← All works

Peshitta Leviticus

Peshitta (Syriac Old Testament) · 859 sections

1. Leviticus 5:16

   ܘܕܚܛܐ ܡܢ ܩܘܕܫܐ ܢܦܪܘܥ. ܘܚܘܡܫܗ ܢܘܣܦ ܥܠܘܗܝ. ܘܢܬܠܝܘܗܝ ܠܟܗܢܐ. ܘܟܗܢܐ ܢܚܣܐ ܥܠܘܗܝ ܒܕܟܪܐ ܕܩܘܪܒܢܐ ܘܢܫܬܒܩ ܠܗ.

2. Leviticus 5:17

   ܘܐܢ ܢܦܫܐ ܬܚܛܐ. ܘܬܥܒܕ ܚܕ ܡܢ ܟܠ ܦܘܩ̈ܕܢܘܗܝ ܕܡܪܝܐ ܕܠܐ ܡܬܥܒܕܝܢ. ܘܠܐ ܝܕܥ ܕܚܛܐ. ܢܩܒܠ ܚܛܗܗ.

3. Leviticus 5:18

   ܘܢܝܬܐ ܕܟܪܐ ܕܠܐ ܡܘܡ ܡܢ ܥܢܐ ܒܕܡܝ̈ܐ ܩܘܪܒܢܐ ܠܟܗܢܐ. ܘܢܚܣܐ ܥܠܘܗܝ ܟܗܢܐ ܥܠ ܛܘܥܝܝ ܕܛܥܐ. ܘܗܘ ܠܐ ܝܕܥ ܘܢܫܬܒܩ ܠܗ.

4. Leviticus 5:19

   ܩܘܪܒܢܐ ܗܘ ܚܠܦ ܚܛܗܐ ܢܝܬܐ ܩܘܪܒܢܐ ܠܡܪܝܐ.

5. Leviticus 5:20

   ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

6. Leviticus 5:21

   ܢܦܫܐ ܟܕ ܬܚܛܐ ܘܬܥܠܐ ܥܘܠܐ ܒܡܪܝܐ. ܘܢܕܓܠ ܒܚܒܪܗ ܒܓܘܥܠܢܐ. ܐܘ ܒܫܘܬܦܘܬܐ ܕܐܝܕܐ. ܐܘ ܒܩܛܝܪܐ ܐܘ ܛܠܡ ܠܚܒܪܗ.

7. Leviticus 5:22

   ܐܘ ܐܫܟܚ ܐܒܕܬܐ ܘܢܕܓܠ ܒܗ̇. ܘܢܐܡܐ ܒܕܓܠܘܬܐ ܥܠ ܚܕܐ ܡܢ ܟܠ ܕܥܒ̇ܕ ܐܢܫܐ ܠܡܚܛܐ ܒܗܝܢ.

8. Leviticus 5:23

   ܘܢܗܘܐ ܟܕ ܢܚܛܐ ܘܢܬܚܝܒ. ܢܦܢܐ ܡܕܡ ܕܫܩܠ ܒܩܛܝܪܐ. ܐܘ ܛܠܘܡܝܐ ܕܛܠܡ. ܐܘ ܓܘܥܠܢܐ ܕܐܓܥܠܘܗܝ. ܐܘ ܐܒܕܬܐ ܕܐܫܟܚ.

9. Leviticus 5:24

   ܐܘ ܡܢ ܟܠܡܕܡ ܕܢܐܡܐ ܥܠܘܗܝ ܒܕܓܠܘܬܐ. ܢܦܪܥܝܘܗܝ ܒܩܪܢܗ ܘܚܘܡܫܗ ܢܘܣܦ ܥܠܘܗܝ. ܠܡ̇ܢ ܕܕܝܠܗ ܗܘ ܢܬܠܝܘܗܝ ܒܝܘܡܐ ܕܩܘܪܒܢܗ.

10. Leviticus 5:25

    ܘܩܘܪܒܢܗ ܢܝܬܐ ܠܡܪܝܐ. ܕܟܪܐ ܕܠܐ ܡܘܡ ܡܢ ܥܢܐ ܒܕ̈ܡܝܐ. ܩܘܪܒܢܐ ܠܟܗܢܐ .

11. Leviticus 5:26

    ܘܢܚܣܐ ܥܠܘܗܝ ܟܗܢܐ ܩܕܡ ܡܪܝܐ. ܘܢܫܬܒܩ ܠܗ ܥܠ ܚܕܐ ܡܢ ܟܠ ܕܥܒ̇ܕ ܐܢܫܐ ܠܡܚܛܐ ܒܗܝܢ.

12. Leviticus 6:1

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

13. Leviticus 6:2

    ܦܩܕ ܠܐܗܪܘܢ ܘܠܒܢ̈ܘܗܝ ܘܐܡܪ ܠܗܘܢ. ܗܢܘ ܢܡܘܣܐ ܕܥܠܬܐ. ܗ̇ܝ ܥܠܬܐ ܕܝܩܕܐ ܥܠ ܡܕܒܚܐ. ܟܠܗ ܠܠܝܐ ܥܕܡܐ ܠܨܦܪܐ . ܘܢܘܪܐ ܕܡܕܒܚܐ ܬܗܘܐ ܝܩܕܐ ܒܗ.

