← All works

Peshitta Leviticus

Peshitta (Syriac Old Testament) · 859 sections

1. Leviticus 1:1

   ܘܩܪܐ ܡܪܝܐ ܠܡܘܫܐ. ܘܡܠܠ ܥܡܗ ܡܢ ܡܫܟܢܙܒܢܐ ܠܡܐܡܪ.

2. Leviticus 1:2

   ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ. ܐܢܫ ܐܢܫ ܡܢܟܘܢ. ܟܕ ܢܩܪܒ ܩܘܪܒܢܗ ܠܡܪܝܐ. ܡܢ ܒܥܝܪ̈ܐ ܡܢ ܬܘܪ̈ܐ ܘܡܢ ܥܢܐ ܬܩܪܒܘܢ ܩܘܪ̈ܒܢܝܟܘܢ.

3. Leviticus 1:3

   ܐܢ ܥܠܬܐ ܩܘܪܒܢܗ ܡܢ ܬܘܪ̈ܐ. ܕܟܪܐ ܕܠܐ ܡܘܡ. ܢܩܪܒܝܘܗܝ ܠܬܪܥܐ ܕܡܫܟܢ ܙܒܢܐ. ܘܢܩܪܒܝܘܗܝ ܠܡܬܪܥܝܘ ܠܗ ܩܕܡ ܡܪܝܐ.

4. Leviticus 1:4

   ܘܢܣܡܘܟ ܐܝܕܗ ܥܠ ܪܝܫ ܩܘܪܒܢܗ. ܘܢܬܪܥܐ ܠܗ ܠܡܚܣܝܘ ܥܠܘܗܝ.

5. Leviticus 1:5

   ܘܢܟܘܣ ܒܪ ܒܩܪܐ ܩܕܡ ܡܪܝܐ. ܘܢܩܪܒܘܢ ܟܗ̈ܢܐ ܒܢ̈ܝ ܐܗܪܘܢ ܕܡܐ. ܘܢܪܙܦܘܢ ܕܡܐ ܥܠ ܡܕܒܚܐ ܟܕ ܚ̇ܕܪ ܒܬܪܥܐ ܕܡܫܟܢܙܒܢܐ.

6. Leviticus 1:6

   ܘܢܫܛܝܘܗܝ ܠܝܩܕܐ ܘܢܦܫܚ ܗ̈ܕܡܘܗܝ.

7. Leviticus 1:7

   ܘܢܬܠܘܢ ܟܗ̈ܢܐ ܒܢ̈ܝ ܐܗܪܘܢ ܢܘܪܐ ܥܠ ܡܕܒܚܐ. ܘܢܟܫܘܢ ܩܝ̈ܣܐ ܥܠ ܢܘܪܐ.

8. Leviticus 1:8

   ܘܢܣܕܪܘܢ ܟܗ̈ܢܐ ܒ̈ܢܝ ܐܗܪܘܢ ܗ̈ܕܡܐ ܘܪܫܐ ܘܬܪܒܐ. ܥܠ ܩܝ̈ܣܐ ܕܒܢܘܪܐ. ܕܥܠ ܡܕܒܚܐ.

9. Leviticus 1:9

   ܘܓܘܝܗ ܘܟܪ̈ܥܘܗܝ ܢܫܝܓ ܒܡ̈ܝܐ. ܘܢܣܩܝܘܗܝ ܟܗܢܐ ܟܠܗ ܠܡܕܒܚܐ. ܥܠܬܐ ܗܘ. ܩܘܪܒܢܐ ܠܪܝܚ ܣܘܬܐ ܠܡܪܝܐ .

10. Leviticus 1:10

    ܘܐܢ ܡܢ ܥܢܐ ܩܘܪܒܢܗ. ܡܢ ܐܡܪ̈ܐ ܐܘ ܡܢ ܥܙ̈ܐ ܠܥܠܬܐ. ܕܟܪܐ ܕܠܐ ܡܘܡ ܢܩܪܒܝܘܗܝ.

11. Leviticus 1:11

    ܘܢܟܣܝܘܗܝ ܥܠ ܫ̈ܦܘܠܘܗܝ ܕܡܕܒܚܐ ܡܢ ܓܪܒܝܝܗ ܩܕܡ ܡܪܝܐ. ܘܢܪܙܦܘܢ ܟܗ̈ܢܐ ܒܢ̈ܝ ܐܗܪܘܢ ܕܡܗ ܥܠ ܡܕܒܚܐ ܟܕ ܚ̇ܕܪ.

12. Leviticus 1:12

    ܘܢܦܫܚ ܗܕܡ̈ܘܗܝ ܘܪܫܗ ܘܬܪܒܗ. ܘܢܣܕܘܪ ܐܢܘܢ ܟܗܢܐ ܥܠ ܩܝ̈ܣܐ ܕܒܢܘܪܐ ܕܥܠ ܡܕܒܚܐ.

13. Leviticus 1:13

    ܘܓܘܝܗ ܘܟܪ̈ܥܘܗܝ ܢܫܝܓ ܒܡ̈ܝܐ. ܘܢܩܪܒܝܘܗܝ ܟܗܢܐ ܟܘܠܗ ܘܢܣܩܝܘܗܝ ܠܡܕܒܚܐ. ܥܠܬܐ ܗܘ. ܩܘܪܒܢܐ ܠܪܝܚ ܢܝܚܐ ܠܡܪܝܐ.

