← All works

Peshitta Odes

Peshitta (Syriac Old Testament) · 209 sections

1. Odes 1:0

   ܬܘܒ ܬܫܒܘܚܬܐ ܩܕܡܝܬܐ ܕܡܘܫܐ

2. Odes 1:1

   ܗܝ̇ܕܝܢ ܫܒ̇ܚܘ ܡܘܫܐ ܘܒ̈ܢܝ ܐܝܣܪܝܠ. ܬܫܒܘ̣ܚܬܐ ܗܕܐ ܠܡ̇ܪܝܐ ܘܐܡܪܘ. ܢܫܒܚ ܠܡܪܝܐ ܓܐܝܐ. ܕܐܬܓ̇ܐܝ ܥ̇ܠ ܪ̈ܟܫܐ ܘܪ̈ܟܒܝܗܘܢ ܐܪܡ̣ܝ ܒܝܡܐ

3. Odes 1:2

   ܬܩܝܦܐ ܘܡܫܒܚܐ. ܕܢܚ ܡܪܝܐ ܘܗܘ̣ܐ ܠܢ ܦܪܘܩܐ. ܗ̇ܢܘ ܐ̇ܠܗܝ ܐ̇ܫܒܚܝܘܗܝ. ܐܠܗܗ ܕܐܒܝ ܐ̇ܪܡܪܡܝܘܗܝ

4. Odes 1:3

   ܡܪܝܐ ܓܢܒܪܐ ܘܩܪܒܬܢܐ ܡܪܝܐ ܫܡܗ

5. Odes 1:4

   ܡܪ̈ܟܒܬܗ ܕܦܪܥܘܢ ܘܚܝܠܗ ܫ̣ܕܐ ܒܝܡܐ. ܘܓܒ̈ܝܐ ܕܓܢܒܪ̈ܘܗܝ ܛ̇ܒܥ ܒܝ̇ܡܐ ܕܣܘܦ

6. Odes 1:5

   ܬܗ̈ܘܡܐ ܟܣ̇ܝܘ ܐܢܘܢ ܢܚ̣ܬܘ ܠܥܘܡܩܐ ܘܛܒܥ̣ܘ ܐܝܟ ܟܐ̈ܦܐ

7. Odes 1:6

   ܝܡܝܢܟ ܡܪܝܐ ܗܕܝܪܐ ܒܚܝܠܐ. ܝܡܝܢܟ ܡܪܝܐ ܬܒ̣ܪܬ ܠܒܥܠܕܒܒ̈ܝܟ

8. Odes 1:7

   ܘܒܣܘܓܐܐ ܕܬܘܩܦܟ ܣ̇ܚܦ̣ܬ ܠܣ̈ܢܐܝܟ ܫ̣ܕܪܬ ܪܘܓܙܟ. ܘܐܟ̣ܠ ܐܢܘܢ ܐܝܟ ܕܠܚܒܬܐ

9. Odes 1:8

   ܒܪܘܚܐ ܕܐ̈ܦܝܟ ܐܬ̇ܥܪܡܘ ܡ̈ܝܐ. ܘܩ̣ܡܘ ܐܝܟ ܕܒܙ̈ܩܐ ܪ̈ܕܝܐ. ܩ̣ܦܘ ܬܗ̈ܘܡܐ ܒܠܒܗ ܕܝܡܐ

10. Odes 1:9

    ܐܡ̣ܪ ܒܥܠܕܒܒܐ ܐܪܕܘܦ ܘܐ̇ܕܪܟ ܘܐ̇ܦܠܓ ܒܙܬܐ. ܬ̣ܒܠܥ ܐܢܘܢ ܢܦܫܝ. ܐ̇ܫܡܘܛ ܣܝܦܝ ܘܬܚܪܘܒ ܐܢܘܢ ܐܝܕܝ

