲉⲣⲉⲁⲡⲉⲗⲗⲏⲥ ϧⲉⲛⲕⲟⲣⲓⲛⲑⲟⲥ ⲡⲁⲩⲗⲟⲥ ⲇⲉ ⲉⲧⲁϥⲥⲉⲡ ⲛⲓⲙⲁ ⲉⲧⲥⲁⲡϣⲱⲓ ⲉⲑⲣⲉϥⲓ ⲉⲉⲫⲉⲥⲟⲥ ⲟⲩⲟϩ ⲉⲧⲁϥϫⲓⲙⲓ ⲛϩⲁⲛⲙⲁⲑⲏⲧⲏⲥ .
It happened that, while Apollos was at Corinth, Paul, having passed through the upper country, came to Ephesus, and found certain disciples.
19.2
ⲡⲉϫⲁϥ ⲛⲱⲟⲩ ϫⲉⲁⲛ ⲁⲣⲉⲧⲉⲛϭⲓ ⲙⲡⲓⲡⲛⲉⲩⲙⲁⲉⲑⲟⲩⲁⲃ ⲉⲧⲁⲣⲉⲧⲉⲛⲛⲁϩϯ ⲛⲑⲱⲟⲩ ⲇⲉ ⲡⲉϫⲱⲟⲩ ϫⲉⲁⲗⲗⲁ ⲟⲩⲇⲉ ⲙⲡⲉⲛⲥⲱⲧⲉⲙ ⲣⲱ ϫⲉⲟⲩⲟⲛ ⲟⲩⲡⲛⲉⲩⲙⲁⲉϥⲟⲩⲁⲃ ϣⲟⲡ .
He said to them, 'Did you receive the Holy Spirit when you believed?' They said to him, 'No, we haven't even heard that there is a Holy Spirit.'
19.3
ⲛⲑⲟϥ ⲇⲉ ⲡⲉϫⲁϥ ϫⲉⲉⲧⲁⲩⲉⲙⲥ ⲑⲏⲛⲟⲩ ⲉⲟⲩ ⲛⲑⲱⲟⲩ ⲇⲉ ⲡⲉϫⲱⲟⲩ ϫⲉⲡⲓⲱⲙⲥ ⲛⲧⲉⲓⲱⲁⲛⲛⲏⲥ .
He said, 'Into what then were you baptized?' They said, 'Into John's baptism.'
19.4
ⲡⲁⲩⲗⲟⲥ ⲇⲉ ⲡⲉϫⲁϥ ϫⲉⲓⲱⲁⲛⲛⲏⲥ ⲙⲉⲛ ⲁϥϯⲱⲙⲥ ϧⲉⲛⲟⲩⲙⲱⲟⲩ ⲙⲙⲉⲧⲁⲛⲟⲓⲁ ⲙⲡⲓⲗⲁⲟⲥ ⲉϥϫⲱ ⲙⲙⲟⲥ ϩⲓⲛⲁ ⲛⲥⲉⲛⲁϩϯ ⲉⲡⲉⲑⲛⲏⲟⲩ ⲙⲉⲛⲉⲛⲥⲱϥ ⲉⲧⲉⲓⲏⲥⲟⲩⲥ ⲡⲉ .
Paul said, 'John indeed baptized with the baptism of repentance, saying to the people that they should believe in the one who would come after him, that is, in Jesus.'
19.5
ⲉⲧⲁⲩⲥⲱⲧⲉⲙ ⲇⲉ ⲁⲩϭⲓⲱⲙⲥ ⲉⲫⲣⲁⲛ ⲙⲡϭⲟⲓⲥ ⲓⲏⲥⲟⲩⲥ .
When they heard this, they were baptized in the name of the Lord Jesus.
19.6
ⲟⲩⲟϩ ⲉⲧⲁ ⲡⲁⲩⲗⲟⲥ ⲭⲁ ϫⲓϫ ⲉϫⲱⲟⲩ ⲁϥⲓ ⲉϩⲣⲏⲓ ⲉϫⲱⲟⲩ ⲛϫⲉⲡⲓⲡⲛⲉⲩⲙⲁⲉⲑⲟⲩⲁⲃ ⲛⲁⲩⲥⲁϫⲓ ⲇⲉ ϧⲉⲛⲫⲗⲁⲥ ⲟⲩⲟϩ ⲛⲁⲩⲉⲣⲡⲣⲟⲫⲏ ⲧⲉⲩⲓⲛ .
