← All works

Peshitta Joshua

Peshitta (Syriac Old Testament) · 656 sections

1. Joshua 19:32

   ܘܢܦܩܬ ܦܨܬܐ ܕܫܬ ܕܒܢ̈ܝ ܢܦܬܠܝ ܠܫܪ̈ܒܬܗܘܢ

2. Joshua 19:33

   ܘܗܘܐ ܬܚܘܡܗܘܢ ܡܢ ܚܠܦܐ ܘܡܢ ܐܠܘܢ ܘܡܢ ܨܢܥܡ ܘܐܕܡܐ ܘܢܩܒ ܘܢܒܐܝܠ ܥܕܡܐ ܠܠܩܘܡ ܘܗ̇ܘܐ ܡܦܩܢܗܝܢ ܠܝܘܪܕܢܢ

3. Joshua 19:34

   ܘܗ̇ܦܟ ܬܚܘܡܐ ܠܡܥܪܒܐ ܠܐܙܢܘܬܒܘܙ ܘܢ̇ܦܩ ܡܢ ܬܡܢ ܠܚܩܝܩ ܘܦ̇ܓܥ ܒܙܒܘܠܘܢ ܡܢ ܬܝܡܢܐ ܘܒܐܫܝܪ ܦ̇ܓܥ ܡܢ ܡܥܪܒܐ ܘܒܝܗܘܕܐ ܒܝܘܪܕܢܢ ܡܢ ܡܕܢܚ̈ܝ ܫܡܫܐ

4. Joshua 19:35

   ܘܒܡܕܝܢ̈ܬܐ ܪ̈ܘܪܒܬܐ ܒܨܘܪ ܘܒܨܝܕܢ ܘܒܚܡܬ ܘܩܪܝܬ ܘܟܢܪܬ

5. Joshua 19:36

   ܘܐܕܡܐ ܘܕܡܐ ܘܚܨܘܪ

6. Joshua 19:37

   ܘܩܕܫ ܘܐܪܕܥܝ ܘܥܝܢ ܨܘܪ

7. Joshua 19:38

   ܘܕܝܐܘܢ ܘܡܓܕܠܐܝܠ ܘܚܕܘܡ ܘܒܝܬ ܥܢܬ ܘܒܝܬ ܫܡܫ ܡܕܝܢ̈ܬܐ ܬܫܥܣܪ̈ܐ ܘܐܓܘܪ̈ܣܝܗܝܢ

8. Joshua 19:40

   ܘܢܦܩܬ ܦܨܬܐ ܕܫܒܥ ܕܒܢ̈ܝ ܕܢ ܠܫܪ̈ܒܬܗܘܢ

9. Joshua 19:41

   ܘܗܘܐ ܬܚܘܡܐ ܕܝܪܬܘܬܗܘܢ ܨܕܥܐ ܘܐܫܬܘܐܝܠ ܘܩܪܝܬܐ ܕܫܡܫ

10. Joshua 19:42

    ܘܫܥܠܒܝܢ ܘܝܐܠܘܢ ܘܢܬܠܐ

11. Joshua 19:43

    ܘܐܠܘܢ ܘܬܡܢܐ ܘܥܩܪܘܢ

12. Joshua 19:44

    ܘܐܠܩܬ ܘܓܒܬܘܢ ܘܒܥܠܬ

13. Joshua 19:45

    ܘܝܗܘܕܝܬ ܘܒܥܠܕܒܟ ܘܓܬܪܡܘܢ

14. Joshua 19:46

    ܘܡܚܪܩܘܢ ܘܟܪܩܘܢ ܥܕܡܐ ܠܬܚܘܡܐ ܕܠܘܩܒܠ ܐܝܠܬ

15. Joshua 19:47

    ܘܢܦܩ ܬܚܘܡܐ ܕܒܢ̈ܘܗܝ ܕܕܢ ܡܢܗܘܢ ܘܣܠܩܘ ܒܢ̈ܝ ܕܢ ܘܥܒܕܘ ܩܪܒܐ ܥܡ ܐ̈ܢܫܐ ܕܐܝܢܘ ܘܟܒܫܘܗ̇ ܘܚܪܒܘܗ̇ ܒܦܘܡܐ ܕܣܝܦܐ ܘܝܪܬܘܗ̇ ܘܐܝܬܒܘ ܒܗ̇ ܘܩܪܐܘܗ̇ ܠܐܝܢܘ ܕܢ ܥܠ ܫܡ ܕܢ ܐܒܘܗܘܢ

16. Joshua 19:48

    ܗܕܐ ܗܝ ܝܪܬܘܬܐ ܕܫܒܛܐ ܕܒܢ̈ܝ ܕܢ ܠܫܪ̈ܒܬܗܘܢ ܡܕܝܢ̈ܬܐ ܗܠܝܢ ܘܩܘܪ̈ܝܐ ܘܐܓܘܪ̈ܣܝܗܝܢ

17. Joshua 19:49

    ܘܫܠܡܘ ܠܡܐܪܬܗ̇ ܠܐܪܥܐ ܒܬܚ̈ܘܡܝܗ̇ ܘܝܗܒܘ ܒܢ̈ܝ ܐܝܣܪܐܝܠ ܝܪܬܘܬܐ ܠܝܫܘܥ ܒܪܢܘܢ ܒܝܢܬܗܘܢ

18. Joshua 19:50

    ܥܠ ܡܠܬ ܦܘܡܗ ܕܡܪܝܐ ܝܗܒܘ ܠܗ ܩܪܝܬܐ ܕܫܐܠ ܠܬܡܢܬܣܪܚ ܕܒܛܘܪܐ ܕܐܦܪܝܡ ܘܒܢܗ̇ ܠܩܪܝܬܐ ܘܐܝܬܒ ܒܗ̇

