← All works

Peshitta Job

Peshitta (Syriac Old Testament) · 1,065 sections

1. Job 13:17

   ܫܡܥܘ ܡܫܡܥ ܡ̈ܠܝ ܘܬܚܘܝܬܝ ܐܡܪ ܩܕܡܝܟܘܢ

2. Job 13:18

   ܗܐ ܐܦ ܐܢܐ ܡ̇ܝܬܐ ܐܢܐ ܕܝܢܝ ܘܝܕܥ̇ ܐܢܐ ܕܐܢܐ ܗܘ ܙܟܝ

3. Job 13:19

   ܡ̇ܢ ܗܘ ܕܐ̇ܢ ܥܡܝ ܕܗܫܐ ܐܫܬܘܩ ܘܐܬܬܢܝܚ

4. Job 13:20

   ܒܪܡ ܬܪ̈ܬܝܢ ܠܐ ܬܥܒܪ ܡܢܝ ܘܗܝܕܝܢ ܡܢ ܩܕܡܝܟ ܠܐ ܐܬܛܥܐ

5. Job 13:21

   ܐܝܕܟ ܠܐ ܬܦܪܩ ܡܢܝ ܘܕܚܠܬܟ ܠܐ ܬܙܝܥܢܝ

6. Job 13:22

   ܘܩܪܝܢܝ ܘܐܢܐ ܐܥܢܐ ܐܘ ܐܡܠܠ ܘܐܬܝܒܝܢܝ ܦܬܓܡܐ

7. Job 13:23

   ܟܡܐ ܠܝ ܚ̈ܘܒܐ ܘܚ̈ܛܗܐ ܚ̈ܘܒܝ ܘܚ̈ܛܗܝ ܐܘܕܥܝܢܝ

8. Job 13:24

   ܠܡܢܐ ܡܗܦܟ ܐܢܬ ܐ̈ܦܝܟ ܡܢܝ ܘܚܫܒܬܢܝ ܠܟ ܐܝܟ ܒܥܠܕܒܒܐ

9. Job 13:25

   ܠܛܪܦܐ ܝܒܝܫܐ ܕܢ̇ܬܪ ܕܐ̇ܫ ܐܢܬ ܘܠܓܠܐ ܝܒܝܫܐ ܪܕ̇ܦ ܐܢܬ

10. Job 13:26

    ܕܟܬܒܬ ܥܠܝ ܡܪܕܘܬܐ ܘܡܕܟܪ ܐܢܬ ܥܠܝ ܚ̈ܘܒܐ ܕܛܠܝܘܬܝ

11. Job 13:27

    ܘܣܡܬ ܪ̈ܓܠܝ ܒܣܕܐ ܘܢܛܪܬ ܒܟܠܗܝܢ ܐܘܪ̈ܚܬܝ ܘܥܠ ܬܘܩܦܐ ܕܪ̈ܓܠܝ ܬܚܙܐ

12. Job 13:28

    ܘܗܘ ܐܝܟ ܪܩܒܐ ܕܒ̇ܠܐ ܘܐܝܟ ܠܒܘܫܐ ܕܐ̇ܟܠ ܠܗ ܣܣܐ

13. Job 14:1

    ܗܟܢܐ ܗܘ ܐܢܫܐ ܝܠܝܕ ܐܢܬܬܐ ܘܙܥܘܪ ܝܘܡ̈ܝܢ ܗܘ ܘܣ̇ܒܠ ܙܘ̈ܥܐ

14. Job 14:2

    ܘܐܝܟ ܥܘܦܝܐ ܢ̇ܦܩ ܘܝ̇ܒܫ ܘܚ̇ܡܐ ܘܥ̇ܪܩ ܐܝܟ ܛܠܠܐ ܘܠܐ ܩ̇ܐܡ

15. Job 14:3

    ܐܦ ܥܠ ܗܢܐ ܦܬܚܬ ܥܝܢܝ̈ܟ ܘܠܗ ܬܥܠ ܒܕܝܢܐ ܥܡܟ

16. Job 14:4

    ܡܢܘ ܢܬܠ ܕܟܝܐ ܡܢ ܛܡܐܐ ܐܦ ܠܐ ܚܕ

17. Job 14:5

    ܐܢ ܦܣܝܩܝܢ ܐܢܘܢ ܝܘܡ̈ܘܗܝ ܘܡܢܝܢܐ ܕܝܪ̈ܚܘܗܝ ܓܙܝܪ̈ܝܢ ܢܡܘܣܐ ܥܒܕܬ ܕܠܐ ܢܥܒܪ ܡܢܗ

18. Job 14:6

    ܘܢܦܘܫ ܥܕܡܐ ܕܢܪܗܛ ܐܝܟ ܐܓܝܪܐ ܝܘܡ̈ܘܗܝ