14. Leviticus 6:3

    ܘܢܠܒܫ ܟܗܢܐ ܠܒ̈ܘܫܐ ܕܒܘܨܐ ܘܡܐ̈ܢܐ ܕܒܘܨܐ. ܢܠܒܫ ܥܠ ܒܣܪܗ. ܘܢܦܪܘܫ ܩܛܡܐ ܕܐܟܠܬ ܢܘܪܐ ܠܥܠܬܐ ܕܥܠ ܡܕܒܚܐ. ܘܢܣܝܡܝܘܗܝ ܥܠ ܓܢܒ ܡܕܒܚܐ.

15. Leviticus 6:4

    ܘܢܫܠܚ ܟܗܢܐ ܡܐ̈ܢܘܗܝ ܘܢܠܒܫ ܡܐ̈ܢܐ ܐܚܪ̈ܢܐ. ܘܢܦܩ ܩܛܡܐ ܠܒܪ ܡܢ ܡܫܪܝܬܐ ܠܕܘܟܬܐ ܕܕܟܝܐ.

16. Leviticus 6:5

    ܘܢܘܪܐ ܬܗܘܐ ܝܩ̇ܕܐ ܥܠ ܡܕܒܚܐ ܘܠܐ ܬܕܥܟ. ܘܢܟܫܐ ܥܠܘܗܝ ܟܗܢܐ ܩܝ̈ܣܐ ܡܢ ܨܦܪ ܠܨܦܪ. ܘܢܣܕܘܪ ܥܠܘܗܝ ܥܠܬܐ. ܘܢܣܩ ܥܠܘܗܝ ܬܪܒܐ ܕܫ̈ܠܡܐ.

17. Leviticus 6:6

    ܘܢܘܪܐ ܐܡܝܢܐܝܬ ܬܗܘܐ ܝܩ̇ܕܐ ܥܠ ܡܕܒܚܐ ܘܠܐ ܬܕܥܟ.

18. Leviticus 6:7

    ܘܗܢܐ ܢܡܘܣܐ ܕܣܡܝܕܐ. ܢܩܪܒܘܢܗ ܒ̈ܢܝ ܐܗܪܘܢ ܩܕܡ ܡܪܝܐ ܩܕܡ ܡܕܒܚܐ.

19. Leviticus 6:8

    ܘܢܦܪܘܫ ܡܢܗ ܡܠܐ ܙܘܪܗ ܡܢ ܢܫܝܦܐ ܕܣܡܝܕܐ ܘܡܢ ܡܫܚܐ. ܘܡܢ ܟܠܗ̇ ܠܒܘܢܬܐ ܕܥܠ ܣܡܝܕܐ. ܘܢܣܩ ܥܠ ܡܕܒܚܐ ܠܪܝܚ ܢܝܚܐ ܕܘܟܪܢܐ ܠܡܪܝܐ.

20. Leviticus 6:9

    ܘܕܡܫܬܚܪ ܡܢܗ ܢܐܟܠܘܢ ܐܗܪܘܢ ܘܒܢ̈ܘܗܝ. ܦܛܝܪܐ ܢܬܐܟܠ. ܒܐܬܪܐ ܩܕܝܫܐ ܒܕܪܬܐ ܕܡܫܟܢ ܙܒܢܐ ܢܐܟܠܘܢܗ.

21. Leviticus 6:10

    ܠܐ ܢܬܐܦܐ ܚܡܝܥ ܡܢܬܗܘܢ ܝܗ̇ܒܬܗ ܡܢ ܩܘܪ̈ܒܢܝ ܩܕܘܫ ܩܘܕܫ̈ܝܢ ܗܘ. ܐܝܟ ܚܛܗܐ ܘܐܝܟ ܩܘܪܒܢܐ.

22. Leviticus 6:11

    ܟܠ ܕܟܪ̈ܐ ܕܒܢ̈ܝ ܐܗܪܘܢ ܢܐܟܠܘܢܗ. ܩܝܡܐ ܗܘ ܠܥܠܡ ܠܕܪ̈ܝܟܘܢ. ܡܢ ܩܘܪ̈ܒܢܘܗܝ ܕܡܪܝܐ. ܟܠ ܕܢܩܪܘܒ ܠܗܘܢ ܢܬܩܕܫ.

23. Leviticus 6:12

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

24. Leviticus 6:13

    ܗܢܘ ܩܘܪܒܢܐ ܕܐܗܪܘܢ ܘܕܒ̈ܢܘܗܝ. ܕܢܩܪܒܘܢ ܠܡܪܝܐ ܒܝܘܡܐ ܕܡܬܡܫܚ. ܚܕ ܡܢ ܥܣܪ̈ܐ ܠܣܐܬܐ. ܢܫܝܦܐ ܣܡܝܕܐ ܐܡܝܢܐܝܬ. ܦܠܓܗ ܒܨܦܪܐ ܘܦܠܓܗ ܒܪܡܫܐ ܐܡܝܢܐܝܬ.

