← All works

Peshitta Nehemia

Peshitta (Syriac Old Testament) · 405 sections

1. Nehemia 1:1

   ܘܗ̣ܘܐ ܒܝܪܚ ܟܢܘܢ ܒܫܢܬ ܥܣܪܝܢ ܐܢܐ ܩܐܡ ܗ̇ܘܝܬ ܒܫܘܫܢ ܒܝܪܬܐ

2. Nehemia 1:2

   ܘܐ̣ܬܐ ܚܢܢܝ ܚܕ ܡܢ ܐܚ̈ܝ ܗܘ ܘܓܒܪ̈ܐ ܝܗܘ̈ܕܝܐ ܘܫ̇ܐܠܬ ܐܢܘܢ ܥܠ ܝܗܘ̈ܕܝܐ ܐܝܠܝܢ ܕܝܬܪܘ ܡܢ ܫܒܝܐ ܘܐܦ ܥܠ ܐܘܪܫܠܡ ܡܕܝܢܬܐ

3. Nehemia 1:3

   ܘܐܡܪܝܢ ܠܝ ܗܠܝܢ ܐܢܫܐ ܕܫ̇ܐܠܬ ܐܢܘܢ ܗܢܘܢ ܐܢܫܐ ܐܝܠܝܢ ܕܦܠܛܘ ܡܢ ܫܒܝܐ ܗܐ ܬܡܢ ܐܢܘܢ ܒܡܕܝܢܬܐ ܒܒܝܫܬܐ ܪܒܬܐ ܫܪܝܢ ܘܒܚܣܕܐ ܣܓܝܐܐ ܘܗܐ ܫܘܪܗ̇ ܕܐܘܪܫܠܡ ܬܪܝܥ ܘܬܪ̈ܥܝܗ̇ ܝܩܝܕܝܢ ܒܢܘܪܐ

4. Nehemia 1:4

   ܗܝܕܝܢ ܟܕ ܫ̇ܡܥܬ ܡ̈ܠܐ ܗܠܝܢ ܝ̇ܬܒ ܗ̇ܘܝܬ ܘܒ̇ܟܐ ܘܡܬܐܒܠ ܝܘܡ̈ܬܐ ܣܓܝ̈ܐܐ ܘܗ̇ܘܝܬ ܨܐܡ ܘܡܨ̇ܠܐ ܩܕܡ ܐܠܗܐ ܕܫܡܝܐ

5. Nehemia 1:5

   ܘܐ̇ܡܪ ܗ̇ܘܝܬ ܒ̇ܥܐ ܐܢܐ ܡܢ ܩܕܡܝܟ ܡܪܝܐ ܐܠܗܐ ܕܫܡܝܐ ܐܠܗܐ ܓܢܒܪܐ ܘܪܒܐ ܘܕܚܝܠܐ ܢ̇ܛܪ ܫܪܪܐ ܘܛܝܒܘܬܐ ܠܪ̈ܚܡܘܗܝ ܘܠܢܛܪ̈ܝ ܦܘܩ̈ܕܢܘܗܝ

6. Nehemia 1:6

   ܢܗ̈ܘܝܢ ܡܟܝܠ ܥܝ̈ܢܝܟ ܦܬܝ̈ܚܢ ܘܐܕܢ̈ܝܟ ܨܝ̈ܬܢ ܠܡܫܡܥ ܨܠܘܬܐ ܕܐܢܐ ܥܒܕܟ ܡܨ̇ܠܐ ܩܕܡܝܟ ܒܐܝܡܡܐ ܘܒܠܠܝܐ ܥܠ ܒܢ̈ܝ ܐܝܣܪܝܠ ܥܒ̈ܕܝܟ ܘܐܢܐ ܡܘܕܐ ܐܢܐ ܥܠ ܚܛܗ̈ܐ ܕܒܢ̈ܝ ܐܝܣܪܝܠ ܕܚܛܘ ܠܟ ܘܐܢܐ ܘܒܝܬ ܐܒܝ ܚ̣ܛܝܢܢ ܚܢܢ ܩܕܡܝܟ

7. Nehemia 1:7

   ܘܠܐ ܢܛܪܢ ܦܘܩ̈ܕܢܐ ܘܢܡܘ̈ܣܐ ܕܦܩܕܬ̣ ܠܡܘܫܐ ܥܒܕܟ

8. Nehemia 1:8

   ܐܬܕܟܪ ܦܬܓ̈ܡܐ ܕܦܩܕܬ̣ ܠܡܘܫܐ ܥܒܕܟ ܘܐܡܪܬ̣ ܠܗ ܕܐܢܬܘܢ ܬܟܕܒܘܢ ܒܝ ܘܐܢܐ ܐܒܕܪܟܘܢ ܒܝܬ ܥܡ̈ܡܐ

9. Nehemia 1:9

   ܘܬܬܗܦܟܘܢ ܠܘܬܝ ܘܬܛܪܘܢ ܢܡܘ̈ܣܝ ܘܬܥܒܕܘܢ ܐܢܘܢ ܘܐܢ ܢܗܘܘܢ ܡܒܕܪ̈ܝܟܘܢ ܒܣ̈ܘܦܝ ܫܡܝܐ ܡܢ ܬܡܢ ܐܩܪܒܟܘܢ ܘܐܝܬܝܟܘܢ ܠܐܬܪܐ ܕܓ̇ܒܝܬ ܠܡܫܪܝܘ ܫܡܝ ܬܡܢ

10. Nehemia 1:10

    ܘܗܢܘܢ ܥܒ̈ܕܝܟ ܘܥܡܟ ܕܦ̣ܪܩܬ ܒܚܝܠܟ ܪܒܐ ܘܒܐܝܕܟ ܬܩܝܦܬܐ

11. Nehemia 1:11

    ܒܒܥܘ ܡܢ ܩܕܡܝܟ ܡܪܝܐ ܬܗܘܐ ܐܕܢܟ ܨܝܬܐ ܠܨܠܘܬܗ ܕܥܒܕܟ ܘܠܨܠܘܬܐ ܕܐܝܠܝܢ ܕܨܒܝܢ ܠܡܕܚܠ ܠܫܡܟ ܘܦܪܘܩܝܗܝ ܠܥܒܕܟ ܝܘܡܢܐ ܘܗܒܝܗܝ ܒܪ̈ܚܡܐ ܩܕܡ ܓܒܪܐ ܗܢܐ ܘܐܢܐ ܗ̇ܘܝܬ ܫܩܝܐ ܠܡܠܟܐ

