← All works

Peshitta Maccabees 2

Peshitta (Syriac Old Testament) · 555 sections

1. Maccabees 2 14:31

   ܘܟܕ ܕܝܢ ܝܕܥ ܕܐܬܛܝܒ ܝܗܘܕܐ ܘܐܬܚܙܩ ܒܚܝܠܗ ܥܠ ܠܗܝܟܠܐ ܪܒܐ ܘܩܕܝܫܐ ܟܕ ܩܝܡܝܢ ܟܗ̈ܢܐ ܘܡܩܪܒܝܢ ܩܘܪ̈ܒܢܐ ܘܐܡܪ ܠܗܘܢ ܗܒܘ ܠܝ ܠܝܗܘܕܐ

2. Maccabees 2 14:32

   ܘܗܢܘܢ ܕܝܢ ܝܡܝܢ ܗܘܘ ܘܐܡܪܝܢ ܠܗ ܕܠܐ ܚܙܐ ܠܢ ܘܠܐ ܝܕܥܝܢܢ ܐܝܟܐ ܐܝܬܘܗܝ

3. Maccabees 2 14:33

   ܘܐܪܝܡ ܐܝܕܗ ܠܘܩܒܠ ܗܝܟܠܐ ܘܝܡܐ ܠܗܘܢ ܗܟܢܐ ܕܐܠܐ ܬܫܠܡܘܢܝܗܝ ܠܝܗܘܕܐ ܟܕ ܦܟܝܪ ܠܗܢܐ ܗܝܟܠܐ ܕܐܠܗܐ ܐܥܒܕܝܘܗܝ ܐܝܟ ܡܕܒܪܐ ܘܠܡܕܒܚܐ ܐܣܚܘܦ ܘܐܒܢܐ ܒܕܘܟܬܗ ܠܕܝܘܢܣܘܣ ܗܝܟܠܐ ܝܕܝܥܐ

4. Maccabees 2 14:34

   ܘܟܕ ܐܡܪ ܗܠܝܢ ܟܠܗܝܢ ܫܢܝ ܟܗ̈ܢܐ ܕܝܢ ܦܪܣܘ ܐܝܕܝ̈ܗܘܢ ܠܘܬ ܥܡܘܪܐ ܕܫܡܝܐ ܘܒܥܝܢ ܗܘܘ ܘܡܨܠܝܢ ܡܢ ܗܘ ܕܗܘ ܗܘܐ ܒܟܠܙܒܢ ܡܥܕܪܢܐ ܠܥܡܗ ܘܐܡܪܝܢ ܗܘܘ

5. Maccabees 2 14:35

   ܐܢܬ ܡܪܝܐ ܕܟܠ ܕܥܠ ܡܕܡ ܠܐ ܣܢܝܩ ܐܢܬ ܐܢܬ ܐܨܛܒܝܬ ܕܬܓܒܐ ܠܟ ܐܬܪܐ ܠܗܝܟܠܟ ܕܬܫܪܐ ܫܟܝܢܬܟ ܒܝܢܬܢ

6. Maccabees 2 14:36

   ܘܗܫܐ ܡܪܝܐ ܩܕܝܫܐ ܕܟܠ ܩܕܝܫ̈ܐ ܐܢܬ ܢܛܪ ܠܥܠܡ ܠܗܢܐ ܐܬܪܐ ܘܠܒܝܬܐ ܕܠܐ ܛܘܠܫܐ ܕܒܗܢܐ ܙܒܢܐ ܐܬܕܟܝ ܘܣܟܘܪ ܕܝܢ ܟܘܠ ܦܘܡܐ ܕܥܘ̈ܠܐ

7. Maccabees 2 14:37

   ܓܒܪܐ ܕܝܢ ܚܕ ܕܫܡܗ ܗܘܐ ܪܓܫ ܡܢ ܣܒ̈ܐ ܕܐܘܪܫܠܡ ܐܬܐܡܪ ܗܘܐ ܥܠܘܗܝ ܠܢܝܩܢܘܪ ܕܓܒܪܐ ܗܘ ܕܪܚܡ ܡܕܝܢܬܗ ܘܝܬܝܪܐܝܬ ܫܦܝܪ ܗܘܐ ܫܡܗ ܘܡܛܠ ܬܪܥܝܬܗ ܛܒܬܐ ܘܒܣܝܡܬܐ ܡܬܩܪܐ ܗܘܐ ܐܒܐ ܕܝܗܘ̈ܕܝܐ

