← All works

Peshitta Odes

Peshitta (Syriac Old Testament) · 209 sections

1. Odes 5:18

   ܐܢܐ ܕܝܢ ܒܡܪܝܐ ܐܕܘܨ. ܘܐܪܘܙ ܒܐܠܗܐ ܦܪܘܩܝ

2. Odes 5:19

   ܡܪܐ ܡܪ̈ܘܬܐ ܚܝܠܝ. ܕܥ̣ܒܕ ܪ̈ܓܠܝ ܐܝܟ ܕܐܝܠܐ. ܘܥܠ ܪܘܡܐ ܐܩܝܡܢܝ. ܕܐ̇ܙܡܪ ܬܫܒ̈ܚܬܗ

3. Odes 6:0

   ܬܫܒܘܚܬܐ ܕܐܫܥܝܐ.

4. Odes 6:9

   ܒܠܠܝܐ ܢܦܫܝ ܐܬܝܐܝܒܬ ܠܟ. ܐܦ ܪܘܚܝ ܒܓܘܝ ܡܩܕܡܐ ܠܘܬܟ. ܡܛܠ ܕܐܝܟ ܕܝܢ̈ܝܟ ܥܠ ܐܪܥܐ. ܙܕܝܩܘܬܐ ܝܠܦܘ ܥܡܘܪ̈ܝܗ ܕܬܒܝܠ

5. Odes 6:10

   ܐܬܪܚܩ ܥ̇ܘܠܐ ܕܠܐ ܢܠܦ ܙܕܝܩܘܬܐ. ܘܡܟܣܢܘܬܐ ܒܐܪܥܐ ܡܟܘܢܐ. ܢܫܬܩܠ ܪܫܝܥܐ ܕܠܐ ܢܚܙܐ ܬܫܒܘܚܬܗ ܕܡܪܝܐ

6. Odes 6:11

   ܡܪܝܐ ܒܪܡܘܬܐ ܕܐܝ̈ܕܝܟ ܠܐ ܢܚܙܘܢ. ܢܚܙܘܢ ܘܢܒܗܬܘܢ ܛܢܢܗ ܕܥܡܟ. ܘܐܝܟ ܬܢܘܪܐ ܬܐܟܘܠ ܐܢܘܢ ܠܒ̈ܥܠܕܒܒܝܟ

