Acts (Bohairic Coptic)

Coptic New Testament (Bohairic) · 1,006 sections

14.10
ⲡⲉϫⲁϥ ϧⲉⲛⲟⲩⲛⲓϣϯ ⲛⲥⲙⲏ ϫⲉⲧⲱⲛⲕ ⲟϩⲓ ⲉⲣⲁⲧⲕ ⲉϫⲉⲛⲛⲉⲕϭⲁⲗⲁⲩϫ ⲟⲩⲟϩ ⲛⲁϥϭⲓⲫⲉⲓ ⲟⲩⲟϩ ⲛⲁϥⲙⲟϣⲓ .
said with a loud voice, 'Stand upright on your feet!' He leaped up and walked.
14.11
ⲛⲓⲙⲏϣ ⲙⲉⲛ ⲟⲩⲛ ⲉⲧⲁⲩⲛⲁⲩ ⲉⲫⲏ ⲉⲧⲁϥⲁⲓϥ ⲛϫⲉⲡⲁⲩⲗⲟⲥ ⲁⲩϭⲓⲥⲓ ⲛⲧⲟⲩⲥⲙⲏ ⲉϩⲣⲏⲓ ⲙⲙⲉⲧⲗⲩⲕⲁⲱⲛ ⲉⲩϫⲱ ⲙⲙⲟⲥ ϫⲉⲁ ⲛⲓⲛⲟⲩϯ ⲉⲣ ⲙⲫⲣⲏϯ ⲛⲛⲓⲣⲱⲙⲓ ⲁⲩⲓ ⲉⲡⲉⲥⲏⲧ ϣⲁⲣⲟⲛ .
When the multitude saw what Paul had done, they lifted up their voice, saying in the language of Lycaonia, 'The gods have come down to us in the likeness of men!'
14.12
ⲛⲁⲩⲙⲟⲩϯ ⲙⲉⲛ ⲉⲃⲁⲣⲛⲁⲃⲁⲥ ϫⲉⲡⲓⲍⲉⲩⲥ ⲡⲁⲩⲗⲟⲥ ⲇⲉ ϫⲉⲡⲓⲉⲣⲙⲏⲥ ⲉⲡⲓⲇⲏ ⲛⲑⲟϥ ⲉⲧⲟⲓ ⲛϩⲩⲅⲟⲩⲙⲉⲛⲟⲥ ⲛⲧⲉⲡⲓⲥⲁϫⲓ .
They called Barnabas 'Jupiter,' and Paul 'Mercury,' because he was the chief speaker.
14.13
ⲡⲓⲟⲩⲏⲃ ⲇⲉ ⲛⲧⲉⲡⲓⲍⲉⲩⲥ ⲫⲏ ⲉⲛⲁϥⲭⲏ ϧⲁϫⲱⲥ ⲛϯⲡⲟⲗⲓⲥ ⲁϥⲓⲛⲓ ⲛϩⲁⲛⲙⲁⲥⲓ ⲛⲉⲙϩⲁⲛⲭⲗⲟⲙ ⲉϩⲣⲏⲓ ⲉⲡⲓⲡⲩⲗⲱⲛ ⲛⲁϥⲟⲩⲱϣ ⲉϣⲱⲧ ⲡⲉ ⲛⲉⲙⲡⲓⲙⲏϣ .
The priest of Jupiter, whose temple was in front of their city, brought oxen and garlands to the gates, and would have made a sacrifice along with the multitudes.
14.14
ⲉⲧⲁⲩⲥⲱⲧⲉⲙ ⲇⲉ ⲛϫⲉⲛⲓⲁⲡⲟⲥⲧⲟⲗⲟⲥ ⲃⲁⲣⲛⲁⲃⲁⲥ ⲛⲉⲙⲡⲁⲩⲗⲟⲥ ⲁⲩⲫⲱϧ ⲛⲛⲟⲩϩⲃⲱⲥ ⲁⲩϭⲟϫⲓ ϣⲁⲡⲓⲙⲏϣ ⲉⲩⲱϣ ⲉⲃⲟⲗ
But when the apostles, Barnabas and Paul, heard of it, they tore their clothes, and sprang into the multitude, crying out,
14.15
ⲉⲩϫⲱ ⲙⲙⲟⲥ ⲛⲓⲣⲱⲙⲓ ⲉⲑⲃⲉⲟⲩ ⲧⲉⲧⲉⲛⲓⲣⲓ ⲛⲛⲁⲓ ⲁⲛⲟⲛ ϩⲱⲛ ⲁⲛⲟⲛ ϩⲁⲛⲣⲱⲙⲓ ⲛⲣⲉϥϣⲉⲡⲙⲕⲁϩ ⲙⲡⲉⲧⲉⲛⲣⲏϯ ⲉⲛϩⲓϣⲉⲛⲛⲟⲩϥⲓ ⲛⲱⲧⲉⲛ ⲉϩⲉⲛ ⲑⲏⲛⲟⲩ ⲥⲁⲃⲟⲗ ⲛⲛⲓⲙⲉⲧⲉⲫⲗⲏⲟⲩ ⲟⲩⲟϩ ⲉⲕⲉⲧ ⲑⲏⲛⲟⲩ ⲉⲫⲛⲟⲩϯ ⲉⲧⲟⲛϧ ⲫⲏ ⲉⲧⲁϥⲑⲁⲙⲓⲟ ⲛⲧⲫⲉ ⲛⲉⲙⲡⲕⲁϩⲓ ⲛⲉⲙⲫⲓⲟⲙ ⲛⲉⲙϩⲱⲃ ⲛⲓⲃⲉⲛ ⲉⲧⲉⲛϧⲏⲧⲟⲩ .
'Men, why are you doing these things? We also are men of like passions with you, and bring you good news, that you should turn from these vain things to the living God, who made the sky and the earth and the sea, and all that is in them;
14.16
ⲫⲏ ⲉⲧⲉⲛϧⲣⲏⲓ ϧⲉⲛⲛⲓⲅⲉⲛⲉⲁ ⲉⲧⲁⲩⲥⲓⲛⲓ ⲁϥⲭⲱ ⲛⲛⲓⲉⲑⲛⲟⲥ ⲧⲏⲣⲟⲩ ⲉⲑⲣⲟⲩⲙⲟϣⲓ ϩⲓⲛⲟⲩⲙⲱⲓⲧ .
who in the generations gone by allowed all the nations to walk in their own ways.
14.17
ⲕⲉⲧⲟⲓ ⲙⲡⲉϥⲭⲁϥ ⲉϥⲟⲓ ⲛⲁⲧⲙⲉⲑⲣⲉ ⲉϥⲓⲣⲓ ⲛϩⲁⲛⲡⲉⲑⲛⲁⲛⲉⲩ ⲁϥϯ ⲛⲱⲟⲩ ⲛϩⲁⲛⲙⲟⲩⲛϩⲱⲟⲩ ⲉⲃⲟⲗ ϧⲉⲛⲧⲫⲉ ⲛⲉⲙϩⲁⲛⲥⲏⲟⲩ ⲙⲙⲁⲥⲟⲩⲧⲁϩ ⲉϥⲧⲥⲓⲟ ⲛⲛⲉⲧⲉⲛϩⲏⲧ ⲛϧⲣⲉ ⲛⲉⲙⲟⲩⲛⲟϥ .
Yet he didn't leave himself without witness, in that he did good and gave you rains from the sky and fruitful seasons, filling our hearts with food and gladness.'
14.18
ⲟⲩⲟϩ ⲛⲁⲓ ⲉⲩϫⲱ ⲙⲙⲱⲟⲩ ⲙⲟⲅⲓⲥ ⲁⲩⲑⲣⲉ ⲡⲓⲙⲏϣ ϩⲉⲣⲓ ⲉϣⲧⲉⲙϣⲱⲧ ⲛⲱⲟⲩ .
Even saying these things, they hardly stopped the multitudes from making a sacrifice to them.
14.19
ⲁⲩϣⲉ ⲇⲉ ⲉⲃⲟⲗ ϧⲉⲛⲧⲁⲛⲧⲓⲟⲭⲓⲁ ⲛⲉⲙⲓⲕⲟⲛⲓⲟⲛ ⲛϫⲉϩⲁⲛⲓⲟⲩⲇⲁⲓ ⲁⲩⲑⲉⲧ ϩⲏⲧ ⲛⲛⲓⲙⲏϣ ⲁⲩϩⲓⲱⲛⲓ ⲉϫⲉⲛⲡⲁⲩⲗⲟⲥ ⲟⲩⲟϩ ⲁⲩⲱϣϯ ⲙⲙⲟϥ ⲥⲁⲃⲟⲗ ⲛϯⲡⲟⲗⲓⲥ ⲉⲩⲙⲉⲩⲓ ϫⲉⲁϥⲙⲟⲩ .
But some Jews from Antioch and Iconium came there, and having persuaded the multitudes, they stoned Paul, and dragged him out of the city, supposing that he was dead.
14.20
ⲉⲩⲕⲱϯ ⲇⲉ ⲉⲣⲟϥ ⲛϫⲉⲛⲓⲙⲁⲑⲏⲧⲏⲥ ⲉⲧⲁϥⲧⲱⲛϥ ⲇⲉ ⲁϥⲓ ⲉϧⲟⲩⲛ ⲉϯⲃⲁⲕⲓ ⲟⲩⲟϩ ⲡⲉϥⲣⲁⲥϯ ⲁϥⲓ ⲉⲃⲟⲗ ⲛⲉⲙⲃⲁⲣⲛⲁⲃⲁⲥ ⲉϩⲣⲏⲓ ⲉⲧⲉⲣⲃⲏ .
But as the disciples stood around him, he rose up, and entered into the city. On the next day he went out with Barnabas to Derbe.
14.21
ⲉⲧⲁⲩϩⲓϣⲉⲛⲛⲟⲩϥⲓ ⲇⲉ ϧⲉⲛϯⲡⲟⲗⲓⲥ ⲉⲧⲉⲙⲙⲁⲩ ⲟⲩⲟϩ ⲉⲧⲁⲩϯⲥⲃⲱ ⲛⲟⲩⲛⲓϣϯ ⲙⲙⲏ ϣⲁⲩⲧⲁⲥⲑⲟ ⲉϩⲣⲏⲓ ⲉⲗⲩⲥⲧⲣⲁ ⲛⲉⲙⲓⲕⲟⲛⲓⲟⲛ ⲛⲉⲙⲧⲁⲛϯⲟⲭⲓⲁ .
