← All works

Peshitta Kings 2

Peshitta (Syriac Old Testament) · 719 sections

1. Kings 2 4:31

   ܘܓܚܙܝ ܥܒܪ ܩܕܡܝܗܘܢ ܘܣܡ ܚܘܛܪܗ ܥܠ ܐ̈ܦܘܗܝ ܕܛܠܝܐ ܘܠܝܬ ܩܠ ܘܐܦ ܠܐ ܕܨܐܬ ܘܗܦܟ ܠܐܘܪܥܗ ܘܚܘܝܗ ܘܐܡܪ ܠܗ ܠܐ ܐܬܬܥܝܪ ܛܠܝܐ

2. Kings 2 4:32

   ܘܐܬܐ ܐܠܝܫܥ ܠܒܝܬܐ ܘܚܙܐ ܘܗܐ ܛܠܝܐ ܡܝܬ ܘܪܡܐ ܒܥܪܣܗ

3. Kings 2 4:33

   ܘܥܠ ܘܐܚܕ ܬܪܥܐ ܒܐ̈ܦܝ ܬܪ̈ܝܗܘܢ ܘܨܠܝ ܩܕܡ ܡܪܝܐ

4. Kings 2 4:34

   ܘܣܠܩ ܘܢܦܠ ܠܥܠ ܡܢܗ ܕܛܠܝܐ ܘܣܡ ܦܘܡܗ ܥܠ ܦܘܡܗ ܘܥܝ̈ܢܘܗܝ ܥܠ ܥܝ̈ܢܘܗܝ ܘܐ̈ܝܕܘܗܝ ܥܠ ܐܝ̈ܕܘܗܝ ܘܐܬܓܗܢ ܥܠܘܗܝ ܘܚܡ ܒܣܪܗ ܕܛܠܝܐ

5. Kings 2 4:35

   ܘܗܦܟ ܘܗܠܟ ܒܒܝܬܐ ܚܕܐ ܠܟܐ ܘܚܕܐ ܠܟܐ ܘܣܠܩ ܘܐܬܓܗܢ ܥܠܘܗܝ ܘܐܬܦܘܩ ܛܠܝܐ ܫܒܥ ܙܒܢܝ̈ܢ ܘܦܬܚ ܛܠܝܐ ܥܝ̈ܢܘܗܝ

6. Kings 2 4:36

   ܘܩܪܐ ܠܓܚܙܝ ܘܐܡܪ ܠܗ ܩܪܝܗ ܠܫܝܠܘܡܝܬܐ ܗܕܐ ܘܩܪܗ ܘܥܠܬ ܠܘܬܗ ܘܐܡܪ ܠܗ ܫܩܘܠܝ ܒܪܟܝ

7. Kings 2 4:37

   ܘܢܦܠܬ ܥܠ ܪ̈ܓܠܘܗܝ ܘܣܓܕܬ ܠܗ ܥܠ ܐܪܥܐ ܘܫܩܠܬ ܒܪܗ ܘܢܦܩܬ

8. Kings 2 4:38

   ܘܐܠܝܫܥ ܗܦܟ ܠܓܠܓܠܐ ܘܟܦܢܐ ܐܝܬ ܒܐܪܥܐ ܘܒܢ̈ܝ ܢܒ̈ܝܐ ܝܬܒܝܢ ܩܕܡܘܗܝ ܘܐܡܪ ܠܬܠܡܝܕܗ ܬܦܝ ܩܕܣܐ ܪܒܐ ܘܒܫܠ ܒܘܫܠܐ ܠܒܢ̈ܝ ܢܒ̈ܝܐ

9. Kings 2 4:39

   ܘܢܦܩ ܚܕ ܠܚܩܠܐ ܠܡܠܩܛ ܪ̈ܘܥܢܐ ܘܐܫܟܚ ܓܦܬܐ ܒܚܩܠܐ ܘܠܩܛ ܡܢܗ ܦܩ̈ܘܥܐ ܕܕܒܪܐ ܡܠܐ ܠܒܫܗ ܘܐܬܐ ܐܪܡܝ ܒܩܕܣܐ ܕܒܘܫܠܐ ܡܛܠ ܕܠܐ ܝܕܥ

10. Kings 2 4:40

    ܘܢܣܟ ܠܗܘܢ ܠܓܒܪ̈ܐ ܠܡܐܟܠ ܘܟܕ ܐܟܠܘ ܡܢ ܒܘܫܠܐ ܐܡܪܝܢ ܡܘܬܐ ܐܝܬ ܒܩܕܣܐ ܢܒܝܗ ܕܐܠܗܐ ܘܠܐ ܐܫܟܚܘ ܕܢܐܟܠܘܢ

11. Kings 2 4:41

    ܘܐܡܪ ܣܒܘ ܩܡܚܐ ܐܪܡܘ ܒܩܕܣܐ ܘܐܡܪ ܣܘܟܘ ܠܥܡܐ ܘܢܐܟܠܘܢ ܘܠܐ ܗܘܐ ܡܕܡ ܒܩܕܣܐ

12. Kings 2 4:42

    ܘܓܒܪܐ ܐܬܐ ܡܢ ܡܕܝܢܬ ܓܢܒܪܐ ܘܐܝܬܝ ܠܢܒܝܗ ܕܐܠܗܐ ܠܚܡܐ ܕܒܟܪ̈ܐ ܥܣܪ̈ܝܢ ܕܠܚܡܐ ܕܣܥܪ̈ܐ ܘܦܪ̈ܝܟܬܐ ܒܣܕܘܢܐ ܘܐܡܪ ܗܒܘ ܠܥܡܐ ܘܢܐܟܠܘܢ

13. Kings 2 4:43

    ܘܐܡܪ ܠܗ ܡܫܡܫܢܗ ܡܢܐ ܐܬܠ ܗܢܐ ܩܕܡ ܡܐܐ ܓܒܪ̈ܝܢ ܘܐܡܪ ܠܗ ܐܠܝܫܥ ܗܒ ܠܥܡܐ ܘܢܐܟܠܘܢ ܡܛܠ ܕܗܟܢܐ ܐܡܪ ܡܪܝܐ ܢܐܟܠܘܢ ܘܢܘܬܪܘܢ

