← All works

Peshitta Maccabees 2

Peshitta (Syriac Old Testament) · 555 sections

1. Maccabees 2 12:2

   ܪ̈ܫܐ ܕܝܢ ܘܡܕܒܪ̈ܢܐ ܕܐܝܬ ܗܘܘ ܒܐܬܪ̈ܘܬܐ ܛܝܡܬܐܣ ܘܐܦܘܠܘܢܝܣ ܒܪ ܓܢܝ ܘܝܐܪܘܢܝܡܘܣ ܘܪܡܦܘܢ ܘܢܝܩܢܘܪ ܘܥܡܗܘܢ ܩܘܦܪ̈ܝܐ ܠܐ ܫܒܩܝܢ ܗܘܘ ܠܗܘܢ ܕܢܫܠܘܢ ܘܢܬܬܢܝܚܘܢ

2. Maccabees 2 12:3

   ܒܢ̈ܝ ܝܘܦܐ ܕܝܢ ܗܟܢܐ ܥܒܕܘ ܪܘܫܥܐ ܪܒܐ ܘܐܦܝܣܘ ܠܝܗܘ̈ܕܝܐ ܕܥܡܗܘܢ ܕܢܬܒܘܢ ܥܡ ܢܝܫܝ̈ܗܘܢ ܘܒܢܝ̈ܗܘܢ ܒܩܪ̈ܩܘܪܐ ܟܕ ܠܐ ܐܝܬ ܗܘܐ ܠܗܘܢ ܚܕ ܥܡ ܚܕ ܠܐ ܒܥܠܕܒܒܘܬܐ ܘܠܐ ܡܨܘܬܐ

3. Maccabees 2 12:4

   ܐܠܐ ܐܬܚܫܒܘ ܟܠܗܘܢ ܒܢ̈ܝ ܡܕܝܢܬܐ ܐܟܚܕܐ ܘܐܨܛܒܝܘ ܗܠܝܢ ܐܝܟ ܕܗܐ ܠܡ ܫܠܡܐ ܗܘ ܨܒܝܢ ܗܘܘ ܕܢܥܒܕܘܢ ܘܟܕ ܠܝܬ ܠܗܘܢ ܡܣܡ ܒܪܥܝܢܐ ܡܕܡ ܣܠܩܘ ܘܝܬܒܘ ܘܥܠܘ ܘܛܒܥܘ ܐܢܘܢ ܒܓܘ ܝܡܐ ܐܝܟ ܡܐܬܝܢ ܢܦܫ̈ܢ

4. Maccabees 2 12:5

   ܘܟܕ ܫܡܥ ܝܗܘܕܐ ܒܝܫܬܐ ܘܪܘܫܥܐ ܕܗܘܐ ܒܒ̈ܢܝ ܥܡܗ ܦܩܕ ܠܐܢܫܐ ܕܥܡܗ

5. Maccabees 2 12:6

   ܘܨܠܝ ܘܓܥܐ ܠܘܬ ܐܠܗܐ ܕܝܢܐ ܕܩܘܫܬܐ ܘܐܬܐ ܥܠ ܩܛܘ̈ܠܐ ܕܐܚܝ̈ܗܘܢ ܘܠܠܡܐܢܗܘܢ ܐܘܩܕܘ ܒܠܠܝܐ ܥܡ ܐ̈ܠܦܐ ܕܐܝܬ ܗ̈ܘܝ ܒܗ ܘܠܐܝܠܝܢ ܕܐܫܬܟܚܘ ܒܗܝܢ ܩܛܠܘ ܐܢܘܢ

6. Maccabees 2 12:7

   ܘܟܕ ܐܪܓܫܘ ܒܢ̈ܝ ܡܕܝܢܬܐ ܐܚܕܘ ܬܪ̈ܥܐ ܘܗܘ ܗܦܟ ܘܐܬܐ ܠܗ ܡܛܠ ܕܬܘܒ ܒܥܐ ܗܘܐ ܕܢܐܙܠ ܥܠܝܗܘܢ ܘܡܬܚܫܒ ܗܘܐ ܕܢܥܩܪܝܗ ܠܝܘܦܐ ܥܡ ܝܬܒ̈ܝܗ

7. Maccabees 2 12:8

   ܐܪܓܫ ܕܝܢ ܬܘܒ ܕܐܦ ܗܠܝܢ ܕܝܡܢܝܢ ܗܟܘܬ ܨܒܘ ܕܢܥܒܕܘܢ ܠܝܗܘ̈ܕܝܐ ܕܥܡܪܝܢ ܬܡܢ

8. Maccabees 2 12:9

   ܘܐܙܠ ܠܬܡܢ ܒܠܠܝܐ ܘܐܘܩܕܗ ܠܠܡܢܐܢܗܘܢ ܥܡ ܟܠܡܕܡ ܕܐܝܬ ܗܘܐ ܒܗ ܐܝܟ ܕܢܬܚܙܐ ܙܗܪܐ ܕܢܘܪܐ ܕܝܩܕܢܗ ܥܕܡܐ ܠܐܘܪܫܠܡ ܡܐܬܝܢ ܕܐܪܒܥܝܢ ܐܣ̈ܛܕܘܢ

9. Maccabees 2 12:10

   ܘܡܢ ܬܡܢ ܐܪܚܩܘ ܐܝܟ ܬܫܥܐ ܐܣ̈ܛܕܘܢ ܘܐܙܠܝܢ ܗܘܘ ܥܠ ܛܝܡܬܐܘܣ ܘܐܪܡܝܘ ܥܠܝܗܘܢ ܥܪ̈ܒܝܐ ܐܝܟ ܚܡܫܐ ܐ̈ܠܦܝܢ ܪ̈ܓܠܝܐ ܘܚܡܫܡܐܐ ܦܪ̈ܫܝܢ

10. Maccabees 2 12:11

    ܘܟܕ ܗܘܐ ܩܪܒܐ ܘܬܟܬܘܫܐ ܪܒܐ ܙܟܘ ܕܒܝܬ ܝܗܘܕܐ ܡܛܠ ܥܘܕܪܢܐ ܕܐܠܗܐ ܕܗܘܐ ܥܡܗܘܢ ܘܟܕ ܐܙܕܟܝܘ ܡܕܒܪ̈ܢܐ ܒܥܝܢ ܗܘܘ ܡܢ ܝܗܘܕܐ ܕܢܬܠ ܠܗܘܢ ܝܡܝܢܐ ܟܕ ܡܫܬܘܕܝܢ ܗܘܘ ܠܗ ܕܢܬܠܘܢ ܐܦ ܒܝܬ ܪܥܝܐ

11. Maccabees 2 12:12

    ܘܝܗܘܕܐ ܕܝܢ ܐܬܪܥܝ ܕܚܫܚܝܢ ܐܢܘܢ ܠܗ ܠܨܒܘ̈ܬܐ ܣܓܝܐ̈ܬܐ ܘܐܬܪܡܝ ܕܢܥܒܕ ܥܡܗܘܢ ܫܠܡܐ ܘܟܕ ܫܩܠܘ ܝܡܝܢܐ ܐܙܠܘ ܠܡܫܟ̈ܢܝܗܘܢ

12. Maccabees 2 12:13

    ܝܗܘܕܐ ܕܝܢ ܐܪܡܝ ܥܠ ܡܕܝܢܬܐ ܚܕܐ ܥܫܝܢܬܐ ܕܟܪܝܟܐ ܘܡܚܙܩܐ ܒܫܘܪ̈ܝܗ ܘܥܡܪܝܢ ܗܘܘ ܒܗ ܥܡ̈ܡܐ ܣܓܝܐ̈ܐ ܘܫܡܗ ܕܝܢ ܩܨܦܐ

