Peshitta Joshua

ܘܐܡܪܢ ܡܐ ܕܐܡܪܘ ܠܢ ܘܠܕܪ̈ܝܢ ܡܢ ܡܚܪ ܢܐܡܪܘܢ ܠܗܘܢ ܚܙܘ ܕܡܘܬܐ ܕܡܕܒܚܗ ܕܡܪܝܐ ܕܥܒܕܘ ܐ̈ܒܗܝܢ ܠܐ ܠܝܩܕܐ ܫܠܡܐ ܘܠܐ ܠܕܒܚܬܐ ܐܠܐ ܕܢܗܘܐ ܣܗܕܐ ܒܝܢܝܢ ܘܠܟܘܢ

ܚܣ ܠܢ ܕܢܣܠܐ ܕܚܠܬܗ ܕܡܪܝܐ ܘܢܗܦܘܟ ܡܢ ܕܚܠܬܗ ܕܡܪܝܐ ܘܢܒܢܐ ܠܢ ܡܕܒܚܐ ܠܝܩܕܐ ܫܠܡܐ ܘܠܩܘܪܒܢܐ ܘܠܕܒܚܬܐ ܠܒܪ ܡܢ ܡܕܒܚܗ ܕܡܪܝܐ ܐܠܗܐ ܕܐܝܣܪܝܠ ܕܐܝܬ ܩܕܡ ܡܫܟܢܗ

ܘܫܡܥ ܦܝܢܚܝܣ ܒܪ ܐܠܝܥܙܪ ܟܗܢܐ ܘܪ̈ܘܪܒܢܐ ܕܟܢܘܫܬܐ ܪ̈ܝܫܐ ܕܚ̈ܝܠܘܬܐ ܕܐܝܣܪܐܝܠ ܕܥܡܗ ܡ̈ܠܐ ܕܡܠܠܘ ܒܢ̈ܝ ܪܘܒܝܠ ܘܒܢ̈ܝ ܓܕ ܘܦܠܓܗ ܕܫܒܛܐ ܕܡܢܫܐ ܘܫܦܪ ܒܥܝܢ̈ܝܗܘܢ

ܘܐܡܪ ܦܝܢܚܝܣ ܒܪ ܐܠܝܥܙܪ ܟܗܢܐ ܠܒܢ̈ܝ ܪܘܒܝܠ ܘܠܒܢ̈ܝ ܓܕ ܘܠܒܢ̈ܝ ܡܢܫܐ ܝܘܡܢܐ ܐܝܕܥܢ ܕܒܝܢܬܢ ܗܘ ܡܪܝܐ ܕܠܐ ܕܓܠܬܘܢ ܒܡܪܝܐ ܕܓܠܘܬܐ ܗܕܐ ܡܟܝܠ ܐܢܬܘܢ ܦܨܝܬܘܢ ܠܒܢ̈ܝ ܐܝܣܪܝܠ ܕܠܐ ܬܗܘܐ ܒܗܘܢ ܐܝܕܗ ܕܡܪܝܐ ܠܪܘܓܙܐ

ܘܗܦܟ ܦܝܢܚܝܣ ܒܪ ܐܠܝܥܙܪ ܟܗܢܐ ܘܪ̈ܘܪܒܢܐ ܕܥܡܗ ܡܢ ܠܘܬ ܒܢ̈ܝ ܪܘܒܝܠ ܘܡܢ ܠܘܬ ܒܢ̈ܝ ܓܕ ܘܡܢܫܐ ܡܢ ܐܪܥܐ ܕܓܠܥܕ ܠܐܪܥܐ ܕܟܢܥܢ ܠܘܬ ܒܢ̈ܝ ܐܝܣܪܝܠ ܘܐܬܝܒܘ ܐܢܘܢ ܦܬܓܡܐ