25. Leviticus 6:14

    ܥܠ ܛܐܓܢܐ ܒܡܫܚܐ ܢܬܥܒܕ. ܡܪܥܕܐ ܢܥܒܕܝܘܗܝ. ܘܦܘܬܝܗܝ ܠܣܡܝܕܐ ܦܬ̈ܝܢ ܦܬ̈ܝܢ. ܘܩܪܒ ܪܝܚ ܣܘܬܐ ܠܡܪܝܐ.

26. Leviticus 6:15

    ܘܟܗܢܐ ܕܡܬܡܫܚ ܒܬܪܗ ܡܢ ܒܢ̈ܘܗܝ ܢܥܒܕܝܘܗܝ. ܩܝܡܐ ܠܥܠܡ ܠܡܪܝܐ ܡܫܡܠܝܐܝܬ ܬܣܩ.

27. Leviticus 6:16

    ܘܟܘܠܗ ܣܡܝܕܐ ܕܟܗܢܐ. ܡܫܡܠܝܐܝܬ ܢܗܘܐ ܘܠܐ ܢܬܐܟܠ.

28. Leviticus 6:17

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

29. Leviticus 6:18

    ܡܠܠ ܥܡ ܐܗܪܘܢ ܘܥܡ ܒ̈ܢܘܗܝ ܘܐܡܪ ܠܗܘܢ. ܗܢܘ ܢܡܘܣܐ ܕܚܛܗܐ. ܒܐܬܪܐ ܕܡܬܢܟܣܐ ܥܠܬܐ ܢܬܢܟܣ ܚܛܗܐ ܩܕܡ ܡܪܝܐ. ܩܕܘܫ ܩܘܕܫ̈ܝܢ ܗܘ.

30. Leviticus 6:19

    ܘܟܗܢܐ ܕܡܕܟܐ ܠܗ ܢܐܟܠܝܘܗܝ. ܒܐܬܪܐ ܩܕܝܫܐ ܢܬܐܟܠ. ܒܕܪܬܐ ܕܡܫܟܢܙܒܢܐ.

31. Leviticus 6:20

    ܟܠ ܕܢܩܪܘܒ ܠܒܣܪܗ ܢܬܩܕܫ. ܘܕܢܪܘܣ ܡܢ ܕܡܗ ܥܠ ܡܐܢܐ. ܡܐܢܐ ܕܡܬܪܣܣ ܥܠܘܗܝ. ܢܬܚܠܠ ܒܐܬܪܐ ܩܕܝܫܐ.

32. Leviticus 6:21

    ܘܡܐܢܐ ܕܦܚܪܐ ܐܝܢܐ ܕܡܬܒܫܠ ܒܗ ܢܬܬܒܪ. ܘܐܢ ܒܡܐܢܐ ܕܢܚܫܐ ܢܬܒܫܠ. ܢܬܡܪܩ ܘܢܬܬܫܝܓ ܒܡ̈ܝܐ.

33. Leviticus 6:22

    ܟܠ ܕܟܪ̈ܐ ܕܒܢ̈ܝ ܐܗܪܘܢ ܢܐܟܠܘܢܗ. ܡܛܠ ܕܩܕܘܫ ܩܘ̈ܕܫܝܢ ܗܘ.

34. Leviticus 6:23

    ܘܟܘܠ ܚܛܗܐ ܕܥܐ̇ܠ ܡܢ ܕܡܗ ܠܡܫܟܢܙܒܢܐ. ܠܡܚܣܝܘ ܒܩܘܕܫܐ ܠܐ ܢܬܐܟܠ. ܐܠܐ ܒܢܘܪܐ ܢܐܩܕ.

35. Leviticus 7:1

    ܗܢܘ ܢܡܘܣܐ ܕܩܘܪܒܢܐ. ܩܕܘܫ ܩܘܕܫܝ̈ܢ ܗܘ.

36. Leviticus 7:2

    ܒܐܬܪܐ ܕܢܟܣܝܢ ܝܩܕܐ ܫܠܡܐ. ܢܟܣܘܢ ܩܘܪܒܢܐ. ܘܕܡܗ ܢܪܣܘܢ ܥܠ ܡܕܒܚܐ ܟܕ ܚܕܪ.

37. Leviticus 7:3

    ܘܟܠܗ ܬܪܒܗ ܢܩܪܒ ܡܢܗ. ܐܠܝܬܐ ܘܚܠܒܐ ܕܩܪܝܡ ܠܓܘܝܐ.

38. Leviticus 7:4

    ܘܬܪܬܝ̈ܢ ܟܘܠܝ̈ܢ ܘܬܪܒܗܝܢ. ܘܚܨܪ ܟܒܕܐ ܥܡ ܟܘܠܝ̈ܬܐ ܢܥܒܕܝܗ.