13. Maccabees 2 12:14

    ܥܡܘܪ̈ܝܗ ܕܝܢ ܡܛܠ ܕܬܟܝܠܝܢ ܗܘܘ ܥܠ ܫܘܪܪܗܘܢ ܕܫܘܪ̈ܝܗ ܘܥܠ ܙܝܢܐ ܣܓܝܐܐ ܕܣܝܡ ܗܘܐ ܠܗܘܢ ܒܓܘܗ ܝܬܝܪܐܝܬ ܡܬܪܝܡܝܢ ܗܘܘ ܘܡܓܕܦܝܢ ܘܡܨܥܪܝܢ ܠܕܒܝܬ ܝܗܘܕܐ ܘܐܡܪܝܢ ܗܘܘ ܠܗܘܢ ܡ̈ܠܐ ܛܢ̈ܦܬܐ ܐܝܠܝܢ ܕܠܐ ܙܕܩ̈ܢ

14. Maccabees 2 12:15

    ܕܒܝܬ ܝܗܘܕܐ ܕܝܢ ܨܠܝܘ ܘܓܥܘ ܠܘܬ ܐܠܗܐ ܚܝܠܬܢܐ ܕܥܠܡ̈ܐ ܠܗܘ ܕܕܠܐ ܒܟܐ̈ܦܐ ܘܕܠܐ ܡܐ̈ܟܢܣ ܘܐܘܡ̈ܢܘܬܐ ܕܒܢܝ̈ܢܫܐ ܣܚܦ ܠܫܘܪ̈ܝܗ ܕܐܝܪܝܚܘ ܒܝܘܡ̈ܬܗ ܕܝܫܘܥ ܘܐܬܩܪܒܘ ܘܐܬܛܪܝܘ ܒܫܘܪܐ ܐܝܟ ܚܝܘ̈ܬܐ ܘܣܚܦܘܗܝ ܠܫܘܪܗ

15. Maccabees 2 12:16

    ܘܟܒܫܘܗ ܠܡܕܝܢܬܐ ܒܨܒܝܢܗ ܕܐܠܗܐ ܘܩܛܠܘ ܒܗ ܠܣ̈ܓܝܐܐ ܐܝܟܢܐ ܕܝܡܬܐ ܕܩܪܝܒܐ ܗܘܬ ܠܗܘܢ ܕܐܝܬ ܗܘܐ ܒܗ ܐܝܟ ܬܪܝܢ ܐ̈ܣܛܕܘܢ ܬܬܡܙܓ ܟܠܗ ܒܕܡܐ

16. Maccabees 2 12:17

    ܘܫܩܠܘ ܡܢ ܬܡܢ ܘܐܙܠܘ ܐܝܟ ܫܒܥܡܐܐ ܘܚܡܫܝܢ ܐܣ̈ܛܕܘܢ ܘܥܠܘ ܠܟܪܟܐ ܠܘܬ ܝܗܘ̈ܕܝܐ ܗܢܘܢ ܕܡܬܩܪܝܢ ܛܘ̈ܒܝܢܐ

17. Maccabees 2 12:18

    ܘܐܫܟܚܘܗܝ ܠܛܝܡܬܐܣ ܒܗ ܒܐܬܪܐ ܕܠܐ ܚܝܠ ܟܕ ܡܪ̈ܫܠܢ ܐܝܕܘ̈ܗܝ ܡܛܠ ܕܠܝܬ ܗܘܐ ܥܡܗ ܚܝܠܐ ܘܫܒܝܩܐ ܗܘܬ ܠܗ ܕܝܢ ܡܛܪܬܐ ܒܚܣܢܐ ܚܕ ܪܒܐ ܘܥܫܝܢܐ

18. Maccabees 2 12:19

    ܕܘܣܝܬܐܘܣ ܕܝܢ ܘܣܘܣܝܦܛܪܣ ܡܕܒܪ̈ܢܐ ܘܪ̈ܫܐ ܡܢ ܕܒܝܬ ܡܩܒܝ ܐܙܠܘ ܘܩܛܠܘ ܠܗܢܘܢ ܕܫܒܝܩܝܢ ܗܘܘ ܠܗ ܠܛܝܡܬܐܘܣ ܒܚܣ̈ܢܐ ܝܬܝܪ ܡܢ ܥܣܪܐ ܐ̈ܠܦܝܢ ܓܒܪ̈ܝܢ

19. Maccabees 2 12:20

    ܡܩܒܝ ܕܝܢ ܟܢܫ ܚܝܠܐ ܕܥܡܗ ܘܦܠܓ ܐܢܘܢ ܡ̈ܢܘܢ ܡ̈ܢܘܢ ܘܐܩܝܡ ܪܫܐ ܥܠ ܟܠ ܚܕܐ ܚܕܐ ܡܢ ܡܢܘ̈ܬܐ ܘܐܙܠ ܥܠ ܛܝܡܬܐܘܣ ܕܐܬܐ ܗܘܐ ܥܠܝܗܘܢ ܒܬܪܬܥܣܪܐ ܪ̈ܒܘܢ ܚܝܠܐ ܕܪ̈ܓܠܝܐ ܘܦܪ̈ܫܐ ܬܪܝܢ ܐ̈ܠܦܝܢ ܘܚܡܫܡܐܐ

20. Maccabees 2 12:21

    ܘܟܕ ܫܡܥ ܛܝܡܬܐܘܣ ܥܠ ܕܒܝܬ ܝܗܘܕܐ ܫܕܪ ܢܝܫܝ̈ܗܘܢ ܘܒܢܝ̈ܗܘܢ ܘܟܠܗ ܝܩܪܬܗܘܢ ܠܩܪܝܬܐ ܕܡܬܩܪܝܐ ܩܪܢܐ ܡܛܠ ܕܩܫܝܐ ܗܘܬ ܩܪܝܬܐ ܘܡܚܣܢܐ ܘܠܐ ܥܓܠ ܡܫܟܚܐ ܗܘܬ ܠܡܬܟܒܫܘ ܐܘ ܠܡܬܒܙܙܘ ܡܛܠ ܕܐܠܝܨܝܢ ܗܘܘ ܡܥ̈ܠܢܝܗ ܡܢ ܟܘܠܗܘܢ ܣܛܪ̈ܝܗ

21. Maccabees 2 12:22

    ܘܟܕ ܐܬܚܙܝܬ ܕܝܢ ܡܫܪܝܬܗ ܩܕܡܝܬܐ ܕܝܗܘܕܐ ܢܦܠܬ ܕܚܠܬܐ ܘܙܘܥܬܐ ܥܠ ܒܥܠܕܒ̈ܒܐ ܒܨܒܝܢܗ ܕܐܠܗܐ ܐܚܝܕ ܟܠ ܕܐܬܓܠܝ ܥܠܝܗܘܢ ܘܝܗܒܘ ܟܘܠܗܘܢ ܠܡܥܪܩ ܘܐܢܫ ܠܣܛܪܗ ܥܪܩܝܢ ܗܘܘ ܐܝܟܢܐ ܕܚܕ ܒܚܕ ܐܙܠܝܢ ܗܘܘ ܘܣܠܩܝܢ ܘܚܕ ܡܢ ܚܕ ܡܬܕܓܫܝܢ ܗܘܘ ܘܡܣܬܪܚܝܢ ܗܕܡ̈ܝܗܘܢ ܡܛܠ ܕܣܝ̈ܦܝܗܘܢ ܫܡܝܛܝܢ ܗܘܘ

22. Maccabees 2 12:23

    ܝܗܘܕܐ ܕܝܢ ܪܕܦ ܗܘܐ ܒܬܪܗܘܢ ܬܩܝܦܐܝܬ ܘܡܩܛܠ ܗܘܐ ܒܗܘܢ ܒܪ̈ܫܝܥܐ ܩܛܠ ܕܝܢ ܒܗܘܢ ܐܝܟ ܬܠܬ ܪ̈ܒܘܢ ܓܒܪ̈ܐ