ܘܫܦܪ ܦܬܓܡܐ ܒܥܝܢ̈ܝ ܒܢ̈ܝ ܐܝܣܪܝܠ ܘܒܪܟܘ ܒܢ̈ܝ ܐܝܣܪܝܠ ܠܐܠܗܐ ܘܠܐ ܐܡܪܘ ܕܢܣܩܘܢ ܥܠܝܗܘܢ ܠܩܪܒܐ ܠܡܚܪܒܘܬܗ̇ ܠܐܪܥܐ ܕܒܢ̈ܝ ܪܘܒܝܠ ܘܕܒܢ̈ܝ ܓܕ ܘܕܒܢ̈ܝ ܡܢܫܐ ܕܝ̇ܬܒܝܢ ܒܗ̇

ܘܩܪܘ ܒܢ̈ܝ ܪܘܒܝܠ ܘܒܢ̈ܝ ܓܕ ܘܒܢ̈ܝ ܡܢܫܐ ܠܡܕܒܚܐ ܕܥܒܕܘ ܡܕܒܚܐ ܕܣܗܕܘܬܐ ܡܛܠ ܕܣܗܕܘܬܐ ܗܘ ܒܝܢܬܗܘܢ ܘܡܪܝܐ ܗܘ ܒܠܚܘܕ ܐܠܗܐ

ܘܡܢ ܒܬܪ ܝܘܡ̈ܬܐ ܣ̈ܓܝܐܐ ܐܢܝܚ ܡܪܝܐ ܠܐܝܣܪܝܠ ܡܢ ܟܘܠܗܘܢ ܒ̈ܥܠܕܒܒܝܗܘܢ ܕܟܪܝܟܝܢ ܠܗܘܢ ܘܝܫܘܥ ܩܫ ܘܥܠ ܒܫܢ̈ܝܐ

ܘܩܪܐ ܝܫܘܥ ܠܟܠܗ ܐܝܣܪܝܠ ܠܩܫܝ̈ܫܘܗܝ ܘܠܪ̈ܝܫܘܗܝ ܘܠܕܝܢ̈ܘܗܝ ܘܠܣܦܪ̈ܘܗܝ ܘܐܡܪ ܠܗܘܢ ܐܢܐ ܣ̇ܐܒܬ ܘܥ̇ܠܬ ܒܫܢ̈ܝܐ

ܘܐܢܬܘܢ ܚܙܝܬܘܢ ܟܠ ܕܥܒܕ ܡܪܝܐ ܐܠܗܟܘܢ ܠܟܠܗܘܢ ܥܡ̈ܡܐ ܗܠܝܢ ܕܐܘܒܕ ܐܢܘܢ ܡܢ ܩܕܡܝܟܘܢ ܘܡܪܝܐ ܐܠܗܟܘܢ ܗܘܝܘ ܥܒ̣ܕ ܩܪܒܟܘܢ

ܚܙܘ ܕܝܢ ܕܠܐ ܦ̇ܠܓܬ ܠܟܘܢ ܥܡ̈ܡܐ ܗܠܝܢ ܕܐܫܬܚܪܘ ܒܝܪܬܘܬܐ ܕܫܒ̈ܛܝܟܘܢ ܡܢ ܝܘܪܕܢܢ ܘܟܠܗܘܢ ܥܡ̈ܡܐ ܕܚ̇ܪܒܬ ܘܝܡܐ ܪܒܐ ܒܡܥܪ̈ܒܝ ܫܡܫܐ ܦ̇ܠܓܬ ܠܟܘܢ

ܡܪܝܐ ܐܠܗܟܘܢ ܗܘ ܢܬܒܪ ܐܢܘܢ ܘܢܚܪܘܒ ܐܢܘܢ ܡܢ ܩܕܡܝܟܘܢ ܘܬܐܪܬܘܢ ܐܪܥܗܘܢ ܐܝܟ ܕܐܡܪ ܠܟܘܢ ܡܪܝܐ ܐܠܗܟܘܢ