When Paul had laid his hands on them, the Holy Spirit came on them, and they spoke with other languages and prophesied.
19.7
ⲛⲑⲱⲟⲩ ⲇⲉ ⲧⲏⲣⲟⲩ ⲛⲁⲩⲉⲣ ⲓⲃ ⲛⲣⲱⲙⲓ .
They were about twelve men in all.
19.8
ⲉⲧⲁϥϣⲉ ⲇⲉ ⲉϧⲟⲩⲛ ⲉϯⲥⲩⲛⲁⲅⲱⲅⲏ ⲛⲁϥⲟⲩⲟⲛϩ ⲙⲙⲟϥ ⲉⲃⲟⲗ ⲛⲅ ⲛⲁⲃⲟⲧ ⲉϥⲥⲁϫⲓ ⲟⲩⲟϩ ⲉϥⲑⲱⲧ ⲙⲡⲟⲩϩⲏⲧ ⲉⲑⲃⲉϯⲙⲉⲧⲟⲩⲣⲟ ⲛⲧⲉⲫⲛⲟⲩϯ .
He entered into the synagogue, and spoke boldly for a period of three months, reasoning and persuading about the things concerning the Kingdom of God.
19.9
ⲉⲧⲁ ϩⲁⲛⲟⲩⲟⲛ ⲇⲉ ⲉⲣⲛⲁϣⲧϩⲏⲧ ⲉⲩⲟⲓ ⲛⲁⲧⲥⲱⲧⲉⲙ ⲉⲩⲥⲁϫⲓ ⲉϥϩⲱⲟⲩ ⲛⲥⲁⲡⲓⲙⲱⲓⲧ ⲙⲡⲉⲙⲑⲟ ⲙⲡⲓⲙⲏϣ ⲁϥⲫⲱⲧ ⲉⲃⲟⲗ ⲙⲙⲱⲟⲩ ⲉⲁϥⲫⲱⲣϫ ⲛⲛⲓⲙⲁⲑⲏⲧⲏⲥ ⲉⲃⲟⲗ ⲉϥⲥⲁϫⲓ ⲙⲙⲏ ⲛⲓ ϧⲉⲛϯⲥⲭⲟⲗⲏ ⲛⲧⲉⲧⲩⲣⲁⲛⲛⲟⲥ .
But when some were hardened and disobedient, speaking evil of the Way before the multitude, he departed from them, and separated the disciples, reasoning daily in the school of Tyrannus.
19.10
ⲫⲁⲓ ⲇⲉ ⲛⲁϥⲣⲁ ⲙⲙⲟϥ ⲛⲣⲟⲙⲡⲓ ⲃϯ ϩⲱⲥⲧⲉ ⲟⲩⲟⲛ ⲛⲓⲃⲉⲛ ⲉⲧϣⲟⲡ ϧⲉⲛϯⲁⲥⲓⲁ ⲛⲧⲟⲩⲥⲱⲧⲉⲙ ⲉⲡⲓⲥⲁϫⲓ ⲛⲧⲉⲡϭⲟⲓⲥ ⲛⲓⲓⲟⲩⲇⲁⲓ ⲛⲉⲙⲛⲓⲟⲩⲉⲓⲛⲓⲛ
This continued for two years, so that all those who lived in Asia heard the word of the Lord Jesus, both Jews and Greeks.
19.11
ⲛⲁϥⲓⲣⲓ ⲇⲉ ⲛϩⲁⲛϫⲟⲙ ⲛϫⲉⲫⲛⲟⲩϯ ⲛϩⲁⲛⲕⲟⲩϫⲓ ⲁⲛ ⲉⲃⲟⲗ ϩⲓⲧⲉⲛⲛⲉⲛϫⲓϫ ⲙⲡⲁⲩⲗⲟⲥ .