39. Leviticus 7:5

    ܘܢܣܩ ܐܢܘܢ ܟܗܢܐ ܠܡܕܒܚܐ ܩܘܪܒܢܐ ܠܡܪܝܐ. ܚܛܗܐ ܗܘ.

40. Leviticus 7:6

    ܟܠ ܕܟܪܐ ܕܒܢ̈ܝ ܐܗܪܘܢ ܢܐܟܠܘܢܗ. ܒܐܬܪܐ ܩܕܝܫܐ ܢܬܐܟܠ. ܩܕܘܫ ܩܘܕܫܝ̈ܢ ܗܘ.

41. Leviticus 7:7

    ܐܝܟ ܚܛܗܐ ܗܟܢܐ ܩܘܪܒܢܐ. ܢܡܘܣܐ ܚܕ ܢܗܘܐ ܠܟܘܢ. ܘܟܗܢܐ ܕܡܚܣܐ ܒܗ ܠܗ ܢܗܘܐ.

42. Leviticus 7:8

    ܘܟܗܢܐ ܕܡܩܪܒ ܚܠܦ ܚܛܗܗ ܕܓܒܪܐ ܝܩܕܐ ܫܠܡܐ. ܡܫܟܗ ܕܝܩܕܐ ܫܠܡܐ ܕܡܩܪܒ ܠܟܗܢܐ ܢܗܘܐ.

43. Leviticus 7:9

    ܘܟܠܗ ܣܡܝܕܐ ܕܡܬܐܦܐ ܒܬܢܘܪܐ ܘܟܠ ܕܡܬܥܒܕ ܒܛܪܛܩܠ ܘܥܠ ܛܐܓܢܐ. ܠܟܗܢܐ ܕܡܩܪܒ ܠܗ ܢܗܘܐ.

44. Leviticus 7:10

    ܘܟܠ ܣܡܝܕܐ ܕܡܬܦܝܠ ܒܡܫܚܐ ܘܕܝܒܝܫ. ܠܟܠܗܘܢ ܒܢ̈ܝ ܐܗܪܘܢ ܢܗܘܐ. ܠܐܢܫ ܐܝܟ ܕܡܛܐ ܠܗ.

45. Leviticus 7:11

    ܗܢܘ ܢܡܘܣܐ ܕܕܒܚܐ ܕܥܠܬܐ. ܕܡܬܩܪܒ ܠܡܪܝܐ.

46. Leviticus 7:12

    ܐܢ ܥܠ ܬܘܕܝܬܐ ܢܩܪܒܝܘܗܝ. ܢܩܪܒ ܥܠ ܕܒܚܐ ܕܬܘܕܝܬܗ. ܚܚ̈ܪܬܐ ܦܛܝ̈ܪܬܐ ܕܦܝ̈ܠܢ ܒܡܫܚܐ. ܘܠܓ̈ܢܐ ܦܛܝ̈ܪܐ ܕܡܫܝܚܝܢ ܒܡܫܚܐ. ܢܫܝܦܐ ܕܡܪܥܕ ܚܚ̈ܪܬܐ ܕܦܝ̈ܠܢ ܒܡܫܚܐ.

47. Leviticus 7:13

    ܥܠ ܚܚܘܪܬܐ ܕܠܚܡܐ. ܚܡܝܥܐ ܢܩܪܒ ܩܘܪܒܢܗ ܥܠ ܕܒܚܐ ܕܥܠܬܐ ܕܬܘܕܝܬܗ.

48. Leviticus 7:14

    ܘܕܢܩܪܒ ܚܕ ܡܢ ܗܠܝܢ ܟܠܗܘܢ ܩܘܪ̈ܒܢܐ ܦܘܪ̈ܫܢܐ ܠܡܪܝܐ. ܠܟܗܢܐ ܕܪܐ̇ܣ ܕܡܐ ܕܥܠܬܐ ܠܗ ܢܗܘܐ.

49. Leviticus 7:15

    ܘܒܣܪܐ ܕܕܒܚܐ ܕܥܠܬܐ ܕܬܘܕܝܬܗ. ܒܝܘܡܐ ܕܡܩܪܒ ܠܗ ܢܬܐܟܠ. ܘܠܐ ܢܫܬܒܩ ܡܢܗ ܡܕܡ ܠܨܦܪܐ .

50. Leviticus 7:16

    ܘܐܢ ܢܕܪܐ ܗܘ ܐܘ ܦܘܪܫܢܐ ܕܒܚܐ ܕܩܘܪܒܢܗ. ܒܝܘܡܐ ܕܡܬܩܪܒ ܕܒܚܐ ܢܬܐܟܠ. ܐܦ ܠܝܘܡܐ ܐܚܪܢܐ ܡܕܡ ܕܝ̇ܬܪ ܡܢܗ ܬܘܒ ܢܬܐܟܠ.

51. Leviticus 7:17

    ܘܡܕܡ ܕܡܫܬܚܪ ܡܢ ܒܣܪܐ ܕܕܒܚܐ ܠܝܘܡܐ ܕܬܠܬܐ ܒܢܘܪܐ ܢܐܩܕ.