ܒܠܚܘܕ ܐܬܚܝܠܘ ܛܒ ܘܛܪܘ ܘܥܒܕܘ ܟܠ ܕܟܬܝܒ ܒܣܦܪܐ ܕܢܡܘܣܐ ܕܡܘܫܐ ܥܒܕܗ ܕܡܪܝܐ ܘܠܐ ܬܣܛܘܢ ܡܢܗ ܠܐ ܠܝܡܝܢܐ ܘܠܐ ܠܣܡܠܐ

ܘܠܐ ܬܬܚܠܛܘܢ ܒܥܡ̈ܡܐ ܗܠܝܢ ܕܐܫܬܚܪܘ ܒܝܢܬܟܘܢ ܘܫܡܐ ܕܐ̈ܠܗܝܗܘܢ ܠܐ ܬܬܕܟܪܘܢ ܘܠܐ ܬܐܡܘܢ ܒܗܘܢ ܘܠܐ ܬܦܠܚܘܢ ܐܢܘܢ ܘܠܐ ܬܣܓܕܘܢ ܠܗܘܢ

ܐܠܐ ܠܡܪܝܐ ܐܠܗܟܘܢ ܐܬܢܩܦܘ ܐܝܟܢܐ ܕܥܒܕܬܘܢ ܥܕܡܐ ܠܝܘܡܢܐ

ܘܚܪܒ ܡܪܝܐ ܡܢ ܩܕܡܝܟܘܢ ܥܡ̈ܡܐ ܪ̈ܘܪܒܐ ܘܥܫܝ̈ܢܐ ܘܐܢܫ ܠܐ ܩܡ ܠܘܩܒܠܟܘܢ ܥܕܡܐ ܠܝܘܡܢܐ

ܓܒܪܐ ܚܕ ܡܢܟܘܢ ܢܪܕܘܦ ܠܐܠܦܐ ܡܛܠ ܕܡܪܝܐ ܐܠܗܟܘܢ ܥܡܟܘܢ ܘܗܘ ܥ̇ܒܕ ܩܪܒܟܘܢ ܐܝܟܢܐ ܕܐܡܪ ܠܟܘܢ

ܐܙܕܗܪܘ ܛܒ ܒܢܦܫܟܘܢ ܠܡܕܚܠ ܠܡܪܝܐ ܐܠܗܟܘܢ

ܐܢ ܕܝܢ ܬܗܦܟܘܢ ܘܬܬܢܩܦܘܢ ܒܫܪܟܐ ܕܗܠܝܢ ܥܡ̈ܡܐ ܕܐܫܬܚܪܘ ܒܝܢܬܟܘܢ ܘܬܗܘܘܢ ܠܗܘܢ ܚ̈ܬܢܐ ܘܬܬܚܠܛܘܢ ܒܗܘܢ ܘܗܢܘܢ ܒܟܘܢ

ܗܘܝܬܘܢ ܝ̇ܕܥܝܢ ܕܛܘܒ ܠܐ ܡܘܣܦ ܡܪܝܐ ܐܠܗܟܘܢ ܠܡܚܪܒ ܠܗܠܝܢ ܥܡ̈ܡܐ ܡܢ ܩܕܡܝܟܘܢ ܘܢܗܘܘܢ ܠܟܘܢ ܠܦܚ̈ܐ ܘܠܬܘܩ̈ܠܬܐ ܘܠܘ̈ܠܝܬܐ ܒܨ̈ܕܥܝܟܘܢ ܘܨܢܪ̈ܝܬܐ ܒܥܝܢ̈ܝܟܘܢ ܥܕܡܐ ܕܬܐܒܕܘܢ ܡܢ ܐܪܥܐ ܛܒܬܐ ܕܝܗܒ ܠܟܘܢ ܡܪܝܐ ܐܠܗܟܘܢ