12. Nehemia 2:1

    ܘܗܝܕܝܢ ܒܝܪܚ ܢܝܣܢ ܒܫܢܬ ܥܣܪܝܢ ܠܐܪܛܚܫܫܬ ܡܠܟܐ ܚܡ̣ܪܐ ܡܫܩܐ ܗ̇ܘܝܬ ܩܕܡ ܡܠܟܐ ܘܫ̇ܩܠܬ ܚܡܪܐ ܘܝ̇ܗܒܬ ܠܡܠܟܐ ܘܠܐ ܗ̇ܘܝܬ ܒܝܫ ܩܕܡܘܗܝ

13. Nehemia 2:2

    ܘܐ̣ܡܪ ܠܝ ܡܠܟܐ ܡܛܠ ܡܢܐ ܐܦ̈ܝܟ ܒܝ̈ܫܢ ܘܐܢܬ ܠܐ ܗܘܝܬ̣ ܟܪܝܗ ܠܝܬ ܗܢܐ ܐܠܐ ܐܢ ܒܝܫܘܬ ܠܒܐ ܘܕ̇ܚܠܬ ܣܓܝ ܛܒ

14. Nehemia 2:3

    ܘܐ̇ܡܪܬ ܠܡܠܟܐ ܡܠܟܐ ܠܥܠܡ ܚܝܝ ܡܛܠ ܡܢܐ ܠܐ ܢܒܐ̈ܫܢ ܐܦ̈ܝ ܕܡܕܝܢܬܐ ܕܒܝܬ ܡܠܟܘܬܐ ܕܐܒܗ̈ܝ ܚܪܒܐ ܘܬܪ̈ܥܝܗ̇ ܡܘܩܕܝܢ ܒܢܘܪܐ

15. Nehemia 2:4

    ܘܐ̣ܡܪ ܠܝ ܡܠܟܐ ܡܛܠ ܗܕܐ ܒ̇ܥܝܬ ܘܨ̇ܠܝܬ ܩܕܡ ܐܠܗܐ ܕܫܡܝܐ

16. Nehemia 2:5

    ܘܐ̇ܡܪܬ ܠܡܠܟܐ ܐܢ ܥܠ ܡܠܟܐ ܫܦܝܪ ܐܢܐ ܐܢܐ ܥܒܕܟ ܩܕܡܝܟ ܬܫܕܪܢܝ ܠܝܗܘܕ ܡܕܝܢܬܗ ܕܕܘܝܕ ܠܒܝܬ ܩܒܘܪܐ ܕܐܒ̈ܗܝ ܘܐܒܢܝܗ̇

17. Nehemia 2:6

    ܘܐ̣ܡܪ ܠܝ ܡܠܟܐ ܫܛܝܐ ܥܕ ܐܡܬܝ ܐ̇ܙܠ ܐܢܬ ܘܐ̇ܬܐ ܘܫ̣ܦܪ ܩܕܡ ܡܠܟܐ ܘܫܕܪܢܝ ܘܝ̣ܗܒ ܠܝ ܙܒܢܐ

18. Nehemia 2:7

    ܘܐ̇ܡܪܬ ܠܡܠܟܐ ܐܢ ܥܠ ܡܠܟܐ ܫܦܝܪ ܢܟܬܒܘܢ ܠܝ ܐܓܪ̈ܬܐ ܠܘܬ ܫܠܝ̈ܛܐ ܕܒܥܒܪ ܢܗܪܐ ܕܢܥܕܪܘܢܢܝ ܥܕܡܐ ܕܐܙܠ ܠܝܗܘܕ

19. Nehemia 2:8

    ܘܐܓܪܬܐ ܠܘܬ ܐܣܦ ܢ̇ܛܪ ܦܪܕܝܣܐ ܕܡܠܟܐ ܕܢܬܠ ܠܝ ܩܝ̈ܣܐ ܠܡܥܒܕ ܬܪ̈ܥܝ ܒܝܬܐ ܘܕܒ̈ܬܐ ܘܕܫܘܪܐ ܕܡܕܝܢܬܐ ܘܠܒܝܬܐ ܕܥ̇ܐܠ ܐܢܐ ܠܗ ܘܝ̣ܗܒ ܠܝ ܡܠܟܐ ܐܝܟ ܐܝܕܗ ܕܐܠܗܝ ܕܐܛܐܒܬ ܠܝ

20. Nehemia 2:9

    ܘܐ̇ܬܝܬ ܠܘܬ ܫܠܝܛܐ ܕܒܥܒܪ ܢܗܪܐ ܘܝ̇ܗܒܬ ܠܗ ܐܓܪܬܐ ܕܡܠܟܐ ܘܫܕܪ ܥܡܝ ܡܠܟܐ ܪ̈ܒܝ ܚܝ̈ܠܐ ܘܦܪ̈ܫܐ

21. Nehemia 2:10

    ܘܫ̣ܡܥ ܣܡܒܠܝܛ ܚܘܪܢܝܐ ܘܛܘܒܝܐ ܓܒܪ̈ܐ ܥܡܘ̈ܢܝܐ ܘܐܬܐܒܫܬ ܠܗܘܢ ܒܝܫܐܝܬ ܥܠ ܕܐ̣ܬܐ ܒܪܢܫܐ ܠܡܒܥܐ ܛܒܬܐ ܥܠ ܒܢ̈ܝ ܐܝܣܪܝܠ

22. Nehemia 2:11

    ܘܐ̇ܬܝܬ ܠܐܘܪܫܠܡ ܘܗ̇ܘܝܬ ܬܡܢ ܝܘܡ̈ܬܐ ܬܠܬܐ

23. Nehemia 2:12

    ܘܩ̇ܡܬ ܒܠܠܝܐ ܐܢܐ ܘܓܒܪ̈ܐ ܗ̇ܢܘܢ ܕܐܝܬ ܗܘܘ ܥܡܝ ܘܠܐ ܚ̇ܘܝܬ ܠܐܢܫ ܡܕܡ ܕܐܪܡܝ ܐܠܗܐ ܒܠܒܝ ܠܡܥܒܕ ܠܐܘܪܫܠܡ ܘܒܥܝܪܐ ܠܝܬ ܗܘܐ ܥܡܝ ܐܠܐ ܐܢ ܒܥܝܪܐ ܕܪܟܝܒ ܗ̇ܘܝܬ ܥܠܝܗ̇