When they had preached the Good News to that city, and had made many disciples, they returned to Lystra, Iconium, and Antioch,
14.22
ⲉⲩⲧⲁϫⲣⲟ ⲛⲛⲓⲯⲩⲭⲏ ⲛⲧⲉⲛⲓⲙⲁⲑⲏⲧⲏⲥ ⲉⲩϯⲛⲟⲙϯ ⲛⲱⲟⲩ ⲉⲑⲣⲟⲩⲟϩⲓ ϧⲉⲛⲡⲓⲛⲁϩϯ ⲟⲩⲟϩ ϫⲉⲉⲃⲟⲗ ϩⲓⲧⲉⲛⲟⲩⲙⲏϣ ⲛϩⲟϫϩⲉϫ ϩⲱϯ ⲉⲣⲟⲛ ⲉϣⲉ ⲉϧⲟⲩⲛ ⲉϯⲙⲉⲧⲟⲩⲣⲟ ⲛⲧⲉⲫⲛⲟⲩϯ .
confirming the souls of the disciples, exhorting them to continue in the faith, and that through many afflictions we must enter into the Kingdom of God.
14.23
ⲁⲩⲭⲁϫⲓϫ ⲇⲉ ⲉϫⲉⲛϩⲁⲛⲡⲣⲉⲥⲃⲩⲧⲉⲣⲟⲥ ⲛⲱⲟⲩ ⲕⲁⲧⲁⲉⲕⲕⲗⲏⲥⲓⲁ ⲟⲩⲟϩ ⲉⲧⲁⲩⲧⲱⲃϩ ϧⲉⲛϩⲁⲛⲛⲏⲥⲧⲓⲁ ⲁⲩⲭⲁⲩ ϧⲁⲧⲉⲛⲡϭⲟⲓⲥ ⲫⲏ ⲉⲧⲁⲩⲛⲁϩϯ ⲉⲣⲟϥ .
When they had appointed elders for them in every assembly, and had prayed with fasting, they commended them to the Lord, on whom they had believed.
14.24
ⲉⲧⲁⲩⲥⲉⲛ ϯⲡⲓⲥⲓⲇⲓⲁ ⲇⲉ ⲁⲩⲓ ⲉϯⲡⲁⲙⲫⲩⲗⲓⲁ .
They passed through Pisidia, and came to Pamphylia.
14.25
ⲟⲩⲟϩ ⲉⲧⲁⲩⲥⲁϫⲓ ⲙⲡⲓⲥⲁϫⲓ ϧⲉⲛⲡⲉⲣⲅⲏ ⲁⲩⲓ ⲉϩⲣⲏⲓ ⲉⲁⲧⲧⲁⲗⲓⲁ .
When they had spoken the word in Perga, they went down to Attalia.
14.26
ⲟⲩⲟϩ ⲉⲃⲟⲗ ⲙⲙⲁⲩ ⲁⲩⲉⲣϩⲱⲧ ⲉⲧⲁⲛϯⲟⲭⲓⲁ ⲡⲓⲙⲁ ⲉⲧⲁⲩⲧⲏⲓⲧⲟⲩ ⲛϧⲏⲧϥ ϧⲉⲛⲡⲓϩⲙⲟⲧ ⲛⲧⲉⲫⲛⲟⲩϯ ⲉⲡⲓϩⲱⲃ ⲉⲧⲁⲩϫⲟⲕϥ ⲉⲃⲟⲗ .
From there they sailed to Antioch, from where they had been committed to the grace of God for the work which they had fulfilled.
14.27
ⲉⲧⲁⲩⲓ ⲇⲉ ⲟⲩⲟϩ ⲉⲧⲁⲩⲑⲱⲟⲩϯ ⲛϯⲉⲕⲕⲗⲏⲥⲓⲁ ⲛⲁⲩⲧⲁⲙⲟ ⲙⲙⲱⲟⲩ ⲉⲑⲃⲉϩⲱⲃ ⲛⲓⲃⲉⲛ ⲉⲧⲁϥⲁⲓⲧⲟⲩ ⲛⲉⲙⲱⲟⲩ ⲛϫⲉⲫⲛⲟⲩϯ ⲟⲩⲟϩ ϫⲉⲁϥⲟⲩⲱⲛ ⲛⲟⲩⲣⲟ ⲛⲧⲉⲫⲛⲁϩϯ ⲛⲛⲓⲉⲑⲛⲟⲥ .
When they had arrived, and had gathered the assembly together, they reported all the things that God had done with them, and that he had opened a door of faith to the nations.
14.28
ⲁⲩϣⲱⲡⲓ ⲇⲉ ⲙⲙⲁⲩ ⲛⲉⲙⲛⲓⲙⲁⲑⲏⲧⲏⲥ ⲛⲟⲩⲕⲟⲩϫⲓ ⲛⲥⲏⲟⲩ ⲁⲛ .
They stayed there with the disciples for a long time.
15.1
ⲟⲩⲟϩ ⲉⲧⲁⲩⲓ ⲛϫⲉϩⲁⲛⲟⲩⲟⲛ ⲉⲃⲟⲗ ϧⲉⲛϯⲓⲟⲩⲇⲉⲁ ⲛⲁⲩϯⲥⲃⲱ ⲛⲛⲓⲥⲛⲏⲟⲩ ϫⲉⲉϣⲱⲡ ⲁⲣⲉⲧⲉⲛϣⲧⲉⲙⲥⲟⲩⲃⲉ ⲑⲏⲛⲟⲩ ⲕⲁⲧⲁⲧⲥⲩⲛⲏ ⲧⲓⲁ ⲙⲙⲱⲩⲥⲏⲥ ⲙⲙⲟⲛ ϣϫⲟⲙ ⲙⲙⲱⲧⲉⲛ ⲉⲛⲟϩⲉⲙ .
Some men came down from Judea and taught the brothers, 'Unless you are circumcised after the custom of Moses, you can't be saved.'
15.2
ⲉⲧⲁϥϣⲱⲡⲓ ⲇⲉ ⲛϫⲉⲟⲩϣⲑⲟⲣⲧⲉⲣ ⲛⲟⲩⲕⲟⲩϫⲓ ⲁⲛ ⲙⲡⲁⲩⲗⲟⲥ ⲛⲉⲙⲃⲁⲣⲛⲁⲃⲁⲥ ⲛⲉⲙϩⲁⲛⲕⲉⲭⲱⲟⲩⲛⲓ ⲉⲃⲟⲗ ⲛϧⲏⲧⲟⲩ ⲁⲩⲑⲱϣ ⲙⲡⲁⲩⲗⲟⲥ ⲛⲉⲙⲃⲁⲣⲛⲁⲃⲁⲥ ⲉⲑⲣⲟⲩϣⲉ ϣⲁⲛⲓⲁⲡⲟⲥⲧⲟⲗⲟⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲉⲧϧⲉⲛⲓⲉⲣⲟⲥⲁⲗⲏⲙ ⲉⲛⲁⲩ ⲉⲑⲃⲉⲡⲁⲓⲍⲏⲧⲏⲙⲁ .
Therefore when Paul and Barnabas had no small discord and discussion with them, they appointed Paul and Barnabas, and some others of them, to go up to Jerusalem to the apostles and elders about this question.
15.3
ⲛⲑⲱⲟⲩ ⲙⲉⲛ ⲟⲩⲛ ⲉⲧⲁⲩⲧⲫⲱⲟⲩ ⲉⲃⲟⲗ ϩⲓⲧⲉⲛϯⲉⲕⲕⲗⲏⲥⲓⲁ ⲁⲩⲥⲓⲛⲓ ⲉⲃⲟⲗ ϩⲓⲧⲉⲛϯⲫⲟⲓⲛⲓⲕⲏ ⲛⲉⲙⲧⲥⲁⲙⲁⲣⲓⲁ ⲉⲩⲥⲁϫⲓ ⲉⲑⲃⲉⲡⲧⲁⲥⲑⲟ ⲛⲛⲓⲉⲑⲛⲟⲥ ⲟⲩⲟϩ ⲛⲁⲩⲓⲣⲓ ⲛⲟⲩⲛⲓϣϯ ⲛⲣⲁϣⲓ ⲛⲉⲙⲛⲓⲥⲛⲏⲟⲩ ⲧⲏⲣⲟⲩ .
They, being sent on their way by the assembly, passed through both Phoenicia and Samaria, declaring the conversion of the Gentiles. They caused great joy to all the brothers.
15.4
ⲉⲧⲁⲩⲓ ⲇⲉ ⲉϩⲣⲏⲓ ⲉⲓⲉⲣⲟⲥⲁⲗⲏⲙ ⲁⲩϣⲟⲡⲟⲩ ⲉⲣⲱⲟⲩ ⲛϫⲉⲛⲁ ϯⲉⲕⲕⲗⲏⲥⲓⲁ ⲛⲉⲙⲛⲓⲁⲡⲟⲥⲧⲟⲗⲟⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲁⲩⲧⲁⲙⲱⲟⲩ ⲇⲉ ⲉϩⲱⲃ ⲛⲓⲃⲉⲛ ⲉⲧⲁ ⲫⲛⲟⲩϯ ⲁⲓⲧⲟⲩ ⲛⲉⲙⲱⲟⲩ .
When they had come to Jerusalem, they were received by the assembly and the apostles and the elders, and they reported all things that God had done with them.
15.5
ⲁⲩⲧⲱⲟⲩⲛ ⲇⲉ ⲛϫⲉϩⲁⲛⲟⲩⲟⲛ ⲉⲃⲟⲗ ϧⲉⲛⲧϩⲉⲣⲉⲥⲓⲥ ⲛⲧⲉⲛⲓⲫⲁⲣⲓⲥⲉⲟⲥ ⲛⲏ ⲉⲧⲁⲩⲛⲁϩϯ ⲉⲩϫⲱ ⲙⲙⲟⲥ ϫⲉⲥϣⲉ ⲛⲥⲉⲥⲟⲩⲃⲏⲧⲟⲩ ⲟⲩⲟϩ ⲉϩⲟⲛϩⲉⲛ ⲉⲁⲣⲉϩ ⲉⲫⲛⲟⲙⲟⲥ ⲙⲙⲱⲩⲥⲏⲥ .
