← All works

Peshitta Nehemia

Peshitta (Syriac Old Testament) · 405 sections

1. Nehemia 8:5

   ܘܦܬ̣ܚ ܥܙܪܐ ܣ̇ܦܪܐ ܟܬܒܐ ܕܢܡܘܣܐ ܠܥܝܢ ܟܠܗ ܥܡܐ ܡܛܠ ܕܪܡ ܗܘܐ ܡܢ ܟܠܗ ܥܡܐ ܘܟܕ ܦܬ̣ܚ ܩܡ ܟܠܗ ܥܡܐ

2. Nehemia 8:6

   ܘܒ̇ܪܟ ܥܙܪܐ ܠܡܪܝܐ ܐܠܗܐ ܪܒܐ ܘܥܢܘ ܟܠܗ ܥܡܐ ܘܐܡܪܝܢ ܐܡܝܢ ܘܐܡܝܢ ܘܟܕ ܐܪܝܡܘ ܐܝܕܝ̈ܗܘܢ ܩܥ̣ܕܘ ܘܣܓ̣ܕܘ ܩܕܡ ܡܪܝܐ ܥܠ ܐܦܝ̈ܗܘܢ ܥܕܡܐ ܠܐܪܥܐ

3. Nehemia 8:7

   ܘܝܫܘܥ ܘܒܢ̈ܘܗܝ ܘܣܪܒܝܐ ܘܝܡܝܢ ܘܥܩܘܦ ܘܫܒܬܝ ܘܗܘܕܝܐ ܘܡܥܣܝܐ ܘܩܠܛܝܐ ܘܥܙܪܝܐ ܘܝܘܙܒܪ ܘܚܢܢܝ ܘܦܢܝܐ ܘܠܘܝ̈ܐ ܕܡܫܡܫܝܢ ܠܥܡܐ ܒܢܡܘܣܐ ܘܥܡܐ ܩܝܡܝܢ ܥܠ ܕܘܟܬܗܘܢ

4. Nehemia 8:8

   ܘܩܪܘ ܒܟܬܒܐ ܕܢܡܘܣܐ ܕܡܪܝܐ ܟܕ ܦܪܝܣ ܘܐܬܛܦܝܣܘ ܒܗ ܘܐܣܬܟܠܘ ܒܩܪܝܢܗ

5. Nehemia 8:9

   ܘܐܡ̣ܪ ܢܚܡܝܐ ܪܝܫܐ ܕܟܘܡܪ̈ܐ ܘܥܙܪܐ ܟܘܡܪܐ ܣ̇ܦܪܐ ܘܠܘܝ̈ܐ ܐܝܠܝܢ ܕܡܫܡܫܝܢ ܗܘܘ ܠܥܡܐ ܘܐܡܪܝܢ ܠܟܘܠܗ ܥܡܐ ܝܘܡܢܐ ܩܕܝܫ ܗܘ ܩܕܡ ܡܪܝܐ ܐܠܗܟܘܢ ܠܐ ܬܟܪܐ ܠܟܘܢ ܘܠܐ ܬܒܟܘܢ ܡܛܠ ܕܒܟܝܢ ܗܘܘ ܓܝܪ ܟܘܠܗ ܥܡܐ ܟܕ ܫܡܥܝܢ ܗܘܘ ܟܬܒܐ ܕܢܡܘܣܐ

6. Nehemia 8:10

   ܘܐܡ̣ܪ ܠܗܘܢ ܙܠܘ ܐܟܘܠܘ ܘܐܫܬܘ ܘܫܕܪܘ ܡܐܟܘܠܬܐ ܠܡ̇ܢ ܕܠܐ ܡܛܝܒ ܠܗ ܡܛܘܠ ܕܩܕܝܫ ܗܘ ܝܘܡܢܐ ܩܕܡ ܡܪܝܐ ܠܐ ܬܟܪܐ ܠܟܘܢ ܡܛܠ ܕܝܘܡܐ ܗܘ ܕܚܕܘܬܐ ܕܡܪܝܐ ܘܗܘ ܢܗܘܐ ܥܕܘܪܟܘܢ

7. Nehemia 8:11

   ܘܠܘܝ̈ܐ ܡܫܬܩܝܢ ܠܟܠܗ ܥܡܐ ܘܐܡܪܝܢ ܫܬܘܩܘ ܡܛܠ ܕܝܘܡܢܐ ܡܩܕܫ ܗܘ ܘܠܐ ܬܒܟܘܢ

8. Nehemia 8:12

   ܘܐܙܠܘ ܟܘܠܗ ܥܡܐ ܠܡܐܟܠ ܘܠܡܫܬܐ ܘܠܡܫܕܪܘ ܡܐܟܘܠܬܐ ܘܠܡܥܒܕ ܚܕܘܬܐ ܪܒܬܐ ܘܐܬܛܦܝܣܘ ܒܡ̈ܠܐ ܐܝܠܝܢ ܕܐܘܕܥܘ ܐܢܘܢ

9. Nehemia 8:13

   ܘܒܝܘܡܐ ܕܬܪܝܢ ܐܬܟܢܫܘ ܪ̈ܝܫܝ ܐܒܗ̈ܬܐ ܕܟܘܠܗ ܥܡܐ ܘܟܘܡܪ̈ܐ ܘܠܘܝ̈ܐ ܠܘܬ ܥܙܪܐ ܣ̇ܦܪܐ ܠܡܬܛܦܣܘ ܡܢܗ ܥܠ ܟܬܒܐ ܕܢܡܘܣܐ