11. Odes 1:10

    ܐܫܒ̣ܬ ܪܘܚܟ ܘܟ̇ܣܝ ܐܢܘܢ ܝܡܐ ܛܒ̣ܥܘ ܐܝܟ ܐܒܪܐ ܒܡ̈ܝܐ ܬܩ̈ܝܦܐ

12. Odes 1:11

    ܡ̣ܢܘ ܐܟܘܬܟ ܡܪܝ̇ܐ. ܡ̣ܢܘ ܐܟܘܬܟ ܗܕܝܪ ܒܩ̣ܘܕܫܗ. ܕܚ̣ܝܠܐ ܘܡܫܒܚܐ ܘܥ̇ܒ̣ܕ ܬܕܡܪ̈ܬܐ

13. Odes 1:12

    ܐܪܝܡ̣ܬ ܝܡܝܢܟ ܘܒܠܥ̣ܬ ܐܢܘܢ ܐܪܥܐ

14. Odes 1:13

    ܕܒ̣̇ܪܬ ܒܛܝ̇ܒܘܬܟ ܠܥܡܐ ܗܢܐ ܕܦ̣ܪܩܬ. ܕܒ̣̇ܪܬ ܒܬܘܩܦܟ ܠܕܝܪܐ ܕܩܘܕܫܟ

15. Odes 1:14

    ܫܡ̣ܥܘ ܥܡ̈ܡܐ ܘܙܥ̣ܘ ܘܕܚܠܬܐ ܐܚ̣ܕܬ̇ ܐܢܘܢ ܠܝܬ̈ܒܝ̇ܗ̇ ܕܦܠܫܬ

16. Odes 1:15

    ܗ̇ܝܕܝܢ ܕܚ̣ܠܘ ܪ̈ܘܪܒܢܐ ܕܐܕܘܡ. ܘܠܓܒܪ̈ܐ ܕܡܘܐܒ ܐܚ̣ܕ ܐܢܘܢ ܪܬܝܬܐ.. ܐܬܬ̣ܒܪܘ ܟܠܗܘܢ ܥܡܘܪ̈ܝܗ̇ ܕܟܢܥܢ

17. Odes 1:16

    ܬ̇ܦ̣ܠ ܥܠܝܗܘܢ ܕܚܠܬܐ ܘܙܘܥܬܐ. ܒܪܒ̇ܘܬܐ ܕܕܪܥܟ ܢܛܒ̣ܥܘܢ ܐܝܟ ܟܐ̈ܦܐ. ܥܕܡܐ ܕܢܥ̣ܒܪ ܥܡܟ ܡܪܝܐ. ܥܕܡܐ ܕܢܥ̣ܒܪ ܥܡܐ ܗܢܐ ܕܦ̣ܪܩܬ

18. Odes 1:17

    ܬܝ̇ܬܐ ܐܢܘܢ ܘܬܨܘܒ ܐܢܘܢ ܒܛ̣ܘܪܐ ܕܝܪܬܘܬܟ. ܡܬ̣ܩܢܐ ܠܡܘܬܒܟ ܥܒ̣ܕܬ ܡܪܝܐ ܡܩ̣ܕܫܟ. ܡܪܝܐ ܬ̇ܩܢܝܗܝ ܒܐܝ̈ܕܝܟ

19. Odes 1:18

    ܡܪܝܐ ܢܡ̇ܠܟ ܠܥܠܡ ܥܠܡܝܢ

20. Odes 1:19

    ܡܛܠ ܕܥ̣ܠܘ ܪܟܫܗ ܕܦܪܥܘܢ ܘܡܪ̈ܟܒܬܗ ܘܦܪ̣̈ܫܘܗܝ ܒܓܘ ܝܡܐ. ܘܐܗ̣ܦܟ ܥܠܝܗܘܢ ܡܪܝܐ ܡܝ̈ܐ ܕܝܡܐ. ܘܒ̈ܢܝ ܐܝܣܪܝܠ ܗ̇ܠܟܘ ܒܝܒܫܐ ܒܓܘ ܝܡܐ

21. Odes 1:20

    ܘܢܣܒ̣ܬ̇ ܡܪܝܡ ܢܒܝܬܐ ܚܬܗ ܕܐܗܪܘܢ ܦܠܓܐ ܒܐܝܕܗ̇ ܘܢ̈ܦ̣ܩܝ ܟܠܗܝܢ ܢܫ̈ܐ ܒܬܪܗ̇ ܒ̈ܦܠܓܐ ܘܒܪ̈ܒܝܥܐ

22. Odes 1:21

    ܘܡܥ̣ܢܝܐ ܗܘܬ ܠܗܝܢ ܡܪܝܡ. ܫ̇ܒܚ̈ܝܢ ܠܡܪܝܐ ܓܐܝܐ. ܕܐܬܓ̇ܐܝ ܥܠ ܪܟܫܐ ܘܪ̈ܟܒܝܗܘܢ ܐܪܡ̣ܝ ܒܝܡܐ

23. Odes 2:0

    ܬܫܒܘܚܬܐ ܕܬܪ̈ܬܝܢ ܕܡܘܫܐ. .

24. Odes 2:1

    ܨܘܬ ܫܡܝܐ ܘܐ̇ܡܠܠ. ܬܫܡܥ ܐܪܥ̇ܐ ܡ̇ܐܡܪܗ ܕܦܘܡܝ

25. Odes 2:2

    ܢ̣ܪܣܡ ܐܝܟ ܡܛܪܐ ܝܘܠܦܢܝ. ܘܢܚܘܬ ܐܝܟ ܛܠܐ ܡܐܡܪܝ ܐܝܟ ܪ̈ܘܚܐ ܕܥܠ ܬܕܐܐ ܘܐܝܟ ܪ̈ܣܝܣܐ ܕܥܠ ܥܣܒܐ

26. Odes 2:3

    ܡܛܠ ܕܒܫܡܗ ܕܡܪܝܐ ܐܩܪܐ. ܗܒܘ ܪܒܘܬܐ ܠܐܠܗܢ

27. Odes 2:4

    ܬܩܝܦܐ ܕܕܠܐ ܡܘܡ ܥ̇ܒ̈ܕܘܗܝ. ܘܟܠܗܝܢ ܐܘܪ̈ܚܬܗ ܕܝ̣ܢܐ. ܐܠܗܐ ܡܗܝܡܢܐ ܘܠܐ ܗܘ̣ܐ ܥܘ̇ܠܐ. ܙܕܝܩܐ ܘܬܪܝܨܐ