14. Kings 2 4:44

    ܘܣܡ ܩܕܡܝܗܘܢ ܘܐܟܠܘ ܘܐܘܬܪܘ ܐܝܟ ܦܬܓܡܗ ܕܡܪܝܐ

15. Kings 2 5:1

    ܘܢܥܡܢ ܪܒ ܚܝܠܐ ܕܡܠܟܐ ܕܐܕܘܡ ܓܒܪ ܗܘܐ ܪܒ ܩܕܡ ܡܪܗ ܘܫܒܝܚ ܒܐ̈ܦܐ ܡܛܠ ܕܒܗ ܥܒܕ ܡܪܝܐ ܦܘܪܩܢܐ ܠܐܕܘܡ ܘܓܒܪܐ ܢܥܡܢ ܓܢܒܪ ܚܝܠܐ ܗܘܐ ܘܓܪܒ

16. Kings 2 5:2

    ܘܐܕܘܡ̈ܝܐ ܢܦܩܘ ܒ̈ܓܝܣܐ ܘܫܒܘ ܡܢ ܐܪܥܐ ܕܐܝܣܪܝܠ ܥܠܝܡܬܐ ܙܥܘܪܬܐ ܘܗܘܬ ܩܕܡ ܐܢܬܬܗ ܕܢܥܡܢ

17. Kings 2 5:3

    ܘܐܡܪܬ ܠܡܪܬܗ ܛܘܒܘܗܝ ܠܡܪܝ ܐܢ ܢܐܙܠ ܠܘܬ ܢܒܝܐ ܕܐܝܬ ܒܫܡܪܝܢ ܡܚܕܐ ܡܐܣܐ ܠܗ ܡܢ ܓܪܒܗ

18. Kings 2 5:4

    ܘܥܠܘ ܘܚܘܝܘ ܠܡܪܗ ܘܐܡܪܘ ܠܗ ܗܟܢܐ ܘܗܟܢܐ ܐܡܪܬ ܥܠܝܡܬܐ ܕܡܢ ܐܪܥܐ ܕܐܝܣܪܝܠ

19. Kings 2 5:5

    ܘܐܡܪ ܠܗ ܡܠܟܐ ܕܐܕܘܡ ܬܐ ܙܠ ܐܢܐ ܐܫܕܪ ܐܝܓܪܬܐ ܠܡܠܟܐ ܕܐܝܣܪܝܠ ܘܐܙܠ ܘܢܣܒ ܒܐܝܕܗ ܥܣܪ ܟܟܪ̈ܝܢ ܕܟܣܦܐ ܘܫܬܐ ܐ̈ܠܦܝܢ ܕܕܗܒܐ ܘܥܣܪ̈ܐ ܙܘ̈ܓܝܢ ܕܢܚ̈ܬܐ

20. Kings 2 5:6

    ܘܐܝܬܝ ܐܝܓܪܬܐ ܠܡܠܟܐ ܕܐܝܣܪܝܠ ܘܗܟܢܐ ܟܬܝܒ ܒܗ ܒܫܥܬܐ ܕܡܛܝܐ ܐܝܓܪܬܐ ܗܕܐ ܠܘܬܟ ܗܐ ܫܕܪܬ ܠܟ ܠܢܥܡܢ ܥܒܕܝ ܐܣܝܗܝ ܡܢ ܓܪܒܗ

21. Kings 2 5:7

    ܘܟܕ ܩܪܐ ܡܠܟܐ ܕܐܝܣܪܝܠ ܐܝܓܪܬܐ ܨܪܝ ܠܒ̈ܘܫܘܗܝ ܘܐܡܪ ܐܢܐ ܐܠܗܐ ܐܢܐ ܕܡܡܝܬ ܘܡܚܐ ܕܫܠܚ ܠܝ ܗܢܐ ܐܣܐ ܓܒܪܐ ܡܢ ܓܪܒܗ ܡܟܝܠ ܕܥܘ ܘܚܙܘ ܕܡܬܓܪܝܘ ܡܬܓܪܐ ܥܡܝ

22. Kings 2 5:8

    ܘܟܕ ܫܡܥ ܐܠܝܫܥ ܢܒܝܗ ܕܐܠܗܐ ܕܨܪܝ ܡܠܟܐ ܠܒ̈ܘܫܘܗܝ ܫܠܚ ܠܡܠܟܐ ܘܐܡܪ ܠܗ ܠܡܢܐ ܨܪܝܬ ܠܒ̈ܘܫܝܟ ܢܐܬܐ ܠܘܬܝ ܘܢܕܥ ܕܐܝܬ ܢܒܝܐ ܒܐܝܣܪܝܠ

23. Kings 2 5:9

    ܘܐܬܐ ܢܥܡܢ ܒܪܟܫܗ ܘܒܡܪ̈ܟܒܬܗ ܘܩܡ ܒܬܪܥ ܒܝܬܗ ܕܐܠܝܫܥ

24. Kings 2 5:10

    ܘܫܠܚ ܠܗ ܐܠܝܫܥ ܒܝܕ ܡܠܐܟܐ ܙܠ ܣܚܝ ܫܒܥ ܙܒ̈ܢܝܢ ܒܝܘܪܕܢܢ ܘܢܬܘܒ ܒܣܪܟ ܥܠܝܟ ܘܢܬܕܟܐ

25. Kings 2 5:11

    ܘܪܓܙ ܢܥܡܢ ܘܐܙܠ ܘܐܡܪ ܐܢܐ ܐܡܪܬ ܕܡܦܩ ܢܦܘܩ ܠܘܬܝ ܘܢܩܘܡ ܘܢܩܪܐ ܒܫܡܗ ܕܡܪܝܐ ܐܠܗܗ ܘܢܢܝܦ ܐܝܕܗ ܥܠ ܕܘܟܬܐ ܘܬܬܐܣܐ ܡܢ ܓܪܒܐ

26. Kings 2 5:12

    ܠܐ ܗܘܐ ܛܒ ܐܡܢܢ ܘܦܪܦܪ ܢܗܪ̈ܘܬܐ ܕܕܪܡܣܘܩ ܡܢ ܟܠܗܘܢ ܡ̈ܝܐ ܕܐܝܣܪܝܠ ܐܙܠ ܐܣܚܐ ܒܗܘܢ ܡܬܕܟܐ ܐܢܐ ܘܐܬܦܢܝ ܘܐܙܠ ܒܚܡܬܐ