8. Maccabees 2 14:38

   ܐܝܬܘܗܝ ܗܘܐ ܓܝܪ ܡܢ ܩܕܝܡ ܒܕܝܢܐ ܘܠܐ ܫܒܩ ܗܘܐ ܕܢܗܘܐ ܚܘܠܛܢܐ ܒܥܡܐ ܕܝܗܘ̈ܕܝܐ ܡܫܠܡܐ ܗܘܬ ܓܝܪ ܢܦܫܗ ܘܦܓܪܗ ܒܟܘܠ ܨ̈ܠܘܢ ܘܒܥ̈ܘܢ ܥܠ ܐ̈ܦܝ ܕܘܒܪ̈ܐ ܕܝܗܘܕܝܘܬܐ

9. Maccabees 2 14:39

   ܢܝܩܢܘܪ ܕܝܢ ܡܛܠ ܕܨܒܐ ܗܘܐ ܕܢܘܕܥ ܣܢܐܬܐ ܕܐܝܬ ܗܘܬ ܠܗ ܥܡ ܝܗܘ̈ܕܝܐ ܫܕܪ ܐܝܟ ܚܡܫܡܐܐ ܡܢ ܦܠܚܘ̈ܗܝ ܕܢܐܚܕܘܢܝܗܝ

10. Maccabees 2 14:40

    ܐܡܪ ܗܘܐ ܓܝܪ ܕܟܕ ܠܗܢܐ ܐܚܘܕ ܥܩܬܐ ܪܒܬܐ ܐܥܒܕ ܠܝܗܘ̈ܕܝܐ

11. Maccabees 2 14:41

    ܟܕ ܕܝܢ ܐܬܐ ܟܢܫܐ ܘܚܕܪܘܗ ܠܕܪܬܗ ܒܥܝܢ ܗܘܘ ܕܢܦܬܚܘܢ ܬܪ̈ܥܐ ܘܢܘܩܕܘܢ ܐܢܘܢ ܒܢܘܪܐ ܘܗܘ ܕܝܢ ܟܕ ܚܙܐ ܕܩܪܒܘ ܕܢܐܚܕܘܢܝܗܝ ܫܩܠ ܣܝܦܐ ܘܡܚܐ ܒܟܪܣܗ

12. Maccabees 2 14:42

    ܡܛܠ ܕܨܒܐ ܗܘܐ ܕܚܐܪܐܝܬ ܢܡܘܬ ܘܠܐ ܢܫܬܠܡ ܠܪ̈ܫܝܥܐ ܘܠܥܘ̈ܠܐ ܘܢܨܥܪܘܢ ܐܝܩܪܐ ܕܣܝܒܘܬܗ

13. Maccabees 2 14:43

    ܘܠܐ ܥܢܬ ܡܚܘܬܗ ܡܛܠ ܣܘܪܗܒܐ ܘܪܗܝܒܘܬܐ ܘܟܕ ܥܠܘ ܟܢܫ̈ܐ ܠܓܘ ܡܢ ܬܪ̈ܥܐ ܕܕܪܬܐ ܫܘܪ ܘܣܠܩ ܠܗ ܠܫܘܪܐ ܓܢܒܪܐܝܬ ܘܚܝܠܬܢܐܝܬ ܘܫܕܐ ܢܦܫܗ ܡܨܥܬ ܟܢܫ̈ܐ

14. Maccabees 2 14:44

    ܘܗܢܘܢ ܕܝܢ ܒܪܫܥܬܗ ܟܕ ܚܙܘ ܫܢܝܘ ܘܝܗܒܘ ܐܬܪܐ

15. Maccabees 2 14:45

    ܘܟܕ ܥܕܟܝܠ ܚܝ ܗܘܐ ܘܡܬܓܘܙܠ ܗܘܐ ܒܚܡܬܐ ܕܛܢܢܐ ܫܘܪ ܘܩܡ ܟܕ ܪܕܐ ܗܘܐ ܡܢܗ ܕܡܐ ܣܓܝܐܐ ܡܛܠ ܕܩ̈ܫܝܢ ܗ̈ܘܝ ܡܚܘ̈ܬܗ ܘܪܗܛ ܘܥܒܪܗ ܠܟܠܗ ܗܘ ܟܢܫܐ ܘܩܡ ܥܠ ܟܐܦܐ ܚܕܐ ܪܡܬܐ