23. Maccabees 2 12:24

    ܘܗܘ ܕܝܢ ܛܝܡܬܐܘܣ ܢܦܠ ܒܐܝ̈ܕܝܗܘܢ ܕܒܝܬ ܕܘܣܝܬܐܘܣ ܘܣܘܣܝܦܛܪܣ ܘܐܚܕܘܗܝ ܘܒܥܐ ܗܘܐ ܡܢܗܘܢ ܘܡܬܟܫܦ ܗܘܐ ܠܗܘܢ ܕܢܫܒܩܘܢܝܗܝ ܟܕ ܚܝ ܘܗܢܘܢ ܕܝܢ ܡܛܠ ܕܠܣܓ̈ܝܐܐ ܡܢܗܘܢ ܐܝܬ ܗܘܘ ܨܐܕܘܗܝ ܐܚ̈ܐ ܘܒܢ̈ܝ ܫܪܒܬܐ

24. Maccabees 2 12:25

    ܘܗܘ ܕܝܢ ܐܫܬܘܕܝ ܗܘܐ ܠܗܘܢ ܕܢܪܦܐ ܐܢܘܢ ܟܕ ܚܝܝܢ ܘܒܗܬܘ ܡܢܗ ܡܛܠ ܚܝ̈ܐ ܕܐܚܝ̈ܗܘܢ ܘܫܒܩܘܗܝ ܟܕ ܚܝ

25. Maccabees 2 12:26

    ܝܗܘܕܐ ܕܝܢ ܡܩܒܝ ܢܦܩ ܥܠ ܐܬܪܐ ܕܡܬܩܪܐ ܗܘܐ ܩܪܢܐ ܘܐܛܪܓܛ ܘܩܛܠ ܬܡܢ ܥܣܪܝܢ ܘܚܡܫܐ ܐ̈ܠܦܝܢ

26. Maccabees 2 12:27

    ܘܡܢ ܒܬܪ ܕܐܙܕܟܝܘ ܗܠܝܢ ܘܐܬܩܛܠܘ ܐܬܚܙܩ ܝܗܘܕܐ ܥܡ ܚܝܠܗ ܘܐܙܠ ܥܠ ܥܦܪܘܢ ܡܕܝܢܬܐ ܥܫܝܢܬܐ ܕܥܡܪ ܗܘܐ ܒܗ ܠܘܣܝܐܣ ܘܟܢܫܐ ܕܥܡ̈ܡܐ ܣ̈ܓܝܐܐ ܘܥ̈ܠܝܡܐ ܥܫ̈ܝܢܐ ܘܚܝܠܬܢܐܝܬ ܡܬܟܬܫܝܢ ܗܘܘ ܥܠ ܫܘܪ̈ܝܗ ܒܓܐܪ̈ܐ ܘܒܢܝܙ̈ܟܐ ܘܒܟܘܠ ܡܐ̈ܢܝ ܩܪܒܐ

27. Maccabees 2 12:28

    ܕܒܝܬ ܝܗܘܕܐ ܕܝܢ ܨܠܝܘ ܘܓܥܘ ܠܘܬ ܐܠܗܐ ܗܘ ܕܡܨܐ ܒܚܝܠܐ ܠܡܫܚܩ ܘܠܡܬܒܪ ܠܟܠܗ ܥܘܫܢܐ ܕܒܥܠܕܒ̈ܒܐ ܘܐܫܠܡܗ ܠܡܕܝܢܬܐ ܒܐܝܕܝ̈ܗܘܢ ܘܥܠܘ ܘܟܒܫܘܗ ܘܩܛܠܘ ܒܗ ܐܝܟ ܥܣܪܝܢ ܘܚܡܫܐ ܐ̈ܠܦܝܢ

28. Maccabees 2 12:29

    ܘܡܢ ܬܡܢ ܫܩܠܘ ܘܐܙܠܘ ܠܒܝܫܢ ܕܪܚܝܩܐ ܡܢ ܐܘܪܫܠܡ ܐܝܟ ܫܬܡܐܐ ܐܣ̈ܛܕܘܢ

29. Maccabees 2 12:30

    ܘܐܘܕܝܘ ܗܘܘ ܕܝܢ ܝܗܘ̈ܕܝܐ ܕܝܬܒܝܢ ܗܘܘ ܒܗ ܥܠ ܒܢ̈ܝ ܡܕܝܢܬܐ ܕܣܓܝ ܡܢܝܚܝܢ ܗܘܘ ܠܗܘܢ ܘܐܚܝܕܝܢ ܒܐܝܩܪܗܘܢ

30. Maccabees 2 12:31

    ܘܩܒܠܘ ܛܝܒܘܬܗܘܢ ܕܒܝܬ ܝܗܘܕܐ ܘܐܪܥܘ ܐܢܘܢ ܒܫܠܡܐ ܘܡܢ ܬܡܢ ܐܬܘ ܠܐܘܪܫܠܡ ܕܢܥܒܕܘܢ ܥܕܥܕܐ ܕܦܛܝܪ̈ܐ

31. Maccabees 2 12:32

    ܘܡܢ ܒܬܪ ܦܢܛܝܩܘܣܛܐ ܐܙܠܘ ܥܠ ܓܘܪܓܝܐ ܪܫܐ ܘܡܕܒܪܢܐ ܕܐܕܘ̈ܡܝܐ

32. Maccabees 2 12:33

    ܢܦܩ ܕܝܢ ܥܠܝܗܘܢ ܒܬܠܬܐ ܐ̈ܠܦܝܢ ܪ̈ܓܠܝܝܢ ܘܐܪܒܥܡܐܐ ܦܪ̈ܫܝܢ

33. Maccabees 2 12:34

    ܘܟܕ ܫܪܝܘ ܠܡܩܪܒܘ ܢܦܠܘ ܐܢܫܐ ܩܠܝܠ ܡܢ ܐܕܘܡ̈ܝܐ

34. Maccabees 2 12:35

    ܕܘܣܬܐܘܣ ܕܝܢ ܡܢ ܛܘܒܝ̈ܢܐ ܦܪܫܐ ܘܓܒܪܐ ܚܝܠܬܢܐ ܐܚܕܗ ܠܓܘܪܓܝܐ ܒܟܠܡܝܕܝܢ ܕܝܠܗ ܘܢܓܝܕ ܗܘܐ ܘܡܝܬܐ ܠܗ ܒܚܝܠܐ ܡܛܠ ܕܨܒܐ ܗܘܐ ܕܟܕ ܚܝ ܢܝܬܝܘܗܝ ܠܡܚܝܒܐ ܘܐܣܬܩܒܠ ܚܕ ܡܢ ܦܠܚܘ̈ܗܝ ܓܒܪܐ ܬܪܩܝܐ ܘܡܚܝܗܝ ܥܠ ܟܬܦܗ ܘܩܛܥܗ ܘܥܪܩ ܓܘܪܓܝܐ ܘܐܙܠ ܠܫܡܪܝܢ

35. Maccabees 2 12:36

    ܕܒܝܬ ܥܙܪܝ ܕܝܢ ܝܬܝܪܐܝܬ ܡܩܪܒܝܢ ܗܘܘ ܘܡܩܛܠܝܢ ܘܓܥܐ ܝܗܘܕܐ ܠܘܬ ܡܪܝܐ ܚܝܠܬܢܐ ܕܢܗܘܐ ܠܗܘܢ ܡܥܕܪܢܐ ܘܝܗܒ ܗܘ ܥܠܝܗܘܢ ܒܩܕܡܐ