52. Leviticus 7:18

    ܘܐܢ ܡܬܐܟܠܘ ܢܬܐܟܠ ܡܢ ܒܣܪܐ ܕܕܒܚܐ ܕܥܠܬܐ ܠܝܘܡܐ ܕܬܠܬܐ ܠܐ ܢܬܩܒܠ. ܘܡ̇ܢ ܕܡܩܪܒ ܠܗ. ܠܐ ܢܬܚܫܒ ܠܗ. ܐܠܐ ܢܗܘܐ ܡܣܠܝܐ. ܘܢܦܫܐ ܕܬܐܟܘܠ ܡܢܗ. ܚܛܝܬܐ ܬܩܒܠ.

53. Leviticus 7:19

    ܘܒܣܪܐ ܕܢܩܪܘܒ ܠܟܠܡܕܡ ܕܛܡܐ ܠܐ ܢܬܐܟܠ. ܐܠܐ ܒܢܘܪܐ ܢܐܩܕ. ܘܟܠ ܕܕܟܐ ܢܐܟܘܠ ܒܣܪܐ.

54. Leviticus 7:20

    ܘܢܦܫܐ ܕܬܐܟܘܠ ܡܢ ܒܣܪܐ ܕܕܒܚܐ. ܫܠܡܐ ܕܡܪܝܐ ܟܕ ܛܡܐܘܬܗ ܥܠܘܗܝ. ܬܐܒܕ ܢܦܫܐ ܗ̇ܝ ܡܢ ܥܡܗ̇.

55. Leviticus 7:21

    ܘܢܦܫܐ ܟܕ ܬܩܪܘܒ ܒܟܠܗ̇ ܛܡܐܘܬܐ ܕܐܢܫܐ. ܐܘ ܒܒܥܝܪ̈ܐ ܛܡܐܬܐ. ܐܘ ܒܟܠ ܪܚܫܐ ܛܡܐܐ. ܘܢܐܟܘܠ ܡܢ ܒܣܪܐ ܕܕܒܚܐ ܕܥܠܬܐ ܕܡܪܝܐ. ܬܐܒܕ ܢܦܫܐ ܗ̇ܝ ܡܢ ܥܡܗ̇.

56. Leviticus 7:22

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

57. Leviticus 7:23

    ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ. ܟܠ ܬܪܒܐ ܕܬܘܪ̈ܐ ܘܕܐܡܪ̈ܐ ܘܕܥܙ̈ܐ ܠܐ ܬܐܟܠܘܢ.

58. Leviticus 7:24

    ܘܬܪܒܐ ܕܦܓܪܐ ܘܬܪܒܐ ܕܐܝܕܐ ܕܐܟܝܠܐ ܠܚܝܘܬܐ. ܢܬܥܒܕ ܠܟܠ ܥܒܕ ܘܡܐܟܠ ܠܐ ܬܐܟܠܘܢܗ.

59. Leviticus 7:25

    ܡܛܠ ܕܟܠ ܡ̇ܢ ܕܢܐܟܘܠ ܬܪܒܐ. ܡܢ ܒܥܝܪܐ ܕܡܬܩܪܒ ܡܢܗ̇ ܩܘܪܒܢܐ ܠܡܪܝܐ. ܬܐܒܕ ܢܦܫܐ ܗ̇ܝ ܕܐܟ̇ܠܐ ܡܢ ܥܡܗ̇.

60. Leviticus 7:26

    ܘܟܠ ܕܡܐ ܠܐ ܬܐܟܠܘܢ ܒܟܠܗ ܒܝܬ ܡܥܡܪܟܘܢ. ܕܦܪܚܬܐ ܘܕܒܥܝܪ̈ܐ.

61. Leviticus 7:27

    ܟܠ ܢܦܫܐ ܕܬܐܟܘܠ ܕܡܐ. ܬܐܒܕ ܢܦܫܐ ܗ̇ܝ ܡܢ ܥܡܗ̇.

62. Leviticus 7:28

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

63. Leviticus 7:29

    ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ. ܡ̇ܢ ܕܡܩܪܒ ܕܒܚܐ ܫܠܡܐ ܠܡܪܝܐ. ܢܝܬܐ ܩܘܪܒܢܗ ܠܡܪܝܐ ܡܢ ܕܒܚܐ ܕܥܠܬܐ.

64. Leviticus 7:30

    ܐ̈ܝܕܘܗܝ ܢܝ̈ܬܝܢ ܩܘܪܒܢܗ ܕܡܪܝܐ. ܬܪܒܐ ܕܥܠ ܚܕܝܐ ܢܝܬܐ. ܘܢܥܐ ܕܡܬܦܪܫ ܦܘܪܫܢܐ ܩܕܡ ܡܪܝܐ.

65. Leviticus 7:31

    ܘܢܣܩ ܟܗܢܐ ܬܪܒܐ ܠܡܕܒܚܐ. ܘܢܗܘܐ ܢܥܐ ܠܐܗܪܘܢ ܘܠܒܢ̈ܘܗܝ.

