← All works

Peshitta Judith

Peshitta (Syriac Old Testament) · 341 sections

1. Judith 10:4

   ܘܣܡ̣ܬ ܣܒܟܐ ܒܪܝܫܗ̇. ܘܣ̇ܡܬ ܩܘ̇ܠܒ̈ܝܗ̇. ܘܐܩ̈ܠܢܝܗ ܘܥܙܩ̈ܬܗ̇ ܘܩܕ̈ܫܝܗ̇. ܘܟܠܗ ܨܒܬܗ̇. ܘܐܨܛܒܬܬ ܕܛ̇ܒ ܐܝܟ ܕܠܡܚܛܦ ܥܝܢ̈ܐ ܕܐܢܫܐ ܕܚ̇ܙܝܢ ܠܗ

2. Judith 10:5

   ܘܝܗ̣ܒܬ ܠܐܡܬܗ̇ ܥܠܘܐ ܕܚ̣ܡܪܐ̣ ܘܡܐܢܐ ܕܡܫܚܐ. ܘܡܠ̣ܬ ܬܪܡܠܐ ܫܚܬܝܬܐ. ܘܕܒ̈ܠܐ ܘܠܚܡܐ. ܘܐܪ̣ܡܝܬ ܬܡܢ ܓܒܬܐ. ܘܚܙ̣ܩܬ ܡܐܢ̈ܝܗ̣̇. ܘܣܡܬ ܥܠ ܐܡܬܗ̇

3. Judith 10:6

   ܘܢ̣ܦܩ ܬܪ̈ܬܝܗܝܢ. ܘܐܬ̈ܝ ܕܡܕܝܢܬܐ. ܘܐܫܟܚ ܬܡܢ ܠܥܘܙܝܐ̇. ܘܠܣ̈ܒܐ ܕܡܕܝܢܬܐ ܚܒܪܝ̣ ܘܟܪܡܝ

4. Judith 10:7

   ܘܚܙܘ ܫܘܚܠܦܐ ܕܐܦ̈ܝܗ̇. ܘܡܥܛܦܐ ܕܢܚܬܝܗ̇. ܘܬܡܗܘ ܛܒ ܥܠ ܫܘܦܪܗ̇. ܘܐܡ̣ܪܘ ܠܗ̇

5. Judith 10:8

   ܐܠܗܗܘܢ ܕܐܒ̈ܗܝܢ ܢܬܠ ܠܟܝ ܪ̈ܚ̣ܡܐ̣. ܘܬܫܠܡܝܢ ܨܢܝܥܘܬܟܝ̇. ܠܫܘܒܚܐ ܕܒ̈ܢܝ ܐܝܣܪܝܠ̣ ܘܠܪܘܡܐ ܕܐܪܫܠܡ. ܘܢܦ̣ܠܬ ܥܠ ܐܦ̈ܝܗ̇ ܘܣܓ̣ܕܬ ܠܐܠܗܐ

6. Judith 10:9

   ܘܐܡ̣ܪܬ ܠܗܘܢ. ܦܩܘܕܘ ܦܬ̇ܚܝܢ ܬܪ̈ܥܐ ܕܡܕܝܢܬܐ. ܘܐ̇ܦܘܩ ܘܐ̇ܫܠܡ ܦܬܓ̈ܡܐ ܕܡܠܠܬܘܢ ܥܡܝ. ܘܦ̣ܩܕܘ ܠܥܠܝܡ̈ܐ ܕܢܦܬܚܘܢ ܠܗ̇ ܬܪܥܐ̣. ܐܝܟ ܕܐܡ̣ܪܬ

7. Judith 10:10

   ܘܥܒ̣ܕܘ ܒ̈ܢܝ ܡܕܝܢܬܐ ܗܟܢܐ. ܘܢܦ̣ܩܬ ܝܗܘܕܝܬ ܗܝ̣ ܘܛܠܝܬܗ̇ ܥܡܗ̇. ܘܕܩܘ ܒ̈ܢܝ ܡܕܝܢܬܐ ܥܕܡܐ ܕܢܚ̣ܬܬ ܡܢ ܛܘ̣ܪܐ. ܘܟܕ ܐ̇ܬܝ ܠܐܘܠܘܢܐ. ܬܘܒ̣ ܠܐ ܚܙܐܘܗ̇

8. Judith 10:11

   ܘܐܙܠ̣ܬ ܒܓܘ ܐܘܠܘܢܐ ܬܪܝܨܐܝܬ ܘܦܓܥ̣ܬ ܒܡܛܪܬܐ ܩܕܡܝܬܐ ܕܒ̈ܢܝ ܐܬܘܪ

9. Judith 10:12

   ܘܐܚܕܘܗ̇ ܘܫܐܠܘܗ̇ ܘܐܡ̇ܪܝܢ ܠܗ̇. ܡܐ ܛܒܟܝ ܘܡܢ ܐܝܡ̇ܟܐ ܐܬ̣ܝܬ̣. ܘܠܐ̇ܝܟܐ ܐܙܠ̣ܬܝ. ܘܐܡ̣ܪܬ ܠܗܘܢ ܒܪܬ ܥܒܪ̈ܝܐ ܐܢܐ. ܘܥܪ̣ܩܬ ܡܢܗܘܢ̣. ܡܛܠ ܕܥܬܝܕܝܢ ܐܢܘܢ ܠܡܫܬܠܡܘ ܠܟܘܢ ܠܡܐܟܘܠܬܐ

10. Judith 10:13

    ܘܐܢܐ ܐܬ̇ܝܬ ܠܘܬ ܐܠܦܪܢܐ ܪܒ ܚܝܠܟܘܢ. ܕܐܘܕܥܗ ܦܬܓܡܐ ܕܩܘܫܬܐ ܘܐܚܘܝܘܗܝ ܐܘܪܚܐ ܕܢܐܙܠ ܒܗ. ܘܢܫܠܛ ܒܟܠܗ ܛܘܪܐ ܘܠܐ ܢܛܥܐ ܡܢܗ ܚܕ ܡܢ ܒ̈ܢܝ ܒܣܪܐ. ܘܐܦܠܐ ܪܘܚܐ ܕܚ̈ܝܐ

11. Judith 10:14

    ܘܟܕ ܫܡ̣ܥܘ ܥܒܕܐ ܦܬܓܡ̈ܝܗ̇ ܚܪܘ ܒܐ̈ܦܝܗ̇ ܘܬܡܝܗ ܗܘܐ ܫܘܦܪܗ̇ ܒܥܝܢ̈ܝܗܘܢ ܛܒ

12. Judith 10:15

    ܘܐܡ̣ܪܘ ܠܗ̇. ܐܚܝܬܝ ܢܦܫܟܝ ܠܛܒܬܐ. ܕܐܣܬܪܗܒܬ ܢܚܬܬ̇ܝ ܩܕܡ ܡܪܢ. ܡܟܝܠ ܩܪܘܒܝ ܠܘܬ ܡܫܟܢܗ. ܘܐܢ̈ܫܐ ܡܢܢ ܢܘܒܠܘܢܟܝ̣. ܥܕܡܐ ܕܢܫܠܡܘܢܟܝ ܒܐܝܕܘ̈ܗܝ

13. Judith 10:16

    ܘܟܕ ܬܩܘܡܝܢ ܩܕܡܘܗܝ ܠܐ ܬܕܚܠܝܢ ܒܠܒܟܝ. ܐܠܐ ܚܘܐܝܘܗܝ ܦܬܓܡܝܟܝ̣ ܘܢܛܐܒ ܠܟܝ.