ܐܢܐ ܕܝܢ ܗܐ ܐ̇ܙܠ ܐܢܐ ܒܐܘܪܚܐ ܕܟܠܗ̇ ܐܪܥܐ ܐܢܬܘܢ ܕܝܢ ܝ̇ܕܥܝܢ ܐܢܬܘܢ ܒܟܠܗ ܠܒܟܘܢ ܘܒܟܘܠܗ̇ ܢܦܫܟܘܢ ܕܠܐ ܒܛܠܬ ܡܠܬܐ ܚܕܐ ܡܢ ܟܠܗܝܢ ܡ̈ܠܐ ܛܒ̈ܬܐ ܕܐܡܪ ܡܪܝܐ ܐܠܗܟܘܢ ܥܠܝܟܘܢ ܟܠܗܝܢ ܐܬ̈ܝ ܥܠܝܟܘܢ ܘܠܐ ܒܛܠܬ ܡܠܬܐ ܚܕܐ

ܘܐܝܟܢܐ ܕܝܢ ܕܐܬ̈ܝ ܥܠܝܟܘܢ ܟܘܠܗܝܢ ܡ̈ܠܐ ܛܒ̈ܬܐ ܕܐܡܪ ܠܟܘܢ ܡܪܝܐ ܐܠܗܟܘܢ ܗܟܢܐ ܢܐܬ̈ܝܢ ܥܠܝܟܘܢ ܟܠܗܝܢ ܠܘ̈ܛܬܐ ܥܕܡܐ ܕܢܘܒܕܟܘܢ ܡܢ ܐܪܥܐ ܗܕܐ ܛܒܬܐ ܕܝܗܒ ܠܟܘܢ

ܐܢ ܬܥܒܪܘܢ ܥܠ ܕܝܬܩܐ ܕܡܪܝܐ ܐܠܗܟܘܢ ܘܥܠ ܦܘܩ̈ܕܢܐ ܕܐܬܦܩܕܬܘܢ ܘܬܐܙܠܘܢ ܘܬܦܠܚܘܢ ܠܐ̈ܠܗܐ ܐܚܪ̈ܢܐ ܘܬܣܓܕܘܢ ܠܗܘܢ ܢܬܚܡܬ ܪܘܓܙܗ ܕܡܪܝܐ ܐܠܗܟܘܢ ܥܠܝܟܘܢ ܘܬܐܒܕܘܢ ܒܥܓܠ ܡܢ ܐܪܥܐ ܛܒܬܐ ܕܝܗܒ ܠܟܘܢ

ܘܟܢܫ ܝܫܘܥ ܠܟܠܗܘܢ ܫܒ̈ܛܐ ܕܐܝܣܪܝܠ ܠܫܟܝܡ ܘܩܪܐ ܠܩܫܝܫ̈ܐ ܕܐܝܣܪܝܠ ܘܠܪ̈ܝܫܝܗܘܢ ܘܠܕܝܢ̈ܝܗܘܢ ܘܠܣܦܪ̈ܝܗܘܢ ܘܩܡ ܩܕܡ ܡܫܟܢܙܒܢܐ ܩܕܡ ܐܠܗܐ

ܘܐܡܪ ܝܫܘܥ ܠܟܠܗ ܥܡܐ ܗܟܢܐ ܐ̇ܡܪ ܡܪܝܐ ܐܠܗܐ ܕܐܝܣܪܝܠ ܒܥܒܪܐ ܕܢܗܪܐ ܝܬܒܘ ܗܘܘ ܐ̈ܒܗܝܟܘܢ ܡܢ ܥܠܡ ܬܪܚ ܐܒܘܗܝ ܕܐܒܪܗܡ ܘܐܒܘܗܝ ܕܢܚܘܪ ܘܦ̇ܠܚܝܢ ܗܘܘ ܬܡܢ ܠܐ̈ܠܗܐ ܐܚܪ̈ܢܐ

ܘܕܒ̇ܪܬ ܠܐܒܪܗܡ ܐܒܘܟܘܢ ܡܢ ܥܒܪܐ ܕܢܗܪܐ ܘܗ̇ܠܟܬܗ ܒܟܠܗ̇ ܐܪܥܐ ܕܟܢܥܢ ܘܐܣ̇ܓܝܬ ܙܪܥܗ ܘܝܗ̇ܒܬ ܠܗ ܠܐܝܣܚܩ