10. Nehemia 8:14

    ܐܫܟܚܘ ܒܟܬܒܐ ܕܢܡܘܣܐ ܕܦ̇ܩܕ ܡܪܝܐ ܠܡܘܫܐ ܕܢܬܒܘܢ ܒܢ̈ܝ ܐܝܣܪܐܝܠ ܒܡ̈ܛܠܐ ܒܥܐܕܐ ܒܝܪܚܐ ܕܬܫܪܝ

11. Nehemia 8:15

    ܘܕܢܫܡܥܘܢ ܐܩܪܝܘ ܟܪ̈ܘܙܐ ܒܟܠܗܝܢ ܩܘܪ̈ܝܗܘܢ ܘܒܐܘܪܫܠܡ ܘܐܡܪܝܢ ܣܩܘ ܠܛܘܪܐ ܐܝܬܘ ܩܝ̈ܣܐ ܕܙܝ̈ܬܐ ܘܩܝ̈ܣܐ ܕܓܘܙܐ ܘܛܪ̈ܦܐ ܕܕܩ̈ܠܐ ܘܛܪ̈ܦܐ ܕܐܛܪܘܓܐ ܘܣܘ̈ܟܐ ܕܥܪ̈ܒܐ ܘܥܒ̣ܕܘ ܡ̈ܛܠܠܐ ܐܝܟܢܐ ܕܟܬܝܒ ܒܟܬܒܐ ܕܢܡܘܣܐ ܕܡܘܫܐ

12. Nehemia 8:16

    ܘܢܦ̣ܩܘ ܥܡܐ ܘܐܝܬܝܘ ܘܥܒ̣ܕܘ ܠܗܘܢ ܡ̈ܛܠܐ ܓܒܪ ܥܠ ܐܓܪܗ ܘܒܕܪ̈ܝܗܘܢ ܘܒܕܪܬܐ ܕܒܝܬܗ ܕܡܪܝܐ ܘܒܫܘܩܐ ܕܬܪܥܐ ܕܡܝ̈ܐ ܘܒܫܘܩܐ ܕܬܪܥܐ ܕܐܦܪܝܡ

13. Nehemia 8:17

    ܘܥܒܕܘ ܟܠܗ ܥܡܐ ܕܗܦܟܘ ܡܢ ܫܒܝܐ ܡ̈ܛܠܐ ܘܝ̣ܬܒܘ ܒܡ̈ܛܠܐ ܡܛܠ ܕܠܐ ܥ̣ܒܕܘ ܒܢ̈ܝ ܐܝܣܪܝܠ ܗܟܢܐ ܡܢ ܝܘܡ̈ܬܗ ܕܝܫܘܥ ܒܪܢܘܢ ܥܕܡܐ ܠܗ ܠܝܘܡܐ ܗܢܐ ܘܗܘܬ ܚܕܘܬܐ ܪܒܬܐ ܕܛܒ

14. Nehemia 8:18

    ܘܩ̇ܪܝܢ ܗܘܘ ܒܟܬܒܐ ܕܢܡܘܣܗ ܕܡܪܝܐ ܟܘܠ ܝܘܡ ܒܝܘܡ ܡܢ ܝܘܡܐ ܩܕܡܝܐ ܥܕܡܐ ܠܝܘܡܐ ܐܚܪܝܐ ܘܥ̣ܒܕܘ ܥܐܕܐ ܫܒܥܐ ܝܘܡ̈ܝܢ ܘܒܝܘܡܐ ܕܬܡܢܝܐ ܐܬܟܢܫܘ ܐܝܟܢܐ ܕܟܬܝܒ ܠܗܘܢ

15. Nehemia 9:1

    ܘܒܝܘܡܐ ܕܐܪܒܥܐ ܘܥܣܪܝܢ ܒܗ ܒܝܪܚܐ ܗܢܐ ܐܬܟܢܫܘ ܒܢ̈ܝ ܐܝܣܪܝܠ ܒܨܘܡܐ ܘܒܣ̈ܩܐ ܘܐܪܡܝܘ ܩܛܡܐ ܥܠܝܗܘܢ

16. Nehemia 9:2

    ܘܐܬܦܪܫ ܙܪܥܐ ܕܐܝܣܪܝܠ ܡܢ ܟܘܠܗܘܢ ܥܡ̈ܡܐ ܘܩܡܘ ܘܐܘܕܝܘ ܥܠ ܚܛܗܝ̈ܗܘܢ ܘܥܠ ܚܛܗ̈ܐ ܕܐܒܗܝ̈ܗܘܢ

17. Nehemia 9:3

    ܘܩܡܘ ܥܠ ܕܘܟܬܗܘܢ ܘܩ̇ܪܝܢ ܗܘܘ ܒܟܬܒܐ ܕܢܡܘܣܐ ܕܡܪܝܐ ܐܠܗܗܘܢ ܪܘܒܥܗ ܕܝܘܡܐ ܩܪܝܢ ܘܪܘܒܥܗ ܕܝܘܡܐ ܡܘܕܝܢ ܘܣ̇ܓܕܝܢ ܩܕܡ ܡܪܝܐ ܐܠܗܗܘܢ

18. Nehemia 9:4

    ܘܩܡܘ ܪܫܐ ܥܠ ܠܘܝ̈ܐ ܝܫܘܥ ܘܩܕܡܐܝܠ ܒܢ̈ܝ ܚܫܒܝܐ ܘܫܪܒܝܐ ܒܢ̈ܝ ܟܒܢܝ ܘܨ̇ܠܝܘ ܩܕܡ ܡܪܝܐ ܐܠܗܗܘܢ ܒܩܠܐ ܪܡܐ

19. Nehemia 9:5

    ܘܐܡܪܝܢ ܠܘܝ̈ܐ ܝܫܘܥ ܘܩܕܡܐܝܠ ܒܢ̈ܝ ܚܫܒܝܐ ܘܫܪܒܝܐ ܘܗܘܕܝܐ ܘܫܟܢܝܐ ܘܦܬܚܝܐ ܩܡܘ ܘܒ̇ܪܟܘ ܠܡܪܝܐ ܐܠܗܗܘܢ ܡܢ ܥܠܡ ܘܥܕܡܐ ܠܥܠܡ ܘܒܪܝܟ ܫܡܐ ܕܐܝܩܪܗ ܘܡܪܡܪܡ ܥܠ ܟܘܠ ܒܪ̈ܝܬܐ ܘܬܫܒ̈ܚܬܐ