28. Odes 2:5

    ܚܒܠ ܘܠܐ ܠܗ ܒ̈ܢܝܐ ܕܡܘܡܐ. ܕܪܐ ܡܥ̇ܩܡܐ ܘܡܦ̇ܬܠܐ

29. Odes 2:6

    ܗܠܝܢ ܠܡܪܝܐ ܦ̇ܪܥܝܢ ܐܢܬܘܢ. ܥܡܐ ܣܟܠܐ ܘܠܐ ܗܘ̣ܐ ܚܟܝܡܐ ܕܠܡܐ݃ ܠܐ ܗܘܐ ܐܒܘܟ ܕܩ̣ܢܟ. ܘܗܘ̣ܝܘ ܥ̣ܒܕܟ ܘܐܬ̣ܩܢܟ

30. Odes 2:7

    ܐܬܕܟܪ ܝܘܡ̈ܬܐ ܕܡܢ ܥܠܡ ܘܐܣ̇ܬܟܠ ܒܫ̈ܢܝܐ ܕܕܪܕܪ̈ܝܢ ܫ̇ܐ̣ܠ ܠܐܒܘܟ ܘܢܚ̇ܘܝܟ. ܘܠܣ̈ܒܝܟ ܘܢܐܡܪ̈ܘܢ ܠܟ

31. Odes 2:8

    ܟܕ ܡ̇ܦܠܓ ܡܪܝܡܐ ܥܡ̈ܡܐ. ܘܟܕ ܡ̇ܦܪܫ ܒܢܝ̈ܢܫܐ ܐܩܝܡ ܬܚܘܡܐ ܕܥܡ̈ܡܐ. ܠܡܢܝܢܐ ܕܒܢ̈ܝ ܐܝܣܪܐܝܠ

32. Odes 2:9

    ܡܛܠ ܕܦܠܓܘܬܗ ܕܡܪܝܐ ܥܡܗ. ܘܝܥܩܘܒ ܚܒ̈ܠܐ ܕܝܪܬܘܬܗ

33. Odes 2:10

    ܐܫܟܚܗ ܒܐܪܥܐ ܕܡܕܒܪܐ ܘܒܚܘܪܒܐ ܕܐܫܝܡܘܢ. ܐܩ̣ܦܗ ܘܚܒ̇ܒܗ ܘܢ̇ܛܪܗ ܐܝܟ ܒܒܬܐ ܕܥܝܢܐ

34. Odes 2:11

    ܘܐܝܟ ܢܫܪܐ̇ ܕܛܐ̇ܣ ܥܠ ܩܢ̣ܗ. ܘܥܠ ܦܪ̈ܘܓܘܗܝ ܡ̇ܪܚܦ ܦ̇ܪܣ ܓܦܘ̈ܗܝ ܘܡ̇ܩܒܠ ܠܗܘܢ̇ ܘܫ̇ܩܠ ܠܗܘܢ ܥܠ ܥܘܫܢܐ ܕܐܒ̣ܪ̈ܘܗܝ

35. Odes 2:12

    ܡܪܝܐ ܒܠܚܘܕܘܗܝ ܕܒ̇ܪܗ ܘܠܝܬ ܗܘܐ ܥܡܗ ܐܠܗܝ ܢܘܟܪܝ

36. Odes 2:13

    ܐܘܬܒܗ ܥܠ ܥܘܫܢܐ ܕܐܪܥܐ. ܘܐܘܟܠܗ ܥ̈ܠܠܬܐ ܕܚܩܠܐ. ܐܝܢܩܗ ܕܒܫܐ ܡܢ ܟܐܦܐ. ܘܡܫܚܐ ܡܢ ܟܐܦܐ ܕܛܪܢܐ

37. Odes 2:14

    ܚܐܘܬܐ ܕܬܘܪ̈ܐ ܘܚܠܒܐ ܕܥܢܐ. ܥܡ ܬܪܒܐ ܕܡ̈ܦܛܡܐ. ܕܟܪ̈ܐ ܒܢ̈ܝ ܕܝ̈ܨ̣ܐ ܘܓ̈ܕܝܐ. ܥܡ ܬܪܒܐ ܘܫܘܡܢܐ ܕܚ̈ܛܐ ܘܕܡܐ ܕܥ̈ܢܒܐ ܐܫܩܝܗ ܚܡ̣ܪܐ

38. Odes 2:15

    ܫ̣ܡܢ ܐܝܣܪܐܝܠ ܘܒ̣ܥܛ. ܫܡ̣ܢ ܘܬ̣ܩܦ ܘܩ̣ܢܐ ܢܟܣ̈ܐ. ܘܛܥ̣ܐ ܠܐܠܗܐ ܕܥܒ̣ܕܗ ܘܨ̇ܚܝ ܠܬܩܝܦܐ ܕܦܪܩ̣ܗ̇