ܘܝܗ̇ܒܬ ܠܐܝܣܚܩ ܠܝܥܩܘܒ ܘܠܥܝܣܘ ܘܝܗ̇ܒܬ ܠܥܣܘ ܝܘܪܬܢܐ ܛܘܪܐ ܕܣܥܝܪ ܘܝܥܩܘܒ ܘܒܢ̈ܘܗܝ ܢܚܬܘ ܠܡܨܪܝܢ

ܘܫ̇ܕܪܬ ܠܡܘܫܐ ܘܠܐܗܪܘܢ ܘܡܚ̇ܝܬ ܠܡܨܪ̈ܝܐ ܘܬܕܡܪ̈ܬܐ ܥܒ̇ܕܬ ܒܝܢܬܗܘܢ ܘܡܢ ܒܬܪ ܗܝܕܝܢ ܐܦܩ̇ܬܟܘܢ

ܘܐܦܩ̇ܬ ܠܐ̈ܒܗܝܟܘܢ ܡܢ ܡܨܪܝܢ ܘܐܝ̇ܬܝܬ ܐܢܘܢ ܠܝܡܐ ܘܪܕܦܘ ܡܨܪ̈ܝܐ ܒܬܪ ܐ̈ܒܗܝܟܘܢ ܒܩܪ̈ܘܟܐ ܘܒܦܪ̈ܫܐ ܠܝܡܐ ܕܣܘܦ

ܘܓܥܘ ܐ̈ܒܗܝܟܘܢ ܠܘܬ ܡܪܝܐ ܘܥܒܕ ܚܫܘܟܐ ܒܝܢܝܗܘܢ ܠܡܨܪ̈ܝܐ ܘܦܠܓ ܡܪܝܐ ܝܡܐ ܕܣܘܦ ܘܐܥܒܪ ܠܐ̈ܒܗܝܟܘܢ ܒܓܘܗ ܘܐܝܬܝܗ ܠܝܡܐ ܥܠ ܡܨܪ̈ܝܐ ܘܟܣܝ ܐܢܘܢ ܘܚ̈ܙܝ ܥܝܢ̈ܝܟܘܢ ܡܕܡ ܕܥܒ̇ܕܬ ܠܡܨܪ̈ܝܐ ܘܐܝ̇ܬܝܬܟܘܢ ܠܡܕܒܪܐ ܘܐܝܬܒܬܘܢ ܒܡܕܒܪܐ ܝܘܡ̈ܬܐ ܣ̈ܓܝܐܐ

ܘܐܬܝܬܘܢ ܠܐܪܥܐ ܕܐܡܘܪ̈ܝܐ ܕܝ̇ܬܒܝܢ ܒܥܒܪܐ ܕܝܘܪܕܢܢ ܘܐܬܟܬܫܘ ܥܡܟܘܢ ܘܐܫ̇ܠܡܬ ܐܢܘܢ ܒܐ̈ܝܕܝܟܘܢ ܘܐܘ̇ܒܕܬ ܐܢܘܢ ܡܢ ܩܕܡܝܟܘܢ ܘܐܝܪܬܬܘܢ ܐܪܥܗܘܢ