36. Maccabees 2 12:37

    ܟܕ ܡܙܡܪ ܗܘܐ ܒܬܫܒܚ̈ܬܐ ܒܩܠܐ ܕܐܒܗ̈ܬܐ ܘܫܪܝ ܠܡܩܛܠܘ ܒܗܘܢ ܘܐܙܕܟܝܘ ܕܒܝܬ ܓܘܪܓܝܐ ܘܥܪܩܘ

37. Maccabees 2 12:38

    ܘܫܩܠ ܡܢ ܬܡܢ ܝܗܘܕܐ ܗܘ ܘܚܝܠܗ ܘܐܬܐ ܠܕܘܠܡܐ ܡܕܝܢܬܐ ܘܟܕ ܩܪܒܬ ܕܝܢ ܫܒܬܐ ܐܝܟ ܥܝܕܗܘܢ ܐܬܩܕܫܘ ܘܐܫܒܬܘ ܥܠ ܕܘܟܬܗܘܢ

38. Maccabees 2 12:39

    ܠܝܘܡܐ ܕܝܢ ܐܚܪܢܐ ܐܬܘ ܠܘܬ ܝܗܘܕܐ ܘܐܡܪܘ ܠܗ ܕܢܣܒܘܢ ܘܢܩܒܪܘܢ ܦܓܪ̈ܐ ܕܗܢܘܢ ܕܢܦܠܘ ܒܩܒܪ̈ܐ ܕܐܒܗܝ̈ܗܘܢ

39. Maccabees 2 12:40

    ܘܐܫܟܚܘ ܕܝܢ ܬܚܝܬ ܠܒܘ̈ܫܐ ܕܐܢܫ ܐܢܫ ܡܢܗܘܢ ܟܕ ܡܛܫܝܢ ܕܗܒܐ ܡܢ ܦܬܟܪ̈ܐ ܕܝܡܢܝܢ ܡܢ ܗܢܘܢ ܕܦܩܕ ܢܡܘܣܐ ܠܝܗܘ̈ܕܝܐ ܕܠܐ ܢܬܛܪܘܢ ܠܗܘܢ ܘܐܬܝܕܥܬ ܘܐܬܗܝܡܢܬ ܗܕܐ ܠܟܠܗܘܢ ܕܡܛܠ ܗܕܐ ܗܘ ܨܒܘܬܐ ܢܦܠܘ

40. Maccabees 2 12:41

    ܘܟܘܠܗܘܢ ܒܪܟܘ ܘܐܘܕܝܘ ܥܠ ܕܝܢܗ ܟܐܢܐ ܕܐܠܗܐ ܗܘ ܕܐܝܠܝܢ ܕܡ̈ܛܫܝܢ ܗܘ ܡܝܬܐ ܘܡܚܘܐ ܒܓܠܝܐ

41. Maccabees 2 12:42

    ܘܫܪܝܘ ܠܡܨܠܝܘ ܘܠܡܒܥܐ ܡܢ ܐܠܗܐ ܟܠܗܘܢ ܕܠܐ ܡܛܠ ܗܕܐ ܬܬܟܬܒ ܠܗܘܢ ܚܛܝܬܐ ܡܫܠܡܢܝܬܐ ܝܗܘܕܐ ܕܝܢ ܓܢܒܪܐ ܒܥܐ ܗܘܐ ܘܡܬܟܫܦ ܡܢ ܟܠܗ ܥܡܐ ܕܢܛܪܘܢ ܢܦܫܗܘܢ ܘܢܙܕܗܪܘܢ ܡܢ ܚܛܗ̈ܐ ܘܐܡܪ ܗܘܐ ܠܗܘܢ ܕܗܐ ܩܕܡ ܥܝܢܝ̈ܟܘܢ ܚܙܝܬܘܢ ܡܕܡ ܕܓܕܫ ܠܗܠܝܢ

42. Maccabees 2 12:43

    ܐܪܡܝ ܕܝܢ ܥܠ ܥܡܐ ܟܠܗ ܕܢܬܠܘܢ ܟܣܦܐ ܘܓܒܐ ܬܠܬܐ ܐ̈ܠܦܝܢ ܕܟܣܦܐ ܘܫܕܪ ܠܐܘܪܫܠܡ ܕܢܩܪܒܘܢ ܩܘܪ̈ܒܢܐ ܥܠ ܐ̈ܦܝܗܘܢ ܘܟܐܢܐܝܬ ܘܙܕܩܐܝܬ ܥܒܕ ܡܛܠ ܣܒܪܐ ܕܩܝܡܬܐ ܕܡܢ ܒܝܬ ܡܝ̈ܬܐ

43. Maccabees 2 12:44

    ܐܠܘ ܠܐ ܓܝܪ ܕܡܣܟܐ ܗܘܐ ܘܡܣܒܪ ܠܩܝܡܬܐ ܕܡܢ ܒܝܬ ܡܝ̈ܬܐ ܦܟܝܗܘܬܐ ܗܘܬ ܗܕܐ ܘܫܛܝܘܬܐ ܕܚܠܦ ܡܝ̈ܬܐ ܐܢܫ ܢܨܠܐ ܘܢܩܪܒ ܩܘܪ̈ܒܢܐ

44. Maccabees 2 12:45

    ܚܐܪ ܗܘܐ ܓܝܪ ܘܡܣܟܐ ܠܐܓܪܐ ܘܠܣܒܪܐ ܘܢܝܚܐ ܕܥܬܝܕ ܠܐܝܠܝܢ ܕܫܟܒܝܢ ܒܙܕܝܩܘܬܐ ܘܡܛܠ ܗܕܐ ܫܕܪ ܕܢܚܣܘܢ ܥܠ ܚܛܗ̈ܝܗܘܢ ܕܗܢܘܢ ܕܫܟܒܘ

45. Maccabees 2 13:1

    ܒܫܢܬ ܡܐܐ ܕܝܢ ܘܐܪܒܥܝܢ ܘܬܫܥ ܐܬܐ ܐܢܛܝܟܘܣ ܐܘܦܛܘܪ ܥܠ ܝܗܘ̈ܕܝܐ

46. Maccabees 2 13:2

    ܘܥܡܗ ܠܘܣܝܐܣ ܗܘ ܕܥܒܝܕ ܗܘܐ ܥܠ ܨܒ̈ܘܬܐ ܟܕ ܐܝܬ ܥܡܗ ܚܝܠܐ ܕܥܡ̈ܡܐ ܣܓܝܐ̈ܐ ܚܕܥܣܪܐ ܪ̈ܒܘܢ ܪ̈ܓܠܝܐ ܘܚܡܫܐ ܐ̈ܠܦܝܢ ܘܬܠܬܡܐܐ ܦܪ̈ܫܝܢ ܘܥܣܪܝܢ ܘܬܪܝܢ ܦܝ̈ܠܝܢ ܘܡܪ̈ܟܒܬܐ ܬܠܬܡܐܐ ܕܡܚܙܩܢ ܒܡ̈ܓܢܐ ܠܩܪܒܐ

47. Maccabees 2 13:3

    ܐܦ ܡܢܠܐܘܣ ܕܝܢ ܐܙܠ ܘܚܠܛ ܥܡܗܘܢ ܘܒܥܐ ܗܘܐ ܡܢ ܐܢܛܝܟܘܣ ܘܡܬܟܫܦ ܠܗ ܕܢܐܙܠ ܥܠ ܣܘܚܦܐ ܕܐܬܪܗ ܘܕܒ̈ܢܝ ܡܕܝܢܬܗ ܘܠܐ ܠܥܘܕܪܢܗܘܢ ܡܛܠ ܕܡܣܟܐ ܗܘܐ ܕܢܐܙܠ ܘܢܩܘܡ ܒܪܫܢܘܬܐ