24. Nehemia 2:13

    ܘܢ̇ܦܩܬ ܒܬܪܥܐ ܕܢܚܠܐ ܒܠܠܝܐ ܠܐ̈ܦܝ ܥܝܢ ܬܢܝܢ ܘܠܬܪܥܐ ܕܐܣܦܘܬ ܘܗ̇ܘܝܬ ܣ̇ܟܪ ܒܫܘܪ̈ܝܗ̇ ܕܐܘܪܫܠܡ ܕܡܬܪܥܝܢ ܗܘܘ ܘܬܪ̈ܥܐ ܝܩܝܕܝܢ ܗܘܘ ܒܢܘܪܐ

25. Nehemia 2:14

    ܘܥ̇ܒܪܬ ܥܠ ܬܪܥܐ ܕܢܚܠܐ ܘܠܐܡܐ ܕܡܠܟܐ ܘܠܝܬ ܗܘܐ ܐܬܪܐ ܠܒܥܝܪܐ ܠܡܥܒܪ ܬܡܢ

26. Nehemia 2:15

    ܘܗ̇ܘܝܬ ܣ̇ܠܩ ܒܢܚܠܐ ܒܠܠܝܐ ܘܗ̇ܘܝܬ ܣ̇ܟܪ ܒܫܘܪܐ ܘܐ̇ܬܐ ܘܥ̇ܠܬ ܒܬܪܥ ܢܚܠܐ ܘܗ̇ܦܟܬ

27. Nehemia 2:16

    ܘܫ̈ܠܝܛܢܐ ܠܐ ܝܕܥܘ ܠܐܝܟܐ ܐ̇ܙܠܬ ܘܡܢܐ ܥ̇ܒܕ ܐܢܐ ܘܠܝܗ̈ܘܕܝܐ ܘܠܟܗ̈ܢܐ ܘܠܫ̈ܠܝܛܢܐ ܘܠܣ̇ܦܪ̈ܐ ܘܠܫܪܟܐ ܕܥܒ̈ܕܝ ܥܒ̈ܝܕܬܐ ܥܕܡܐ ܠܗܫܐ ܠܐ ܚ̇ܘܝܬ

28. Nehemia 2:17

    ܘܐ̇ܡܪܬ ܠܗܘܢ ܐܢܬܘܢ ܚܙܝܢ ܒܝܫ̈ܬܐ ܕܚܢܢ ܒܗ̇ ܕܗܐ ܐܘܪܫܠܡ ܚܪܒܐ ܘܬܪ̈ܥܝܗ̇ ܝܩܝܕܝܢ ܒܢܘܪܐ ܬܘ ܢܒܢܐ ܫܘܪܐ ܕܐܘܪܫܠܡ ܘܠܐ ܢܗܘܐ ܡܟܝܠ ܚܣܕܐ

29. Nehemia 2:18

    ܘܓ̇ܠܝܬ ܠܗܘܢ ܐܝܕܐ ܕܐܠܗܝ ܕܗܘܬ ܥܡܝ ܠܛܒ ܐܦ ܡ̈ܠܝ ܡ̇ܠܟܐ ܕܐܬܐܡܪ ܠܝ ܘܐܡܪܝܢ ܩܝܡܝܢܢ ܘܒܢܝܢ ܘܥܫܢܘ ܐܝܕ̈ܝܗܘܢ ܠܡܥܒܕ ܕܛܒ

30. Nehemia 2:19

    ܘܫ̣ܡܥ ܣܡܒܠܝܛ ܚܘܪܢܝܐ ܘܛܘܒܝܐ ܓܒܪܐ ܥܡܘܢܝܐ ܘܓܫܘܡ ܥܪܒܝܐ ܘܓܚܟܘ ܥܠܝܢ ܘܡܝܩܘ ܒܢ ܘܐܡܪܝܢ ܡܢܐ ܗܝ ܡܠܬܐ ܗܕܐ ܕܥܒܕܝܢ ܐܢܬܘܢ ܕܠܡܐ ܥܠ ܡܠܟܐ ܐܢܬܘܢ ܡܪܕܝܢ

31. Nehemia 2:20

    ܘܐ̇ܬܝܒܬ ܐܢܘܢ ܦܬܓܡܐ ܘܐ̇ܡܪܬ ܠܗܘܢ ܐܠܗܐ ܕܫܡܝܐ ܗ̣ܘ ܦܪܩܢ ܘܚܢܢ ܥܒܕܝܢ ܘܩܝܡܝܢ ܘܒܢܝܢ ܘܠܟܘܢ ܠܝܬ ܠܟܘܢ ܙܕܩܐ ܘܕܘܟܪܢܐ ܘܡܢܬܐ ܒܐܘܪܫܠܡ

32. Nehemia 3:1

    ܘܩܡ ܐܠܝܫܒ ܟܘܡܪܐ ܪܒܐ ܘܐܚ̈ܘܗܝ ܟܘܡܪ̈ܐ ܘܒܢ̈ܘܗܝ ܥܠ ܬܪܥܐ ܕܓ̈ܢܐ ܘܐܩܝܡܘ ܬܪ̈ܥܘܗܝ ܘܩܘܕ̈ܫܘܗܝ ܘܥܕܡܐ ܠܡܓܕܠ ܡܐܐ ܗܢܘܢ ܩܕܫܘܗܝ ܥܕܡܐ ܠܡܓܕܠܐ ܕܚܢܢܐܝܠ

33. Nehemia 3:2

    ܘܥܕܡܐ ܠܬܚܘܡܐ ܕܐܢܫܐ ܕܐܝܪܝܚܘ ܘܥܕܡܐ ܠܬܚܘܡܐ ܕܒܢ̈ܝ ܙܒܘܪ ܐܡܪܝ

34. Nehemia 3:3

    ܘܬܪܥܐ ܕܨܝ̈ܕܐ ܒܢܐܘܗܝ ܒܢ̈ܝ ܣܢܐܐ ܘܗܢܘܢ ܐܬܩܢܘܗܝ ܘܐܩܝܡܘ ܬܪ̈ܥܘܗܝ ܘܣܘܟܪ̈ܘܗܝ ܘܡܘ̈ܟܠܘܗܝ

35. Nehemia 3:4

    ܘܥܕܡܐ ܠܬܚܘܡܐ ܬ̇ܩܦ ܡܪܡܘܬ ܒܪ ܐܘܪܝܐ ܒܪ ܐܩܘܨ ܘܥܕܡܐ ܠܬܚܘܡܐ ܬܩܦ ܡܫܠܡ ܒܪܟܢܝܐ ܒܪ ܡܫܝܙܟܠ ܘܥܕܡܐ ܠܬܚܘܡܐ ܬܩܦ ܙܕܘܩ ܒܪ ܒܥܢܐ