ܘܩܡ ܒܠܩ ܒܪ ܨܦܘܪ ܡܠܟܐ ܕܡܘܐ̈ܒܝܐ ܘܐܬܟܬܫ ܥܡ ܐܝܣܪܝܠ ܘܫܕܪ ܩܪܐ ܠܒܠܥܡ ܒܪ ܒܥܘܪ ܠܡܠܛܟܘܢ

ܘܠܐ ܨܒ̇ܝܬ ܠܡܫܡܥܗ ܠܒܠܥܡ ܘܡܒܪܟܘ ܒܪܟ̇ܬܟܘܢ ܘܦܨ̇ܝܬܟܘܢ ܡܢ ܐ̈ܝܕܘܗܝ

ܘܥܒܪܬܘܢ ܝܘܪܕܢܢ ܘܐܬܝܬܘܢ ܠܐܝܪܝܚܘ ܘܐܬܟܬܫܘ ܥܡܟܘܢ ܓܒܪ̈ܐ ܕܐܝܪܝܚܘ ܘܐܡܘܪ̈ܝܐ ܘܟܢ̈ܥܢܝܐ ܘܦܪ̈ܙܝܐ ܘܚ̈ܬܝܐ ܘܓܪ̈ܓܘܣܝܐ ܘܚ̈ܘܝܐ ܘܝܒ̈ܘܣܝܐ ܘܐܫ̇ܠܡܬ ܐܢܘܢ ܒܐ̈ܝܕܝܟܘܢ

ܘܫ̇ܕܪܬ ܩܕܡܝܟܘܢ ܕܒܘܪ̈ܝܬܐ ܘܐܘ̇ܒܕܬ ܡܢ ܩܕܡܝܟܘܢ ܬܪ̈ܝܢ ܡ̈ܠܟܝܗܘܢ ܕܐܡܘܪ̈ܝܐ ܠܐ ܒܣ̈ܝܦܝܟܘܢ ܐܦܠܐ ܒܩܫ̈ܬܬܟܘܢ

ܘܝܗ̇ܒܬ ܠܟܘܢ ܐܪܥܐ ܕܠܐ ܠܐܝܬܘܢ ܒܗ̇ ܘܩܘܪ̈ܝܐ ܕܠܐ ܒܢܝܬܘܢ ܘܐܝܬܒܬܘܢ ܒܗܝܢ ܘܟܪ̈ܡܐ ܘܙܝ̈ܬܐ ܕܠܐ ܢܨܒܬܘܢ ܗܐ ܐ̇ܟܠܝܢ ܐܢܬܘܢ

ܡܟܝܠ ܕܚܠܘ ܡܢ ܡܪܝܐ ܘܦܘܠܚܘܗܝ ܒܬܡܝܡܘܬܐ ܘܒܩܘܫܬܐ ܘܐܥܒܪܘ ܡܢ ܠܒܟܘܢ ܐ̈ܠܗܐ ܢܘܟܪ̈ܝܐ ܕܦܠܚܘ ܐ̈ܒܗܝܟܘܢ ܒܥܒܪܐ ܕܢܗܪܐ ܘܒܡܨܪܝܢ ܘܐܢܬܘܢ ܦܠܘܚܘ ܠܡܪܝܐ

ܘܐܢ ܒܝܫ ܗܘ ܒܥܝܢ̈ܝܟܘܢ ܠܡܦܠܚ ܠܡܪܝܐ ܓܒܘ ܠܟܘܢ ܝܘܡܢܐ ܠܡ̇ܢ ܦ̇ܠܚܝܢ ܐܢܬܘܢ ܐܢ ܠܐ̈ܠܗܐ ܕܦܠܚܘ ܐ̈ܒܗܝܟܘܢ ܒܥܒܪܐ ܕܢܗܪܐ ܘܐܢ ܠܐ̈ܠܗܐ ܕܐܡܘܪ̈ܝܐ ܕܥ̇ܡܪܝܢ ܐܢܬܘܢ ܒܐܪܥܗܘܢ ܐܢܐ ܕܝܢ ܘܒܢ̈ܝ ܒܝܬܝ ܠܡܪܝܐ ܗܘ ܐܠܗܐ ܦ̇ܠܚܝܢܢ

ܘܥܢܘ ܟܘܠܗ ܥܡܐ ܘܐܡܪܘ ܚܣ ܠܢ ܕܢܫܒܘܩ ܠܡܪܝܐ ܘܢܦܠܘܚ ܠܐ̈ܠܗܐ ܐܚܪ̈ܢܐ

ܡܛܠ ܕܡܪܝܐ ܗܘ ܐܠܗܢ ܗ̇ܘ ܕܐܣܩܢ ܡܢ ܐܪܥܐ ܕܡܨܪܝܢ ܡܢ ܒܝܬ ܥܒܕܘܬܐ ܘܥܒܕ ܩܕܡܝܢ ܗܠܝܢ ܐ̈ܬܘܬܐ ܪ̈ܘܪܒܬܐ ܘܢܛܪܢ ܒܟܠܗ̇ ܐܘܪܚܐ ܕܗܠܟܢ ܒܗ̇ ܘܒܟܘܠܗܘܢ ܥܡ̈ܡܐ ܕܥܒܪܢ ܒܝܢܬܗܘܢ