48. Maccabees 2 13:4

    ܡܪܝܐ ܕܝܢ ܡܠܟ ܡ̈ܠܟܐ ܐܥܝܪ ܚܡܬܗ ܕܐܢܛܝܟܘܣ ܥܠ ܡܢܠܐܘܣ ܡܚܝܒܐ ܡܛܠ ܕܐܘܕܥܗ ܗܘܐ ܠܘܣܝܐܣ ܕܗܘܝܘ ܥܠܬܐ ܕܟܠܗܝܢ ܒܝܫ̈ܬܐ ܘܦܩܕ ܕܢܘܒܠܘܢܝܗܝ ܠܚܠܒ ܘܬܡܢ ܢܘܒܕܘܢܝܗܝ

49. Maccabees 2 13:5

    ܐܝܬ ܗܘܐ ܕܝܢ ܬܡܢ ܡܓܕܠܐ ܕܚܡܫܝܢ ܐܡܝܢ ܕܡܠܐ ܗܘܐ ܩܛܡܐ ܕܐܝܬ ܗ̈ܘܝ ܠܗ ܓܝ̈ܓܠܐ ܘܒܐܘܡܢܘܬܐ ܡܬܢܓܕ ܗܘܐ

50. Maccabees 2 13:6

    ܘܚܒܫܘܗܝ ܬܡܢ ܠܡܚܠܨ ܗܝܟܠܐ ܘܠܥܒܘܕܐ ܕܟܠܗܝܢ ܒܝܫ̈ܬܐ

51. Maccabees 2 13:7

    ܘܒܗܢܐ ܬܫܢܝܩܐ ܡܝܬ ܡܚܝܒܐ ܘܪܫܝܥܐ ܘܠܐ ܐܫܬܘܝ ܐܦܠܐ ܕܢܬܩܒܪ ܒܐܪܥܐ ܡܢܠܐܘܣ ܘܟܐܢܐܝܬ ܩܒܠ ܦܘܪܥܢܐ

52. Maccabees 2 13:8

    ܡܛܠ ܕܣܥܪ ܗܘܐ ܒܝܫ̈ܬܐ ܠܡܕܒܚܐ ܐܝܟܐ ܕܐܝܬ ܗܘܐ ܢܘܪܐ ܩܕܝܫܬܐ ܘܩܛܡܐ ܘܡܛܘܠ ܗܢܐ ܒܩܛܡܐ ܩܒܠ ܡܘܬܐ

53. Maccabees 2 13:9

    ܡܠܟܐ ܕܝܢ ܐܝܬܘܗܝ ܗܘܐ ܥܕܟܝܠ ܒܚܡܬܐ ܘܒܪܥܝܢܐ ܩܫܝܐ ܥܠ ܝܗܘ̈ܕܝܐ ܘܡܬܚܫܒ ܗܘܐ ܕܢܣܥܘܪ ܠܗܘܢ ܒܝܫ̈ܬܐ ܣܓܝܐ̈ܬܐ ܝܬܝܪ ܡܢ ܐܒܘܗܝ

54. Maccabees 2 13:10

    ܠܝܗܘܕܐ ܕܝܢ ܐܬܓܠܝܬ ܡܐܬܝܬܗ ܘܡܚܫܒܬܗ ܕܡܠܟܐ ܘܦܩܕ ܠܥܡܐ ܕܢܬܥܝܪܘܢ ܒܨܠܘܬܐ ܒܐܝܡܡܐ ܘܒܠܠܝܐ ܘܢܓܥܘܢ ܠܘܬ ܐܠܗܐ ܕܢܥܕܪ ܐܢܘܢ ܘܢܦܪܘܩ ܐܢܘܢ ܗܫܐ ܘܒܟܠ ܙܒܢ ܡܢ ܐܝܕܐ ܕܥܡ̈ܡܐ

55. Maccabees 2 13:11

    ܗܢܘܢ ܕܨܒܝܢ ܕܢܪܚܩܘܢ ܐܢܘܢ ܡܢ ܢܡܘܣܐ ܘܡܢ ܐܬܪܐ ܘܡܢ ܗܝܟܠܐ ܩܕܝܫܐ ܘܠܥܡܐ ܗܘ ܕܩܠܝܠ ܙܒܢܐ ܐܬܪܘܚ ܘܐܬܬܢܝܚ ܠܐ ܢܫܒܩܝܘܗܝ ܕܢܫܬܥܒܕ ܠܥܡ̈ܡܐ ܪ̈ܫܝܥܐ ܘܥܘܪ̈ܠܐ

56. Maccabees 2 13:12

    ܟܠܗܘܢ ܕܝܢ ܨܠܝܘ ܘܓܥܘ ܗܟܢܐ ܘܒܥܘ ܡܢ ܐܠܗܐ ܡܪܚܡܢܐ ܒܒܟܬܐ ܣܓܝܐ̈ܬܐ ܟܕ ܐܝܬܝܗܘܢ ܗܘܘ ܒܨܘܡܐ ܬܠܬܐ ܝܘܡ̈ܝܢ ܘܕܠܐ ܫܠܝܘ ܪܡܝܢ ܗܘܘ ܥܠ ܐ̈ܦܝܗܘܢ ܘܓܥܝܢ ܘܡܢ ܒܬܪ ܬܠܬܐ ܝܘ̈ܡܝܢ ܒܥܐ ܡܢܗܘܢ ܝܗܘܕܐ ܘܒܝܐ ܐܢܘܢ ܕܢܐܟܠܘܢ

57. Maccabees 2 13:13

    ܝܗܘܕܐ ܕܝܢ ܐܙܠ ܗܘ ܒܠܚܘܕܘܗܝ ܠܘܬ ܣ̈ܒܐ ܘܐܬܡܠܟ ܥܡܗܘܢ ܘܐܡܪ ܕܡܢ ܩܕܡ ܕܢܥܘܠ ܚܝܠܗ ܕܡܠܟܐ ܠܝܗܘܕܐ ܘܢܟܒܫܘܢ ܘܢܬܡܨܘܢ ܚܝܠܗ ܕܡܕܝܢܬܐ ܢܦܘܩ ܘܢܣܥܘܪ ܘܢܬܩܢ ܟܠܗܝܢ ܨܒܘ̈ܬܐ ܒܥܘܕܪܢܗ ܕܐܠܗܐ

58. Maccabees 2 13:14

    ܘܣܡܗ ܡܕܒܪܢܘܬܐ ܒܐܝ̈ܕܝ ܐܠܗܐ ܒܪܘܝܗ ܕܥܠܡܐ ܘܒܥܐ ܡܢ ܐܝܠܝܢ ܕܥܡܗ ܕܓܢܒܪܐܝܬ ܢܬܟܬܫܘܢ ܘܢܫܠܡܘܢ ܢܦܫܗܘܢ ܥܕܡܐ ܠܡܘܬܐ ܥܠ ܐ̈ܦܝ ܢܡܘܣܐ ܘܗܝܟܠܐ ܘܡܕܝܢܬܐ ܘܐܬܪܐ ܘܒܢ̈ܝ ܥܡܐ ܘܟܢܫ ܟܠܗ ܚܝܠܗ ܘܐܬܛܝܒܘ ܒܡܘܪܥܝܡ

59. Maccabees 2 13:15

    ܘܝܗܒ ܕܝܢ ܠܐܝܠܝܢ ܕܥܡܗ ܐܬܐ ܕܦܘܪܩܢܗ ܕܐܠܗܐ ܘܕܒܪ ܥܡܗ ܥܠܝܡ̈ܐ ܚܝ̈ܠܬܢܐ ܡܓ̈ܒܝܐ ܘܐܙܠ ܥܠ ܡܫܪܝܬܐ ܘܐܪܡܝ ܒܠܠܝܐ ܥܠ ܕܪܬܗ ܕܡܠܟܐ ܘܩܛܠ ܬܡܢ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ ܘܠܪܒܐ ܕܦܝ̈ܠܐ ܥܡ ܟܠܗ ܛܘܝܒܐ ܕܥܡܗ ܫܚܩ ܘܐܪܡܝ