14. Judith 10:17

    ܘܓܒܘ ܡܢܗܘܢ ܡܐܐ ܓܒܪ̈ܝ̣ܢ. ܘܐܫܠܡܘܗ̇ ܠܗ̣̇ ܘܠܥܠܝܡܬܗ̇. ܘܐܝܬܝܘ ܐ̈ܢܝܢ ܠܡܫܟܢܗ ܕܐܠܦܪܢܐ

15. Judith 10:18

    ܘܗ̣ܘܐ ܪܗܛܐ ܒܟܠܗ̇ ܡܫܪܝܬܐ. ܡܛܠ ܕܐܫܬܡ̣ܥܬ ܡܐܬܝܬܗ̇. ܠܐܝܠܝܢ ܕܒܡܫ̈ܟܢܐ. ܘܐܬ̣ܘ ܘܟܪܝܟܝܢ ܗܘܘ ܠܗ̇. ܟܕ ܩܝܡܐ ܠܒܪ ܡܢ ܡܫܟܢܐ ܕܐܠܦܪܢܐ. ܥܕܡܐ ܕܐܡ̣ܪܘ ܠܗ ܥܠܝܗ̇

16. Judith 10:19

    ܘܬܡ̣ܗܘ ܒܫܘܦܪܗ̇. ܘܩ̇ܒܠܘ ܦܬܓ̈ܡܝܗ̇ ܡܢ ܕܛ̇ܒܝܢ ܗܘܘ ܛܒ. ܘܐܬܕܡܪܘ ܒܒ̈ܢܝ ܐܝܣܪܐܝܠ ܡܛܠܬܗ̇. ܘܐܡ̇ܪܘ ܓܒܪ ܠܚܒܪܗ. ܡ̇ܢ ܢܒܣܐ ܒܥܡܐ ܕܐܝܬ ܒܗ ܐܝܟ ܗܠܝܢ ܢܫ̈ܐ. ܠܐ ܘ̇ܠܐ ܕܢܫܬܚܪ ܡܢܗܘܢ ܐܢܫ. ܕܠܐ ܟܕ ܢܫܬܚܪܘܢ ܢܬܚܟܡܘܢ ܠܟܠܗ̇ ܐܪܥܐ. .

17. Judith 10:20

    ܘܢܦ̣ܩܘ ܟ̇ܠܗܘܢ ܦܠܚ̈ܘܗܝ ܕܐܠܦܪܢܐ ܘܟܠܗܘܢ ܥܒܕ̈ܘܗܝ̣. ܘܐܥܠܘܗ̇ ܠܡܫܟܢܐ

18. Judith 10:21

    ܘܐܠܦܪܢܐ ܪܡ̣ܐ ܗܘܐ ܘܢܝܚ ܒܥܪܣܗ ܒܓܘ ܟܠܬܗ̣. ܕܙܩܝܪܐ ܒܐܪܓܘܢܐ ܘܒܕܗܒܐ. ܘܒܐܙܡܪܓܕܐ. ܘܒܟܐ̈ܦܐ ܛ̇ܒ̈ܬܐ

19. Judith 10:22

    ܘܐܡ̣ܪܘ ܠܗ̇ ܥܠܝܗ̇. ܘܗ̣ܘ ܟܕ ܫ̣ܡܥ̣. ܢܦ̣ܩ ܠܕܪܬܐ ܕܡܫܟܢܐ̇. ܘܠܡܦ̈ܕܐ ܕܣܐܡܐ ܕ̇ܠܩܝܢ ܗܘܘ ܩܕܡܘܗܝ. ܘܐܥܠܘܗ̇ ܠܘܬܗ

20. Judith 10:23

    ܘܟܕ ܩܡܬ ܝܗܘܕܝܬ ܩܕܡܘܗܝ ܘܩܕܡ ܥ̈ܒ̣ܕܘܗܝ̣. ܐܬܕܡܪܘ ܟܠܗܘܢ ܒܫܘܦܪܐ ܕܐ̈ܦܝܗ̇. ܘܢܦ̣ܠܬ ܥܠ ܐ̈ܦܝܗ̇ ܘܣܓ̣ܕܬ ܠܗ. ܘܐܚܕܘܗ̇ ܥܒܕ̣ܘܗܝ ܘܐܩܝܡܘܗ̇

21. Judith 11:1

    ܘܐܡ̣ܪ ܠܗ̇ ܐܠܦܪܢܐ. ܬܪܣܝ ܐܢܬܬܐ ܠܐ ܬܕܚܠܝܢ ܒܠܒܟܝ. ܡܛܠ ܕܠܐ ܐܒܐ̇ܫܬ ܠܟܠܢܫ̇. ܕܨ̇ܒܐ ܕܢܦܠܘܚ̇ ܠܢܒܘ ܟܕܢܨܪ ܡ̇ܠܟܐ ܕܟܠܗ̇ ܐܪܥܐ

22. Judith 11:2

    ܘܐܦ ܗܫܐ ܥܡܟܝ ܐܝܠܝܢ ܕܥܡ̇ܪܝܢ ܒܛܘ̣ܪܐ̣. ܐܠܘ ܠܐ ܐܣܠܝܘܢܝ̣. ܠܐ ܡܪܝܡ ܗܘ̣̇ܝܬ ܥܠܝܗܘܢ ܢܝܙܟܐ. ܐܠܐ ܗܢܘܢ ܥܒܕܘ ܠܢܦܫܗܘܢ ܗܠܝܢ

23. Judith 11:3

    ܡܟܝܠ ܐܡ̣ܪ ܠܝ ܠܡܢܐ ܥܪܩܬܝ ܡܢܗܘܢ ܘܐܬܝܬܝ ܠܘܬܢ. ܐܬܝܬ ܓܝܪ̣ ܠܚ̈ܝܐ. ܬܪܣܝ ܡܢ ܗܢܐ ܠܠܝܐ ܘܠܗܠ ܬܚܝܢ

24. Judith 11:4

    ܡܛܠ ܕܠܝܬ ܕܡܗܪ ܠܟܝ. ܘܐ̇ܥܒܕ ܠܟܝ̣. ܐܝܟ ܕܡܬܥܒܕ ܠܥܒ̣̈ܕܘܗܝ ܕܡܪܝ

25. Judith 11:5

    ܘܐܡ̣ܪܬ ܠܗ ܝܗܘܕܝܬ. ܫܡ̣ܥ ܡ̈ܠܝܗ̇ ܕܐܡܬܟ. ܘܬܡܠܠ ܐܡܬܟ ܩܕܡܝܟ. ܘܠܐ ܐܡܠܠ ܕܓ̈ܠܬܐ ܩܕܡܝܟ ܒܠܠܝܐ ܗܢܐ