66. Leviticus 7:32

    ܘܫܩܐ ܕܝܡܝܢܐ ܬܬܠܘܢ ܦܘܪܫܢܐ ܠܡܪܝܐ. ܡܢ ܕܒܚܝ̈ܟܘܢ ܫ̈ܠܡܐ .

67. Leviticus 7:33

    ܕܡܩܪܒ ܕܡܐ ܘܬܪܒܐ ܕܥܠܬܐ ܡܢ ܒܢ̈ܝ ܐܗܪܘܢ ܠܗ ܬܗܘܐ ܡܢܬܐ ܫܩܐ ܕܝܡܝܢܐ.

68. Leviticus 7:34

    ܡܛܠ ܕܚܕܝܐ ܕܦܘܪܫܢܐ ܘܫܩܐ ܕܦܘܪܫܢܐ. ܢܣ̇ܒܬ ܡܢ ܒܢ̈ܝ ܐܝܣܪܐܝܠ ܡܢ ܕܒܚܝ̈ܗܘܢ ܫ̈ܠܡܐ. ܘܝܗ̇ܒܬ ܐܢܘܢ ܠܐܗܪܘܢ ܟܗܢܐ ܘܠܒܢ̈ܘܗܝ. ܩܝܡܐ ܠܥܠܡ ܡܢ ܠܘܬ ܒܢ̈ܝ ܐܝܣܪܝܠ.

69. Leviticus 7:35

    ܗܕܐ ܗܝ ܡܫܝܚܘܬܐ ܕܐܗܪܘܢ. ܘܡܫܝܚܘܬܐ ܕܒܢ̈ܘܗܝ ܡܢ ܩܘܪ̈ܒܢܘܗܝ ܕܡܪܝܐ. ܒܝܘܡܐ ܕܡܬܩܪܒ ܠܡܫܡܫܘ ܠܡܪܝܐ.

70. Leviticus 7:36

    ܕܦܩܕ ܡܪܝܐ ܠܡܬܠ ܠܗܘܢ ܡܢ ܒܢ̈ܝ ܐܝܣܪܝܠ. ܒܝܘܡܐ ܕܡܫܚ ܐܢܘܢ ܩܝܡܐ ܠܥܠܡ ܠܕܪ̈ܝܗܘܢ.

71. Leviticus 7:37

    ܗܢܐ ܢܡܘܣܐ ܕܝܩܕܐ ܕܥܠܬܐ. ܘܠܣܡܝܕܐ ܘܠܚܛܗܐ ܘܠܩܘܪܒܢܐ. ܘܠܫܘܡܠܝܐ ܘܠܕܒܚܐ ܕܥܠܬܐ.

72. Leviticus 7:38

    ܕܦܩܕ ܡܪܝܐ ܠܡܘܫܐ ܒܛܘܪܐ ܕܣܝܢܝ. ܒܝܘܡܐ ܕܦܩܕܗ ܥܠ ܒܢ̈ܝ ܐܝܣܪܝܠ. ܕܢܩܪܒ ܩܘܪ̈ܒܢܝܗܘܢ ܠܡܪܝܐ ܒܡܕܒܪܐ ܕܣܝܢܝ.

73. Leviticus 8:1

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

74. Leviticus 8:2

    ܕܒܪ ܠܐܗܪܘܢ ܘܠܒܢ̈ܘܗܝ ܥܡܗ. ܘܣܒ ܠܒܘܫ̈ܐ ܘܡܫܚܐ ܕܡܫܝܚܘܬܐ ܘܬܘܪܐ ܕܚܛܗܐ ܘܬܪ̈ܝܢ ܕܟܪ̈ܝܢ. ܘܣܠܐ ܕܦܛܝܪܐ.

75. Leviticus 8:3

    ܘܟܢܫ ܟܠܗ̇ ܟܢܘܫܬܐ ܠܬܪܥܐ ܕܡܫܟܢܙܒܢܐ.

76. Leviticus 8:4

    ܘܥܒܕ ܡܘܫܐ ܐܝܟ ܕܦܩܕܗ ܡܪܝܐ. ܘܐܬܟܢܫܬ ܟܘܠܗ̇ ܟܢܘܫܬܐ ܩܕܡ ܡܫܟܢ ܙܒܢܐ.

77. Leviticus 8:5

    ܘܐܡܪ ܡܘܫܐ ܠܟܠܗ̇ ܟܢܘܫܬܐ . ܗܢܘ ܦܘܩܕܢܐ ܕܦܩܕ ܡܪܝܐ ܠܡܥܒܕ.

78. Leviticus 8:6

    ܘܩܪܒ ܡܘܫܐ ܠܐܗܪܘܢ ܘܠܒܢ̈ܘܗܝ. ܘܐܣܚܝ ܐܢܘܢ ܒܡ̈ܝܐ.

