← All works

Peshitta Job

Peshitta (Syriac Old Testament) · 1,065 sections

1. Job 9:19

   ܐܢ ܒܚܝܠܐ ܬܩܝܦ ܗܘ ܘܐܢ ܠܕܝܢ̣ܐ ܡܢܘ ܢܐܪܥܝܘܗܝ

2. Job 9:20

   ܐܢ ܐܙܟܐ ܦܘܡܝ ܢܚܝܒܢܝ ܬܡܝܡ ܐܢܐ ܘܡܥܩܡ ܠܝ

3. Job 9:21

   ܬܡܝܡ ܐܢܐ ܘܠܐ ܝ̇ܕܥ ܐܢܐ ܢܦܫܝ ܐܣܠܝܬ ܚ̈ܝܝ

4. Job 9:22

   ܚܕܐ ܗܝ ܡܛܠ ܗܢܐ ܐܡܪܬ ܕܠܙܕܝܩ̈ܐ ܘܠܪ̈ܫܝܥܐ ܗܘܝܘ ܡܣܝܦ

5. Job 9:23

   ܐܢ ܫܒܛܗ ܡܢ ܫܠܝ ܩܛܠ ܘܥܠ ܫܛܝܘܬ ܙܟܝ̈ܝܢ ܡܡܝܩ

6. Job 9:24

   ܐܪܥܐ ܝܗܒܗ̇ ܒܐܝܕܗ ܕܪܫܝܥܐ ܘܐ̈ܦܝܗܘܢ ܕܕܝ̇ܢܐ̈ ܡܚܦܝܢ ܐܠܐ ܪܘܓܙܗ ܡܢܘ ܡܣܝܒܪ

7. Job 9:25

   ܝܘܡ̈ܝ ܩܠܘ ܡܢ ܕܪܗܛܐ ܥܪܩܘ ܘܠܐ ܚܙܘ ܛܒܬܐ

8. Job 9:26

   ܥܒܪܘ ܥܡ ܐ̈ܠܦܐ ܣܓܝܐ̈ܬܐ ܕܒ̈ܥܠܕܒܒܐ ܐܝܟ ܢܫܪܐ ܕܛ̇ܐܣ ܥܠ ܡܟܘܠܬܗ

9. Job 9:27

   ܥܡ ܡܪ̈ܪܝ ܛܥܝܬ ܫܘ̈ܥܝܬܝ ܐܢ ܐܫܒܘܩ ܪܢܝܝ ܐܘ ܡ̈ܠܝ ܡܬܬܥܝܩ ܐܢܐ

10. Job 9:28

    ܘܐܢ ܐܬܬܢܝܚ ܕܚ̇ܠ ܐܢܐ ܡܢ ܟܠ ܬܫܢܝܩ ܡܛܠ ܕܝ̇ܕܥ ܐܢܐ ܕܠܐ ܡܙܟܐ ܐܢܬ ܠܝ

11. Job 9:29

    ܗܐ ܐܢ ܐܬܚܝܒ ܠܡܢܐ ܐܝܟ ܗܒܠܐ ܡܣܝܦ ܐܢܬ ܠܝ

12. Job 9:30

    ܘܐܢ ܐܬܬܫܝܓ ܒܡ̈ܝܐ ܕܬܠܓܐ ܘܡܬܕܟܐ ܐܢܐ ܒܕܟܝܘܬܐ ܕܐ̈ܝܕܝ

13. Job 9:31

    ܗܝܕܝܢ ܒܓܘܡܨܐ ܬܛܒܥܢܝ ܘܢܬܪܚܩ ܡܢܝ ܠܒܘܫܝ

14. Job 9:32

    ܡܛܘܠ ܕܠܐ ܗܘܐ ܓܒܪܐ ܕܐܟܘܬܝ ܕܐܬܠ ܠܗ ܦܬܓܡܐ ܘܢܥܘܠ ܐܟܚܕܐ ܠܕܝܢܐ

15. Job 9:33

    ܐܫܬܘܦ ܕܝܢ ܐܝܬ ܡܟܣܢܐ ܒܝܢܬܢ ܕܢܣܝܡ ܐܝܕܗ ܥܠ ܦܘܡܐ ܕܬܪ̈ܝܢ