60. Maccabees 2 13:16

    ܘܡܠܐܘܗ ܠܟܠܗ ܡܫܪܝܬܐ ܙܘܥܬܐ ܘܫܓܘܫܝܐ ܘܗܦܟܘ ܡܢ ܬܡܢ ܒܒܘܣܡܐ ܘܒܚܕܘܬܐ

61. Maccabees 2 13:17

    ܟܕ ܩܪܝܒ ܕܝܢ ܕܢܢܗܪ ܥܒܕܘ ܗܟܢܐ ܡܛܠ ܚܝܠܗ ܘܥܘܕܪܢܗ ܕܡܪܝܐ ܕܡܛܠ ܗܘܐ ܥܠܝܗܘܢ

62. Maccabees 2 13:18

    ܡܠܟܐ ܕܝܢ ܟܕ ܛܥܡ ܘܚܙܐ ܓܢܒܪܘܬܗܘܢ ܘܠܒܝܒܘܬܗܘܢ ܕܝܗܘ̈ܕܝܐ ܨܒܐ ܗܘܐ ܕܒܐܘܡܢܘܬܐ ܘܒܢܟܠܐ ܢܟܒܘܫ ܐܢܘܢ

63. Maccabees 2 13:19

    ܘܫܕܪ ܡܛܪܬܐ ܥܠ ܒܝܬ ܫܘܪ̈ܐ ܚܣ̈ܢܐ ܕܝܗܘ̈ܕܝܐ ܘܐܬܟܬܫܘ ܥܠܘܗܝ ܘܐܙܕܟܝܘ ܘܐܬܒܨܪܘ ܣܓܝ

64. Maccabees 2 13:20

    ܝܗܘܕܐ ܕܝܢ ܡܫܕܪ ܗܘܐ ܐܣܢܐ ܠܐܝܠܝܢ ܕܝܬܒܝܢ ܗܘܘ ܒܓܘ ܚܣ̈ܢܐ

65. Maccabees 2 13:21

    ܘܐܙܠ ܪܘܕܩܣ ܡܢ ܐܪܥܐ ܕܝܗܘܕܐ ܘܓܠܐ ܪܐܙܗܘܢ ܠܒܥܠܕܒ̈ܒܝܗܘܢ ܘܦܩܕ ܘܐܫܟܚܘܗܝ ܘܩܛܠܘܗܝ

66. Maccabees 2 13:22

    ܘܬܢܐ ܬܘܒ ܡܠܟܐ ܘܐܬܐ ܥܠ ܒܝܬ ܫܘܪ̈ܐ ܘܝܗܒ ܝܡܝܢܐ ܘܢܣܒ ܘܫܩܠ

67. Maccabees 2 13:23

    ܘܐܙܠ ܥܠ ܕܒܝܬ ܝܗܘܕܐ ܘܐܬܟܬܫ ܥܡܗܘܢ ܘܐܙܕܟܝ ܘܗܦܟ ܟܕ ܣܒܪ ܗܘܐ ܥܠ ܦܝܠܝܦܘܣ ܗܘ ܕܡܩܡ ܗܘܐ ܠܗ ܥܠ ܨܒܘ̈ܬܐ ܒܐܢܛܝܟܝܐ ܕܢܡܪܕ ܥܠܘܗܝ ܨܒܐ ܘܥܒܕ ܫܠܡܐ ܥܡ ܝܗܘ̈ܕܝܐ ܘܐܫܬܥܒܕ ܠܗܘܢ ܘܐܝܡܐ ܠܗܘܢ ܘܐܩܝܡ ܥܡܗܘܢ ܪܚܡܘܬܐ ܘܩܪܒ ܩܘܪ̈ܒܢܐ ܘܝܩܪܗ ܠܗܝܟܠܐ ܪܘܪܒܐܝܬ ܐܦ ܥܠ ܐܬܪܐ ܪܚܡ

68. Maccabees 2 13:24

    ܘܠܡܩܒܝ ܩܒܠܗ ܒܚܘܒܐ ܣܓܝܐܐ ܘܫܒܩ ܪܫܐ ܘܡܕܒܪܢܐ ܡܢ ܦܛܠܡܐܣ ܘܥܕܡܐ ܠܓܙܪ ܠܗܓܡܢܝܕܝܣ

69. Maccabees 2 13:25

    ܘܐܙܠ ܠܦܛܘܠܘܡܐܘܣ ܘܡܬܬܥܝܩܝܢ ܗܘܘ ܦܛܘ̈ܠܡܝܐ ܥܠ ܩܝܡܐ ܕܐܩܝܡ ܗܘܐ ܥܡܗܘܢ ܘܡܬܚܡܬܝܢ ܗܘܘ ܥܠܘܗܝ ܪܘܪܒܐܝܬ ܘܨܒܝܢ ܗܘܘ ܕܢܫܪܘܢ ܩܝܡܐ ܕܐܩܝܡ ܥܡܗܘܢ

70. Maccabees 2 13:26

    ܘܩܪܒ ܠܘܣܝܐܣ ܩܕܡ ܒܝܡ ܘܢܦܩ ܠܗܘܢ ܪܘܚܐ ܘܐܦܝܣ ܐܢܘܢ ܘܫܝܢ ܐܢܘܢ ܘܕܒܪ ܡܢ ܬܡܢ ܠܐܢܛܝܘܟܝܐ ܗܟܢܐ ܗܘܬ ܐܘܪܚܗ ܘܡܐܬܝܬܗ ܕܡܠܟܐ

71. Maccabees 2 14:1

    ܡܢ ܒܬܪ ܕܝܢ ܬܠܬ ܫ̈ܢܝܢ ܐܬܐ ܥܠ ܕܒܝܬ ܝܗܘܕܐ ܕܡܛܪܝܘܣ ܒܪ ܣܠܘܩܘܣ ܥܠ ܠܡܐܢܐ ܕܐܠܣ ܟܕ ܐܝܬ ܥܡܗ ܚܝܠܐ ܣܓܝܐܐ ܘܥܫܝܢܐ ܟܕ ܡܙܝܢ ܪܘܪܒܐܝܬ

72. Maccabees 2 14:2

    ܕܢܐܚܕܝܗ ܠܟܘܠܗ ܐܪܥܐ ܡܛܠ ܕܩܛܠܗ ܗܘܐ ܠܐܢܛܝܟܣ ܘܠܠܘܣܝܐܣ ܪܒ ܒܝܬܗ

73. Maccabees 2 14:3

    ܐܠܩܝܡܘܣ ܕܝܢ ܕܡܢ ܩܕܝܡ ܗܘܐ ܗܘܐ ܪܒ ܟܗ̈ܢܐ ܕܛܡܐ ܗܘܐ ܡܫܠܡܢܐܝܬ ܒܙܒ̈ܢܐ ܕܚܘܠܛܢܐ ܐܬܚܫܒ ܘܚܙܐ ܕܡܢ ܟܠܦܪܘܣ ܠܐ ܐܝܬ ܠܗ ܣܒܪܐ ܐܦܠܐ ܕܢܬܩܪܒ ܠܘܬ ܡܕܒܚܐ ܡܫܟܚ

74. Maccabees 2 14:4

    ܐܙܠ ܠܘܬ ܕܡܛܪܝܘܣ ܡܠܟܐ ܒܫܢܬ ܡܐܐ ܘܚܡܫܝܢ ܘܚܕܐ ܘܐܘܒܠ ܠܗ ܟܠܝܠܐ ܕܕܗܒܐ ܘܫܒܠܬܐ ܕܕܗܒܐ ܘܥܡܗܘܢ ܣܘ̈ܟܐ ܕܕܩ̈ܠܐ ܡܢ ܕܗܝܟܠܐ ܘܒܗܘ ܝܘܡܐ ܕܝܢ ܗܘܐ ܒܫܠܝܐ