36. Nehemia 3:5

    ܘܥܕܡܐ ܠܬܚܘܡܐ ܬ̇ܩܦܘ ܬܩܘ̈ܥܝܐ ܘܫܠܝܛܢ̈ܝܗܘܢ ܘܠܐ ܐܥܠܘ ܨܘܪܗܘܢ ܒܦܘܠܚܢܐ ܕܡܪ̈ܝܗܘܢ

37. Nehemia 3:6

    ܘܬܪܥܐ ܕܬܪܝܢ ܬ̇ܩܦ ܝܘܝܕܥ ܒܪ ܦܨܚ ܘܡܫܠܡ ܒܪ ܒܣܪܝܐ ܘܗܢܘܢ ܐܬܩܢܘܗܝ ܘܐܩܝܡܘ ܬܪ̈ܥܘܗܝ ܘܣܘܟܪ̈ܘܗܝ ܘܡܘ̈ܟܠܘܗܝ

38. Nehemia 3:7

    ܘܥܕܡܐ ܠܬܚܘܡܐ ܬ̇ܩܦ ܡܠܛܝܐ ܓܒܥܘܢܝܐ ܘܢܕܘܢ ܡܪܬܝܐ ܐܢܫܐ ܕܓܒܥܘܢ ܘܕܡܨܦܝܐ ܥܒܕܘ ܟܘܪܣܝܐ ܠܫܠܝܛ ܥܒܪ ܢܗܪܐ

39. Nehemia 3:8

    ܘܬܚܘܡܐ ܬ̇ܩܦ ܥܙܐܝܠ ܒܪ ܚܕܝܐ ܒܪ ܨܪܦܝܐ ܘܬܚܘܡܐ ܬܩܦ ܚܢܢܝܐ ܒܪ ܩܕܚܝܐ ܘܫܒܩܘ ܐܘܪܫܠܡ ܟܕ ܫܘܪܗ̇ ܐܪܘܝܚ

40. Nehemia 3:9

    ܘܬܚܘܡܐ ܬ̇ܩܦ ܐܪܡܝܐ ܒܪ ܚܘܪ ܫܠܝܛܐ ܕܐܘܪܫܠܡ

41. Nehemia 3:10

    ܘܬܚܘܡܐ ܬ̇ܩܦ ܚܕܝܐ ܒܪ ܚܕܘܡܦܝ ܘܪܒܐ ܕܒܝܬܗ ܘܬܚܘܡܐ ܬ̇ܩܦ ܚܛܘܫ ܒܪ ܚܫܒܢܝܐ

42. Nehemia 3:11

    ܘܡܫܘܚܬܐ ܕܬܪ̈ܬܝܢ ܬ̇ܩܦ ܡܠܟܝܐ ܒܪ ܚܪܡ ܘܚܫܘܡ ܒܪ ܪܒܐ ܕܡܘܐܒ ܘܡܓܕܠܐ ܕܐܫܬܚܪ

43. Nehemia 3:12

    ܘܥܕܡܐ ܠܬܚܘܡܐ ܬ̇ܩܦ ܫܠܘܡ ܒܪ ܚܠܘܫ ܫܠܝܛܐ ܕܐܘܪܫܠܡ ܗܘ ܘܒܢ̈ܘܗܝ

44. Nehemia 3:13

    ܘܬܪܥܐ ܕܦܩܥܬܐ ܬ̇ܩܦ ܚܢܘܢ ܥܡܘܪܐ ܕܙܝܘܚ ܗܢܘܢ ܒܢܐܘܗܝ ܘܐܩܝܡܘ ܬܪ̈ܥܘܗܝ ܘܣܘܟܪ̈ܘܗܝ ܘܡܘ̈ܟܠܘܗܝ ܘܐܠܦ ܐܡ̈ܝܢ ܗ̇ܘܐ ܒܫܘܪܐ ܥܕܡܐ ܠܬܪܥܐ ܕܐܣܦܘܬ

45. Nehemia 3:14

    ܘܬܪܥܐ ܕܐܣܦܘܬ ܬ̇ܩܦ ܡܠܟܝܐ ܒܪ ܪܟܒ ܫܠܝܛܐ ܕܒܝܬ ܟܪ̈ܡܐ ܗܢܘܢ ܒܢܐܘܗܝ ܘܐܩܝܡܘ ܬܪ̈ܥܘܗܝ ܘܣܘܟܪ̈ܘܗܝ ܘܡܘ̈ܟܠܘܗܝ

46. Nehemia 3:15

    ܘܬܪܥܐ ܕܥܝܢܐ ܬ̇ܩܦ ܫܠܘܡ ܒܪ ܚ̣ܙܐ ܫܠܝܛܐ ܕܡܨܦܝܐ ܗܢܘܢ ܒܢܐܘܗܝ ܘܛܠܠܘܗܝ ܘܐܩܝܡܘ ܬܪ̈ܥܘܗܝ ܘܣܘܟܪ̈ܘܗܝ ܘܡܘ̈ܟܠܘܗܝ ܘܫܘܪܐ ܕܦܣܩܝܢ ܕܡܦܩܐ ܡܝ̈ܐ ܠܓܢܬ ܡܠܟܐ ܘܥܕܡܐ ܠܡܣܩܬܐ ܕܢܚܬܐ ܡܢ ܩܪܝܬܗ ܕܕܘܝܕ

47. Nehemia 3:16

    ܒܬܪܗ ܬ̇ܩܦ ܢܚܡܝܐ ܒܪ ܚܙܒܘܩ ܫܠܝܛܐ ܕܒܝܬ ܨܘܪ ܥܕܡܐ ܠܫܒܝܠܐ ܕܩܒܪܗ ܕܕܘܝܕ ܘܥܕܡܐ ܠܦܣܩܝܢ ܕܥܒܝܕܐ ܘܥܕܡܐ ܠܒܝܬ ܓܢܒܪ̈ܐ

48. Nehemia 3:17

    ܒܬܪܗ ܥ̣ܫܢ ܠܘܝܐ ܪܚܘܡ ܒܪ ܒ̇ܢܝ ܥܕܡܐ ܠܬܚܘܡܐ ܕܚܫܒܝܐ ܫܠܝܛܐ ܕܡܥܠܢܐ

49. Nehemia 3:18

    ܒܬܪܗ ܥܫܢܘ ܐܚܝ̈ܗܘܢ ܒܘܙܝ ܒܪ ܚܕܪ ܫܠܝܛܐ ܕܩܥܝܠܐ

50. Nehemia 3:19

    ܘܥ̣ܫܢ ܥܕܡܐ ܠܬܚܘܡܐ ܕܥܙܪ ܒܪ ܝܫܘܥ ܫܠܝܛܐ ܕܡܨܦܝܐ ܡܫܘܚܬܐ ܕܬܪ̈ܬܝܢ ܡܢ ܠܘܩܒܠ ܡܣܩܬܐ ܕܐܙܠܐ ܠܩܡܨܘܥ