16. Job 9:34

    ܘܢܥܒܪ ܡܢܝ ܫܒܛܗ ܘܕܚܠܬܗ ܠܐ ܬܙܝܥܢܝ

17. Job 9:35

    ܐܡܠܠ ܘܠܐ ܐܕܚܠ ܡܢܗ ܡܛܠ ܕܠܐ ܗܘܝܬ ܠܩܘܒܠܗ

18. Job 10:1

    ܥܩܬ ܢܦܫܝ ܒܚ̈ܝܝ ܪܢܝܬ ܒܪܢܝܝ ܘܐܡܠܠ ܒܡܪ̈ܪܐ ܕܢܦܫܝ

19. Job 10:2

    ܘܐܡܪ ܠܐܠܗܐ ܠܐ ܬܚܝܒܢܝ ܐܘܕܥܝܢܝ ܥܠ ܡܢܐ ܗܘ ܕܐ̇ܢ ܐܢܬ ܠܝ

20. Job 10:3

    ܠܐ ܟܕܘ ܠܟ ܕܛ̇ܠܡ ܐܢܬ ܘܡܣܠܐ ܐܢܬ ܠܐܘܬܐ ܕܐ̈ܝܕܝܟ ܘܥܠ ܬܪܥܝܬܐ ܕܪ̈ܫܝܥܐ ܐܕܝܩܬ

21. Job 10:4

    ܕܠܡܐ ܥܝܢ̈ܝܟ ܐܝܟ ܥܝ̈ܢܝ ܒܣܪܐ ܐ̈ܢܝܢ ܐܘ ܐܝܟ ܡܚܙܝܐ ܗܘ ܕܐܢܫܐ ܚ̇ܙܐ ܐܢܬ

22. Job 10:5

    ܐܘ ܝܘܡ̈ܬܟ ܐܝܟ ܝܘ̈ܡܝ ܐܢܫܐ ܐܢܘܢ ܐܘ ܫ̈ܢܝܟ ܐܝܟ ܝܘܡ̈ܬܐ ܐܢܘܢ ܕܓܒܪܐ

23. Job 10:6

    ܕܡܥܩܒ ܐܢܬ ܥܠ ܚ̈ܘܒܝ ܘܥܠ ܚ̈ܛܗܝ

24. Job 10:7

    ܘܝ̇ܕܥ ܐܢܬ ܕܐܢܐ ܙܟܝ ܐܢܐ ܘܠܝܬ ܕܡܢ ܐ̈ܝܕܝܟ ܡܫܬܘܙܒ

25. Job 10:8

    ܐܝ̈ܕܝܟ ܠܐ̈ܝ ܒܝ ܘܥܒ̈ܕܢܝ ܘܡܢ ܒܬܪܟܢ ܨ̇ܒܐ ܐܢܬ ܠܡܚܝܒܘܬܢܝ ܘܠܡܛܒܥܘܬܢܝ

26. Job 10:9

    ܐܬܕܟܪ ܕܐܝܟ ܛܝܢܐ ܗܘ ܥܒܕܬܢܝ ܘܠܥܦܪܐ ܡܗܦܟ ܐܢܬ ܠܝ

27. Job 10:10

    ܘܐܝܟ ܚܠܒܐ ܗܘ ܪܒܝܬܢܝ ܘܐܝܟ ܓܒܬܐ ܡܣܝܬܢܝ

28. Job 10:11

    ܡܫܟܐ ܘܒܣܪܐ ܐܠܒܫܬܢܝ ܘܒܓ̈ܝܕܐ ܘܒܓܪ̈ܡܐ ܫܪܪܬܢܝ

29. Job 10:12

    ܘܚ̈ܝܐ ܘܫܠܡܐ ܥܒܕܬ ܥܡܝ ܘܦܘܩ̈ܕܢܝܟ ܢܛܪܬ ܪܘܚܝ

30. Job 10:13

    ܘܗܠܝܢ ܟܣܝܬ ܒܠܒܟ ܝ̇ܕܥ ܗܘܝܬ ܕܗܕܐ ܗܘܬ ܒܪܥܝܢܟ

31. Job 10:14

    ܕܐܢ ܚܛܝܬ ܢܛ̇ܪ ܐܢܬ ܠܝ ܘܡܢ ܚ̈ܛܗܝ ܠܐ ܡܙܟܐ ܐܢܬ ܠܝ