But some of the sect of the Pharisees who believed rose up, saying, 'It is necessary to circumcise them, and to command them to keep the law of Moses.'
15.6
ⲁⲩⲑⲱⲟⲩϯ ⲇⲉ ⲛϫⲉⲛⲓⲁⲡⲟⲥⲧⲟⲗⲟⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲉⲛⲁⲩ ⲉⲑⲃⲉⲡⲁⲓⲥⲁϫⲓ .
The apostles and the elders were gathered together to see about this matter.
15.7
ⲉⲧⲁⲥϣⲱⲡⲓ ⲇⲉ ⲛϫⲉⲟⲩⲛⲓϣϯ ⲛⲍⲏⲇⲏⲥⲓⲥ ⲁϥⲟϩⲓ ⲉⲣⲁⲧϥ ⲛϫⲉⲡⲉⲧⲣⲟⲥ ⲡⲉϫⲁϥ ⲛⲱⲟⲩ ⲛⲓⲣⲱⲙⲓ ⲛⲉⲛⲥⲛⲏⲟⲩ ⲛⲑⲱⲧⲉⲛ ⲧⲉⲧⲉⲛⲥⲱⲟⲩⲛ ϫⲉⲓⲥϫⲉⲛ ⲛⲓⲉϩⲟⲟⲩ ⲛⲁⲣⲭⲉⲟⲥ ⲁⲫⲛⲟⲩϯ ⲥⲱⲧⲡ ϧⲉⲛⲑⲏⲛⲟⲩ ⲉⲃⲟⲗ ϧⲉⲛⲣⲱⲓ ⲉⲧⲣⲉ ⲛⲓⲉⲑⲛⲟⲥ ⲥⲱⲧⲉⲙ ⲉⲡⲥⲁϫⲓ ⲛⲧⲉⲡⲓⲉⲩⲁⲅⲅⲉⲗⲓⲟⲛ ⲟⲩⲟϩ ⲛⲥⲉⲛⲁϩϯ .
When there had been much discussion, Peter rose up and said to them, 'Brothers, you know that a good while ago God made a choice among you, that by my mouth the nations should hear the word of the Good News, and believe.
15.8
ⲟⲩⲟϩ ⲡⲉⲧⲥⲱⲟⲩⲛ ⲛⲛⲓϩⲏⲧ ⲫⲛⲟⲩϯ ⲁϥⲉⲣⲙⲉⲑⲣⲉ ⲛⲱⲟⲩ ⲟⲩⲟϩ ⲁϥϯ ⲛⲱⲟⲩ ⲙⲡⲓⲡⲛⲉⲩⲙⲁⲉⲑⲟⲩⲁⲃ ⲙⲫⲣⲏϯ ϩⲱⲛ ⲉⲧⲁϥⲧⲏⲓϥ ⲛⲁⲛ .
God, who knows the heart, testified about them, giving them the Holy Spirit, just like he did to us.
15.9
ⲟⲩⲟϩ ⲙⲡⲉϥⲭⲁ ϩⲗⲓ ⲛϣⲓⲃϯ ⲟⲩⲧⲱⲛ ⲛⲉⲙⲱⲟⲩ ⲉⲁϥⲧⲟⲩⲃⲟ ⲛⲛⲟⲩϩⲏⲧ ⲛϧⲣⲏⲓ ϧⲉⲛⲡⲓⲛⲁϩϯ .
He made no distinction between us and them, cleansing their hearts by faith.
15.10
ϯⲛⲟⲩ ⲟⲩⲛ ⲉⲑⲃⲉⲟⲩ ⲧⲉⲧⲉⲛⲉⲣⲡⲓⲣⲁⲍⲓⲛ ⲙⲫⲛⲟⲩϯ ⲉⲧⲁⲗⲉ ⲟⲩⲛⲁϩⲃⲉϥ ⲉϫⲉⲛⲛⲉⲛⲙⲟϯ ⲛⲛⲓⲙⲁⲑⲏⲧⲏⲥ ⲫⲁⲓ ⲉⲧⲉⲙⲡⲉ ⲛⲉⲛⲓⲟϯ ⲟⲩⲇⲉ ⲁⲛⲟⲛ ϣϫⲉⲙϫⲟⲙ ⲛⲧⲱⲟⲩⲛ ϧⲁⲣⲟϥ .
Now therefore why do you tempt God, that you should put a yoke on the neck of the disciples which neither our fathers nor we were able to bear?
15.11
ⲁⲗⲗⲁ ⲉⲃⲟⲗ ϩⲓⲧⲉⲛⲡⲓϩⲙⲟⲧ ⲛⲧⲉⲡⲉⲛϭⲟⲓⲥ ⲓⲏⲥⲟⲩⲥ ⲧⲉⲛⲛⲁϩϯ ⲉⲛⲟϩⲉⲙ ⲕⲁⲧⲁⲫⲣⲏϯ ⲛⲛⲓⲕⲉⲭⲱⲟⲩⲛⲓ .
But we believe that we are saved through the grace of the Lord Jesus, just as they are.'
15.12
ⲁⲩⲭⲁⲣⲱϥ ⲇⲉ ⲛϫⲉⲡⲓⲙⲏϣ ⲧⲏⲣϥ ⲟⲩⲟϩ ⲛⲁⲩⲥⲱⲧⲉⲙ ⲉⲃⲁⲣⲛⲁⲃⲁⲥ ⲛⲉⲙⲡⲁⲩⲗⲟⲥ ⲉⲩⲥⲁϫⲓ ⲛⲛⲓⲙⲏⲓⲛⲓ ⲧⲏⲣⲟⲩ ⲛⲉⲙⲛⲓϣⲫⲏⲣⲓ ⲉⲧⲁ ⲫⲛⲟⲩϯ ⲁⲓⲧⲟⲩ ϧⲉⲛⲛⲓⲉⲑⲛⲟⲥ ⲉⲃⲟⲗ ϩⲓⲧⲟⲧⲟⲩ .
All the multitude kept silence, and they listened to Barnabas and Paul reporting what signs and wonders God had done among the nations through them.
15.13
ⲙⲉⲛⲉⲛⲥⲁⲉⲧⲁⲩⲭⲁⲣⲱⲟⲩ ⲇⲉ ⲁϥⲉⲣⲟⲩⲱ ⲛϫⲉⲓⲁⲕⲱⲃⲟⲥ ⲉϥϫⲱ ⲙⲙⲟⲥ ⲛⲓⲣⲱⲙⲓ ⲛⲉⲛⲥⲛⲏⲟⲩ ⲥⲱⲧⲉⲙ ⲉⲣⲟⲓ .
After they were silent, James answered, 'Brothers, listen to me.
15.14
ⲥⲩⲙⲉⲱⲛ ⲁϥⲥⲁϫⲓ ⲕⲁⲧⲁⲫⲣⲏϯ ⲓⲥϫⲉⲛ ϣⲟⲣⲡ ⲉⲧⲁ ⲫⲛⲟⲩϯ ϫⲉⲙⲡϣⲓⲛⲓ ⲉϭⲓ ⲛⲟⲩⲗⲁⲟⲥ ⲉⲃⲟⲗ ϧⲉⲛⲛⲓⲉⲑⲛⲟⲥ ϧⲉⲛⲡⲉϥⲣⲁⲛ .
Simeon has reported how God first visited the nations, to take out of them a people for his name.
15.15
ⲟⲩⲟϩ ⲫⲁⲓ ⲥⲉϯⲙⲁϯ ⲛⲉⲙⲁϥ ⲛϫⲉⲛⲓⲥⲁϫⲓ ⲛⲧⲉⲛⲓⲡⲣⲟⲫⲏⲧⲏⲥ ⲕⲁⲧⲁⲫⲣⲏϯ ⲉⲧⲥϧⲏⲟⲩⲧ
This agrees with the words of the prophets. As it is written,
15.16
ϫⲉⲙⲉⲛⲉⲛⲥⲁⲛⲁⲓ ⲉⲓⲉⲧⲁⲥⲑⲟ ⲟⲩⲟϩ ⲉⲓⲉⲕⲱⲧ ⲛϯⲥⲕⲏⲛⲏ ⲛⲧⲉⲇⲁⲩⲓⲇ ⲑⲏ ⲉⲧⲁⲥϩⲉⲓ ⲟⲩⲟϩ ⲛⲏ ⲉⲧⲁⲩⲥⲱⲥ ⲛⲧⲁⲥ ⲉⲓⲉⲕⲟⲧⲟⲩ ⲟⲩⲟϩ ϯⲛⲁⲧⲁϩⲟⲥ ⲉⲣⲁⲧⲥ .
'After these things I will return. I will again build the tabernacle of David, which has fallen. I will again build its ruins. I will set it up,
15.17
ϩⲟⲡⲱⲥ ⲛⲥⲉⲕⲱϯ ⲛⲥⲁⲡϭⲟⲓⲥ ⲛϫⲉⲡⲥⲱϫⲡ ⲛⲛⲓⲣⲱⲙⲓ ⲛⲉⲙⲛⲓⲉⲑⲛⲟⲥ ⲧⲏⲣⲟⲩ ⲛⲏ ⲉⲧⲁⲩⲙⲟⲩϯ ⲉⲡⲁⲣⲁⲛ ⲉϩⲣⲏⲓ ⲉϫⲱⲟⲩ ⲡⲉϫⲉ ⲡϭⲟⲓⲥ ⲫⲏ ⲉⲧⲑⲣⲟ ⲛⲛⲁⲓ .
That the rest of men may seek after the Lord; All the Gentiles who are called by my name, Says the Lord, who does all these things.
15.18
ⲟⲩⲟⲛϩ ⲉⲃⲟⲗ ⲓⲥϫⲉⲛ ⲡⲉⲛⲉϩ .
All his works are known to God from eternity.'