19. Job 14:7

    ܡܛܠ ܕܐܝܬ ܠܩܝܣܐ ܣܒܪܐ ܕܐܢ ܡܬܦܣܩ ܬܘܒ ܡܚܠܦ ܘܥܢ̈ܩܘܗܝ ܠܐ ܥܢ̈ܕܢ

20. Job 14:8

    ܘܐܢ ܢܣܐܒ ܒܐܪܥܐ ܥܩܪܗ ܘܒܥܦܪܐ ܬܡܘܬ ܡܘܥܝܬܗ

21. Job 14:9

    ܡܢ ܪܝܚܐ ܕܡ̈ܝܐ ܢܦܪܥ ܘܢܥܒܕ ܛܪ̈ܦܐ ܐܝܟ ܢܨܝܒܐ

22. Job 14:10

    ܘܓܒܪܐ ܡ̇ܐܬ ܘܒ̇ܠܐ ܘܣ̇ܐܦ ܒܪܢܫܐ ܘܠܝܬܘܗܝ

23. Job 14:11

    ܥܢܕܝܢ ܡ̈ܝܐ ܡܢ ܝܡܐ ܘܢܗܪܐ ܚ̇ܪܒ ܘܝ̇ܒܫ

24. Job 14:12

    ܘܓܒܪܐ ܕܫ̇ܟܒ ܠܐ ܩ̇ܐܡ ܥܕ ܒܠܝܢ ܫܡܝܐ ܠܐ ܢܬܬܥܝܪܘܢ ܘܠܐ ܢܕܝܢ ܡܢ ܫܢܬܗܘܢ

25. Job 14:13

    ܡ̇ܢ ܕܝܢ ܥܒܕ ܕܒܫܝܘܠ ܛܫܝܬܢܝ ܘܣܬܪܬܢܝ ܥܕܡܐ ܕܥܒܪ ܪܘܓܙܟ ܘܣܡܬ ܠܝ ܕܝܢ ܩܝܡܐ ܘܐܬܕܟܪܬܢܝ

26. Job 14:14

    ܐܢ ܡ̇ܐܬ ܓܒܪܐ ܕܠܡܐ ܚܝܐ ܘܟܠܗܘܢ ܝܘܡ̈ܬܐ ܕܥܠܝܡܘܬܗ ܡܣܟܐ ܥܕܡܐ ܕܐܬܝܐ ܣܝܒܘܬܗ

27. Job 14:15

    ܐܢ ܬܩܪܝܢܝ ܐܥܢܝܟ ܘܥܠ ܥܒܕ ܐ̈ܝܕܝܟ ܐܬܚܫܒ

28. Job 14:16

    ܡܛܠ ܕܗܫܐ ܗ̈ܠܟܬܝ ܠܐ ܬܡܢܐ ܘܠܐ ܬܛܪ ܥܠܝ ܚ̈ܛܗܝ

29. Job 14:17

    ܚܬܘܡ ܒܨܪܪܐ ܚ̈ܘܒܝ ܘܐܦܪܩ ܡܢܝ ܚ̈ܛܗܝ

30. Job 14:18

    ܫܪܝܪܐܝܬ ܛܘܪܐ ܥܫܝܢܐ ܢ̇ܦܠ ܐܘ ܫܩܝܦܐ ܡܬܬܙܝܥ ܡܢ ܕܘܟܬܗ

31. Job 14:19

    ܟܐܦܐ ܫܚܩܐ ܡ̈ܝܐ ܐܘ ܟܬܐ ܥܦܪܗ̇ ܕܐܪܥܐ ܣܒܪܗ ܕܐܢܫܐ ܐܘܒܕܬ

32. Job 14:20

    ܬܥܫܢܝܘܗܝ ܠܥܠܡ ܘܢܗܠܟ ܒܒܗܬܬܐ ܕܐ̈ܦܘܗܝ ܬܫܕܝܘܗܝ

33. Job 14:21

    ܐܢ ܢܣܓܘܢ ܒ̈ܢܘܗܝ ܠܐ ܝ̇ܕܥ ܘܐܢ ܢܙܥܪܘܢ ܠܐ ܡܫܬܘܕܥ ܠܗܘܢ

34. Job 14:22

    ܒܪܡ ܒܣܪܗ ܥܠܘܗܝ ܢܟܐܒ ܘܢܦܫܗ ܥܠܘܗܝ ܬܬܐܒܠ

35. Job 15:1

    ܘܥܢܐ ܐܠܝܦܙ ܬܝܡܢܝܐ ܘܐܡܪ

36. Job 15:2

    ܚܟܝܡ ܪܘܚܐ ܢܥܢܐ ܒܐܝܕܥܬܐ ܘܢܡܠܐ ܚܡܬܐ ܟܪܣܗ

37. Job 15:3

