← All works

Peshitta Kings 2

Peshitta (Syriac Old Testament) · 719 sections

1. Kings 2 1:1

   ܘܡܪܕ ܡܘܐܒ ܥܠ ܡܠܟܐ ܕܐܝܣܪܝܠ ܡܢ ܒܬܪ ܕܡܝܬ ܐܚܒ

2. Kings 2 1:2

   ܘܢܦܠ ܐܚܙܝܐ ܡܢ ܟܣܘܣܛܪܘܢ ܕܥܠܝܬܗ ܕܒܫܡܪܝܢ ܘܐܬܟܪܗ ܘܫܕܪ ܐܝ̈ܙܓܕܐ ܘܐܡܪ ܠܗܘܢ ܙܠܘ ܫܐܠܘ ܡܢ ܒܥܠܙܒܘܒ ܐܠܗܐ ܕܥܩܪܘܢ ܐܢ ܡܬܚܠܡ ܐܢܐ ܡܢ ܟܘܪܗܢܝ ܗܢܐ

3. Kings 2 1:3

   ܘܡܠܐܟܗ ܕܡܪܝܐ ܐܡܪ ܠܐܠܝܐ ܕܡܢ ܬܫܒܝ ܩܘܡ ܚܘܬ ܠܐܘܪܥܐ ܕܐܝ̈ܙܓܕܘܗܝ ܕܡܠܟܐ ܕܫܡܪܝܢ ܘܐܡܪ ܠܗܘܢ ܡܢ ܒܠܝ ܕܠܝܬ ܐܠܗܐ ܒܐܝܣܪܝܠ ܐܙܠܝܢ ܐܢܬܘܢ ܠܡܫܐܠ ܡܢ ܒܥܠܙܒܘܒ ܐܠܗܐ ܕܥܩܪܘܢ

4. Kings 2 1:4

   ܡܛܠ ܗܢܐ ܗܟܢܐ ܐܡܪ ܡܪܝܐ ܥܪܣܐ ܕܣܠܩܬ ܠܗ ܠܐ ܬܚܘܬ ܡܢܗ ܐܠܐ ܡܡܬ ܬܡܘܬ ܘܐܙܠ ܐܠܝܐ

5. Kings 2 1:5

   ܘܗܦܟܘ ܐܝ̈ܙܓܕܐ ܠܘܬ ܐܚܙܝܐ ܘܐܡܪ ܠܗܘܢ ܐܚܙܝܐ ܡܢܐ ܗܦܟܬܘܢ

6. Kings 2 1:6

   ܐܡܪܝܢ ܠܗ ܓܒܪܐ ܚܕ ܣܠܩ ܠܐܘܪܥܢ ܘܐܡܪ ܠܢ ܗܦܘܟܘ ܙܠܘ ܠܘܬ ܓܒܪܐ ܕܫܕܪܟܘܢ ܘܐܡܪܘ ܠܗ ܡܢ ܒܠܝ ܕܠܝܬ ܐܠܗܐ ܒܐܝܣܪܝܠ ܫܕܪܬ ܠܡܫܐܠ ܡܢ ܒܥܠܙܒܘܒ ܐܠܗܐ ܕܥܩܪܘܢ ܡܛܠ ܗܢܐ ܗܟܢܐ ܐܡܪ ܡܪܝܐ ܥܪܣܐ ܕܣܠܩܬ ܠܗ ܠܐ ܬܚܘܬ ܡܢܗ ܐܠܐ ܡܡܬ ܬܡܘܬ

7. Kings 2 1:7

   ܐܡܪ ܠܗܘܢ ܡܢܘ ܚܙܘܗ ܕܓܒܪܐ ܕܣܠܩ ܠܐܘܪܥܟܘܢ ܘܐܡܪ ܠܟܘܢ ܡ̈ܠܐ ܗܠܝܢ

8. Kings 2 1:8

   ܐܡܪܝܢ ܠܗ ܓܒܪܐ ܣܥܪ ܘܩܡܪܐ ܕܡܫܟܐ ܐܣܝܪ ܒܚ̈ܨܘܗܝ ܐܡܪ ܠܗܘܢ ܐܠܝܐ ܗܘ ܕܡܢ ܬܫܒܝ

9. Kings 2 1:9

   ܘܫܕܪ ܥܠܘܗܝ ܪܒܐ ܕܚܡܫܝܢ ܘܚܡܫܝܢ ܕܥܡܗ ܘܣܠܩܘ ܠܘܬܗ ܘܗܘ ܝܬܒ ܥܠ ܪܝܫ ܛܘܪܐ ܘܐܡܪ ܠܗ ܢܒܝܗ ܕܐܠܗܐ ܡܠܟܐ ܐܡܪ ܚܘܬ

10. Kings 2 1:10

    ܘܥܢܐ ܐܠܝܐ ܘܐܡܪ ܠܪܒܐ ܕܚܡܫܝܢ ܐܢ ܢܒܝܗ ܐܢܐ ܕܐܠܗܐ ܬܚܘܬ ܢܘܪܐ ܡܢ ܫܡܝܐ ܘܬܐܟܠܟ ܠܟ ܘܠܚܡܫܝܢ ܕܥܡܟ ܘܢܚܬܬ ܢܘܪܐ ܡܢ ܫܡܝܐ ܘܐܟܠܬܗ ܠܗ ܘܠܚܡܫܝܢ ܕܥܡܗ

11. Kings 2 1:11

    ܘܗܦܟ ܘܫܕܪ ܥܠܘܗܝ ܪܒܐ ܕܚܡܫܝܢ ܐܚܪ̈ܢܝܢ ܘܚܡܫܝܢ ܕܥܡܗ ܘܥܢܐ ܘܐܡܪ ܠܗ ܢܒܝܗ ܕܐܠܗܐ ܗܟܢܐ ܐܡܪ ܡܠܟܐ ܒܥܓܠ ܚܘܬ