79. Leviticus 8:7

    ܘܐܠܒܫܗ ܟܘܬܝܢܐ ܘܐܣܪܗ ܗܡܝܢܐ. ܘܐܥܛܦܗ ܦܪܝܣܐ. ܘܡܚܐ ܦܪܙܘܡܐ ܒܚ̈ܨܘܗܝ. ܘܝܗܒ ܥܠܘܗܝ ܦܕܬܐ. ܘܚܙܩܗ ܒܗܡܝܢܐ ܕܦܕܬܐ.

80. Leviticus 8:8

    ܘܝܗܒ ܥܠܝܗ̇ ܦܪܝܣܐ . ܘܝܗܒ ܥܠ ܦܪܝܣܐ ܝܕܥܬܐ ܘܩܘܫܬܐ.

81. Leviticus 8:9

    ܘܣܡ ܡܨܢܦܬܐ ܒܪܫܗ. ܘܣܡ ܥܠ ܡܨܢܦܬܐ ܠܘܩܒܠ ܐ̈ܦܘܗܝ ܟܠܝܠܐ ܕܕܗܒܐ ܟܠܝܠ ܩܘܕܫܐ. ܐܝܟܢܐ ܕܦܩܕ ܡܪܝܐ ܠܡܘܫܐ.

82. Leviticus 8:10

    ܘܢܣܒ ܡܘܫܐ ܡܫܚܐ ܕܡܫܝܚܘܬܐ. ܘܡܫܚ ܠܡܫܟܢܐ ܘܠܟܠܡܕܡ ܕܐܝܬ ܒܗ . ܘܩܕܫ ܐܢܘܢ.

83. Leviticus 8:11

    ܘܪܣ ܡܢܗ ܥܠ ܡܕܒܚܐ ܫܒܥ ܙܒ̈ܢܝܢ. ܘܡܫܚ ܠܡܕܒܚܐ. ܘܠܟܠܗܘܢ ܡܐ̈ܢܘܗܝ. ܘܠܠܩܢܐ ܘܠܟܢܗ̇ ܡܫܚ ܘܩܕܫ ܐܢܘܢ.

84. Leviticus 8:12

    ܘܢܣܟ ܡܢ ܡܫܚܐ ܕܡܫܝܚܘܬܐ ܒܪܫܗ ܕܐܗܪܘܢ. ܘܡܫܚܗ ܘܩܕܫܗ.

85. Leviticus 8:13

    ܘܩܪܒ ܡܘܫܐ ܠܒܢ̈ܝ ܐܗܪܘܢ. ܘܐܠܒܫ ܐܢܘܢ ܟܘ̈ܬܝܢܝܬܐ. ܘܐܣܪ ܐܢܘܢ ܗܡܝ̈ܢܐ. ܘܥܒܕ ܠܗܘܢ ܟܠܘ̈ܐ. ܐܝܟܢܐ ܕܦܩܕ ܡܪܝܐ ܠܡܘܫܐ.

86. Leviticus 8:14

    ܘܩܪܒ ܬܘܪܐ ܕܚܛܗܐ. ܘܣܡܘ ܐܗܪܘܢ ܘܒ̈ܢܘܗܝ ܐ̈ܝܕܝܗܘܢ ܥܠ ܪܫܗ ܕܬܘܪܐ ܕܚܛܗܐ.

87. Leviticus 8:15

    ܘܢܟܣܗ. ܘܢܣܒ ܡܘܫܐ ܡܢ ܕܡܐ ܒܨܒܥܗ. ܘܪܣ ܥܠ ܩܪ̈ܢܬܗ ܕܡܕܒܚܐ ܟܕ ܚ̇ܕܪ. ܘܕܟܝܗ ܠܡܕܒܚܐ. ܘܕܡܐ ܢܣܟ ܥܠ ܫ̈ܦܘܠܘܗܝ ܕܡܕܒܚܐ ܘܩܕܫܗ. ܘܚܣܝܗ.

88. Leviticus 8:16

    ܘܢܣܒ ܟܠܗ ܬܪܒܐ ܕܩܪܝܡ ܥܠ ܓܘܝܐ. ܘܚܨܪ ܟܒܕܐ ܘܬܪ̈ܬܝܢ ܟܘ̈ܠܝܢ ܘܬܪܒܗܝܢ. ܘܐܣܩ ܡܘܫܐ ܠܡܕܒܚܐ.

89. Leviticus 8:17

    ܘܬܘܪܐ ܘܡܫܟܗ ܘܒܣܪܗ ܘܦܪܬܗ. ܐܘܩܕ ܒܢܘܪܐ ܠܒܪ ܡܢ ܡܫܪܝܬܐ. ܐܝܟܢܐ ܕܦܩܕ ܡܪܝܐ ܠܡܘܫܐ.

90. Leviticus 8:18

    ܘܩܪܒ ܕܟܪܐ ܕܝܩܕܐ ܕܥܠܬܐ. ܘܣܡܘ ܐܗܪܘܢ ܘܒܢ̈ܘܗܝ ܐ̈ܝܕܝܗܘܢ ܥܠ ܪܫܗ ܕܕܟܪܐ.