19. Joshua 19:51

    ܗܠܝܢ ܝܪ̈ܬܘܬܐ ܕܐܘܪܬ ܐܠܝܥܙܪ ܟܗܢܐ ܘܝܫܘܥ ܒܪܢܘܢ ܘܪ̈ܫܐ ܕܐ̈ܒܗܬܐ ܕܫܒ̈ܛܐ ܕܐܝܣܪܝܠ ܒܦܨ̈ܐ ܒܫܝܠܘ ܩܕܡ ܡܪܝܐ ܒܬܪܥܐ ܕܡܫܟܢ ܙܒܢܐ ܘܫܠܡܘ ܠܡܦܠܓܘܬܗ̇ ܠܐܪܥܐ

20. Joshua 20:1

    ܘܐܡܪ ܡܪܝܐ ܠܝܫܘܥ

21. Joshua 20:2

    ܐܡܪ ܠܒܢ̈ܝ ܐܝܣܪܝܠ ܫܒܘܩܘ ܠܟܘܢ ܩܘܪ̈ܝܐ ܠܡܫܘܙܒܘܬܐ ܐܝܟܢܐ ܕܐܡ̇ܪܬ ܠܟܘܢ ܒܐܝܕܐ ܕܥܒܕܝ ܡܘܫܐ

22. Joshua 20:3

    ܕܢܥܪܘܩ ܠܬܡܢ ܩܛܘܠܐ ܐܝܢܐ ܕܢܩܛܘܠ ܢܦܫܐ ܡܢ ܫܠܝܐ ܟܕ ܠܐ ܝ̇ܕܥ ܘܢܗ̈ܘܝܢ ܠܟܘܢ ܠܡܫܘܙܒܘܬܐ ܡܢ ܬܒ̇ܥ ܥܝܪܬܐ ܕܕܡܐ

23. Joshua 20:4

    ܘܢܥܪܘܩ ܠܚܕܐ ܡܢ ܗܠܝܢ ܩܘܪ̈ܝܐ ܘܢܩܘܡ ܒܡܥܠܢܐ ܕܬܪܥܐ ܕܩܪܝܬܐ ܘܢܡܠܠ ܩܕܡ ܩܫܝܫ̈ܐ ܕܩܪܝܬܐ ܗ̇ܝ ܘܢܐܡܪ ܡ̈ܠܘܗܝ ܘܢܚܡܠܘܢܗ ܠܘܬܗܘܢ ܒܩܪܝܬܐ ܘܢܬܠܘܢ ܠܗ ܕܘܟܬܐ ܠܡܥܡܪ ܥܡܗܘܢ

24. Joshua 20:5

    ܟܕ ܢܪܕܘܦ ܬܒ̇ܥ ܥܝܪܬܐ ܕܕܡܐ ܒܬܪܗ ܘܠܐ ܢܫܠܡܘܢܗ ܒܐ̈ܝܕܘܗܝ ܠܩܛܘܠܐ ܡܛܠ ܕܟܕ ܠܐ ܝ̇ܕܥ ܡܚܝܗܝ ܠܚܒܪܗ ܘܠܐ ܣ̇ܢܐ ܗܘܐ ܠܗ ܡܢ ܩܕܡ ܝܘܡ̈ܬܐ

25. Joshua 20:6

    ܘܢܬܒ ܒܩܪܝܬܐ ܗ̇ܝ ܥܕܡܐ ܕܩ̇ܐܡ ܩܕܡ ܟܢܘܫܬܐ ܒܕܝܢܐ ܥܕܡܐ ܕܢܡܘܬ ܟܗܢܐ ܪܒܐ ܕܢܗܘܐ ܒܝܘܡ̈ܬܐ ܗ̇ܢܘܢ ܘܗܝܕܝܢ ܢܗܦܘܟ ܩܛܘܠܐ ܘܢܐܬܐ ܠܒܝܬܗ ܘܠܩܪܝܬܗ ܘܠܡܕܝܢܬܐ ܕܥܪܩ ܡܢܗ̇

26. Joshua 20:7

    ܗܝܕܝܢ ܦܪܫܘ ܩܘܪ̈ܝܐ ܗܠܝܢ ܠܒܝܬ ܓܘܣܐ ܠܪܩܡ ܕܒܓܠܝܠܐ ܕܒܛܘܪܐ ܕܢܦܬܠܝ ܘܠܫܟܝܡ ܕܒܛܘܪܐ ܕܐܦܪܝܡ ܘܠܩܘܪܝܬ ܐܪܒܥ ܕܗܝ ܗܝ ܚܒܪܘܢ ܕܒܛܘܪܐ ܕܝܗܘܕܐ

27. Joshua 20:8

    ܘܒܥܒܪܐ ܕܝܘܪܕܢܢ ܕܐܝܪܝܚܘ ܡܢ ܡܕܢܚܐ ܝܗܒܘ ܒܘܨܪ ܕܒܡܕܒܪܐ ܕܝ̇ܬܒܐ ܒܦܩܥܬܐ ܡܢ ܫܒܛܐ ܕܪܘܒܝܠ ܘܪܡܬ ܓܠܥܕ ܡܢ ܫܒܛܐ ܕܓܕ ܘܓܘܠܢ ܕܒܡܬܢܝܢ ܡܢ ܫܒܛܐ ܕܡܢܫܐ

28. Joshua 20:9

    ܗܠܝܢ ܐܢܝ̈ܢ ܩܘܪ̈ܝܐ ܕܫܘܘܙܒܐ ܘܕܒܝܬ ܓܘܣܐ ܠܟܠܗܘܢ ܒܢ̈ܝ ܐܝܣܪܝܠ ܘܠܥܡܘܪ̈ܐ ܕܥ̇ܡܪܝܢ ܒܝܢܬܗܘܢ ܕܢܗܘܐ ܥ̇ܪܩ ܠܬܡܢ ܟܠ ܡ̇ܢ ܕܩ̇ܛܠ ܢܦܫܐ ܡܢ ܫܠܝܐ ܕܠܐ ܢܫܬܠܡ ܒܐܝܕܐ ܕܬܒ̇ܥ ܥܝܪܬܐ ܕܕܡܐ ܥܕܡܐ ܕܢܩܘܡ ܩܕܡ ܟܢܘܫܬܐ ܒܕܝܢܐ