12. Kings 2 1:12

    ܘܥܢܐ ܐܠܝܐ ܘܐܡܪ ܠܗ ܐܢ ܢܒܝܗ ܐܢܐ ܕܐܠܗܐ ܬܚܘܬ ܢܘܪܐ ܡܢ ܫܡܝܐ ܘܬܐܟܠܟ ܠܟ ܘܠܚܡܫܝܢ ܕܥܡܟ ܘܢܚܬܬ ܢܘܪܗ ܕܐܠܗܐ ܡܢ ܫܡܝܐ ܘܐܟܠܬܗ ܠܗ ܘܠܚܡܫܝܢ ܕܥܡܗ

13. Kings 2 1:13

    ܘܫܕܪ ܥܠܘܗܝ ܪܒܐ ܕܚܡܫܝܢ ܕܬܠܬ ܙܒ̈ܢܝܢ ܘܚܡܫܝܢ ܕܥܡܗ ܘܣܠܩ ܪܒܐ ܕܚܡܫܝܢ ܘܒܪܟ ܥܠ ܒܘܪ̈ܟܘܗܝ ܩܕܡ ܐܠܝܐ ܘܡܬܟܫܦ ܠܗ ܘܐܡܪ ܠܗ ܢܒܝܗ ܕܐܠܗܐ ܬܬܝܩܪ ܢܦܫܝ ܘܢܦܫܐ ܕܥܒ̈ܕܝܟ ܗܠܝܢ ܚܡܫܝܢ ܕܩܝܡܝܢ ܩܕܡܝܟ

14. Kings 2 1:14

    ܕܗܐ ܢܚܬܬ ܢܘܪܐ ܡܢ ܫܡܝܐ ܘܐܟܠܬ ܠܬܪ̈ܝܢ ܪ̈ܘܪܒܢܝܢ ܕܚܡܫܝܢ ܘܠܚܡܫܝܢ ܚܡܫܝܢ ܕܥܡܗܘܢ ܘܗܫܐ ܬܬܝܩܪ ܢܦܫܝ ܒܥܝܢ̈ܝܟ

15. Kings 2 1:15

    ܘܐܡܪ ܡܠܐܟܗ ܕܡܪܝܐ ܠܐܠܝܐ ܚܘܬ ܥܡܗ ܘܠܐ ܬܕܚܠ ܡܢܗ ܘܩܡ ܘܢܚܬ ܥܡܗ ܠܘܬ ܡܠܟܐ

16. Kings 2 1:16

    ܘܐܡܪ ܠܗ ܗܟܢܐ ܐܡܪ ܡܪܝܐ ܚܠܦ ܕܫܕܪܬ ܐܝ̈ܙܓܕܐ ܠܡܫܐܠ ܡܢ ܒܥܠܙܒܘܒ ܐܠܗܐ ܕܥܩܪܘܢ ܡܢ ܒܠܝ ܕܠܝܬ ܐܠܗܐ ܒܐܝܣܪܝܠ ܠܡܫܐܠ ܦܬܓܡܗ ܡܛܠ ܗܢܐ ܥܪܣܐ ܕܣܠܩܬ ܠܗ ܠܐ ܬܚܘܬ ܡܢܗ ܐܠܐ ܡܡܬ ܬܡܘܬ

17. Kings 2 1:17

    ܘܡܝܬ ܐܝܟ ܦܬܓܡܗ ܕܡܪܝܐ ܕܐܡܪ ܐܠܝܐ ܘܐܡܠܟ ܝܘܪܡ ܐܚܘܗܝ ܒܬܪܗ ܒܫܢܬ ܬܪ̈ܬܝܢ ܕܝܘܪܡ ܒܪ ܝܘܫܦܛ ܡܠܟܐ ܕܝܗܘܕܐ ܡܛܠ ܕܠܐ ܗܘܐ ܠܗ ܒܪܐ

18. Kings 2 1:18

    ܘܫܪܟܐ ܕܦܬ̈ܓܡܘܗܝ ܕܐܚܙܝܐ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

19. Kings 2 2:1

    ܘܗܘܐ ܕܟܕ ܡܣܩ ܡܪܝܐ ܠܐܠܝܐ ܒܥܠܥܠܐ ܠܫܡܝܐ ܘܐܙܠܘ ܐܠܝܐ ܘܐܠܝܫܥ ܡܢ ܓܠܓܠܐ

20. Kings 2 2:2

    ܘܐܡܪ ܐܠܝܐ ܠܐܠܝܫܥ ܟܬܪ ܠܝ ܗܪܟܐ ܡܛܠ ܕܡܪܝܐ ܫܕܪܢܝ ܠܒܝܬ ܐܝܠ ܘܐܡܪ ܐܠܝܫܥ ܚܝ ܗܘ ܡܪܝܐ ܘܚܝܐ ܗܝ ܢܦܫܟ ܕܠܐ ܐܫܒܩܟ ܘܢܚܬܘ ܠܒܝܬ ܐܝܠ

21. Kings 2 2:3

    ܘܢܦܩܘ ܒܢ̈ܝ ܢܒ̈ܝܐ ܕܒܝܬ ܐܝܠ ܠܘܬ ܐܠܝܫܥ ܘܐܡܪܝܢ ܠܗ ܠܐ ܝܕܥ ܐܢܬ ܕܝܘܡܢܐ ܢܣܒ ܡܪܝܐ ܠܡܪܟ ܡܢ ܪܝܫܟ ܘܐܡܪ ܐܦ ܐܢܐ ܝܕܥ ܐܢܐ ܫܬܘܩܘ

22. Kings 2 2:4

    ܘܐܡܪ ܐܠܝܐ ܠܐܠܝܫܥ ܟܬܪ ܠܝ ܗܪܟܐ ܡܛܠ ܕܡܪܝܐ ܫܕܪܢܝ ܠܐܝܪܝܚܘ ܘܐܡܪ ܚܝ ܗܘ ܡܪܝܐ ܘܚܝܐ ܗܝ ܢܦܫܟ ܕܠܐ ܐܫܒܩܟ ܘܐܙܠܘ ܠܐܝܪܝܚܘ