14. Leviticus 1:14

    ܘܐܢ ܡܢ ܥܘܦܐ. ܥܠܬܐ ܩܘܪܒܢܗ ܠܡܪܝܐ. ܢܩܪܒ ܡܢ ܫܘܦܢܝ̈ܢܐ ܠܡܪܝܐ. ܐܘ ܡܢ ܒܢ̈ܝ ܝܘܢܐ ܩܘܪܒܢܗ.

15. Leviticus 1:15

    ܘܢܩܪܒܝܘܗܝ ܟܗܢܐ ܠܡܕܒܚܐ. ܘܢܡܠܘܓ ܪܫܗ ܘܢܣܩ ܥܠ ܡܕܒܚܐ . ܘܢܡܨܐ ܕܡܗ ܥܠ ܐܣܬܐ ܕܡܕܒܚܐ ܟܕ ܚ̇ܕܪ.

16. Leviticus 1:16

    ܘܢܥܒܪ ܩܘܪܩܒܢܗ ܒܐܘܟܠܗ. ܘܢܪܡܝܘܗܝ ܥܠ ܓܢܒ ܡܕܒܚܐ ܡܢ ܡܕܢܚܐ ܒܕܘܟܬܐ ܕܩܛܡܐ.

17. Leviticus 1:17

    ܘܢܫܛܦܝܘܗܝ ܒܝܬ ܓܦܘ̈ܗܝ ܘܠܐ ܢܦܪܫ. ܘܢܣܩܝܘܗܝ ܟܗܢܐ ܠܡܕܒܚܐ ܥܠ ܩܝ̈ܣܐ ܕܥܠ ܢܘܪܐ. ܥܠܬܐ ܗܘ. ܩܘܪܒܢܐ ܠܪܝܚ ܣܘܬܐ ܠܡܪܝܐ.

18. Leviticus 2:1

    ܘܢܦܫܐ ܟܕ ܬܩܪܒ ܩܘܪܒܢܐ ܕܣܡܝܕܐ ܠܡܪܝܐ. ܢܫܝܦܐ ܢܗܘܐ ܩܘܪܒܢܗ. ܘܢܣܘܟ ܥܠܘܗܝ ܡܫܚܐ. ܘܢܣܝܡ ܥܠܘܗܝ ܠܒܘܢܬܐ.

19. Leviticus 2:2

    ܘܢܝܬܝܘܗܝ ܠܘܬ ܟܗܢܐ ܒܪ ܐܗܪܘܢ. ܘܢܙܘܪ ܡܢ ܬܡܢ ܡܠܐ ܙܘܪܗ. ܡܢ ܢܫܝܦܐ ܘܡܢ ܡܫܚܐ. ܕܥܠ ܟܠܗ̇ ܠܒܘܢܬܐ. ܘܢܣܩ ܟܗܢܐ ܕܘܟܪܢܗ ܥܠ ܡܕܒܚܐ ܩܘܪܒܢܐ ܠܪܝܚ ܣܘܬܐ ܠܡܪܝܐ.

20. Leviticus 2:3

    ܘܕܡܫܬܚܪ ܡܢ ܣܡܝܕܐ ܠܐܗܪܘܢ ܘܠܒܢ̈ܘܗܝ. ܩܕܘܫ ܩܘܕܫܝܢ ܗܘ ܡܢ ܩܘܪ̈ܒܢܘܗܝ ܕܡܪܝܐ.

21. Leviticus 2:4

    ܘܟܕ ܬܩܪܒ ܩܘܪܒܢܐ ܕܣܡܝܕܐ ܕܡܬܐܦܐ ܒܬܢܘܪܐ. ܢܫܝܦܐ ܚܚܪ̈ܬܐ ܦܛܝܪ̈ܬܐ ܕܦܝ̈ܠܢ ܒܡܫܚܐ. ܘܠܓܢ̈ܐ ܦܛܝܪ̈ܐ ܕܦܝܠܝܢ ܒܡܫܚܐ.

22. Leviticus 2:5

    ܘܐܢ ܣܡܝܕܐ ܕܥܠ ܛܐܓܢܐ ܩܘܪܒܢܟ. ܢܫܝܦܐ ܦܛܝܪܐ ܕܦܝܠ ܒܡܫܚܐ ܢܗܘܐ .

23. Leviticus 2:6

    ܘܦܘܬܝܗܝ ܦܬ̈ܐ ܘܣܘܟ ܥܠܘܗܝ ܡܫܚܐ. ܥܠ ܣܡܝܕܐ ܗ̇ܘ.

24. Leviticus 2:7

    ܘܐܢ ܣܡܝܕܐ ܗܘ ܕܛܪܛܩܠ ܩܘܪܒܢܟ. ܣܡܝܕܐ ܢܫܝܦܐ ܒܡܫܚܐ ܢܬܥܒܕ.

25. Leviticus 2:8

    ܘܬܝܬܐ ܣܡܝܕܐ ܕܡܬܥܒܕ ܡܢ ܗܠܝܢ ܠܡܪܝܐ. ܘܬܩܪܒܝܘܗܝ ܠܟܗܢܐ. ܘܢܣܩܝܘܗܝ ܠܡܕܒܚܐ ܠܡܪܝܐ.