29. Joshua 21:1

    ܘܩܪܒܘ ܪ̈ܝܫܐ ܕܟܗ̈ܢܐ ܘܠܘ̈ܝܐ ܠܘܬ ܐܠܝܥܙܪ ܟܗܢܐ ܘܠܘܬ ܝܫܘܥ ܒܪܢܘܢ ܘܠܘܬ ܪ̈ܝܫܐ ܕܐ̈ܒܗܬܐ ܕܫܒ̈ܛܐ ܕܐܝܣܪܝܠ

30. Joshua 21:2

    ܘܐܡܪܘ ܠܗܘܢ ܒܫܝܠܘ ܒܐܪܥܐ ܕܟܢܥܢ ܡܪܝܐ ܦܩܕ ܒܐܝܕܐ ܕܡܘܫܐ ܕܢܬܠܘܢ ܠܢ ܩܘܪ̈ܝܐ ܠܡܥܡܪ ܒܗܝܢ ܘܐܓܘܪ̈ܣܝܗܝܢ ܠܒܥܝܪܢ

31. Joshua 21:3

    ܘܝܗܒܘ ܒܢ̈ܝ ܐܝܣܪܐܝܠ ܠܠܘ̈ܝܐ ܡܢ ܝܪܬܘܬܗܘܢ ܥܠ ܡܠܬ ܦܘܡܗ ܕܡܪܝܐ ܩܘܪ̈ܝܐ ܗܠܝܢ ܘܐܓܘܪ̈ܣܝܗܝܢ

32. Joshua 21:4

    ܘܢܦܩܬ ܦܨܬܐ ܕܫܪܒܬܐ ܕܩܗܬ ܕܒܢ̈ܝ ܐܗܪܘܢ ܟܗܢܐ ܡܢ ܠܘ̈ܝܐ ܘܝܗܒܘ ܠܗܘܢ ܡܢ ܫܒܛܐ ܕܝܗܘܕܐ ܘܡܢ ܫܒܛܐ ܕܫܡܥܘܢ ܘܡܢ ܫܒܛܐ ܕܒܢܝܡܝܢ ܒܦܨܬܐ ܩܘܪ̈ܝܐ ܬܠܬܥܣܪ̈ܐ

33. Joshua 21:5

    ܘܠܒܢ̈ܘܗܝ ܕܩܗܬ ܕܐܫܬܚܪܘ ܝܗܒܘ ܠܗܘܢ ܡܢ ܫܒܛܐ ܕܐܦܪܝܡ ܘܡܢ ܫܒܛܐ ܕܕܢ ܘܡܢ ܦܠܓܗ ܕܫܒܛܐ ܕܡܢܫܐ ܩܘܪ̈ܝܐ ܥܣܪ

34. Joshua 21:6

    ܘܠܒܢ̈ܘܗܝ ܕܓܪܫܘܢ ܝܗܒܘ ܠܗܘܢ ܡܢ ܫܒܛܐ ܕܐܝܣܟܪ ܘܡܢ ܫܒܛܐ ܕܐܫܝܪ ܘܡܢ ܫܒܛܐ ܕܢܦܬܠܝ ܘܡܢ ܦܠܓܗ ܕܫܒܛܐ ܕܡܢܫܐ ܒܡܬܢܝܢ ܒܦܨܬܐ ܩܘܪ̈ܝܐ ܬܠܬܥܣܪ̈ܐ

35. Joshua 21:7

    ܘܠܒܢ̈ܘܗܝ ܕܡܪܪܝ ܠܫܪ̈ܒܬܗܘܢ ܝܗܒܘ ܠܗܘܢ ܡܢ ܫܒܛܐ ܕܪܘܒܝܠ ܘܡܢ ܫܒܛܐ ܕܓܕ ܘܡܢ ܫܒܛܐ ܕܙܒܘܠܘܢ ܩܘܪ̈ܝܐ ܬܪ̈ܬܥܣܪܐ

36. Joshua 21:8

    ܘܝܗܒܘ ܒܢ̈ܝ ܐܝܣܪܝܠ ܠܠܘ̈ܝܐ ܩܘܪ̈ܝܐ ܗܠܝܢ ܘܐܓܘܪ̈ܣܝܗܝܢ ܒܦܨ̈ܐ ܐܝܟܢܐ ܕܦܩܕ ܡܪܝܐ ܠܡܘܫܐ

37. Joshua 21:9

    ܘܗܠܝܢ ܫ̈ܡܗܐ ܕܩܘܪ̈ܝܐ ܕܝܗܒܘ ܡܢ ܫܒܛܐ ܕܝܗܘܕܐ ܘܡܢ ܫܒܛܐ ܕܫܡܥܘܢ ܩܘܪ̈ܝܐ ܒܫܡ̈ܗܝܗܝܢ

38. Joshua 21:10

    ܘܗ̈ܘܝ ܠܒܢ̈ܘܗܝ ܕܐܗܪܘܢ ܡܢ ܫܪܒܬܐ ܕܩܗܬ ܡܢ ܒܢ̈ܘܗܝ ܕܠܘܝ ܡܛܠ ܕܕܝܠܗܘܢ ܗܘܬ ܦܨܬܐ ܩܕܡܝܬܐ

39. Joshua 21:11

    ܘܝܗܒܘ ܠܗܘܢ ܠܩܘܪܝܬ ܐܪܒܥ ܕܐܒܘܗܘܢ ܕܓܢܒܪ̈ܐ ܕܗܝ ܗܝ ܚܒܪܘܢ ܕܒܛܘܪܐ ܕܝܗܘܕܐ ܘܠܐܓܘܪ̈ܣܝܗ̇ ܟܕ ܚ̇ܕܪܝܢ ܠܗ̇