7. Odes 6:12

   ܡܪܝܐ ܬܛܪ ܠܢ ܫܠܡܐ. ܡܛܠ ܕܐܝܟ ܟܠܗܘܢ ܥܒ̈ܕܝܢ ܥܬܕܬ ܠܢ

8. Odes 6:13

   ܡܪܝܐܐܠܗܢ ܩܢܝ ܠܢ. ܡܛܠ ܕܗܘܘ ܥܠܝܢ ܡܪ̈ܝܐ ܠܒܪ ܡܢܟ. ܒܠܚܘܕ ܫܡܟ ܕܝܠܟ ܢܬܕܟܪ

9. Odes 6:14

   ܡ̈ܝܬܐ ܠܐ ܡܚܝܢ. ܘܓܢܒܪ̈ܐ ܠܐ ܡܩܝܡܝܢ. ܡܛܠܗܢܐ ܦܩܕܬ ܘܕܢܒܬ ܐܢܘܢ̇ ܘܐܘܒܕܬ ܟܠܗ ܕܘܟܪܢܗܘܢ

10. Odes 6:15

    ܐܘܣܦܬ ܥܠ ܥܡܟ ܡܪܝܐ. ܐܘܣܦܬ ܥܠ ܥܡܟ. ܐܬܪܚܩܬ ܘܕܚܩܬ ܠܟܠܗܘܢ ܪ̈ܫܝܥܐ ܕܐܪܥܐ

11. Odes 6:16

    ܡܪܝܐ ܒܐܘܠܨܢܐ ܦܩܕܘܟ. ܘܒܚܒܘܫܝܐ ܠܚܫܘ ܡܪܕܘܬܟ

12. Odes 6:17

    ܐܝܟ ܒܛܢܐ ܕܩܪܝܒܐ ܠܡܐܠܕ ܘܡܚܒܠܐ ܘܡܝܠܐ ܒܚ̈ܒܠܝܗ̇. ܗܟܢܐ ܗܘܢ ܡܢ ܩܕܡܝܟ ܡܪܝܐ

13. Odes 6:18

    ܒܛܢܢ ܘܚܒܠܢ ܐܝܟ ܗ̈ܢܝܢ ܕܝ̈ܠܕܢ ܪ̈ܘܚܐ. ܦܪܘܩܝܢ ܕܠܐ ܢܐܒܕ ܒܐܪܥܐ. ܘܠܐ ܢܦܠܘܢ ܥܡܘܪ̈ܝܗ̇ ܕܬܒܝܠ

14. Odes 6:19

    ܢܐܚܘܢ ܡ̈ܝܬܐ ܘܫ̈ܠܕܝܗܘܢ ܢܩ̈ܘܡܢ. ܢܬܬܥܝܪܘܢ ܘܢܫܒܚܘܢ ܫ̈ܟܒ̈ܝ ܥܦܪܐ. ܡܛܠ ܕܛܠܟ ܛܠܐ ܗܘ ܕܢܘܗܪܐ. ܘܐܪܥܐ ܕܥܘ̈ܠܐ ܬܣܚܦ

15. Odes 7:0

    ܬܫܒܘܚܬܐ ܕܝܘܢܢ.

16. Odes 7:3

    ܩܪܝܬ ܠܡܪܝܐ ܒܥܩ̈ܬܝ ܘܥܢܢܝ. ܘܡܢ ܟܪܣܗ̇ ܕܫܝܘܠ ܓܥܝܬ ܘܫܡܥܬ ܒܩܠܝ

17. Odes 7:4

    ܘܐܪܡܝܬܢܝ ܒܥܘܡܩܐ ܒܠܒܗ ܕܝܡܐ ܘܢܗܪ̈ܘܬܐ ܚܕܪ̈ܘܢܝ. ܟܠܗܘܢ ܡ̈ܚܫܘܠܝܟ ܘܓ̈ܠܠܝܟ ܥܠܝ ܥܒ̣ܪܘ

18. Odes 7:5

    ܐܢܐ ܕܝܢ ܐܡܪܬ ܕܐܪܚܩܬ ܡܢ ܩܕܡ ܥܝ̈ܢܝܟ. ܡܟܝܠ ܡܘܣܦ ܐܢܐ ܠܡܚܙܐ ܠܗܝܟܠܟ ܩܕܝܫܐ

19. Odes 7:6

    ܚܕܪܘܢܝ ܡ̈ܝܐ ܥܕܡܐ ܠܢܦܫܐ ܘܬܗܘܡܐ ܟܪܟܢܝ. ܒܐܫܬܗ ܕܝܡܐ ܐܬܚܒܫ ܪܝܫܝ

20. Odes 7:7

    ܘܠܐܫ̈ܬܗܘܢ ܕܛܘܪ̈ܐ ܢܚܬܬ ܘܐܪܥܐ ܐܚܕܬ ܣܘܟܪ̈ܝܗ̇ ܒܐ̈ܦܝ ܠܥܠܡ. ܘܐܣܩܬ ܚܝ̈ܝ ܡܢ ܚܒܠܐ ܡܪܝܐ ܐܠܗܝ

21. Odes 7:8

    ܟܕ ܐܬܛܪܦܬ ܢܦܫܝ ܠܡܪܝܐ ܐܬܕܟܪܬ. ܘܥܠܬ ܩܕܡܝܟ ܨܠܘܬܝ ܠܗܝܟܠܟ ܩܕܝܫܐ

22. Odes 7:9

    ܟܠ ܕܢܛܪ̈ܝܢ ܕܚ̈ܠܬܐ ܣܪ̈ܝܩܬܐ. ܡܪܚܡܢܘܬܟ ܫܒܩܝܢ

23. Odes 7:10

    ܐܢܐ ܕܝܢ ܒܩܠܐ ܕܬܘܕܝܬܐ ܐܕܒܚ ܠܟ. ܘܡܕܡ ܕܢܕܪܬ ܐܫܠܡ. ܦܘܪܥܢܐ ܠܡܪܝܐ

24. Odes 8:0

    ܬܫܒܘܚܬܐ ܕܒܝܬ ܚܢܢܝܐ.