26. Leviticus 2:9

    ܘܢܦܪܘܫ ܟܗܢܐ ܡܢ ܣܡܝܕܐ ܕܘܟܪܢܗ. ܘܢܣܩ ܠܡܕܒܚܐ . ܩܘܪܒܢܐ ܠܪܝܚ ܣܘܬܐ ܠܡܪܝܐ.

27. Leviticus 2:10

    ܘܕܡܫܬܚܪ ܡܢ ܣܡܝܕܐ ܠܐܗܪܘܢ ܘܠܒ̈ܢܘܗܝ ܩܕܘܫ ܩܘ̈ܕܫܝܢ ܡܢ ܩܘܪ̈ܒܢܘܗܝ ܕܡܪܝܐ.

28. Leviticus 2:11

    ܟܠ ܣܡܝܕܐ ܕܬܩܪܒܘܢ ܠܡܪܝܐ. ܠܐ ܢܬܥܒܕ ܚܡܝܥܐ. ܡܛܠ ܕܟܠ ܚܡܝܪ ܘܟܠ ܕܒܫ. ܠܐ ܬܣܩܘܢ ܡܢܗ ܩܘܪܒܢܐ ܠܡܪܝܐ.

29. Leviticus 2:12

    ܩܘܪ̈ܒܢܐ ܪ̈ܫܝܬܐ ܬܩܪܒܘܢ ܐܢܘܢ ܠܡܪܝܐ. ܘܥܠ ܡܕܒܚܐ ܠܐ ܢܣܩܘܢ ܠܪܝܚ ܣܘܬܐ .

30. Leviticus 2:13

    ܘܟܠܗ ܩܘܪܒܢܐ ܕܣܡܝܕܟ ܒܡܠܚܐ ܬܡܠܘܚ. ܘܠܐ ܬܒܛܠ ܡܠܚܐ ܕܩܝܡܗ ܕܐܠܗܟ ܡܢ ܣܡܝܕܟ. ܥܠ ܟܠ ܩܘܪ̈ܒܢܝܟ ܬܩܪܒ ܡܠܚܐ.

31. Leviticus 2:14

    ܘܐܢ ܬܩܪܒ ܩܘܪܒܢܐ ܕܒܟܪ̈ܐ ܠܡܪܝܐ. ܟܦܐ ܕܡܚܪܟܐ ܒܢܘܪܐ. ܦܪ̈ܝܟܬܐ ܡܕܟܝ̈ܬܐ ܬܩܪܒ ܩܘܪܒܢܐ ܕܒܟܪ̈ܝܟ.

32. Leviticus 2:15

    ܘܬܬܠ ܡܫܚܐ ܥܠܘܗܝ ܘܠܒܘܢܬܐ ܩܘܪܒܢܐ ܗܘ.

33. Leviticus 2:16

    ܘܢܣܩ ܟܗܢܐ ܕܘܟܪܢܗ ܡܢ ܦܪܝ̈ܟܬܐ ܘܡܢ ܡܫܚܐ. ܥܠ ܟܠܗ̇ ܠܒܘܢܬܐ ܩܘܪܒܢܐ ܠܡܪܝܐ.

34. Leviticus 3:1

    ܘܐܢ ܕܒܚܐ ܫܠܡܐ ܩܘܪܒܢܗ. ܐܢ ܡܢ ܬܘܪ̈ܐ ܗܘ ܡܩܪܒ. ܕܟܪܐ ܐܘ ܢܩܒܬܐ ܕܠܐ ܡܘܡ ܢܩܪܒ ܩܕܡ ܡܪܝܐ.

35. Leviticus 3:2

    ܘܢܣܡܘܟ ܐܝܕܗ ܥܠ ܪܝܫ ܩܘܪܒܢܗ. ܘܢܟܣܝܘܗܝ ܒܬܪܥܐ ܕܡܫܟܢܙܒܢܐ. ܘܢܪܣܘܢ ܟܗ̈ܢܐ ܒܢ̈ܝ ܐܗܪܘܢ ܕܡܐ ܥܠ ܡܕܒܚܐ ܟܕ ܚ̇ܕܪ.

36. Leviticus 3:3

    ܘܢܩܪܒ ܡܢ ܕܒܚܐ ܫܠܡܐ ܩܘܪܒܢܐ ܠܡܪܝܐ. ܚܠܒܐ ܕܩܪܝܡ ܠܓܘܝܐ. ܘܟܠܗ ܬܪܒܐ ܕܥܠ ܓܘܝܐ.

37. Leviticus 3:4

    ܘܬܪ̈ܬܝܢ ܟܘ̈ܠܝܢ ܘܬܪܒܐ ܕܥܠܝܗܝܢ ܕܥܠ ܣܛܪܐ. ܘܚܨܪ ܟܒܕܐ ܥܡ ܟܘܠܝ̈ܬܐ ܢܥܒܕܝܗ̇.

38. Leviticus 3:5

    ܘܢܣܩܘܢܗ ܟܗܢ̈ܐ ܒܢ̈ܝ ܐܗܪܘܢ ܠܡܕܒܚܐ. ܥܠ ܥܠܬܐ ܘܥܠ ܩܝ̈ܣܐ ܕܥܠ ܢܘܪܐ. ܩܘܪܒܢܐ ܠܪܝܚ ܣܘܬܐ ܠܡܪܝܐ.