40. Joshua 21:12

    ܘܠܚܩ̈ܠܬܗ̇ ܕܩܪܝܬܐ ܘܠܫܪܟܐ ܕܐܓܘܪ̈ܣܝܗ̇ ܝܗܒܘ ܠܟܠܒ ܒܪ ܝܘܦܢܐ ܒܝܪܬܘܬܗ

41. Joshua 21:13

    ܘܠܒܢ̈ܝ ܐܗܪܘܢ ܟܗܢܐ ܝܗܒܘ ܩܪܝܬܐ ܕܡܫܘ̈ܙܒܐ ܡܢ ܩ̈ܛܝܠܐ ܠܚܒܪܘܢ ܘܠܐܓܘܪ̈ܣܝܗ̇ ܘܠܠܒܢܐ ܘܠܐܓܘܪ̈ܣܝܗ̇

42. Joshua 21:14

    ܘܠܝܪܬ ܘܠܐܓܘܪ̈ܣܝܗ̇ ܘܠܐܫܬܡܘܥ ܘܠܐܓܘܪ̈ܣܝܗ̇

43. Joshua 21:15

    ܘܠܚܠܘ ܘܠܐܓܘܪ̈ܣܝܗ̇ ܘܠܕܒܝܪ ܘܠܐܓܘܪ̈ܣܝܗ̇

44. Joshua 21:16

    ܘܠܥܝܢ ܘܠܐܓܘܪ̈ܣܝܗ̇ ܘܠܥܛܐ ܘܠܐܓܘܪ̈ܣܝܗ̇ ܘܠܒܝܬ ܫܡܫ ܘܠܐܓܘܪ̈ܣܝܗ̇ ܩܘܪ̈ܝܐ ܬܫܥ ܡܢ ܫܒܛܐ ܕܝܗܘܕܐ ܘܕܫܡܥܘܢ

45. Joshua 21:17

    ܘܡܢ ܫܒܛܐ ܕܒܢܝܡܝܢ ܓܒܥܘܢ ܘܐܓܘܪ̈ܣܝܗ̇ ܘܓܒܥ ܘܐܓܘܪ̈ܣܝܗ̇

46. Joshua 21:18

    ܘܥܢܬܘܬ ܘܐܓܘܪ̈ܣܝܗ̇ ܘܥܠܡܘܢ ܘܐܓܘܪ̈ܣܝܗ̇ ܡܕܝܢ̈ܬܐ ܐܪܒܥ

47. Joshua 21:19

    ܟܠܗܝܢ ܩܘܪ̈ܝܐ ܕܒܢ̈ܝ ܐܗܪܘܢ ܟܗܢܐ ܬܠܬܥܣܪ̈ܐ ܘܐܓܘܪ̈ܣܝܗܝܢ

48. Joshua 21:20

    ܘܠܫܪܒܬܐ ܕܠܘ̈ܝܐ ܕܒܢ̈ܝ ܩܗܬ ܕܐܫܬܚܪܘ ܡܢ ܒܢ̈ܝ ܩܗܬ ܗ̈ܘܝ ܩܘܪ̈ܝܐ ܕܦܨ̈ܝܗܘܢ ܡܢ ܫܒܛܐ ܕܐܦܪܝܡ

49. Joshua 21:21

    ܘܝܗܒܘ ܠܗܘܢ ܩܪܝܬܐ ܕܒܝܬ ܡܫܘܙܒܘܬܐ ܕܩ̈ܛܘܠܐ ܠܫܟܝܡ ܕܒܛܘܪܐ ܕܐܦܪܝܡ ܘܠܐܓܘܪ̈ܣܝܗ̇ ܘܠܓܕܪ ܘܠܐܓܘܪ̈ܣܝܗ̇

50. Joshua 21:22

    ܘܠܩܒܨܝܡ ܘܠܐܓܘܪ̈ܣܝܗ̇ ܘܠܒܝܬ ܚܘܪܢ ܘܠܐܓܘܪ̈ܣܝܗ̇ ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

51. Joshua 21:23

    ܘܡܢ ܫܒܛܐ ܕܕܢ ܐܬܠܩܐ ܘܐܓܘܪ̈ܣܝܗ̇ ܘܓܒܬܘܢ ܘܐܓܘܪ̈ܣܝܗ̇

52. Joshua 21:24

    ܘܐܠܘܢ ܘܐܓܘܪ̈ܣܝܗ̇ ܘܓܬܪܡܘܢ ܘܐܓܘܪ̈ܣܝܗ̇ ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

53. Joshua 21:25

    ܘܡܢ ܦܠܓܗ ܕܫܒܛܐ ܕܡܢܫܐ ܬܥܢܟ ܘܐܓܘܪ̈ܣܝܗ̇ ܘܓܬܪܡܘܢ ܘܐܓܘܪ̈ܣܝܗ̇ ܩܘܪ̈ܝܐ ܬܪ̈ܬܝܢ ܘܐܓܘܪ̈ܣܝܗܝܢ

54. Joshua 21:26

    ܟܠܗܝܢ ܩܘܪ̈ܝܐ ܘܡܕܝܢ̈ܬܐ ܥܣܪ ܘܐܓܘܪ̈ܣܝܗܝܢ ܗ̈ܘܝ ܠܫܪܒܬܐ ܕܒܢ̈ܘܗܝ ܕܩܗܬ ܕܐܫܬܚܪܘ

55. Joshua 21:27

    ܘܠܒܢ̈ܘܗܝ ܕܓܪܫܘܢ ܡܢ ܫܪܒܬܐ ܕܠܘ̈ܝܐ ܗ̈ܘܝ ܩܘܪ̈ܝܗܘܢ ܡܢ ܦܠܓܗ ܕܫܒܛܐ ܕܡܢܫܐ ܡܢ ܩܪܝܬܐ ܕܒܝܬ ܫܘܘܙܒܐ ܕܩ̈ܛܘܠܐ ܓܘܠܢ ܕܒܡܬܢܝܢ ܘܐܓܘܪ̈ܣܝܗ̇ ܘܥܣܬܪܘܬ ܘܐܓܘܪ̈ܣܝܗ̇ ܩܘܪ̈ܝܐ ܬܪ̈ܬܝܢ ܘܐܓܘܪ̈ܣܝܗܝܢ