23. Kings 2 2:5

    ܘܩܪܒܘ ܒܢ̈ܝ ܢܒܝ̈ܐ ܕܒܐܝܪܝܚܘ ܠܘܬ ܐܠܝܫܥ ܘܐܡܪ̈ܝܢ ܠܗ ܝܕܥ ܐܢܬ ܕܝܘܡܢܐ ܢܣܒ ܡܪܝܐ ܠܡܪܟ ܡܢ ܪܝܫܟ ܘܐܡܪ ܐܦ ܐܢܐ ܝܕܥ ܐܢܐ ܫܬܘܩܘ

24. Kings 2 2:6

    ܘܐܡܪ ܐܠܝܐ ܠܐܠܝܫܥ ܟܬܪ ܠܝ ܗܪܟܐ ܡܛܠ ܕܡܪܝܐ ܫܕܪܢܝ ܠܝܘܪܕܢܢ ܘܐܡܪ ܚܝ ܗܘ ܡܪܝܐ ܘܚܝܐ ܗܝ ܢܦܫܟ ܕܠܐ ܐܫܒܩܟ ܘܐܙܠܘ ܬܪ̈ܝܗܘܢ

25. Kings 2 2:7

    ܘܚܡܫܝܢ ܓܒܪ̈ܝܢ ܡܢ ܒܢ̈ܝ ܢܒ̈ܝܐ ܐܙܠܘ ܘܩܡܘ ܡܢ ܩܒܘܠ ܡܢ ܪܘܚܩܐ ܘܬܪ̈ܝܗܘܢ ܩܡܘ ܥܠ ܣܦܬܗ ܕܝܘܪܕܢܢ

26. Kings 2 2:8

    ܘܢܣܒ ܐܠܝܐ ܡܥܦܪܗ ܘܟܪܟܗ ܘܡܚܐ ܐܢܘܢ ܠܡ̈ܝܐ ܕܝܘܪܕܢܢ ܘܐܬܦܠܓܘ ܦܠܓܐ ܠܟܐ ܘܦܠܓܐ ܠܟܐ ܘܥܒܪܘ ܬܪ̈ܝܗܘܢ ܒܝܒܫܐ

27. Kings 2 2:9

    ܘܟܕ ܥܒܪܘ ܐܡܪ ܐܠܝܐ ܠܐܠܝܫܥ ܫܐܠ ܡܢܐ ܐܥܒܕ ܠܟ ܥܕܠܐ ܐܬܕܒܪ ܡܢܟ ܘܐܡܪ ܐܠܝܫܥ ܢܗܘܐ ܚܕ ܬܪ̈ܝܢ ܒܪܘܚܟ ܥܠܝ

28. Kings 2 2:10

    ܘܐܡܪ ܐܣܓܝܬ ܫܐܠܬ ܐܢ ܬܚܙܝܢܝ ܟܕ ܡܬܕܒܪ ܐܢܐ ܡܢܟ ܢܗܘܐ ܠܟ ܗܟܢܐ ܘܐܢ ܠܐ ܠܐ ܢܗܘܐ

29. Kings 2 2:11

    ܘܗܘܐ ܕܟܕ ܗܢܘܢ ܡܡܠܠܝܢ ܘܡܗܠܟܝܢ ܘܗܐ ܡܪܟܒܬܐ ܕܢܘܪܐ ܘܪܟܫܐ ܕܢܘܪܐ. ܘܦܪܫܘ ܒܝܬ ܬܪ̈ܝܗܘܢ ܘܣܠܩ ܐܠܝܐ ܒܥܠܥܠܐ ܠܫܡܝܐ

30. Kings 2 2:12

    ܘܐܠܝܫܥ ܚܙܐ ܘܗܐ ܡܝܠܠ ܘܐܡܪ ܐܒܝ ܐܒܝ ܪܟܒܗ ܕܐܝܣܪܝܠ ܘܦܪ̈ܫܘܗܝ ܘܬܘܒ ܠܐ ܚܙܝܗܝ ܘܐܚܕ ܒ̈ܠܒܘܫܘܗܝ ܘܨܪܝ ܐܢܘܢ ܠܬܪ̈ܝܢ ܨܪ̈ܘܢ

31. Kings 2 2:13

    ܘܐܪܝܡ ܡܥܦܪܗ ܕܐܠܝܐ ܕܢܦܠ ܡܢܗ ܘܗܦܟ ܘܩܡ ܠܗ ܥܠ ܣܦܬܗ ܕܝܘܪܕܢܢ

32. Kings 2 2:14

    ܘܩܪܐ ܠܡܪܝܐ ܘܐܡܪ ܐܘܢ ܡܪܝܐ ܐܠܗܗ ܕܡܪܝ ܐܠܝܐ ܘܐܦ ܗܘ ܡܚܐ ܠܡ̈ܝܐ ܕܝܘܪܕܢܢ ܘܐܬܦܠܓܘ ܦܠܓܐ ܠܟܐ ܘܦܠܓܐ ܠܟܐ ܘܥܒܪ ܐܠܝܫܥ

33. Kings 2 2:15

    ܘܚܙܘ ܒܢ̈ܝ ܢܒܝ̈ܐ ܕܒܐܝܪܝܚܘ ܡܢ ܩܒܘܠ ܘܐܡܪܘ ܫܪܬ ܪܘܚܗ ܕܐܠܝܐ ܥܠ ܐܠܝܫܥ ܘܐܬܘ ܠܐܘܪܥܗ ܘܣܓܕܘ ܠܗ ܥܠ ܐܪܥܐ