39. Leviticus 3:6

    ܘܐܢ ܡܢ ܥܢܐ ܩܘܪܒܢܗ. ܠܕܒܚܐ ܥܠܬܐ ܠܡܪܝܐ. ܕܟܪܐ ܐܘ ܢܩܒܬܐ ܕܠܐ ܡܘܡ ܢܩܪܒܝܘܗܝ.

40. Leviticus 3:7

    ܘܐܢ ܡܢ ܐܡܪ̈ܐ ܗܘ ܡܩܪܒ ܩܘܪܒܢܗ. ܢܩܪܒܝܘܗܝ ܩܕܡ ܡܪܝܐ.

41. Leviticus 3:8

    ܘܢܣܡܘܟ ܐܝܕܗ ܥܠ ܪܝܫ ܩܘܪܒܢܗ. ܘܢܟܣܝܘܗܝ ܩܕܡ ܡܪܝܐ ܒܬܪܥܐ ܕܡܫܟܢܙܒܢܐ. ܘܢܪܣܘܢ ܒܢ̈ܝ ܐܗܪܘܢ ܕܡܗ ܥܠ ܡܕܒܚܐ ܟܕ ܚ̇ܕܪ.

42. Leviticus 3:9

    ܘܢܩܪܒ ܡܢ ܕܒܚܐ ܕܥܠܬܐ ܩܘܪܒܢܐ ܠܡܪܝܐ. ܬܪܒܗ ܘܐܠܝܬܗ ܟܕ ܫܠܡܐ. ܠܘܩܒܠ ܡ̈ܬܢܬܗ ܢܥܒܕܝܘܗܝ. ܘܚܠܒܐ ܕܩܪܝܡ ܠܓܘܝܐ. ܘܟܠܗ ܬܪܒܐ ܕܥܠ ܓܘܝܐ.

43. Leviticus 3:10

    ܘܬܪ̈ܬܝܢ ܟܘ̈ܠܝܢ ܘܬܪܒܐ ܕܥܠܝܗܝܢ ܕܥܠ ܣܛܪܐ. ܘܚܨܪ ܟܒܕܐ ܥܡ ܟܘ̈ܠܝܬܐ ܢܥܒܕܝܗ̇ .

44. Leviticus 3:11

    ܘܢܣܩܝܘܗܝ ܟܗܢܐ ܠܡܕܒܚܐ ܠܚܡ ܩܘܪܒܢܐ ܠܡܪܝܐ.

45. Leviticus 3:12

    ܘܐܢ ܥܠܬܐ ܡܢ ܥ̈ܙܐ ܩܘܪܒܢܗ. ܢܩܪܒܝܗ̇ ܩܕܡ ܡܪܝܐ.

46. Leviticus 3:13

    ܘܢܣܡܘܟ ܐܝܕܗ ܥܠ ܪܫܗ̇. ܘܢܟܣܝܗ̇ ܩܕܡ ܡܫܟܢܙܒܢܐ. ܘܢܪܣܘܢ ܒܢ̈ܝ ܐܗܪܘܢ ܕܡܗ̇ ܥܠ ܡܕܒܚܐ ܟܕ ܚ̇ܕܪ.

47. Leviticus 3:14

    ܘܢܩܪܒ ܡܢܗ̇ ܩܘܪܒܢܗ ܩܘܪܒܢܐ ܠܡܪܝܐ. ܚܠܒܐ ܕܩܪܝܡ ܠܓܘܝܐ. ܘܟܠܗ ܬܪܒܐ ܕܥܠ ܓܘܝܐ.

48. Leviticus 3:15

    ܘܬܪ̈ܬܝܢ ܟܘ̈ܠܝܢ ܘܬܪܒܐ ܕܥܠܝܗܝܢ ܕܥܠ ܣܛܪܐ. ܘܚܨܪ ܟܒܕܐ ܥܡ ܟܘ̈ܠܝܬܐ ܢܥܒܕܝܗ̇.

49. Leviticus 3:16

    ܘܢܣܩ ܐܢܘܢ ܟܗܢܐ ܠܡܕܒܚܐ. ܠܚܡ ܩܘܪܒܢܐ ܠܪܝܚ ܣܘܬܐ . ܟܠ ܬܪܒ ܠܡܪܝܐ.

50. Leviticus 3:17

    ܩܝܡܐ ܠܥܠܡ ܠܕܪ̈ܝܟܘܢ ܒܟܠܗ ܒܝܬ ܡܥܡܪܟܘܢ. ܟܠ ܬܪܒ ܘܟܠ ܕܡ ܠܐ ܬܐܟܠܘܢ.

51. Leviticus 4:1

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

52. Leviticus 4:2

    ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ. ܢܦܫܐ ܟܕ ܬܚܛܐ ܒܛܘܥܝܝ ܡܢ ܟܘܠ ܦܘܩܕܢܘ̈ܗܝ ܕܡܪܝܐ ܕܠܐ ܡܬܥܒܕܝܢ. ܘܢܥܒܕ ܚܕ ܡܢܗܘܢ.

53. Leviticus 4:3

    ܐܢ ܟܗܢܐ ܕܡܫܝܚ ܢܚܛܐ ܠܚ̈ܘܒܘܗܝ ܕܥܡܐ. ܢܩܪܒ ܥܠ ܚܛܗܐ ܕܚܛܐ. ܬܘܪܐ ܒܪ ܒܩܪܐ ܕܠܐ ܡܘܡ ܠܡܪܝܐ ܠܚܛܗܗ.