39. Odes 2:16

    ܐܛܢ̣ܗ ܒܢܘܟܪ̈ܝܐ. ܘܒܕܚ̈ܠܬܐ ܐܪܓ̣ܙܗ

40. Odes 2:17

    ܕܒ̇ܚܘ ܠܫܐ̈ܕܐ ܕܠܐ ܗ̣ܘܘ ܐ̈ܠܗܐ ܐܠܗ̈ܐ ܕܠܐ ܝ̣ܕܥܘ ܐܢܘܢ̇ ܚ̣ܕ̈ܬܐ ܐܢܘܢ ܕܗܫܐ ܐܬ̣ܥܒܕܘ. ܘܠܐ ܕܚ̣ܠܘ ܠܗܘܢ ܐܒܗ̈ܝܟܘܢ

41. Odes 2:18

    ܠܬܩܝܦܐ ܕܝ̣ܠܕܟ ܛܥ̣ܝܬ ܘܐܬ̣ܢܫܝܬ ܠܐܠܗܐ ܕܫܒܚܟ

42. Odes 2:19

    ܘܚ̣ܙܐ ܡܪܝܐ ܘܪܓ̣ܙ. ܥܠ ܕܐܪܓܙܘܗܝ ܒܢܘ̈ܗܝ ܘܒ̈ܢܬܗ

43. Odes 2:20

    ܘܐܡ̣ܪ ܐ̇ܦܢܐ ܐ̈ܦܝ ܡܢܗܘܢ ܘܐ̇ܚܙܐ ܡܢܐ ܗܘܝܐ ܚܪܬܗܘܢ. ܡܛܠ ܕܕܪܐ ܐܢܘܢ ܗܦܝܟܐ. ܒ̈ܢܝܐ ܕܠܝܬ ܒܗܘܢ ܗܝܡܢܘܬܐ

44. Odes 2:21

    ܗܢܘܢ ܐܛܢܘ̣ܢܝ ܒܠܐ ܐܠܗ: ܘܐܪܓܙܘܢܝ ܒܕܚ̈ܠܬܗܘܢ. ܐܦ ܐܢܐ ܐܛ̇ܢ ܐܢܘܢ ܒܠܐ ܥܡܝ. ܘܒܥܡܐ ܣܟܠܐ ܐ̇ܪܓܙ ܐܢܘܢ

45. Odes 2:22

    ܡܛܠ ܕܢܘܪܐ ܩ̇ܕܚܐ ܒܪܘܓܙܝ ܘܡ̇ܘܩܕܐ ܥܕܡܐ ܠܫܝܘܠ ܬܚܬܝܬܐ. ܬܐܟܘܠ ܐܪܥܐ ܘܥ̈ܠܠܬܗ. ܘܬ̇ܘܩܕ ܫܬܐ̈ܣܐ ܕܛܘ̣ܪ̈ܐ

46. Odes 2:23

    ܐ̇ܟܢܫ ܥܠܝܗܘܢ ܒܝܫ̣̈ܬܐ ܘܓܐܪ̈ܝ ܐ̇ܘܟܠ ܒܗܘܢ

47. Odes 2:24

    ܢܬܛ̇ܪܦܘܢ ܠܟܦܢܐ̣ ܘܢܫ̈ܬܠܡܢ ܠܗܘܢ ܪ̈ܘܚܐ ܒܝ̣ܫ̈ܬܐ. ܘܠܛܝܪܐ ܐܫ̣ܠܡ ܐܢܘܢ. ܘܚܝ̈ܘܬ ܫܢܐ ܐ̇ܓܪܐ ܒܗܘܢ ܥܡ ܚܡܬܐ ܕܚܘ̈ܘܬܐ ܕܚ̇ܠܕܝܢ ܒܥܦܪܐ

48. Odes 2:25

    ܡܢ ܠܒܪ ܬܓ̇ܝܙ ܚܪܒܐ ܘܡܢ ܬܘ̈ܘܢܐ ܕܚܠܬܐ. ܐܦ ܓܕܘ̈ܕܐ ܘܒ̈ܬܘܠܬܐ. ܘܛ̈ܠܝܐ ܥܡ ܓܒܪ̈ܐ ܣܒ̈ܐ

49. Odes 2:26

    ܐܡ̇ܪܬ ܕܐܝܟܐ ܐܢܘܢ. ܐ̇ܒܛܠ ܡܢ ܒܢܝ̈ܢܫܐ ܕܘܟܪܢܗܘܢ

50. Odes 2:27

    ܐܠܘ ܠܐ ܪܘܓܙܐ ܕܒܥܠܕܒܒܐ ܕܥ̣ܫܢ. ܕܠܐ ܢܬܬܪܝܡܘܢ ܒ̈ܥܠܕܒܒܝܗܘܢ ܘܢܐ̇ܡܪܘܢ ܕܐ̣ܝܕܢ ܗܘ ܐܬܬ̣ܪܝܡܬ̇ ܘܠܐ ܗܘܐ ܡܪܝܐ ܥ̣ܒܕ ܗܠܝܢ