34. Kings 2 2:16

    ܘܐܡܪܘ ܠܗ ܗܐ ܐܝܬ ܗܪܟܐ ܥܡ ܥܒ̈ܕܝܟ ܚܡܫܝܢ ܓܒܪ̈ܝܢ ܓܢܒܪ̈ܝ ܚܝܠܐ ܢܐܙܠܘܢ ܢܒܥܘܢܗ ܠܡܪܟ ܕܠܡܐ ܫܩܠܬܗ ܪܘܚܗ ܕܡܪܝܐ ܘܐܪܡܝܬܗ ܒܚܕ ܡܢ ܛܘܪ̈ܐ ܐܘ ܒܚܕ ܡܢ ܢܚ̈ܠܐ ܘܐܡܪ ܠܐ ܬܫܕܪܘܢ

35. Kings 2 2:17

    ܘܐܬܟܬܫܘ ܥܡܗ ܥܕܡܐ ܕܒܗܬ ܡܢܗܘܢ ܘܐܡܪ ܫܕܪܘ ܘܫܕܪܘ ܚܡܫܝܢ ܓܒܪ̈ܝܢ ܘܒܥܐܘܗܝ ܬܠܬܐ ܝܘܡ̈ܝܢ ܘܠܐ ܐܫܟܚܘܗܝ

36. Kings 2 2:18

    ܘܐܬܘ ܠܘܬܗ ܘܗܘ ܝܬܒ ܒܐܝܪܝܚܘ ܘܐܡܪ ܠܗܘܢ ܠܐ ܐܡܪܬ ܠܟܘܢ ܕܠܐ ܬܐܙܠܘܢ

37. Kings 2 2:19

    ܘܐܡܪܘ ܐܢܫ̈ܝ ܩܪܝܬܐ ܠܐܠܝܫܥ ܗܐ ܡܘܬܒܗ ܕܩܪܝܬܐ ܫܦܝܪ ܐܝܟ ܕܡܪܢ ܚܙܐ ܘܡ̈ܝܐ ܒܝܫܝܢ ܘܐܪܥܐ ܡܓܙܝܐ

38. Kings 2 2:20

    ܘܐܡܪ ܐܝܬܘ ܠܝ ܩܘܩܬܐ ܚܕܐ ܚܕܬܐ ܘܐܪܡܘ ܒܗ ܡܠܚܐ ܘܐܝܬܝܘ ܠܗ

39. Kings 2 2:21

    ܘܢܦܩ ܠܗ ܠܡܒܘܥܐ ܕܡ̈ܝܐ ܘܐܪܡܝ ܬܡܢ ܡܠܚܐ ܘܐܡܪ ܗܟܢܐ ܐܡܪ ܡܪܝܐ ܐܣܝܬ ܠܡ̈ܝܐ ܗܠܝܢ ܘܬܘܒ ܠܐ ܢܗܘܐ ܬܡܢ ܕܡܐܬ ܘܕܡܓܙܐ

40. Kings 2 2:22

    ܘܐܬܐܣܝܘ ܡ̈ܝܐ ܗܠܝܢ ܥܕܡܐ ܠܝܘܡܢܐ ܐܝܟ ܦܬܓܡܗ ܕܐܠܝܫܥ ܕܐܡܪ

41. Kings 2 2:23

    ܘܣܠܩ ܡܢ ܬܡܢ ܠܒܝܬ ܐܝܠ ܘܗܘ ܣܠܩ ܒܐܘܪܚܐ ܘܛ̈ܠܝܐ ܕܩ̈ܕܩܐ ܢܦܩܘ ܡܢ ܩܪܝܬܐ ܘܡܒܙܚܝܢ ܒܗ ܘܐܡܪܝܢ ܣܩ ܩܪܚܐ ܣܩ ܩܪܚܐ

42. Kings 2 2:24

    ܘܐܬܦܢܝ ܠܒܣܬܪܗ ܘܚܙܐ ܐܢܘܢ ܘܠܛ ܐܢܘܢ ܒܫܡܗ ܕܡܪܝܐ ܘܢܦܩ ܬܪ̈ܬܝܢ ܕܒܝܢ ܡܢ ܥܒܐ ܘܦܪܬ ܡܢܗܘܢ ܐܪܒܥܝܢ ܘܬܪ̈ܝܢ ܛܠܝܝܢ

43. Kings 2 2:25

    ܘܐܙܠ ܡܢ ܬܡܢ ܠܛܘܪܐ ܕܟܪܡܠܐ ܘܡܢ ܬܡܢ ܬܘܒ ܠܫܡܪܝܢ

44. Kings 2 3:1

    ܘܝܘܪܡ ܒܪ ܐܚܒ ܐܡܠܟ ܥܠ ܐܝܣܪܝܠ ܒܫܡܪܝܢ ܒܫܢܬ ܬܡܢܥܣܪܐ ܠܝܘܫܦܛ ܡܠܟܐ ܕܝܗܘܕܐ ܘܐܡܠܟ ܬܪܬܥܣܪ̈ܐ ܫܢܝ̈ܢ

45. Kings 2 3:2

    ܘܥܒܕ ܕܒܝܫ ܩܕܡ ܡܪܝܐ ܒܪܡ ܠܐ ܐܝܟ ܐܒܘܗܝ ܘܐܝܟ ܐܡܗ ܘܐܥܒܪ ܩܝܡܬܐ ܕܒܥܠܐ ܕܥܒܕ ܐܒܘܗܝ

46. Kings 2 3:3

    ܒܠܚܘܕ ܒܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ ܐܬܕܒܩ ܘܠܐ ܣܛܐ ܡܢܗܘܢ

47. Kings 2 3:4

    ܘܡܝܫܥ ܡܠܟܐ ܕܡܘܐܒ ܢܩܕܐ ܗܘܐ ܘܡܣܩ ܗܘܐ ܠܡܠܟܐ ܕܐܝܣܪܝܠ ܡܐܐ ܐ̈ܠܦܝܢ ܫܡܝ̈ܢܐ ܕܥ̈ܢܐ ܘܡܐܐ ܐ̈ܠܦܝܢ ܕܟܪ̈ܐ ܕܥܡܪܐ