56. Joshua 21:28

    ܘܡܢ ܫܒܛܐ ܕܐܝܣܟܪ ܩܫܝܢ ܘܐܓܘܪ̈ܣܝܗ̇ ܘܪܒܬ ܘܐܓܘܪ̈ܣܝܗ̇

57. Joshua 21:29

    ܘܝܪܡܘܬ ܘܐܓܘܪ̈ܣܝܗ̇ ܘܥܝܢ ܓܕ ܘܐܓܘܪ̈ܣܝܗ̇ ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

58. Joshua 21:30

    ܘܡܢ ܫܒܛܐ ܕܐܫܝܪ ܡܫܐܝܠ ܘܐܓܘܪ̈ܣܝܗ̇ ܘܥܟܪܘܢ ܘܐܓܘܪ̈ܣܝܗ̇

59. Joshua 21:31

    ܘܚܠܩܘܬ ܘܐܓܘܪ̈ܣܝܗ̇ ܘܪܚܘܒ ܘܐܓܘܪ̈ܣܝܗ̇ ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

60. Joshua 21:32

    ܘܡܢ ܫܒܛܐ ܕܢܦܬܠܝ ܩܪܝܬܐ ܕܒܝܬ ܫܘܘܙܒܐ ܕܩ̈ܛܘܠܐ ܪܩܡ ܕܒܓܠܝܠܐ ܘܐܓܘܪ̈ܣܝܗ̇ ܘܚܡܪܘܕ ܘܐܓܘܪ̈ܣܝܗ̇ ܘܩܪܬܢ ܘܐܓܘܪ̈ܣܝܗ̇ ܩܘܪ̈ܝܐ ܬܠܬ ܘܐܓܘܪ̈ܣܝܗܝܢ

61. Joshua 21:33

    ܟܠܗܝܢ ܩܘܪ̈ܝܐ ܕܫܪܒܬܐ ܕܒܢ̈ܝ ܓܪܫܘܢ ܩܘܪ̈ܝܐ ܬܠܬܥܣܪ̈ܐ ܘܐܓܘܪ̈ܣܝܗܝܢ

62. Joshua 21:34

    ܘܡܢ ܫܒܛܐ ܕܙܒܘܠܘܢ ܢܟܚ ܘܐܓܘܪ̈ܣܝܗ̇ ܘܩܪܬܢ ܘܐܓܘܪ̈ܣܝܗ̇

63. Joshua 21:35

    ܘܪܡܢ ܘܐܓܘܪ̈ܣܝܗ̇ ܘܝܗܠܐ ܘܐܓܘܪ̈ܣܝܗ̇ ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

64. Joshua 21:36

    ܗ̈ܘܝ ܩܘܪ̈ܝܗܘܢ ܡܢ ܫܒܛܐ ܕܪܘܒܝܠ ܝܗܨ ܘܐܓܘܪ̈ܣܝܗ̇

65. Joshua 21:37

    ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

66. Joshua 21:38

    ܘܡܢ ܫܒܛܐ ܕܓܕ ܩܪܝܬܐ ܕܫܘܘܙܒܐ ܕܩ̈ܛܘܠܐ ܪܡܬ ܓܠܥܕ ܘܐܓܘܪ̈ܣܝܗ̇ ܘܡܚܢܝܡ ܘܐܓܘܪ̈ܣܝܗ̇

67. Joshua 21:39

    ܘܚܫܒܘܢ ܘܐܓܘܪ̈ܣܝܗ̇ ܘܝܥܙܝܪ ܘܐܓܘܪ̈ܣܝܗ̇ ܩܘܪ̈ܝܐ ܐܪܒܥ ܘܐܓܘܪ̈ܣܝܗܝܢ

68. Joshua 21:40

    ܗܠܝܢ ܩܘܪ̈ܝܐ ܕܒܢ̈ܝ ܡܪܪܝ ܠܫܪ̈ܒܬܗܘܢ ܕܐܫܬܚܪܘ ܡܢ ܫܪܒܬܐ ܕܠܘ̈ܝܐ ܘܣܠܩ ܒܦܨܬܗܘܢ ܩܘܪ̈ܝܐ ܬܪ̈ܬܥܣܪܐ ܘܐܓܘܪ̈ܣܝܗܝܢ

69. Joshua 21:41

    ܘܟܠܗܝܢ ܩܘܪ̈ܝܐ ܗܠܝܢ ܕܠܘ̈ܝܐ ܒܓܘ ܝܪܬܘܬܐ ܐܢܝ̈ܢ ܕܒܢ̈ܝ ܐܝܣܪܝܠ ܘܗ̈ܘܝ ܩܘܪ̈ܝܐ ܕܠܘ̈ܝܐ ܐܪܒܥܝܢ ܘܬܡܢܐ ܘܐܓܘܪ̈ܣܝܗܝܢ

70. Joshua 21:42

    ܝ̇ܬܒ̈ܢ ܗ̈ܘܝ ܕܝܢ ܩܘܪ̈ܝܐ ܘܡܕܝܢ̈ܬܐ ܗܠܝܢ ܩܪܝܬܐ ܩܪܝܬܐ ܘܐܓܘܪ̈ܣܝܗܝܢ ܚܕܝܪܝܢ ܠܗܝܢ ܘܟܠܗܝܢ ܩܘܪ̈ܝܐ ܗܠܝܢ ܘܡܕܝܢ̈ܬܐ ܗܟܢܐ