15.19
ⲉⲑⲃⲉⲫⲁⲓ ϯϯϩⲁⲡ ⲁⲛⲟⲕ ⲉϣⲧⲉⲙⲟⲩⲁϩϧⲓⲥⲓ ⲛⲛⲏ ⲉⲑⲛⲁⲕⲟⲧⲟⲩ ⲉⲃⲟⲗ ϧⲉⲛⲛⲓⲉⲑⲛⲟⲥ .
'Therefore my judgment is that we don't trouble those from among the Gentiles who turn to God,
15.20
ⲁⲗⲗⲁ ⲉⲟⲩⲱⲣⲡ ⲛⲱⲟⲩ ⲉⲑⲣⲟⲩϩⲉⲛⲟⲩ ⲥⲁⲃⲟⲗ ⲛⲛⲓϣⲱⲧ ⲛⲓⲇⲱⲗⲟⲛ ⲛⲉⲙϯⲡⲟⲣⲛⲉⲓⲁ ⲛⲉⲙⲛⲓⲱϫϩ ⲛⲉⲙⲛⲓⲥⲛⲟϥ ⲉⲧⲙⲱⲟⲩⲧ .
but that we write to them that they abstain from the pollution of idols, from sexual immorality, from what is strangled, and from blood.
15.21
ⲙⲱⲩⲥⲏⲥ ⲅⲁⲣ ⲓⲥϫⲉⲛ ⲛⲓⲅⲉⲛⲉⲁ ⲛⲁⲣⲭⲉⲟⲥ ⲟⲩⲟⲛⲧⲁϥ ⲛⲛⲏ ⲉⲧϩⲓⲱⲓϣ ⲙⲙⲟϥ ⲕⲁⲧⲁⲡⲟⲗⲓⲥ ϧⲉⲛⲛⲓⲥⲩⲛⲁⲅⲱⲅⲏ ⲉⲩⲱϣ ⲙⲙⲟϥ ⲕⲁⲧⲁⲥⲁⲃⲃⲁⲧⲟⲛ ⲛⲓⲃⲉⲛ .
For Moses from generations of old has in every city those who preach him, being read in the synagogues every Sabbath.'
15.22
ⲧⲟⲧⲉ ⲁⲥⲉⲣⲇⲟⲕⲓⲛ ⲛⲛⲓⲁⲡⲟⲥⲧⲟⲗⲟⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲛⲉⲙϯⲉⲕⲕⲗⲏⲥⲓⲁ ⲧⲏⲣⲥ ⲉⲥⲱⲧⲡ ⲛϩⲁⲛⲣⲱⲙⲓ ⲉⲃⲟⲗ ⲛϧⲏⲧⲟⲩ ⲉⲟⲩⲟⲣⲡⲟⲩ ⲉⲧⲁⲛⲧⲓⲟⲭⲓⲁ ⲛⲉⲙⲡⲁⲩⲗⲟⲥ ⲛⲉⲙⲃⲁⲣⲛⲁⲃⲁⲥ ⲓⲟⲩⲇⲁⲥ ⲡⲉⲧⲟⲩⲙⲟⲩϯ ⲉⲣⲟϥ ϫⲉⲃⲁⲣⲥⲁⲃⲃⲁⲥ ⲛⲉⲙⲥⲓⲗⲁⲥ ϩⲁⲛⲣⲱⲙⲓ ⲛϩⲩⲅⲟⲩⲙⲉⲛⲟⲥ ϧⲉⲛⲛⲓⲥⲛⲏⲟⲩ .
Then it seemed good to the apostles and the elders, with the whole assembly, to choose men out of their company, and send them to Antioch with Paul and Barnabas: Judas called Barsabbas, and Silas, chief men among the brothers.
15.23
ⲉⲁⲩⲥϧⲁⲓ ⲉⲃⲟⲗ ϩⲓⲧⲟⲧⲟⲩ ⲛⲓⲁⲡⲟⲥⲧⲟⲗⲟⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲛⲛⲓⲥⲛⲏⲟⲩ ⲛⲏ ⲉⲧⲭⲏ ϧⲉⲛⲧⲁⲛⲧⲓⲟⲭⲓⲁ ⲛⲉⲙϯⲕⲩⲗⲓⲕⲓⲁ ⲛⲉⲙϯⲥⲩⲣⲓⲁ ⲛⲓⲥⲛⲏⲟⲩ ⲛⲓⲉⲃⲟⲗ ϧⲉⲛⲛⲓⲉⲑⲛⲟⲥ ⲭⲉⲣⲉ .
They wrote these things by their hand: 'The apostles, the elders, and the brothers, to the brothers who are of the Gentiles in Antioch, Syria, and Cilicia: greetings.
15.24
ⲉⲡⲓⲇⲏ ⲁⲛⲥⲱⲧⲉⲙ ϫⲉϩⲁⲛⲟⲩⲟⲛ ⲉⲃⲟⲗ ⲛϧⲏⲧⲟⲩ ⲉⲧⲁⲩⲓ ⲉⲃⲟⲗ ⲁⲩϣⲑⲉⲣⲧⲉⲣ ⲑⲏⲛⲟⲩ ⲉⲩⲫⲱⲛϩ ⲛⲛⲉⲧⲉⲛⲯⲩⲭⲏ ϧⲉⲛϩⲁⲛⲥⲁϫⲓ ⲛⲁⲓ ⲉⲧⲉⲙⲡⲉⲛϫⲟⲧⲟⲩ .
Because we have heard that some who went out from us have troubled you with words, unsettling your souls, saying, 'You must be circumcised and keep the law,' to whom we gave no commandment;
15.25
ⲁⲥⲉⲣⲇⲟⲕⲓⲛ ⲟⲩⲛ ⲛⲁⲛ ⲉⲁⲛⲓ ⲉⲩⲙⲁ ⲉⲩⲥⲟⲡ ⲉⲥⲱⲧⲡ ⲛϩⲁⲛⲣⲱⲙⲓ ⲉⲟⲩⲟⲣⲡⲟⲩ ϩⲁⲣⲱⲧⲉⲛ ⲛⲉⲙⲛⲉⲛⲁⲅⲁⲡⲏⲧⲟⲥ ⲃⲁⲣⲛⲁⲃⲁⲥ ⲛⲉⲙⲡⲁⲩⲗⲟⲥ .
it seemed good to us, having come to one accord, to choose out men and send them to you with our beloved Barnabas and Paul,
15.26
ϩⲁⲛⲣⲱⲙⲓ ⲉⲁⲩϯ ⲛⲧⲟⲩⲯⲩⲭⲏ ⲉϩⲣⲏⲓ ⲉϫⲉⲛⲫⲣⲁⲛ ⲙⲡⲉⲛϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ .
men who have risked their lives for the name of our Lord Jesus Christ.
15.27
ⲁⲛⲟⲩⲱⲣⲡ ⲇⲉ ⲛⲓⲟⲩⲇⲁⲥ ⲛⲉⲙⲥⲓⲗⲁⲥ ⲛⲑⲱⲟⲩ ϩⲱⲟⲩ ⲉⲩⲧⲁⲙⲱⲧⲉⲛ ⲉⲛⲁⲓ ⲣⲱ ⲉⲃⲟⲗ ϩⲓⲧⲉⲛⲡⲥⲁϫⲓ .
We have sent therefore Judas and Silas, who themselves will also tell you the same things by word of mouth.
15.28
ⲁⲥⲣⲁⲛⲁϥ ⲅⲁⲣ ⲙⲡⲓⲡⲛⲉⲩⲙⲁⲉⲑⲟⲩⲁⲃ ⲛⲉⲙⲁⲛⲟⲛ ϩⲱⲛ ⲉϣⲧⲉⲙⲟⲩⲁϩⲃⲁⲣⲟⲥ ⲉϫⲉⲛⲑⲏⲛⲟⲩ ⲛϩⲟⲩⲟ ⲡⲗⲏⲛ ⲛⲁⲓ ϧⲉⲛⲟⲩⲁⲛⲁⲅⲕⲏ .
For it seemed good to the Holy Spirit, and to us, to lay no greater burden on you than these necessary things:
15.29
ⲁⲣⲉϩ ⲉⲣⲱⲧⲉⲛ ⲥⲁⲃⲟⲗ ⲙⲙⲱⲟⲩ ⲛⲓϣⲱⲧ ⲛⲓⲇⲱⲗⲟⲛ ⲛⲉⲙⲛⲓⲥⲛⲟϥ ⲉⲧⲙⲱⲟⲩⲧ ⲛⲉⲙⲛⲓⲱϫϩ ⲛⲉⲙⲛⲓⲡⲟⲣⲛⲉⲓⲁ ⲛⲁⲓ ⲉⲣⲉⲧⲉⲛⲁⲣⲉϩ ⲉⲣⲱⲧⲉⲛ ⲥⲁⲃⲟⲗ ⲙⲙⲱⲟⲩ ⲛⲧⲉⲧⲉⲛⲉⲣϩⲱⲃ ⲛⲕⲁⲗⲱⲥ ⲟⲩϫⲁⲓ .
that you abstain from things sacrificed to idols, from blood, from things strangled, and from sexual immorality, from which if you keep yourselves, it will be well with you. Farewell.'
15.30
ⲛⲑⲱⲟⲩ ⲙⲉⲛ ⲟⲩⲛ ⲉⲧⲁⲩⲭⲁⲩ ⲉⲃⲟⲗ ⲁⲩⲓ ⲉⲧⲁⲛⲧⲓⲟⲭⲓⲁ ⲟⲩⲟϩ ⲉⲧⲁⲩⲑⲱⲟⲩϯ ⲙⲡⲓⲙⲏ ϣⲁⲩϯ ⲛϯⲉⲡⲓⲥⲧⲟⲗⲏ
So, when they were sent off, they came to Antioch. Having gathered the multitude together, they delivered the letter.
15.31
ⲉⲧⲁⲩⲱϣ ⲇⲉ ⲁⲩⲣⲁϣⲓ ⲉϩⲣⲏⲓ ⲉϫⲉⲛⲡⲓⲑⲱⲧ ⲛϩⲏⲧ .
When they had read it, they rejoiced over the encouragement.