    ܠܡܟܣܘ ܡ̈ܠܝܢ ܕܠܐ ܟܫܪ̈ܢ ܘܒܡ̈ܠܐ ܕܠܝܬ ܒܗܝܢ ܝܘܬܪܢ

38. Job 15:4

    ܐܦ ܐܢܬ ܡܒܛܠ ܐܢܬ ܕܚܠܬܐ ܘܡܣܓܐ ܐܢܬ ܡܡܠܠ ܩܕܡ ܐܠܗܐ

39. Job 15:5

    ܡܛܠ ܕܢܐܠܦ ܦܘܡܟ ܚ̈ܛܗܐ ܘܨ̇ܒܐ ܐܢܬ ܒܠܫܢܐ ܕܢܟܠܐ

40. Job 15:6

    ܢܚܝܒܟ ܦܘܡܟ ܘܠܐ ܐܢܐ ܘܣ̈ܦܘܬܟ ܢܣܗ̈ܕܢ ܒܟ ܩܕܡܝ

41. Job 15:7

    ܕܠܡܐ ܩܕܡ ܐܢܫܐ ܐܬܝܠܕܬ ܐܘ ܡܢ ܩܕܡ ܪ̈ܡܬܐ ܐܬܒܛܢܬ

42. Job 15:8

    ܒܐܪܙܗ ܕܡܪܝܐ ܫܡܥܬ ܘܐܬܓܠܝܬ ܠܟ ܚܟܡܬܐ

43. Job 15:9

    ܡܢܐ ܝ̇ܕܥ ܐܢܬ ܕܚܢܢ ܠܐ ܝܕܥܝܢܢ ܐܘ ܡܢܐ ܡܬܒܝܢ ܐܢܬ ܕܠܐ ܗܘܐ ܠܘܬܢ

44. Job 15:10

    ܗܐ ܐܝܬ ܒܢ ܕܣܐ̣ܒ ܐܦ ܐܝܬ ܒܢ ܕܩܫܝܫ ܘܕܥܬܝܩ ܐܦ ܡܢ ܐܒܘܟ ܒܝ̈ܘܡܬܐ

45. Job 15:11

    ܐܙܓܪ ܡܢܟ ܠܘܚ̈ܡܘܗܝ ܕܐܠܗܐ ܘܡܠܠ ܒܢܝܚ ܠܘܬ ܢܦܫܟ

46. Job 15:12

    ܠܡܢܐ ܐܬܪܝܡ ܠܒܟ ܘܠܡܢܐ ܡܪ̈ܡܙܢ ܥܝܢ̈ܝܟ

47. Job 15:13

    ܕܡܪܝܡ ܐܢܬ ܠܘܬ ܐܠܗܐ ܪܘܚܟ ܘܡ̇ܦܩ ܐܢܬ ܡܢ ܦܘܡܟ ܡ̈ܠܐ

48. Job 15:14

    ܡܢܘ ܐܢܫܐ ܕܢܙܟܐ ܐܘ ܡܢܘ ܢܙܕܕܩ ܝܠܝܕ ܐܢܬܬܐ

49. Job 15:15

    ܗܐ ܒܩܕܝܫ̈ܘܗܝ ܠܐ ܡܗܝܡܢ ܘܫܡܝܐ ܠܐ ܕܟܝܢ ܩܕܡܘܗܝ

50. Job 15:16

    ܐܦܢ ܡܣܬܠܐ ܘܡܬܛܪܦ ܓܒܪܐ ܢܫܬܐ ܥܘܠܐ ܐܝܟ ܡ̈ܝܐ

51. Job 15:17

    ܐܚܘܝܟ ܫܡܥܝܢܝ ܘܡܕܡ ܕܚܙܝܬ ܐܬܢܐ

52. Job 15:18

    ܕܚ̈ܟܝܡܐ ܚܘܝܘ ܘܠܐ ܟܣܝܘ ܡܢ ܐ̈ܒܗܝܗܘܢ

53. Job 15:19

    ܠܗܘܢ ܒܠܚܘܕܝܗܘܢ ܐܬܝܗܒܬ ܐܪܥܐ ܘܠܐ ܥܒܪ ܢܘܟܪܝܐ ܒܝܢܬܗܘܢ

54. Job 15:20

    ܟܘܠ ܝܘܡ̈ܘܗܝ ܕܪܫܝܥܐ ܡܬܪܘܪܒ ܘܡܢܝܢ ܫܢ̈ܘܗܝ ܢܬܢܛܪ ܠܚܣܝܢܐ

55. Job 15:21

    ܩܠ ܙܘܥܬܐ ܒܐܕܢ̈ܘܗܝ ܘܒܫܠܡܐ ܒܙܘܙܐ ܢܐܬܐ ܥܠܘܗܝ

56. Job 15:22