25. Odes 8:26

    ܡܒܪܟ ܐܢܬ ܡܪܝܐ ܐܠܗܐ ܕܐܒ̈ܗܬܢ. ܘܡܪܡܪܡ ܘܡܫܒܚ ܫܡܟ ܠܥܠܡ

26. Odes 8:27

    ܡܛܠ ܕܙܕܝܩ ܐܢܬ ܒܟܠܡܐ ܕܥܒܕܬ ܠܢ ܘܟܠܗܘܢ ܥܒ̈ܕܝܟ ܒܩܘܫܬܐ ܘܬܪܝܨܢ ܐܘܪ̈ܚܬܟ. ܘܟܠܗܘܢ ܕܝܢܝ̈ܟ ܡܗܝܡܢܝܢ

27. Odes 8:28

    ܡܛܠ ܕܒܕܝܢܐ ܗܘ ܕܩܘܫܬܐ ܥܒܕܬ ܠܢ ܒܟܠܡܐ ܕܐܝܬܝܬ ܥܠܝܢ ܘܥܠ ܡܕܝܢܬܐ ܩܕܝܫܬܐ ܕܐܒܗ̈ܝܢ ܥܠ ܐܘܪܫܠܡ. ܡܛܠ ܕܒܟܐܢܘܬܐ ܐܝܬܝܬ ܥܠܝܢ ܗܠܝܢ ܟܠܗܝܢ. ܡܛܠ ܚ̈ܘܒܝܢ ܘܚܛܗ̈ܝܢ

28. Odes 8:29

    ܕܚܛܝܢ ܘܐܪܫܥܢ ܩܕܡܝܟ. ܘܐܪܚܩܢ ܡܢܟ ܘܥܒܪܢ ܥܠ ܡܐܡܪܟ. ܘܚܛܝܢ ܠܟ

29. Odes 8:30

    ܘܠܦܘ̈ܩܕܢܝܟ ܠܐ ܫܡܥܢ ܘܠܐ ܢܛܪܢ. ܘܠܐ ܥܒܕܢ ܐܝܟ ܡܕܡ ܕܦܩܕܬܢ ܕܢܛܐܒ ܠܢ

30. Odes 8:31

    ܘܟܠܡܐ ܕܥܒܕܬ ܠܢ ܘܟܠܡܐ ܕܐܝܬܝܬ ܥܠܝܢ ܒܕܝܢܐ ܗܘ ܟܐܢܐ ܥ̣ܒܕܬ ܠܢ

31. Odes 8:32

    ܘܐܫܠܡܬܢ ܒܐܝ̈ܕܐ ܕܒ̈ܥܠܕܒܒܝܢ. ܥ̇ܘ̈ܠܐ ܕܪ̈ܚܝܩܝܢ ܡܢܟ. ܘܠܡܪܘܬܐ ܕܡܠܟܘܬܐ ܪܫܝܥܬܐ. ܕܒܝ̣ܫܐ ܡܢ ܟܠܗܝܢ ܡ̈ܠܟܘܬܐ ܕܐܪܥܐ