15.32
ⲓⲟⲩⲇⲁⲥ ⲛⲉⲙⲥⲓⲗⲁⲥ ϩⲁⲛⲡⲣⲟⲫⲏⲧⲏⲥ ϩⲱⲟⲩ ⲛⲉⲉⲃⲟⲗ ϩⲓⲧⲉⲛⲟⲩⲥⲁϫⲓ ⲉϥⲟϣ ⲁⲩⲑⲉⲧ ⲡϩⲏⲧ ⲛⲛⲓⲥⲛⲏⲟⲩ ⲟⲩⲟϩ ⲁⲩⲧⲁϫⲣⲱⲟⲩ .
Judas and Silas, also being prophets themselves, encouraged the brothers with many words, and strengthened them.
15.33
ⲉⲧⲁⲩⲉⲣ ⲟⲩⲭⲣⲟⲛⲟⲥ ⲇⲉ ϧⲁⲧⲟⲧⲟⲩ ⲁⲩⲭⲁⲩ ⲉⲃⲟⲗ ϧⲉⲛⲟⲩϩⲓⲣⲏⲛⲏ ⲉⲑⲣⲟⲩϣⲉ ϣⲁⲛⲏ ⲉⲧⲁⲩⲟⲩⲟⲣⲡⲟⲩ .
After they had spent some time there, they were sent back with greetings from the brothers to the apostles.
15.34
ⲥⲓⲗⲁⲥ ⲇⲉ ⲁϥⲟⲩⲱϣ ⲉϣⲱⲡⲓ ϧⲉⲛⲡⲓⲙⲁ ⲉⲧⲉⲙⲙⲁⲩ .
15.35
ⲡⲁⲩⲗⲟⲥ ⲇⲉ ⲛⲉⲙⲃⲁⲣⲛⲁⲃⲁⲥ ⲁⲩϣⲱⲡⲓ ϧⲉⲛⲧⲁⲛⲧⲓⲟⲭⲓⲁ ⲉⲩϯⲥⲃⲱ ⲟⲩⲟϩ ⲉⲩϩⲓϣⲉⲛⲛⲟⲩϥⲓ ⲛⲉⲙⲕⲉⲙⲏϣ ⲙⲡⲓⲥⲁϫⲓ ⲛⲧⲉⲫⲛⲟⲩϯ .
But Paul and Barnabas stayed in Antioch, teaching and preaching the word of the Lord, with many others also.
15.36
ⲙⲉⲛⲉⲛⲥⲁϩⲁⲛⲉϩⲟⲟⲩ ⲇⲉ ⲡⲉϫⲉ ⲡⲁⲩⲗⲟⲥ ⲙⲃⲁⲣⲛⲁⲃⲁⲥ ϫⲉⲙⲁⲣⲉⲛⲕⲟⲧⲧⲉⲛ ⲛⲧⲉⲛϫⲉⲙⲡϣⲓⲛⲓ ⲛⲛⲉⲛⲥⲛⲏⲟⲩ ⲕⲁⲧⲁⲃⲁⲕⲓ ⲛⲓⲃⲉⲛ ⲛⲏ ⲉⲧⲁⲛϩⲓⲱⲓϣ ⲙⲡⲓⲥⲁϫⲓ ⲛⲧⲉⲡϭⲟⲓⲥ ⲛϧⲏⲧⲟⲩ ϫⲉⲟⲩ ⲡⲉⲧϣⲟⲡ ⲙⲙⲱⲟⲩ .
After some days Paul said to Barnabas, 'Let's return now and visit our brothers in every city in which we proclaimed the word of the Lord, to see how they are doing.'
15.37
ⲃⲁⲣⲛⲁⲃⲁⲥ ⲇⲉ ⲛⲁϥⲟⲩⲱϣ ⲉⲱⲗⲓ ⲙⲡⲕⲉⲓⲱⲁⲛⲛⲏⲥ ⲛⲉⲙⲱⲟⲩ ⲡⲉⲧⲟⲩⲙⲟⲩϯ ⲉⲣⲟϥ ϫⲉⲙⲁⲣⲕⲟⲥ .
Barnabas planned to take John, who was called Mark, with them also.
15.38
ⲡⲁⲩⲗⲟⲥ ⲇⲉ ⲛⲁϥⲉⲣⲁⲝⲓⲟⲓⲛ ϫⲉⲭⲁⲥ ⲫⲏ ⲉⲧⲁϥⲫⲱⲣϫ ⲥⲁⲃⲟⲗ ⲙⲙⲱⲟⲩ ⲓⲥϫⲉⲛ ⲧⲡⲁⲙⲫⲩⲗⲓⲁ ⲟⲩⲟϩ ⲉⲧⲉⲙⲡⲉϥⲓ ⲛⲉⲙⲱⲟⲩ ⲉⲡⲓϩⲱⲃ ⲉϣⲧⲉⲙⲟⲗϥ ⲛⲉⲙⲱⲟⲩ .
But Paul didn't think that it was a good idea to take with them someone who had withdrawn from them in Pamphylia, and didn't go with them to do the work.
15.39
ⲁϥϣⲱⲡⲓ ⲇⲉ ⲛϫⲉⲟⲩϫⲱⲛⲧ ϩⲱⲥⲧⲉ ⲛⲥⲉⲫⲱⲣϫ ⲉⲃⲟⲗ ⲛⲛⲟⲩⲉⲣⲏⲟⲩ ⲃⲁⲣⲛⲁⲃⲁⲥ ⲇⲉ ⲁϥϭⲓ ⲙⲙⲁⲣⲕⲟⲥ ⲁϥⲉⲣϩⲱⲧ ⲉⲕⲩⲡⲣⲟⲥ .
Then the contention grew so sharp that they separated from each other. Barnabas took Mark with him, and sailed away to Cyprus,
15.40
ⲡⲁⲩⲗⲟⲥ ⲇⲉ ⲁϥⲥⲱⲧⲡ ⲛⲥⲓⲗⲁⲥ ⲁϥⲓ ⲉⲃⲟⲗ ⲉⲁⲩⲧⲏⲓϥ ⲛⲧⲉⲛⲡⲓϩⲙⲟⲧ ⲛⲧⲉⲫⲛⲟⲩϯ ⲉⲃⲟⲗ ϩⲓⲧⲟⲧⲟⲩ ⲛⲛⲓⲥⲛⲏⲟⲩ .
but Paul chose Silas, and went out, being commended by the brothers to the grace of God.
15.41
ⲛⲁϥⲥⲓⲛⲓ ⲇⲉ ⲡⲉ ⲉⲃⲟⲗ ϧⲉⲛⲧⲥⲩⲣⲓⲁ ⲛⲉⲙⲧⲕⲩⲗⲓⲕⲓⲁ ⲉϥⲧⲁϫⲣⲟ ⲛⲛⲓⲉⲕⲕⲗⲏⲥⲓⲁ .
He went through Syria and Cilicia, strengthening the assemblies.
16.1
ⲁϥⲓ ⲇⲉ ⲉϩⲣⲏⲓ ⲉⲧⲕⲉⲧⲉⲣⲃⲏ ⲛⲉⲙⲗⲩⲥⲧⲣⲁ ⲟⲩⲟϩ ⲓⲥ ⲟⲩⲙⲁⲑⲏⲧⲏⲥ ⲉⲛⲁϥⲭⲏ ⲙⲙⲁⲩ ⲉⲡⲉϥⲣⲁⲛ ⲡⲉ ⲧⲓⲙⲟⲑⲉⲟⲥ ⲡϣⲏⲣⲓ ⲛⲟⲩⲥϩⲓⲙⲓ ⲛⲓⲟⲩⲇⲁⲓ ⲙⲡⲓⲥⲧⲏ ⲡⲉϥⲉⲓⲱⲧ ⲇⲉ ⲛⲉⲟⲩⲉⲓⲛⲓⲛ ⲡⲉ .
He came to Derbe and Lystra: and behold, a certain disciple was there, named Timothy, the son of a Jewess who believed; but his father was a Greek.
16.2
ⲫⲁⲓ ⲛⲁⲩⲉⲣⲙⲉⲑⲣⲉ ⲉⲑⲃⲏⲧϥ ⲛϫⲉⲛⲓⲥⲛⲏⲟⲩ ⲉⲧϧⲉⲛⲗⲩⲥⲧⲣⲁ ⲛⲉⲙⲓⲕⲟⲛⲓⲟⲛ .
The brothers who were at Lystra and Iconium gave a good testimony about him.
16.3
ⲫⲁⲓ ⲁϥⲟⲩⲱϣ ⲛϫⲉⲡⲁⲩⲗⲟⲥ ⲉⲑⲣⲉϥⲓ ⲉⲃⲟⲗ ⲛⲉⲙⲁϥ ⲟⲩⲟϩ ⲉⲧⲁϥⲟⲗϥ ⲁϥⲥⲟⲩⲃⲏⲧϥ ⲉⲑⲃⲉⲛⲓⲓⲟⲩⲇⲁⲓ ⲉⲧϣⲟⲡ ϧⲉⲛⲡⲓⲙⲁ ⲉⲧⲉⲙⲙⲁⲩ ⲛⲁⲩⲥⲱⲟⲩⲛ ⲅⲁⲣ ⲧⲏⲣⲟⲩ ϫⲉⲡⲉϥⲓⲱⲧ ⲟⲩⲟⲩⲉⲓⲛⲓⲛ ⲡⲉ .
Paul wanted to have him go out with him, and he took and circumcised him because of the Jews who were in those parts; for they all knew that his father was a Greek.
16.4
ⲉⲩⲕⲱϯ ⲇⲉ ϧⲉⲛⲛⲓⲡⲟⲗⲓⲥ ⲛⲁⲩϯ ⲙⲙⲟⲥ ⲉⲧⲟⲧⲟⲩ ⲉⲁⲣⲉϩ ⲉⲛⲓϩⲱⲛ ⲉⲧⲁⲩⲥⲉⲙⲛⲏ ⲧⲟⲩ ⲉⲃⲟⲗ ϩⲓⲧⲟⲧⲟⲩ ⲛⲛⲓⲁⲡⲟⲥⲧⲟⲗⲟⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲉⲧϧⲉⲛⲓⲉⲣⲟⲥⲁⲗⲏⲙ .