God worked special miracles by the hands of Paul,
19.12
ϩⲱⲥⲇⲉ ⲛⲥⲉϭⲓ ⲛϩⲁⲛⲥⲟⲩⲇⲁⲣⲓⲟⲛ ⲛⲉⲙϩⲁⲛⲥⲓⲙⲓⲕⲩⲛⲑⲓⲛⲟⲛ ⲉⲃⲟⲗ ϩⲓⲡⲉϥⲥⲱⲙⲁ ⲛⲥⲉⲭⲁⲩ ϩⲓϫⲉⲛⲛⲏ ⲉⲧϣⲱⲛⲓ ⲟⲩⲟϩ ⲛⲉϣⲁⲩϣⲉ ⲛⲱⲟⲩ ⲉⲃⲟⲗ ϩⲓⲱⲧⲟⲩ ⲛϫⲉⲛⲓϣⲱⲛⲓ ⲟⲩⲟϩ ⲛⲓⲡⲛⲉⲩⲙⲁⲉⲧϩⲱⲟⲩ ⲛⲁⲩⲛⲏⲟⲩ ⲉⲃⲟⲗ ⲡⲉ .
so that even handkerchiefs or aprons were carried away from his body to the sick, and the evil spirits went out.
19.13
ⲁⲩϩⲓⲧⲟⲧⲟⲩ ⲇⲉ ⲛϫⲉϩⲁⲛⲟⲩⲟⲛ ⲉⲃⲟⲗ ϧⲉⲛⲛⲓⲓⲟⲩⲇⲁⲓ ⲉⲩⲕⲱϯ ⲛⲉⲝⲟⲣⲅⲓⲥⲧⲏⲥ ⲉϫⲉ ⲫⲣⲁⲛ ⲙⲡϭⲟⲓⲥ ⲓⲏⲥⲟⲩⲥ ⲉϫⲉⲛⲛⲏ ⲉⲧⲉⲛⲓⲡⲛⲉⲩⲙⲁⲉⲧϩⲱⲟⲩ ϩⲓⲱⲧⲟⲩ ⲉⲩϫⲱ ⲙⲙⲟⲥ ϫⲉϯⲧⲁⲣⲕⲟ ⲙⲙⲱⲧⲉⲛ ⲛⲓⲏⲥⲟⲩⲥ ⲫⲏ ⲉⲧⲉⲡⲁⲩⲗⲟⲥ ϩⲓⲱⲓϣ ⲙⲙⲟϥ .
But some of the itinerant Jews, exorcists, took on themselves to invoke over those who had the evil spirits the name of the Lord Jesus, saying, 'We adjure you by Jesus whom Paul preaches.'
19.14
ⲛⲉ ⲟⲩⲟⲛ ⲍⲇⲉ ⲛϣⲏⲣⲓ ⲛⲧⲉⲟⲩⲁⲓ ϫⲉⲥⲕⲉⲩⲁ ⲉⲟⲩⲓⲟⲩⲇⲁⲓ ⲛⲁⲣⲭⲓⲉⲣⲉⲩⲥ ⲉⲩⲓⲣⲓ ⲙⲫⲁⲓ .
There were seven sons of one Sceva, a Jewish chief priest, who did this.
19.15
ⲁϥⲉⲣⲟⲩⲱ ⲛϫⲉⲡⲓⲡⲛⲉⲩⲙⲁⲉⲧϩⲱⲟⲩ ⲡⲉϫⲁϥ ⲛⲱⲟⲩ ϫⲉⲓⲏⲥⲟⲩⲥ ϯⲥⲱⲟⲩⲛ ⲙⲙⲟϥ ⲟⲩⲟϩ ⲡⲕⲉⲡⲁⲩⲗⲟⲥ ϯⲉⲙⲓ ⲉⲣⲟϥ ⲛⲑⲱⲧⲉⲛ ⲇⲉ ⲛⲑⲱⲧⲉⲛ ⲛⲓⲙ .
The evil spirit answered, 'Jesus I know, and Paul I know, but who are you?'
19.16
ⲟⲩⲟϩ ⲁϥϩⲓⲧϥ ⲉϧⲣⲏⲓ ⲉϫⲱⲟⲩ ⲛϫⲉⲡⲓⲣⲱⲙⲓ ⲉⲧⲉⲡⲓⲡⲛⲉⲩⲙⲁⲉⲧϩⲱⲟⲩ ⲛⲉⲙⲁϥ ⲁϥⲉⲣϭⲟⲓⲥ ⲉⲣⲱⲟⲩ ⲉⲩⲥⲟⲡ ⲁϥϫⲉⲙϫⲟⲙ ⲉϩⲣⲏⲓ ⲉϫⲱⲟⲩ ϩⲱⲥⲧⲉ ⲛⲥⲉⲫⲱⲧ ⲉⲃⲟⲗ ϧⲉⲛⲡⲓⲏⲓ ⲉⲧⲉⲙⲙⲁⲩ ⲉⲩⲃⲏϣ ⲉⲣⲉϫⲱⲟⲩ ⲫⲏϧ .