48. Kings 2 3:5

    ܘܡܢ ܒܬܪ ܕܡܝܬ ܐܚܒ ܡܪܕ ܡܠܟܐ ܕܡܘܐܒ ܥܠ ܡܠܟܐ ܕܐܝܣܪܝܠ

49. Kings 2 3:6

    ܘܢܦܩ ܡܠܟܐ ܝܘܪܡ ܒܝܘܡܐ ܗܘ ܡܢ ܫܡܪܝܢ ܘܡܢܐ ܠܟܠܗ ܐܝܣܪܝܠ

50. Kings 2 3:7

    ܘܫܕܪ ܠܘܬ ܝܘܫܦܛ ܡܠܟܐ ܕܝܗܘܕܐ ܘܐܡܪ ܡܠܟܐ ܕܡܘܐܒ ܡܪܕ ܥܠܝ ܬܐ ܥܡܝ ܢܐܙܠ ܠܩܪܒܐ ܥܠ ܡܘܐܒ ܘܐܡܪ ܠܗ ܝܘܫܦܛ ܣܠܩ ܐܢܐ ܐܟܘܬܟ ܘܥܡܝ ܐܝܟ ܥܡܟ ܘܪܟܫܝ ܐܝܟ ܪܟܫܟ

51. Kings 2 3:8

    ܘܐܡܪ ܠܗ ܒܐܝܕܐ ܐܘܪܚܐ ܢܣܩ ܘܐܡܪ ܒܐܘܪܚܐ ܕܡܕܒܪܐ ܕܐܕܘܡ

52. Kings 2 3:9

    ܘܐܙܠ ܡܠܟܐ ܕܐܝܣܪܝܠ ܘܡܠܟܐ ܕܝܗܘܕܐ ܘܡܠܟܐ ܕܐܕܘܡ ܘܐܬܟܪܟܘ ܡܪܕܐ ܫܒܥܐ ܝܘܡ̈ܝܢ ܘܠܝܬ ܗܘܘ ܡ̈ܝܐ ܠܡܫܪܝܬܐ ܘܠܥܡܐ ܕܥܡܗܘܢ

53. Kings 2 3:10

    ܘܐܡܪ ܡܠܟܐ ܕܝܣܪܝܠ ܐܘܗ ܥܠ ܗܕܐ ܟܝ ܩܪܐ ܡܪܝܐ ܠܬܠܬܐ ܡ̈ܠܟܝܢ ܗܠܝܢ ܕܢܫܠܡ ܐܢܘܢ ܒܐܝܕܐ ܕܡܘܐܒ

54. Kings 2 3:11

    ܘܐܡܪ ܝܘܫܦܛ ܠܝܬ ܗܪܟܐ ܢܒܝܐ ܕܡܪܝܐ ܕܢܫܐܠ ܦܬܓܡܗ ܕܡܪܝܐ ܡܢܗ ܘܥܢܐ ܚܕ ܡܢ ܥܒ̈ܕܘܗܝ ܕܡܠܟܐ ܕܐܝܣܪܝܠ ܘܐܡܪ ܐܝܬ ܗܪܟܐ ܐܠܝܫܥ ܒܪ ܫܦܛ ܕܢܣܟ ܗܘܐ ܡ̈ܝܐ ܥܠ ܐ̈ܝܕܘܗܝ ܕܐܠܝܐ

55. Kings 2 3:12

    ܘܐܡܪ ܝܘܫܦܛ ܐܝܬ ܗܘ ܥܡܗ ܦܬܓܡܗ ܕܡܪܝܐ ܘܢܚܬܘ ܠܘܬܗ ܡܠܟܐ ܕܐܝܣܪܝܠ ܘܡܠܟܐ ܕܝܗܘܕܐ ܘܡܠܟܐ ܕܐܕܘܡ

56. Kings 2 3:13

    ܘܐܡܪ ܐܠܝܫܥ ܠܡܠܟܐ ܕܐܝܣܪܝܠ ܡܐ ܠܝ ܘܠܟ ܙܠ ܠܘܬ ܢܒܝ̈ܘܗܝ ܕܐܒܘܟ ܘܠܘܬ ܢܒܝ̈ܝܗ ܕܐܡܟ ܐܡܪ ܠܗ ܡܠܟܐ ܕܐܝܣܪܝܠ ܥܠ ܗܕܐ ܟܝ ܩܪܐ ܡܪܝܐ ܠܬܠܬܐ ܡ̈ܠܟܝܢ ܗܠܝܢ ܕܢܫܠܡ ܐܢܘܢ ܒܐܝܕܐ ܕܡܘܐܒ

57. Kings 2 3:14

    ܘܐܡܪ ܐܠܝܫܥ ܚܝ ܗܘ ܡܪܝܐ ܚܝܠܬܢܐ ܕܩܡܬ ܩܕܡܘܗܝ ܐܠܘ ܠܐ ܡܢ ܐ̈ܦܘܗܝ ܕܝܘܫܦܛ ܡܠܟܐ ܕܝܗܘܕܐ ܡܬܚܡܨ ܐܢܐ ܐܢ ܐܕܝܩܬ ܠܘܬܟ ܘܐܢ ܚܙܝܬܟ

58. Kings 2 3:15

    ܘܗܫܐ ܐܝܬܘ ܠܝ ܢܩܘܫܐ ܘܗܘܐ ܕܟܕ ܢܩܫ ܢܩܘܫܐ ܗܘܬ ܥܠܘܗܝ ܐܝܕܗ ܕܡܪܝܐ

59. Kings 2 3:16

    ܘܐܡܪ ܢܬܥܒܕ ܢܚܠܐ ܗܢܐ ܓܘ̈ܒܝܢ ܓܘܒ̈ܝܢ

60. Kings 2 3:17

    ܡܛܘܠ ܕܗܟܢܐ ܐܡܪ ܡܪܝܐ ܠܐ ܬܚܙܘܢ ܪܘܚܐ ܘܠܐ ܡܛܪܐ ܘܢܚܠܐ ܗܢܐ ܢܬܡܠܐ ܡ̈ܝܐ ܘܐܫܬܘ ܐܢܬܘܢ ܘܒܥܝܪܟܘܢ