As they went on their way through the cities, they delivered the decrees to them to keep which had been ordained by the apostles and elders who were at Jerusalem.
16.5
ⲛⲓⲉⲕⲕⲗⲏⲥⲓⲁ ⲙⲉⲛ ⲟⲩⲛ ⲛⲁⲩⲛⲏⲟⲩ ⲛⲧⲁϫⲣⲟ ϧⲉⲛⲡⲓⲛⲁϩϯ ⲟⲩⲟϩ ⲛⲁⲩⲛⲏⲟⲩ ⲛⲁϣⲁⲓ ϧⲉⲛⲧⲟⲩⲏⲡⲓ ⲙⲙⲏⲛⲓ .
So the assemblies were strengthened in the faith, and increased in number daily.
16.6
ⲁⲩⲥⲓⲛⲓ ⲇⲉ ⲉⲃⲟⲗ ϩⲓⲧⲉⲛϯⲫⲣⲓⲕⲓⲁ ⲛⲉⲙϯⲭⲱⲣⲁ ⲛⲧⲉϯⲅⲁⲗⲁⲧⲓⲁ ⲉⲁϥⲧⲁϩⲛⲟ ⲙⲙⲱⲟⲩ ⲛϫⲉⲡⲓⲡⲛⲉⲩⲙⲁⲉⲑⲟⲩⲁⲃ ⲉϣⲧⲉⲙⲥⲁϫⲓ ⲙⲡⲓⲥⲁϫⲓ ⲛⲧⲉⲫⲛⲟⲩϯ ϧⲉⲛϯⲁⲥⲓⲁ .
When they had gone through the region of Phrygia and Galatia, they were forbidden by the Holy Spirit to speak the word in Asia.
16.7
ⲉⲧⲁⲩⲓ ⲇⲉ ⲉϩⲣⲏⲓ ⲉⲛⲓⲙⲁ ⲛⲧⲉϯⲙⲩⲥⲓⲁ ⲛⲁⲩϭⲱⲛⲧ ⲙⲙⲱⲟⲩ ⲉϣⲉ ⲉϯⲃⲏⲑⲉⲛⲓⲁ ⲟⲩⲟϩ ⲛⲁϥⲭⲱ ⲙⲙⲱⲟⲩ ⲁⲛ ⲡⲉ ⲛϫⲉⲡⲓⲡⲛⲉⲩⲙⲁⲛⲧⲉⲓⲏⲥⲟⲩⲥ .
When they had come opposite Mysia, they tried to go into Bithynia, but the Spirit didn't allow them.
16.8
ⲉⲧⲁⲩⲥⲓⲛⲓ ⲇⲉ ⲉⲃⲟⲗ ϧⲉⲛϯⲙⲩⲥⲓⲁ ⲁⲩⲓ ⲉϩⲣⲏⲓ ⲉⲧⲣⲱⲁⲥ .
Passing by Mysia, they came down to Troas.
16.9
ⲟⲩⲟϩ ⲁϥⲟⲩⲟⲛϩ ⲉⲡⲁⲩⲗⲟⲥ ⲛϫⲉⲟⲩϩⲟⲣⲁⲙⲁ ⲙⲡⲓⲉϫⲱⲣϩ ⲟⲩⲣⲱⲙⲓ ⲙⲙⲁⲕⲉⲇⲱⲛ ⲉϥⲟϩⲓ ⲉⲣⲁⲧϥ ⲉϥⲧⲱⲃϩ ⲙⲙⲟϥ ⲉϥϫⲱ ⲙⲙⲟⲥ ϫⲉⲁⲙⲟⲩ ⲉⲧⲙⲁⲕⲉⲇⲟⲛⲓⲁ ⲁⲣⲓⲃⲟⲏⲑⲓⲛ ⲉⲣⲟⲛ .
A vision appeared to Paul in the night. There was a man of Macedonia standing, begging him, and saying, 'Come over into Macedonia and help us.'
16.10
ϩⲱⲥ ⲇⲉ ⲉⲧⲁⲛⲛⲁⲩ ⲉⲡⲓϩⲟⲣⲁⲙⲁ ⲥⲁⲧⲟⲧⲉⲛ ⲁⲛⲕⲱϯ ⲛⲥⲁⲓⲉⲑⲙⲁⲕⲉⲇⲟⲛⲓⲁ ⲉⲛⲥⲟϭⲛⲓ ϫⲉⲉⲧⲁ ⲫⲛⲟⲩϯ ⲑⲁϩⲙⲉⲛ ⲉϩⲓϣⲉⲛⲛⲟⲩϥⲓ ⲛⲱⲟⲩ .
When he had seen the vision, immediately we sought to go out to Macedonia, concluding that the Lord had called us to preach the Good News to them.
16.11
ⲉⲧⲁⲛⲓ ⲇⲉ ⲉⲃⲟⲗ ϧⲉⲛⲧⲣⲱⲁⲥ ⲁⲛϣⲉ ⲛⲭⲱⲗⲉⲙ ⲉⲥⲁⲙⲟⲑⲣⲁⲕⲏ ⲡⲉϥⲣⲁⲥϯ ⲇⲉ ⲁⲛⲓ ⲉϩⲣⲏⲓ ⲉⲛⲉⲁⲡⲟⲗⲓⲥ .
Setting sail therefore from Troas, we made a straight course to Samothrace, and the day following to Neapolis;
16.12
ⲟⲩⲟϩ ⲉⲃⲟⲗ ⲙⲙⲁⲩ ⲁⲛⲓ ⲉⲫⲓⲗⲓⲡⲡⲟⲓⲥ ⲉⲧⲉⲛⲑⲟⲥ ⲧⲉ ϯϩⲟⲩⲓϯ ⲛⲧⲉϯⲧⲟⲓ ⲛⲧⲉⲧⲙⲁⲕⲉⲇⲟⲛⲓⲁ ⲟⲩⲡⲟⲗⲓⲥ ⲛⲕⲟⲗⲱⲛⲓⲁ ⲛⲁⲛϣⲟⲡ ⲇⲉ ⲡⲉ ϧⲉⲛϯⲡⲟⲗⲓⲥ ⲉⲧⲉⲙⲙⲁⲩ ⲛϩⲁⲛⲉϩⲟⲟⲩ .
and from there to Philippi, which is a city of Macedonia, the foremost of the district, a Roman colony. We were staying some days in this city.
16.13
ⲛϩⲣⲏⲓ ⲇⲉ ϧⲉⲛⲡⲓⲉϩⲟⲟⲩ ⲛⲧⲉⲛⲓⲥⲁⲃⲃⲁⲧⲟⲛ ⲁⲛⲓ ⲥⲁⲃⲟⲗ ⲛϯⲡⲟⲗⲓⲥ ϧⲁⲧⲉⲛⲫⲓⲁⲣⲟ ⲡⲓⲙⲁ ⲉⲛⲁⲛⲙⲉⲩⲓ ϫⲉⲟⲩⲟⲛ ⲟⲩⲡⲣⲟⲥⲉⲩⲭⲏ ⲛⲁϣⲱⲡⲓ ⲙⲙⲁⲩ ⲟⲩⲟϩ ⲉⲧⲁⲛϩⲉⲙⲥⲓ ⲛⲁⲛⲥⲁϫⲓ ⲛⲉⲙⲛⲓϩⲓⲟⲙⲓ ⲉⲧⲁⲩⲓ ⲉⲃⲟⲗ .
On the Sabbath day we went forth outside of the city by a riverside, where we supposed there was a place of prayer, and we sat down, and spoke to the women who had come together.
16.14
ⲟⲩⲟϩ ⲟⲩⲥϩⲓⲙⲓ ⲉⲡⲉⲥⲣⲁⲛ ⲡⲉ ⲗⲩⲇⲓⲁ ⲉⲟⲩⲥⲁⲛϭⲏϫⲓ ⲧⲉ ⲛⲧⲉⲟⲩⲡⲟⲗⲓⲥ ϫⲉⲑⲩⲁⲧⲏⲣⲱⲛ ⲉⲥⲉⲣⲥⲉⲃⲉⲥⲑⲉ ⲙⲫⲛⲟⲩϯ ⲛⲁⲥⲥⲱⲧⲉⲙ ⲑⲁⲓ ⲁ ⲫⲛⲟⲩϯ ⲟⲩⲱⲛ ⲙⲡⲉⲥϩⲏⲧ ⲉϯϩⲑⲏⲥ ⲉⲛⲏ ⲉⲛⲁⲣⲉⲡⲁⲩⲗⲟⲥ ϫⲱ ⲙⲙⲱⲟⲩ .
A certain woman named Lydia, a seller of purple, of the city of Thyatira, one who worshiped God, heard us; whose heart the Lord opened to listen to the things which were spoken by Paul.
16.15
ⲉⲧⲁⲥϭⲓⲱⲙⲥ ⲇⲉ ⲛⲉⲙⲡⲉⲥⲏⲓ ⲁⲥϯϩⲟ ⲉⲣⲟⲛ ⲉⲥϫⲱ ⲙⲙⲟⲥ ϫⲉⲓⲥϫⲉ ⲁⲧⲉⲧⲉⲛⲟⲡⲧ ⲉⲟⲩⲡⲓⲥⲧⲏ ⲙⲡϭⲟⲓⲥ ⲁⲙⲱⲓⲛⲓ ⲉϧⲟⲩⲛ ⲉⲡⲁⲏⲓ ϣⲱⲡⲓ ⲟⲩⲟϩ ⲁⲥϭⲓⲧⲧⲉⲛ ⲛϫⲟⲛⲥ .
When she and her household were baptized, she begged us, saying, 'If you have judged me to be faithful to the Lord, come into my house, and stay.' So she persuaded us.
16.16
ⲁⲥϣⲱⲡⲓ ⲇⲉ ⲉⲛⲛⲁ ⲉϯⲡⲣⲟⲥⲉⲩⲭⲏ ⲁⲥⲓ ⲉⲃⲟⲗ ⲉϩⲣⲁⲛ ⲛϫⲉⲟⲩⲁⲗⲟⲩ ⲙⲃⲱⲕⲓ ⲉⲟⲩⲟⲛ ⲟⲩⲡⲛⲉⲩⲙⲁⲛⲣⲉϥϣⲓⲛⲓ ⲛⲉⲙⲁⲥ ⲑⲁⲓ ⲉⲛⲁⲥϯ ⲛⲟⲩⲙⲏϣ ⲛⲉⲣⲅⲁⲥⲓⲁ ⲛⲛⲉⲥϭⲓⲥⲉⲩ ⲉⲥⲟⲓ ⲛⲣⲉϥϣⲓⲛⲓ .