The man in whom the evil spirit was leaped on them, and overpowered them, and prevailed against them, so that they fled out of that house naked and wounded.
19.17
ⲫⲁⲓ ⲇⲉ ⲁϥϣⲱⲡⲓ ⲉϥⲟⲩⲟⲛϩ ⲉⲃⲟⲗ ⲛⲛⲓⲓⲟⲩⲇⲁⲓ ⲧⲏⲣⲟⲩ ⲛⲉⲙⲛⲓⲟⲩⲉⲓⲛⲓⲛ ⲉⲧϣⲟⲡ ϧⲉⲛⲉⲫⲉⲥⲟⲥ ⲟⲩⲟϩ ⲟⲩϩⲟϯ ⲁⲥⲓ ⲉϩⲣⲏⲓ ⲉϫⲱⲟⲩ ⲧⲏⲣⲟⲩ ⲟⲩⲟϩ ⲛⲁϥⲛⲏⲟⲩ ⲛϭⲓⲥⲓ ⲛϫⲉⲫⲣⲁⲛ ⲙⲡϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ .
This became known to all, both Jews and Greeks, who lived at Ephesus. Fear fell on them all, and the name of the Lord Jesus was magnified.
19.18
ⲟⲩⲙⲏϣ ⲇⲉ ⲉⲃⲟⲗ ϧⲉⲛⲛⲏ ⲉⲧⲁⲩⲛⲁϩϯ ⲛⲁⲩⲛⲏⲟⲩ ⲡⲉ ⲉⲩⲟⲩⲱⲛϩ ⲉⲃⲟⲗ ⲟⲩⲟϩ ⲉⲩϫⲱ ⲛⲛⲟⲩϩⲃⲏⲟⲩⲓ .
Many also of those who had believed came, confessing, and declaring their deeds.
19.19
ϩⲁⲛⲙⲏϣ ⲇⲉ ϧⲉⲛⲛⲏ ⲉⲛⲁⲩⲓⲣⲓ ⲛⲛⲓⲙⲉⲧⲡⲉⲣⲓⲉⲣⲅⲟⲥ ⲉⲁⲩⲓⲛⲓ ⲛⲛⲟⲩϫⲱⲙ ⲁⲩⲣⲟⲕϩⲟⲩ ⲙⲡⲉⲙⲑⲟ ⲛⲟⲩⲟⲛ ⲛⲓⲃⲉⲛ ⲟⲩⲟϩ ⲁⲩϥⲓⲱⲡ ⲛⲛⲟⲩⲧⲓⲙⲏ ⲉⲁⲩϫⲉⲙⲟⲩ ⲉⲟⲩⲟⲛ ⲉⲛⲑⲃⲁ ⲛϩⲁⲧ ⲙⲙⲁⲩ .
Many of those who practiced magical arts brought their books together and burned them in the sight of all. They counted the price of them, and found it to be fifty thousand pieces of silver.
19.20
ⲡⲁⲓⲣⲏϯ ⲇⲉ ϧⲉⲛⲟⲩⲁⲙⲁϩⲓ ⲁϥⲁⲓⲁⲓ ⲛϫⲉⲡⲥⲁϫⲓ ⲙⲡϭⲟⲓⲥ ⲟⲩⲟϩ ⲁϥϫⲉⲙϫⲟⲙ .
So the word of the Lord was growing and becoming mighty.
19.21
ⲉⲧⲁⲩϫⲱⲕ ⲇⲉ ⲉⲃⲟⲗ ⲛϫⲉⲛⲁⲓ ⲁ ⲡⲁⲩⲗⲟⲥ ⲭⲁⲥ ϧⲉⲛⲡⲉϥⲡⲛⲉⲩⲙⲁϫⲉ ⲁϥϣⲁⲛⲙⲟⲩϣⲧ ⲛⲧⲙⲁⲕⲉⲇⲟⲛⲓⲁ ⲛⲉⲙϯⲁⲭⲁⲓⲁ ⲛⲧⲉϥϣⲉ ⲉⲓⲉⲣⲟⲥⲁⲗⲏⲙ ⲉⲁϥϫⲟⲥ ϫⲉⲙⲉⲛⲉⲛⲥⲁⲑⲣⲓϣⲉ ⲙⲙⲁⲩ ϩⲱϯ ⲛⲧⲁⲛⲁⲩ ⲉⲧⲕⲉⲣⲱⲙⲏ .