32. Odes 8:33

    ܘܗܫܐ ܡܪܝܐ ܠܝܬ ܠܢ ܡ̇ܦܬܚ ܦܘܡܐ ܩܕܡܝܟ. ܡܛܠ ܒܗܬܬܐ ܘܚܣܕܐ ܕܗܘܐ ܠܥܒ̈ܕܝܟ ܘܠܕܚ̈ܠܝܟ

33. Odes 8:34

    ܠܐ ܬܫܠܡܢ ܥܕܡܐ ܠܚܪܬܐ ܡܛܠ ܫܡܟ. ܘܠܐ ܬܒܛܠ ܕܝܬܝܩܐ ܕܝܠܟ

34. Odes 8:35

    ܘܠܐ ܬܪܚܩ ܪ̈ܚܡܝܟ ܘܛܝܒ̈ܘܬܟ ܡܢܢ. ܡܛܠ ܐܒܪܗܡ ܪܚܡܟ. ܘܡܛܠ ܐܝܣܚܩ ܥܒܕܟ. ܘܡܛܠ ܐܝܣܪܐܝܠ ܩܕܝܫܟ

35. Odes 8:36

    ܕܡܠܟܬ ܠܗܘܢ. ܕܬܣܓܐ ܙܪܥܗܘܢ ܐܝܟ ܟܘ̈ܟܒܐ ܕܒܫܡܝܐ. ܘܐܝܟ ܚܠܐ ܕܥܠ ܣܦܬܗ ܕܝܡܐ

36. Odes 8:37

    ܘܗܫܐ ܡܪܝܐ ܗܐ ܐܬܡܟܟܢ ܡܢ ܟܠܗܘܢ ܥܡ̈ܡܐ. ܘܚܢܢ ܡܒܕܪܝܢܢ ܝܘܡܢܐ ܒܟܠܗ̇ ܐܪܥܐ. ܡܛܠ ܚ̈ܘܒܝܢ ܘܚܛܗ̈ܝܢ

37. Odes 8:38

    ܘܠܐ ܐܝܬ ܒܙܒܢܐ ܗܢܐ. ܠܐ ܪܝܫܐ ܘܠܐ ܫܠܝܛܐ ܘܠܐ ܢܒܝܐ ܘܠܐ ܡܕܒܪܢܐ. ܘܠܐ ܡܕܒܚܐ. ܘܠܐ ܕܒܚܐ ܘܠܐ ܩܘܪܒܢܐ. ܘܠܐ ܕܘܟܬܐ ܕܢܣܩ ܒܣ̈ܡܐ ܐܘ ܕܒܚܬܐ ܘܢܫܟܚ ܚܢܢܐ ܘܪ̈ܚܡܐ

38. Odes 8:39

    ܐܠܐ ܒܠܒܐ ܫܚܝܩܐ ܘܒܪܘܚܐ ܡܟܝܟܬܐ. ܗܐ ܐܬܩܪܒܢ ܠܝܩܕܢܐ ܕܢܘܪܐ

39. Odes 8:40

    ܟܕ ܒ̇ܥܝܢܢ ܕܝܬܝܪ ܡܢ ܬܘܪ̈ܐ ܘܕܟܪ̈ܐ ܘܐܡܪ̈ܐ ܣ̈ܓܝܐܐ. ܗܟܢܐ ܢܗܘܐ ܩܘܪܒܢܐ ܕܢܦܫܢ ܝܘܡܢܐ ܩܕܡܝܟ. ܘܠܐ ܢܒܗܬܘܢ ܥܒ̈ܕܝܟ. ܡܛܠ ܕܠܐ ܒܗܬܝܢ ܐܝܠܝܢ ܕܬܟܝܠܝܢ ܥܠܝܟ