27. Kings 2 5:13

    ܘܩܪܒܘ ܥܒ̈ܕܘܗܝ ܘܐܡܪܝܢ ܠܗ ܡܪܢ ܐܠܘ ܦܬܓܡܐ ܪܒܐ ܐܡܪ ܗܘܐ ܠܟ ܢܒܝܐ ܘܠܐ ܗܘܐ ܠܟ ܠܡܥܒܕ ܐܠܐ ܗܐ ܦܬܓܡܐ ܗܘ ܙܥܘܪܐ ܐܡܪ ܠܟ ܙܠ ܣܚܝ ܘܕܟܝ

28. Kings 2 5:14

    ܘܫܡܥ ܒܩܠܗܘܢ ܘܥܒܕ ܗܟܢܐ ܘܐܙܠ ܣܚܐ ܫܒܥ ܙܒ̈ܢܝܢ ܒܝܘܪܕܢܢ ܘܗܦܟ ܒܣܪܗ ܐܝܟ ܒܣܪܐ ܕܛܠܝܐ ܙܥܘܪܐ ܘܐܬܕܟܝ

29. Kings 2 5:15

    ܘܗܦܟ ܠܘܬ ܢܒܝܗ ܕܐܠܗܐ ܗܘ ܘܟܠܗ ܡܫܪܝܬܗ ܘܐܬܐ ܘܩܡ ܩܕܡܘܗܝ ܘܐܡܪ ܠܗ ܗܫܐ ܗܘ ܝܕܥܬ ܕܠܝܬ ܐܠܗܐ ܒܟܠܗ ܐܪܥܐ ܐܠܐ ܐܢ ܒܐܝܣܪܝܠ ܘܗܫܐ ܣܒ ܒܘܪܟܬܐ ܗܕܐ ܡܢ ܥܒܕܟ

30. Kings 2 5:16

    ܘܐܡܪ ܐܠܝܫܥ ܚܝ ܗܘ ܡܪܝܐ ܕܩܡܬ ܩܕܡܘܗܝ ܕܠܐ ܐܣܒ ܘܒܥܐ ܡܢܗ ܕܢܣܒ ܘܠܐ ܨܒܐ

31. Kings 2 5:17

    ܘܐܡܪ ܢܥܡܢ ܘܡܐ ܕܠܐ ܢܬܝܗܒ ܠܥܒܕܟ ܛܥܢܐ ܕܬܪ̈ܝܢ ܟܘܕܢܘܢ ܐܕܡܬܐ ܡܛܠ ܕܬܘܒ ܠܐ ܥܒܕ ܥܒܕܟ ܥ̈ܠܘܬܐ ܘܕܒܚ̈ܐ ܠܐܠܗ ܐܚܪܝܢ ܐܠܐ ܐܢ ܠܡܪܝܐ ܒܠܚܘܕܘܗܝ

32. Kings 2 5:18

    ܘܥܠ ܨܒܘܬܐ ܗܕܐ ܢܫܒܘܩ ܡܪܝܐ ܠܥܒܕܟ ܡܐ ܕܥܐܠ ܡܪܝ ܠܒܝܬ ܪܡܘܢ ܠܡܣܓܕ ܬܡܢ ܘܗܘ ܡܣܬܡܟ ܥܠ ܐ̈ܝܕܝ ܘܐܣܓܘܕ ܒܝܬ ܪܡܘܢ ܘܡܐ ܕܣܓܕܬ ܒܝܬ ܪܡܘܢ ܢܫܒܘܩ ܡܪܝܐ ܠܥܒܕܟ ܥܠ ܨܒܘܬܐ ܗܕܐ

33. Kings 2 5:19

    ܘܐܡܪ ܠܗ ܙܠ ܒܫܠܡܐ ܘܐܙܠ ܡܢ ܠܘܬܗ ܐܝܟ ܦܪܣܚܐ ܕܐܪܥܐ

34. Kings 2 5:20

    ܘܐܡܪ ܓܚܙܝ ܬܠܡܝܕܗ ܕܐܠܝܫܥ ܢܒܝܗ ܕܐܠܗܐ ܗܐ ܚܣܟ ܡܪܝ ܠܢܥܡܢ ܐܕܘܡܝܐ ܘܠܐ ܢܣܒ ܡܢܗ ܡܕܡ ܕܐܝܬܝ ܚܝ ܗܘ ܡܪܝܐ ܐܠܐ ܐܪܗܛ ܒܬܪܗ ܘܐܣܒ ܡܢܗ ܡܕܡ

35. Kings 2 5:21

    ܘܪܗܛ ܓܚܙܝ ܒܬܪ ܢܥܡܢ ܘܚܙܐ ܢܥܡܢ ܕܪܗܛ ܒܬܪܗ ܘܢܚܬ ܡܢ ܡܪܟܒܬܗ ܠܐܘܪܥܗ ܘܐܡܪ ܠܗ ܫܠܡ ܐܬܝܬ

36. Kings 2 5:22

    ܘܐܡܪ ܫܠܡ ܡܪܝ ܫܕܪܢܝ ܘܐܡܪ ܗܫܐ ܐܬܘ ܠܘܬܝ ܬܪ̈ܝܢ ܓܒܪ̈ܝܢ ܡܢ ܛܘܪܐ ܕܐܦܪܝܡ ܡܢ ܒܢ̈ܝ ܢܒ̈ܝܐ ܗܒ ܠܗܘܢ ܟܟܪܐ ܕܟܣܦܐ ܘܬܪ̈ܝܢ ܙܘܓ̈ܝܢ ܕܢܚ̈ܬܐ

37. Kings 2 5:23

    ܘܐܡܪ ܢܥܡܢ ܒܥܐ ܐܢܐ ܣܒ ܬܪ̈ܬܝܢ ܟܟܪ̈ܝܢ ܘܐܠܨܗ ܘܨܪ ܬܪ̈ܬܝܢ ܟܟܪ̈ܝܢ ܒܬܪ̈ܝܢ ܣܕ̈ܘܢܝܢ ܘܬܪ̈ܝܢ ܙܘ̈ܓܝܢ ܕܢܚ̈ܬܐ ܘܝܗܒ ܠܬܪ̈ܝܢ ܥ̈ܠܝܡܘܗܝ ܘܫܩܠܘ ܥܡܗ