54. Leviticus 4:4

    ܘܢܝܬܝܘܗܝ ܠܬܘܪܐ ܠܬܪܥܐ ܕܡܫܟܢܙܒܢܐ ܩܕܡ ܡܪܝܐ. ܘܢܣܡܘܟ ܐܝܕܗ ܥܠ ܪܫܗ ܕܬܘܪܐ . ܘܢܟܣܝܘܗܝ ܠܬܘܪܐ ܩܕܡ ܡܪܝܐ.

55. Leviticus 4:5

    ܘܢܣܒ ܟܗܢܐ ܕܡܫܝܚ ܡܢ ܕܡܐ ܕܬܘܪܐ ܘܢܝܬܝܘܗܝ ܠܬܪܥܐ ܕܡܫܟܢܙܒܢܐ.

56. Leviticus 4:6

    ܘܢܨܒܘܥ ܟܗܢܐ ܨܒܥܗ ܒܕܡܐ ܘܢܪܘܣ ܡܢ ܕܡܐ. ܫܒܥ ܙܒ̈ܢܝܢ ܩܕܡ ܡܪܝܐ ܠܐ̈ܦܝ ܦܪܣܐ ܕܩܘܕܫܐ.

57. Leviticus 4:7

    ܘܢܬܠ ܟܗܢܐ ܡܢ ܕܡܐ ܥܠ ܩܪ̈ܢܬܗ ܕܡܕܒܚܐ. ܕܥܛܪܐ ܕܒܣܡ̈ܐ. ܩܕܡ ܡܪܝܐ ܒܡܫܟܢ ܙܒܢܐ. ܘܢܐܫܘܕ ܟܠܗ ܕܡܐ ܕܬܘܪܐ. ܥܠ ܫ̈ܦܘܠܝ ܡܕܒܚܐ ܕܥܠܬܐ ܒܬܪܥܐ ܕܡܫܟܢܙܒܢܐ.

58. Leviticus 4:8

    ܘܬܪܒܐ ܟܠܗ ܕܬܘܪܐ ܕܚܛܗܐ. ܢܦܪܘܫ ܡܢܗ ܚܠܒܐ ܕܩܪܝܡ ܠܓܘܝܐ. ܘܟܠܗ ܬܪܒܐ ܕܥܠ ܓܘܝܐ.

59. Leviticus 4:9

    ܘܬܪ̈ܬܝܢ ܟܘ̈ܠܝܢ ܘܬܪܒܐ ܕܥܠܝܗܝܢ ܕܥܠ ܣܛܪܐ. ܘܚܨܪ ܟܒܕܐ ܥܡ ܟܘ̈ܠܝܬܐ ܢܥܒܕܝܗ .

60. Leviticus 4:10

    ܐܝܟ ܕܡܬܦܪܫ ܡܢ ܬܘܪܐ ܕܕܒܚܐ ܕܥܠܬܐ. ܘܢܣܩ ܐܢܘܢ ܟܗܢܐ ܥܠ ܡܕܒܚܐ ܕܥܠܬܐ.

61. Leviticus 4:11

    ܘܡܫܟܗ ܕܬܘܪܐ ܘܟܠܗ ܒܣܪܗ ܥܡ ܦܪܬܗ ܘܥܡ ܪܫܗ. ܘܥܡ ܟܪ̈ܥܘܗܝ ܘܥܡ ܓܘܝܗ .

62. Leviticus 4:12

    ܘܢܦܩܝܘܗܝ ܠܟܠܗ ܬܘܪܐ ܠܒܪ ܡܢ ܡܫܪܝܬܐ. ܠܕܘܟܬܐ ܕܕܟܝܐ ܠܐܬܪ ܕܪܡܝܢ ܩܛܡܐ. ܘܢܘܩܕܝܘܗܝ ܥܠ ܩܝ̈ܣܐ ܕܥܠ ܢܘܪܐ. ܐܬܪ ܕܪܡܝܢ ܩܛܡܐ ܢܐܩܕ.

63. Leviticus 4:13

    ܘܐܢ ܟܠܗ̇ ܟܢܘܫܬܐ ܕܐܝܣܪܝܠ ܢܛܥܘܢ. ܘܬܛܫܐ ܡܠܬܐ ܡܢ ܥܝܢ̈ܝܗ̇ ܕܟܢܘܫܬܐ. ܘܢܥܒܕܘܢ ܚܕ ܡܢ ܟܠ ܦܘܩ̈ܕܢܘܗܝ ܕܡܪܝܐ ܕܠܐ ܡܬܥܒܕܝܢ ܘܢܬܚܝܒܘܢ.

64. Leviticus 4:14

    ܘܢܬܝܕܥ ܚܛܗܐ ܕܚܛܘ ܒܗ. ܢܩܪܒܘܢ ܟܘܠܗ̇ ܟܢܘܫܬܐ. ܬܘܪܐ ܚܕ ܒܪ ܒܩܪܐ ܠܚܛܗܐ. ܘܢܝܬܘܢܗ ܩܕܡ ܡܫܟܢܙܒܢܐ.

65. Leviticus 4:15

    ܘܢܣܡܟܘܢ ܣܒ̈ܐ ܕܟܢܘܫܬܐ ܐ̈ܝܕܝܗܘܢ ܥܠ ܪܫܗ ܕܬܘܪܐ ܩܕܡ ܡܪܝܐ. ܘܢܟܣܘܢܝܗܝ ܠܬܘܪܐ ܩܕܡ ܡܪܝܐ.