Now after these things had ended, Paul determined in the spirit, when he had passed through Macedonia and Achaia, to go to Jerusalem, saying, 'After I have been there, I must also see Rome.'
19.22
ⲁϥⲟⲩⲱⲣⲡ ⲇⲉ ⲛⲃ ⲉⲧⲙⲁⲕⲉⲇⲟⲛⲓⲁ ϧⲉⲛⲛⲏ ⲉⲧϣⲉⲙϣⲓ ⲙⲙⲟϥ ⲧⲓⲙⲟⲑⲉⲟⲥ ⲛⲉⲙⲉⲣⲁⲥⲧⲟⲥ ⲛⲑⲟϥ ⲇⲉ ⲁϥⲉⲣ ⲟⲩⲭⲣⲟⲛⲟⲥ ϧⲉⲛϯⲁⲥⲓⲁ .
Having sent into Macedonia two of those who served him, Timothy and Erastus, he himself stayed in Asia for a while.
19.23
ⲁϥϣⲱⲡⲓ ⲇⲉ ⲙⲡⲓⲥⲏⲟⲩ ⲉⲧⲉⲙⲙⲁⲩ ⲛϫⲉⲟⲩϣⲑⲟⲣⲧⲉⲣ ⲛⲟⲩⲕⲟⲩϫⲓ ⲁⲛ ⲉⲑⲃⲉⲡⲓⲙⲱⲓⲧ .
About that time there arose no small stir concerning the Way.
19.24
ⲟⲩⲁⲓ ⲅⲁⲣ ⲉⲡⲉϥⲣⲁⲛ ⲡⲉ ⲇⲓⲙⲏⲧⲣⲓⲟⲥ ⲟⲩⲙⲁⲛⲕ ϩⲁⲧ ⲉϥⲙⲟⲛⲕ ⲛϩⲁⲛⲉⲣⲫⲏⲟⲩⲓ ⲛϩⲁⲧ ⲛⲧⲉϯⲁⲣⲧⲉⲙⲓⲥ ⲛⲁϥϯ ⲛϩⲁⲛⲙⲏϣ ⲛϩⲱⲃ ⲛⲛⲓⲧⲉⲭⲛⲓⲧⲏⲥ ⲛϩⲁⲛⲕⲟⲩϫⲓ ⲁⲛ .
For a certain man named Demetrius, a silversmith, who made silver shrines of Artemis, brought no little business to the craftsmen,
19.25
ⲛⲁⲓ ⲉⲧⲁϥⲑⲟⲩⲱⲧⲟⲩ ⲛⲉⲙⲛⲓⲕⲉⲉⲣⲅⲁⲧⲏ ⲥⲉⲧⲉⲙⲡⲕⲱϯ ⲛⲛⲁⲓ ⲡⲉϫⲁϥ ⲛⲓⲣⲱⲙⲓ ⲧⲉⲧⲉⲛⲥⲱⲟⲩⲛ ϫⲉⲉⲃⲟⲗ ϧⲉⲛⲧⲁⲓϫⲓⲛⲉⲣϩⲱⲃ ⲁⲣⲉ ϯⲙⲉⲧⲣⲉϥϫⲫⲉ ϩⲏⲟⲩ ϣⲟⲡ ⲛⲁⲛ .
whom he gathered together, with the workmen of like occupation, and said, 'Sirs, you know that by this business we have our wealth.