71. Joshua 21:43

    ܘܝܗܒ ܡܪܝܐ ܠܐܝܣܪܝܠ ܟܠܗ̇ ܐܪܥܐ ܕܐܝܡܐ ܠܡܬܠ ܠܐ̈ܒܗܝܗܘܢ ܘܝܪܬܘܗ̇ ܘܐܝܬܒܘ ܒܗ̇

72. Joshua 21:44

    ܘܐܢܝܚ ܠܗܘܢ ܡܪܝܐ ܡܢ ܟܠܗܘܢ ܚܕܪ̈ܝܗܘܢ ܐܝܟ ܕܐܝܡܐ ܠܐ̈ܒܗܝܗܘܢ ܘܐܢܫ ܡܢ ܒ̈ܥܠܕܒܒܝܗܘܢ ܠܐ ܩܡ ܩܕܡܝܗܘܢ ܐܠܐ ܐܫܠܡ ܐܢܘܢ ܡܪܝܐ ܠܟܘܠܗܘܢ ܒ̈ܥܠܕܒܒܝܗܘܢ ܒܐ̈ܝܕܝܗܘܢ

73. Joshua 21:45

    ܘܠܐ ܒܛܠܬ ܚܕܐ ܡܢ ܟܠܗܝܢ ܡ̈ܠܐ ܛܒ̈ܬܐ ܕܐܡܪ ܡܪܝܐ ܠܕܒܝܬ ܐܝܣܪܝܠ ܐܠܐ ܟܘܠܗܝܢ ܗ̈ܘܝ

74. Joshua 22:1

    ܗܝܕܝܢ ܩܪܐ ܝܫܘܥ ܠܒܢ̈ܝ ܪܘܒܝܠ ܘܠܒܢ̈ܝ ܓܕ ܘܠܦܠܓܗ ܕܫܒܛܐ ܕܡܢܫܐ

75. Joshua 22:2

    ܘܐܡܪ ܠܗܘܢ ܐܢܬܘܢ ܢܛܪܬܘܢ ܟܠ ܡܕܡ ܕܐܡܪ ܠܟܘܢ ܡܘܫܐ ܥܒܕܗ ܕܡܪܝܐ ܘܫܡܥܬܘܢ ܒܩܠܝ ܠܟܠ ܡܕܡ ܕܦܩ̇ܕܬܟܘܢ

76. Joshua 22:3

    ܘܠܐ ܫܒܩܬܘܢ ܠܐ̈ܚܝܟܘܢ ܗܐ ܝܘܡ̈ܬܐ ܣ̈ܓܝܐܐ ܥܕܡܐ ܠܝܘܡܢܐ ܘܢܛܪܬܘܢ ܦܘܩ̈ܕܢܘܗܝ ܕܡܪܝܐ ܐܠܗܟܘܢ

77. Joshua 22:4

    ܘܗܫܐ ܗܐ ܐܢܝܚ ܡܪܝܐ ܐܠܗܐ ܠܐ̈ܚܝܟܘܢ ܐܝܟܢܐ ܕܐܡܪ ܠܗܘܢ ܡܟܝܠ ܐܬܦܢܘ ܘܙܠܘ ܠܩܘܪ̈ܝܟܘܢ ܘܠܐܪܥܐ ܕܝܪܬܘܬܟܘܢ ܕܝܗܒ ܠܟܘܢ ܡܘܫܐ ܥܒܕܗ ܕܡܪܝܐ ܒܥܒܪܐ ܕܝܘܪܕܢܢ ܡܢ ܡܕܢܚܐ

78. Joshua 22:5

    ܒܠܚܘܕ ܕܝܢ ܐܙܕܗܪܘ ܛܒ ܘܥܒܕܘ ܦܘܩ̈ܕܢܐ ܘܢܡ̈ܘܣܐ ܕܦܩܕܟܘܢ ܡܘܫܐ ܥܒܕܗ ܕܡܪܝܐ ܠܡܪܚܡ ܠܡܪܝܐ ܐܠܗܟܘܢ ܘܠܡܛܪ ܦܘܩ̈ܕܢܘܗܝ ܘܠܡܬܢܩܦܘ ܠܗ ܘܠܡܦܠܚܗ ܒܟܠܗ ܠܒܟܘܢ ܘܒܟܠܗ̇ ܢܦܫܟܘܢ

79. Joshua 22:6

    ܘܒܪܟ ܐܢܘܢ ܝܫܘܥ ܘܫܕܪ ܐܢܘܢ ܘܐܙܠܘ ܠܩܘܪ̈ܝܗܘܢ

80. Joshua 22:7

    ܘܠܦܠܓܗ ܕܫܒܛܐ ܕܡܢܫܐ ܝܗܒ ܡܘܫܐ ܒܡܬܢܝܢ ܘܠܦܠܓܗ ܝܗܒ ܝܫܘܥ ܥܡ ܐ̈ܚܝܗܘܢ ܒܥܒܪܐ ܕܝܘܪܕܢܢ ܡܢ ܡܥܪܒܐ ܘܫܕܪ ܐܢܘܢ ܝܫܘܥ ܘܐܙܠܘ ܠܩܘܪ̈ܝܗܘܢ ܘܒܪܟ ܐܢܘܢ

81. Joshua 22:8

    ܘܐܡܪ ܠܗܘܢ ܒܢܟܣ̈ܐ ܣ̈ܓܝܐܐ ܗܦܘܟܘ ܠܩܘܪ̈ܝܟܘܢ ܘܠܐܪܥܐ ܕܝܪܬܘܬܟܘܢ ܘܒܩܢܝܢܐ ܕܛܒ ܣܓܝ ܒܣܐܡܐ ܘܒܕܗܒܐ ܘܒܢܚܫܐ ܘܒܦܪܙܠܐ ܘܒܢܚ̈ܬܐ ܕܣܓܝܐܝܢ ܛܒ ܘܦܠܓܘ ܒܙܬܐ ܕܒ̈ܥܠܕܒܒܝܟܘܢ ܥܡ ܐ̈ܚܝܟܘܢ