51. Nehemia 3:20

    ܘܡܢ ܒܬܪܗ ܐ̣ܚܕ ܘܥ̣ܫܢ ܒܪܘܟ ܒܪ ܙܟܝ ܡܫܘܚܬܐ ܕܬܪ̈ܬܝܢ ܥܕܡܐ ܠܩܡܨܘܥ ܘܥܕܡܐ ܠܬܪܥܐ ܕܒܝܬ ܐܠܝܫܒ ܟܗܢܐ ܪܒܐ

52. Nehemia 3:21

    ܒܬܪܗ ܥܫܢ ܡܪܡܘܬ ܒܪ ܐܘܪܝܐ ܡܢ ܐܩܘܨ ܡܫܘܚܬܐ ܕܬܪ̈ܬܝܢ ܡܢ ܬܪܥܐ ܕܒܝܬ ܐܠܝܫܒ ܘܥܕܡܐ ܠܣܘܦܐ ܕܒܝܬ ܐܠܝܫܒ

53. Nehemia 3:22

    ܒܬܪܗ ܥܫܢܘ ܟܗ̈ܢܐ ܐܢܫܐ ܕܦܩܥܬܐ

54. Nehemia 3:23

    ܒܬܪܗ ܐܥܫܢ ܒܢܝܡܝܢ ܘܚܫܘܒ ܪܒܐ ܕܒܝܬܗ ܒܬܪܗ ܐܥܫܢ ܥܙܪܝܐ ܒܪ ܡܥܣܝܐ ܒܪ ܥܢܢܝܐ ܒܣܬܪ ܒܝܬܗ

55. Nehemia 3:24

    ܒܬܪܗ ܐܥܫܢ ܒܙܘܝ ܒܪ ܚܝܕܪ ܡܫܘܚܬܐ ܕܬܪܬܝܢ ܡܢ ܒܝܬ ܥܙܪܝܐ ܥܕܡܐ ܠܡܨܘܥ ܘܥܕܡܐ ܠܦܢܝܬܐ

56. Nehemia 3:25

    ܕܦܠܐ ܒܪ ܐܙܝ ܡܢ ܠܘܩܒܠ ܡܩܨܘܥ ܘܥܕܡܐ ܠܡܓܕܠܐ ܕܦܩܥܬܐ ܕܢ̇ܦܩ ܡܢ ܒܝܬ ܡܠܟܐ ܥܠܝܐ ܘܥܕܡܐ ܠܕܪܬܐ ܕܒܝܬ ܐܣܝܪ̈ܐ ܒܬܪܗ ܦܪܝܐ ܒܪ ܦܪܥܫ

57. Nehemia 3:26

    ܘܢܬ̈ܢܝܐ ܕܗܘܘ ܝܬܒܝܢ ܒܦܥܠ ܥܕܡܐ ܠܬܪܥܐ ܕܡ̈ܝܐ ܠܡܕܢܚܐ ܘܡܓܕܠܐ ܕܡܦܩܢܐ

58. Nehemia 3:27

    ܒܬܪܗ ܥܫܢܘ ܬܩܘ̈ܥܝܐ ܡܫܘܚܬܐ ܕܬܪ̈ܬܝܢ ܡܢ ܠܘܩܒܠ ܡܓܕܠܐ ܪܒܐ ܕܡܦܩܢܐ ܘܥܕܡܐ ܠܫܘܪܐ ܥܫܝܢܐ

59. Nehemia 3:28

    ܡܢ ܡܥܠܢܐ ܕܬܪܥܐ ܕܪ̈ܟܫܐ ܐܥܫܢܘ ܟܗ̈ܢܐ ܐܢܫ ܠܘܩܒܠ ܒܝܬܗ

60. Nehemia 3:29

    ܒܬܪܗܘܢ ܐܥܫܢ ܨ̇ܕܘܩ ܒܪ ܐܡܝܪ ܠܘܩܒܠ ܒܝܬܗ ܒܬܪܗ ܐܥܫܢ ܫܡܥܝܐ ܒܪ ܫܟܢܝܐ ܢ̇ܛܪ ܬܪܥܐ ܡܕܢܚܝܐ

61. Nehemia 3:30

    ܒܬܪܗ ܐܥܫܢ ܚܢܢܝܐ ܒܪ ܫܠܡܝܐ ܘܚܢܘܢ ܒܪ ܨܠܦ ܫܬܝܬܝܐ ܡܫܘܚܬܐ ܕܬܪ̈ܬܝܢ ܒܬܪܗ ܐܥܫܢ ܡܫܠܘܡ ܒܪ ܒܪܟܝܐ ܠܘܩܒܠ ܒܝܬܗ ܒܬܪܗ ܐܥܫܢ ܒܢܘܢ ܒܪ ܚܝܕܪ ܡܫܘܚܬܐ ܕܬܪ̈ܬܝܢ

62. Nehemia 3:31

    ܒܬܪܗ ܐܥܫܢ ܡܠܟܝܐ ܒܪ ܨܪܦܝܐ ܥܕܡܐ ܠܒܝܬ ܢܬ̈ܢܝܐ ܘܕܟ̈ܠܝܐ ܠܘܩܒܠ ܬܪܥܐ ܕܡܦܩܢܐ ܘܥܕܡܐ ܠܡܣܩܢܐ ܕܦܢܝܬܐ

63. Nehemia 3:32

    ܕܒܝܬ ܡܣܩܬܐ ܕܦܢܝܐ ܠܬܪܥܐ ܕܓ̇ܫܐ ܥܫܢܘ ܨܪ̈ܦܝܐ ܘܕܟ̈ܠܝܐ

64. Nehemia 3:33

    ܘܟܕ ܫ̣ܡܥ ܣܡܒܠܝܛ ܕܒ̇ܢܝܢܢ ܫܘܪܐ ܟܪܝܬ ܠܗ ܘܣ̣ܓܝ ܪܘܓܙܗ ܘܡܝܩ ܥܠܝܗܘܢ ܥܠ ܝܗܘ̈ܕܝܐ

65. Nehemia 3:34

    ܘܐ̣ܡܪ ܠܐܚ̈ܘܗܝ ܘܠܚܝܠܐ ܕܫܡܪ̈ܝܐ ܡܢܐ ܥܒܕܝܢ ܝܗܘ̈ܕܝܐ ܘܡܫܬܒܗܪܝܢ ܫܒܘܩܘ ܠܗܘܢ ܡܕܒܚܝܢ ܘܐܟܠܝܢ ܒܝܘܡܐ ܕܐܩܝܡܘ ܟܐ̈ܦܐ ܗܠܝܢ ܡܢ ܩܩܠܬܐ ܕܥܦܪܐ ܘܝܩܝ̈ܕܢ ܐܢ̈ܝܢ