It happened, as we were going to prayer, that a certain girl having a spirit of divination met us, who brought her masters much gain by fortune telling.
16.17
ⲑⲁⲓ ⲉⲧⲁⲥⲙⲟϣⲓ ⲛⲥⲁⲡⲁⲩⲗⲟⲥ ⲛⲉⲙⲁⲛ ⲛⲁⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ ϫⲉⲛⲁⲓⲣⲱⲙⲓ ϩⲁⲛⲉⲃⲓⲁⲓⲕ ⲛⲧⲉⲫⲛⲟⲩϯ ⲉⲧϭⲟⲥⲓ ⲛⲉⲛⲁⲓ ⲉⲧϩⲓⲱⲓϣ ⲛⲱⲧⲉⲛ ⲛⲟⲩⲙⲱⲓⲧ ⲛⲟⲩϫⲁⲓ .
Following Paul and us, she cried out, 'These men are servants of the Most High God, who proclaim to us a way of salvation!'
16.18
ⲫⲁⲓ ⲇⲉ ⲛⲁⲥⲣⲁ ⲙⲙⲟϥ ⲛⲟⲩⲙⲏϣ ⲛⲉϩⲟⲟⲩ ⲉⲧⲁϥⲉⲣⲙⲕⲁϩ ⲛϩⲏⲧ ⲇⲉ ⲛϫⲉⲡⲁⲩⲗⲟⲥ ⲟⲩⲟϩ ⲉⲧⲁϥⲕⲟⲧϥ ⲉⲡⲓⲡⲛⲉⲩⲙⲁⲡⲉϫⲁϥ ϫⲉϯϩⲟⲛϩⲉⲛ ⲛⲁⲕ ϧⲉⲛⲫⲣⲁⲛ ⲛⲓⲏⲥⲟⲩⲥ ⲡⲭⲣⲓⲥⲧⲟⲥ ⲉⲓ ⲉⲃⲟⲗ ⲛϧⲏⲧⲥ ⲟⲩⲟϩ ⲁϥⲓ ⲉⲃⲟⲗ ⲛϯⲟⲩⲛⲟⲩ ⲉⲧⲉⲙⲙⲁⲩ .
She was doing this for many days. But Paul, becoming greatly annoyed, turned and said to the spirit, 'I command you in the name of Jesus Christ to come out of her!' It came out that very hour.
16.19
ⲉⲧⲁⲩⲛⲁⲩ ⲇⲉ ⲛϫⲉⲛⲉⲥϭⲓⲥⲉⲩ ϫⲉⲁⲥⲓ ⲉⲃⲟⲗ ⲛϧⲏⲧⲥ ⲛϫⲉⲧϩⲉⲗⲡⲓⲥ ⲛⲧⲉⲡⲟⲩϩⲱⲃ ⲁⲩⲁⲙⲟⲛⲓ ⲙⲡⲁⲩⲗⲟⲥ ⲛⲉⲙⲥⲓⲗⲁⲥ ⲁⲩⲱϣϯ ⲙⲙⲱⲟⲩ ⲉⲃⲟⲗ ⲉϯⲁⲅⲟⲣⲁ ϣⲁⲛⲓⲁⲣⲭⲱⲛ
But when her masters saw that the hope of their gain was gone, they seized Paul and Silas, and dragged them into the marketplace before the rulers.
16.20
ⲟⲩⲟϩ ⲉⲧⲁⲩⲉⲛⲟⲩ ϩⲁⲛⲓⲥⲁⲧⲏⲅⲟⲩⲥ ⲡⲉϫⲱⲟⲩ ϫⲉⲛⲁⲓⲣⲱⲙⲓ ⲥⲉϣⲑⲟⲣⲧⲉⲣ ⲛⲧⲉⲛⲡⲟⲗⲓⲥ ⲉϩⲁⲛⲓⲟⲩⲇⲁⲓ ⲛⲉ .
When they had brought them to the magistrates, they said, 'These men, being Jews, are agitating our city,
16.21
ⲟⲩⲟϩ ⲥⲉϩⲓⲱⲓϣ ⲛⲁⲛ ⲛϩⲁⲛⲕⲉⲕⲁϩⲥ ⲛⲁⲓ ⲉⲧⲉⲥϣⲉ ⲛⲁⲛ ⲁⲛ ⲉϣⲟⲡⲟⲩ ⲟⲩⲇⲉ ⲉⲁⲓⲧⲟⲩ ⲉⲁⲛⲟⲛ ϩⲁⲛⲣⲱⲙⲉⲟⲥ .
and set forth customs which it is not lawful for us to accept or to observe, being Romans.'
16.22
ⲟⲩⲟϩ ⲁϥⲧⲱⲛϥ ⲉϩⲣⲏⲓ ⲉϫⲱⲟⲩ ⲛϫⲉⲡⲓⲙⲏϣ ⲟⲩⲟϩ ⲛⲓⲥⲁⲧⲏⲅⲟⲩⲥ ⲁⲩⲫⲱϧ ⲛⲛⲟⲩϩⲃⲱⲥ ⲁⲩⲉⲣⲕⲉⲗⲉⲩⲓⲛ ⲛⲥⲉϩⲓⲟⲩⲓ ⲉⲣⲱⲟⲩ ⲙⲡϣⲃⲱⲧ .
The multitude rose up together against them, and the magistrates tore their clothes off of them, and commanded them to be beaten with rods.
16.23
ⲉⲧⲁⲩϯ ⲛⲟⲩⲙⲏϣ ⲛϣⲁϣ ⲛⲱⲟⲩ ⲁⲩϩⲓⲧⲟⲩ ⲉⲡⲓϣⲧⲉⲕⲟ ⲉⲁⲩϩⲟⲛϩⲉⲛ ⲉⲧⲟⲧϥ ⲙⲡⲓⲣⲉϥⲁⲣⲉϩ ⲛⲧⲉⲡⲓⲙⲁ ⲛⲥⲱⲛϩ ⲉⲁⲣⲉϩ ⲉⲣⲱⲟⲩ ϧⲉⲛⲟⲩⲧⲁϫⲣⲟ .
When they had laid many stripes on them, they threw them into prison, charging the jailer to keep them safely,
16.24
ⲫⲁⲓ ⲉⲧⲁϥϭⲓ ⲛⲟⲩϩⲟⲛϩⲉⲛ ⲙⲡⲁⲓⲣⲏϯ ⲁϥϩⲓⲧⲟⲩ ⲉϧⲟⲩⲛ ⲉⲡⲓϣⲧⲉⲕⲟ ⲉⲧⲥⲁϧⲟⲩⲛ ⲟⲩⲟϩ ⲁϥⲧⲁϫⲣⲟ ⲛⲛⲟⲩϭⲁⲗⲁⲩϫ ⲉⲡⲓϣⲉ .
who, having received such a command, threw them into the inner prison, and secured their feet in the stocks.
16.25
ⲛϩⲣⲏⲓ ⲇⲉ ϧⲉⲛⲧⲫⲁϣⲓ ⲙⲡⲓⲉϫⲱⲣϩ ⲡⲁⲩⲗⲟⲥ ⲛⲉⲙⲥⲓⲗⲁⲥ ⲉⲩⲉⲣⲡⲣⲟⲥⲉⲩⲭⲉⲥⲑⲉ ⲛⲁⲩⲥⲙⲟⲩ ⲉⲫⲛⲟⲩϯ ⲛⲁⲩⲥⲱⲧⲉⲙ ⲉⲣⲱⲟⲩ ⲛϫⲉⲛⲏ ⲉⲧⲥⲟⲛϩ .
But about midnight Paul and Silas were praying and singing hymns to God, and the prisoners were listening to them.
16.26
ⲛⲟⲩϩⲟϯ ϧⲉⲛⲟⲩϩⲟϯ ⲁϥϣⲱⲡⲓ ⲛϫⲉⲟⲩⲛⲓϣϯ ⲙⲙⲟⲛⲙⲉⲛ ϩⲱⲥⲇⲉ ⲛⲥⲉⲕⲓⲙ ⲛϫⲉⲛⲓⲥⲉⲛϯ ⲛⲧⲉⲡⲓⲙⲁ ⲛⲥⲱⲛϩ ⲛϯⲟⲩⲛⲟⲩ ⲇⲉ ⲁⲩⲟⲩⲱⲛ ⲛϫⲉⲛⲓⲣⲱⲟⲩ ⲧⲏⲣⲟⲩ ⲟⲩⲟϩ ⲛⲓⲥⲛⲁⲩϩ ⲛⲧⲱⲟⲩ ⲧⲏⲣⲟⲩ ⲁⲩⲃⲱⲗ ⲉⲃⲟⲗ .
Suddenly there was a great earthquake, so that the foundations of the prison were shaken; and immediately all the doors were opened, and everyone's bonds were loosened.
16.27
ⲉⲧⲁϥⲛⲉϩⲥⲓ ⲇⲉ ⲛϫⲉⲡⲓⲣⲉϥⲁⲣⲉϩ ⲛⲧⲉⲡⲓⲙⲁ ⲛⲥⲱⲛϩ ⲟⲩⲟϩ ⲉⲧⲁϥⲛⲁⲩ ⲉⲛⲓⲣⲱⲟⲩ ⲛⲧⲉⲡⲓϣⲧⲉⲕⲟ ⲉⲩⲟⲩⲏⲛ ⲁϥⲑⲱⲕⲉⲙ ⲛⲧⲉϥⲥⲏϥⲓ ⲉϥⲛⲁϧⲟⲑⲃϥ ⲉϥⲙⲉⲩⲓ ϫⲉⲁⲩⲫⲱⲧ ⲛϫⲉⲛⲏ ⲉⲧⲥⲱⲛϩ .
The jailer, being roused out of sleep and seeing the prison doors open, drew his sword and was about to kill himself, supposing that the prisoners had escaped.