16. Maccabees 2 14:46

    ܟܕ ܡܦܠܦܠ ܗܘܐ ܟܠܗ ܒܕܡܐ ܘܐܦܩ ܡܥܘ̈ܗܝ ܘܐܚܕ ܐܢܘܢ ܒܬܪ̈ܬܝܗܝܢ ܐܝܕܘ̈ܗܝ ܘܚܘܝ ܠܥܡܐ ܘܨܠܝ ܘܒܥܐ ܘܩܪܐ ܠܗܘ ܕܫܠܝܛ ܥܠ ܚܝ̈ܐ ܘܥܠ ܪܘܚܐ ܕܬܘܒ ܢܬܠ ܘܢܦܢܐ ܐܢܘܢ ܠܗ ܘܗܝܕܝܢ ܢܦܩ ܡܢ ܥܠܡܐ

17. Maccabees 2 15:1

    ܢܝܩܢܘܪ ܕܝܢ ܫܡܥ ܘܝܠܦ ܥܠ ܕܒܝܬ ܝܗܘܕܐ ܕܐܝܬܝܗܘܢ ܥܠ ܓܢܒ ܫܡܪܝܢ ܘܐܬܪܥܝ ܕܒܝܘܡܐ ܕܢܝܚܐ ܕܫܒܬܐ ܢܪܡܐ ܥܠܝܗܘܢ ܡܢ ܫܠܝܐ ܒܥܡܐ ܣܓܝܐܐ

18. Maccabees 2 15:2

    ܝܗܘ̈ܕܝܐ ܕܝܢ ܡܬܪܡܝܢ ܗܘܘ ܠܗ ܒܐܘܠܨܢܐ ܣܓܝܐܐ ܘܐܡܪܝܢ ܗܘܘ ܠܗ ܠܐ ܬܥܒܕ ܗܟܢܐ ܘܬܘܒܕ ܩܫܝܐܝܬ ܠܐܢܫܐ ܕܠܐ ܫܘܝܢ ܐܠܐ ܗܒ ܬܫܒܘܚܬܐ ܠܝܘܡܐ ܪܒܐ ܘܩܕܝܫܐ ܕܡܝܩܪ ܡܢ ܥܒܘܕܐ ܘܒܪܘܝܐ ܕܟܠ

19. Maccabees 2 15:3

    ܪܫܝܥܐ ܕܝܢ ܘܛܡܐܐ ܫܐܠ ܕܐܢ ܐܝܬܘܗܝ ܚܝܠܬܢܐ ܒܫܡܝܐ ܗܘ ܕܦܩܕ ܥܠ ܝܘܡܐ ܕܫܒܬܐ

20. Maccabees 2 15:4

    ܗܢܘܢ ܕܝܢ ܥܢܘ ܘܐܡܪܘ ܠܗ ܐܝܬܘܗܝ ܡܪܝܐ ܚܝܐ ܘܗܘܝܘ ܚܝܠܬܢܐ ܒܫܡܝܐ ܕܗܘ ܦܩܕ ܕܢܬܢܛܪ ܝܘܡܐ ܕܫܒܬܐ

21. Maccabees 2 15:5

    ܘܛܡܐܐ ܘܪܫܝܥܐ ܥܢܐ ܘܐܡܪ ܘܐܦ ܐܢܐ ܚܝܠܬܢܐ ܐܢܐ ܥܠ ܐܪܥܐ ܕܦܩܕ ܐܢܐ ܠܟܘܢ ܕܬܣܒܘܢ ܙܝܢܐ ܘܬܥܒܕܘܢ ܨܒܘ̈ܬܗ ܕܡܠܟܐ ܘܠܐ ܐܬܟܠܝ ܕܠܐ ܢܣܥܘܪ ܬܪܥܝܬܗ ܛܡܐܬܐ

22. Maccabees 2 15:6

    ܘܡܫܬܩܠ ܗܘܐ ܗܘ ܢܝܩܢܘܪ ܘܡܬܪܝܡ ܒܫܘܒܗܪܐ ܣܓܝܐܐ ܘܝܠܦ ܗܘܐ ܥܠ ܕܒܝܬ ܝܗܘܕܐ ܕܟܢܝܫܝܢ ܐܢܘܢ ܘܡܛܝܒܝܢ ܘܗܘ ܝܬܝܪܐܝܬ ܡܬܥܙܙ ܗܘܐ