75. Maccabees 2 14:5

    ܘܟܕ ܐܫܟܚ ܠܗ ܐܬܪܐ ܐܠܩܝܡܣ ܠܡܪܚܘܬܗ ܘܠܥܘܠܘܬܗ ܩܪܝܗܝ ܕܡܛܪܝܘܣ ܠܡܘܬܒܐ ܘܫܐܠܗ ܗܘܐ ܘܐܡܪ ܠܗ ܕܒܐܝܕܐ ܬܪܥܝܬܐ ܐܘ ܡܚܫܒܬܐ ܡܬܥܫܢܝܢ ܝܗܘ̈ܕܝܐ ܗܟܢܐ ܥܢܐ ܗܘ ܘܐܡܪ ܠܗ

76. Maccabees 2 14:6

    ܗܢܘܢ ܕܡܬܩܪܝܢ ܡܫܒ̈ܚܐ ܕܝܗܘ̈ܕܝܐ ܕܥܠܝܗܘܢ ܥܒܝܕ ܝܗܘܕܐ ܡܩܒܝ ܗܢܘܢ ܡܪܕܝܢ ܘܡܓܪܓܝܢ ܘܡܥܫܢܝܢ ܩܪܒܐ ܘܠܐ ܫܒܩܝܢ ܠܗ ܠܡܠܟܘܬܐ ܕܢܗܘܐ ܒܗ ܫܠܡܐ

77. Maccabees 2 14:7

    ܡܛܠ ܗܢܐ ܐܦ ܐܢܐ ܫܒܩܬ ܬܫܒܘܚܬܐ ܕܐܒܗ̈ܝ ܕܐܝܬܝܗ ܪܒܘܬ ܟܗܢܘܬܐ ܘܗܐ ܐܬܝܬ ܬܪܬܝܢ ܙܒ̈ܢܝܢ ܩܕܡܝܟ

78. Maccabees 2 14:8

    ܡܛܠ ܕܝܨܦ ܐܢܐ ܘܫܩܝܠ ܐܢܐ ܛܥܢܐ ܕܨܒ̈ܘܬܗ ܕܡܠܟܐ ܘܕܬܪܬܝܢ ܕܝܢ ܡܛܠ ܒܢ̈ܝ ܥܡܢ ܕܝܠܢ ܚܙܐ ܐܢܐ ܓܝܪ ܪܡܘܬܗܘܢ ܘܫܘܒܗܪܗܘܢ ܕܗܠܝܢ ܕܡܢ ܩܕܝܡ ܐܡܪܬ ܥܠܝܗܘܢ ܕܐܝܟܢܐ ܫܚܩܝܢ ܠܗ ܠܥܡܢ ܘܠܐ ܫܒܩܝܢ ܠܗ ܐܦܠܐ ܩܠܝܠ ܕܢܗܘܐ ܒܢܝܚܐ

79. Maccabees 2 14:9

    ܐܢܬ ܕܝܢ ܡܠܟܐ ܕܝܠܦܬ ܗܠܝܢ ܣܒ ܛܥܢܐ ܕܐܪܥܢ ܘܕܒܢ̈ܝ ܥܡܢ ܕܘ̈ܝܐ ܘܒܝ̈ܫܐ ܐܝܟ ܡܐ ܕܐܝܬ ܠܟ ܡܪܚܡܢܘܬܐ ܠܘܬ ܟܠܗܘܢ ܒܢܝ̈ܢܫܐ

80. Maccabees 2 14:10

    ܟܠ ܟܡܐ ܓܝܪ ܕܝܗܘܕܐ ܚܝ ܕܢܗܘܐ ܫܠܡܐ ܒܐܪܥܢ ܠܐ ܡܫܟܚ

81. Maccabees 2 14:11

    ܘܟܕ ܫܡܥ ܡܢܗ ܡܠܟܐ ܗܠܝܢ ܡ̈ܠܐ ܒܪܫܥܬܗ ܐܦ ܪ̈ܚܡܘܗܝ ܕܡܠܟܐ ܡܛܠ ܕܐܝܬ ܗܘܐ ܠܗܘܢ ܒܥܠܕܒܒܘܬܐ ܥܡ ܝܗܘܕܐ ܓܘܙܠܘܗ ܠܚܡܬܗ ܕܕܡܛܪܝܣ ܥܠܘܗܝ

82. Maccabees 2 14:12

    ܘܒܪܫܥܬܗ ܩܪܐ ܡܠܟܐ ܕܡܛܪܝܘܣ ܠܢܝܩܢܘܪ ܗܘ ܕܥܒܝܕ ܗܘܐ ܪܒܐ ܥܠ ܦܝ̈ܠܐ ܘܪܫܐ ܘܡܕܒܪܢܐ

83. Maccabees 2 14:13

    ܘܝܗܒ ܠܗ ܐܓܪ̈ܬܐ ܘܫܕܪܗ ܘܦܩܕܗ ܕܠܗ ܠܝܗܘܕܐ ܢܩܛܠܝܘܗܝ ܘܠܐܝܠܝܢ ܕܐܝܬ ܗܘܘ ܥܡܗ ܢܒܕܪ ܐܢܘܢ ܘܠܐܠܩܝܡܘܣ ܕܝܢ ܢܩܝܡ ܒܪܒܘܬ ܟܗܢܘܬܐ ܕܗܝܟܠܐ ܪܒܐ ܘܡܫܒܚܐ

84. Maccabees 2 14:14

    ܥܡ̈ܡܐ ܕܝܢ ܐܝܠܝܢ ܕܥܪܩܘ ܗܘܘ ܡܢ ܐܪܥܐ ܕܝܗܘܕܐ ܐܬܝܢ ܗܘܘ ܘܚܠܛܝܢ ܥܡ ܢܝܩܢܘܪ ܘܡܬܒܣܡܝܢ ܗܘܘ ܘܚܕܝܢ ܥܠ ܐܘܠܨܢܐ ܘܥܩܬܐ ܕܐܝܬ ܗܘܐ ܠܕܒܝܬ ܝܗܘܕܐ

85. Maccabees 2 14:15

    ܘܟܕ ܫܡܥܘ ܕܒܝܬ ܝܗܘܕܐ ܥܠ ܡܐܬܝܬܗ ܕܢܝܩܢܘܪ ܘܥܠ ܡܪܡܝܢܘܬܐ ܕܥܡ̈ܡܐ ܐܪܡܝܘ ܥܦܪܐ ܥܠ ܪ̈ܫܝܗܘܢ ܘܓܥܝܢ ܗܘܘ ܘܡܨܠܝܢ ܩܕܡ ܗܘ ܕܒܟܘܠ ܙܒܢ ܗܘ ܗܘܐ ܠܗܘܢ ܡܥܕܪܢܐ ܘܒܟܠܙܒܢ ܓܠܝܐܝܬ ܦܪܩ ܝܪܬܘܬܗ

86. Maccabees 2 14:16

    ܘܦܩܕ ܝܗܘܕܐ ܕܢܬܚܙܩܘܢ ܒܙܝܢܗܘܢ ܘܒܪܫܥܬܗ ܫܩܠܘ ܘܐܪܥܘ ܐܢܘܢ ܒܩܪܝܬܐ ܕܫܡܗ ܕܫܘ

87. Maccabees 2 14:17

    ܫܡܥܘܢ ܕܝܢ ܐܚܘܗܝ ܕܝܗܘܕܐ ܡܢ ܫܠܝܐ ܐܪܡܝ ܗܘܐ ܥܠ ܢܝܩܢܘܪ ܘܡܛܠ ܕܡܣܪܗܒܐܝܬ ܐܙܠܘ ܥܠܘܗܝ ܐܬܪܗܒܘ ܡܢܗ