16.28
ⲁϥⲱϣ ⲇⲉ ⲉⲃⲟⲗ ⲛϫⲉⲡⲁⲩⲗⲟⲥ ϧⲉⲛⲟⲩⲛⲓϣϯ ⲛⲥⲙⲏ ⲉϥϫⲱ ⲙⲙⲟⲥ ϫⲉⲙⲡⲉⲣⲉⲣ ϩⲗⲓ ⲙⲡⲉⲧϩⲱⲟⲩ ⲛⲁⲕ ⲧⲉⲛⲙⲡⲁⲓⲙⲁ ⲅⲁⲣ ⲧⲏⲣⲟⲩ .
But Paul cried with a loud voice, saying, 'Don't harm yourself, for we are all here!'
16.29
ⲁϥϭⲓ ⲇⲉ ⲛⲟⲩⲱⲓⲛⲓ ⲁϥϭⲟϫⲓ ⲉϧⲟⲩⲛ ⲟⲩⲟϩ ⲉⲧⲁϥϣⲱⲡⲓ ϧⲉⲛⲟⲩⲥⲑⲉⲣⲧⲉⲣ ⲁϥϩⲓⲧϥ ⲉϧⲣⲏⲓ ϧⲁⲣⲁⲧϥ ⲙⲡⲁⲩⲗⲟⲥ ⲛⲉⲙⲥⲓⲗⲁⲥ .
He called for lights and sprang in, and, fell down trembling before Paul and Silas,
16.30
ⲟⲩⲟϩ ⲉⲧⲁϥⲉⲛⲟⲩ ⲉⲃⲟⲗ ⲡⲉϫⲁϥ ⲛⲱⲟⲩ ϫⲉⲛⲁϭⲓⲥⲉⲩ ⲟⲩ ⲡⲉⲧⲥⲉⲙⲡϣⲁ ⲛⲧⲁⲁⲓϥ ϩⲓⲛⲁ ⲛⲧⲁⲛⲟϩⲉⲙ .
and brought them out and said, 'Sirs, what must I do to be saved?'
16.31
ⲛⲑⲱⲟⲩ ⲇⲉ ⲡⲉϫⲱⲟⲩ ϫⲉⲛⲁϩϯ ⲉⲡϭⲟⲓⲥ ⲓⲏⲥⲟⲩⲥ ⲟⲩⲟϩ ⲉⲕⲉⲛⲟϩⲉⲙ ⲛⲑⲟⲕ ⲛⲉⲙⲡⲉⲕⲏⲓ .
They said, 'Believe in the Lord Jesus Christ, and you will be saved, you and your household.'
16.32
ⲟⲩⲟϩ ⲁⲩⲥⲁϫⲓ ⲛⲉⲙⲁϥ ⲙⲡⲓⲥⲁϫⲓ ⲛⲧⲉⲡϭⲟⲓⲥ ⲛⲑⲟϥ ⲛⲉⲙⲡⲉϥⲏⲓ ⲧⲏⲣϥ .
They spoke the word of the Lord to him, and to all who were in his house.
16.33
ⲟⲩⲟϩ ⲁϥⲟⲗⲟⲩ ⲛϯⲟⲩⲛⲟⲩ ⲉⲧⲉⲙⲙⲁⲩ ⲛⲧⲉⲡⲓⲉϫⲱⲣϩ ⲁϥϫⲟⲕⲙⲟⲩ ⲉⲃⲟⲗ ϧⲉⲛⲛⲟⲩⲉⲣϧⲱⲧ ⲟⲩⲟϩ ⲁϥϭⲓⲱⲙⲥ ⲛⲑⲟϥ ⲛⲉⲙⲡⲉϥⲏⲓ ⲧⲏⲣϥ .
He took them the same hour of the night, and washed their stripes, and was immediately baptized, he and all his household.
16.34
ⲉⲧⲁϥⲉⲛⲟⲩ ⲇⲉ ⲉϧⲟⲩⲛ ⲉⲡⲉϥⲏⲓ ⲁϥⲭⲁ ⲟⲩⲧⲣⲁⲡⲉⲍⲁ ϧⲁⲧⲟⲧⲟⲩ ⲟⲩⲟϩ ⲛⲁϥⲑⲉⲗⲏ ⲗⲙⲙⲟϥ ⲛⲉⲙⲡⲉϥⲏⲓ ⲧⲏⲣϥ ⲉⲧⲁϥⲛⲁϩϯ ⲉⲫⲛⲟⲩϯ .
He brought them up into his house, and set food before them, and rejoiced greatly, with all his household, having believed in God.
16.35
ⲉⲧⲁ ⲡⲓⲉϩⲟⲟⲩ ⲇⲉ ϣⲱⲡⲓ ⲁⲩⲟⲩⲱⲣⲡ ⲛϫⲉⲛⲓⲥⲁⲧⲏⲅⲟⲩⲥ ⲛϩⲁⲛⲣⲁⲃⲇⲟⲩⲭⲟⲥ ⲉⲩϫⲱ ⲙⲙⲟⲥ ϫⲉⲭⲁ ⲛⲓⲣⲱⲙⲓ ⲉⲧⲉⲙⲙⲁⲩ ⲉⲃⲟⲗ .
But when it was day, the magistrates sent the sergeants, saying, 'Let those men go.'
16.36
ⲁϥⲧⲁⲙⲉ ⲡⲁⲩⲗⲟⲥ ⲇⲉ ⲉⲛⲁⲓⲥⲁϫⲓ ⲛϫⲉⲡⲓⲣⲉϥⲁⲣⲉϩ ⲛⲧⲉⲡⲓⲙⲁ ⲛⲥⲱⲛϩ ϫⲉⲁ ⲛⲓⲥⲁⲧⲏⲅⲟⲩⲥ ⲟⲩⲱⲣⲡ ϩⲓⲛⲁ ⲛⲥⲉⲭⲁ ⲑⲏⲛⲟⲩ ⲉⲃⲟⲗ ϯⲛⲟⲩ ⲟⲩⲛ ⲁⲙⲱⲓⲛⲓ ⲉⲃⲟⲗ ⲙⲁϣⲉ ⲛⲱⲧⲉⲛ ϧⲉⲛⲟⲩϩⲓⲣⲏⲛⲏ .
The jailer reported these words to Paul, saying, 'The magistrates have sent to let you go; now therefore come out, and go in peace.'
16.37
ⲡⲁⲩⲗⲟⲥ ⲇⲉ ⲡⲉϫⲁϥ ⲛⲱⲟⲩ ϫⲉⲉⲧⲁⲩϩⲓⲟⲩⲓ ⲉⲣⲟⲛ ⲛⲇⲏⲙⲟⲥⲓⲁ ⲉⲁⲛⲟⲛ ϩⲁⲛⲣⲱⲙⲓ ⲛⲣⲱⲙⲉⲟⲥ ⲛⲧⲉⲛⲉⲣⲡⲕⲉϩⲱⲟⲩⲓ ⲙⲡϩⲁⲡ ⲁⲛ ⲁⲩϩⲓⲧⲧⲉⲛ ⲉⲡϣⲧⲉⲕⲟ ⲟⲩⲟϩ ⲥⲉϩⲓⲟⲩⲓ ⲙⲙⲟⲛ ⲉⲃⲟⲗ ⲛⲭⲱⲡ ⲙⲙⲟⲛ ⲁⲗⲗⲁ ⲙⲁⲣⲟⲩⲓ ⲛⲑⲱⲟⲩⲓ ⲛⲥⲉⲉⲛⲧⲉⲛ ⲉⲃⲟⲗ .
But Paul said to them, 'They have beaten us publicly, without a trial, men who are Romans, and have cast us into prison! Do they now release us secretly? No, most certainly, but let them come themselves and bring us out!'
16.38
ⲁⲩⲧⲁⲙⲉ ⲛⲓⲥⲁⲧⲏⲅⲟⲩⲥ ⲇⲉ ⲉⲛⲁⲓⲥⲁϫⲓ ⲛϫⲉⲛⲓⲣⲁⲃⲇⲟⲩⲭⲟⲥ ⲁⲩⲉⲣϩⲟϯ ⲇⲉ ⲉⲧⲁⲩⲥⲱⲧⲉⲙ ϫⲉϩⲁⲛⲣⲱⲙⲉⲟⲥ ⲛⲉ .
The sergeants reported these words to the magistrates, and they were afraid when they heard that they were Romans,
16.39
ⲟⲩⲟϩ ⲉⲧⲁⲩⲓ ⲁⲩϧⲱⲛϫ ⲉⲣⲱⲟⲩ ⲟⲩⲟϩ ⲉⲧⲁⲩⲉⲛⲟⲩ ⲉⲃⲟⲗ ⲁⲩϯϩⲟ ⲉⲣⲱⲟⲩ ⲉⲑⲣⲟⲩϣⲉ ⲛⲱⲟⲩ ⲉⲃⲟⲗ ϧⲉⲛⲧⲟⲩⲡⲟⲗⲓⲥ .
and they came and begged them. When they had brought them out, they asked them to depart from the city.
16.40
ⲉⲧⲁⲩⲓ ⲇⲉ ⲉⲃⲟⲗ ϧⲉⲛⲡⲓϣⲧⲉⲕⲟ ⲁⲩϣⲉ ⲉϧⲟⲩⲛ ⲉⲡⲏⲓ ⲛⲗⲩⲇⲓⲁ ⲟⲩⲟϩ ⲉⲧⲁⲩⲛⲁⲩ ⲁⲩϯⲛⲟⲙϯ ⲛⲛⲓⲥⲛⲏⲟⲩ ⲟⲩⲟϩ ⲁⲩⲓ ⲉⲃⲟⲗ .
They went out of the prison, and entered into Lydia's house. When they had seen the brothers, they encouraged them, and departed.

Bohairic Coptic New Testament, Coptic SCRIPTORIUM (github.com/CopticScriptorium/corpora, corpus bohairic.nt). Coptic text from Marcion / Hany Takla; annotation by Nina Speranskaja, Nicholas Wagner and Amir Zeldes. English is the World English Bible (public domain), aligned by Coptic SCRIPTORIUM. Licence: CC-BY 4.0. Source.