23. Maccabees 2 15:7

    ܝܗܘܕܐ ܕܝܢ ܡܩܒܝ ܡܣܒܪ ܗܘܐ ܘܬܟܝܠ ܡܫܠܡܢܐܝܬ ܕܥܒܕ ܠܗ ܐܠܗܐ ܦܘܪܩܢܐ

24. Maccabees 2 15:8

    ܘܡܒܝܐ ܗܘܐ ܘܐܡܪ ܠܐܝܠܝܢ ܕܥܡܗ ܕܠܐ ܢܕܚܠܘܢ ܡܢ ܟܢܫ̈ܐ ܕܥܡ̈ܡܐ ܕܐܬܝܢ ܥܠܝܗܘܢ ܡܥܗܕ ܗܘܐ ܠܗܘܢ ܕܝܢ ܘܡܕܟܪ ܬܘܒ ܥܘܕܪ̈ܢܐ ܕܡܢ ܩܕܝܡ ܕܗܘܘ ܠܗܘܢ ܡܢ ܫܡܝܐ ܘܗܟܢܐ ܐܡܪ ܗܘܐ ܕܚܘܪܘ ܘܣܟܘ ܠܙܟܘܬܐ ܕܗܘܝܐ ܠܟܘܢ ܡܢ ܐܠܗܐ ܐܚܝܕ ܟܠ

25. Maccabees 2 15:9

    ܘܡܪܬܐ ܗܘܐ ܠܗܘܢ ܡܢ ܢܡܘܣܐ ܘܡܢ ܢܒܝ̈ܐ ܘܡܕܟܪ ܗܘܐ ܠܗܘܢ ܓܢܒܪ̈ܘܬܐ ܘܐܓܘ̈ܢܐ ܕܡܢ ܩܕܝܡ ܥܒܕܘ ܗܘܘ ܘܚܝܠ ܐܢܘܢ ܘܠܒܒ ܐܢܘܢ

26. Maccabees 2 15:10

    ܘܐܥܝܪ ܒܗܘܢ ܚܡܬܐ ܘܛܢܢܐ ܟܕ ܡܚܘܐ ܗܘܐ ܠܗܘܢ ܬܘܒ ܐܦ ܪܘܫܥܗܘܢ ܕܥܡ̈ܡܐ ܘܛܠܘܡܝܐ ܕܛܠܡܘ ܒܡܘܡܬܐ

27. Maccabees 2 15:11

    ܘܙܝܢ ܘܚܙܩ ܠܚܕ ܚܕ ܡܢܗܘܢ ܝܗܘܕܐ ܠܐ ܒܪ̈ܘܡܚܐ ܘܒܣܟܪ̈ܐ ܐܠܐ ܒܡ̈ܠܐ ܛܒܬ̈ܐ ܕܒܘܝܐܐ ܘܕܠܘܒܒܐ ܘܕܚܝܠܬܢܘܬܐ ܘܐܫܬܥܝ ܗܘܐ ܠܗܘܢ ܚܙܘܐ ܕܚܙܐ ܕܫܘܐ ܠܡܬܩܒܠܘ ܘܠܡܬܗܝܡܢܘ ܘܟܕ ܫܡܥܘ ܐܬܒܣܡܘ ܟܠܗܘܢ

28. Maccabees 2 15:12

    ܐܝܬܝܗ ܗܘܬ ܕܝܢ ܬܫܥܝܬܐ ܕܚܙܘܐ ܕܚܙܐ ܗܕܐ ܚܙܐ ܠܚܘܢܝܐ ܟܗܢܐ ܕܐܝܬܘܗܝ ܗܘܐ ܓܒܪܐ ܫܦܝܪܐ ܘܛܒܐ ܘܩܘܒܠܠܗ ܢܟܦ ܗܘܐ ܘܒܟܝܢܗ ܡܟܝܟ ܗܘܐ ܘܡܠܬܗ ܒܣܝܡܐ ܗܘܬ ܘܝܐܝܐ ܘܡܢ ܛܠܝܘܬܗ ܪܕܐ ܗܘܐ ܒܟܘܠ ܕܙܕܩ̈ܢ ܘܫܦܝܪ̈ܢ ܠܩܝܡܐ ܠܗ ܠܗܢܐ ܒܚܙܘܐ ܚܙܐ ܟܕ ܦܫܝ̈ܛܢ ܐܝܕܘ̈ܗܝ ܘܡܨܠܐ ܥܠ ܟܠܗ ܥܡܐ ܕܝܗܘ̈ܕܝܐ