32. Job 10:15

    ܐܢ ܚܛܝܬ ܘܝ ܠܝ ܘܐܢ ܐܙܕܕܩܬ ܠܐ ܐܪܝܡ ܪܝܫܝ ܡܣܒܥ ܐܢܐ ܨܥܪܐ ܘܚܙܝܬ ܡܘܟܟܝ

33. Job 10:16

    ܘܐܢ ܐܬܬܪܝܡ ܐܝܟ ܐܪܝܐ ܬܨܘܕܢܝ ܘܗ̇ܦܟ ܐܢܬ ܡܬܓܢܒܪ ܥܠܝ

34. Job 10:17

    ܘܡܚܪܐ ܐܢܬ ܙܝܢܟ ܠܘܩܒܠܝ ܘܡܣܓܐ ܐܢܬ ܪܘܓܙܟ ܠܘܬܝ ܘܚܝ̈ܠܘܢ ܡܚܠܦ ܐܢܬ ܥܠܝ

35. Job 10:18

    ܘܠܡܢܐ ܡܢ ܡܪܒܥܐ ܐܦܩܬܢܝ ܣܦܬ ܕܝܢ ܘܥܝܢ ܠܐ ܚܙܬܢܝ

36. Job 10:19

    ܘܗܘܝܬ ܕܝܢ ܐܝܟ ܕܠܐ ܗܘܝܬ ܘܡܢ ܟܪܣܐ ܠܩܒܪܐ ܕܝܢ ܐܘܒܠܘܢܝ

37. Job 10:20

    ܙܥܘܪ̈ܝܢ ܐܢܘܢ ܝܘܡ̈ܬܐ ܕܚ̈ܝܝ ܦܪܘܩ ܡܢܝ ܘܐܫܠܐ ܘܐܬܬܢܝܚ ܩܠܝܠ

38. Job 10:21

    ܥܕܠܐ ܐ̇ܙܠ ܐܢܐ ܘܬܘܒ ܠܐ ܐܗܦܘܟ ܠܐܪܥܐ ܚܫܘܟܬܐ ܘܕܛ̈ܠܠܝ ܡܘܬܐ

39. Job 10:22

    ܕܫܗܝܐ ܐܝܟ ܚܒܪܐ ܘܛ̈ܠܠܝ ܡܘܬܐ ܘܠܝܬ ܒܗ̇ ܣܕܪ̈ܝܢ ܕܕܪ̈ܝܢ ܘܡܫܠܗܝܐ ܐܝܟ ܚܒܪܐ

40. Job 11:1

    ܘܥܢܐ ܨܘܦܪ ܢܥܡܬܝܐ ܘܐܡܪ

41. Job 11:2

    ܒܣܘܓܐܐ ܕܡ̈ܠܐ ܠܐ ܥ̇ܢܐ ܐܦ ܠܐ ܓܒܪܐ ܡܠܠܐ ܒܦ̈ܬܓܡܘܗܝ ܡܙܕܕܩ

42. Job 11:3

    ܗܐ ܥܠ ܡ̈ܠܝܟ ܡ̈ܝܬܐ ܗܘ ܢܫܬܩܘܢ ܐܢܬ ܡܡܠܠ ܘܠܝܬ ܕܟ̇ܠܐ ܠܟ ܘܐܢ ܡܡܝܩ ܐܢܬ ܠܝܬ ܕܡ̇ܟܣ ܠܟ

43. Job 11:4

    ܘܐܡܪ ܐܢܬ ܕܟܐܢܐܝܬ ܐܬܕܒܪܬ ܘܕܟܐ ܗܘܝܬ ܒܥܝܢ̈ܝ ܢܦܫܟ

44. Job 11:5

    ܒܪܡ ܡ̇ܢ ܕܝܢ ܥܒܕ ܕܝ̇ܗܒ ܗܘܐ ܐܠܗܐ ܦܬܓܡܐ ܘܡܪܝܡ ܗܘܐ ܣ̈ܦܘܬܗ ܥܡܟ

45. Job 11:6

    ܘܡܚܘܐ ܗܘܐ ܠܟ ܟܣ̈ܝܬܗ̇ ܕܚܟܡܬܐ ܡܛܠ ܕܐܝܬ ܠܗ̇ ܩ̈ܦܠܐ ܠܚܟܡܬܐ ܘܝ̇ܕܥ ܗܘܝܬ ܕܫ̇ܒܩ ܗܘܐ ܠܟ ܐܠܗܐ ܚ̈ܛܗܝܟ