61. Kings 2 3:18

    ܘܒܨܝܪܐ ܗܝ ܗܕܐ ܒܥܝܢ̈ܝ ܡܪܝܐ ܘܢܫܠܡ ܠܡܘ̈ܐܒܝܐ ܒܐ̈ܝܕܝܟܘܢ

62. Kings 2 3:19

    ܘܬܚܪܒܘܢ ܟܘܠ ܩܘܪ̈ܝܐ ܥܫܝܢ̈ܬܐ ܘܟܠ ܩܘܪ̈ܝܐ ܕܓܒܝ̈ܢ ܘܟܠ ܐܝ̈ܠܢܐ ܕܫܦܝܪܝܢ ܬܪܡܘܢ ܘܟܠ ܡܒ̈ܘܥܐ ܕܡ̈ܝܐ ܬܛܡܡܘܢ ܘܟܠ ܝܪܬܘܬܐ ܕܫܦܝܪܐ ܬܡܠܘܢܗ ܟܐ̈ܦܐ

63. Kings 2 3:20

    ܘܗܘܐ ܒܨܦܪܐ ܟܕ ܣܠܩ ܩܘܪܒܢܐ ܘܗܐ ܡ̈ܝܐ ܐܬܝܢ ܡܢ ܐܘܪܚܐ ܕܐܕܘܡ ܘܐܬܡܠܝܬ ܐܪܥܐ ܡ̈ܝܐ

64. Kings 2 3:21

    ܘܟܠܗܘܢ ܡܘܐ̈ܒܝܐ ܚܙܘ ܕܣܠܩܘ ܡ̈ܠܟܐ ܠܡܬܟܬܫܘ ܥܡܗܘܢ ܘܐܟܪܙܘ ܡܢ ܟܘܠ ܐܣܪ ܣܝܦܐ ܘܠܥܠ ܘܩܡܘ ܥܠ ܬܚܘܡܐ

65. Kings 2 3:22

    ܘܩܕܡܘ ܒܨܦܪܐ ܘܫܡܫܐ ܕܢܚ ܥܠ ܡ̈ܝܐ ܘܚܙܘ ܡܘܐ̈ܒܝܐ ܡܢ ܩܒܘܠ ܠܡ̈ܝܐ ܕܣܘܡܩܝܢ ܐܝܟ ܕܡܐ

66. Kings 2 3:23

    ܘܐܡܪܘ ܕܡܐ ܗܘ ܗܢܐ ܡܬܚܪܒܘ ܐܬܚܪܒܘ ܡ̈ܠܟܐ ܘܩܛܠܘ ܓܒܪ ܚܒܪܗ ܡܟܝܠ ܠܒܙܬܐ ܡܘܐܒ

67. Kings 2 3:24

    ܘܐܬܘ ܠܡܫܪܝܬܐ ܕܐܝܣܪܝܠ ܘܩܡܘ ܒܢ̈ܝ ܐܝܣܪܝܠ ܘܚܪܒܘ ܠܡܘܐ̈ܒܝܐ ܘܥܪܩܘ ܡܢ ܩܕܡܝܗܘܢ ܘܥܠܘ ܒܗܘܢ ܘܚܪܒܘܗܝ ܠܡܘܐܒ

68. Kings 2 3:25

    ܘܩܘܪ̈ܝܐ ܣܚܦܘ ܘܟܠ ܝܪܬܘܬܐ ܕܫܦܝܪܐ ܫܕܘ ܓܒܪ ܟܐܦܗ ܘܡܠܐܘܗ ܘܟܠ ܡ̈ܥܝܢܐ ܕܡ̈ܝܐ ܛܡܡܘ ܘܟܠ ܐܝ̈ܠܢܐ ܕܫܦܝܪܝܢ ܐܪܡܝܘ ܥܕܡܐ ܕܐܫܬܒܩ ܟܐ̈ܦܐ ܒܐܣܬܐ ܟܕ ܡܣܚ̈ܦܢ ܘܐܬܟܪܟܘܗ ܕܫܕܝܢ ܒܩ̈ܠܥܐ ܘܚܪܒܘܗ

69. Kings 2 3:26

    ܘܚܙܐ ܡܠܟܐ ܕܡܘܐܒ ܕܥܫܢ ܠܗ ܡܢܗ ܩܪܒܐ ܘܕܒܪ ܥܡܗ ܫܒܥܡܐܐ ܓܒܪ̈ܝܢ ܫܡܛܝ ܣܝܦܐ ܕܢܬܦܠܛ ܠܘܬ ܡܠܟܐ ܕܐܕܘܡ ܘܠܐ ܐܫܟܚ

70. Kings 2 3:27

    ܘܢܣܒ ܠܒܪܗ ܒܘܟܪܗ ܕܗܘ ܡܡܠܟ ܒܬܪܗ ܘܐܣܩܗ ܥܠܬܐ ܥܠ ܫܘܪܐ ܘܗܘܐ ܪܘܓܙܐ ܪܒܐ ܥܠ ܐܝܣܪܝܠ ܘܫܩܠܘ ܡܢܗ ܘܗܦܟܘ ܠܐܬܪܗܘܢ

71. Kings 2 4:1

    ܘܐܢܬܬܐ ܚܕܐ ܡܢ ܢܫ̈ܝ ܒܢ̈ܝ ܢܒ̈ܝܐ ܡܙܥܩܐ ܩܕܡ ܐܠܝܫܥ ܘܐܡܪܐ ܥܒܕܟ ܒܥܠܝ ܡܝܬ ܘܐܢܬ ܝܕܥ ܐܢܬ ܕܥܒܕܟ ܕܚܠ ܗܘܐ ܡܢ ܡܪܝܐ ܘܡܪܐ ܚܘܒܐ ܐܬܐ ܠܡܕܒܪ ܬܪ̈ܝܢ ܒܢ̈ܝ ܠܗ ܥܒ̈ܕܐ