66. Nehemia 3:35

    ܘܛܘܒܝܐ ܥܡܘܢܝܐ ܩ̇ܐܡ ܗ̣ܘܐ ܠܘܬܗ ܘܐ̣ܡܪ ܟܡܐ ܕܗܢܘܢ ܒܢܝܢ ܝ̇ܕܥ ܐܢܐ ܕܣ̇ܠܩ ܬܥܠܐ ܘܥ̇ܩܪ ܟܐ̈ܦܐ ܕܫܘܪ̈ܝܗܘܢ

67. Nehemia 3:36

    ܫܡܥ ܐܠܗܢ ܡܛܠ ܕܗܘܝܢ ܓܘܚܟܐ ܘܐܗܦܟ ܨܥܪܗܘܢ ܒܪܫܗܘܢ ܘܗܒ ܐܢܘܢ ܠܒܙܬܐ ܒܐܪܥܐ ܕܫܒܝܬܗܘܢ

68. Nehemia 3:37

    ܠܐ ܬܫܒܘܩ ܠܚܘ̈ܒܝܗܘܢ ܘܚܛܗܝ̈ܗܘܢ ܡܢ ܩܕܡܝܟ ܠܐ ܢܬܥܛܘܢ ܡܛܠ ܕܪܓܙܘ ܠܘܩܒܠ ܒܢܝܢܐ ܕܒܢܝܢ

69. Nehemia 3:38

    ܘܚܢܢ ܢܒܢܝܘܗܝ ܠܫܘܪܐ ܘܒܢܐܘܗܝ ܘܓ̣ܡܪ ܫܘܪܐ ܥܕܡܐ ܠܦܠܓܗ ܗܝܕܝܢ ܐܬܦܬܚ ܦܘܡܐ ܕܟܘܠܗ ܥܡܐ ܠܡܥܒܕ

70. Nehemia 4:1

    ܗܝܕܝܢ ܟܕ ܫ̣ܡܥ ܣܡܒܠܝܛ ܘܛܘܒܝܐ ܘܥܪ̈ܒܝܐ ܘܥܡܘ̈ܢܝܐ ܘܐܫܕܘ̈ܕܝܐ ܕܐܬܝܗܒ ܙܒܢܐ ܠܫܘܪܐ ܕܐܘܪܫܠܡ ܠܡܬܒܢܝܘ ܘܫ̇ܪܝ ܬܘܪ̈ܥܬܐ ܠܡܣܬܟܪܘ ܟܪܝܬ ܠܗܘܢ ܛܒ

71. Nehemia 4:2

    ܘܐܬܚܫܒܘ ܟܠܗܘܢ ܐܟܚܕܐ ܠܡܐܬܐ ܠܡܬܟܬܫܘ ܒܐܘܪܫܠܡ ܘܠܡܥܒܕ ܠܗܘܢ ܬܘܩܠܬܐ

72. Nehemia 4:3

    ܘܨ̇ܠܝܢ ܩܕܡ ܐܠܗܐ ܕܢܩܝܡ ܥܠܝܢ ܢܛܘܪ̈ܐ ܒܐܝܡܡܐ ܘܒܠܠܝܐ ܡܢ ܩܕܡܝܗܘܢ

73. Nehemia 4:4

    ܘܐܡܪܝܢ ܝܗܘ̈ܕܝܐ ܒ̣ܨܪ ܠܗ ܚܝܠܐ ܡܢ ܩܘܦ̈ܝܐ ܘܥܦܪܐ ܣ̇ܓܝ ܛܒ ܘܚܢܢ ܠܐ ܡܫܟܚܝܢ ܚܢܢ ܠܡܒܢܐ ܫܘܪܐ

74. Nehemia 4:5

    ܘܐܡܪܝܢ ܣܢܐܝ̈ܢ ܕܠܐ ܢܕܥܘܢ ܘܠܐ ܢܚܙܘܢ ܥܕܡܐ ܕܢܦܠ ܥܠܝܗܘܢ ܘܢܩ̇ܛܠ ܐܢܘܢ ܘܢܒ̇ܛܠ ܥ̇ܒܕܗܘܢ

75. Nehemia 4:6

    ܘܐܬܘ ܝܗܘ̈ܕܝܐ ܕܝܬܒܝܢ ܠܘܬܗܘܢ ܘܐܡܪܝܢ ܠܢ ܗܐ ܡܟܝܠ ܥܣܪ ܙܒ̈ܢܝܢ ܐܬܘ ܠܡܬܟܬܫܘ ܥܡܟܘܢ ܡܢ ܟܘܠܗܘܢ ܐܬܪ̈ܘܬܐ ܐܝܠܝܢ ܕܫ̣ܕܝܢ ܗܘܘ ܒܗܘܢ

76. Nehemia 4:7

    ܘܐܬܘ ܘܩܡܘ ܡܢ ܒܣܬܪ ܫܘܪܐ ܠܡܬܟܬܫܘ ܥܡܟܘܢ ܒܓܐܪ̈ܝܗܘܢ ܘܦܠܓܘܗܝ ܠܚܝܠܐ ܠܛܘܗܡ̈ܐ ܥܡ ܣܝ̈ܦܝܗܘܢ ܘܪ̈ܘܡܚܐ ܘܩ̈ܫܬܬܐ

77. Nehemia 4:8

    ܘܕܚ̇ܠܬ ܘܩܡ̇ܬ ܘܐܡ̇ܪܬ ܠܪ̈ܘܪܒܢܐ ܘܠܫܠܝ̈ܛܢܐ ܘܠܫܪܟܐ ܕܥܡܐ ܠܐ ܬܕܚܠܘܢ ܡܢ ܩܕܡܝܗܘܢ ܠܡܪܝܐ ܪܒܐ ܘܕܚܝܠܐ ܐܬܕܟܪܘ ܘܐܬܟܬܫܘ ܥܠ ܐܦܝ̈ ܐܚܝ̈ܟܘܢ ܘܥܠ ܐܦܝ̈ ܒܢܝ̈ܟܘܢ ܘܒܢ̈ܬܟܘܢ