29. Maccabees 2 15:13

    ܘܬܘܒ ܡܢ ܒܬܪܟܢ ܐܬܚܙܝ ܠܗ ܓܒܪܐ ܚܕ ܒܣܝܒܘܬܐ ܫܦܝܪܬܐ ܘܒܬܫܒܘܚܬܐ ܪܒܬܐ ܘܡܝܬܪܐ ܗܘܬ ܚܙܬܗ ܘܪܒܘܬܐ ܕܝܐܝܘܬܐ ܕܐܝܬ ܗܘܐ ܥܠܘܗܝ

30. Maccabees 2 15:14

    ܘܥܢܐ ܚܘܢܝܐ ܘܐܡܪ ܥܠܘܗܝ ܕܗܢܘ ܐܪܡܝܐ ܢܒܝܐ ܪܚܡ ܐܚ̈ܘܗܝ ܕܣܓܝ ܒܥܐ ܘܡܬܟܫܦ ܘܡܨܠܐ ܥܠ ܐ̈ܦܝ ܥܡܐ ܘܥܠ ܡܕܝܢܬܐ ܩܕܝܫܬܐ

31. Maccabees 2 15:15

    ܘܦܫܛ ܝܡܝܢܗ ܐܪܡܝܐ ܘܝܗܒ ܠܝܗܘܕܐ ܪܘܡܚܐ ܕܕܗܒܐ ܘܐܡܪ ܠܗ

32. Maccabees 2 15:16

    ܩܒܠ ܗܕܐ ܪܘܡܚܐ ܡܘܗܒܬܐ ܡܢ ܐܠܗܐ ܕܒܗ ܬܡܚܐ ܘܬܬܒܪ ܠܟܠܗܘܢ ܒܥܠܕܒ̈ܒܝܟ

33. Maccabees 2 15:17

    ܘܟܕ ܫܡܥܘ ܕܝܢ ܚܒܪ̈ܘܗܝ ܕܝܗܘܕܐ ܗܠܝܢ ܡ̈ܠܐ ܐܬܒܝܐܘ ܒܡܠܘ̈ܗܝ ܫܦܝܪ̈ܬܐ ܘܐܬܚܝܠܘ ܛܒ ܡܫ̈ܟܚܢ ܗ̈ܘܝ ܓܝܪ ܕܢܚܝ̈ܠܢ ܘܢܘܪ̈ܒܢ ܘܢܥ̈ܫܢܢ ܠܐܝܠܝܢ ܕܫܡܥܝܢ ܠܗܝܢ ܘܢܓܡܪ̈ܢ ܢܦܫ̈ܬܐ ܕܥܠܝܡ̈ܐ ܘܐܬܚܫܒܘ ܒܢܦܫ̈ܬܗܘܢ ܕܠܐ ܢܬܬܟܠܘܢ ܥܠ ܣܕܪ̈ܐ ܘܥܘ̈ܬܕܐ ܕܩܪܒܐ ܐܠܐ ܒܟܠ ܓܢܒܪܘܬܐ ܢܬܥܫܢܘܢ ܘܢܬܠܘܢ ܢܦܫܗܘܢ ܠܐܘܠܨܢܐ ܒܪܥܝܢܐ ܡܠܝܐ ܥܠ ܐ̈ܦܝ ܡܕܝܢܬܐ ܩܕܝܫܬܐ ܘܥܠ ܐ̈ܦܝ ܗܝܟܠܐ ܩܕܝܫܐ ܘܥܠ ܟܠܗ ܒܝܬ ܡܩܕܫܐ

34. Maccabees 2 15:18

    ܥܠ ܢܝܫܝ̈ܗܘܢ ܓܝܪ ܘܒܢܝ̈ܗܘܢ ܘܐܚܝ̈ܗܘܢ ܘܫܪ̈ܒܬܗܘܢ ܡܕܡ ܗܘ ܒܨܝܪ ܝܨܦܝܢ ܗܘܘ ܚܫܗܘܢ ܓܝܪ ܪܒܐ ܘܨܦܬܗܘܢ ܥܠ ܐ̈ܦܝ ܗܝܟܠܐ ܗܘܐ ܩܕܝܫܐ