51. Odes 2:28

    ܡܛܠ ܕܥܡܐ ܗ̣ܘ ܕܐܒ̇ܝܕܐ ܬܪܥܝܬܗ. ܘܠܝܬ ܒܗܘܢ ܣܘܟܠܐ

52. Odes 2:29

    ܐܠܘ ܚܟ̣ܡܘ ܘܐܣ̇ܬܟܠܘ ܒܗܕܐ. ܘܐܬ̇ܒܝܢܘ ܒܚܪܬܗܘܢ

53. Odes 2:30

    ܪܕܦ ܗܘܐ ܚܕ ܠܐܠܦܐ. ܘܬܪ̈ܝܢ ܡ̇ܥܪ̈ܩܝܢ ܗܘܘ ܪܒ̣ܘܬܐ ܐܠܐ ܬܩܝܦܗܘܢ ܐܫ̣ܠܡ ܐܢܘܢ. ܘܡܪܝܐ ܚܒ̣ܫ ܐܢܘܢ

54. Odes 2:31

    ܡܛܠ ܕܠܐ ܗܘܐ ܐܝܟ ܬܘܩܦܢ ܬܘܩܦܗܘܢ ܘܒ̈ܥܠܕܒܒܝܢ ܕܝ̇ܢ̈ܝܢ

55. Odes 2:32

    ܡܛܠ ܕܡܢ ܓܦܬܐ ܕܣܕܘܡ ܓܦܬܗܘܢ. ܘܡܢ ܫܬܠܬܐ ܕܥܡ̇ܘܪܐ. ܥܢܒ̈ܝܗܘܢ ܥܢ̣̈ܒܝܢ ܡܪ̈ܝܪܢ. ܘܣ̈ܓܘܠܝܗܘܢ ܡܪ̈ܪܐ ܠܗܘܢ

56. Odes 2:33

    ܚܡܬܐ ܕܬܢܝܢܐ ܚܡܬܗܘܢ̇ ܘܪܝܫܗ ܕܦܬܢܐ ܒܝ̣ܫܐ

57. Odes 2:34

    ܗܐ ܓ̣ܢܝܙ ܥܡܝ ܘܚܬ̣ܝܡ ܒܐܘܨܪ̈ܐ

58. Odes 2:35

    ܕܝܠܝ ܗܘ ܦܘܪܥܢܐ ܕܐ̇ܦܪܘܥ̇ ܐܢܘܢ ܒܙܒܢܐ ܕܬܡ̣ܘܛ ܪܓܠܗܘܢ. ܡܛܠ ܕܩܪܝܒ ܗܘ ܝܘܡܐ ܕܬܒ̇ܪܗܘܢ. ܘܡܣ̣ܪܗܒ ܡܕܡ ܕܥܬ̇ܝܕ ܠܗܘܢ

59. Odes 2:36

    ܡܛܠ ܕܕܐ̇ܢ ܡܪܝܐ ܠܥܡܗ ܘܒ̣ܥܒ̈ܕܘܗܝ ܡܬܒ̇ܝܐܐ. ܡܛܠ ܕܚ̣ܙܐ ܕܫ̣ܠܛܬ̇ ܐ̣ܝܕܐ. ܘܠܝܬ ܕܥ̇ܕܪ ܘܕܣܡ̇ܟ

60. Odes 2:37

    ܘܐܡ̇ܪܬ. ܐܝܟܐ ܐܢܘܢ ܐܠܗܝ̈ܗܘܢ ܬܩ̈ܝܦܐ ܗ̇ܢܘܢ ܕܬܟܝܠܝܢ ܗܘܘ ܥܠܝܗܘܢ

61. Odes 2:38

    ܕܬܪܒܐ ܕܕܒܚ̈ܝܗܘܢ ܐ̇ܟܠܝܢ ܗܘܘ. ܘܫ̇ܬܝܢ ܗܘܘ ܚܡ̣ܪܐ ܕܢܘܩܝܗܘܢ. ܢܩܘܡܘܢ ܗܫܐ ܘܢܥ̇ܕܪܘܢܟܘܢ ܘܢܗܘܘܢ ܥܠܝܟܘܢ ܡܣܬܪ̈ܢܐ

62. Odes 2:39

    ܚܙܘ ܗܟܝܠ ܕܐܢܐ ܐܢܐ. ܘܠܝܬ ܐܠܗ ܠܒܪ ܡܢܝ. ܐܢܐ ܡܡ̣ܝܬ ܐܢܐ ܘܐܢܐ ܡ̇ܐܚ̣ܐ ܐܢܐ ܐܢܐ ܡ̇ܚܐ ܐܢܐ ܘܐܢܐ ܡܐܣ̇ܐ ܐܢܐ. ܘܠܝܬ ܕܦ̇ܠܛ ܡܢ ܐܝ̈ܕܝ

63. Odes 2:40

    ܡܛܠ ܕܐܪܝܡ̇ܬ ܥܠ ܫܡܝܐ ܐܝܕܝ ܘܐܡ̣̇ܪܬ ܕܚ̇ܝ ܐܢܐ ܠܥܠܡ

64. Odes 2:41

    ܐ̇ܠܛ̣ܘܫ ܫܢܢܗ ܕܣܝܦܝ ܐܝܟ ܒܪܩܐ ܘܬ̣ܐܚܘܕ ܒ̣ܕܝܢܐ ܐܝܕܝ. ܐܗ̣ܦܟ ܦܘܪܥܢܐ ܥܠ ܣ̈ܢܐܝ. ܘܠܒ̈ܥܠܕܒܒܝ ܐܫ̇ܠܡ