19.26
ⲟⲩⲟϩ ⲧⲉⲧⲉⲛⲛⲁⲩ ⲟⲩⲟϩ ⲧⲉⲧⲉⲛⲥⲱⲧⲉⲙ ϫⲉⲟⲩ ⲙⲟⲛⲟⲛ ⲇⲉ ⲉⲫⲉⲥⲟⲥ ⲙⲙⲁⲩⲁⲧⲥ ⲁⲗⲗⲁ ⲥⲭⲉⲇⲟⲛ ϧⲉⲛϯⲁⲥⲓⲁ ⲧⲏⲣⲥ ⲁⲫⲁⲓ ϫⲉⲡⲁⲩⲗⲟⲥ ⲟⲩⲱⲧⲉⲃ ⲛⲟⲩⲛⲓϣϯ ⲙⲙⲏϣ ⲉⲃⲟⲗ ⲉϥϫⲱ ⲙⲙⲟⲥ ϫⲉϩⲁⲛⲛⲟⲩϯ ⲁⲛ ⲛⲉⲛⲁⲓ ⲉⲧⲟⲩⲑⲁⲙⲓⲟ ⲙⲙⲱⲟⲩ ⲉⲃⲟⲗ ϩⲓⲧⲉⲛϩⲁⲛⲙⲟⲩⲛⲕ ⲛϫⲓϫ .
You see and hear, that not at Ephesus alone, but almost throughout all Asia, this Paul has persuaded and turned away many people, saying that they are no gods, that are made with hands.
19.27
ⲟⲩ ⲙⲟⲛⲟⲛ ⲡⲁⲓⲙⲉⲣⲟⲥ ⲉⲑⲛⲁϣⲱⲡⲓ ⲛⲁⲛ ⲉⲟⲩⲕⲩⲛⲇⲓⲛⲟⲥ ⲉⲑⲣⲉⲛⲓ ⲉⲩⲥⲟϩⲓ ⲁⲗⲗⲁ ⲡⲓⲕⲉⲉⲣⲫⲉⲓ ⲛⲧⲉϯⲛⲓϣϯ ⲛⲛⲟⲩϯ ϯⲁⲣⲧⲉⲙⲓⲥ ⲛⲥⲉⲛⲁⲟⲡϥ ⲁⲛ ϫⲉⲉϩⲗⲓ ⲟⲩⲟϩ ⲥⲉⲛⲁϣⲟⲣϣⲉⲣ ⲛⲧⲉⲥⲙⲉⲧⲛⲓϣϯ ⲑⲁⲓ ⲉⲧⲉϯⲁⲥⲓⲁ ⲧⲏⲣⲥ ⲛⲉⲙϯⲟⲓⲕⲟⲩⲙⲉⲛⲏ ⲧⲏⲣⲥ ⲉⲣⲥⲉⲃⲉⲥⲑⲉ ⲙⲙⲟⲥ .
Not only is there danger that this our trade come into disrepute, but also that the temple of the great goddess Artemis will be counted as nothing, and her majesty destroyed, whom all Asia and the world worships.'
19.28
ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓ ⲟⲩⲟϩ ⲉⲧⲁⲩⲙⲟϩ ⲛϫⲱⲛⲧ ⲛⲁⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉⲟⲩⲛⲓϣϯ ⲧⲉ ϯⲁⲣⲧⲉⲙⲓⲥ ⲛⲧⲉⲛⲁ ⲉⲫⲉⲥⲟⲥ .
When they heard this they were filled with anger, and cried out, saying, 'Great is Artemis of the Ephesians!'
19.29
ⲟⲩⲟϩ ⲁⲥⲙⲟϩ ⲛϫⲉϯⲡⲟⲗⲓⲥ ⲛϣⲑⲟⲣⲧⲉⲣ ⲁⲩϭⲟϫⲓ ⲇⲉ ⲧⲏⲣⲟⲩ ϧⲉⲛⲟⲩⲟⲩⲟⲓ ⲉⲩⲥⲟⲡ ⲉⲡⲓⲑⲉⲁⲧⲣⲟⲛ ⲁⲩϩⲱⲗⲉⲙ ⲛⲅⲁⲓⲟⲥ ⲛⲉⲙⲁⲣⲓⲥⲧⲁⲣⲭⲟⲥ ⲉϩⲁⲛⲣⲉⲙⲑⲙⲁⲕⲉⲇⲟⲛⲓⲁ ⲛⲉⲁⲩⲓ ⲉⲡϣⲉⲙⲙⲟ ⲛⲉⲙⲡⲁⲩⲗⲟⲥ .
The whole city was filled with confusion, and they rushed with one accord into the theater, having seized Gaius and Aristarchus, men of Macedonia, Paul's companions in travel.