38. Kings 2 5:24

    ܘܐܬܐ ܠܓܢܝܐ ܘܢܣܒ ܡܢܗܘܢ ܘܐܛܪ ܒܒܝܬܐ ܘܫܕܪ ܐܢܘܢ ܠܓܒܪ̈ܐ ܘܐܙܠܘ

39. Kings 2 5:25

    ܘܗܘ ܐܬܐ ܘܩܡ ܩܕܡ ܡܪܗ ܘܐܡܪ ܠܗ ܐܠܝܫܥ ܐܝܡܟܐ ܓܚܙܝ ܘܐܡܪ ܠܐ ܐܙܠ ܥܒܕܟ ܠܐ ܠܟܐ ܘܠܐ ܠܟܐ

40. Kings 2 5:26

    ܘܐܡܪ ܠܗ ܐܠܝܫܥ ܠܒܝ ܚܘܝܢܝ ܟܕ ܢܚܬ ܓܒܪܐ ܡܢ ܡܪܟܒܬܗ ܠܐܘܪܥܟ ܗܢܘ ܙܒܢܐ ܕܬܩܢܐ ܠܟ ܟܣܦܐ ܘܬܩܢܐ ܠܒ̈ܘܫܐ ܘܙ̈ܝܬܐ ܘܟܪ̈ܡܐ ܘܥܢܐ ܘܬܘܪ̈ܐ ܘܥܒ̈ܕܐ ܘܐܡ̈ܗܬܐ

41. Kings 2 5:27

    ܓܪܒܗ ܕܢܥܡܢ ܢܕܒܩ ܒܟ ܘܒܙܪܥܟ ܠܥܠܡ ܘܢܦܩ ܡܢ ܩܕܡܘܗܝ ܟܕ ܓܪܒ ܐܝܟ ܬܠܓܐ

42. Kings 2 6:1

    ܘܐܡܪܘ ܒܢ̈ܝ ܢܒ̈ܝܐ ܠܐܠܝܫܥ ܗܢܐ ܐܬܪܐ ܕܝܬܒܝܢ ܚܢܢ ܒܗ ܗܪܟܐ ܩܕܡܝܟ ܐܠܝܨ ܗܘ ܠܢ

43. Kings 2 6:2

    ܢܐܙܠ ܠܝܘܪܕܢܢ ܘܢܦܣܘܩ ܡܢ ܬܡܢ ܓܒܪ ܚܕܐ ܚܕܐ ܩܪܝ ܘܢܥܒܕ ܠܢ ܐܬܪܐ ܠܡܬܒ ܬܡܢ ܘܐܡܪ ܙܠܘ

44. Kings 2 6:3

    ܘܥܢܐ ܚܕ ܡܢܗܘܢ ܘܐܡܪ ܐܢ ܨܒܐ ܐܢܬ ܙܠ ܥܡ ܥܒ̈ܕܝܟ ܘܐܡܪ ܐܢܐ ܐܙܠ

45. Kings 2 6:4

    ܘܐܙܠ ܥܡܗܘܢ ܘܐܬܘ ܠܝܘܪܕܢܢ ܘܦܣܩܘ ܩܝ̈ܣܐ

46. Kings 2 6:5

    ܘܚܕ ܡܢܗܘܢ ܟܕ ܪܡܐ ܩܪܝܬܐ ܢܦܠ ܦܪܙܠܗ ܒܓܘ ܡ̈ܝܐ ܘܐܝܠܠ ܘܐܡܪ ܒܥܐ ܐܢܐ ܡܢܟ ܡܪܝ ܡܫܐܠ ܫܐܝܠ ܠܥܒܕܟ

47. Kings 2 6:6

    ܘܐܡܪ ܠܗ ܢܒܝܗ ܕܐܠܗܐ ܐܝܟܐ ܢܦܠ ܘܚܘܝܗ ܐܬܪܐ ܘܦܣܩ ܩܝܣܐ ܘܐܪܡܝ ܬܡܢ ܘܛܦ ܦܪܙܠܐ

48. Kings 2 6:7

    ܘܐܡܪ ܐܪܝܡ ܕܝܠܟ ܘܐܘܫܛ ܐܝܕܗ ܘܢܣܒܗ

49. Kings 2 6:8

    ܘܡܠܟܐ ܕܐܕܘܡ ܡܬܟܬܫ ܥܡ ܐܝܣܪܝܠ ܘܐܬܡܠܟ ܗܘ ܘܥܒ̈ܕܘܗܝ ܘܐܡܪ ܒܐܬܪ ܦܠܢ ܟܡܢܘ ܘܐܬܛܫܘ

50. Kings 2 6:9

    ܘܫܠܚ ܢܒܝܐ ܕܐܠܗܐ ܠܡܠܟܐ ܕܐܝܣܪܐܝܠ ܘܐܡܪ ܠܗ ܐܙܕܗܪ ܠܐ ܬܥܒܪ ܐܬܪܐ ܗܢܐ ܡܛܘܠ ܕܬܡܢ ܐ̈ܕܘܡܝܐ ܟܡܝܢܝܢ

51. Kings 2 6:10

    ܘܫܕܪ ܡܠܟܐ ܕܐܝܣܪܝܠ ܠܐܬܪܐ ܕܐܡܪ ܠܗ ܢܒܝܗ ܕܐܠܗܐ ܘܙܗܪܗ ܕܢܙܕܗܪ ܡܢ ܬܡܢ ܠܐ ܚܕܐ ܘܠܐ ܬܪ̈ܬܝܢ

52. Kings 2 6:11

    ܘܐܬܕܠܚ ܠܒܗ ܕܡܠܟܐ ܕܐܕܘܡ ܥܠ ܦܬܓܡܐ ܗܢܐ ܘܩܪܐ ܠܥܒ̈ܕܘܗܝ ܘܐܡܪ ܠܗܘܢ ܠܐ ܬܚܘܘܢܢܝ ܡ̇ܢ ܡܢ ܕܝܠܢ ܠܘܬ ܡܠܟܐ ܕܐܝܣܪܝܠ

53. Kings 2 6:12

    ܘܥܢܐ ܚܕ ܡܢ ܥܒ̈ܕܘܗܝ ܘܐܡܪ ܠܐ ܗܘܐ ܡܢ ܕܝܠܢ ܡܪܝ ܡܠܟܐ ܬܡܢ ܐܠܐ ܐܠܝܫܥ ܗܘ ܢܒܝܐ ܕܐܝܣܪܝܠ ܡܚܘܐ ܠܡܠܟܐ ܕܐܝܣܪܝܠ ܡܕܡ ܕܥܒܕ ܐܢܬ ܒܩܝܛܘܢܐ ܕܡܫܟܒܟ