78. Nehemia 4:9

    ܗܝܕܝܢ ܟܕ ܫܡܥܘ ܒܥܠܕܒ̈ܒܝܢ ܕܐܬܝܕܥ̣ܬ ܠܢ ܡܠܬܐ ܘܒ̇ܛܠ ܡܪܝܐ ܡܘ̈ܠܟܢܝܗܘܢ ܐܬܗܦܟܢ ܟܘܠܢ ܘܣܠܩܢ ܠܫܘܪܐ ܘܥܒܕܝܢ ܗܘ̣ܝܢ ܟܠܢ ܓܒܪ ܒܥ̇ܒܕܗ

79. Nehemia 4:10

    ܘܦܠܓܐ ܕܥܠܝ̈ܡܐ ܡܢ ܝܘܡܐ ܗ̇ܘ ܘܠܗܠ ܦܠܓܗܘܢ ܕܥܡܐ ܥܒܕܝܢ ܥ̇ܒܕܐ ܘܦܠܓܗܘܢ ܐܚܝܕܝܢ ܪ̈ܘܡܚܐ ܘܣܟܪ̈ܐ ܘܩܫ̈ܬܬܐ ܘܫܪ̈ܝܢܐ ܘܡܫܡ̈ܫܢܐ ܩܝܡܝܢ ܒܣܬܪ ܝܗܘ̈ܕܝܐ

80. Nehemia 4:11

    ܘܒ̇ܢܝܢ ܫܘܪܐ ܘܕܫܩܝܠܝܢ ܒܩܘ̈ܦܐ ܫܩܝܠܝܢ ܒܚܕܐ ܐܝܕܗ ܥ̇ܒܕ ܥ̇ܒܕܐ ܘܒܚܕܐ ܫܩܝܠ ܙܝܢܐ

81. Nehemia 4:12

    ܘܐܪܕܟܠܐ ܐܚܝܕ ܓܒܪ ܣܝܦܐ ܘܩܐܡ ܘܒ̇ܢܐ ܘܕܩ̇ܪܐ ܒܩܪܢܐ ܩܐܡ ܒܣܬܪܗ

82. Nehemia 4:13

    ܘܐܡ̇ܪܬ ܠܪ̈ܘܪܒܢܐ ܘܠܫܠܝ̈ܛܢܐ ܘܠܫܪܟܐ ܕܥܡܐ ܥܒܝܕܬܐ ܣܓܝܐܐ ܘܐܪܘܝܚܐ ܘܚܢܢ ܦܪܝܫܝܢܢ ܘܩܝܡܝܢܢ ܥܠ ܫܘܪܐ ܘܦܪܝܩܝܢ ܚܢܢ ܓܒܪ ܡܢ ܐܚܘܗܝ

83. Nehemia 4:14

    ܘܒܕܘܟܬܐ ܕܝܢ ܕܫܡܥܝܬܘܢ ܩܠܐ ܕܩܪܢܐ ܠܬܡܢ ܬܬܩܪܒܘܢ ܠܘܬܢ ܘܐܠܗܢ ܢܬܟܬܫ ܥܠ ܐܦܝ̈ܢ

84. Nehemia 4:15

    ܘܚܢܢ ܢܗܘܐ ܥܒܕܝܢ ܒܥ̇ܒܕܢ ܘܦܠܓܢ ܢܗܘܘܢ ܐܚܝܕܝܢ ܪ̈ܘܡܚܐ ܡܢ ܡܣ̈ܩܝ ܫܦ̣ܪܐ ܥܕܡܐ ܕܢܦܩܝܢ ܟܘܟ̈ܒܐ

85. Nehemia 4:16

    ܐܦ ܒܗ ܒܙܒܢܐ ܗ̇ܘ ܐܡ̇ܪܬ ܠܥܡܐ ܕܓܒܪܐ ܘܛܠܝܗ ܢܗܘܘܢ ܒܝܬܝܢ ܒܓܘ ܫܘܩ̈ܐ ܕܐܘܪܫܠܡ ܘܢܗܘܘܢ ܢܛܪܝܢ ܠܗ̇ ܒܠܠܝܐ ܘܒܐܝܡܡܐ ܘܢܗܘܘܢ ܥܒܕܝܢ ܥ̇ܒܕܐ

86. Nehemia 4:17

    ܘܐܢܐ ܘܐܚܝ̈ ܘܛܠܝ̈ܝ ܘܐܢ̈ܫܐ ܢܛܘܪ̈ܐ ܕܒܬܪܝ ܠܐ ܫܠܚܝܢܢ ܢܚ̈ܬܝܢ ܝܪܚܐ ܕܝܘܡ̈ܬܐ ܐܢܫ ܕܡ̇ܛܐ ܠܗ

87. Nehemia 5:1

    ܘܗܝܕܝܢ ܐܝܠܠܘ ܥܡܐ ܘܢܫ̈ܝܗܘܢ ܝܠܠܬܐ ܪܒܬܐ ܥܠ ܐܚܝ̈ܗܘܢ ܝܗܘ̈ܕܝܐ

88. Nehemia 5:2

    ܘܐܝܬ ܕܐܡܪܝܢ ܒܢܝ̈ܢ ܘܒܢ̈ܬܢ ܘܐܚܝ̈ܢ ܣܓܝܐܝܢ ܢܣܒ ܥܒܘܪܐ ܘܢܐܟܘܠ ܘܢܚܐ

89. Nehemia 5:3

    ܘܐܝܬ ܕܐܡܪܝܢ ܚܩ̈ܠܬܢ ܘܒ̈ܬܝܢ ܘܟܪ̈ܡܝܢ ܡܙ̇ܒܢܝܢܢ ܘܢܣܒܝܢܢ ܥܒܘܪܐ ܒܟܦܢܐ ܘܚܝܝܢ ܚܢܢ

90. Nehemia 5:4

    ܘܐܝܬ ܕܐܡܪܝܢ ܢܐܙܦ ܟܣܦܐ ܡܢ ܡܕܐܬܐ ܕܡ̇ܠܟܐ ܘܢܦܠܘܚ ܚܩ̈ܠܬܢ ܘܟܪ̈ܡܝܢ ܘܢܚܐ

91. Nehemia 5:5

    ܘܐܝܬ ܕܐܡܪܝܢ ܡܟܝܠ ܐܝܟ ܒܣܪܐ ܕܐܚܝ̈ܢ ܗܟܢܐ ܐܦ ܒܣܪܢ ܘܐܝܟ ܒܢܝ̈ܗܘܢ ܗܟܢܐ ܐܦ ܒܢܝ̈ܢ ܗܐ ܡܟܝܠ ܟܒܫܝܢܢ ܒܢ̈ܝܢ ܘܒܢ̈ܬܢ ܠܥ̇ܒ̈ܕܝܢ ܘܐܝܬ ܡܢ ܒܢ̈ܬܢ ܕܡܬܟ̈ܒܫܢ ܠܐܡܗ̈ܬܐ ܘܠܐ ܡܪܝܡܝܢ ܩܕܡ ܐܠܗܐ ܐܝ̈ܕܝܗܘܢ ܘܚܩ̈ܠܬܢ ܘܟܪ̈ܡܝܢ ܘܢܟܣ̈ܝܢ ܡܬܝܗܒܝܢ ܠܐܚܪ̈ܢܐ