20. Nehemia 9:6

    ܐܢܬ ܗܘ ܡܪܝܐ ܒܠܚܘܕܝܟ ܐܢܬ ܥܒܕ̣ܬ ܫܡܝܐ ܘܫܡܝ̈ ܫܡܝܐ ܘܟܠ ܚܝܠܘ̈ܬܗܘܢ ܘܐܪܥܐ ܘܟܘܠ ܡܕܡ ܕܐܝܬ ܥܠܝܗ̇ ܘܡܝ̈ܐ ܘܟܠ ܡܕܡ ܕܐܝܬ ܒܗܘܢ ܘܐܢܬ ܗܘ ܕܡܚܐ ܠܟܠܗܘܢ ܘܚܝ̈ܠܘܬܐ ܕܫܡܝܐ ܠܟ ܗܘ ܣ̇ܓܕܝܢ

21. Nehemia 9:7

    ܐܢܬ ܗܘ ܡܪܝܐ ܐܠܗܐ ܕܓܒܝ̣ܬ ܠܐܒܪܡ ܘܐܦܩܬܝܗܝ ܡܢ ܐܘܪ ܕܟܠܕܝ̈ܐ ܘܫܚܠܦ̣ܬ ܫܡܗ ܐܒܪܗܡ

22. Nehemia 9:8

    ܘܐܫܟܚ̣ܬ ܠܒܗ ܕܟܐ ܩܕܡܝܟ ܘܝܡܝ̣ܬ ܠܗ ܡܘܡ̈ܬܐ ܠܡܬܠ ܠܗ ܐܪܥܐ ܕܟܢܥܢܝ̈ܐ ܘܕܚ̈ܬܝܐ ܘܕܐܡܘܪ̈ܝܐ ܘܕܦܪ̈ܙܝܐ ܘܕܚܘܝ̈ܐ ܘܕܝܒܘܣܝ̈ܐ ܘܕܓܪ̈ܓܘܣܝܐ ܠܡܬܠ ܠܙܪܥܗ ܘܐܫܪܬ ܡ̈ܠܝܟ ܥܡܗ ܡܛܠ ܕܙܕܝܩ ܐܢܬ

23. Nehemia 9:9

    ܘܚܙܝ̣ܬ ܫܘܥܒܕܐ ܕܐܒ̈ܗܝܢ ܕܒܡܨܪܝܢ ܘܫܡܥ̣ܬ ܝܠܠܬܗܘܢ ܥܠ ܝܡܐ ܕܣܘܦ

24. Nehemia 9:10

    ܘܥܒܕ̣ܬ ܐܬܘ̈ܬܐ ܘܬܕܡܪ̈ܬܐ ܒܦܪܥܘܢ ܘܒܟܠܗ ܚܝܠܗ ܘܒܟܠܗ ܥܡܐ ܕܐܪܥܗ ܡܛܠ ܕܝܕܥ̣ܬ ܕܐܥܠܝܘ ܒܗܘܢ ܒܥܡܟ ܘܥܒܕ̣ܬ ܠܟ ܫܡܐ ܐܝܟ ܕܝܘܡܢܐ

25. Nehemia 9:11

    ܘܝܡܐ ܬܪܥ̣ܬ ܩܕܡܝܗܘܢ ܘܥܒܪܘ ܒܓܘ ܝܡܐ ܒܝܒܫܐ ܘܠܪ̈ܕܘܦܝܗܘܢ ܛܒܥ̣ܬ ܒܥܘܡ̈ܩܘܗܝ ܕܝܡܐ ܐܝܟ ܕܛܒܥܐ ܟܐܦܐ ܒܡܝ̈ܐ ܥܫܝ̈ܢܐ

26. Nehemia 9:12

    ܘܒܥܡܘܕܐ ܕܥܢܢܐ ܕܒܪ̣ܬ ܐܢܘܢ ܒܐܝܡܡܐ ܘܒܐܣܛܘܢܐ ܕܢܘܪܐ ܒܠܠܝܐ ܠܡܢܗܪܘ ܠܗܘܢ ܐܘܪܚܐ ܠܡܗܠܟܘ ܒܗ̇

27. Nehemia 9:13

    ܘܥܠ ܛܘܪܐ ܕܣܝܢܝ ܢܚܬ̣ܬ ܘܡܠܠ̣ܬ ܥܡܗܘܢ ܡܢ ܫܡܝܐ ܘܝܗܒ̣ܬ ܠܗܘܢ ܕܝ̣̈ܢܐ ܬܪ̈ܝܨܐ ܘܢܡ̈ܘܣܐ ܕܫܪܪܐ ܘܩܝ̈ܡܐ ܘܦܘܩ̈ܕܢܐ ܕܛܒܝܢ

28. Nehemia 9:14

    ܘܫܒܬܐ ܕܩܘܕܫܟ ܐܘܕܥ̣ܬ ܐܢܘܢ ܘܦܘܩ̈ܕܢܐ ܘܩܝ̈ܡܐ ܘܢܡ̈ܘܣܐ ܕܦܩܕ̣ܬ ܐܢܘܢ ܒܐܝܕܐ ܕܡܘܫܐ ܥܒ̣ܕܟ

29. Nehemia 9:15

    ܠܚܡܐ ܡܢ ܫܡܝܐ ܝܗܒ̣ܬ ܠܗܘܢ ܠܟܦܢܗܘܢ ܘܡܝ̈ܐ ܡܢ ܟܐܦܐ ܝܗܒ̣ܬ ܠܗܘܢ ܠܨܗܝܗܘܢ ܘܐܡܪ̣ܬ ܠܗܘܢ ܠܡܥܠ ܘܠܡܐܪܬ ܐܪܥܐ ܕܐܬܩܢܬ ܐܝܕܟ ܠܡܬܠ ܠܗܘܢ