ܘܐܘܒܕ ܐܢܘܢ ܡܪܝܐ ܐܠܗܢ ܠܟܠܗܘܢ ܥܡ̈ܡܐ ܗܠܝܢ ܘܠܐܡܘܪ̈ܝܐ ܕܥ̇ܡܪܝܢ ܚܢܢ ܒܐܪܥܗܘܢ ܐܘܒܕ ܐܢܘܢ ܡܪܝܐ ܡܢ ܩܕܡܝܢ ܡܛܠ ܗܢܐ ܠܡܪܝܐ ܗܘ ܦ̇ܠܚܝܢܢ ܡܛܠ ܕܗܘܝܘ ܐܠܗܐ ܒܠܚܘܕܘܗܝ ܘܗܘܝܘ ܐܠܗܢ

ܘܐܡܪ ܝܫܘܥ ܠܥܡܐ ܚܙܘ ܕܝܢ ܕܠܡܐ ܠܐ ܡܫܟܚܝܢ ܐܢܬܘܢ ܠܡܦܠܚ ܠܡܪܝܐ ܡܛܠ ܕܐܠܗܐ ܗܘ ܩܕܝܫܐ ܘܐܠܗܐ ܗܘ ܛܢܢܐ ܘܠܐ ܕܝܢ ܫ̇ܒܩ ܠܚ̈ܘܒܝܟܘܢ ܘܠܚ̈ܛܗܝܟܘܢ

ܕܠܡܐ ܬܫܒܩܘܢܗ ܠܡܪܝܐ ܘܬܦܠܚܘܢ ܠܐ̈ܠܗܐ ܐܚܪ̈ܢܐ ܢܘܟܪ̈ܝܐ ܕܐܪܥܐ ܘܢܗܦܘܟ ܡܪܝܐ ܠܡܒܐܫܘ ܠܟܘܢ ܘܢܓܡܪܟܘܢ ܡܢ ܒܬܪ ܕܐܛܐܒ ܠܟܘܢ

ܘܐܡܪܘ ܥܡܐ ܠܝܫܘܥ ܠܐ ܗ̇ܘܐ ܠܢ ܦܘܠܚܢ ܐܚܪܝܢ ܐܠܐ ܠܡܪܝܐ ܗܘ ܐܠܗܐ ܦ̇ܠܚܝܢܢ

ܘܐܡܪ ܝܫܘܥ ܠܥܡܐ ܣ̇ܗܕܝܢ ܐܢܬܘܢ ܒܢܦܫܟܘܢ ܕܐܢܬܘܢ ܓܒܝܬܘܢ ܠܟܘܢ ܠܡܦܠܚ ܠܡܪܝܐ ܘܐ̇ܡܪܝܢ ܠܗ ܣ̇ܗܕܝܢܢ

ܐ̇ܡܪ ܠܗܘܢ ܝܫܘܥ ܡܟܝܠ ܐܥܒܪܘ ܐ̈ܠܗܐ ܢܘܟܪ̈ܝܐ ܕܒܝܢܬܟܘܢ ܘܐܬܩܢܘ ܠܒܟܘܢ ܠܘܬ ܡܪܝܐ ܐܠܗܐ ܕܐܝܣܪܝܠ