40. Odes 8:41

    ܘܐܦ ܗܫܐ ܚܢܢ ܐܬܝܢ ܒܬܪܟ ܒܠܒܐ ܫܠܡܐ. ܘܐ̈ܦܝܟ ܒܥܝܢܢ ܡܪܝܐ

41. Odes 8:42

    ܠܐ ܬܒܗܬܝܢ. ܐܠܐ ܥܒܕ ܥܡܢ ܐܝܟ ܣܘܓܐܐ ܕܛܝܒ̈ܘܬܟ ܘܕܪ̈ܚܡܝܟ ܣ̈ܓܝܐܐ

42. Odes 8:43

    ܘܦܪܘܩܝܢ ܐܝܟ ܣܘܓܐܐ ܕܬܕܡܪ̈ܬܟ. ܘܗܒ ܬܫܒܘܚܬܐ ܠܫܡܟ ܡܪܝܐ

43. Odes 8:44

    ܘܢܒܗܬܘܢ ܟܠܗܘܢ ܐܝܠܝܢ ܕܐܡ̇ܪܝܢ ܒܝ̣ܫܬܐ ܥܠ ܥܒ̈ܕܝܟ. ܘܢܒܗܬܘܢ ܒܟܠܗ̇ ܓܢܒܪܘܬܗܘܢ. ܘܚܝܠܗܘܢ ܢܫܬܒܩ

44. Odes 8:45

    ܘܢܕܥܘܢ ܕܐܢܬ ܗܘ ܚܕ ܐܠܗܐ ܒܠܚܘܕܝܟ. ܘܡܫܒܚ ܐܢܬ ܒܟܠܗܘܢ ܥܒ̈ܕܝܟ

45. Odes 8:46

    ܘܠܐ ܫܠܝܢ ܗܘܘ ܗ̇ܢܘܢ ܕܡܘܩܕܝܢ ܗܘܘ ܐܬܘܢܐ ܕܢܘܪܐ ܘܫܕܝܢ ܗܘܘ ܒܗ ܢܦܛܐ ܘܙܦܬܐ ܘܟܒܪܝܬܐ. ܘܩ̈ܢܝܐ ܘܫܒ̈ܫܬܐ

46. Odes 8:47

    ܘܝܗܒܬ ܩܠܐ ܫܠܗܒܝܬܐ ܕܢܘܪܐ. ܘܣܠܩܬ ܠܥܠ ܡܢ ܐܬܘܢܐ ܕܢܘܪܐ̇· ܐܪ̈ܒܥܝܢ ܘܬܫܥ ܐܡ̈ܝܢ

47. Odes 8:48

    ܘܗܘܬ ܡܘܩܕܐ ܘܡܘܒܕܐ ܢܘܪܐ̣. ܠܟܠ ܕܡܫܟܚܐ ܚܕܪܘܗܝ ܕܐܬܘܢܐ. ܡܢ ܟܠ̈ܕܝܐ ܘܐ̈ܟܠܝ ܩܪܨܐ

48. Odes 8:49

    ܡܠܐܟܐ ܕܝܢ ܕܡܪܝܐ ܢܚܬ ܥܡ ܚܢܢܝܐ ܘܥܙܪܝܐ ܘܡܝܫܐܝܠ ܠܓܘ ܐܬܘܢܐ ܕܢܘܪܐ. ܘܕܥܟܗ̇ ܠܫܠܗܒܝܬܐ ܕܢܘܪܐ ܡܢ ܐܬܘܢܐ

49. Odes 8:50

    ܘܥܒ̣ܕ ܒܡܨܥܬܗ ܕܐܬܘܢܐ ܐܝܟ ܪܘܚܐ ܕܛܠܐ. ܘܠܐ ܩܪܒܬ ܠܗܘܢ ܢܘܪܐ ܐܦܠܐ ܩܠܝܠ ܘܠܐ ܐܟܪܝܬ ܠܗܘܢ ܘܠܐ ܐܠܨܬ ܐܢܘܢ̇

50. Odes 8:51

    ܗܝܕܝܢ ܬܠܬܝܗܘܢ ܐܝܟ ܕܡܢ ܚܕ ܦܘܡܐ. ܡܫܒܚܝܢ ܗܘܘ ܘܡܒܪܟܝܢ ܠܐܠܗܐ ܡܢ ܓܘ ܐܬܘܢܐ ܕܢܘܪܐ ܘܐܡ̇ܪܝܢ