30. Nehemia 9:16

    ܗ̣ܢܘܢ ܕܝܢ ܘܐܒܗܝ̈ܗܘܢ ܐܥܠܝܘ ܘܩܫܝܘ ܩܕܠܗܘܢ ܘܠܐ ܫ̣ܡܥܘ ܠܦܘܩ̈ܕܢܝܟ

31. Nehemia 9:17

    ܘܠܐ ܨܒܘ ܠܡܫܡܥ ܘܠܐ ܐܬܕܟܪܘ ܬܕܡܪ̈ܬܟ ܕܥܒܕ̣ܬ ܠܗܘܢ ܘܗ̣ܦܟ ܠܒܗܘܢ ܠܥܒ̇ܕܝ̈ܗܘܢ ܒܝ̈ܫܐ ܘܐܢܬ ܐܠܗܐ ܫܒܘܩܐ ܘܪܚܡܬܢܐ ܘܚܢܢܐ ܪܚܝܩ ܪܘܓܙܐ ܘܩܪܝܒ ܒܥܘܬܐ ܠܐ ܫܒܩ̣ܬ ܐܢܘܢ

32. Nehemia 9:18

    ܡܛܠ ܕܗܢܘܢ ܥ̣ܒܕܘ ܥܓܠܐ ܕܢܣܟܬܐ ܘܐܡܪܝܢ ܗܢܘ ܐܠܗܟ ܐܝܣܪܝܠ ܕܐܣܩܟ ܡܢ ܐܪܥܐ ܕܡܨܪܝܢ ܘܥ̣ܒܕܘ ܒܝ̈ܫܬܐ ܪ̈ܘܪܒܬܐ

33. Nehemia 9:19

    ܘܐܢܬ ܒܪ̈ܚܡܝܟ ܣܓܝ̈ܐܐ ܠܐ ܫܒܩ̣ܬ ܐܢܘܢ ܒܡܕܒܪܐ ܘܥܡܘܕܐ ܕܥܢܢܐ ܠܐ ܥ̣ܒܪ ܡܢܗܘܢ ܒܐܝܡܡܐ ܠܡܕܒܪܘ ܐܢܘܢ ܒܐܘܪܚܐ ܘܐܣܛܘܢܐ ܕܢܘܪܐ ܒܠܠܝܐ ܠܡܢܗܪܘ ܠܗܘܢ ܐܘܪܚܐ ܕܢܐܙܠܘܢ ܒܗ̇

34. Nehemia 9:20

    ܘܪܘܚܟ ܛܒܬܐ ܝܗܒ̣ܬ ܠܡܠܦܘ ܐܢܘܢ ܘܡܢܢܐ ܠܐ ܟܠܝ̣ܬ ܡܢ ܦܘܡܗܘܢ ܘܡܝ̈ܐ ܝܗܒ̣ܬ ܠܗܘܢ ܠܨܗܝܗܘܢ

35. Nehemia 9:21

    ܘܐܪܒܥܝܢ ܫܢ̈ܝܢ ܡܕܡ ܠܐ ܚܣܪ̣ܬ ܠܗܘܢ ܒܡܕܒܪܐ ܢܚܬܝ̈ܗܘܢ ܠܐ ܒܠܝܘ ܘܡܣܢܝ̈ܗܘܢ ܠܐ ܐܬܒܙܥܘ

36. Nehemia 9:22

    ܘܝܗܒ̣ܬ ܠܗܘܢ ܡܠܟܘ̈ܬܐ ܕܥܡܡ̈ܐ ܘܦܠܓ̣ܬ ܠܗܘܢ ܠܪܝܫ ܐܢܫ ܘܝܪܬܘ ܐܪܥܐ ܕܣܝܚܘܢ ܐܪܥܐ ܕܡ̇ܠܟܐ ܕܚܫܒܘܢ ܘܐܪܥܐ ܕܥ̣ܘܓ ܡܠܟܐ ܕܒܝܫܘܢ

37. Nehemia 9:23

    ܘܒܢܝ̈ܗܘܢ ܐܣܓܝ̣ܬ ܐܝܟ ܟܘܟܒ̈ܐ ܕܒܫܡܝܐ ܘܐܥܠ̣ܬ ܐܢܘܢ ܠܐܪܥܐ ܕܐܡ̣ܪܬ ܠܐܒܗܝ̈ܗܘܢ ܠܡܥܠ ܠܗ̇ ܠܡܐܪܬܗ̇

38. Nehemia 9:24

    ܘܥܠܘ ܒܢܝ̈ܐ ܘܝܪܬܘ ܐܪܥܐ ܘܬܒܪ̣ܬ ܩܕܡܝܗܘܢ ܥܡܘܪ̈ܝܗ̇ ܕܐܪܥܐ ܕܟܢܥܢܝ̈ܐ ܘܐܫܠܡ̣ܬ ܐܢܘܢ ܒܐܝܕܝ̈ܗܘܢ ܠܗܘܢ ܘܠܡ̈ܠܟܝܗܘܢ ܘܠܥܡ̈ܡܐ ܕܐܪܥܐ ܠܡܥܒܕ ܒܗܘܢ ܐܝܟ ܨܒܝܢܗܘܢ

39. Nehemia 9:25

    ܘܐܚܕܘ ܩܘܪ̈ܝܐ ܬܩܝ̈ܦܬܐ ܘܐܪܥܐ ܫܡܝܢܬܐ ܘܝܪܬܘ ܒ̈ܬܐ ܕܡ̣ܠܝܢ ܟܘܠܗܝܢ ܛܒ̈ܬܐ ܘܓܘ̈ܒܐ ܚܦܝܪ̈ܐ ܘܟܪ̈ܡܐ ܘܙܝ̈ܬܐ ܘܐܝ̈ܠܢܐ ܕܡܐܟ̈ܠܬܐ ܣܓܝ̈ܐܬܐ ܘܐ̣ܟܠܘ ܘܣ̣ܒܥܘ ܘܫ̣ܡܢܘ ܘܐܬܦܢܩܘ ܒܛܘܒܟ ܪܒܐ