46. Job 11:7

    ܒܘܕܩܗ ܕܐܠܗܐ ܡܫܟܚ ܐܢܬ ܠܡܕܥ ܐܘ ܥܠ ܣܘܦܗ ܕܚܣܝܢܐ ܡܫܟܚ ܐܢܬ ܠܡܩܡ

47. Job 11:8

    ܪܘܡܐ ܕܫܡܝܐ ܝ̇ܕܥ ܐܢܬ ܐܘ ܥܘܡܩܐ ܕܫܝܘܠ ܡܢ ܐܝܡܟܐ ܝ̇ܕܥ ܐܢܬ

48. Job 11:9

    ܐܪܝܟܐ ܗܝ ܡܢ ܐܪܥܐ ܡܫܘܚܬܗ̇ ܘܦܬܝܐ ܗܝ ܡܢ ܝܡܐ

49. Job 11:10

    ܐܢ ܢܥܒܪ ܢܐܚܘܕ ܘܢܟܢܫ ܡܢܘ ܡܗܦܟ ܠܗ

50. Job 11:11

    ܡܛܘܠ ܕܗܘܝܘ ܓܝܪ ܝ̇ܕܥ ܐܡܬܝ ܗܘܐ ܙܒܢܐ ܘܚ̇ܙܐ ܥܘܠܐ ܘܗܘ ܡܬܒܝܢ

51. Job 11:12

    ܘܓܒܪܐ ܕܕܟܐ ܡܬܠܒܒ ܘܕܓܢܒܪ ܥ̇ܕܪ ܠܐܢܫ

52. Job 11:13

    ܐܠܘ ܐܢܬ ܐܬܩܢܬ ܠܒܟ ܘܦܫܛܬ ܐ̈ܝܕܝܟ ܠܘܬܗ

53. Job 11:14

    ܐܢ ܐܝܬ ܗܘܐ ܥܘܠܐ ܒܐܝ̈ܕܝܟ ܡܪܚܩ ܗܘܐ ܠܗ ܘܠܐ ܐܫܪܝܬ ܒܡܫܟܢܟ ܥܘܠܐ

54. Job 11:15

    ܘܗܝܕܝܢ ܬܪܝܡ ܐ̈ܝܕܝܟ ܘܡܢ ܥܩܐ ܠܐ ܬܕܚܠ

55. Job 11:16

    ܘܗܝܕܝܢ ܥܡܠܟ ܬܬܢܫܐ ܘܐܝܟ ܡ̈ܝܐ ܥܒܘܪ̈ܐ ܬܬܕܒܪ

56. Job 11:17

    ܘܡܢ ܛܗܪܐ ܢܩܘܡ ܚܦܪܐ ܘܥܪܦܠܐ ܐܝܟ ܨܦܪܐ ܬܗܘܐ

57. Job 11:18

    ܘܬܬܟܠ ܕܐܝܬ ܣܒܪܐ ܘܬܕܡܟ ܘܬܬܢܝܚ

58. Job 11:19

    ܘܠܝܬ ܕܡܥܝܪ ܠܟ ܢܒܥܘܢ ܐ̈ܦܝܟ ܣ̈ܓܝܐܐ

59. Job 11:20

    ܘܥܝܢ̈ܝܗܘܢ ܕܪ̈ܫܝܥܐ ܢܚܫ̈ܟܢ ܘܬܘܩܦܗܘܢ ܢܐܒܕ ܡܢܗܘܢ ܘܣܒܪܐ ܕܢܦܫ̈ܬܗܘܢ

60. Job 12:1

    ܘܥܢܐ ܐܝܘܒ ܘܐܡܪ

61. Job 12:2

