← All works

Peshitta Judith

Peshitta (Syriac Old Testament) · 341 sections

1. Judith 14:18

   ܛܠܡ̣ܘ ܥ̣̈ܒܕܐ ܡܪ̈ܝܗܘܢ. ܘܥܒܕܬ ܒܗܬܬܐ ܗܕܐ ܐܢܬܬܐ ܚܕܐ ܡܢ ܥܒܪ̈ܝܐ̇. ܒܒܝܬܗ ܕܢܒܘ ܟܕܢܨ̇ܪ. ܡܛܠ ܕܗܐ ܐܠܦܪܢܐ ܪܡ̣ܐ ܥܠ ܐܪܥܐ̣. ܘܪܫܗ̣̇ ܫܩܝܠ ܡܢܗ

2. Judith 14:19

   ܘܟܕ ܫܡ̣ܥܘ ܡ̈ܠܘܗܝ ܪ̈ܒܝ ܚܝܠܐ ܕܐܬܘܪ. ܨ̇ܪܝܘ ܟܘܬܝ̈ܢܝܬܗܘܢ. ܘܐܬܕ̣ܠܚܬ ܢܦܫܗܘܢ ܛܒ ܒܓܘ ܡܫܪܝܬܐ

3. Judith 15:1

   ܘܟܕ ܫܡܥܘ ܐܝܠܝܢ ܕܒܡܫ̈ܟܢܐ̣ ܐܬܕܡܪܘ ܕܡܢܐ ܟܝ ܗ̣ܘܐ

4. Judith 15:2

   ܘܢܦ̣ܠܬ ܥܠܝܗܘܢ ܕܚܠܬܐ̣ ܘܪܬܝܬܐ. ܘܠܐ ܟܬܪܘ ܐܢܫ ܠܘܬ ܩܪܝܒܗ. ܐܠܐ ܐܬܗܦܟܘ ܘܥ̣ܪܩܘ ܐܟܚܕܐ. ܠܟܠ ܐܘܪ̈ܚܢ ܒܦܩܥ̈ܬܐ̣ ܘܒܛܘ̣ܪ̈ܐ

5. Judith 15:3

   ܘܐܝܠܝܢ ܕܫܪܝܢ ܗܘܘ ܒܛܘ̣ܪ̈ܐ ܘܟܪܝܟܝܢ ܣ̇ܡܘ ܠܡܥ̣ܪܩ. ܘܗܝܕܝܢ ܒ̈ܢܝ ܐܝܣܪܐܝܠ ܣ̇ܡ̇ܘ ܥܠܝܗܘܢ. ܟܠܗܘܢ ܓܒܪ̈ܐ ܩܪ̈ܒܬܢܐ̣. ܘܐܬܢܟܣܘ ܥܠܝܗܘܢ

6. Judith 15:4

   ܘܫܕܪ ܥܘܙܝܐ̣ ܠܟܠܗܘܢ ܬܚܘܡ̈ܐ ܕܐܝܣܪܝܠ. ܕܢܘܕܥܘܢ ܐܢܘܢ ܥܠ ܡܐ ܕܓ̣ܕܫ. ܘܢܦܩܘܢ ܟܠܗܘܢ̇ ܥܠ ܒܥܠܕ̈ܒܒܐ ܘܢܚܪܒܘܢ ܐܢܘܢ̇