40. Nehemia 9:26

    ܘܗ̣ܦܟܘ ܘܕܓܠܘ ܒܟ ܘܫܕܐܘܗܝ ܠܢܡܘܣܟ ܠܒܪ ܡܢ ܬܪ̈ܥܝܬܗܘܢ ܘܠܢܒ̈ܝܝܟ ܩ̇ܛܠܘ ܥܠ ܕܐܡܪܘ ܠܗܘܢ ܠܡܗܦܟ ܠܘܬܟ ܘܥ̣ܒܕܘ ܒܝ̈ܫܬܐ ܪ̈ܘܪܒܬܐ

41. Nehemia 9:27

    ܘܐܫܠܡ̣ܬ ܐܢܘܢ ܒܐܝܕ ܒܥܠܕܒܒܝ̈ܗܘܢ ܘܐܥܝܩܘ ܠܗܘܢ ܘܒܥܕܢܐ ܕܐܘܠܨܢܐ ܒܥܘ ܡܢܟ ܘܫܡܥ̣ܬ ܐܢܘܢ ܡܢ ܫܡܝܐ ܐܝܟ ܪ̈ܚܡܝܟ ܣܓܝ̈ܐܐ ܘܐܩܝܡ̣ܬ ܠܗܘܢ ܦܪ̈ܘܩܐ ܘܦܪܩܘ ܐܢܘܢ ܡܢ ܐܝܕܐ ܕܐܠܘܨܝ̈ܗܘܢ

42. Nehemia 9:28

    ܘܟܕ ܐܪܘܚ̣ܬ ܠܗܘܢ ܗ̣ܦܟܘ ܠܡܥܒܕ ܕܣ̣ܢܐ ܩܕܡܝܟ ܘܫܒܩ̣ܬ ܐܢܘܢ ܒܐܝܕ ܒܥܠܕܒܒܝ̈ܗܘܢ ܘܫܥܒܕܘ ܐܢܘܢ ܘܗ̣ܦܟܘ ܘܨ̇ܠܝܘ ܩܕܡܝܟ ܘܐܢܬ ܡܢ ܫܡܝܐ ܫܡܥ̣ܬ ܘܦܪܩ̣ܬ ܐܢܘܢ ܒܟܠ ܙܒܢ ܐܝܟ ܣܘܓܐܬ ܪ̈ܚܡܝܟ

43. Nehemia 9:29

    ܘܐܣܗ̣ܕܬ ܒܗܘܢ ܠܡܗܦܟܘ ܐܢܘܢ ܠܢܡܘܣܝ̈ܟ ܘܗܢܘܢ ܐܥܠܝܘ ܘܠܐ ܫ̣ܡܥܘ ܠܦܘܩ̈ܕܢܝܟ ܘܒܕܝ̣̈ܢܝܟ ܚܛܘ ܒܗܘܢ ܕܐܢ ܥܒ̇ܕ ܠܗܘܢ ܒܪܢܫܐ ܚ̇ܝܐ ܒܗܘܢ ܘܥ̣ܒܕܘ ܠܗܘܢ ܟܬܦܐ ܡܪܘܕܬܐ ܘܩܕܠܗܘܢ ܩܫܝܘ ܘܠܐ ܫ̣ܡܥܘ

44. Nehemia 9:30

    ܘܐܟܪܙ̣ܬ ܥܠܝܗܘܢ ܫܢܝ̈ܐ ܣܓܝ̈ܐܬܐ ܘܐܣܗ̣ܕܬ ܒܗܘܢ ܒܪܘܚܟ ܒܐܝܕܐ ܕܢܒܝ̈ܝܟ ܘܠܐ ܫ̣ܡܥܘ ܘܐܫܠܡ̣ܬ ܐܢܘܢ ܒܐܝܕܐ ܕܥܡ̈ܡܐ ܕܡܕܝ̈ܢܬܐ

45. Nehemia 9:31

    ܘܡܛܠ ܪ̈ܚܡܝܟ ܣܓܝ̈ܐܐ ܠܐ ܐܘܒ̣ܕܬ ܐܢܘܢ ܘܠܐ ܫܒܩ̣ܬ ܐܢܘܢ ܡܛܘܠ ܕܐܠܗܐ ܐܢܬ ܚܢܢܐ ܘܪܚܡܬܢܐ

46. Nehemia 9:32

    ܡܟܝܠ ܐܠܗܢ ܐܠܗܐ ܪܒܐ ܘܓܢܒܪܐ ܘܕܚܝܠܐ ܢ̇ܛܪ ܡܘܡ̈ܬܐ ܘܫܪܪܐ ܠܐ ܢܬܟܣܐ ܡܢ ܩܕܡܝܟ ܟܠܗ ܐܘܠܨܢܐ ܕܐܬܐ ܥܠܝܢ ܘܥܠ ܡ̈ܠܟܝܢ ܘܥܠ ܪ̈ܘܪܒܢܝܢ ܘܥܠ ܟܘܡܪ̈ܝܢ ܘܥܠ ܢܒܝ̈ܝܢ ܘܥܠ ܐܒܗ̈ܝܢ ܘܥܠ ܟܘܠܗ ܥܡܐ ܡܢ ܝܘܡ̈ܘܗܝ ܕܡܠܟܐ ܕܐܬܘܪ ܘܥܕܡܐ ܠܝܘܡܢܐ

47. Nehemia 9:33

    ܘܐܢܬ ܙܕܝܩ ܥܠ ܟܠܡܕܡ ܕܐ̣ܬܐ ܥܠܝܢ ܡܛܠ ܕܒܩܘܫܬܐ ܐܢܬ ܓܝܪ ܘܚܢܢ ܐܥܠܝܢܢ

48. Nehemia 9:34

    ܘܡ̈ܠܟܝܢ ܘܪ̈ܘܪܒܢܝܢ ܘܟܘܡܪ̈ܝܢ ܘܐܒܗ̈ܝܢ ܘܠܐ ܥ̣ܒܕܘ ܢܡܘܣܟ ܘܠܐ ܨܬܘ ܠܦܘܩ̈ܕܢܝܟ ܘܠܣܗ̈ܕܘܬܟ ܕܐܣ̣ܗܕܬ ܒܗܘܢ