54. Kings 2 6:13

    ܘܐܡܪ ܙܠܘ ܚܙܘ ܐܝܟܘ ܐܫܕܪ ܐܕܒܪܝܘܗܝ ܘܚܘܝܘܗܝ ܘܐܡܪܘ ܠܗ ܗܐ ܒܕܘܬܢ

55. Kings 2 6:14

    ܘܫܕܪ ܠܬܡܢ ܪ̈ܟܫܐ ܘܪ̈ܟܒܐ ܘܚܝܠܐ ܥܫܝܢܐ ܘܐܬܘ ܒܠܠܝܐ ܘܐܬܟܪܟܘܗ ܠܩܪܝܬܐ

56. Kings 2 6:15

    ܘܩܕܡ ܡܫܡܫܢܐ ܕܢܒܝܗ ܕܐܠܗܐ ܠܡܦܩ ܘܢܦܩ ܘܚܙܐ ܚܝܠܐ ܕܟܪܝܟ ܠܩܪܝܬܐ ܘܪ̈ܟܫܐ ܘܪ̈ܟܒܐ ܘܐܡܪ ܠܗ ܥܠܝܡܗ ܐܘܗ ܡܪܝ ܐܝܟܢܐ ܢܥܒܪ

57. Kings 2 6:16

    ܘܐܡܪ ܠܗ ܠܐ ܬܕܚܠ ܡܛܘܠ ܕܣܓ̈ܝܐܝܢ ܐܢܘܢ ܕܥܡܢ ܡܢ ܕܥܡܗܘܢ

58. Kings 2 6:17

    ܘܨܠܝ ܐܠܝܫܥ ܩܕܡ ܡܪܝܐ ܘܐܡܪ ܡܪܝܐ ܦܬܚ ܥܝܢ̈ܘܗܝ ܕܛܠܝܐ ܘܢܚܙܐ ܘܦܬܚ ܡܪܝܐ ܥ̈ܝܢܘܗܝ ܕܛܠܝܐ ܘܚܙܐ ܘܗܐ ܛܘܪܐ ܡܠܐ ܪ̈ܟܫܐ ܘܪ̈ܟܒܐ ܕܢܘܪܐ ܚܕܪ̈ܘܗܝ ܕܐܠܝܫܥ

59. Kings 2 6:18

    ܘܢܚܬ ܠܘܬܗܘܢ ܘܨܠܝ ܐܠܝܫܥ ܩܕܡ ܡܪܝܐ ܘܐܡܪ ܡܚܝ ܠܥܡܐ ܗܢܐ ܒܫܪ̈ܓܪܓܝܬܐ ܘܡܚܐ ܐܢܘܢ ܒܫܪ̈ܓܪܓܝܬܐ ܐܝܟ ܦܬܓܡܗ ܕܐܠܝܫܥ

60. Kings 2 6:19

    ܘܐܡܪ ܠܗܘܢ ܐܠܝܫܥ ܠܐ ܗܘܬ ܗܕܐ ܐܘܪܚܐ ܘܠܐ ܗܘܬ ܗܕܐ ܩܪܝܬܐ ܬܘ ܒܬܪܝ ܘܐܘܒܠܟܘܢ ܠܘܬ ܓܒܪܐ ܕܒܥܝܢ ܐܢܬܘܢ ܘܐܘܒܠ ܐܢܘܢ ܠܫܡܪܝܢ

61. Kings 2 6:20

    ܘܟܕ ܥܠܘ ܠܫܡܪܝܢ ܐܡܪ ܐܠܝܫܥ ܡܪܝܐ ܦܬܚ ܥܝܢܝ̈ܗܘܢ ܕܗܠܝܢ ܘܢܚܙܘܢ ܘܦܬܚ ܡܪܝܐ ܥܝ̈ܢܝܗܘܢ ܘܚܙܘ ܘܗܐ ܒܓܘ ܫܡܪܝܢ ܐܢܘܢ

62. Kings 2 6:21

    ܘܐܡܪ ܡܠܟܐ ܕܐܝܣܪܝܠ ܠܐܠܝܫܥ ܟܕ ܚܙܐ ܐܢܘܢ ܡܡܚܐ ܐܡܚܐ ܐܢܘܢ ܐܒܝ

63. Kings 2 6:22

    ܘܐܡܪ ܠܗ ܠܐ ܬܡܚܐ ܕܫܒܝܬ ܒܚܪܒܟ ܘܒܩܫܬܟ ܡܚܐ ܐܢܬ ܣܝܡ ܠܚܡܐ ܘܡ̈ܝܐ ܩܕܡܝܗܘܢ ܢܐܟܠܘܢ ܘܢܫܬܘܢ ܘܢܐܙܠܘܢ ܠܘܬ ܡܪܗܘܢ

64. Kings 2 6:23

    ܘܬܩܢ ܠܗܘܢ ܫܪܘܬܐ ܪܒܬܐ ܘܐܟܠܘ ܘܐܫܬܝܘ ܘܐܙܠܘ ܠܘܬ ܡܪܗܘܢ ܘܬܘܒ ܠܐ ܐܘܣܦܘ ܓܝܣ̈ܐ ܕܐܕܘܡ ܠܡܐܬܐ ܠܬܚܘܡܐ ܕܐܝܣܪܝܠ

65. Kings 2 6:24

    ܘܡܢ ܒܬܪ ܗܝܕܝܢ ܟܢܫ ܒܪܗܕܕ ܡܠܟܐ ܕܐܕܘܡ ܟܠܗ ܡܫܪܝܬܗ ܘܣܠܩ ܘܫܪܐ ܥܠ ܫܡܪܝܢ ܘܐܬܟܬܫ ܥܡܗ

66. Kings 2 6:25

    ܘܗܘܐ ܟܦܢܐ ܪܒܐ ܒܫܡܪܝܢ ܟܕ ܗܢܘܢ ܫܪܝܢ ܥܠܝܗ ܥܕܡܐ ܕܐܙܕܒܢ ܪܝܫܐ ܕܚܡܪܐ ܒܬܡܢܐܝܢ ܕܟܣܦܐ ܘܪܘܒܥܐ ܕܩܒܐ ܕܚܪ̈ܝ ܝܘܢܐ ܒܚܡܫܐ ܕܟܣܦܐ