66. Leviticus 4:16

    ܘܢܝܬܐ ܟܗܢܐ ܕܡܫܝܚ ܡܢ ܕܡܗ ܕܬܘܪܐ ܠܬܪܥܐ ܕܡܫܟܢܙܒܢܐ.

67. Leviticus 4:17

    ܘܢܨܒܘܥ ܟܗܢܐ ܨܒܥܗ ܒܕܡܐ. ܘܢܪܘܣ ܫܒܥ ܙܒ̈ܢܝܢ ܩܕܡ ܡܪܝܐ ܠܐ̈ܦܝ ܦܪܣܐ.

68. Leviticus 4:18

    ܘܡܢ ܕܡܐ ܢܬܠ ܥܠ ܩܪ̈ܢܬܗ ܕܡܕܒܚܐ. ܕܩܕܡ ܡܪܝܐ ܒܡܫܟܢܙܒܢܐ. ܘܟܠܗ ܕܡܐ ܢܐܫܘܕ ܥܠ ܫ̈ܦܘܠܝ ܡܕܒܚܐ ܕܥܠܬܐ ܒܬܪܥܐ ܕܡܫܟܢܙܒܢܐ.

69. Leviticus 4:19

    ܘܟܠܗ ܬܪܒܗ ܢܦܪܘܫ ܡܢܗ ܘܢܣܩ ܠܡܕܒܚܐ.

70. Leviticus 4:20

    ܘܢܥܒܕ ܠܬܘܪܐ ܐܝܟ ܕܥܒܕ ܠܬܘܪܐ ܕܚܛܗܐ. ܗܟܢܐ ܢܥܒܕ ܠܗ. ܘܢܚܣܐ ܥܠܝܗܘܢ ܟܗܢܐ ܘܢܫܬܒܩ ܠܗܘܢ.

71. Leviticus 4:21

    ܘܢܦܩܝܘܗܝ ܠܬܘܪܐ ܠܒܪ ܡܢ ܡܫܪܝܬܐ. ܘܢܘܩܕܝܘܗܝ ܐܝܟ ܕܐܘܩܕ ܠܬܘܪܐ ܩܕܡܝܐ. ܚܛܗܐ ܗܘ ܕܟܢܘܫܬܐ.

72. Leviticus 4:22

    ܘܐܢ ܪܒܐ ܢܚܛܐ ܘܢܥܒܕ ܚܕ ܡܢ ܟܠ ܦܘܩ̈ܕܢܘܗܝ ܕܡܪܝܐ ܐܠܗܗ. ܐܝܠܝܢ ܕܠܐ ܡܬܥܒܕܝܢ ܒܛܘܥܝܝ ܘܢܚܘܒ.

73. Leviticus 4:23

    ܐܢ ܐܬܝܕܥ ܠܗ ܚܛܗܐ ܕܚܛܐ ܒܗ ܢܝܬܐ ܩܘܪܒܢܗ ܨܦܪܝܐ ܕܥ̈ܙܐ. ܕܟܪܐ ܕܠܐ ܡܘܡ.

74. Leviticus 4:24

    ܘܢܣܡܘܟ ܐܝܕܗ ܥܠ ܪܫܗ ܕܨܦܪܝܐ. ܘܢܟܣܝܘܗܝ ܒܕܘܟܬܐ ܕܢܟܣ ܥܠܬܐ ܩܕܡ ܡܪܝܐ. ܚܛܗܐ ܗܘ.

75. Leviticus 4:25

    ܘܢܣܒ ܟܗܢܐ ܡܢ ܕܡܐ ܕܚܛܗܐ ܒܨܒܥܗ. ܘܢܬܠ ܥܠ ܩܪܢܬܗ ܕܡܕܒܚܐ ܕܥܠܬܐ. ܘܕܡܗ ܢܐܫܘܕ ܥܠ ܫ̈ܦܘܠܝ ܡܕܒܚܐ ܕܥܠܬܐ.

76. Leviticus 4:26

    ܘܟܠܗ ܬܪܒܗ ܢܣܩ ܠܡܕܒܚܐ. ܐܝܟ ܬܪܒܐ ܕܕܒܚܐ ܕܥܠܬܐ. ܘܢܚܣܐ ܥܠܘܗܝ ܟܗܢܐ ܡܢ ܚܛܗܐ ܕܚܛܐ ܘܢܫܬܒܩ ܠܗ.

77. Leviticus 4:27

    ܘܐܢ ܢܦܫܐ ܚܕܐ ܬܚܛܐ ܒܛܘܥܝܝ ܡܢ ܥܡܐ ܕܐܪܥܐ. ܘܬܥܒܕ ܚܕ ܡܢ ܦܘܩ̈ܕܢܘܗܝ ܕܡܪܝܐ ܕܠܐ ܡܬܥܒܕܝܢ ܘܢܚܘܒ.

78. Leviticus 4:28

    ܐܢ ܐܬܝܕܥ ܠܗ ܚܛܗܐ ܕܚܛܐ. ܢܝܬܐ ܩܘܪܒܢܗ ܨܦܪܝܬܐ ܕܥ̈ܙܐ. ܢܩܒܬܐ ܕܠܐ ܡܘܡ ܥܠ ܚܛܗܐ ܕܚܛܐ.