49. Nehemia 9:35

    ܘܟ̣ܦܪܘ ܒܡܠܟܘܬܟ ܘܒܛܘܒܟ ܪܒܐ ܕܝܗ̣ܒܬ ܠܗܘܢ ܒܐܪܥܐ ܛܒܬܐ ܘܫܡܝܢܬܐ ܕܝܗܒ̣ܬ ܠܗܘܢ ܘܠܐ ܦܠܚܘܟ ܘܠܐ ܗ̣ܦܟܘ ܡܢ ܥ̇ܒ̈ܕܝܗܘܢ ܒܝ̈ܫܐ

50. Nehemia 9:36

    ܡܛܠ ܗܢܐ ܚܢܢ ܝܘܡܢܐ ܥܒ̣̈ܕܐ ܘܐܪܥܐ ܕܝܗܒ̣ܬ ܠܐܒܗ̈ܝܢ ܠܡܐܟܠ ܐܒܗ̇ ܘܛܘܒܗ̇ ܗܐ ܚܢܢ ܐܝܟ ܥ̣ܒ̈ܕܐ ܦܠܚܝܢ ܒܗ̇ ܒܓܘܗ̇

51. Nehemia 9:37

    ܘܥ̈ܠܠܬܗ̇ ܢܣܒܝܢ ܡ̈ܠܟܐ ܕܐܩܝܡ̣ܬ ܥܠܝܢ ܡܛܠ ܚܛܗ̈ܝܢ ܘܥܠ ܦܓܪܢ ܗܢܘܢ ܫܠܝܛܝܢ ܘܥܠ ܒܥܝܪܢ ܐܝܟ ܨܒܝܢܗܘܢ ܘܒܐܘܠܨܢܐ ܪܒܐ ܫ̇ܪܝܢܢ

52. Nehemia 10:1

    ܘܒܟܠܗܝܢ ܗܠܝܢ ܝ̇ܡܝܢ ܚܢܢ ܒܫܪܪܐ ܘܡܣܗܕܝܢ ܚܢܢ ܥܠ ܚܬܡܐ ܩܫܝ̈ܫܝܢ ܘܠܘܝ̈ܐ ܘܟܘܡܪ̈ܝܢ

53. Nehemia 10:2

    ܘܟܠ ܐܝܠܝܢ ܕܚܝܘ ܡܢܢ ܢܚܡܝܐ ܩܫܝܫܐ ܒܪ ܚܢܢܝܐ ܪܝܫ ܟܘܡܪ̈ܐ ܘܙܪܚܝܐ

54. Nehemia 10:3

    ܘܣܪܝܐ ܘܥܙܪܝܐ ܘܐܪܡܝܐ

55. Nehemia 10:4

    ܘܦܫܚܘܪ ܘܐܪܡܝܐ ܘܡܠܟܝܐ ܘܦܫܛܝܐ

56. Nehemia 10:5

    ܘܚܛܘܫ ܘܫܟܢܝܐ ܘܡܠܘܟ

57. Nehemia 10:6

    ܘܫܟܘܡ ܘܥܙܡܘܬ ܓܒܪܝܐ

58. Nehemia 10:7

    ܕܢܝܐܝܠ ܓܒܬܘܢ ܒܪܘܟ

59. Nehemia 10:8

    ܡܫܠܡ ܐܒܝܐ ܒܢܝܡܝܢ

60. Nehemia 10:9

    ܡܥܙܝܐ ܒܠܓܝ ܫܡܥܝܐ ܗܠܝܢ ܟܘܡܪ̈ܐ

61. Nehemia 10:10

    ܘܠܘܝ̈ܐ ܘܝܫܘܥ ܒܪ ܝܙܢܝܐ ܒܢ̈ܝ ܡܒܢܝ ܚ̇ܕܪ ܩܕܡܝܐ

62. Nehemia 10:11

    ܘܐܚܝ̈ܗܘܢ ܫܟܢܝܐ ܘܐܘܪܝܐ ܩܠܛܝܐ ܦܠܛܝܐ ܚܢܢܝ

63. Nehemia 10:12

    ܡ̇ܝܟܐ ܪܟܘܒ ܚܫܒܝܐ

64. Nehemia 10:13

    ܙܟܘܪ ܫܪܒܝܐ ܫܟܢܝܐ

65. Nehemia 10:14

    ܗܘܕܝܐ ܒܢ̈ܝ ܒܢ̇ܝ

66. Nehemia 10:15

    ܪ̈ܫܝ ܥܡܐ ܦܪܥܫ ܫܠܝܛ ܡܘܐܒ ܥܝܠܡ ܙܬܝܐ

67. Nehemia 10:16

    ܒܢ̈ܝ ܥܙܓܪ ܘܒܢ̈ܝ ܐܕܘܢܝܐ

68. Nehemia 10:17

    ܒܓܘܝ ܥܕܘܢ

69. Nehemia 10:18

    ܐܛܪ ܚܙܩܝܐ ܥܙܘܪ

70. Nehemia 10:19

    ܐܘܪܝܐ ܚ̇ܫܘܡ ܒܨܝ

71. Nehemia 10:20

    ܚܘܙܝܦ ܥܢܬܘܬ ܢܒܝ

72. Nehemia 10:21

    ܡܦܓܫ ܡܫܠܡ ܥܙܝ̇ܦܝ

73. Nehemia 10:22

    ܡܫܘܙܦܐܝܠ ܙܕܘ̇ܩ ܝܘܝܕܥ

74. Nehemia 10:23

    ܦܠܛܝܐ ܚܢܢܝ ܥܢܢܝܐ

75. Nehemia 10:24

    ܗܘܫܥ ܚܢܢܝܐ ܝܫܘܥ

76. Nehemia 10:25

    ܗ̇ܠܘܫ ܦܠܚܐ ܫ̇ܒܘܩ

77. Nehemia 10:26

    ܐܪܚܘܡ ܚܫܒܝܐ ܡܥܣܝܐ

78. Nehemia 10:27

    ܐܚܝܐ ܚܢܢܝ ܥ̣ܢܢ

79. Nehemia 10:28

    ܡܠܘܟ ܚܪܡ ܒܥܢܐ

80. Nehemia 10:29

    ܘܫܪܟܐ ܕܥܡܐ ܟܘܡܪ̈ܐ ܘܠܘܝ̈ܐ ܘܬ̇ܪ̈ܥܐ ܘܡܫܡ̈ܫܢܐ ܘܥ̈ܒ̣ܕܐ ܘܟܠ ܕܐܬܦܪܫܘ ܡܢ ܥܡ̈ܡܐ ܕܡܕܝ̈ܢܬܐ ܢܐܬܘܢ ܠܘܬ ܢܡܘܣܐ ܕܡܪܝܐ ܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܒ̈ܢܬܗܘܢ ܘܟܠ ܡ̇ܢ ܕܝ̇ܕܥ ܘܡܣܬܟܠ