7. Judith 15:5

   ܘܟܕ ܫܡ̣ܥܘ ܒ̈ܢܝ ܐܝܣܪܝܠ ܟܠܗܘܢ ܐܟܚܕܐ̣. ܢܦ̣ܠܘ ܥܠܝܗܘܢ. ܘܡܩܛܠܝܢ ܗܘܘ ܒܗܘܢ ܥܕܡܐ ܠܚܘܒܐ. ܗܟܘܬ̇ ܒ̈ܢܝ ܐܪܫܠܡ ܕܐܬܘ̣ ܡܢ ܟܠ ܛܘ̣ܪ̈ܝܢ. ܡܛܠ ܕܐܫܬܡܥܘ ܠܗܘܢ ܟܠ ܡܐ ܕܐܬܥ̇ܒܕ ܠܡܫܪܝܬܐ ܕܒܥܠܕܒ̈ܒܝܗܘܢ. ܘܐܝܠܝܢ ܕܒܓܠܥܕ ܘܒܓܠܝܠܐ ܢܦܩ̣ܘ ܥܠܝܗܘܢ ܘܡܚܘ ܐܢܘܢ. ܡܚܘܬܐ ܪܒܬܐ ܥܕܡܐ ܕܥ̣ܒܪܘ ܕܪܡܣܘܩ ܘܬܚ̈ܘܡܝܗ̇

8. Judith 15:6

   ܘܫܪܟܐ ܕܥܡܘܪ̈ܝܗ̇ ܕܒܝܬ ܦܠܘ̣. ܢܦܠ̣ܘ ܥܠ ܡܫܪ̈ܝܬܐ ܕܐܬܘܪ̣. ܘܒܙܘ ܘܫܒܘ ܘܥܬܪܘ ܛܒ

9. Judith 15:7

   ܘܗܦܟܘ ܒ̈ܢܝ ܐܝܣܪܝܠ ܡܢ ܩܪܒܐ̣. ܘܐܫܬܠܛܘ ܒܫܪܟ̣ܐ ܕܡܕ̈ܝܢܬܐ ܕܒܛܘܪ̈ܐ ܘܒܦܩܥܬܐ̣. ܘܢܣ̣ܒܘ ܒܙܬܐ ܣܓܝܐܬܐ

10. Judith 15:8

    ܘܐܬ̣ܐ ܝܘܝܩܝܡ ܟܗܢܐ ܪܒܐ. ܘܣ̈ܒܐ ܕܐܝܣܪܐܝܠ ܐܝܠܝܢ ܕܥ̇ܡܪܝܢ ܒܐܪܫܠܡ ܠܡܡܠܠܘ ܫ̇ܠܡܐ ܥܡ ܝܗܘܕܝܬ

11. Judith 15:9

    ܘܟܕ ܢܦܩ̣ܬ ܠܘܬܗܘܢ ܟܪܟܘܗ̇ ܟܠܗ̇ܘܢ ܐܟܚܕܐ̣̇. ܘܐܡܪܘ. ܐܢܬܝ ܗܝ ܪܘܡܗ̇ ܕܐܪܫ̇ܠܡ. ܘܫܘܒܗܪܗ ܕܐܝܣܪܝܠ. ܘܬܫܒܘܚܬܗ ܕܥܡܢ

12. Judith 15:10

    ܕܥܒܕܬܝ ܗܠܝܢ ܟܠܗܝܢ ܒܐܝܕ̈ܝܟܝ. ܘܥܒܕܬܝ ܛ̇ܒ̈ܬܐ ܥܡ ܐܝܣܪܐܝܠ. ܘܐܨܛܒܝ ܒܗܘܢ ܡܪܝܐ. ܘܬܗܘܝܢ ܒܪܝܟܐ ܠܡܪܝܐ. ܚܝܠܬܢܐ ܠܥܠܡ ܥܠܡܝܢ. ܘܐܡ̣ܪܘ ܟܠܗ ܥܡܐ̇ ܐܡܝܢ