67. Kings 2 6:26

    ܘܡܠܟܐ ܕܐܝܣܪܝܠ ܥܒܪ ܗܘܐ ܥܠ ܫܘܪܐ ܘܐܢܬܬܐ ܚܕܐ ܡܒܓܢܐ ܩܕܡܘܗܝ ܘܐܡܪܐ ܦܪܘܩܝܢܝ ܡܪܝ ܡܠܟܐ

68. Kings 2 6:27

    ܘܐܡܪ ܠܗ ܢܦܪܩܟܝ ܡܪܝܐ ܡܢ ܐܝܡܟܐ ܐܦܪܩܟܝ ܡܢ ܐܕܪܐ ܐܘ ܡܢ ܡܥܨܪܬܐ

69. Kings 2 6:28

    ܐܡܪ ܠܗ ܡܠܟܐ ܡܐ ܠܟܝ ܐܡܪܐ ܠܗ ܐܢܬܬܐ ܗܕܐ ܐܡܪܬ ܠܝ ܗܒܝ ܒܪܟܝ ܢܐܟܠܝܘܗܝ ܝܘܡܢܐ ܘܒܪܝ ܢܐܟܘܠ ܡܚܪ

70. Kings 2 6:29

    ܘܒܫܠܢ ܒܪܝ ܘܐܟܠܢܝܗܝ ܘܐܡܪܬ ܠܗ ܠܝܘܡܐ ܐܚܪܢܐ ܗܒܝ ܒܪܟܝ ܢܐܟܠܝܘܗܝ ܘܐܛܫܝܬܗ ܠܒܪܗ

71. Kings 2 6:30

    ܘܟܕ ܫܡܥ ܡܠܟܐ ܡ̈ܠܝܗ ܕܐܢܬܬܐ ܟܕ ܡܗܠܟ ܥܠ ܫܘܪܐ ܨܪܝ ܠܒܘܫ̈ܘܗܝ ܘܚܙܐ ܥܡܐ ܕܣܩܐ ܠܒܝܫ ܥܠ ܒܣܪܗ ܡܢ ܠܓܘ

72. Kings 2 6:31

    ܘܐܡܪ ܗܟܢܐ ܢܥܒܕ ܠܝ ܐܠܗܐ ܘܗܟܢܐ ܢܘܣܦ ܠܝ ܐܢ ܢܦܘܫ ܪܝܫܗ ܕܐܠܝܫܥ ܒܪ ܫܦܛ ܥܠܘܗܝ ܝܘܡܢܐ

73. Kings 2 6:32

    ܘܐܠܝܫܥ ܝܬܒ ܒܒܝܬܗ ܘܣܒ̈ܐ ܝܬܒܝܢ ܗܘܘ ܩܕܡܘܗܝ ܘܫܕܪ ܓܒܪܐ ܡܢ ܩܕܡܘܗܝ ܘܥܕܠܐ ܢܐܬܐ ܐܝܙܓܕܐ ܥܠܘܗܝ ܐܡܪ ܗܘ ܠܣ̈ܒܐ ܚܙܝܬܘܢ ܕܫܕܪ ܒܪ ܩܛܘܠܐ ܗܢܐ ܠܡܣܒ ܪܝܫܝ ܚܙܘ ܡܐ ܕܐܬܐ ܐܝܙܓܕܐ ܐܚܘܕܘ ܬܪܥܐ ܘܚܘܒܨܘܗܝ ܠܒܪ ܡܛܠ ܕܩܠܐ ܕܪ̈ܓܠܝ ܡܪܗ ܒܬܪܗ

74. Kings 2 6:33

    ܘܥܕ ܗܘ ܡܡܠܠ ܥܡܗܘܢ ܐܬܐ ܐܝܙܓܕܐ ܥܠܘܗܝ ܘܐܡܪ ܗܐ ܗܕܐ ܗܝ ܒܝܫܬܐ ܡܢ ܩܕܡ ܡܪܝܐ ܡܢܐ ܐܨܠܐ ܬܘܒ ܠܡܪܝܐ

75. Kings 2 7:1

    ܘܐܡܪ ܐܠܝܫܥ ܫܡܥ ܦܬܓܡܗ ܕܡܪܝܐ ܗܟܢܐ ܐܡܪ ܡܪܝܐ ܡܚܪ ܠܗܢܐ ܥܕܢܐ ܣܐܬܐ ܕܢܫܝܦܐ ܒܣܠܥܐ ܘܣܐܬܝܢ ܣܥܪ̈ܝܢ ܒܣܠܥܐ ܒܬܪܥܐ ܕܫܡܪܝܢ

76. Kings 2 7:2

    ܘܥܢܐ ܓܢܒܪܐ ܕܡܠܟܐ ܡܣܬܡܟ ܥܠ ܐ̈ܝܕܘܗܝ ܘܐܡܪ ܐܢ ܡܪܝܐ ܢܥܒܕ ܟܘ̈ܐ ܒܫܡܝܐ ܢܗܘܐ ܦܬܓܡܐ ܗܢܐ ܘܐܡܪ ܠܗ ܗܐ ܚܙܐ ܐܢܬ ܒܥܝܢ̈ܝܟ ܘܡܢܗ ܠܐ ܬܐܟܘܠ

77. Kings 2 7:3

    ܘܐܪܒܥܐ ܓܒܪ̈ܝܢ ܓܪܒ̈ܝܢ ܝܬܒܝܢ ܗܘܘ ܠܒܪ ܡܢ ܫܘܪܐ ܘܐܡܪܘ ܓܒܪ ܠܚܒܪܗ ܡܢܐ ܝܬܒܝܢ ܚܢܢ ܗܪܟܐ ܥܕܡܐ ܕܢܡܘܬ

78. Kings 2 7:4

    ܐܢ ܐܡܪܝܢܢ ܕܢܥܘܠ ܠܓܘ ܩܪܝܬܐ ܟܦܢܐ ܥܫܝܢ ܒܓܘ ܩܪܝܬܐ ܡܝܬܝܢ ܚܢܢ ܬܡܢ ܘܐܢ ܝܬܒܝܢܢ ܗܪܟܐ ܡܝܬܝܢ ܚܢܢ ܐܠܐ ܬܘ ܢܐܙܠ ܠܡܫܪܝܬܐ ܕܐܕܘܡ ܐܢ ܢܚܘܢܢ ܢܚܐ ܘܐܢ ܢܡܝܬܘܢܢ ܢܡܘܬ