91. Leviticus 8:19

    ܘܢܟܣܗ ܡܘܫܐ. ܘܪܣ ܡܢ ܕܡܗ ܥܠ ܡܕܒܚܐ ܟܕ ܚ̇ܕܪ.

92. Leviticus 8:20

    ܘܠܗ ܠܕܟܪܐ ܦܫܚ ܗ̈ܕܡܝܢ ܗ̈ܕܡܝܢ. ܘܐܣܩ ܡܘܫܐ ܪ̈ܫܐ ܘܗ̈ܕܡܐ ܘܬܪܒܐ.

93. Leviticus 8:21

    ܘܓܘܝܐ ܘܟܪ̈ܥܐ ܐܫܝܓ ܒܡ̈ܝܐ. ܘܐܣܩܗ ܡܘܫܐ ܠܕܟܪܐ ܟܠܗ ܠܡܕܒܚܐ. ܝܩܕܐ ܠܥܠܬܐ. ܠܪܝܚ ܣܘܬܐ ܩܘܪܒܢܐ ܠܡܪܝܐ. ܐܝܟ ܕܦܩܕ ܡܪܝܐ ܠܡܘܫܐ.

94. Leviticus 8:22

    ܘܩܪܒ ܕܟܪܐ ܕܬܪ̈ܝܢ ܕܟܪܐ ܕܫܘܡܠܝܐ. ܘܣܡܘ ܐܗܪܘܢ ܘܒܢ̈ܘܗܝ ܐ̈ܝܕܝܗܘܢ ܥܠ ܪܫܗ ܕܕܟܪܐ.

95. Leviticus 8:23

    ܘܢܟܣܗ ܡܘܫܐ. ܘܢܣܒ ܡܢ ܕܡܗ. ܘܪܣ ܥܠ ܛܪܦܐ ܕܐܕܢܗ ܕܐܗܪܘܢ ܕܝܡܝܢܐ. ܘܥܠ ܟܪܬܐ ܕܐܝܕܗ ܕܝܡܝܢܐ. ܘܥܠ ܟܪܬܐ ܕܪܓܠܗ ܕܝܡܝܢܐ.

96. Leviticus 8:24

    ܘܩܪܒ ܠܒܢ̈ܝ ܐܗܪܘܢ. ܘܪܣ ܡܘܫܐ ܡܢ ܕܡܐ ܥܠ ܛܪ̈ܦܐ ܕܐ̈ܕܢܝܗܘܢ ܕܝܡܝܢܐ. ܘܥܠ ܟܪ̈ܘܬܐ ܕܐ̈ܝܕܝܗܘܢ ܕܝܡܝܢܐ. ܘܥܠ ܟܪ̈ܘܬܐ ܕܪ̈ܓܠܝܗܘܢ ܕܝܡܝܢܐ. ܘܪܣ ܡܘܫܐ ܕܡܐ ܥܠ ܡܕܒܚܐ ܟܕ ܚ̇ܕܪ.

97. Leviticus 8:25

    ܘܢܣܒ ܬܪܒܐ ܘܐܠܝܬܐ ܘܟܠܗ ܚܠܒܐ ܕܩܪܝܡ ܠܓܘܝܐ. ܘܚܨܪ ܟܒܕܐ ܘܬܪ̈ܬܝܢ ܟܘ̈ܠܝܢ ܘܬܪ̈ܒܗܝܢ. ܘܫܩܐ ܕܝܡܝܢܐ.

98. Leviticus 8:26

    ܘܡܢ ܣܠܐ ܕܦܛܝܪܐ ܕܩܕܡ ܡܪܝܐ. ܢܣܒ ܚܚܘܪܬܐ ܚܕܐ ܦܛܝܪܬܐ. ܘܚܚܘܪܬܐ ܚܕܐ ܕܡܫܚܐ. ܘܠܓܢܐ ܚܕ. ܘܣܡ ܥܠ ܬܪܒܐ ܘܥܠ ܫܩܐ ܕܝܡܝܢܐ.

99. Leviticus 8:27

    ܘܣܡ ܐܢܘܢ ܟܠܗܘܢ ܒܐܝ̈ܕܝ ܐܗܪܘܢ ܘܒܐܝ̈ܕܝ ܒܢ̈ܘܗܝ. ܘܦܪܫ ܐܢܘܢ ܦܘܪܫܢܐ ܩܕܡ ܡܪܝܐ.

100. Leviticus 8:28

     ܘܢܣܒ ܐܢܘܢ ܡܘܫܐ ܡܢ ܐܝ̈ܕܝܗܘܢ. ܘܐܣܩ ܐܢܘܢ ܠܡܕܒܚܐ ܝܩܕܐ ܕܥܠܬܐ. ܕܢܗܘܘܢ ܫܘܡܠܝܐ ܠܪܝܚ ܣܘܬܐ ܩܘܪܒܢܐ ܠܡܪܝܐ.

← Previous · Next → — showing 101–200 of 859

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.