    ܒܩܘܫܬܐ ܐܢܬܘܢ ܐܢܘܢ ܥܡܐ ܘܥܡܟܘܢ ܬܡܘܬ ܚܟܡܬܐ

62. Job 12:3

    ܐܦ ܠܝ ܠܒܐ ܐܝܬ ܠܝ ܐܟܘܬܟܘܢ ܘܠܐ ܗܘܝܬ ܒܨܝܪ ܡܢܟܘܢ ܠܡ̇ܢ ܗ̈ܘܝ ܐܝܟ ܗܠܝܢ

63. Job 12:4

    ܘܗܘܐ ܓܘܚܟܐ ܠܚܒܪ̈ܘܗܝ ܘܩܪܐ ܠܐܠܗܐ ܘܥܢܝܗܝ ܕܨ̇ܒܐ ܒܙܕܝ̈ܩܐ ܕܠܐ ܡܘܡ

64. Job 12:5

    ܠܡܦܪܩܘ ܫܛܝܘܬܐ ܘܥܘܠܐ ܘܠܡܬܩܢܘ ܪܓܠܐ ܡܙܥܬܐ

65. Job 12:6

    ܢܫܢܘܢ ܡܫ̈ܟܢܝܗܘܢ ܕܒܙܘ̈ܙܐ ܘܬܘܟܠܢܗܘܢ ܕܐܝܠܝܢ ܕܡܪܓܙܝܢ ܠܐܠܗܐ ܡܛܠ ܕܠܝܬ ܐܠܗܐ ܒܠܒܗܘܢ

66. Job 12:7

    ܘܐܠܐ ܫ̇ܐܠ ܠܚܝܘܬܐ ܘܬܠܦܟ ܘܠܦܪܚܬܐ ܕܫܡܝܐ ܘܬܚܘܝܟ

67. Job 12:8

    ܘܐܫܬܥܐ ܠܐܪܥܐ ܘܬܠܦܟ ܘܢܫܬܥܘܢ ܠܟ ܢܘ̈ܢܐ ܕܒܝܡܐ

68. Job 12:9

    ܡܢܘ ܕܠܐ ܝ̇ܕܥ ܒܗܠܝܢ ܟܠܗܝܢ ܕܐܝܕܗ ܕܡܪܝܐ ܥܒܕܬ ܗܠܝܢ

69. Job 12:10

    ܡܛܠ ܕܒܐܝܕܗ ܐ̈ܢܝܢ ܢܦܫ̈ܬܐ ܕܟܠ ܕܚܝ ܘܪܘܚܐ ܕܟܠ ܒܣܪ ܘܐܢܫ

70. Job 12:11

    ܐܕܢܐ ܫ̇ܡܥܐ ܡ̈ܠܐ ܘܚܟܐ ܛܥ̇ܡ ܡܐܟܘܠܬܐ

71. Job 12:12

    ܘܒܩܫܝ̈ܫܐ ܚܟܡܬܐ ܘܒܢܘܓܪܐ ܕܝܘܡ̈ܬܐ ܒܘܝܢܐ

72. Job 12:13

    ܥܡܗ ܗܝ ܚܟܡܬܐ ܘܓܢܒܪܘܬܐ ܕܝܠܗ ܗܝ ܬܪܥܝܬܐ ܘܒܘܝܢܐ

73. Job 12:14

    ܗܐ ܐܢ ܣ̇ܚܦ ܡܢܘ ܒ̇ܢܐ ܘܐܢ ܐܚ̇ܕ ܒܐ̈ܦܝ ܐܢܫ ܡܢܘ ܦ̇ܬܚ

74. Job 12:15

    ܐܢ ܓ̇ܥܪ ܒܡ̈ܝܐ ܝܒܫܝܢ ܘܐܢ ܡܫܕܪ ܠܗܘܢ ܗܦܟܝܢ ܐܪܥܐ