    ܠܐ ܡܗܝܡܢ ܕܗ̇ܦܟ ܡܢ ܚܫܘܟܐ ܚ̇ܙܐ ܠܚܪܒܐ

57. Job 15:23

    ܥ̇ܪܩ ܗܘ ܠܠܘܚܡܐ ܕܕܝܢܐ ܘܐܝܟܐ ܕܗܘ ܝ̇ܕܥ ܕܡܛܝܒ ܗܘ ܒܐܝܕܗ ܝܘܡܐ ܕܚܫܘܟܐ

58. Job 15:24

    ܢܒܥܬܝܘܗܝ ܐܘܠܨܢܐ ܘܥܩܬܐ ܬܕܪܟܝܘܗܝ ܐܝܟ ܡܠܟܐ ܕܡܛܝܒ ܠܩܪܒܐ

59. Job 15:25

    ܡܛܠ ܕܐܪܝܡ ܥܠ ܐܠܗܐ ܐܝܕܗ ܘܥܠ ܚܣܝܢܐ ܐܬܓܒܪ

60. Job 15:26

    ܘܪܗܛ ܥܠܘܗܝ ܒܨܘܪܐ ܪܡܐ ܘܒܩܦܝܐ ܕܩܕܠܗ ܒܣܘܓܐܬ ܣܕܪ̈ܐ ܕܣܟܪ̈ܐ

61. Job 15:27

    ܘܟܣܝ ܐ̈ܦܘܗܝ ܒܬܪܒܗ ܘܥܒܕ ܟܝܡܐ ܠܥܠ ܡܢ ܥܝܘܬܐ

62. Job 15:28

    ܘܐܘܬܒ ܩܘܪ̈ܝܐ ܚܪ̈ܒܬܐ ܕܠܐ ܝܬ̈ܒܢ ܘܐܬܛܝܒ ܠܩܪܒܐ

63. Job 15:29

    ܠܐ ܢܟܬܪ ܘܠܐ ܢܩܘܡ ܚܝܠܗ ܘܠܐ ܢܪܡܐ ܡ̈ܠܐ ܥܠ ܐܪܥܐ

64. Job 15:30

    ܘܠܐ ܢܥܢܕܘܢ ܡܢ ܚܫܘܟܐ ܘܥܢ̈ܩܘܗܝ ܬܝܒܫ ܫܠܗܒܝܬܐ ܢܫܛܐ ܒܪܘܚܐ ܕܦܘܡܗ

65. Job 15:31

    ܘܠܐ ܢܗܝܡܢ ܠܕܓܠܘܬܐ ܡܛܥܝܢܝܬܐ ܡܛܘܠ ܕܐܝܩܐ ܗܘܬ ܡܘܥܝܬܗ

66. Job 15:32

    ܘܕܠܐ ܒܝ̈ܘܡܘܗܝ ܝܒܫ ܘܐ̈ܝܕܘܗܝ ܠܐ ܢܫܟ̈ܚܢ

67. Job 15:33

    ܢܥܩܘܪ ܐܝܟ ܓܦܬܐ ܒܣܪ̈ܘܗܝ ܘܢܫܕܐ ܐܝܟ ܙܝܬܐ ܡܘܥܝܬܗ

68. Job 15:34

    ܡܛܠ ܕܟܢܘܫܬܐ ܕܚܢ̈ܦܐ ܬܗܘܐ ܠܚܘܪܒܐ ܘܠܨܕܝܐ ܘܢܘܪܐ ܬܐܟܘܠ ܠܡܫܟܢܐ ܕܥ̇ܘ̈ܠܐ

69. Job 15:35

    ܒܛܢܘ ܥܘ̣ܠܐ ܘܝܠܕܘ ܥܬܐ ܘܟܪ̈ܣܬܗܘܢ ܡ̈ܠܝܢ ܢܟܠܐ

70. Job 16:1

    ܘܥܢܐ ܐܝܘܒ ܘܐܡܪ

71. Job 16:2

    ܫܡܥܬ ܕܣ̈ܓܝܐܢ ܐܝܟ ܗܠܝܢ ܘܡܒ̈ܝܐܢܝ ܒܥܘܠܐ ܐܢܬܘܢ ܟܠܟܘܢ

72. Job 16:3

    ܠܐ ܬܟܪܘܢ ܠܪܘܚܝ ܒܡ̈ܠܐ ܘܐܦܢ ܬܐܡܪܘܢ ܠܝ ܠܐ ܥ̇ܢܐ ܐܢܐ

73. Job 16:4

    ܐܦ ܐܢܐ ܐܟܘܬܟܘܢ ܐܡܠܠ ܐܫܬܘܦ ܕܝܢ ܥܒܝ̈ܕܢ ܗ̈ܘܝ ܢܦܫ̈ܬܟܘܢ ܚܠܦ ܢܦܫܝ ܘܒܩܝܬܟܘܢ ܕܝܢ ܒܡ̈ܠܐ ܘܐܢܝܕܬ ܥܠܝܟܘܢ ܒܪܝܫܝ