26. Judith 11:6

    ܘܐܢ ܬܫܡ̣ܥ ܦܬܓ̈ܡܝ̣ ܢܫ̣ܬܠܡ ܟܠܡܕܡ ܒܐܝ̈ܕܝܟ. ܟܘܠ ܕܢ̇ܥܒܕ ܥܡܟ ܐܠܗܐ. ܘܠܐ ܢ̇ܦܠ ܡܪܝ ܡܢ ܨܢܥ̈ܬܗ ܟܡܐ ܕܚܝ

27. Judith 11:7

    ܡܛܠ ܕܚܝ ܗܘ ܢܒܘܟܕܢܨ̇ܪ ܡ̇ܠܟܐ ܕܟܘܠܗ̇ ܐܪܥܐ. ܕܠܐ ܒܠܚܘܕ ܒܢܝܢ̈ܫܐ ܢܦܠܚܘܢܗ ܡܛܠܬܟ̣. ܐܠܐ ܐܦ ܚܝܘܬܐ ܘܒܥܝܪܐ ܘܦܪܚܬܐ ܕܫܡܝܐ. ܢܕܥܘܢܝܗܝ ܠܢܒܘܟܕܢܨ̇ܪ ܒܚܝܠܟ

28. Judith 11:8

    ܫܡܥܢ ܚܟܡܬܟ ܘܨܢܥܬܗ ܕܠܒܟ. ܘܐܬܐܡܪ ܒܟܠܗ̇ ܐܪܥܐ̣. ܕܐܢܬ ܒܠܚܘܕܝܟ ܛܒ ܒܟܠܗ̇ ܡܠܟܘܬܐ. ܘܬܡܝܗ ܒܝܕܥܬܐ. ܘܚܝܠܬܢ ܒܩܪܒܐ

29. Judith 11:9

    ܘܗܫܐ ܡ̣ܪ̣ܝ. ܡܠܬܐ ܕܐܡ̣ܪ ܐܚܝܘܕ ܒܟܢܫܐ ܩܕܡܝܟ. ܫܡܥܢ ܡܠܘܗܝ̣. ܡܛܘܠ ܕܩܒܠܘܗܝ ܒ̈ܢܝ ܡܕܝܢܬܐ. ܘܐܫܬܥܝ ܠܗܘܢ ܟܠܗܘܢ ܦܬܓ̈ܡܐ ܕܐܡ̣ܪ ܩܕܡܝܟ

30. Judith 11:10

    ܡܛܠ ܗܢܐ ܡܪܝ ܠܐ ܬܥܒܪ ܥܠ ܡܠܬܗ. ܐܠܐ ܣܝܡܝܗ̇ ܒܠܒܟ̣. ܡܛܠ ܕܫܪܝܪ ܗ̣ܘ. ܡܛܠ ܕܠܐ ܡܬ̣ܬܒܥ ܥܡܢ. ܘܐܦܠܐ ܫܠܛܐ ܒܗܘܢ ܚܪܒܐ. ܐܠܐ ܐܢ ܚܛܘ ܩܕܡ ܐܠܗܗܘܢ

31. Judith 11:11

    ܘܡܟܝܠ ܕܠܐ ܢܗܘܐ ܡܪܝ ܕܠܐ ܣܘܥܪܢ. ܢ̇ܦܠ ܡܘܬܐ̣. ܩܕܡܝܗܘ̇ܢ. ܘܐܕܪܟ ܐܢܘܢ ܚܛܐ ܪܒܐ. ܕܒܗ ܡܪܓܙܝܢ ܠܐܠܗܗܘܢ ܟܕ ܢܥܒܕܘܢܗ̇

32. Judith 11:12

    ܡܛܠ ܕܚ̣ܣܪ ܠܗܘܢ ܬܘܪܣܝܐ. ܘܐܬܛܠ̇ܩܘ ܠܗܘܢ ܡܝܝ̈ܗܘܢ. ܐܬܚܫܒܘ ܠܡܫܠܛ ܒܒܥܝܪܗܘܢ. ܘܟܠ ܕ̣ܦܪܫ ܠܗܘܢ ܐܠܗܗܘܢ ܒܢܡܘ̈ܣܘܗܝ ܕܠܐ ܢܐܟܠܘܢ

33. Judith 11:13

    ܘܐܬܪܥܝܘ ܠܡܐܟܠ ܪ̈ܫܝܬܐ ܕܥܒܘܪܐ ܘܕܚ̣ܡܪܐ ܘܕܡܫܚܐ. ܕܢܛܪܘ ܟܠܗܘܢ̇ ܠܡܩܕܫܘ ܠܟܗ̈ܢܐ ܕܩܝܡܝܢ ܩܕܡ ܐܠܗܐ ܒܐܘܪܫܠܡ. ܘܐܨܛܒܝܘ ܠܡܐܟܠ̣. ܡܢ ܗ̈ܢܘܢ ܕܐܦ ܠܐ ܒܐܝܕ̈ܝܗܘܢ ܫܠܝܛ ܠܐܢܫ ܡܢ ܒܢ̈ܝ ܥܡܐ ܠܡܩܪܒ

34. Judith 11:14

    ܘܫ̣ܕܪܘ ܐܦ ܠܐܘܪܫܠܡ. ܡܛܠ ܕܐܦ ܥܡܘܪ̈ܐ ܕܬܡܢ ܥܒܕܘ ܐܝܟ ܟܠܗܝܢ ܗܠܝܢ̇. ܠܐܝܠܝܢ ܕܐܘܒܠܘ ܠܗܘܢ ܦܬܓܡܐ ܠܘܬ ܣ̈ܒܐ

35. Judith 11:15

    ܘܢܗܘܐ ܕܟܕ ܢܫܠܚܘܢ ܠܗܘܢ ܘܢܥܒܕܘܢ ܗܕܐ̣. ܢܫܬܠܡܘܢ ܠܟ ܒܝܘܡܐ ܗ̇ܘ. ܘܬܘܒܕ ܐܢܘܢ

36. Judith 11:16

    ܡܛܠ ܗܢܐ ܐܦ ܐܢܐ ܐܡܬܟ̣. ܟܕ ܚ̇ܙܝܬ ܗܠܝ̣ܢ. ܥ̇ܪܩܬ ܡܢܗܘܢ. ܘܫܕܪܢܝ ܐܠܗܐ ܠܡܥܒܕ ܥܡܟ ܨܒܘܬܐ̣. ܕܬܬܡܗ ܒܗ̇ ܟܠܗ̇ ܐܪܥܐ. ܐܝܠܝܢ ܕܢܫܡܥܘܢ