ܘܐܡܪܘ ܥܡܐ ܠܝܫܘܥ ܠܡܪܝܐ ܐܠܗܢ ܦ̇ܠܚܝܢ ܚܢܢ ܘܒܩܠܗ ܫ̇ܡܥܝܢܢ

ܘܐܩܝܡ ܝܫܘܥ ܕܝܬܝܩܐ ܠܥܡܐ ܒܗ ܒܝܘܡܐ ܗ̇ܘ ܘܐܠܦ ܐܢܘܢ ܦܘܩ̈ܕܢܐ ܘܕܝ̈ܢܐ ܒܫܟܝܡ

ܘܟܬܒ ܝܫܘܥ ܡ̈ܠܐ ܗܠܝܢ ܒܣܦܪܐ ܕܢܡܘܣܗ ܕܐܠܗܐ ܘܢܣܒ ܟܐܦܐ ܪܒܬܐ ܘܐܩܝܡܗ̇ ܬܚܝܬ ܒܛܡܬܐ ܕܒܝܬ ܡܩܕܫܗ ܕܡܪܝܐ

ܘܐܡܪ ܝܫܘܥ ܠܟܘܠܗ ܥܡܐ ܗܐ ܟܐܦܐ ܗܕܐ ܬܗܘܐ ܠܢ ܣܗܕܘܬܐ ܡܛܠ ܕܗܝ ܫܡܥܬ ܟܠܗܝܢ ܡ̈ܠܘܗܝ ܕܡܪܝܐ ܕܡܠܠ ܥܡܢ ܘܬܗܘܐ ܠܟܘܢ ܠܣܗܕܘܬܐ ܕܠܐ ܬܟܕܒܘܢ ܒܡܪܝܐ ܐܠܗܟܘܢ

ܘܡܢ ܒܬܪ ܕܦܩܕ ܝܫܘܥ ܠܥܡܐ ܫܕܪ ܐܢܘܢ ܐܢܫ ܠܝܪܬܘܬܗ

ܘܡܢ ܒܬܪ ܡ̈ܠܐ ܗܠܝܢ ܡܝܬ ܝܫܘܥ ܒܪܢܘܢ ܥܒܕܗ ܕܡܪܝܐ ܒܪ ܡܐܐ ܘܥܣܪ ܫܢ̈ܝܢ

ܘܩܒܪܘܗܝ ܒܬܚܘܡܐ ܕܝܪܬܘܬܗ ܒܬܡܢܬܣܪܚ ܕܒܛܘܪܐ ܕܐܦܪܝܡ ܡܢ ܓܪܒܝܐ ܠܛܘܪܐ ܕܓܥܫ

ܘܦܠܚ ܐܝܣܪܝܠ ܠܡܪܝܐ ܟܠܗܘܢ ܝܘܡ̈ܬܗ ܕܝܫܘܥ ܘܟܠܗܘܢ ܝܘܡ̈ܬܐ ܕܩܫܝܫ̈ܐ ܕܢܚܘ ܢܘܓܪܐ ܒܬܪ ܝܫܘܥ ܘܐܝܕܥܘ ܥܒ̈ܕܘܗܝ ܕܡܪܝܐ ܕܥܒܕ ܠܐܝܣܪܝܠ

ܘܠܓܪ̈ܡܘܗܝ ܕܝܘܣܦ ܕܐܣܩܘ ܒܢ̈ܝ ܐܝܣܪܝܠ ܡܢ ܡܨܪܝܢ ܩܒܪܘ ܒܫܟܝܡ ܒܦܠܓܘܬܐ ܕܚܩܠܐ ܕܙܒܢ ܝܥܩܘܒ ܡܢ ܚܡܘܪ ܐܒܘܗܝ ܕܫܟܝܡ ܒܡܐܐ ܢܩ̈ܘܢ ܘܗܘܬ ܝܪܬܘܬܐ ܠܒܢ̈ܝ ܝܘܣܦ

ܘܐܠܝܥܙܪ ܟܗܢܐ ܒܪ ܐܗܪܘܢ ܟܗܢܐ ܡܝܬ ܘܩܒܪܘܗܝ ܒܓܒܥܬܐ ܕܦܝܢܚܣ ܒܪܗ ܕܐܬܝܗܒܬ ܠܗ ܒܛܘܪܐ ܕܐܦܪܝܡ