65. Odes 2:42

    ܐ̇ܪܘܐ ܓܐܪ̈ܝ ܡܢ ܕܡܐ. ܘܣܝܦܝ ܢܐܟܘܠ ܒܣܪܐ. ܡܢ ܕܡܐ ܕܩܛܝ̈ܠܐ ܘܕܫ̣ܒ̈ܝܐ. ܘܡܢ ܪܝܫ ܬܓܐ ܕܒܥܠܕܒܒܐ

66. Odes 2:43

    ܡܟܝܠ ܫܒܚܘ ܥܡܡ̈ܐ ܥܡܗ. ܡܛܠ ܕܕܡܐ ܕܥ̣ܒ̈ܕܘܗܝ ܡܬ̣ܦܪܥ. ܘܦܘܪܥܢܐ ܡ̇ܗܦܟ ܠܣ̈ܢܐܘܗܝ. ܘܡ̇ܚܣܐ ܥܠ ܐܪܥܗ ܘܥܠ ܥܡܗ

67. Odes 3:0

    ܬܫܒܘܚܬܐ ܕܐܫܥܝܐ.

68. Odes 3:8

    ܬܬܒ̇ܣܡ ܫܡܝܐ ܡܢ ܠܥܠ. ܘܥܢܢ̈ܐ ܢܪ̈ܣ̇ܢ ܙܕܝܩܘܬܐ. ܬܬ̣ܦܬܚ ܐܪܥܐ ܘܢ̣ܣܓܐ ܦܘܪܩܢܐ ܘܙܕܝܩܘܬܐ ܬ̣ܫܘܚ ܐܟܚܕܐ. ܐܢܐ ܐܢܐ ܡܪܝܐ ܕܒ̇ܪܝܬ ܗܠܝܢ

69. Odes 3:10

    ܫܒܚܘ ܠܡܪܝܐ ܬܫܒܘܚܬ̣ܐ ܚ̇ܕܬܐ. ܬܫܒܘܚܬܗ ܡܢ ܣܘ̈ܦܝܗ̇ ܕܐܪܥܐ. ܢ̇ܚ̈ܬܝ ܝܡܐ ܒܡܠܐܗ̇. ܘܓܙܪ̈ܬܐ ܘܕܥܡ̇ܪܝܢ ܒܗܝܢ

70. Odes 3:11

    ܢ̣ܚܕܐ ܡܕܒܪܐ ܘܩܘܪ̈ܝܗ̇. ܘܡܪ̈ܓܐ ܬܗܘܐ ܩ̇ܕܪ. ܘܢܫ̇ܒܚܘܢ ܝ̈ܬܒܝ ܫ̈ܩܝܦܐ. ܘܡܢ ܪܝܫܐ ܕܛܘ̣ܪ̈ܐ ܢ̣ܩܥܘܢ

71. Odes 3:12

    ܘܢܬܠܘܢ ܬܫܒܘܚܬ̣ܐ ܠܡܪܝܐ. ܘܬܫܒ̈ܚܬܗ ܢܚ̇ܘܘܢ ܒܓܙܪ̈ܬܐ

72. Odes 3:13

    ܡܪܝܐ ܐܝܟ ܓܢܒܪܐ ܢܦܘܩ ܘܐܝܟ ܓܒܪܐ ܩܪܒܬܢܐ ܢܓ̇ܪܓ ܛܢ̣ܢܐ ܢ̣ܩܥܐ ܘܢܬ̇ܓܒܪ ܘܢܩܛܘܠ ܠܒܥܠܕܒ̈ܒܘܗܝ

73. Odes 4:0

    ܬܫܒܘܚܬܐ ܕܚܢܐ.

74. Odes 4:1

    ܥܫܢ ܠܒܝ ܒܡܪܝܐ ܘܐܬܬܪܝܡܬ ܩܪܢܝ ܒܐܠܗܐ ܦܪܘܩܝ. ܐܬܦܬܚ ܦܘܡܝ ܥܠ ܒ̈ܥܠܕܒܒܝ ܡܛܠ ܕܚܕܝܬܢܝ ܒܦܘܪܩܢܟ

75. Odes 4:2

    ܠܝܬ ܕܩܕܝܫ ܐܝܟ ܡܪܝܐ. ܘܠܝܬ ܕܬܩܝܦ ܐܝܟ ܐܠܗܢ. ܡܛܠ ܕܠܝܬ ܠܒܪ ܡܢܗ

76. Odes 4:3

    ܠܐ ܬܣܓܘܢ ܠܡܡܠܠܘ ܪ̈ܘܪܒܬܐ. ܘܠܐ ܢܦܘܩ ܛܠܘܡܝܐ ܡܢ ܦܘܡܟܘܢ̇ ܡܛܠ ܕܝܕܥܬܐ ܗܘ ܡܪܝܐ. ܘܠܐ ܬ̈ܩܢܢ ܨ̈ܢܥܬܐ ܩܕܡܘܗܝ