13. Judith 15:11

    ܘܗܘܘ ܡܥܒܪܝܢ ܥܡܐ ܡܫܪ̈ܝܬܗܘܢ. ܕܐܬܘܪ̈ܝܐ ܥܕܡܐ ܠܬܠܬܐ ܝܘܡ̈ܝܢ. ܘܝܗܒ̣ܘ ܠܝܗܘܕܝܬ ܡܫܟܢܗ ܕܐܠܦܪܢܐ. ܘܟܠܗܘܢ ܡ̈ܐܢܝ ܡܫܟܢܗ. ܘܥܪܣܗ ܘܒܥܝܪܗ ܘܡܐ̈ܢܘܗܝ. ܘܢܣܒ̣ܬ ܘܣܡ̣ܬ ܐܢܘܢ ܥܠ ܟܘܕܢ̈ܘܬܐ ܘܟ̣ܕܢܬ ܥܓܠܬܗ̣̇. ܘܣܡ̣ܬ ܐܢܘܢ ܒܗܝܢ

14. Judith 15:12

    ܘܪܗܛ ܠܘܬܗ̇ ܟܠܗܝܢ. ܢܫ̈ܐ ܕܐܝܣܪܝܠ. ܘܟܪܟܗ̇. ܘܓܒ̈ܝ ܡܢܗܝܢ ܟܢܫ̈ܐ ܕܡܫܒܚܢܝ̈ܬܐ̣. ܘܢܣ̣ܒܬ ܣܘ̈ܟܐ ܕܕܩ̈ܠܐ̣ ܒܐܝܕܗ̇. ܘܝܗ̣ܒܬ ܠܢܫ̈ܐ ܕܥܡܗ̇

15. Judith 15:13

    ܘܣܡ̣ܬ ܟ̈ܠܝܠܐ ܕܙܝܬܐ ܒܪܝܫܗ̇. ܗܝ̣ ܘܚܒܪܬܗ̇. ܘܐܬܘ ܟܠ ܪ̈ܘܪܒܢܐ ܕܒܝܬ ܐܝܣܪܝܠ̣. ܘܟܠ ܪ̈ܘܪܒܢܝܬܐ ܕܐܝܣܪܝܠ. ܘܐ̇ܬܝܢ ܗܘܘ ܥܡܗܝܢ ܟܘܠܗܘܢ ܒ̈ܢܝ ܐܝܣܪܝܠ̣. ܟܕ ܡܙܝܢܝܢ. ܘܣܝܡܝܢ ܟ̈ܠܝܠܐ ܘܬܫܒܘܚܬܐ ܒܦܘܡ̇ܗܘܢ

16. Judith 15:14

    ܘܡܥܢܝܐ ܗܘܬ ܝܗܘܕܝܬ. ܒܬܘܕܝܬܗ ܠܟܠܗ ܐܝܣܪܝܠ. ܘܥ̇ܢܐ ܗܘܐ ܟܠܗ ܥܡܐ ܬܫܒܘܚܬܗ ܕܡܪܝܐ.

17. Judith 16:1

    ܘܐܡ̣ܪܬ ܝܗܘܕܝܬ. ܫ̇ܒܚܘ ܠܡܪ̈ܝܐ ܒ̈ܦܠܓܐ. ܙܡ̣ܪܘ ܠܗ ܒܨܨ̈ܠܐ. ܫ̇ܒܚܘ ܠܗ ܬܫܒܘܚܬܐ ܚܕܬܐ. ܘܪܡܪܡܘܗܝ ܘܩܪܘ ܒܫܡܗ

18. Judith 16:2

    ܐܢܬ ܗܘ ܐܠܗܐ ܕܡ̇ܫܚܩ ܩܪ̈ܒܐ. ܡܪܝܐ ܕܣܡ̣ܬ ܡܫܪܝܬܐ ܒܓܘ ܥܡܟ. ܠܡܦܪܩ ܐܢܘܢ ܡܢ ܐܝ̣ܕܐ ܕܐܠܘܨ̈ܝܗܘܢ

19. Judith 16:3

    ܐܬܐ ܐܬܘܪܝܐ ܡ̇ܢ ܛܘ̣ܪ̈ܝ ܓܪܒܝܐ̣. ܐܬ̣ܐ ܒܪ̈ܒܘܬܐ ܕܚܝܠܗ. ܒܣܘܓܐܗܘܢ ܣ̣ܟܪܘ ܢ̈ܚܠܐ. ܘܪ̈ܟܫܗܘܢ ܟܣܝܘ ܪ̈ܡܬܐ