37. Judith 11:17

    ܡܛܠ ܕܕܚܠܬ ܐܠܗܐ ܗ̣ܝ ܐܡܬܟ. ܘ̇ܦܠܚܬ ܒܐܝ̇ܡܡܐ ܘܒܠܠܝܐ ܩܕܡ ܐܠܗܐ. ܕܫܡܝܐ. ܘܡܟܝܠ ܐܟܬܪ ܠܘܬܟ ܡܪܝ. ܘܬܗܘܐ ܢܦ̇ܩܐ ܐܡܬܟ ܒܠܠܝܐ ܠܢܚܠܐ̣. ܘܐܨ̇ܠܐ ܠܐܠܗܐ̣. ܘܢܚܘܝܢܝ ܐܡܬܝ ܡܬܥܒܕܝܢ ܚܛܗ̈ܝܗܘܢ

38. Judith 11:18

    ܘܐܬ̇ܐ ܘܐܘܕܥܝܘܗܝ ܠܟ. ܘܬܦܘܩ ܒܚܝܠܟ. ܘܠܐ ܢܗܘܐ ܐܢܫ ܡܢܗܘܢ ܕܩܐ̇ܡ ܠܩܘܒܠܟ

39. Judith 11:19

    ܘܐ̇ܥܒܪܟ ܒܓܘ ܝܗܘܕ. ܥܕܡܐ ܕܬܡܛܐ ܠܐܘܪܫܠܡ. ܘܐܣ̇ܝܡ ܟܘܪܣܝܟ ܒܡܨܥܬܗ̇. ܘܬ̣ܕܒܪ ܐܢܘܢ ܐܝܟ ܥܢܐ ܕܠܝܬ ܠܗ̇ ܪ̈ܥܝܐ̇. ܘܠܐ ܢܒ̇ܚ ܟܠܒܐ ܒܠܫܢܗ ܩܕܡܝܟ. ܡܛܠ ܕܗܠܝܢ ܐܬܓܠܝ ܒܡܕܥܝ. ܘܐ̇ܫܬܕܪܬ ܕܐܡ̇ܪ ܠܟ

40. Judith 11:20

    ܘܫܦ̣ܪܘ ܦܬܓܡ̈ܝܗ̇ ܩܕܡ ܐܠܦܪܢܐ̇. ܘܩܕܡ ܥܒ̈ܕܘܗܝ ܟܘܠܗܘܢ ܘܐܬܕܡܪܘ ܒܫܘܦܪܗ̇ ܘܒܚܟܡܬܗ̇. ܘܐܡܪܘ ܠܗ̇

41. Judith 11:21

    ܕܠܝܬ ܐܢܬܬܐ ܐܝܟ ܗܕܐ ܡܢ ܣܘ̈ܦܝܗ̇ ܠܣܘ̈ܦܝܗ̇ ܕܐܪܥܐ. ܒܫܘܦܪܐ ܕܐܦ̈ܐ ܘܒܡ̈ܠܐ ܕܣܘܟܠܐ.

42. Judith 11:22

    ܘܐܡ̣ܪ ܠܗ̇ ܐܠܦܪܢܐ. ܫܦ̣ܝܪ ܥ̣ܒܕ ܐܠܗܐ ܕܫܕܪܟܝ ܩܕܡ ܒ̈ܢܝ ܥܡܟܝ. ܕܢܗܘܐ ܒܢ ܥܘܗܕܢܐ. ܘܒܐܝܠܝܢ ܕܐܣܠܝܘ ܠܡܪܝ̣ ܐܒܕܢܐ ܢܗܘܐ

43. Judith 11:23

    ܘܗܫܐ. ܐܢܬܝ ܫܦܝܪܐ ܐܢܬܝ ܒܚܙܘܟܝ̣. ܘ̇ܛܒܐ ܐܢܬܝ ܒܡܕܥܟܝ ܘܒܦܬ̈ܓܡܝܟܝ. ܘܐܢ ܬܥܒܕܝܢ ܐܝܟ ܕܐܡܪܬܝ̣. ܐܠܗܟܝ ܢܗܘܐ ܐܠܗܝ. ܘܐܢܬܝ ܒܒܝܬܗ ܕܡ̇ܠܟܐ ܬܬܒܝܢ. ܘܬܗܘܝܢ ܡܝܬܪܐ ܒܫܡܐ ܛܒ ܡܢ ܟܘܠܗ̇ ܐܪܥܐ

44. Judith 12:1

    ܘܦ̣ܩܕ ܕܢܫܘܘܢ ܠܗ̣̇. ܘܕܢܬܠܘܢ ܠܗ̇ ܡܢ ܚܫܡܝܬܗ. ܘܡܢ ܚܡܪܐ ܕܡܫܬܝܗ̇

45. Judith 12:2

    ܘܐ̣ܡܪܬ ܝܗܘܕܝܬ. ܠܐ ܐܟܠܐ ܐܢܐ ܡܢܗ̇ ܕܠܡܐ ܢܗܘܐ ܠܝ ܠܬܘܩܠܬܐ. ܐܠܐ ܣ̇ܦܩ ܠܝ ܡܐ ܕܐܬ̣ܐ ܥܡܝ

46. Judith 12:3

    ܐܡ̇ܪ ܠܗ̇ ܐܠܦܪܢܐ. ܘܐܢ ܢܓܡܪ ܠܗ ܡܢ ܐܝܡܟܐ ܠܢ ܠܡܬܠ ܠܟܝ ܐܟܘܬܗ. ܡܛܠ ܕܠܝܬ ܥܡܢ ܓܒܪܐ ܡܢ ܥܡܟܝ̇. ܕܐܝܬ ܠܗ ܐܟܘܬܗ

47. Judith 12:4

    ܘܐܡ̣ܪܬ ܝܗܘܕܝܬ. ܚ̇ܝܐ ܗܝ ܢܦܫܟ ܡܪܝ̣. ܕܠܐ ܬܓܡܪ ܐܡܬܟ ܡܕܡ ܕܐܬ̣ܐ ܥܡܗ̇. ܥܕܡܐ ܕܢ̣ܥܒܕ ܐܠܗܐ ܒܐܝ̈ܕܝ ܡܕܡ ܕܐܬܪܥܝܬ

48. Judith 12:5

    ܘܐܥܠܘܗ̇ ܥܒ̣ܕ̣̈ܘܗܝ ܕܐܠܦܪܢܐ ܠܡܫܟܢܐ. ܘܕܡ̣ܟܬ ܥܕܡܐ ܠܦܠܓܗ ܕܠܠܝܐ̣ ܘܩܡܬ ܒܡܛܪܬܐ ܕܨ̇ܦܪܐ̣

49. Judith 12:6

    ܘܫܕ̣ܪܬ ܠܘܬ ܐܠܦܪܢܐ̣. ܘܐܡ̣ܪܬ ܠܗ. ܢܦܩܘܕ ܡܪܝ̣ ܘܢܫܒܩܘܢܗ̇ ܠܐܡܬܟ ܠܡܦܩ ܠܨܠܘܬܐ

50. Judith 12:7

    ܘܦ̣ܩܕ ܐܠܦܪ̈ܢܐ ܠܢ̣ܛܘܪ̈ܐ̣ ܕܠܐ ܢܟܠܘܢܗ̇. ܘܟܬ̣ܪܬ ܒܡܫܪܝܬܐ ܬܠܬܐ ܝܘܡ̈ܝܢ. ܘܢܦ̇ܩܐ ܗܘܬ ܠܢܚܠܐ ܕܒܝܬ ܦܠܘ ܒܠܝܠܘ̈ܬܐ. ܘܥ̇ܡܕܐ ܗܘܬ ܒܥܝܢܐ ܕܡܝ̈ܐ