51. Odes 8:52

    ܡܒܪܟ ܐܢܬ ܡܪܝܐ ܐܠܗܐ ܕܐ̈ܒܗܬܢ. ܡܫܒܚ ܐܢܬ ܘܡܪܡܪܡ ܐܢܬ ܠܥܠܡ. ܡܒܪܟ ܫܡܐ ܕܬܫܒܘܚܬܟ ܩܕܝܫܐ. ܡܫܒܚ ܐܢܬ ܘܡܪܡܪܡ ܐܢܬ ܠܥܠܡ

52. Odes 8:53

    ܡܒܪܟ ܐܢܬ ܒܗܝܟܠܐ ܕܩܘܕܫܟ. ܡܫܒܚ ܐܢܬ ܘܡܪܡܪܡ ܐܢܬ ܠܥܠܡ

53. Odes 8:54

    ܡܒܪܟ ܐܢܬ ܕܝ̇ܬܒ ܐܢܬ ܥܠ ܟܪ̈ܘܒܐ ܘܚ̇ܙܐ ܐܢܬ ܬܗܘ̈ܡܐ. ܡܫܒܚ ܐܢܬ ܘܡܪܡܪܡ ܐܢܬ ܠܥܠܡ

54. Odes 8:55

    ܡܒܪܟ ܐܢܬ ܥܠ ܟܘܪܣܝ ܡܠܟܘܬܟ. ܡܫܒܚ ܐܢܬ ܘܡܪܡܪܡ ܐܢܬ ܠܥܠܡ

55. Odes 8:56

    ܡܒܪܟ ܐܢܬ ܒܪܩܝܥܐ ܕܫܡܝܐ. ܡܫܒܚ ܐܢܬ ܘܡܪܡܪܡ ܐܢܬ ܠܥܠܡ

56. Odes 9:0

    ܨܠܘܬܐ ܕܒܝܬ ܚܢܢܝܐ.

57. Odes 9:57

    ܒܪܟܘ ܟܠܗܘܢ ܥܒܕܘ̈ܗܝ ܕܡܪܝܐ ܠܡܪܝܐ. ܫܒܚܘܗܝ ܘܪܡܪܡܘܗܝ ܠܥܠܡ

58. Odes 9:58

    ܘܡ̈ܠܐܟܘܗܝ ܕܡܪܝܐ ܠܡܪܝܐ

59. Odes 9:59

    ܒܪܟܘ ܫܡܝܐ

60. Odes 9:60

    ܒܪܟܘ ܡ̈ܝܐ ܕܠܥܠ ܡܢ ܫܡܝܐ

61. Odes 9:61

    ܘܟܠ ܚܝ̈ܠܘܬܗ ܕܡܪܝܐ ܠܡܪܝܐ

62. Odes 9:62

    ܒܪܟܘ ܫܡܫܐ ܘܣܗܪܐ

63. Odes 9:63

    ܘܟܠܗܘܢ ܟܘ̈ܟܒܐ ܕܒܪܩܝܥܐ ܠܡܪܝܐ

64. Odes 9:64

    ܒܪܟܘ ܡܛܪܐ ܘܛܠܐ

65. Odes 9:65

    ܘܟܠܗܝܢ ܪ̈ܘܚܐ ܠܡܪܝܐ

66. Odes 9:66

    ܒܪܟܘ ܢܘܪܐ ܘܚܘܡܐ ܠܡܪܝܐ

67. Odes 9:69

    ܒܪܟܘ ܥܪܝܐ ܘܚܘܡܐ

68. Odes 9:70

    ܬܠܓܐ ܘܓܠܝܕܐ ܠܡܪܝܐ

69. Odes 9:71

    ܒܪܟܘ ܠܠܝܐ ܘܐܝܡܡܐ

70. Odes 9:72

    ܢܘܗܪܐ ܘܚܫܘܟܐ ܠܡܪܝܐ

71. Odes 9:73

    ܒܪܟܘ ܒܪ̈ܩܐ ܘܥܢ̈ܢܐ ܠܡܪܝܐ

72. Odes 9:74

    ܒܪܟܘ ܐܪܥܐ

73. Odes 9:75

    ܘܛܘܪ̈ܐ ܘܪ̈ܡܬܐ

74. Odes 9:76

    ܘܟܠ ܕܡܘܥ̇ܐ ܥܠ ܐܪܥܐ ܠܡܪܝܐ.