74. Job 16:5

    ܒܨܝܬܟܘܢ ܕܝܢ ܒܡ̈ܠܝܟܘܢ ܘܡܡܠܠܐ ܕܣ̈ܦܘܬܝ ܠܐ ܕܝܢ ܚܣܟܬ ܡܢܟܘܢ

75. Job 16:6

    ܐܢ ܐܡܠܠ ܓܝܪ ܠܐ ܦ̇ܪܩ ܟܐܒܝ ܘܐܢ ܫ̇ܠܐ ܐܢܐ ܡܢܘ ܡܪܘܚ ܠܝ

76. Job 16:7

    ܡܛܠ ܕܗܫܐ ܐܠܐܝܢܝ ܘܢܛܪ ܟܠܗ̇ ܣܗܕܘܬܝ

77. Job 16:8

    ܘܐܩܝܡܢܝ ܘܗܘܝܬ ܣܗܕܐ ܘܩܡܬ ܒܝ ܟܕܒܘܬܝ ܘܩܕܡܘܗܝ ܡܠܠܬ

78. Job 16:9

    ܪܘܓܙܗ ܬܒܪܢܝ ܘܦܫܚܢܝ ܘܚ̇ܪܩ ܥܠܝ ܫܢ̈ܘܗܝ ܒ̈ܥܠܕܒܒܝ ܚ̇ܒܪܘ ܥܝ̈ܢܝܗܘܢ ܥܠܝ

79. Job 16:10

    ܘܥܠܝ ܦܬܚܘ ܦܘܡܗܘܢ ܒܚܣܕܐ ܘܡܚܘ ܦܟ̈ܝ ܐܟܚܕܐ ܘܚܡܬܐ ܡܬܡܠܝܢ ܗܘܘ ܥܠܝ

80. Job 16:11

    ܐܫܠܡܢܝ ܠܡܠܐܟܐ ܥܘ̇ܠܐ ܘܠܐܝܕܐ ܕܪܫܝܥܐ ܐܫܠܡܢܝ

81. Job 16:12

    ܫܠܐ ܗܘܝܬ ܘܛܪܦܢܝ ܐܚܕ ܒܩܕܠܝ ܘܒܕܪܢܝ ܐܩܝܡܢܝ ܠܗ ܐܝܟ ܢܝܫܐ

82. Job 16:13

    ܘܣܓܝܘ ܥܠܝ ܓܐܪ̈ܘܗܝ ܘܫܕܐ ܒܟ̈ܘܠܝܬܝ ܘܠܐ ܚܣ ܐܫܕ ܥܠ ܐܪܥܐ ܡܪܪܬܝ

83. Job 16:14

    ܬܪܥܢܝ ܬܘܪܥܬܐ ܒܓܘ ܬܘܪܥܬܐ ܘܪܗܛ ܥܠܝ ܐܝܟ ܕܥܠ ܓܢܒܪܐ

84. Job 16:15

    ܣܩܐ ܐܬܟܒܢܬ ܥܠ ܡܫܟܝ ܘܦܠܦܠܬ ܒܥܦܪܐ ܪܝܫܝ

85. Job 16:16

    ܐ̈ܦܝ ܐܬܕܠܚ ܡܢ ܒܟܬܐ ܘܚ̈ܙܝܬܝ ܡܢ ܛܠܠܗ ܕܡܘܬܐ

86. Job 16:17

    ܥܠ ܕܠܝܬ ܥܘܠܐ ܒܐ̈ܝܕܝ ܘܨܠܘܬܝ ܕܟܝܐ

87. Job 16:18

    ܐܪܥܐ ܠܐ ܬܟܣܐ ܕܡܝ ܘܠܐ ܢܗܘܐ ܐܬܪܐ ܠܙܥܩ̈ܬܝ