19.30
ⲉϥⲟⲩⲱϣ ⲇⲉ ⲛϫⲉⲡⲁⲩⲗⲟⲥ ⲉⲓ ⲉϧⲟⲩⲛ ⲉⲡⲓⲙⲏϣ ⲛⲁⲩⲭⲱ ⲙⲙⲟϥ ⲁⲛ ⲡⲉ ⲛϫⲉⲛⲓⲙⲁⲑⲏⲧⲏⲥ .
When Paul wanted to enter in to the people, the disciples didn't allow him.
19.31
ϩⲁⲛⲕⲉⲭⲱⲟⲩⲛⲓ ⲇⲉ ⲉⲃⲟⲗ ϧⲉⲛⲛⲓⲁⲣⲭ ⲱⲛ ⲛⲧⲉϯⲁⲥⲓⲁ ⲉⲩⲟⲓ ⲛϣⲫⲏⲣ ⲉⲣⲟϥ ⲁⲩⲟⲩⲱⲣⲡ ϩⲁⲣⲟϥ ⲉⲩϯϩⲟ ⲉϣⲧⲉⲙⲑⲣⲉϥⲧⲏⲓϥ ⲙⲙⲁⲩⲁⲧϥ ⲉⲡⲓⲑⲉⲁⲧⲣⲟⲛ .
Certain also of the Asiarchs, being his friends, sent to him and begged him not to venture into the theater.
19.32
ϩⲁⲛⲕⲉⲭⲱⲟⲩⲛⲓ ⲙⲉⲛ ⲟⲩⲛ ⲛⲁⲩⲱϣ ⲉⲃⲟⲗ ⲉⲩϫⲱ ⲛⲕⲉϩⲱⲃ ⲛⲉⲁ ϯⲉⲕⲕⲗⲏⲥⲓⲁ ⲅⲁⲣ ϣⲑⲟⲣⲧⲉⲣ ⲡⲉ ⲟⲩⲟϩ ⲛⲁⲣⲉⲡⲟⲩϩⲟⲩⲟ ⲥⲱⲟⲩⲛ ⲁⲛ ϫⲉⲉⲧⲁⲩⲑⲱⲟⲩϯ ⲉⲑⲃⲉⲟⲩ .
Some therefore cried one thing, and some another, for the assembly was in confusion. Most of them didn't know why they had come together.
19.33
ⲉⲃⲟⲗ ⲇⲉ ϧⲉⲛⲡⲓⲙⲏϣ ⲁⲩⲓⲛⲓ ⲛⲁⲗⲉⲝⲁⲛⲇⲣⲟⲥ ⲉⲃⲟⲗ ⲛϫⲉⲛⲓⲓⲟⲩⲇⲁⲓ ⲁⲗⲉⲝⲁⲛⲇⲣⲟⲥ ⲁϥϭⲱⲣⲉⲙ ⲉⲣⲱⲟⲩ ⲛⲧⲉϥϫⲓϫ ⲉϥⲟⲩⲱϣ ⲉⲉⲣⲁⲡⲟⲗⲟⲅⲓⲥⲑⲉ ⲙⲡⲓⲙⲏϣ .
They brought Alexander out of the multitude, the Jews putting him forward. Alexander beckoned with his hand, and would have made a defense to the people.
19.34
ⲉⲧⲁⲩⲉⲙⲓ ⲇⲉ ϫⲉⲟⲩⲓⲟⲩⲇⲁⲓ ⲡⲉ ⲁϥϣⲱⲡⲓ ⲛϫⲉⲟⲩϧⲣⲱⲟⲩ ⲛⲟⲩⲱⲧ ⲛⲧⲉⲟⲩⲟⲛ ⲛⲓⲃⲉⲛ ⲛⲁⲩ ⲟⲩⲛⲟⲩ ⲥⲛⲟⲩϯ ⲉⲩⲱϣ ⲉⲃⲟⲗ ϫⲉⲟⲩⲛⲓϣϯ ⲧⲉ ϯⲁⲣⲧⲉⲙⲓⲥ ⲛⲧⲉⲛⲁ ⲉⲫⲉⲥⲟⲥ .
But when they perceived that he was a Jew, all with one voice for a time of about two hours cried out, 'Great is Artemis of the Ephesians!'