77. Odes 4:4

    ܩܫ̈ܬܬܐ ܕܓܢܒܪ̈ܐ ܢܬܬܒܪ̈ܢ. ܘܟܪ̈ܝܗܐ ܐܬܥܫܢܘ ܒܚܝܠܐ

78. Odes 4:5

    ܘܣ̈ܒܥܐ ܒܠܚܡܐ ܐܬܐܓܪܘ. ܘܟ̈ܦܢܐ ܐܘܬܪܘ. ܥܩܪܬܐ ܝܠܕܬ ܘܣܒܥܬ. ܘܣܓܝܐܬ ܒ̈ܢܝܐ ܨܕܝܬ

79. Odes 4:6

    ܡܪܝܐ ܡܡܝܬ ܘܡܐܚܐ. ܡܚܬ ܠܫܝܘܠ ܘܡܣܩ

80. Odes 4:7

    ܡܪܝܐ ܡ̣ܡܣܟܢ ܘܡܥܬܪ ܘܡܫܦܠ ܐܦ ܡܪܝܡ

81. Odes 4:8

    ܡܪܝܡ ܡܢ ܥܦܪܐ ܠܡܣܟܢܐ. ܘܡܢ ܩܩܠܬܐ ܡܩܝܡ ܠܗ ܠܒܝ̇ܫܐ. ܠܡܘܬܒܘܬܗܘܢ ܥܡ ܪ̈ܘܪܒܢܐ ܕܥܡܐ ܘܟܘܪܣܝܐ ܕܐܝܩܪܐ ܢܘܪܬ ܐܢܘܢ̇

82. Odes 4:9

    ܫܡܥ ܨܠܘܬܐ ܕܟܠ ܕܡܨ̇ܠܐ ܠܗ.ܘܡܒܪܟ ܫܢܝ̈ܗܘܢ ܕܙܕܝ̈ܩܐ. ܡܛܠ ܕܠܐ ܗܘܐ ܒܚܝܠܗ ܡܬܓܒܪ ܓܢܒܪܐ

83. Odes 4:10

    ܡܪܝܐ ܢܬܒܘܪ ܠܡܡܪ̈ܡܪܢܘܗܝ ܘܥܠܝܗܘܢ ܒܫܡܝܐ ܢܪܥܡ. ܠܐ ܢܫܬܒܗܪ ܚܟܝܡܐ ܒܚܟܡܬܗ. ܘܠܐ ܢܫܬܒܗܪ ܓܢܒܪܐ ܒܓܢܒܪܘܬܗ. ܘܠܐ ܢܫܬܒܗܪ ܥܬܝܪܐ ܒܥܘܬܪܗ. ܐܠܐ ܒܗܕܐ ܢܫܬܒܗܪ ܡ̇ܢ ܕܡܫܬܒܗܪ ܡ̇ܢ ܕܡܣܬܟܠ ܘܝܕܥ ܠܝ ܕܐܢܐ ܐܢܐ ܡܪܝܐ. ܥ̇ܒܕ ܛܝܒܘܬܐ ܘܙܕܝܩܘܬܐ ܘܕܝ̣ܢܐ ܒܐܪܥܐ. ܡܪܝܐ ܢܕܘܢ ܥܒܪ̈ܝܗ̇ ܕܐܪܥܐ. ܘܢܬܠ ܥܘܫܢܐ ܠܡ̈ܠܟܝܗ̇ ܘܢܪܝܡ ܩܪܢܐ ܕܡܫܝܚܗ.

84. Odes 5:0

    ܬܫܒܘܚܬܐ ܕܚܒܩܘܩ.

85. Odes 5:2

    ܡܪܝܐ ܫܡܥܬ ܫܡܥܟ ܘܕܚܠܬ. ܡܪܝܐ ܚܙܝܬ ܥܒ̈ܕܝܟ ܘܬܗܪܬ. ܒܝܢܬ ܬܪ̈ܬܝܢ ܚܝ̈ܘܢ ܬܬܝܕܥ. ܒܓܘ ܫ̈ܢܝܐ ܬܬܚܘܐ. ܘܡܐ ܕܩܪܒ̇ ܙܒܢܐ ܬܬܓܠܐ . ܒܪܘܓܙܐ ܪ̈ܚܡܝܟ ܐܬܕܟܪ

86. Odes 5:3

    ܐܠܗܐ ܡܢ ܬܝܡܢܐ ܐܬܐ. ܘܩܕܝܫܐ ܡܢ ܛܘܪܐ ܕܦܪܢ. ܐܬܟܣܝܘ ܫܡܝܐ ܡܢ ܙܝܘܗ ܕܡܫܒܚܐ. ܘܬܫܒܘܚܬܗ ܐܬܡܠܝܬ ܐܪܥܐ