20. Judith 16:4

    ܐܡ̣ܪܘ ܠܡܘܩܕܘ ܬܚܘ̈ܡܝ. ܘܠܓܕ̈ܘܕܝ ܢܩ̇ܛܠ ܒܚܪܒܐ. ܘܠܝܠܘ̈ܕܐ ܢܫ̇ܩܦ ܥܠ ܐܪܥܐ. ܘܛ̈ܠܝܐ̣ ܢܬܠ ܠܫܒܝܐ̣. ܘܒܬܘ̈ܠܬܝ ܠܒܙܬܐ

21. Judith 16:5

    ܡܪܝܐ ܚܝܠܬܢܐ ܛܠ̣ܡ ܐܢܘܢ. ܒܐܝܕܐ ܕܢܩܒܬܐ ܐܒܗܬ ܐܢܘܢ

22. Judith 16:6

    ܡܛܠ ܕܠܐ ܗܘܐ ܡܢ ܓܕܘ̈ܕܐ ܢܦ̣ܠܘ ܚܝ̈ܠܬܢܝܗܘܢ. ܘܐܦܠܐ ܡܢ ܒ̈ܢܝ ܥܫܝܢ̈ܐ ܡܚܐܘܗܝ. ܘܐܦܠܐ ܓܒܪ̈ܐ ܕ̇ܪ̈ܡܝܢ ܒܩܘܡ̈ܬܐ ܐܪܡܝܘ ܥܠܝܗܘܢ. ܐܠܐ̣ ܝܗܘܕܝܬ ܒܪܬ ܡܪܪܝ. ܒܫܘܦܪܐ ܕܐ̈ܦܝܗ̇ ܫܕܠܬܗ

23. Judith 16:7

    ܫܠܚ̣ܬ ܡܐ̈ܢܝ ܐܪܡ̇ܠܘܬܗ̣̇. ܠܬܫܒܘܚܬܐ ܕܟܐܒܘ̈ܗܝ ܕܐܝܣܪܝܠ. ܡܫܚ̣ܬ ܐܦܝ̈ܗ̇ ܒܒܣܡܐ.

24. Judith 16:8

    ܐܣ̣ܪܬ ܓܕ̈ܘܠܝܗ̇ ܒܣܪܝܓܬܐ. ܘܠܒ̣ܫܬ ܢܚܬ̈ܝܗ̇ ܠܡܛܥܝܘܬܗ

25. Judith 16:9

    ܘܡܣ̈ܢܝܗ̇ ܚܛܦ ܥܝ̈ܢܘܗܝ ܘܫܘܦܪܗ̇ ܫ̇ܒ̣ܐ ܢܦ̇ܫܗ. ܦܣ̣ܩ ܢܐܢܪܗ ܨܘܪܗ

26. Judith 16:10

    ܙܥ̇ܘ ܦܪ̈ܣܝܐ ܡܢ ܡܪܚܘܬܗ̇. ܘܡܕ̈ܝܐ ܡܢ ܥܘܫܢܗ̇ ܐܬܒܪܘ

27. Judith 16:11

    ܗܝܕܝܢ ܝܒܒ̇ܘ ܡܟ̈ܝܟܝ. ܘܩܥܘ ܟܪ̈ܝܗܝ ܘܢܦ̣ܠܘ. ܘܐܪܝܡܘ ܩܠܗܘܢ ܘܐܬܬܒܪܘ

28. Judith 16:12

    ܐܝܟ ܕܠܥܠܝܡܬܐ ܕܓܫܘ ܐܢܘܢ. ܘܐܝܟ ܕܠܥ̣ܒ̈ܕܐ ܡܪ̈ܘܕܐ ܩ̇ܛܠܘ ܐܢܘܢ. ܐܒ̣ܕܘ ܐܝܟ ܕܡܢ ܡ̇ܫܪܝܬܗ ܕܡܪܝܐ. ܐܠܗܢ