79. Leviticus 4:29

    ܘܢܣܡܘܟ ܐܝܕܗ ܥܠ ܪܫܗ ܕܚܛܗܐ. ܘܢܟܣܝܘܗܝ ܠܚܛܗܐ ܒܕܘܟܬܐ ܕܢܟܣ ܥܠܬܐ.

80. Leviticus 4:30

    ܘܢܣܒ ܟܗܢܐ ܡܢ ܕܡܐ ܕܚܛܗܐ ܒܨܒܥܗ. ܘܢܪܘܣ ܥܠ ܩܪ̈ܢܬܗ ܕܡܕܒܚܐ ܕܥܠܬܐ. ܘܟܠܗ ܕܡܐ ܢܐܫܘܕ ܥܠ ܫ̈ܦܘܠܝ ܡܕܒܚܐ ܕܥܠܬܐ.

81. Leviticus 4:31

    ܘܟܠܗ ܬܪܒܗ ܢܣܒ ܡܢܗ. ܐܝܟܢܐ ܕܡܬܢܣܒ ܬܪܒܐ ܡܢ ܕܒܚܐ ܕܥܠܬܐ. ܘܢܣܩ ܟܗܢܐ ܥܠ ܡܕܒܚܐ. ܠܪܝܚ ܣܘܬܐ ܩܘܪܒܢܐ ܠܡܪܝܐ. ܘܢܚܣܐ ܥܠܘܗܝ ܟܗܢܐ ܘܢܫܬܒܩ ܠܗ.

82. Leviticus 4:32

    ܘܐܢ ܡܢ ܐܡܪ̈ܐ ܢܝܬܐ ܩܘܪܒܢܗ ܠܚܛܗܐ. ܢܩܒܬܐ ܕܠܐ ܡܘܡ ܢܝܬܐ.

83. Leviticus 4:33

    ܘܢܣܡܘܟ ܐܝܕܗ ܥܠ ܪܫܗ ܕܚܛܗܐ. ܘܢܟܣܝܘܗܝ ܠܚܛܗܐ ܒܕܘܟܬܐ ܕܢܟܣ ܥܠܬܐ.

84. Leviticus 4:34

    ܘܢܣܒ ܟܗܢܐ ܡܢ ܕܡܐ ܕܚܛܗܐ ܒܨܒܥܗ. ܘܢܪܘܣ ܥܠ ܩܪ̈ܢܬܗ ܕܡܕܒܚܐ ܕܥܠܬܐ. ܘܟܠܗ ܕܡܐ ܢܐܫܘܕ ܥܠ ܫ̈ܦܘܠܘܗܝ ܕܡܕܒܚܐ.

85. Leviticus 4:35

    ܘܟܠܗ ܬܪܒܗ ܢܥܒܕ ܐܝܟ ܕܥܒܕ ܠܬܪܒܐ ܕܐܡܪܐ ܡܢ ܕܒܚܐ ܕܥܠܬܐ. ܘܢܣܩ ܐܢܘܢ ܟܗܢܐ ܠܡܕܒܚܐ ܥܠ ܩܘܪ̈ܒܢܘܗܝ ܕܡܪܝܐ. ܘܢܚܣܐ ܥܠܘܗܝ ܟܗܢܐ ܥܠ ܚܛܗܐ ܕܚܛܐ ܘܢܫܬܒܩ ܠܗ.

86. Leviticus 5:1

    ܘܢܦܫܐ ܟܕ ܬܚܛܐ ܘܬܫܡܥ ܩܠܐ ܕܡ̈ܘܡܬܐ. ܘܗܘ ܣܗܕ ܐܘ ܚܙܐ ܐܘ ܝܕܥ. ܐܠܐ ܢܚܘܐ ܢܩܒܠ ܚܛܗܗ.

87. Leviticus 5:2

    ܐܘ ܢܦܫܐ ܕܬܩܪܘܒ ܒܟܠ ܡܕܡ ܕܛܡܐ. ܐܘ ܒܦܓܪܐ ܕܚܝܘܬܐ ܛܡܐܬܐ. ܐܘ ܒܦܓܪܐ ܕܒܥܝܪ̈ܐ ܛܡܐ̈ܬܐ. ܐܘ ܒܦܓܪܐ ܕܪܚܫܐ ܛܡܐܐ. ܘܢܗܡܐ ܡܢܗ. ܘܗܘ ܐܬܛܡܐ ܘܚܛܐ.

88. Leviticus 5:3

    ܐܘ ܐܢ ܢܩܪܘܒ. ܒܛܡܐܘܬܐ ܕܐܢܫܐ. ܠܟܠ ܛܡܐܘܬܐ ܕܢܬܛܡܐ ܒܗ̇. ܘܢܗܡܐ ܡܢܗ̇. ܘܗܘ ܝܕܥ ܕܚܛܐ.

89. Leviticus 5:4

    ܐܘ ܢܦܫܐ ܟܕ ܬܐܡܐ ܒܦܘܪܫܢܐ ܕܣ̈ܦܘܬܐ ܠܡܒܐܫܘ ܐܘ ܠܡܛܐܒܘ. ܒܟܠ ܕܦܪܫ ܐܢܫܐ ܒܡ̈ܘܡܬܐ ܘܢܗܡܐ ܡܢܗ̇. ܘܗܘ ܝܕܥ ܕܚܛܐ ܒܚܕܐ ܡܢ ܗܠܝܢ.