88. Job 16:19

    ܘܗܫܐ ܗܐ ܒܫܡܝܐ ܣܗ̈ܕܝ ܘܝ̈ܕܥܝ ܒܡܪܘܡܐ

89. Job 16:20

    ܐܚ̈ܝ ܘܪ̈ܚܡܝ ܠܘܬ ܐܠܗܐ ܫܦܥܬ ܥܝܢܝ

90. Job 16:21

    ܠܘܝ ܕܝܢ ܢܟ̇ܣ ܒܪ ܐܢܫܐ ܠܐܠܗܐ ܐܝܟ ܓܒܪܐ ܠܚܒܪܗ

91. Job 16:22

    ܕܡܢܝܢܐ ܕܫ̈ܢܘܗܝ ܐܬ̈ܝܢ ܘܐܘܪܚܐ ܕܠܐ ܗ̇ܦܟܐ ܐ̇ܙܠ

92. Job 17:1

    ܪܘܚܝ ܐܬܛܪܦܬ ܘܝܘ̈ܡܝ ܐܬܕܥܟܘ ܛܝܒܘ ܠܝ ܩܒܪܐ

93. Job 17:2

    ܡܛܘܠ ܕܠܝܬ ܫܘܩܪܐ ܠܘܬܝ ܘܒܡܪܪܗܘܢ ܒܬܬ ܪܘܚܝ

94. Job 17:3

    ܣܝܡ ܢܐ ܡܫܟܢܝ ܠܘܬܟ ܡܢܘ ܗܢܐ ܡܫܠܡ ܐܝܕܝ

95. Job 17:4

    ܡܛܠ ܕܠܒܗܘܢ ܟܣܝܬ ܡܢ ܣܘܟܠܐ ܡܛܠ ܗܢܐ ܢܬܬܪܝܡܘܢ ܒܦܠܓܘܬܐ

96. Job 17:5

    ܘܢܬܪܘܪܒ ܪܚܡܐ ܥܠ ܪܚܡܗ ܘܥܝ̈ܢܐ ܕܒ̈ܢܝܗܘܢ ܢܚܫ̈ܟܢ

97. Job 17:6

    ܘܐܩܝܡ ܫܘܠܛܢܐ ܕܥܡ̈ܡܐ ܘܬܚܦܝܬܐ ܥܠ ܐ̈ܦܝܗܘܢ ܐܗܘܐ

98. Job 17:7

    ܟܐܒܬ ܡܢ ܪܘܓܙܐ ܥܝܢܝ ܘܬܪ̈ܥܝܬܝ ܟܠܗܝܢ ܐܝܟ ܛ̈ܠܢܝܬܐ

99. Job 17:8

    ܢܬܡܗܘܢ ܬܪ̈ܝܨܐ ܥܠ ܗܕܐ ܘܙܟ̇ܝܐ ܥܠ ܚܝ̇ܒܐ ܢܬܢܦܨ

100. Job 17:9

     ܢܐܚܘܕ ܙܕܝܩܐ ܐܘܪܚܗ ܘܢܚܡܣܢ ܘܕܕܟܝ̈ܢ ܐ̈ܝܕܘܗܝ ܢܘܣܦ ܥܠ ܚܝܠܐ

← Previous · Next → — showing 301–400 of 1,065

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.