51. Judith 12:8

    ܘܡܐ ܕܣ̇ܠܩܐ ܗܘܬ ܒܥ̇ܝܐ ܗܘܬ ܡܢ ܐܠܗܐ ܕܐܝܣܪܝܠ̣. ܕܢܬܪܘܨ ܐܘܪܚܗ̇ ܠ̣ܩܝܡܬܐ ܕܥܡܗ̇

52. Judith 12:9

    ܘܡܐ ܕܥܐ̇ܠܐ ܗܘܬ ܡܟܬܪܐ ܗܘܬ ܒܕܟܝܘܬܐ ܒܓܘ ܡܫܟܢܐ ܥܕܡܐ ܕܢܣ̇ܒܐ ܗܘܬ ܡܐܟܘܠܬܐ ܒܪܡܫܐ

53. Judith 12:10

    ܘܗ̣ܘܐ ܒܝܘܡܐ ܕܐܪܒܥܐ̣. ܘܥ̣ܒܕ ܐܠܦܪܢܐ ܡܫܬܝܐ ܠܥ̣ܒ̈ܕܘܗܝ ܒܠܚܘܕ. ܘܠܐܢܫ ܡܢ ܦܠܚ̈ܐ ܘܡܢ ܘܩܝܘܡ̈ܐ ܠܐ ܩ̣ܪܐ

54. Judith 12:11

    ܘܐܡ̣ܪ ܠܒܘܓܐ ܡܗܝܡܢܐ ܕ̇ܩܐ̇ܡ ܗ̣ܘܐ ܥܠ ܟܠ ܕܐܝܬ ܠܗ. ܙܠ ܢܐ ܐܦܝܣ ܠܐܢܬܬܐ ܗܝ̇. ܥܒܪܝܬܐ ܕܥܡܟ ܬܐܬܐ ܠܘܬܢ. ܘܬܠܥܣ̣ ܘܬܫܬܐ ܥܡܢ

55. Judith 12:12

    ܡܛܠ ܕܒܗܬܬܐ ܗܝ ܠܢ ܠܡܫܒܩ ܐܢܬܬܐ ܐܝܟ ܗܕܐ. ܘܠܐ ܢܡܠܠ ܥܡܗ̇. ܡܛܠ ܕܐܠܐ ܢܦܩܗ̇ ܬܓܚܟ ܥ̇ܠܝܢ

56. Judith 12:13

    ܘܢܦ̣ܩ ܒܘܓܐ ܡܢ ܩܕܡ ܐܠܦܪܢܐ̣. ܘܥܠ ܠܘܬܗ̇ ܘܐܡ̣ܪ. ܠܐ ܬܬܟܠܐ ܥܠܝܡܬܐ ܫܦܝܪܬܐ. ܠܡܐܬܐ ܩܕܡ ܡܪܝ̇. ܘܠܡܫܬܒܚܘ ܩܕܡ ܐܦܘ̈ܗܝ. ܘܬܫܬܝܢ ܥܡܢ ܚܡ̣ܪܐ ܘܬܬܒܣܡܝܢ. ܘܬܗܘܝܢ ܝܘܡܢܐ ܡܝܩܪܐ̣. ܐܝܟ ܚܕܐ ܡܢ ܒܢ̈ܬ ܪ̈ܘܪܒܢܐ ܕܐܬܘܪ ܕܩܝܡܝܢ ܒܒܝܬܗ ܕܢ̇ܒܘܟܕ̇ܢܨܪ

57. Judith 12:14

    ܘܐܡ̣ܪܬ ܠܗ̇ ܝܗܘܕܝܬ. ܡ̇ܢ ܐܢܐ ܕܐܡ̇ܪ ܕܠܐ ܥܠ ܡܪܝ. ܡܛܠ ܕܟܘܠ ܕܫܦܝܪ ܒܥ̈ܝܢܘܗܝ ܚܦܝܛܐܝܬ ܐ̇ܥܒܕ. ܘܢܗܘܐ ܠܝ ܗܢܐ ܫܘܒܗܪܐ̣ ܥܕܡܐ ܠܝܘܡܐ ܕܡܘܬܝ.

58. Judith 12:15

    ܘܩ̣ܡܬ ܘܐܨܛܒ̣ܬܬ ܒܡ̈ܢܝܗ̇. ܘܒܟܠ ܬܨ̈ܒܝܬܗ̇ ܕܢܫ̈ܐ. ܘܥܠ̣ܬ ܐܡܬܗ̇ ܘܫܘ̣ܝܬ ܠܗ̇ ܩܕܡ ܐܠܦܪܢܐ ܥܠ ܐܪܥܐ. ܫ̈ܠܚܐ ܕܐܡܪ̈ܐ̣ ܕܢܣ̣ܒܬ ܡܢ ܒܘܓܐ ܠܡܕܡ̇ܟ ܥܠܝܗܘܢ. ܕܬܬܒ ܥܠܝܗܘܢ ܠܡܠܥܣ

59. Judith 12:16

    ܘܥ̣ܠܬ ܘܝܬ̣ܒܬ ܝܗܘܕܝܬ. ܘܐܬܙܝܥ ܠܒܗ ܕܐܠܦܪܢܐ ܥܠܝܗ̇. ܘܐܬܛܪ̣ܦܬ ܢܦܫܗ. ܡܛܠ ܕܐܬܪܓܪܓ ܛܒ ܠܡܗܘܐ ܥܡܗ̇. ܘܒ̇ܥܐ ܗܘܐ ܠܗ ܥܕܢܐ ܕܢܕܥܝܗ̇ ܡܢ ܝܘܡܐ ܕܚܙܗ̇

60. Judith 12:17

    ܘܐܡ̣ܪ ܠܗ̇ ܐܠܦܪ̣ܢܐ. ܐܫܬܝ ܘܚܕܝ ܥܡܢ

61. Judith 12:18

    ܘܐܡ̇ܪܐ ܝܗܘܕܝܬ. ܐܫ̇ܬܐ ܡܪܝ̈. ܡܛܠ ܕܝܪܒܘ ܥܠܝ ܚܝ̈ܝ ܝܘܡܢܐ̇. ܛܒ ܡܢ ܟܠܗܘܢ ܝܘܡܬ̈ܐ ܕܗ̇ܘܝܬ ܒܗܘܢ