75. Job 12:16

    ܕܝܠܗ ܗܘ ܬܘܩܦܐ ܘܚܟܡܬܐ ܕܝܠܗ ܗܘ ܥܘܫܢܐ ܘܦܘܪܩܢܐ

76. Job 12:17

    ܡܕܒܪ ܠܡ̈ܠܟܐ ܒܬܡܗܐ ܘܠܕܝ̇ܢܐ̈ ܡܫܛܐ

77. Job 12:18

    ܡ̇ܚܬ ܡ̈ܠܟܝܢ ܠܬܪܥܐ ܘܐ̇ܣܪ ܚ̈ܙܩܐ ܒܚ̈ܨܝܗܘܢ

78. Job 12:19

    ܡܕܒܪ ܠܟܗ̈ܢܐ ܒܬܡܗܐ ܘܠܥܫ̈ܝܢܐ ܡܫܦܠ

79. Job 12:20

    ܡܥܒܪ ܡܡܠܠܐ ܡܢ ܡܗ̈ܝܡܢܐ ܘܛܥܡܐ ܕܣ̈ܒܐ ܫ̇ܩܠ

80. Job 12:21

    ܐܫ̇ܕ ܫܛܝܘܬܐ ܥܠ ܫ̈ܠܝܛܢܐ ܘܚܠܝܨܘܬܗܘܢ ܕܬܩ̈ܝܦܐ ܡܪܦܐ

81. Job 12:22

    ܡܓܠܐ ܥܡܝ̈ܩܬܐ ܡܢ ܚܫܘܟܐ ܘܡ̇ܦܩ ܠܢܘܗܪܐ ܡܢ ܛ̈ܠܠܝ ܡܘܬܐ

82. Job 12:23

    ܡܛܥܐ ܠܥܡ̈ܡܐ ܘܡܒܕܪ ܠܗܘܢ ܫ̇ܛܚ ܠܥܡ̈ܡܐ ܘܡܘܒܕ ܠܗܘܢ ܫ̇ܛܚ ܠܐ̈ܡܘܬܐ ܘܫ̇ܒܩ ܠܗܝܢ

83. Job 12:24

    ܡܫܛܐ ܠܒܐ ܕܪ̈ܫܘܗܝ ܕܥܡܐ ܕܐܪܥܐ ܘܡܛܥܐ ܠܗܘܢ ܒܬܘܫܐ ܕܠܐ ܐܘܪܚܐ

84. Job 12:25

    ܢܡܘܫܘܢ ܒܚܫܘܟܐ ܘܠܐ ܒܢܘܗܪܐ ܢܓܫܓܫܘܢ ܚܫܘܟܐ ܘܠܐ ܢܗܝܪܐ ܘܡܛܥܐ ܠܗܘܢ ܐܝܟ ܪ̈ܘܝܐ

85. Job 13:1

    ܗܐ ܗܠܝܢ ܟܠܗܝܢ ܚܙܬ ܥܝܢܝ ܘܫܡܥܬ ܐܕܢܝ ܘܐܬܒܝܢܬ

86. Job 13:2

    ܐܝܟ ܝܕܥܬܟܘܢ ܝ̇ܕܥ ܐܢܐ ܐܦ ܐܢܐ ܘܠܐ ܗܘܝܬ ܒܨܝܪ ܡܢܟܘܢ

87. Job 13:3

    ܒܪܡ ܕܝܢ ܐܢܐ ܠܘܬ ܚܣܝܢܐ ܡܡܠܠ ܐܢܐ ܘܡܟܣܢܘܬܝ ܠܘܬ ܐܠܗܐ ܐܚܘܐ

88. Job 13:4