90. Leviticus 5:5

    ܘܢܗܘܐ ܟܕ ܢܚܛܐ ܒܚܕܐ ܡܢ ܗܠܝܢ. ܘܢܘܕܐ ܕܚܛܐ ܥܠܝܗ̇.

91. Leviticus 5:6

    ܢܝܬܐ ܩܘܪܒܢܗ ܠܡܪܝܐ ܥܠ ܚܛܗܐ ܕܚܛܐ. ܢܩܒܬܐ ܦܪܬܐ ܡܢ ܥܢܐ. ܐܘ ܨܝܦܪܝܬܐ ܕܥ̈ܙܐ ܠܚܛܗܗ. ܘܢܚܣܐ ܥܠܘܗܝ ܟܗܢܐ ܡܢ ܚܛܗܗ.

92. Leviticus 5:7

    ܘܐܠܐ ܡ̇ܛܐ ܒܐ̈ܝܕܘܗܝ ܕܢܝܬܐ ܦܪܬܐ. ܢܝܬܐ ܩܘܪܒܢܐ ܕܚܛܗܗ ܬܪ̈ܝܢ ܫ̈ܘܦܢܝܢܝܢ. ܐܘ ܬܪ̈ܝܢ ܒܢ̈ܝ ܝܘܢܐ. ܚܕ ܠܚܛܗܐ ܘܚܕ ܠܥܠܬܐ.

93. Leviticus 5:8

    ܘܢܝܬܐ ܐܢܘܢ ܠܟܗܢܐ. ܘܢܩܪܒ ܕܥܠ ܚܛܗܐ ܩܕܡܝܬ. ܘܢܡܠܘܓ ܪܫܗ ܡܢ ܠܘܩܒܠ ܩܕܠܗ. ܘܠܐ ܢܦܪܫ.

94. Leviticus 5:9

    ܘܢܪܘܣ ܡܢ ܕܡܐ ܕܚܛܗܐ ܥܠ ܐܣܬܐ ܕܡܕܒܚܐ. ܘܕܝܬܪ ܡܢ ܕܡܐ ܢܡܨܐ ܥܠ ܫ̈ܦܘܠܝ ܡܕܒܚܐ. ܚܛܗܐ ܗܘ.

95. Leviticus 5:10

    ܘܐܚܪܢܐ ܢܥܒܕ ܠܥܠܬܐ ܐܝܟ ܙܕܩܗ. ܘܢܚܣܐ ܥܠܘܗܝ ܟܗܢܐ ܥܠ ܚܛܗܐ ܕܚܛܐ ܘܢܫܬܒܩ ܠܗ.

96. Leviticus 5:11

    ܘܐܠܐ ܡ̇ܛܐ ܒܐ̈ܝܕܘܗܝ ܬܪ̈ܝܢ ܫܘ̈ܦܢܝܢܝܢ. ܐܘ ܬܪ̈ܝܢ ܒܢ̈ܝ ܝܘܢܐ. ܢܝܬܐ ܩܘܪܒܢܗ ܕܚܛܗܐ ܕܚܛܐ. ܚܕ ܡܢ ܥܣܪܐ ܠܣܐܬܐ ܢܫܝܦܐ ܠܚܛܗܐ. ܘܠܐ ܢܣܘܟ ܥܠܘܗܝ ܡܫܚܐ. ܘܠܐ ܢܣܝܡ ܥܠܘܗܝ ܠܒܘܢܬܐ. ܡܛܠ ܕܚܛܗܐ ܗܘ.

97. Leviticus 5:12

    ܘܢܝܬܝܘܗܝ ܠܟܗܢܐ. ܘܢܙܘܪ ܟܗܢܐ ܡܢܗ ܡܠܐ ܙܘܪܗ ܕܘܟܪܢܐ. ܘܢܣܩ ܠܡܕܒܚܐ ܥܠ ܩܘܪ̈ܒܢܘܗܝ ܕܡܪܝܐ ܚܛܗܐ ܗܘ.

98. Leviticus 5:13

    ܘܢܚܣܐ ܥܠܘܗܝ ܟܗܢܐ ܥܠ ܚܛܗܐ. ܕܚܛܐ ܒܚܕܐ ܡܢ ܗܠܝܢ ܘܢܫܬܒܩ ܠܗ. ܘܬܗܘܐ ܠܟܗܢܐ ܐܝܟ ܣܡܝܕܐ.

99. Leviticus 5:14

    ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

100. Leviticus 5:15

     ܢܦܫܐ ܟܕ ܬܥܠܐ ܥܘܠܐ. ܘܬܚܛܐ ܒܛܘܥܝܝ ܡܢ ܩ̈ܘܕܫܘܗܝ ܕܡܪܝܐ. ܢܝܬܐ ܩܘܪܒܢܗ ܠܡܪܝܐ. ܕܟܪܐ ܕܠܐ ܡܘܡ ܡܢ ܥܢܐ ܒܕܡ̈ܝܐ. ܟܣܦ ܡܬܩ̈ܠܝܢ ܒܡܬܩܠܐ ܕܩܘܕܫܐ ܠܩܘܪܒܢܐ.

Next → — showing 1–100 of 859

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.