72. Kings 2 4:2

    ܘܐܡܪ ܠܗ ܐܠܝܫܥ ܡܢܐ ܐܥܒܕ ܠܟܝ ܚܘܐܝܢܝ ܡܢܐ ܐܝܬ ܠܟܝ ܒܒܝܬܐ ܘܐܡܪܬ ܠܝܬ ܠܐܡܬܟ ܡܕܡ ܒܒܝܬܐ ܐܠܐ ܐܢ ܡܣܪܘܚܝܬܐ ܕܡܫܚܐ

73. Kings 2 4:3

    ܘܐܡܪ ܠܗ ܙܠܝ ܫܐܠܝ ܠܟܝ ܡܐ̈ܢܐ ܡܢ ܫܘܩܐ ܡܢ ܟܠܗܘܢ ܫܒ̈ܒܝܟܝ ܡܐ̈ܢܐ ܣܦܝ̈ܩܐ ܠܐ ܬܙܥܪܝܢ

74. Kings 2 4:4

    ܘܥܘܠܝ ܘܐܚܘܕܝ ܬܪܥܐ ܒܐ̈ܦܝܟܝ ܘܒܐ̈ܦܝ ܒܢܝ̈ܟܝ ܘܣܘܟܝ ܒܗܠܝܢ ܟܠܗܘܢ ܡܐ̈ܢܐ ܡ̈ܝܐ ܘܡܐܢܐ ܕܡܠܐ ܐܣܩܝ ܠܝ

75. Kings 2 4:5

    ܘܐܙܠܬ ܡܢ ܠܘܬܗ ܘܥܠܬ ܘܐܚܕܬ ܬܪܥܐ ܒܐ̈ܦܝܗ ܘܒܐ̈ܦܝ ܒܢܝ̈ܗ ܗܢܘܢ ܡܩܪܒܝܢ ܠܗ ܘܗܝ ܢܣܟܐ

76. Kings 2 4:6

    ܘܟܕ ܫܠܡܘ ܡܐ̈ܢܐ ܐܡܪܐ ܠܒܪܗ ܩܪܒ ܠܝ ܬܘܒ ܡܐ̈ܢܐ ܐܡܪ ܠܗ ܒܪܗ ܠܝܬ ܬܘܒ ܡܐ̈ܢܐ ܘܩܡ ܠܗ ܡܫܚܐ

77. Kings 2 4:7

    ܘܐܬܬ ܚܘܝܬ ܠܢܒܝܗ ܕܐܠܗܐ ܘܐܡܪ ܠܗ ܙܠܝ ܙܒ̇ܢܝ ܡܫܚܐ ܘܦܪܘܥܝ ܚܘܒܬܟܝ ܘܐܢܬܝ ܘܒܢܝ̈ܟܝ ܚܝܝ ܡܢ ܡܕܡ ܕܝܬܪ

78. Kings 2 4:8

    ܘܗܘܐ ܡܢ ܒܬܪ ܝܘܡܐ ܘܐܬܐ ܐܠܝܫܥ ܘܥܒܪ ܠܫܝܠܘ ܘܬܡܢ ܐܝܬ ܗܘܬ ܐܢܬܬܐ ܪܒܬܐ ܘܐܚܕܬܗ ܕܢܐܟܘܠ ܠܚܡܐ ܘܡܐ ܕܥܒܪ ܣܛܐ ܠܬܡܢ ܠܡܐܟܠ ܠܚܡܐ

79. Kings 2 4:9

    ܘܐܡܪܬ ܠܒܥܠܗ ܗܐ ܝܕܥܐ ܐܢܐ ܕܢܒܝܗ ܕܐܠܗܐ ܩܕܝܫ ܗܘ ܘܥܒܪ ܥܠܝܢ ܐܡܝܢܐܝܬ

80. Kings 2 4:10

    ܢܬܩܢ ܠܗ ܥܠܝܬܐ ܙܥܘܪܬܐ ܘܢܪܡܐ ܠܗ ܬܡܢ ܥܪܣܐ ܘܦܬܘܪܐ ܘܟܘܪܣܝܐ ܘܡܢܪܬܐ ܘܡܐ ܕܐܬܐ ܠܘܬܢ ܢܣܛܐ ܠܬܡܢ

81. Kings 2 4:11

    ܘܗܘܐ ܝܘܡܐ ܘܐܬܐ ܠܬܡܢ ܘܣܛܐ ܠܥܠܝܬܐ ܘܕܡܟ ܬܡܢ

82. Kings 2 4:12

    ܘܐܡܪ ܠܓܚܙܝ ܬܠܡܝܕܗ ܩܪܝܗ ܠܫܝܠܘܡܝܬܐ ܗܕܐ ܘܩܪܗ ܘܩܡܬ ܩܕܡܘܗܝ

83. Kings 2 4:13

    ܘܐܡܪ ܠܗ ܗܐ ܐܢܬܝ ܕܚܠܬܝ ܡܢܢ ܗܕܐ ܟܠܗ ܕܚܠܬܐ ܡܢܐ ܘܠ̇ܐ ܠܡܥܒܕ ܠܟܝ ܡܕܡ ܐܝܬ ܠܡܐܡܪ ܥܠܝܟܝ ܠܡܠܟܐ ܐܘ ܠܪܒ ܚܝܠܐ ܘܐܡܪܬ ܫܦܝܪ ܒܓܘ ܥܡܝ ܝܬܒܐ ܐܢܐ

84. Kings 2 4:14

    ܘܐܡܪ ܡܢܐ ܐܥܒܕ ܠܗ ܐܡܪ ܠܗ ܓܚܙܝ ܫܪܝܪܐܝܬ ܒܪܐ ܠܝܬ ܠܗ ܘܒܥܠܗ ܣܐܒ

85. Kings 2 4:15

    ܘܐܡܪ ܩܪܝܗ ܘܩܪܗ ܘܩܡܬ ܒܬܪܥܐ

86. Kings 2 4:16

    ܘܐܡܪ ܠܗ ܠܙܒܢܐ ܗܢܐ ܟܕ ܐܢܬܝ ܚܝܐ ܥܦܩܐ ܐܢܬܝ ܒܪܐ ܘܐܡܪܬ ܠܐ ܡܪܝ ܢܒܝܗ ܕܐܠܗܐ ܠܐ ܬܟܕܒ ܒܐܡܬܟ