35. Maccabees 2 15:19

    ܐܦ ܠܐܝܠܝܢ ܕܝܢ ܕܦܫܘ ܗܘܘ ܒܡܕܝܢܬܐ ܠܐ ܗܘܐ ܙܥܘܪ ܐܓܘܢܐ ܘܚܫܐ ܕܐܝܬ ܗܘܐ ܨܐܕܝܗܘܢ ܕܠܡܐ ܢܕܚܠܘܢ ܘܢܬܒܨܪܘܢ ܡܢ ܫܓܘܫܝܐ ܕܩܪܒܐ

36. Maccabees 2 15:20

    ܘܟܕ ܟܘܠܗܘܢ ܡܣܟܝܢ ܗܘܘ ܠܕܝܢܐ ܕܗܘܐ ܐܬܩܪܒܘ ܘܐܣܬܕܪܘ ܠܘܩܒܠܗܘܢ ܘܐܬܛܝܒܘ ܘܩܡܘ ܦܝ̈ܠܐ ܒܣܕܪ̈ܝܗܘܢ ܐܦ ܦܪ̈ܫܐ ܐܙܕܝܢܘ ܘܩܡܘ ܒܕܘܟܝ̈ܬܗܘܢ

37. Maccabees 2 15:21

    ܘܟܕ ܚܙܐ ܝܗܘܕܐ ܡܩܒܝ ܣܕܪ̈ܝܗܘܢ ܘܥܘܫܢܐ ܕܚܝܠܐ ܕܒܥܠܕܒ̈ܒܐ ܘܥܘܬܕܐ ܕܙܝܢܗܘܢ ܘܛܘܝܒܐ ܘܫܝܚܢܘܬܐ ܕܦܝ̈ܠܐ ܐܪܝܡ ܐܝ̈ܕܘܗܝ ܠܫܡܝܐ ܘܨܠܝ ܘܓܥܐ ܠܘܬ ܐܠܗܐ ܗܘ ܕܥܒܕ ܬܕܡܪ̈ܬܐ ܘܓܒܪ̈ܘܬܐ ܝܕܥ ܗܘܐ ܓܝܪ ܕܠܐ ܗܘܬ ܙܟܘܬܐ ܒܬܟܬܘܫܐ ܒܙܝܢܐ ܐܠܐ ܐܢ ܠܡܢ ܕܗܘ ܨܒܐ ܕܢܬܠ ܙܟܘܬܐ

38. Maccabees 2 15:22

    ܐܡܪ ܗܘܐ ܕܝܢ ܟܕ ܡܨܠܐ ܘܒܥܐ ܗܟܢܐ ܐܢܬ ܡܪܝܐ ܫܕܪܬ ܡܠܐܟܟ ܒܝܘܡ̈ܬܗ ܕܚܙܩܝܐ ܡܠܟܐ ܕܝܗܘܕܐ ܘܩܛܠ ܒܡܫܪܝܬܗ ܕܣܢܚܪܝܒ ܡܐܐ ܘܬܡܢܐܝܢ ܘܚܡܫܐ ܐܠܦܝܢ

39. Maccabees 2 15:23

    ܘܗܫܐ ܚܝܠܬܢܐ ܘܥܡܘܪܐ ܕܫܡܝܐ ܫܕܪ ܡܠܐܟܐ ܛܒܐ ܩܕܡ ܐ̈ܦܝܢ ܘܢܪܡܐ ܘܢܫܪܐ ܒܗܘܢ ܪܬܝܬܐ ܘܙܘܥܬܐ ܘܪܗܝܒܘܬܐ

40. Maccabees 2 15:24

    ܘܒܥܘܫܢܗ ܘܒܪܒܘܬܗ ܕܕܪܥܟ ܢܦܠܘܢ ܗܢܘܢ ܕܒܓܘܕܦܐ ܐܬܘ ܥܠ ܥܡܟ ܩܕܝܫܐ ܘܝܗܘܕܐ ܕܝܢ ܒܗܠܝܢ ܡ̈ܠܐ ܫܠܡ