75. Odes 9:77

    ܘܟܠܗܘܢ ܡܒ̈ܘܥܐ ܕܡ̈ܝܐ ܠܡܪܝܐ

76. Odes 9:78

    ܒܪܟܘ ܝܡ̈ܡܐ ܘܢܗܪ̈ܘܬܐ

77. Odes 9:79

    ܒܪܟܘ ܢܘ̈ܢܐ ܘܟܠ ܕܪܚ̇ܫ ܒܡ̈ܝܐ ܠܡܪܝܐ

78. Odes 9:80

    ܒܪܟܘ ܟܠܗ̇ ܦܪܚܬܐ ܕܫܡܝܐ

79. Odes 9:81

    ܘܚܝܘܬܐ ܕܕܒܪܐ ܠܡܪܝܐ

80. Odes 9:82

    ܘܟܠܗܘܢ ܒܢܝ̈ܢܫܐ ܠܡܪܝܐ

81. Odes 9:83

    ܒܪܟܘ ܕܒܝܬ ܐܝܣܪܐܝܠ

82. Odes 9:84

    ܒܪܟܘ ܟܗ̈ܢܐ

83. Odes 9:85

    ܥܒ̈ܕܘܗܝ ܕܡܪܝܐ ܠܡܪܝܐ

84. Odes 9:86

    ܒܪܟܘ ܪ̈ܘܚܬܐ ܘܢܦܫ̈ܬܐ ܕܙܕܝ̈ܩܐ

85. Odes 9:87

    ܬܡ̈ܝܡܐ ܘܡ̈ܟܝܟܝ ܠܒܐ ܠܡܪܝܐ

86. Odes 9:88

    ܒܪܟܘ ܚܢܢܝܐ ܘܥܙܪܝܐ ܘܡܝܫܐܝܠ ܠܡܪܝܐ. ܒܪܟܘ ܫܠܝ̈ܚܐ ܘܢܒ̈ܝܐ ܣܗ̈ܕܐ ܘܡ̈ܘܕܝܢܐ ܠܡܪܝܐ. ܒܪܟܘ ܟܠ ܕܩܝܡܝܢ ܒܒܝܬܗ ܕܡܪܝܐ ܠܡܪܝܐ. ܡܒܪܟܝܢܢ ܠܐܒܐ ܘܠܒܪܐ ܘܠܪܘܚܐ ܕܩܘܕܫܐ. ܡܫܒܚܝܢܢ ܘܡܪܡܪܡܝܢܢ ܠܥܠܡ

87. Odes 10:0

    ܨܠܘܬܐ ܕܚܙܩܝܐ.

88. Odes 10:10

    ܐܢܐ ܐܡ̇ܪܬ̇· ܕܒܦܠܓܘܬ ܝܘܡ̈ܝ ܐܙ̇ܠ. ܒܬܪܥܐ ܕܫܝܘܠ ܫܒܩ̇ܬ ܫܪܟܢܐ ܕܫܢ̈ܝ

89. Odes 10:11

    ܐܡ̇ܪܬ ܕܠܐ ܐܚ̇ܙܐ ܠܡܪܝܐ ܒܐܪܥܐ ܕܚ̈ܝܐ. ܘܬܘܒ ܠܐ ܐܚ̇ܙܐ ܐܢ̈ܫܐ ܥܡ ܥܡ̈ܪܝ ܚܦ̣ܪܐ

90. Odes 10:12

    ܕܪܝ ܫܩ̣ܠ ܘܥܒ̣ܪ ܡܢܝ̣. ܐܝܟ ܡ̇ܫܟܢܐ ܕܪ̈ܥܘܬܐ. ܐܬܩ̣ܦܕܘ ܐܝܟ ܣܝܪ̈ܣ ܚ̈ܝܝ. ܘܐܝܟ ܢܘܠܐ ܕܩܪܝܒ ܠܡܬܓܕܕܘ. ܡܢ ܐܝܡܡܐ ܘܥܕܡܐ ܠܠܝܐ ܐܫܠܡ̣ܬܢܝ