82. Joshua 22:9

    ܘܗܦܟܘ ܘܐܙܠܘ ܒܢ̈ܝ ܪܘܒܝܠ ܘܒܢ̈ܝ ܓܕ ܘܦܠܓܗ ܕܫܒܛܐ ܕܡܢܫܐ ܡܢ ܠܘܬ ܒܢ̈ܝ ܐܝܣܪܝܠ ܡܢ ܫܝܠܘ ܕܒܐܪܥܐ ܕܟܢܥܢ ܠܡܐܙܠ ܠܐܪܥܐ ܕܓܠܥܕ ܠܐܪܥܐ ܕܝܪܬܘܬܗܘܢ ܕܐܝܪܬܘ ܒܗ̇ ܥܠ ܡܠܬ ܦܘܡܗ ܕܡܪܝܐ ܒܐܝܕܐ ܕܡܘܫܐ

83. Joshua 22:10

    ܘܐܬܘ ܠܓܠܓܠܐ ܕܥܠ ܓܢܒ ܝܘܪܕܢܢ ܕܒܐܪܥܐ ܕܟܢܥܢ ܘܒܢܘ ܬܡܢ ܒܢ̈ܝ ܪܘܒܝܠ ܘܒܢ̈ܝ ܓܕ ܘܦܠܓܘܬ ܫܒܛܐ ܕܡܢܫܐ ܡܕܒܚܐ ܥܠ ܓܢܒ ܝܘܪܕܢܢ ܡܕܒܚܐ ܪܒܐ ܕܚܙܘܐ

84. Joshua 22:11

    ܘܫܡܥܘ ܒܢ̈ܝ ܐܝܣܪܝܠ ܕܒܢ̈ܝ ܪܘܒܝܠ ܘܒܢ̈ܝ ܓܕ ܘܦܠܓܘܬ ܫܒܛܐ ܕܡܢܫܐ ܒܢܘ ܡܕܒܚܐ ܠܘܩܒܠ ܐܪܥܐ ܕܟܢܥܢ ܒܓܠܓܠܐ ܕܥܠ ܓܢܒ ܝܘܪܕܢܢ ܒܐܪܥܐ ܕܒܢ̈ܝ ܐܝܣܪܝܠ

85. Joshua 22:12

    ܘܐܬܟܢܫܘ ܟܘܠܗ̇ ܟܢܘܫܬܐ ܕܒܢ̈ܝ ܐܝܣܪܝܠ ܠܫܝܠܘ ܠܡܣܩ ܥܠܝܗܘܢ ܠܩܪܒܐ

86. Joshua 22:13

    ܘܫܕܪܘ ܒܢ̈ܝ ܐܝܣܪܝܠ ܠܘܬ ܒܢ̈ܝ ܪܘܒܝܠ ܘܠܘܬ ܒܢ̈ܝ ܓܕ ܘܠܘܬ ܦܠܓܗ ܕܫܒܛܐ ܕܡܢܫܐ ܠܐܪܥܐ ܕܓܠܥܕ ܠܦܝܢܚܝܣ ܒܪ ܐܠܝܥܙܪ ܟܗܢܐ

87. Joshua 22:14

    ܘܥܣܪܐ ܪ̈ܘܪܒܢܝܢ ܥܡܗ ܚܕ ܚܕ ܪܒܐ ܡܢ ܟܠܗܘܢ ܫܒ̈ܛܐ ܕܐܝܣܪܝܠ ܘܗܢܘܢ ܓܒܪ̈ܐ ܗܠܝܢ ܪ̈ܝܫܐ ܗܘܘ ܕܚ̈ܝܠܘܬܐ ܕܐܝܣܪܝܠ

88. Joshua 22:15

    ܘܐܬܘ ܠܘܬ ܒܢ̈ܝ ܪܘܒܝܠ ܘܠܘܬ ܒܢ̈ܝ ܓܕ ܘܠܘܬ ܦܠܓܗ ܕܫܒܛܐ ܕܡܢܫܐ ܠܐܪܥܐ ܕܓܠܥܕ ܘܡܠܠܘ ܥܡܗܘܢ ܘܐܡܪܘ ܠܗܘܢ

89. Joshua 22:16

    ܗܟܢܐ ܐ̇ܡܪܝܢ ܟܠܗ̇ ܟܢܘܫܬܐ ܕܡܪܝܐ ܡܢܐ ܗܝ ܟܕܒܘܬܐ ܗܕܐ ܕܟܕܒܬܘܢ ܒܐܠܗܐ ܕܐܝܣܪܝܠ ܘܗܦܟܬܘܢ ܡܢ ܒܬܪܗ ܕܡܪܝܐ ܘܒܢܝܬܘܢ ܠܟܘܢ ܡܕܒܚܐ ܕܬܦܪܩܘܢ ܡܢ ܕܚܠܬܗ ܕܡܪܝܐ

90. Joshua 22:17

    ܠܐ ܟܕܘ ܠܢ ܚܛܝܬܐ ܕܦܥܘܪ ܕܠܐ ܐܬܕܟܝܢ ܡܢܗ̇ ܥܕܡܐ ܠܝܘܡܢܐ ܘܗܘܐ ܡܘܬܢܐ ܒܟܢܘܫܬܗ ܕܡܪܝܐ

91. Joshua 22:18

    ܘܐܢܬܘܢ ܡܐ ܕܗܦܟܬܘܢ ܝܘܡܢܐ ܡܢ ܕܚܠܬܗ ܕܡܪܝܐ ܡܢ ܡܚܪ ܥܠ ܟܘܠܗ̇ ܗܘ ܟܢܘܫܬܐ ܕܐܝܣܪܝܠ ܗ̇ܘܐ ܪܘܓܙܐ