19.35
ⲉⲧⲁϥⲑⲣⲉ ⲡⲓⲙⲏϣ ⲇⲉ ϩⲉⲣⲓ ⲛϫⲉⲡⲓⲅⲣⲁⲙⲙⲁⲧⲉⲩⲥ ⲡⲉϫⲁϥ ⲛⲓⲣⲱⲙⲓ ⲛⲓⲣⲉⲙⲉⲫⲉⲥⲟⲥ ⲛⲓⲙ ⲅⲁⲣ ϧⲉⲛⲛⲓⲣⲱⲙⲓ ⲉⲧⲉⲛϥⲥⲱⲟⲩⲛ ⲁⲛ ⲛⲧⲡⲟⲗⲓⲥ ⲛⲛⲓⲣⲉⲙⲉⲫⲉⲥⲟⲥ ϫⲉⲥⲟⲓ ⲛⲛⲉⲱⲕⲉⲣⲟⲥ ⲛⲧⲉϯⲛⲓϣϯ ⲛⲁⲣⲧⲉⲙⲓⲥ ⲛⲉⲙⲡⲓⲇⲓⲟⲡⲉⲧⲏⲥ .
When the town clerk had quieted the multitude, he said, 'You men of Ephesus, what man is there who doesn't know that the city of the Ephesians is temple keeper of the great goddess Artemis, and of the image which fell down from Zeus?
19.36
ⲙⲙⲟⲛ ϩⲗⲓ ⲟⲩⲛ ϯⲉϧⲟⲩⲛ ⲉϩⲣⲉⲛⲛⲁⲓ ⲥⲉⲙⲡϣⲁ ⲟⲩⲛ ⲛⲧⲉⲧⲉⲛϣⲱⲡⲓ ⲉⲣⲉⲧⲉⲛⲥⲙⲟⲛⲧ ⲟⲩⲟϩ ⲛⲧⲉⲧⲉⲛϣⲧⲉⲙⲉⲣ ϩⲗⲓ ⲛϩⲱⲃ ϧⲉⲛⲟⲩⲁⲥⲓⲁⲓ .
Seeing then that these things can't be denied, you ought to be quiet, and to do nothing rash.
19.37
ⲁⲧⲉⲧⲉⲛⲓⲛⲓ ⲅⲁⲣ ⲛⲛⲁⲓⲣⲱⲙⲓ ⲉⲙⲛⲁⲓ ⲟⲩⲇⲉ ϩⲁⲛⲕⲁⲗⲡ ⲉⲣⲫⲉⲓ ⲁⲛ ⲛⲉⲟⲩⲇⲉ ⲥⲉϫⲉⲟⲩⲁ ⲁⲛ ⲉⲛⲉⲧⲉⲛⲛⲟⲩϯ .
For you have brought these men here, who are neither robbers of temples nor blasphemers of your goddess.
19.38
ⲓⲥϫⲉ ⲟⲩⲛ ⲇⲓⲙⲏⲧⲣⲓⲟⲥ ⲛⲉⲙⲛⲓⲕⲉⲧⲉⲭ ⲛⲓⲧⲏⲥ ⲉⲑⲛⲉⲙⲁϥ ⲟⲩⲟⲛ ⲛⲧⲱⲟⲩ ⲛⲟⲩⲥⲁϫⲓ ϧⲁⲟⲩⲁⲓ ⲥⲉⲛⲁⲓⲛⲓ ⲛⲛⲓⲁⲅⲟⲣⲉⲟⲥ ⲟⲩⲟϩ ⲟⲩⲟⲛ ⲁⲛⲑⲩⲡⲁⲧⲟⲥ ϣⲟⲡ ⲙⲁⲣⲟⲩⲥⲉⲙⲓ ⲉⲛⲟⲩⲉⲣⲏⲟⲩ .
If therefore Demetrius and the craftsmen who are with him have a matter against anyone, the courts are open, and there are proconsuls. Let them press charges against one another.

Bohairic Coptic New Testament, Coptic SCRIPTORIUM (github.com/CopticScriptorium/corpora, corpus bohairic.nt). Coptic text from Marcion / Hany Takla; annotation by Nina Speranskaja, Nicholas Wagner and Amir Zeldes. English is the World English Bible (public domain), aligned by Coptic SCRIPTORIUM. Licence: CC-BY 4.0. Source.