41. Maccabees 2 15:25

    ܕܒܝܬ ܢܝܩܢܘܪ ܕܝܢ ܒܩܝܬܪ̈ܐ ܘܒܟܢܪ̈ܐ ܘܒܙܡܪ̈ܐ ܕܩܪ̈ܢܬܐ ܡܩܪܒܝܢ ܗܘܘ

42. Maccabees 2 15:26

    ܘܕܒܝܬ ܝܗܘܕܐ ܒܨܠܘܬܐ ܘܒܒܥܘܬܐ ܢܦܠܘ ܒܗܘܢ

43. Maccabees 2 15:27

    ܘܒܐܝ̈ܕܝܗܘܢ ܡܩܪܒܝܢ ܗܘܘ ܘܒܠܒܘ̈ܬܗܘܢ ܡܨܠܝܢ ܗܘܘ ܘܓܥܝܢ ܠܘܬ ܐܠܗܐ ܘܐܪܡܝܘ ܘܩܛܠܘ ܡܢܗܘܢ ܐܝܟ ܬܠܬܝܢ ܘܚܡܫܐ ܐܠܦܝܢ ܘܐܬܒܣܡܘ ܘܕܨܘ ܥܠ ܥܘܕܪܢܐ ܕܐܠܗܐ ܕܗܘܐ ܥܡܗܘܢ

44. Maccabees 2 15:28

    ܘܟܕ ܫܠܝܘ ܘܗܦܟܘ ܡܢ ܩܪܒܐ ܟܕ ܚܕܝܢ ܘܡܘܕܝܢ ܘܡܫܒܚܝܢ ܠܐܠܗܐ ܝܠܦܘ ܥܠ ܢܝܩܢܪ ܕܢܦܠ ܒܩܪܒܐ ܥܡ ܟܠܗܘܢ ܦܠܚ̈ܐ ܕܢܩܝܦܝܢ ܗܘܘ ܠܗ

45. Maccabees 2 15:29

    ܘܗܘܐ ܙܘܥܐ ܘܪܗܒܐ ܒܡܫܪܝܬܗ ܕܒܝܬ ܝܗܘܕܐ ܕܝܢ ܐܘܕܝܘ ܘܒܪܟܘ ܠܡܪܝܐ ܒܠܫܢܐ ܕܐܒܗ̈ܬܐ

46. Maccabees 2 15:30

    ܘܦܩܕ ܕܝܢ ܗܘ ܕܒܟܠܡܕܡ ܡܫܠܡܐ ܗܘܬ ܢܦܫܗ ܘܦܓܪܗ ܠܟܠ ܐܘ̈ܠܨܢܐ ܥܠ ܐ̈ܦܝ ܒܢ̈ܝ ܥܡܗ ܘܡܕܝܢܬܗ ܘܚܕܝܐܝܬ ܟܠܗܘܢ ܝܘܡ̈ܬܗ ܗܘܐ ܪܫܐ ܘܡܕܒܪܢܐ ܕܩܪ̈ܒܐ ܕܒܢ̈ܝ ܥܡܗ ܕܢܦܣܩܘܢ ܪܫܗ ܕܢܝܩܢܘܪ ܘܐܝܕܗ ܥܡ ܟܬܦܗ ܘܢܝܬܘܢ ܐܢܘܢ ܠܐܘܪܫܠܡ

47. Maccabees 2 15:31

    ܘܟܕ ܐܬܐ ܡܩܒܝ ܠܐܘܪܫܠܡ ܩܪܐ ܠܒܢ̈ܝ ܥܡܗ ܘܠܟܗܢ̈ܐ ܩܕܡ ܡܕܒܚܐ ܘܫܕܪ ܘܩܪܐ ܠܒܢ̈ܝ ܡܪܕܐ

48. Maccabees 2 15:32

    ܘܚܘܝ ܐܢܘܢ ܪܫܗ ܕܢܝܩܢܘܪ ܛܡܐܐ ܘܐܝܕܗ ܕܡܓܕܦܢܐ ܗܝ ܕܐܪܝܡ ܗܘܐ ܠܘܩܒܠ ܗܝܟܠܗ ܕܐܠܗܐ ܐܚܝܕ ܟܘܠ ܒܫܘܒܗܪܐ ܘܒܪܡܘܬܐ

49. Maccabees 2 15:33

    ܘܦܣܩ ܠܫܢܗ ܕܪܫܝܥܐ ܡܢ ܪܫܗ ܘܩܛܥܗ ܩܠܝܠ ܩܠܝܠ ܘܐܡܪ ܕܢܬܝܗܒ ܠܦܪܚܬܐ ܘܐܝܕܗ ܕܝܢ ܩܒܥܗ ܠܘܩܒܠ ܗܝܟܠܐ