79. Kings 2 7:5

    ܘܩܡܘ ܒܫܦܪܐ ܠܡܐܙܠ ܠܡܫܪܝܬܐ ܕܐܕܘܡ ܘܡܛܝܘ ܥܕܡܐ ܠܣܘܦܐ ܕܡܫܪܝܬܐ ܘܠܝܬ ܬܡܢ ܐܢܫ

80. Kings 2 7:6

    ܘܡܪܝܐ ܐܫܡܥ ܠܡܫܪܝܬܐ ܕܐܕܘܡ ܩܠ ܪ̈ܟܫܐ ܘܩܠ ܪ̈ܟܒܐ ܘܩܠ ܚܝܠܐ ܥܫܝܢܐ ܘܐܡܪܘ ܓܒܪ ܠܚܒܪܗ ܗܐ ܐܓܪ ܥܠܝܢ ܡܠܟܐ ܕܐܝܣܪܐܝܠ ܠܡܠܟܐ ܕܡܨܪ̈ܝܐ ܘܠܡܠܟܐ ܕܚ̈ܬܝܐ ܕܢܐܬܘܢ ܥܠܝܢ

81. Kings 2 7:7

    ܘܩܡܘ ܘܥܪܩܘ ܠܗܘܢ ܒܫܦܪܐ ܘܫܒܩܘ ܡܫ̈ܟܢܝܗܘܢ ܘܪ̈ܟܫܝܗܘܢ ܘܚܡܪ̈ܝܗܘܢ ܘܡܫܪܝܬܗܘܢ ܐܝܟ ܕܥܒܝܕܐ ܘܥܪܩܘ ܒܢܦܫܗܘܢ

82. Kings 2 7:8

    ܘܐܬܘ ܓܒܪ̈ܐ ܗܢܘܢ ܥܕܡܐ ܠܣܘܦܗ ܕܡܫܪܝܬܐ ܘܥܠܘ ܠܡܫܟܢܐ ܚܕ ܘܐܟܠܘ ܘܐܫܬܝܘ ܘܢܣܒܘ ܡܢ ܬܡܢ ܟܣܦܐ ܘܕܗܒܐ ܘܠܒ̈ܘܫܐ ܘܐܙܠܘ ܘܛܡܪܘ ܘܗܦܟܘ ܘܥܠܘ ܠܡܫܟܢܐ ܐܚܪܢܐ ܘܫܩܠܘ ܡܢ ܬܡܢ ܘܐܙܠܘ ܘܛܡܪܘ

83. Kings 2 7:9

    ܘܐܡܪܘ ܓܒܪ ܠܚܒܪܗ ܠܐ ܟܐܢܐܝܬ ܥܒܕܝܢ ܚܢܢ ܝܘܡܢܐ ܝܘܡܐ ܗܘ ܕܣܒܪܬܐ ܘܥܕܡܐ ܠܐܡܬܝ ܫܬܝܩܝܢܢ ܘܡܟܬܪܝܢܢ ܥܕܡܐ ܕܢܢܗܪ ܨܦܪܐ ܘܢܡܛܝܢ ܚܛܗܐ ܗܫܐ ܬܘ ܢܐܙܠ ܘܢܚܘܐ ܒܒܝܬ ܡܠܟܐ

84. Kings 2 7:10

    ܘܐܬܘ ܘܩܪܘ ܠܬܪ̈ܥܐ ܕܩܪܝܬܐ ܘܚܘܝܘ ܐܢܘܢ ܘܐܡܪܘ ܐܙܠܢ ܠܡܫܪܝܬܐ ܕܐܕܘܡ ܘܠܝܬ ܬܡܢ ܓܒܪ ܘܩܠ ܐܢܫ ܐܠܐ ܪ̈ܟܫܐ ܟܕ ܐܣܝܪ̈ܝܢ ܘܚܡܪ̈ܐ ܟܕ ܐܣܝܪ̈ܝܢ ܘܡܫ̈ܟܢܐ ܐܝܟ ܕܗܢܘܢ

85. Kings 2 7:11

    ܘܩܪܘ ܬܪ̈ܥܐ ܘܚܘܝܘ ܠܓܘ ܒܝܬ ܡܠܟܐ

86. Kings 2 7:12

    ܘܩܡ ܡܠܟܐ ܒܠܠܝܐ ܘܐܡܪ ܠܥܒ̈ܕܘܗܝ ܐܚܘܝܟܘܢ ܡܕܡ ܕܥܒܕܘ ܠܢ ܐ̈ܕܘܡܝܐ ܝܕܥܘ ܕܟܦܢܝܢ ܚܢܢ ܘܢܦܩܘ ܡܢ ܡܫܪܝܬܐ ܠܡܬܛܫܝܘ ܒܕܒܪܐ ܘܐܡܪܝܢ ܡܐ ܕܢܦܩܘ ܡܢ ܩܪܝܬܐ ܢܐܚܘܕ ܐܢܘܢ ܟܕ ܚܝ̈ܝܢ ܘܠܩܪܝܬܐ ܢܥܘܠ

87. Kings 2 7:13

    ܘܥܢܐ ܚܕ ܡܢ ܥܒ̈ܕܘܗܝ ܘܐܡܪ ܢܕܒܪܘܢ ܚܡܫܐ ܡܢ ܪ̈ܟܒܐ ܕܐܫܬܚܪܘ ܐܢ ܐܬܬܚܕܘ ܚܫܝܒܝܢ ܐܝܟ ܚܝܠܐ ܟܠܗ ܕܐܝܣܪܝܠ ܕܣܦܘ ܘܢܫܕܪ ܘܢܚܙܐ