92. Joshua 22:19

    ܒܪܡ ܕܝܢ ܐܢ ܡܛܘܫܐ ܗܝ ܐܪܥܐ ܕܝܪܬܘܬܟܘܢ ܥܒܪܘ ܠܟܘܢ ܠܐܪܥܐ ܕܝܪܬܘܬܗ ܕܡܪܝܐ ܐܝܟܐ ܕܫܪܐ ܡܫܟܢܗ ܕܡܪܝܐ ܘܐܝܪܬܘ ܥܡܢ ܘܒܕܚܠܬܗ ܕܡܪܝܐ ܠܐ ܬܒܣܘܢ ܘܥܠܝܢ ܠܐ ܬܡܪܕܘܢ ܡܛܠ ܕܒܢܝܬܘܢ ܠܟܘܢ ܡܕܒܚܐ ܠܒܪ ܡܢ ܡܕܒܚܗ ܕܡܪܝܐ ܐܠܗܐ ܕܐܝܣܪܝܠ

93. Joshua 22:20

    ܠܐ ܚܙܝܬܘܢ ܕܥܟܪ ܒܪ ܟܪܡܝ ܕܪܓ ܗܘܐ ܘܢܣܒ ܡܢ ܚܪܡܐ ܘܥܠ ܟܠܗ̇ ܟܢܘܫܬܐ ܕܐܝܣܪܝܠ ܗܘܐ ܪܘܓܙܐ ܘܗ̇ܘ ܚܕ ܗܘܐ ܓܒܪ ܘܟܠܢ ܒܠܥܢ ܒܚܛܝܬܗ

94. Joshua 22:21

    ܘܥܢܘ ܒܢ̈ܝ ܪܘܒܝܠ ܘܒܢ̈ܝ ܓܕ ܘܦܠܓܗ ܕܫܒܛܐ ܕܡܢܫܐ ܘܡܠܠܘ ܥܡ ܦܝܢܚܝܣ ܒܪ ܐܠܝܥܙܪ ܟܗܢܐ ܘܥܡ ܪ̈ܝܫܐ ܕܚ̈ܝܠܘܬܐ ܕܐܝܣܪܝܠ ܘܐܡܪܘ ܠܗܘܢ

95. Joshua 22:22

    ܡܪܝܐ ܗܘ ܐܠܗܐ ܕܐ̈ܠܗܐ ܐܠܗ ܐ̈ܠܗܝܢ ܡܪܝܐ ܗܘ ܘܗܘܝܘ ܐܠܗܢ ܘܠܐܝܣܪܝܠ ܗܘ ܝ̇ܕܥ ܘܠܢ ܗܘ ܝ̇ܕܥ ܐܢ ܕܢܦܪܘܩ ܡܢܗ ܘܐܢ ܕܢܥܠܐ ܗܘ ܒܕܚܠܬܗ ܕܡܪܝܐ ܥܒܕܢ ܗܟܢܐ ܠܐ ܢܦܪܩܢ ܝܘܡܢܐ

96. Joshua 22:23

    ܐܢ ܒܢܝܢ ܠܢ ܡܕܒܚܐ ܕܢܗܦܘܟ ܡܢ ܕܚܠܬܗ ܕܡܪܝܐ ܐܘ ܕܢܩܪܒ ܥܠܘܗܝ ܕܒܚܬܐ ܐܘ ܦܘܠܚܢ ܐܚܪܝܢ ܡܪܝܐ ܢܬܒܥ ܒܐܝܕܢ

97. Joshua 22:24

    ܐܠܐ ܗܘܐ ܡܢ ܕܚܠܬܗ ܥܒܕܢܗ̇ ܗܕܐ ܘܕܠܐ ܢܐܡܪܘܢ ܡܢ ܡܚܪ ܒܢ̈ܝܟܘܢ ܠܒܢ̈ܝܢ ܡܢܐ ܐܝܬ ܠܟܘܢ ܠܘܬ ܡܪܝܐ ܐܠܗܐ ܕܐܝܣܪܝܠ

98. Joshua 22:25

    ܒܢ̈ܝ ܪܘܒܝܠ ܘܒܢ̈ܝ ܓܕ ܕܗܐ ܬܚܘܡܐ ܝܗܒ ܡܪܝܐ ܒܝܢܝܢ ܘܠܟܘܢ ܝܘܪܕܢܢ ܗܢܐ ܡܟܝܠ ܠܝܬ ܠܟܘܢ ܡܢܬܐ ܒܡܪܝܐ ܐܠܗܐ ܕܐܝܣܪܝܠ ܘܢܒܛܠܘܢ ܒܢ̈ܝܟܘܢ ܡܢ ܡܚܪ ܠܒܢ̈ܝܢ ܕܠܐ ܢܕܚܠܘܢ ܠܡܪܝܐ

99. Joshua 22:26

    ܡܛܠ ܗܢܐ ܗܘ ܐܡܪܢ ܕܢܥܒܕ ܠܢ ܐܬܪܐ ܘܢܒܢܐ ܠܢ ܡܕܒܚܐ ܠܐ ܠܕܒܚܬܐ ܘܠܐ ܠܩܘܪܒܢܐ

100. Joshua 22:27

     ܐܠܐ ܠܣܗܕܘܬܐ ܒܝܢܝܢ ܘܠܟܘܢ ܘܒܝܬ ܕܪ̈ܝܢ ܡܢ ܒܬܪܢ ܘܚܢܢ ܘܕܪ̈ܝܢ ܡܢ ܒܬܪܢ ܦܘܠܚܢܗ ܗܘ ܕܡܪܝܐ ܦ̇ܠܚܝܢܢ ܩܕܡܘܗܝ ܒܥ̈ܠܘܬܢ ܘܒܕܒܚ̈ܝܢ ܘܒܩܘܪ̈ܒܢܝܢ ܒܐܬܪܐ ܕܓ̇ܒܐ ܡܪܝܐ ܠܡܫܪܝܘ ܫܡܗ ܬܡܢ ܘܕܠܐ ܢܐܡܪܘܢ ܒܢ̈ܝܟܘܢ ܡܢ ܡܚܪ ܠܒܢ̈ܝܢ ܠܝܬ ܠܟܘܢ ܡܢܬܐ ܒܡܪܝܐ

← Previous · Next → — showing 501–600 of 656

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.