50. Maccabees 2 15:34

    ܗܝܕܝܢ ܟܠܗܘܢ ܒܪܟܘ ܠܡܪܝܐ ܥܡܘܪܐ ܕܫܡܝܐ ܘܓܥܝܢ ܗܘܘ ܘܐܡܪܝܢ ܡܫܒܚܬ ܗܘ ܡܪܝܐ ܕܢܛܪܬ ܐܬܪܟ ܟܕ ܕܟܐ

51. Maccabees 2 15:35

    ܘܪܫܗ ܕܝܢ ܕܛܡܐܐ ܩܒܥܗ ܒܐܬܪܐ ܪܡܐ ܘܝܕܝܥܐ ܠܘܩܒܠ ܒܝܬ ܡܪܕܐ ܕܗܘܐ ܡܬܚܙܐ ܠܟܠܢܫ ܘܝܕܝܥ ܦܘܪܩܢܗ ܕܐܠܗܢ

52. Maccabees 2 15:36

    ܘܣܡܘ ܒܝܢܬܗܘܢ ܕܠܐ ܢܫܒܩܝܘܗܝ ܠܗܢܐ ܝܘܡܐ ܫܚܝܡܐܝܬ ܐܠܐ ܕܢܗܘܐ ܝܕܝܥ ܠܗܘܢ ܝܘܡܐ ܗܢܐ ܒܬܠܬܥܣܪܐ ܒܐܕܪ ܝܪܚܐ ܕܬܪܥܣܪ ܡܬܐܡܪ ܕܝܢ ܒܠܫܢܐ ܐܪܡܝܐ ܚܕ ܝܘܡܐ ܡܢ ܩܕܡ ܝܘܡܗ ܕܡܘܪܕܟܝ

53. Maccabees 2 15:37

    ܥܠ ܢܝܩܢܘܪ ܕܝܢ ܘܥܠ ܟܠ ܕܓܕܫ ܒܝܘܡ̈ܬܐ ܗܠܝܢ ܗܟܢܐ ܗ̈ܘܝ ܘܡܢܗ ܡܢ ܗܘ ܙܒܢܐ ܐܚܕܘ ܘܐܫܬܠܛܘ ܥܒܪ̈ܝܐ ܒܡܕܝ̈ܢܬܗܘܢ ܘܐܢܐ ܕܝܢ ܡܟܝܠ ܐܫܠܡ ܡ̈ܠܝ

54. Maccabees 2 15:38

    ܘܐܢܗܘ ܕܝܢ ܕܛܒܐܝܬ ܘܡܝܬܪܐܝܬ ܡܬ̈ܩܢܢ ܒܗܕܐ ܐܦ ܐܢܐ ܨܒܐ ܐܢܐ ܘܐܢ ܕܝܢ ܒܨܝܪܐܝܬ ܘܡܣܟܢܐܝܬ ܗܕܐ ܬܫܬܒܩ ܠܝ

55. Maccabees 2 15:39

    ܐܝܟܢܐ ܓܝܪ ܕܐܢ ܐܢܫ ܢܫܬܐ ܚܡܪܐ ܒܠܚܘܕܘܗܝ ܐܘ ܡ̈ܝܐ ܒܠܚܘܕܝܗܘܢ ܠܐ ܡܒܣܡܝܢ ܢܦܫܐ ܘܐܢܕܝܢ ܢܬܡܙܓ ܚܡܪܐ ܒܡ̈ܝܐ ܒܣܝܡ ܘܡܫܠܡ ܛܝܒܘܬܗ ܠܐܝܠܝܢ ܕܫܬܝܢ ܠܗ ܗܟܢܐ ܗܘ ܐܦ ܬܘܩܢܐ ܘܪܘܟܒܐ ܕܡܠܬܐ ܡܚܕܐ ܘܡܒܣܡ ܫܡܥܐ ܕܐܝܠܝܢ ܕܩܪܝܢ ܘܡܬܗܓܝܢ ܒܒܛܝܠܘܬܐ ܘܒܨܝܢ ܘܒܥܝܢ ܘܥܕܡܐ ܠܗܪܟܐ ܡܟܝܠ ܢܗܘܐ ܫܘܠܡܐ ܕܡ̈ܠܐ ܕܬܫܥܝ̈ܬܐ

← Previous — showing 501–555 of 555

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.