88. Maccabees 2 14:18

    ܢܝܩܢܘܪ ܕܝܢ ܟܕ ܫܡܥ ܗܘܐ ܥܠ ܓܢܒܪܘܬܗܘܢ ܕܒܝܬ ܝܗܘܕܐ ܘܥܠ ܢܨܚܢܝ̈ܗܘܢ ܘܕܐܝܟܢܐ ܡܫܠܡܐ ܢܦܫܗܘܢ ܥܠ ܐ̈ܦܝ ܥܡܗܘܢ ܘܐܬܪܗܘܢ ܠܐ ܨܒܐ ܗܘܐ ܕܒܩܛܠܐ ܘܕܡܐ ܢܥܒܕ ܕܝܢܐ

89. Maccabees 2 14:19

    ܐܠܐ ܫܕܪ ܠܦܣܝܕܢܝܣ ܘܠܬܐܕܛܣ ܘܠܡܬܝܬܐ ܠܡܬܠ ܘܠܡܣܒ ܝܡܝܢܐ

90. Maccabees 2 14:20

    ܘܟܕ ܕܝܢ ܫܡܥ ܝܗܘܕܐ ܐܬܡܠܟ ܥܡ ܥܡܐ ܘܐܬܚܫܒܘ ܐܟܚܕܐ ܘܚܙܘ ܕܡ̈ܠܘܗܝ ܕܫܠܡܐ ܐ̈ܢܝܢ ܘܐܬܪܡܝ ܕܢܥܒܕ ܥܡܗ ܫܠܡܐ

91. Maccabees 2 14:21

    ܘܐܩܝܡܘ ܕܒܐܝܢܐ ܝܘܡܐ ܢܚܙܘܢ ܚܕ ܠܚܕ ܘܠܚܕ ܚܕ ܡܢܗܘܢ ܟܪܝܟܝܢ ܗܘܘ ܠܗ ܠܒܫ̈ܐ ܟܕ ܡܙܝܢܝܢ

92. Maccabees 2 14:22

    ܦܩܕ ܕܝܢ ܝܗܘܕܐ ܠܚܝܠܗ ܕܢܬܚܙܩܘܢ ܒܙܝܢܗܘܢ ܘܗܘܘ ܩܝܡܝܢ ܘܡܛܝܒܝܢ ܒܐܬܪ̈ܘܬܐ ܐܝܠܝܢ ܕܩܢܝܛܝܢ ܗܘܘ ܡܢܗܘܢ ܕܕܠܡܐ ܡܡܬܘܡ ܡܢ ܫܠܝܐ ܢܟܠܐ ܡܕܡ ܢܗܘܐ ܘܚܙܘ ܚܕ ܠܚܕ ܒܫܠܡܐ ܣܓܝܐܐ ܘܡܠܠܘ ܡ̈ܠܐ ܕܫܝܢܐ

93. Maccabees 2 14:23

    ܘܐܝܬܘܗܝ ܗܘܐ ܢܝܩܢܘܪ ܒܐܘܪܫܠܡ ܘܡܕܡ ܕܒܝܫ ܠܐ ܥܒܕ ܗܘܐ ܘܠܥܡ̈ܡܐ ܐܝܠܝܢ ܕܐܬܟܢܫܘ ܗܘܘ ܠܘܬܗ ܫܪܐ ܐܢܘܢ

94. Maccabees 2 14:24

    ܘܐܚܝܕ ܗܘܐ ܠܗ ܠܝܗܘܕܐ ܒܚܘܒܐ ܣܓܝܐܐ ܘܐܝܬܘܗܝ ܗܘܐ ܥܡܗ ܒܟܠܙܒܢ ܒܐ̈ܦܐ ܢܗܝܪ̈ܬܐ

95. Maccabees 2 14:25

    ܘܒܥܐ ܡܢܗ ܘܐܦܝܣܗ ܕܢܣܒ ܐܢܬܬܐ ܘܢܥܒܕ ܒܢ̈ܝܐ ܘܢܣܒ ܐܢܬܬܐ ܘܐܫܬܘܬܦ ܒܥܠܡܐ

96. Maccabees 2 14:26

    ܐܠܩܝܡܣ ܕܝܢ ܟܕ ܚܙܐ ܚܘܒܐ ܘܫܠܡܘܬܐ ܕܐܝܬ ܠܗܘܢ ܚܕ ܥܡ ܚܕ ܠܢܝܩܢܘܪ ܘܠܝܗܘܕܐ ܐܙܠ ܠܗ ܠܘܬ ܕܡܛܪܝܣ ܡܠܟܐ ܘܐܡܪ ܠܗ ܥܠ ܢܝܩܢܘܪ ܕܗܘܐ ܠܗ ܢܘܟܪܝܐ ܠܡܠܟܘܬܟ ܘܠܟܠܗܝܢ ܨܒܘ̈ܬܟ ܠܝܗܘܕܐ ܓܝܪ ܗܘ ܕܐܝܬܘܗܝ ܒܥܠܕܒܒܐ ܕܡܠܟܘܬܟ ܫܘܬܦܐ ܘܚܒܪܐ ܥܒܕܗ ܠܗ

97. Maccabees 2 14:27

    ܘܟܕ ܫܡܥ ܡܠܟܐ ܡܐܟܠ ܩܪܨܗ ܕܒܥܠܕܒܒܐ ܐܬܚܡܬ ܒܪܘܓܙܐ ܣܓܝܐܐ ܘܟܬܒ ܠܢܝܩܢܘܪ ܩܫܝܐܝܬ ܡܛܠ ܪܚܡܘܬܗ ܕܥܡ ܝܗܘܕܐ ܘܦܩܕ ܕܠܗ ܠܡܩܒܝ ܟܕ ܦܟܝܪ ܢܐܚܘܕ ܘܢܫܕܪܝܘܗܝ ܒܥܓܠ ܠܐܢܛܝܘܟܝܐ

98. Maccabees 2 14:28

    ܘܟܕ ܫܡܥ ܕܝܢ ܢܝܩܢܘܪ ܐܓܪܬܐ ܐܫܬܪܝ ܗܘܐ ܘܐܬܥܝܩ ܣܓܝ ܘܠܐ ܨܒܐ ܗܘܐ ܕܢܫܬܚܠܦ ܥܠ ܝܗܘܕܐ ܓܒܪܐ ܕܡܕܡ ܠܐ ܐܣܟܠ

99. Maccabees 2 14:29

    ܘܕܢܥܨܐ ܕܝܢ ܦܘܩܕܢܗ ܕܡܠܟܐ ܠܐ ܡܫܟܚ ܗܘܐ ܘܡܬܪܥܐ ܗܘܐ ܕܒܐܝܕܐ ܥܠܬܐ ܢܐܚܕܝܘܗܝ

100. Maccabees 2 14:30

     ܡܩܒܝ ܕܝܢ ܟܕ ܚܙܝܗܝ ܠܢܝܩܢܘܪ ܕܠܐ ܐܝܬܝܗܝܢ ܐ̈ܦܘܗܝ ܠܘܬܗ ܐܝܟ ܕܡܢ ܩܕܝܡ ܐܠܐ ܟܡܝܪ̈ܢ ܘܡܫܚ̈ܠܦܢ ܡܢ ܕܒܟܠ ܙܒܢ ܐܣܬܟܠ ܕܡܫܬܚܠܦܘ ܐܫܬܚܠܦ ܥܠܘܗܝ ܘܟܢܫ ܥܡܗ ܡܢ ܒܢ̈ܝ ܥܡܗ ܠܐ ܙܥܘܪܝܢ ܘܫܢܝ ܠܗ ܡܢܗ ܡܢ ܢܝܩܢܘܪ

← Previous · Next → — showing 401–500 of 555

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.