87. Odes 5:4

    ܙܗܪܗ ܐܝܟ ܢܘܗܪܐ ܢܗܘܐ. ܒܩܪܝܬܐ ܕܐܝ̈ܕܘܗܝ ܢܣܝܡ ܥܘܫܢܗ ܒܠܩܚܐ

88. Odes 5:5

    ܩܕܡܘܗܝ ܬܐܙܠ ܡܠܬܐ. ܘܬܦܘܩ ܡܪܕܘܬܐ ܥܡ ܪ̈ܓܠܘܗܝ

89. Odes 5:6

    ܩܡ ܘܙܥܬ ܐܪܥܐ. ܚܪܘ ܘܐܬܦܫܪܘ ܥܡܡ̈ܐ ܘܐܬܦܫܪܘ ܛܘܪ̈ܐ ܕܡܢ ܥܠܡ ܘܐܬܡܟܟܘ ܪ̈ܡܬܐ ܕܡܢ ܥܠܡܝܢ. ܕܝܠܗ ܐ̈ܢܝܢ ܗ̈ܠܟܬܐ ܕܡܢ ܥܠܡ

90. Odes 5:7

    ܡܫ̈ܟܢܐ ܕܟܘܫ̈ܝܐ ܢܬܡܬܚܘܢ̇ ܘܢ̈ܙܘܥܢ ܝܪ̈ܝܥܬܐ ܕܡܕܝܢ

91. Odes 5:8

    ܥܠ ܢܗܪ̈ܘܬܐ ܪܓܙܬ ܡܪܝܐ ܒܢܗܪ̈ܘܬܐ ܪܘܓܙܟ ܘܒܝܡܐ ܚܐܦܟ. ܪܟܒܬ ܥܠ ܪܟܫܐ ܘܥܠ ܡܪܟܒܬܐ ܕܦܘܪܩܢܐ

92. Odes 5:9

    ܡܬܡܬܚܘ ܬܬܡܬܚ ܩܫܬܟ ܡܪܝܐ ܥܠ ܫܘܠܛܢܐ ܕܡܠܟܘ̈ܬܐ. ܐܪܥܐ ܒܢܗܪ̈ܘܬܐ ܬܬܚܪܬ

93. Odes 5:10

    ܢܚܙܘܢܗ̇ ܥܡ̈ܡܐ ܘܢܚܒܠܘܢ ܐܝܟ ܝܠܕܬܐ. ܐܪܝܡ ܬܗܘܡܐ ܩܠܗ ܘܪܘܡܐ ܕܐܝ̈ܕܘܗܝ ܫܩܠ

94. Odes 5:11

    ܫܡܫܐ ܘܣܗܪܐ ܩܡܘ ܒܡܕܝܪ̈ܝܗܘܢ. ܒܢܘܗܪܐ ܕܓܐܪ̈ܝܟ ܡܗ̇ܠܟܝܢ. ܘܒܙܗܪܐ ܕܒܪ̈ܩܐ ܕܢܝܙܟ̈ܝܟ

95. Odes 5:12

    ܒܚܡܬܟ ܬܕܪܘܟ ܥܠ ܐܪܥܐ. ܘܒܪܘܓܙܟ ܬܕܘܫ ܥܡ̈ܡܐ

96. Odes 5:13

    ܢܦܩܬ ܠܡܦܪܩ ܠܥܡܟ ܘܠܡܦܪܩ ܠܡܫܝܚܟ. ܦܣܩܬ ܪܝܫܐ ܡܢ ܒܝܬܗ ܕܥܘܠܐ. ܘܐܫܠܚܬܝܗܝ ܡܢ ܫ̈ܬܐܣܘܗܝ ܘܥܕܡܐ ܠܨܘܪܗ ܠܥܠܡܝܢ

97. Odes 5:14

    ܦܚܬܬ ܒܚܘܛܪܐ ܪܝܫܐ ܕܫܠܝܛܢ̈ܘܗܝ. ܕܐܬܬܟܠܘ ܒܫܝܚܢܘܬܗܘܢ̇ ܕܢܐܟܠܘܢ ܒܛܘܫܝܐ ܠܡܣܟܢܐ

98. Odes 5:15

    ܕܪܟܬ ܒܝܡܐ ܥܠ ܪܟܫܐ ܘܟܢܫܐ ܕܡ̈ܝܐ ܣܓܝ̈ܐܐ

99. Odes 5:16

    ܫܡܥܬ ܘܙܥܬ ܟܪܣܝ. ܠܘܩܒܠ ܡܡܠܠܐ ܕܣ̈ܦܘܬܝ. ܥܠ ܪܬܝܬܐ ܒܓܪ̈ܡܝ. ܘܒܘܪ̈ܟܝ ܙܥܝ. ܕܒܕܩ ܠܝ ܘܚܘܝܢܝ ܝܘܡܐ ܕܐܘܠܨܢܐ ܕܐ̇ܬܐ ܥܠ ܥܡܐ

100. Odes 5:17

     ܡܛܠ ܕܬܬܐ ܠܐ ܐܦܪܥܬ. ܘܠܝܬ ܛܪ̈ܦܐ ܒܓܘܦܢܐ. ܟܕܒ ܐܒܗ ܕܙܝܬܐ. ܘܐܕܪ̈ܐ ܠܐ ܥܒܕܘ ܥܒܘܪܐ. ܓܡܪܬ ܥܢܐ ܡܢ ܓܙܪܐ. ܘܠܝܬ ܬܘܪ̈ܐ ܒܒܩܪ̈ܐ

Next → — showing 1–100 of 209

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.