62. Judith 12:19

    ܘܢܣ̣ܒܬ ܘܐܟܠܬ ܩܕܡܘܗܝ ܡܕܡ ܕܬܩ̣ܢܬ ܠܗ̇ ܐܡܬܗ̇

63. Judith 12:20

    ܘܚܕܝ ܐܠܦܪܢܐ ܠܩܘܒܠܗ̇. ܘܐܫܬܝ ܚ̣ܡܪܐ ܣܘܓܐܐ. ܕܠܐ ܫܬ̣ܐ ܠܗ ܗܟܘܬ ܚܕ ܡܢ ܝܘܡ̈ܬܐ ܗܐ ܡܢ ܕܐܬܝܠܕ

64. Judith 13:1

    ܘܟܕ ܗ̣ܘܐ ܪܡܫܐ ܩܡ ܥܒ̣̈ܕܘܗܝ ܠܡܐܙܠ. ܘܐܚ̣ܕ ܒܘܓܐ ܬܪܥܐ ܕܡܫܟܢܐ ܡܢ ܠܒܪ. ܘܐܦܩ ܠܟܘܠ ܕܩ̇ܝܡܝܢ ܩܕܡ ܡܪܗ. ܘܐܙܠܘ ܐܢܫ ܠܒܝܬ ܡܫܟܢܗ. ܡܛܠ ܕܠܐ̣ܝܢ ܗܘܘ ܒܣܘܓܐܐ ܕܡܫܬܝܐ ܕܗ̣ܘܐ

65. Judith 13:2

    ܘܐܫܬܚܪܬ ܝܗܘܕܝܬ ܒܠܚܘܕܝܗ̇ ܒܡܫܟܢܐ. ܘܐܠܦܪܢܐ ܪܡܐ ܗܘܐ ܥܠ ܥܪܣܗ. ܡܛܠ ܕܣ̇ܓܝ ܗܘܐ ܥܠܘܗܝ ܚܡ̣ܪܐ

66. Judith 13:3

    ܘܐܡ̣ܪܬ ܝܗܘܕܝܬ ܠܐܡܬܗ̇. ܕܬܩܘܡ ܠܒܪ ܡܢ ܩܝܛܘܢܐ ܠܡܛܪ ܡܦܩܗ̇ ܐܝܟ ܕܒܟܠ ܝܘܡ. ܡܛܘܠ ܕܐܡ̣ܪܬ̣. ܕܐܬ̇ܝܐ ܐܢܐ ܠܨܠܘܬܐ. ܐܦ ܠܒܘܓܐ̣ ܐܡ̣ܪܬ ܐܝܟ ܡ̈ܠܐ ܗܠܝܢ

67. Judith 13:4

    ܘܐ̣ܙܠܘ ܡܢ ܬܡܢ ܟܠܗܘܢ̇ ܘܠܐ ܐܢܫ ܐܫܬܚܪ ܒܩܝܛܘܢܐ ܪܒܐ ܐܝܟ ܙܥܘܪܐ. ܘܩܡܬ ܝܗܘܕܝܬ ܠܘܬ ܪܝܫܗ ܕܐܠܦܪܢܐ̣. ܘܐܡ̣ܪܬ ܡܪܝܐ ܡܪܝܐ. ܐܠܗܐ ܕܟܠ ܚ̈ܝܠܘܢ. ܚܘܪ ܒܫܥܬܐ ܗܕܐ ܒܥ̇ܒܕܐ ܕܐܝܕ̈ܝ ܠܪܘܡܐ ܕܐܪܫܠܡ

68. Judith 13:5

    ܡܛܠ ܕܙܒܢܐ ܗܘ ܠܡܪܚܦܘ ܥܠ ܝܪܬܘܬܟ̣. ܘ̇ܥܒܕ ܨ̈ܢܥܬܗ ܕܠܒܝ̇. ܠܬܒܪܐ ܕܥ̈ܡܡܐ ܕܩܡܘ ܥܠܝܢ

69. Judith 13:6

    ܘܩܪ̣ܒܬ ܠܘܬ ܥܡܘܕܐ ܕܐܝܬ ܗܘܐ ܠܘܬ ܪܫܗ̣. ܕܐܠܦܪܢܐ̣. ܘܫܡܛܬ ܢܐܢܪܗ̣

70. Judith 13:7

    ܘܩܪ̣ܒܬ ܠܘܬ ܥܪܣܗ. ܘܐܚ̣ܕܬ ܒܣܥܪܐ ܕܪܫܗ ܘܐܡܪ̣ܬ. ܚܝܠܝܢܝ ܐܠܗܐ ܕܐܝܣܪܝܠ ܒܝܘܡܐ ܗܢܐ

71. Judith 13:8

    ܘܡܚܬܗ ܥܠ ܨܘܪܗ ܒܢܐܪܢܐ ܬܪ̈ܬܝܢ ܙܒܢ̈ܝܢ̣. ܘܫܩܠܬܗ ܠܪܝܫܗ ܡܢܗ

72. Judith 13:9

    ܘܥܓܠܬܗ ܦܓܪܗ ܡܢ ܬܫܘܝܬܐ̣. ܘܢܣ̣ܒܬ ܟܠܬܐ ܡܢ ܡܓܘ̈ܕܐ ܘܒܬܪ ܩܠܝܠ ܢܦ̣ܩܬ. ܘܝܗ̣ܒܬ ܠܐܡܬܗ̇ ܪܫܗ ܕܐܠܦܪܢܐ

73. Judith 13:10

    ܘܐܪܡܝܬܗ ܒܬܪܡܠܐ ܕܣܝܒܪܬܗ̇. ܘܢܦ̣ܩ ܬ̣ܪ̈ܬܝܗܝܢ ܐܟܚܕܐ. ܐܝܟ ܕܒܥܕܢܐ ܕܨܠܘܬܐ. ܘܥܒ̇ܪܗ̇ ܠܡܫܪܝܬܐ ܕܐܬܘܪ̣. ܘܐܬܟܪܟܝܗܝ ܠܟܠܗ ܢܚܠܐ ܗ̇ܘ. ܘܣ̣ܠܩ ܠܘܬ ܡܕܝܢܬܐ. ܘܐܬܝ ܠܘܬ ܬܪܥܐ

74. Judith 13:11

    ܘܐܡ̇ܪܬ ܝܗܘܕܝܬ ܠܢܛܘܪ̈ܐ ܡܢ ܪܘܚܩܐ. ܦܬܚܘ ܠܝ ܬܪܥܐ ܦܬܚ̣ܘ. ܡܛܠ ܕܐܠܗܢ ܥܡܢ ܗܘ. ܕܝܗ̣ܒ ܚܝܠܐ ܠܐܝܣܪܐܝܠ. ܘܥܘܫܢܐ ܥܠ ܒܥܠܕܒ̈ܒܝܗܘܢ ܐܝܟ ܕܝܘܡܢܐ

75. Judith 13:12

    ܘܗܘܐ ܕܟܕ ܫܡ̣ܥܘ ܐܢܫ̈ܝ ܡܕܝܢܬܐ ܩܠܗ̇. ܐܣܬܪܗܒܘ ܠܡܦܬܚ ܠܗ̇ ܬܪܥܐ ܕܡܕܝܢܬܗܘܢ. ܘܩܪܘ ܠܩܫܝ̈ܫܐ ܕܡܕܝܢܬܐ̣