29. Judith 16:13

    ܐܫ̇ܒܚ ܠܐܠܗܝ ܬܫܒܘܚܬܐ ܚܕܬܐ. ܡܪܝܐ ܚܝܠܬܢܐ. ܪܒ ܐܢܬ ܘܫܒܝܚ ܘܓܢܒܪ ܒܚ̣ܝܠܐ. ܘܠܐ ܡܙܕܟܐ ܐܢܬ

30. Judith 16:14

    ܠܟ ܢܦܠܚܘܢ ܟܠܗܘܢ ܥܡܡ̈ܐ. ܘܠܟ ܬܫܬܥܒܕ ܟܠܗ̇ ܐܪܥܐ ܒܪܝܬܟ. ܡܛܠ ܕܐܢܬ ܐܡ̣ܪܬ ܘܗܘܘ. ܘܣܕܪܬ ܐܢܘܢ ܘܐܬܩܝܡܘ. ܘܠܝܬ̇ ܡ̇ܢ ܕܠܘܩܒܠ ܡܠܬܟ ܢܩܘܡ

31. Judith 16:15

    ܛܘ̣ܪ̈ܐ ܡܢ ܫܬܐ̈ܣܝܗܘܢ ܥܡ ܡܝܝܗ̈ܘܢ ܢܙܘܥܘܢ. ܘܫܘ̈ܥܐ̣ ܐܝܟ ܫܥܘܬܐ ܢܬܦܫܪܘܢ ܡܢ ܩܕܡܝܟ. ܘܥܠ ܕܚܠܝܟ ܬܚ̇ܣܐ

32. Judith 16:16

    ܡܛܘܠ ܕܙܥܘܪܝܐ ܗܝ ܟܠ ܕܒܚܬܐ̇ ܠܪܝܚ ܣܘܬܐ. ܘܒܨܝܪ ܗܘ ܟܠ ܬܪܒܐ ܠܝܩ̈ܕܐ ܫܠܡ̈ܐ. ܘܐܝ̇ܢܐ ܕܕܚ̇ܠ ܠܡܪܝܐ. ܪܒ ܗܘ ܠܘܬܗ ܒܟܘܠ ܙܒܢ

33. Judith 16:17

    ܘܝ ܠܥܡܐ ܕܩܐ̇ܡ ܥܠ ܥ̇ܡܝ. ܡܪܝܐ ܚܝܠܬܢܐ ܡܬܬܒܥ ܡܢܗܘܢ̇. ܒܝܘܡܐ ܕܕܝ̣ܢܐ ܢܬܒܥ ܐܢܘܢ ܘܢܣܥܘܪ ܐܢܘܢ̇. ܘܢܬܠ ܒܣܪܗܘܢ ܠܢ̇ܘ̣ܪܐ ܘܠܬܘܠܥܐ. ܘܢܐܩܪܘܢ ܒܪܘܫܥܐ ܥܕܡܐ ܠܥܠܡ

34. Judith 16:18

    ܘܗܘܐ ܕܟܕ ܐܬܬ ܠܐܪܫܠܡ ܘܣܓ̣ܕܘ ܠܡܪܝܐ̣. ܘܟܕ ܐܬܕܟܝ ܥܡܐ ܘܐܝܬܝܘ ܝܩ̈ܕܝܗܘܢ ܫ̈ܠ̣ܡܐ ܠܡܪܝܐ ܘܕܒ̈ܚܐ ܐܡܝܢܐܝܬ̣

35. Judith 16:19

    ܘܐܝܬ̣ܝܬ ܝܗܘܕܝܬ ܡܐ̈ܢܘܗܝ ܕܐܠܦܪܢܐ̇. ܘܟܠܬܐ ܕܢܣ̣ܒܬ ܡܢ ܩܝܛܘܢܐ̣. ܘܝܗܒ̣ܬ. ܐܢܘܢ ܚܪܡܐ ܠܡܪܝܐ