81. Nehemia 10:30

    ܘܡܥܫܢܝܢ ܥܠ ܐܚܝ̈ܗܘܢ ܘܥܠ ܩܪ̈ܝܒܝܗܘܢ ܘܥܠܝܢ ܒܡܘܡܬܐ ܘܒܩܝܡܐ ܠܡܗܠܟܘ ܒܢܡܘܣܗ ܕܡܪܝܐ ܕܝ̣ܗܒ ܒܐܝܕܐ ܕܡܘܫܐ ܥܒ̣ܕܗ ܕܡܪܝܐ ܘܠܡܛܪ ܘܠܡܥܒܕ ܟܠܗܘܢ ܦܘܩ̈ܕܢܘܗܝ ܕܡܪܝܐ ܡܪܢ ܘܕܝ̣ܢ̈ܘܗܝ ܘܢܡܘ̈ܣܘܗܝ

82. Nehemia 10:31

    ܘܕܠܐ ܢܬܠ ܒܢ̈ܬܢ ܠܥܡ̈ܡܐ ܕܐܪܥܐ ܘܒ̈ܢܬܗܘܢ ܠܐ ܢܣܒ ܠܒܢܝ̈ܢ

83. Nehemia 10:32

    ܘܡܢ ܥܡ̈ܡܐ ܕܐܪܥܐ ܕܡܝܬܝܢ ܠܐ ܢܣܒܘܢ ܘܟܠ ܕܡܘܓܪ ܒܥܝܪܐ ܒܝܘܡܐ ܕܫܒܬܐ ܐܓܪܐ ܠܐ ܢܣ̣̇ܒ ܘܛܥܢܐ ܒܝܘܡܐ ܕܫܒܬܐ ܠܐ ܢܫܩܘܠ ܡܛܠ ܕܩܕܝܫܐ ܗܝ ܘܢܫܒܘܩ ܟܠ ܡܕܡ ܕܚܝ̇ܒܝܢ ܠܢ ܘܚܢܢ ܒܫܢܬܐ ܕܫܒܥ ܢܫܒܘܩ

84. Nehemia 10:33

    ܘܐܫܪܢ ܥܠܝܢ ܦܘܩܕܢܐ ܕܢܗܘܐ ܝܗܒܝܢ ܬܘܠܬܗ̇ ܕܐܣܬܪܐ ܒܫܒܬܐ ܠܦܘܠܚܢܐ ܕܒܝܬܐ ܕܐܠܗܢ

85. Nehemia 10:34

    ܠܠܚܡܐ ܕܦܘܪܫܢܐ ܠܩܘܪ̈ܒܢܐ ܐܡܝܢܐ ܘܠܥܠܬܐ ܐܡܝܢܬܐ ܕܫܒ̈ܐ ܘܕܪܝܫ ܝܪ̈ܚܐ ܘܕܥܕܥ̈ܕܐ ܘܕܡܩ̈ܕܫܐ ܘܕܫܘܒܩܢ ܚܛܗ̈ܐ ܕܐܝܣܪܝܠ ܘܠܟܠܗ̇ ܥܒܝܕܬܐ ܕܒܝܬܐ ܕܐܠܗܢ

86. Nehemia 10:35

    ܘܦ̈ܨܐ ܐܪܡܝܢ ܥܠ ܩܘܪ̈ܒܢܐ ܕܩܝ̈ܣܐ ܟܗ̈ܢܐ ܘܠܘܝ̈ܐ ܘܥܡܐ ܠܡܝܬܝܘ ܠܒܝܬܗ ܕܡܪܝܐ ܐܠܗܢ ܐܝܟ ܕܟܬܝܒ ܒܟܬܒܐ ܕܢܡܘܣܐ

87. Nehemia 10:36

    ܠܡܝܬܝܘ ܪ̈ܝܫܝܬܐ ܕܐܪܥܢ ܘܪܫܝܬܐ ܕܟܠ ܐܒܐ ܕܐܝ̈ܠܢܐ ܒܟܠ ܫܢܐ ܒܫܢܐ ܘܠܡܝܬܝܘ ܠܒܝܬܐ ܕܡܪܝܐ

88. Nehemia 10:37

    ܒܘܟܪ̈ܐ ܕܒܢ̈ܝܢ ܘܕܒܥܝܪܢ ܐܝܟܢܐ ܕܟܬܝܒ ܒܢܡܘܣܐ ܕܡܪܝܐ ܘܒܘܟܪ̈ܐ ܕܬܘܪ̈ܝܢ ܘܕܥܢ̈ܢ ܠܡܝܬܝܘ ܠܒܝܬܐ ܕܐܠܗܢ ܠܟܘܡܪ̈ܐ ܕܡܫܡܫܝܢ ܒܒܝܬܐ ܕܐܠܗܢ