91. Odes 10:14

    ܐܝܟ ܣܢܘܢܝܬܐ ܕܡ̇ܢܨܪܐ ܢܨ̇ܪܬ. ܘܐܝܟ ܝܘܢܐ ܢܗ̇ܡܬ. ܐܪܝܡܬ ܥܝ̈ܢܝ ܠܡܪܘܡܐ. ܡܪܝܐ ܦܨ̇ܢܝ ܘܒܣܡܝܢܝ

92. Odes 10:15

    ܘܡܢܐ ܐܡ̇ܠܠ ܐܡ̣ܪ ܠܝ. ܘܗ̣ܘ ܥܒ̣ܪ ܘܐܢ̣ܝܕ ܟܠܗ̇ ܫܢܬܝ. ܥܠ ܡܪܪܐ ܕܢܦܫܝ ܡܪܝܐ ܥܠܝܗܘܢ ܢܐܚܘܢ

93. Odes 10:16

    ܡܛܠ ܗܠܝܢ ܚ̈ܝܐ ܕܪܘܚܝ ܐܚܠܡܝܢܝ ܘܐܚܢܝ

94. Odes 10:17

    ܗܐ ܠܫ̇ܠܡܐ ܡ̣ܪ ܠܝ ܡܪ̈ܪܐ. ܘܐܢܬ ܨܒ̣ܝܬ ܒܢܦܫܝ̣. ܕܠܐ ܬ̣ܒܠܐ ܒܚܒܠܐ. ܡܛܠ ܕܫܕܝܬ ܒܣܬܪ ܓܘ̣ܫܡܟ ܟܠܗܘܢ ܚ̈ܛܗܝ

95. Odes 10:18

    ܡܛܠ ܕܠܐ ܫܝܘܠ ܬܘܕܐ ܠܟ̣. ܐܦܠܐ ܡ̇ܘܬܐ ܢܫܒܚܟ. ܘܠܐ ܢܣ̇ܒܪܘܢ ܠܩܘܫܬܟ ܐܝܠܝܢ ܕܢܚ̈ܬܝܢ ܠܓܘܒܐ

96. Odes 10:19

    ܐܠܐ ܢܘܕܘܢ ܠܟ ܚ̈ܝܐ ܕܐܟܘܬܝ ܝܘܡܢܐ. ܘܐܒܐ ܠܒܢ̈ܝܐ̣. ܢܚ̇ܘܐ ܗܝܡܢܘܬܟ

97. Odes 10:20

    ܡܪܝܐ ܢܦܪܩܢܝ. ܘܬܫܒ̈ܚܬܗ ܢܫܒ̇ܚ. ܟܠܗܘܢ ܝܘܡ̈ܬܐ ܕܚ̈ܝܝܢ ܒܒܝܬܗ ܕܡܪܝܐ...

98. Odes 11:0

    ܬܫܒܘܚܬܐ ܕܕܘܝܕ.

99. Odes 11:2

    ܐܠܗܝ ܐܠܗܝ ܐܢܬ ܐ̇ܣܟܐ ܠܟ. ܨܗܝܐ ܗܝ ܠܟ ܢܦܫܝ ܘܡ̇ܣܟܐ ܠܟ ܒܣܪܝ. ܐܝܟ ܐܪܥܐ ܨܗܝܬܐ ܘܡ̇ܛܪܦܬܐ ܕܒ̇ܥܝܐ ܡ̈ܝܐ

100. Odes 11:3

     ܗܟܢ ܚܪܬܟ ܒܩܘܫܬܐ ܕܐ̇ܚܙܐ ܥܘܫܢܟ ܘܐܝܩܪܟ

← Previous · Next → — showing 101–200 of 209

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.