76. Judith 13:13

    ܘܪܗ̣ܛܘ ܟܠܗܘܢ. ܡܢ ܙܥܘܪܐ̣ ܘܥܕܡܐ ܠܪܒܐ. ܡܛܠ ܕܬܡܝܗܐ ܗܘܬ ܠܗܘܢ ܨܒܘܬܐ ܕܐܬܬ ܘܦܬܚܘ ܬܪܥܐ ܘܩ̇ܒܠܘ ܐܢ̈ܝܢ. ܘܐܘܚܕܘ ܢܘܪܐ ܕܢܬܚܙܐ ܠܗܘܢ ܘܚܕܪܘܗ̣̇

77. Judith 13:14

    ܘܐܡ̣ܪܬ ܠܗܘܢ ܒܩܠܐ ܪܡ̇ܐ. ܐܘܕܘ ܠܡܪܝܐ ܐܠܗܢ̇. ܕܠܐ ܐܥܒܪ ܚܢܢܗ ܡܢ ܐܝܣܪܝܠ. ܐܠܐ ܬܒ̣ܪ ܠܒܥܠܕܒ̈ܒܝܢ ܒܐܝ̈ܕܝܢ ܒܠܠܝܐ ܗܢܐ

78. Judith 13:15

    ܘܐܦܩ̣ܬ ܪܫܐ ܡܢ ܬܪܡܠܐ̣. ܘܚܘ̣ܝܬ ܘܐܡ̣ܪܬ ܠܗܘܢ. ܕܗܐ ܪܝܫܗ ܕܐܠܦܪܢܐ ܪܒ ܚܝܠܐ ܕܐܬܘܪ. ܘܗܐ ܟܠܬܐ ܕܢܦܝܠ ܗܘܐ ܒܗ̇ ܒܪܘܝܘܬܗ. ܘܬܒܪܗ ܡܪܝܐ ܒܐ̣ܝܕܐ ܕܢܩܒܬܐ

79. Judith 13:16

    ܘܚܝ ܗܘ ܡܪܝܐ ܕܢܛܪܢܝ ܒܐܘܪܚܐ ܕܐ̇ܙܠܬ ܒܗ̣̇. ܐܠܐ ܐܛܥܝܝܗܝ ܐ̈ܦܝ. ܘܠܐ ܥ̣ܒܕ ܥܡܝ ܚܛܗܐ ܒܛܡܐܘܬܐ ܕܒܗܬܬܐ

80. Judith 13:17

    ܘܬܡܗܘ ܛܒ̣ ܟܠܗ ܥܡܐ. ܘܢܦ̣ܠܘ ܘܣܓܕܘ ܠܡܪܝܐ. ܘܐܡ̣ܪܘ ܟܠܗܘ̣ܢ ܐܟܚܕܐ. ܒܪܝܟ ܗܘ ܡܪܝܐ ܐܠܗܢ̇ ܕܬ̣ܒܪ ܝܘܡܢܐ ܠܒܥܠܕܒ̈ܒܐ ܕܥܡܗ

81. Judith 13:18

    ܘܐܡܪ ܠܗ̇ ܥܘܙܝܐ. ܒܪܝܟܐ ܐܢܬ ܒܪܬܝ ܠܐܠܗܐ ܡܪܝܡܐ ܡܢ ܟ̇ܠܗܝܢ ܢܫ̈ܐ ܕܥܠ ܐܪܥܐ ܘܒܪܝܟ ܗܘ ܡܪܝܐ ܕܒ̣ܪܐ ܫܡܝܐ ܘܐܪܥܐ̇. ܕܬܪܨ ܠܟܝ̣ ܕܬܣܒܝܢ̇. ܪܫ̇ܗ ܕܪܒܐ ܕܒܥܠܕܒ̈ܒܝܢ

82. Judith 13:19

    ܡܛܠ ܕܠܐ ܥ̣ܢܕ ܫܘܒܚܟܝ ܡܢ ܠܒܐ ܕܒܢܝܢ̈ܫܐ̇. ܕ̇ܡܬܕܟܪܝܢ ܚܝܠܗ ܕܐܠܗܐ ܥܕܡܐ ܠܥܠܡ

83. Judith 13:20

    ܘܢܥܒܕ ܐ̈ܢܝܢ ܠܟܝ ܐܠܗܐ ܠܝܘܡܐ ܕܠܥܠܡ. ܘܢܣܥܪܟܝ ܠܛܒ. ܚܠܦ ܕܠܐ ܚܣܬܝ ܥܠ ܢܦܫܟܝ̇. ܡܛܠ ܡܘܟܟܗ ܕܥܡܢ. ܐܠܐ ܢܦܩܬܝ ܡܛܠ ܡܦܘܠܬܢ ܘܗܠ̣ܟܬ ܒܬܪܝܨܘܬܐ ܩܕܡ ܐܠܗܢ̇. ܘܐܡ̣ܪ ܟܠܗ ܥܡܐ̇ ܐܡܝܢ̇ ܘܐܡܝܢ

84. Judith 14:1

    ܘܐܡ̣ܪܬ ܠܗܘܢ ܝܗܘܕܝܬ. ܫܘܡܥܘܢܝ ܐܚܝ̈ ܣܒܘ ܪܫܐ ܗܢܐ̣. ܘܬܠܘ ܒܥܥܝܬܐ ܕܫܘܪܐ

85. Judith 14:2

    ܘܢܗܘܐ ܟܕ ܢܢܗܪ ܨ̣ܦܪܐ̣. ܘܢܦܘܩ ܫܡܫܐ ܥܠ ܐܪܥܐ̣. ܘܬܣܒܘܢ ܓܒܪ ܡܐ̈ܢܝ ܩܪܒܗ̣. ܘܬܦܩܘܢ ܟܠ ܓܒܪ ܚܝܠܬܢ ܠܒܪ ܡܢ ܡܕܝܢܬܐ̣. ܘܬܥܒܕܘܢ ܥܠܝܗܘܢ ܪܫܐ. ܘܬܦܩܘܢ ܐܝܟ ܕܠܦܩܥܬܐ. ܥܠ ܡܛܪܬܐ ܩܕܡܝܬܐ ܕܒ̈ܢܝ ܐܬܘܪ̣ ܘܠܐ ܬܚܬܘܢ.