92. Nehemia 5:6

    ܘܟܪܝܬ ܠܝ ܛܒ ܟܕ ܫܡ̇ܥܬ ܐܝܠܠܬܗܘܢ ܘܡ̈ܠܐ ܗܠܝܢ

93. Nehemia 5:7

    ܘܐܬܬܒܪ ܠܒܝ ܒܓܘܝ ܘܐܓܪܬ ܪܘܚܝ ܘܡ̇ܠܠܬ ܥܡ ܩܫܝ̈ܫܐ ܘܥܡ ܪ̈ܘܪܒܢܐ

94. Nehemia 5:8

    ܘܐܡ̇ܪܬ ܠܗܘܢ ܕܚܢܢ ܩܢܝܢ ܚܢܢ ܠܐܚܝ̈ܢ ܝܗܘ̈ܕܝܐ ܕܡܙܕܒܢܝܢ ܠܥܡܡ̈ܐ ܗܢܘܢ ܘܒܢܝ̈ܗܘܢ ܓܒܪܐ ܠܐܚܘܗܝ ܫܩܠܝܢ ܐܢܬܘܢ ܡܛܠ ܗܢܐ ܝܗ̇ܒܬ ܥܠܝܗܘܢ ܩܠܐ ܘܐܡ̇ܪܬ ܠܗܘܢ ܐܦ ܐܢܬܘܢ ܬܙܒܢܘܢ ܠܐܚܝ̈ܟܘܢ ܘܫܬܩܘ ܘܠܐ ܝܗܒܘ ܠܝ ܦܬܓܡ

95. Nehemia 5:9

    ܘܐܡ̇ܪܬ ܠܗܘܢ ܠܐ ܫܦܝܪ ܦܬܓܡܐ ܕܐܢܬܘܢ ܥܒܕܝܢ ܡܟܝܠ ܒܕܚܠܬܐ ܕܐܠܗܢ ܠܐ ܡܗܠܟܝܢ ܐܢܬܘܢ ܡܛܠ ܕܥܒܕܝܢ ܐܢܬܘܢ ܐܝܟ ܥ̇ܒ̈ܕܐ ܕܥܡ̈ܡܐ ܕܒܚܕܪܝܢ

96. Nehemia 5:10

    ܘܐܦ ܐܢܐ ܘܒܢܝ̈ ܘܐܚܝ̈ ܢܣܒ ܟܣܦܐ ܢܙܒܢ ܥܒܘܪܐ ܘܢܫܒܘܩ ܠܡܣ̈ܟܢܐ ܕܐܝܬ ܒܥܡܢ

97. Nehemia 5:11

    ܘܢܦܢܐ ܠܗܘܢ ܚܩ̈ܠܬܗܘܢ ܘܟܪ̈ܡܝܗܘܢ ܘܙܝ̈ܬܝܗܘܢ ܘܒ̈ܬܝܗܘܢ ܘܟܣܦܐ ܘܥܒܘܪܐ ܘܚܡܪܐ ܘܡܫܚܐ ܢܫܒܘܩ ܠܫܪܟܐ ܕܥܡܐ

98. Nehemia 5:12

    ܘܐܡܪܝܢ ܠܝ ܗܟܢܐ ܢܥܒܕ ܐܝܟ ܕܐܢܬ ܐܡ̇ܪ ܘܩ̇ܪܝܬ ܠܟܘܡܪ̈ܐ ܘܐܡ̇ܪܬ ܠܗܘܢ ܕܗܟܢܐ ܘ̇ܠܐ ܠܡܥܒܕ ܘܐܘܡ̇ܝܬ ܐܢܘܢ ܠܡܥܒܕ ܐܝܟ ܦܬܓܡܐ ܗܢܐ

99. Nehemia 5:13

    ܘܐܦ ܠܛܠܝ̈ܐ ܕܩܕܩ̈ܐ ܘܐܡܪܝܢ ܕܗܟܢܐ ܢܙܝܥ ܐܠܗܐ ܠܟܠ ܓܒܪ ܕܠܐ ܢܩܝܡ ܥܠ ܡܠܬܐ ܗܕܐ ܡܢ ܒܝܬܗ ܘܡܢ ܠܐܘܬܗ ܗܟܢܐ ܢܗܘܐ ܡܙܝܥ ܘܪܝܩܢ ܘܐܡܪܝܢ ܥܡܐ ܟܠܗ ܐܡܝܢ ܘܩܡܘ ܥܡܐ ܟܘܠܗ ܘܫܒܚܘ ܠܡܪܝܐ ܘܥܒܕܘ ܟܘܠܗ ܥܡܐ ܐܝܟ ܦܬܓܡܐ ܗܢܐ

100. Nehemia 5:14

     ܐܦ ܡܢ ܝܘܡܐ ܕܦܩܕܢܝ ܠܡܗܘܐ ܫܠܝܛܐ ܒܐܪܥܐ ܕܝܗܘܕ ܡܢ ܫܢܬ ܥܣܪ̈ܝܢ ܘܥܕܡܐ ܠܫܢܬ ܬܠܬܝܢ ܘܬܪ̈ܬܝܢ ܠܐܪܛܚܫܫܬ ܡܠܟܐ ܫܢ̈ܝܢ ܬܪܬܥܣܪܐ ܐܢܐ ܘܐܚܝ̈ ܗ̇ܘܝܬ ܠܗܘܢ ܪܫܐ ܘܠܐ ܚܡ̇ܪܐ ܕܚܕ ܡܢܗܘܢ ܕܒ̇ܪܬ ܘܐܦܠܐ ܐܗ̇ܪܬ ܠܐܢܫ ܡܢܗܘܢ

Next → — showing 1–100 of 405

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.