87. Kings 2 4:17

    ܘܒܛܢܬ ܐܢܬܬܐ ܘܝܠܕܬ ܒܪܐ ܠܙܒܢܐ ܗܢܐ ܟܕ ܗܝ ܚܝܐ ܐܝܟ ܕܐܡܪ ܠܗ ܐܠܝܫܥ

88. Kings 2 4:18

    ܘܪܒܐ ܛܠܝܐ ܘܗܘܐ ܝܘܡܐ ܘܢܦܩ ܠܘܬ ܐܒܘܗܝ ܠܘܬ ܚ̈ܨܘܕܐ

89. Kings 2 4:19

    ܘܐܡܪ ܠܐܒܘܗܝ ܪܝܫܝ ܪܝܫܝ ܘܐܡܪ ܠܛܠܝܐ ܫܩܘܠ ܐܘܒܠܝܗܝ ܠܐܡܗ

90. Kings 2 4:20

    ܘܫܩܠ ܛܠܝܐ ܐܘܒܠܗ ܠܐܡܗ ܘܝܬܒ ܥܠ ܒܘܪ̈ܟܝܗ ܥܕܡܐ ܠܛܗܪܐ ܘܡܝܬ

91. Kings 2 4:21

    ܘܐܣܩܬ ܐܪܡܝܬܗ ܒܥܪܣܐ ܕܢܒܝܗ ܕܐܠܗܐ ܘܐܚܕܬ ܒܐ̈ܦܘܗܝ ܘܢܦܩܬ

92. Kings 2 4:22

    ܘܩܪܬ ܠܒܥܠܗ ܘܐܡܪܬ ܫܕܪ ܠܝ ܚܕ ܡܢ ܛ̈ܠܝܐ ܘܚܕܐ ܐܬܢܐ ܐܡܛܐ ܥܕܡܐ ܠܢܒܝܗ ܕܐܠܗܐ

93. Kings 2 4:23

    ܐܡܪ ܠܗ ܡܢܐ ܐܙܠܐ ܐܢܬܝ ܠܘܬܗ ܝܘܡܢܐ ܕܠܐ ܪܝܫ ܝܪܚܐ ܘܠܐ ܫܒܬܐ ܘܐܡܪܬ ܫܝܠܘܡܝܬܐ

94. Kings 2 4:24

    ܘܐܪܡܝܘ ܠܗ ܥܠ ܐܬܢܐ ܘܐܡܪܬ ܠܛܠܝܐ ܕܒܪ ܘܙܠ ܠܐ ܬܟܠܐ ܠܝ ܠܡܬܒ ܐܠܐ ܐܢ ܐܡܪܬ ܠܟ

95. Kings 2 4:25

    ܘܐܙܠܬ ܠܘܬ ܢܒܝܗ ܕܐܠܗܐ ܠܛܘܪܐ ܕܟܪܡܠܐ ܘܟܕ ܚܙܗ ܢܒܝܗ ܕܐܠܗܐ ܡܢ ܩܒܘܠ ܐܡܪ ܠܓܚܙܝ ܬܠܡܝܕܗ ܗܐ ܫܝܠܘܡܝܬܐ ܗܕܐ

96. Kings 2 4:26

    ܗܫܐ ܗܪܛ ܠܐܘܪܥܗ ܘܐܡܪ ܠܗ ܫܠܡ ܠܟܝ ܘܫܠܡ ܠܒܥܠܟܝ ܘܫܠܡ ܠܛܠܝܐ ܘܐܡܪܬ ܫܠܡ

97. Kings 2 4:27

    ܘܐܬܬ ܠܘܬ ܢܒܝܗ ܕܐܠܗܐ ܠܛܘܪܐ ܕܟܪܡܠܐ ܘܐܚܕܬ ܒܪ̈ܓܠܘܗܝ ܘܩܪܒ ܓܚܙܝ ܠܡܦܪܩܘܬܗ ܘܐܡܪ ܠܗ ܢܒܝܗ ܕܐܠܗܐ ܫܒܘܩ ܠܗ ܡܛܠ ܕܢܦܫܗ ܡܪܝܪܐ ܠܗ ܘܡܪܝܐ ܟܣܝ ܡܢܝ ܘܠܐ ܚܘܝܢܝ

98. Kings 2 4:28

    ܘܐܡܪܬ ܫܐܠܬ ܒܪܐ ܡܢ ܡܪܝ ܠܐ ܐܡܪܬ ܠܟ ܕܠܐ ܬܫܐܠ ܠܝ

99. Kings 2 4:29

    ܘܐܡܪ ܠܓܚܙܝ ܐܣܘܪ ܚܨ̈ܝܟ ܘܣܒ ܚܘܛܪܝ ܒܐܝܕܟ ܘܙܠ ܐܢ ܬܫܟܚ ܓܒܪܐ ܠܐ ܬܒܪܟܝܘܗܝ ܘܐܢ ܢܒܪܟܟ ܓܒܪܐ ܠܐ ܬܥܢܝܘܗܝ ܘܣܝܡ ܚܘܛܪܝ ܥܠ ܐ̈ܦܘܗܝ ܕܛܠܝܐ

100. Kings 2 4:30

     ܘܐܡܪܬ ܐܡܗ ܕܛܠܝܐ ܚܝ ܗܘ ܡܪܝܐ ܘܚܝܐ ܗܝ ܢܦܫܟ ܕܠܐ ܐܫܒܩܟ ܘܩܡ ܘܐܙܠ ܒܬܪܗ

Next → — showing 1–100 of 719

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.