86. Judith 14:3

    ܘܗ̇ܝܕܝܢ ܢܣܒܘܢ ܗܢܘܢ ܙܝܢܗܘܢ. ܘܢܐܙܠܘܢ ܠܡ̇ܫܪܝܬܗܘܢ̇ ܘܢܥܝܪܘܢ ܠܪ̈ܒܝ ܚܝܠܗܘܢ. ܘܢܪܗܛܘܢ ܠܡܫܟܢܐ ܕܐܠܦܪܢܐ ܘܠܐ ܢܫܟܚܘܢܗ. ܘܬܦܠ ܥܠܝܗܘܢ ܕܚܠܬܐ. ܘܢܥܪܩܘܢ ܡܢ ܩܕܡܝܟܘܢ̇

87. Judith 14:4

    ܘܬܐܙܠܘܢ ܐܢܬܘܢ ܟܘܠ ܕܥܡ̇ܪܝܢ ܒܬܚܘܡܐ ܕܐܝܣܪܝܠ̣. ܬܫܛܚܘܢ ܬܪܡܘܢ ܐܢܘܢ ܒܐܘܪ̈ܚܬܐ

88. Judith 14:5

    ܩܕܡ ܕܝܢ ܕܬܥܒܕܘܢ ܗܠܝܢ. ܠܐܚܝܘܕ ܥܡܘܢܝܐ ܩܪܘ. ܕܢܚܙܐ̣ ܘܢܕܥ ܠܗ̇ܘ ܕܐܣܝ ܠܒܝܬ ܐܝܣܪܝܠ. ܘܠܗ ܫ̣ܕܪܘ ܠܘܬܢ ܐܝܟ ܕܠܡܘܬܐ

89. Judith 14:6

    ܘܩܪܐܘܗܝ ܠܐܚܝܘܕ ܡܢ ܒܝܬܗ ܕܥܘܙܝܐ ܘܟܕ ܐܬ̣ܐ ܘܚ̣ܙܐ ܪܝܫܗ ܕܐܠܦܪܢܐ̣. ܒܐ̣ܝܕܗ ܕܓܒܪܐ ܚܕ ܒܟܢܘܫܬܐ ܕܥܡܐ ܢܦ̣ܠ ܥܠ ܐܦܘ̈ܗܝ. ܘܐܬܟ̣ܪܝܬ ܪܘܚܗ

90. Judith 14:7

    ܘܟܕ ܐܚܕܘ ܐܩܝܡܘܗܝ̣. ܢܦ̣ܠ ܥܠ ܪ̈ܓܠܝܗ̇ ܕܝܗܘܕܝܬ ܘܣܓ̣ܕ ܩܕܡܝܗ̇ ܘܐܡ̣ܪ ܠܗ̇. ܒܪܝܟܐ ܐܢܬܝ ܒܟܠ ܥܡ. ܕܢܫܡܥܘܢ ܫܡܥ̇ܟܝ̣ ܘܢܕܚܠܘܢ̇

91. Judith 14:8

    ܘܡܟܝܠ̣ ܚܘܝܐܢܢܝ ܟܘܠ ܡܐ ܕܥܒ̣ܕܬܝ ܒܝܘܡ̈ܬܐ ܗܠܝܢ. ܘܐܫܬ̣ܥܝܬ ܠܗ ܟܠ ܕܥܒܕܬܝ. ܡܢ ܝܘܡܐ ܕܢܦܩܬܝ ܘܥܕܡܐ ܠܝܘܡܐ ܕܡܠܠܬܝ ܥܡܗܘܢ

92. Judith 14:9

    ܘܟܕ ܫ̣ܠܝܬ ܡܢ ܕܠܡܡܠܠܘ̣. ܩܥܘ ܥܡܐ ܒܩܠܐ ܪܡ̇ܐ. ܘܐܫܬܡܥ ܩܠ ܚܕܘܬܐ ܒܡܕܝܢܬܘܢ

93. Judith 14:10

    ܘܟܕ ܚܙܐ ܐܚܝܘܕ ܟܘܠ ܕܥ̣ܒܕ ܐܠܗܐ ܠܐܝܣܪܝܠ. ܗܝܡܢ ܒܐܠܗܐ̣ ܘܓ̣ܙܪ ܒܣܪܐ ܕܥܘܪܠܘܬܗ. ܘܐܬܬܘܣܦ ܥܠ ܥܡܐ ܕܒܝܬ ܐܝܣܪܝܠ. ܥܕܡܐ ܠܝܘܡܢܐ

94. Judith 14:11

    ܘܟܕ ܣ̣ܠܩ ܫܦܪܐ̣. ܬܠܘ ܪܫܗ ܕܐܠܦܪܢܐ ܠܒܪ ܡܢ ܫܘܪܐ. ܘܫܩܠܘ ܓܒܪ ܡܐ̈ܢܝ ܙܝܢܗ̣. ܘܢܦܩܘ ܠܡܫܪܝܬܐ ܥܠ ܡܣܩܢܐ ܕܛܘ̣ܪ̈ܐ

95. Judith 14:12

    ܘܟܕ ܚܙܘ ܐܢܘܢ ܒ̈ܢܝ ܐܬܘܪ̣. ܫܕ̣ܪܘ ܥܠ ܪ̈ܘܪܒܢܝܗܘܢ. ܘܥܠ ܪ̈ܒܝ ܐܠܦ̈ܐ̣. ܘܥܠ ܟܠ ܫܠܝܛܢ̈ܝܗܘܢ

96. Judith 14:13

    ܘܐܙܠܘ ܠܡܫܟܢܗ ܕܐܠܦܪܢܐ. ܘܐ̣ܡܪܘ ܠܒܘܓܐ ܕܩܐ̇ܡ ܗܘܐ ܥܠ ܟܠ ܥܒܝ̈ܕܬܗ. ܥܘܠ ܐܥܝܪܝܗܝ ܠܡܪܢ. ܡܛܠ ܕܐܡܪܚܘ ܓܒܪ̈ܐ ܠܡܚܬ ܥܠܝܢ ܠܩܪܒܐ. ܕܢܐܒܕܘܢ ܠܥܠܡ

97. Judith 14:14

    ܘܐܙܠ ܒܘܓܐ ܘܢܩ̣ܫ ܒܕܪܬܐ̣ ܕܡܫܟܢܐ. ܡܛܠ ܕܣܒ̣ܪ ܗܘܐ ܕܥܡ ܝܗܘܕܝܬ ܕܡ̣ܝܟ ܗܘܐ

98. Judith 14:15

    ܘܟܕ ܐܢܫ ܠܐ ܥܢܝܗܝ. ܦܬ̣ܚ ܘܥܠ ܠܩܝܛܘܢܐ. ܘܐܫܟܚܗ̇ ܠܐܠܦܪܢܐ ܟܕ ܫܕܐ ܥܪܛܠ. ܘܪܝܫܗ ܫܩܝܠ ܡܢܗ

99. Judith 14:16

    ܘܓܥ̣ܐ ܒܩܠܐ ܪܡܐ ܘܒܒܟܬܐ ܘܒܬܢܚܬܐ ܘܒܓܥܬܐ ܪܒܬܐ ܨܪܝ ܠܒܘܫ̈ܘܗܝ

100. Judith 14:17

     ܘܥܠ ܠܡܫܟܢܐ ܐܝ̇ܟܐ ܕܫܪܝܐ ܗܘܬ ܝܗܘܕܝܬ̣. ܘܠܐ ܐܫܟܚܗ̇. ܘܢܦ̣ܩ ܠܘܬ ܥܡܐ ܘܐܡ̣ܪ ܠܗܘܢ

← Previous · Next → — showing 201–300 of 341

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.