89. Nehemia 10:38

    ܘܪ̈ܫܝܬܐ ܕܐܨ̈ܘܬܢ ܘܕܐܕܪ̈ܝܢ ܘܕܐܒ̈ܐ ܕܟܠܗܘܢ ܐܝ̈ܠܢܝܢ ܘܚܡ̣ܪܐ ܘܡܫܚܐ ܢܬܠ ܠܟܗ̈ܢܐ ܕܡܫܡܫܝܢ ܩܕܡ ܐܠܗܢ ܘܚܕ ܡܢ ܥܣܪܐ ܡܢ ܐܪ̈ܥܬܢ ܢܬܠ ܠܠܘܝ̈ܐ ܘܗܢܘܢ ܠܘܝ̈ܐ ܢܗܘܘܢ ܢܣܒܝܢ ܡܥܣܪ̈ܐ ܡܢ ܟܠ ܩܘܪ̈ܝܐ ܕܦܘܠܚܢܢ

90. Nehemia 10:39

    ܘܢܗܘܐ ܟܘܡܪܐ ܒܪ ܐܗܪܘܢ ܥܡ ܠܘܝ̈ܐ ܒܡܥܣܪ̈ܝܗܘܢ ܘܠܘܝ̈ܐ ܢܣܒܘܢ ܚܕ ܡܢ ܥܣܪܐ ܠܒܝܬܐ ܕܐܠܗܢ ܠܒܝܬ ܩܦ̈ܣܐ ܘܠܒܝܬ ܓܙܐ

91. Nehemia 10:40

    ܡܛܠ ܕܠܒܝܬ ܩܦ̈ܣܐ ܢܝܬܘܢ ܒܢ̈ܝ ܐܝܣܪܝܠ ܘܒܢ̈ܝ ܠܘܝ ܪ̈ܝܫܝܬܐ ܕܥܒܘܪܐ ܘܕܚܡ̣ܪܐ ܘܕܡܫܚܐ ܘܬܡܢ ܡܐܢܝ̈ ܩܘܕܫܐ ܘܟܘܡܪ̈ܐ ܘܠܘܝ̈ܐ ܘܬܪ̈ܥܐ ܘܢܛܘܪ̈ܐ ܠܐ ܢܫܒܩܘܢ ܠܒܝܬܐ ܕܐܠܗܢ

92. Nehemia 11:1

    ܘܢܬܒܘܢ ܩܫܝ̈ܫܝ ܥܡܐ ܒܐܘܪܫܠܡ ܘܫܪܟܐ ܕܥܡܐ ܢܪܡܘܢ ܦ̈ܨܐ ܠܡܝܬܝܘ ܚܕ ܡܢ ܥܣܪܐ ܒܢ̈ܝ ܐܢܫܐ ܠܡܥܡܪ ܒܐܘܪܫܠܡ ܡܕܝܢܬܐ ܕܩܘܕܫܐ ܘܬܫܥ ܡܢ̈ܘܢ ܢܗܘܘܢ ܒܩܘܪ̈ܝܐ

93. Nehemia 11:2

    ܘܒܪܟܘ ܥܡܐ ܠܟܠܗܘܢ ܐܢܫܐ ܐܝܠܝܢ ܕܨܒܘ ܡܢ ܪܥܝܢܗܘܢ ܠܡܬܒ ܒܐܘܪܫܠܡ

94. Nehemia 11:3

    ܘܗܠܝܢ ܪ̈ܝܫܐ ܕܡܕܝܢܬܐ ܕܝܬܒܘ ܒܐܘܪܫܠܡ ܘܒܩܘܪ̈ܝܐ ܕܝܗܘܕܐ ܘܝܬܒܘ ܓܒܪܐ ܘܝܘܪܬܢܗ ܒܩܘܪ̈ܝܗܘܢ ܕܐܝܣܪܝܠ ܟܘܡܪ̈ܐ ܘܠܘܝ̈ܐ ܘܥܡܐ ܘܒܢ̈ܝ ܥ̈ܒ̣ܕܝ ܫܠܝܡܘܢ

95. Nehemia 11:4

    ܒܐܘܪܫܠܡ ܘܡܢ ܒܢ̈ܝ ܝܗܘܕܐ ܘܡܢ ܒܢ̈ܝ ܒܢܝܡܝܢ ܘܡܢ ܒܢ̈ܝ ܗܘܕܝܐ ܢܬܢܝܐ ܒܪ ܥܘܙܝܐ ܒܪ ܙܟܪܝܐ ܒܪ ܐܡܪܝܐ ܒܪ ܫܦܛܝܐ ܒܪ ܡܗܠܠܐܝܠ ܡܢ ܒܢ̈ܝ ܦܪܨ

96. Nehemia 11:5

    ܡܥܣܝܐ ܒܪ ܒܪܘܟ ܒܪ ܟܠܚܙܐ ܒܪ ܚܕܝܐ ܒܪ ܥܙܪܝܐ ܒܪ ܝܘܢܕܒ ܒܪ ܙܟܪܝܐ ܒܪ ܫܠܐ

97. Nehemia 11:6

    ܟܠܗܘܢ ܒܢ̈ܝ ܦܪܨ ܕܥܡܪܝܢ ܒܐܘܪܫܠܡ ܐܪܒܥܡܐܐ ܘܐܫܬܝܢ ܘܬܡܢܝܐ ܓܢܒܪ̈ܝ ܚܝܠܐ

98. Nehemia 11:7

    ܘܗܠܝܢ ܒܢ̈ܝ ܒܢܝܡܝܢ ܣܠܐ ܒܪ ܡܫܠܘܡ ܒܪ ܝܘܝܕܥ ܒܪ ܦܪܝܐ ܒܪ ܩܠܝܐ ܒܪ ܢܥܣܝܐ ܒܪ ܐܢܬܝܐܝܠ ܒܪ ܐܫܥܝܐ

99. Nehemia 11:8

    ܘܒܬܪܗ ܬܫܥܡܐܐ ܘܥܣܪܝܢ ܘܬܡܢܝܐ

100. Nehemia 11:9

     ܘܝܘܐܝܠ ܒܪ ܙܟܪܝܐ ܫܠܝܛ ܥܠܝܗܘܢ ܘܝܗܘܕܐ ܒܪ ܣܢܐܐ ܫܠܝܛ ܥܠ ܩܪܝܬܐ ܕܬܪ̈ܬܝܢ

← Previous · Next → — showing 201–300 of 405

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.