88. Kings 2 7:14

    ܘܪܟܒܘ ܬܪ̈ܝܢ ܙܘ̈ܓܝܢ ܕܪ̈ܟܒܐ ܕܪ̈ܟܫܐ

89. Kings 2 7:15

    ܘܐܙܠܘ ܒܬܪܗܘܢ ܥܕܡܐ ܠܝܘܪܕܢܢ ܘܚܙܝܢ ܟܠܗ ܐܘܪܚܐ ܡܠܝܐ ܢܚ̈ܬܐ ܘܡܐ̈ܢܐ ܕܫܒܩܘ ܐܕ̈ܘܡܝܐ ܒܣܘܪܗܒܗܘܢ ܘܗܦܟܘ ܐܝ̈ܙܓܕܐ ܘܚܘܝܘ ܠܡܠܟܐ

90. Kings 2 7:16

    ܘܢܦܩܘ ܥܡܐ ܘܒܙܘ ܠܡܫܪܝܬܐ ܕܐܕܘܡ ܘܗܘܬ ܣܐܬܐ ܕܢܫܝܦܐ ܒܣܠܥܐ ܘܣܐ̈ܬܝܢ ܣܥܪ̈ܝܢ ܒܣܠܥܐ ܐܝܟ ܕܐܡܪ ܡܪܝܐ

91. Kings 2 7:17

    ܘܡܠܟܐ ܐܩܝܡ ܠܓܢܒܪܐ ܕܡܠܟܐ ܡܣܬܡܟ ܗܘܐ ܥܠ ܐ̈ܝܕܘܗܝ ܥܠ ܬܪܥܐ ܘܕܫܘܗܝ ܥܡܐ ܒܬܪܥܐ ܘܡܝܬ. ܐܝܟ ܕܐܡܪ ܢܒܝܗ ܕܐܠܗܐ ܟܕ ܢܚܬ ܐܝܙܓܕܐ ܥܠܘܗܝ

92. Kings 2 7:18

    ܘܗܘܐ ܦܬܓܡܗ ܕܢܒܝܗ ܕܐܠܗܐ ܕܐܡܪ ܠܡܠܟܐ ܕܣܐܬܐ ܕܢܫܝܦܐ ܒܣܠܥܐ ܘܣܐ̈ܬܝܢ ܣܥܪܝܢ ܒܣܠܥܐ ܢܙܕܒܢ ܡܚܪ ܒܗܢܐ ܥܕܢܐ ܒܬܪ̈ܥܐ ܕܫܡܪܝܢ

93. Kings 2 7:19

    ܘܥܢܐ ܗܘܐ ܓܢܒܪܐ ܗܘ ܘܐܡܪ ܠܢܒܝܗ ܕܐܠܗܐ ܐܢ ܡܪܝܐ ܥܒܕ ܟܘ̈ܐ ܒܫܡܝܐ ܗܘܐ ܦܬܓܡܐ ܗܢܐ ܘܐܡܪ ܗܘܐ ܠܗ ܗܐ ܚܙܐ ܐܢܬ ܒܥܝܢ̈ܝܟ ܘܡܢܗ ܠܐ ܬܐܟܘܠ

94. Kings 2 7:20

    ܘܗܘܐ ܗܟܢܐ ܘܕܫܘܗܝ ܥܡܐ ܒܬܪܥܐ ܘܡܝܬ

95. Kings 2 8:1

    ܘܐܠܝܫܥ ܐܡܪ ܠܐܢܬܬܐ ܕܐܚܝ ܒܪܗ ܩܘܡܝ ܙܠܝ ܐܢܬܝ ܘܒܝܬܟܝ ܘܥܡܪܝ ܐܝܟܐ ܕܥܡܪܐ ܐܢܬܝ ܡܛܠ ܕܩܪܐ ܡܪܝܐ ܠܟܦܢܐ ܘܐܦ ܐܬܐ ܥܠ ܐܪܥܐ ܫܒܥ ܫ̈ܢܝܢ

96. Kings 2 8:2

    ܘܩܡܬ ܐܢܬܬܐ ܘܥܒܕܬ ܐܝܟ ܦܬܓܡܗ ܕܢܒܝܗ ܕܐܠܗܐ ܘܐܙܠܬ ܗܝ ܘܒܢ̈ܝ ܒܝܬܗ ܘܥܡܪܬ ܒܐܪܥܐ ܕܦܠܫ̈ܬܝܐ ܫܒܥ ܫ̈ܢܝܢ

97. Kings 2 8:3

    ܘܡܢ ܒܬܪ ܫܒܥ ܫ̈ܢܝܢ ܗܦܟܬ ܘܐܬܬ ܡܢ ܐܪܥܐ ܕܦܠܫ̈ܬܝܐ ܘܐܙܠܬ ܠܡܒܓܢܘ ܩܕܡ ܡܠܟܐ ܥܠ ܒܝܬܗ ܘܥܠ ܚܩܠܗ

98. Kings 2 8:4

    ܘܡܠܟܐ ܐܡܪ ܠܓܚܙܝ ܥܠܝܡܐ ܕܢܒܝܗ ܕܐܠܗܐ ܐܫܬܥܐ ܠܝ ܟܠܗܝܢ ܪ̈ܘܪܒܬܐ ܕܥܒܕ ܐܠܝܫܥ

99. Kings 2 8:5

    ܘܟܕ ܡܫܬܥܐ ܠܡܠܟܐ ܕܐܚܝ ܡܝܬܐ ܚܙܐ ܐܢܬܬܐ ܕܐܚܝ ܒܪܗ ܡܒܓܢܐ ܩܕܡ ܡܠܟܐ ܥܠ ܒܝܬܗ ܘܥܠ ܚܩܠܗ ܘܐܡܪ ܓܚܙܝ ܡܪܝ ܡܠܟܐ ܗܕܐ ܗܝ ܐܢܬܬܐ ܘܗܢܘ ܒܪܗ ܕܐܚܝ ܐܠܝܫܥ

100. Kings 2 8:6

     ܘܫܐܠܗ ܡܠܟܐ ܠܐܢܬܬܐ ܘܐܫܬܥܝܬ ܠܗ. ܘܩܪܐ ܡܠܟܐ ܠܡܗܝܡܢܐ ܚܕ ܘܐܡܪ ܠܗ ܦܢܐ ܠܗ ܟܠܡܕܡ ܕܐܝܬ ܠܗ ܘܟܠܗ ܥܠܠܬܐ ܕܚܩܠܗ ܡܢ ܝܘܡܐ ܕܫܒܩܬܗ ܠܐܪܥܐ ܘܥܕܡܐ ܠܗܫܐ

← Previous · Next → — showing 101–200 of 719

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.