    ܒܪܡ ܕܝܢ ܐܢܬܘܢ ܡ̈ܡܠܠܝ ܫܘܩܪܐ ܐܢܬܘܢ ܘܡܐ̈ܣܝܝ ܒܠܐ ܡܕܡ ܐܢܬܘܢ

89. Job 13:5

    ܡ̇ܢ ܕܝܢ ܥܒܕ ܕܡܫܬܩ ܫܬܝܩܝܢ ܗܘܝܬܘܢ ܘܗܘܬ ܠܟܘܢ ܕܝܢ ܗܕܐ ܠܚܟܡܐ

90. Job 13:6

    ܫܡܥܘ ܗܟܝܠ ܡܟܣܢܘܬܝ ܘܨܘܬܘ ܕܝܢܐ ܕܣ̈ܦܘܬܝ

91. Job 13:7

    ܥܠ ܐܠܗܐ ܡܡܠܠܝܢ ܐܢܬܘܢ ܥܘܠܐ ܘܥܠܘܗܝ ܡܡܠܠܝܢ ܐܢܬܘܢ ܢܟܠܐ

92. Job 13:8

    ܒܐ̈ܦܘܗܝ ܢܣܒܝܢ ܐܢܬܘܢ ܐܘ ܥܡ ܐܠܗܐ ܕܝܢܝܢ ܐܢܬܘܢ

93. Job 13:9

    ܛܒ ܠܟܘܢ ܕܒܨܐ ܠܟܘܢ ܐܘ ܐܝܟ ܕܡܬܕܝܢ ܒܟܠ ܐܢܫ ܡܬܕܝܢܝܢ ܐܢܬܘܢ ܒܗ

94. Job 13:10

    ܡܟܣܘ ܢܟܣܟܘܢ ܐܘ ܒܐ̈ܦܘܗܝ ܢܣܒܝܢ ܐܢܬܘܢ

95. Job 13:11

    ܕܚܠܬܗ ܬܒܥܬܟܘܢ ܘܙܘܥܬܗ ܬܦܠ ܥܠܝܟܘܢ

96. Job 13:12

    ܐܬܕܟܪܘ ܕܡܢ ܥܦܪܐ ܗܘ ܫܘܠܛܢܟܘܢ ܘܥܠ ܓܢܒ ܛܝܢܐ ܗܘ ܡܕܝܪܟܘܢ

97. Job 13:13

    ܫܬܘܩܘ ܡܢܝ ܘܐܡܠܠ ܐܦ ܐܢܐ ܘܐܡܪ ܟܠ ܡܕܡ ܕܥܒܪ ܥܠܝ

98. Job 13:14

    ܥܠ ܡܢܐ ܫܩܝܠ ܐܢܐ ܒܣܪܝ ܒܫ̈ܢܝ ܘܢܦܫܝ ܣܝܡܐ ܒܐ̈ܝܕܝ

99. Job 13:15

    ܐܢ ܢܩܛܠܢܝ ܠܗ ܗܘ ܡܣܟܐ ܐܢܐ ܒܠܚܘܕ ܡܛܠ ܕܐܘܪ̈ܚܬܝ ܩܕܡܘܗܝ ܐܢܝ̈ܢ

100. Job 13:16

     ܘܐܦ ܗܘ ܢܗܘܐ ܠܝ ܦܪܘܩܐ ܡܛܠ ܕܠܐ ܥܐܠ ܩܕܡܘܗܝ ܚܠܦܐ

← Previous · Next → — showing 201–300 of 1,065

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.