36. Judith 16:20

    ܘܗܘܘ ܥܡܐ ܚ̇ܕܝܢ ܒܐܘܪܫܠܡ ܩܕܡ ܒܝܬ ܡܩܕܫܐ. ܝܪܚ ܝܘ̈ܡܝܢ. ܘܝܗܘܕܝܬ ܩܘܝܬ ܥܡܗܘܢ ܬܡܢ ܒܐܘܪܫܠܡ.

37. Judith 16:21

    ܘܡܢ ܒܬܪ ܝܘܡ̈ܬܐ ܗܠܝܢ̣. ܗܦ̣ܟ ܐܢܫ ܠܡܫܟܢܗ. ܘܝܗܘܕܝܬ ܐܙ̣ܠܬ ܠܒܝܬ ܦ̇ܠܘ ܠܒܝܬ ܩܢܝܢܗ̇. ܘܗܘܬ ܡܝܩܪܐ̣ ܠܟܠܗ̇ ܐܪܥܐ

38. Judith 16:22

    ܘܣܓ̈ܝܐܐ ܐܬܪܓܪܓܘ ܠܡܣܒܗ̣̇. ܘܠܐ ܚܟܡܗ̇ ܓܒܪ ܟܘܠܗܘܢ ܝܘܡ̈ܬܐ ܕܚ̈ܝܝܗ̇. ܡܢ ܝܘܡܐ ܕܡܝܬ ܡܢ̇ܫܐ ܒܥܠܗ̇

39. Judith 16:23

    ܘܟܡܐ ܕܐܬ̇ܝܐ̣ ܡܐܪܒ ܝ̇ܪܒܐ ܗܘܬ. ܥܕܡܐ ܕܝܪ̣ܒܬ ܛܒ. ܘܣܐ̣ܒܬ ܒܒܝܬܗ ܕܡ̇ܢܫܐ ܒܥܠܗ̇. ܘܗܘܬ ܒܪܬ ܡܐܐ̣ ܘܚܡܫ ܫ̈ܢܝܢ. ܘܡܝܬܬ ܒܝܬ ܦ̇ܠܘ. ܘܐܬܩ̣ܒܪܬ ܒܡ̈ܥܪܬܐ ܥܡ ܡ̇ܢܫܐ ܒܥܠܗ̇

40. Judith 16:24

    ܘܐܬܐܒܠ ܥܠܝܗ̇ ܟܠܗ ܒܝܬ ܐܝܣܪܝܠ ܫܒܥܐ ܝܘ̈ܡܝܢ. ܘܦܠܓ̣ܬ ܢܟ̈ܣܝܗ̇ ܡܢ ܩܕܡ ܡܘܬܗ̇. ܠܟܠܗܘܢ ܩܪ̈ܝܒܘܗܝ ܕܡ̇ܢܫܐ ܒܥܠܗ̇. ܘܠܐܝܠܝܢ ܕܩܪܝܒܝܢ ܠܫܪܒܬܗ̇. ܘܫܒ̣ܩܬ ܠܐ̈ܡܬܗ ܒܢ̈ܬ. ܚܐܪ̈ܐ

41. Judith 16:25

    ܘܠܐ ܗܘܐ ܬܘܒ ܕܡ̇ܕܚܠ ܠܒ̈ܢܝ ܐܝܣܪܝܠ ܟܠܗܘܢ ܝܘܡ̈ܬܗ̇ ܕܝܗܘܕܝܬ. ܘܐܦ ܡܢ ܒܬܪ ܡܘܬܗ̇ ܝܘܡ̈ܬܐ ܣܓܝܐ̈ܐ ܀ ܫܠܡ ܟܬܒܐ ܕܝܗܘܕܝܬ ܀

← Previous — showing 301–341 of 341

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.