← All works

Peshitta Jeremiah

Peshitta (Syriac Old Testament) · 1,366 sections

1. Jeremiah 4:20

   ܬܒܪܐ ܥܠ ܬܒܪܐ ܢܐܬܐ ܡܛܠ ܕܐܬܒܙܬ ܟܠܗ̇ ܐܪܥܐ ܡܢ ܫܠܝ ܐܬܒܙܙ ܡܫܟܢܝ ܘܢܦܠ ܝܪ̈ܝܥܬܝ

2. Jeremiah 4:21

   ܥܕܡܐ ܠܐܡܬܝ ܐܚܙܐ ܠܕܥܪܩ ܘܐܫܡܥ ܩܠܐ ܕܫܝܦܘܪܐ

3. Jeremiah 4:22

   ܡܛܠ ܕܫܛܘ ܥܡܝ ܘܠܝ ܠܐ ܝܕܥܘ ܒ̈ܢܝܐ ܐܢܘܢ ܣܟ̈ܠܐ ܘܠܐ ܗܘܘ ܚܟܝ̈ܡܐ ܚܟ̇ܝܡܝܢ ܐܢܘܢ ܠܒܝܫܬܐ ܘܛܒܬܐ ܠܐ ܝܕܥ̇ܝܢ

4. Jeremiah 4:23

   ܚܪܬ ܒܐܪܥܐ ܘܗܐ ܬܘܗ ܘܒܘܗ̇ ܘܠܫܡܝܐ ܘܠܝܬ ܢܘܗܪܗܘܢ

5. Jeremiah 4:24

   ܚܙܝܬ ܛܘܪ̈ܐ ܘܗܐ ܙܝܥܝܢ ܘܟܠܗܝܢ ܪ̈ܡܬܐ ܐܬܦܪܩ

6. Jeremiah 4:25

   ܚܪܬ ܘܗܐ ܠܝܬ ܒܪܢܫ ܘܟܠܗ̇ ܦܪܚܬܐ ܕܫܡܝܐ ܦܪܕܬ

7. Jeremiah 4:26

   ܚܙܝܬ ܘܗܐ ܟܪܡܠܐ ܚܪܒ ܐܝܟ ܡܕܒܪܐ ܘܟܘܠܗܝܢ ܩܘܪ̈ܝܗ ܐܬܥܩܪ ܡܢ ܩܕܡ ܡܪܝܐ ܘܡܢ ܩܕܡ ܚܡܬܐ ܕܪܘܓܙܗ

8. Jeremiah 4:27

   ܡܛܠ ܕܗܟܢܐ ܐܡܪ ܡܪܝܐ ܠܚܒܠܐ ܬܗܘܐ ܟܠܗ̇ ܐܪܥܐ ܘܓܡܘܪܝܐ ܠܐ ܐܥܒܕ

9. Jeremiah 4:28

   ܡܛܠ ܗܠܝܢ ܬܬܐܒܠ ܐܪܥܐ ܘܢܚܫܟܘܢ ܫܡܝܐ ܡܢ ܠܥܠ ܟܠ ܕܡܠܠܬ ܘܐܬܪܥܝܬ ܠܐ ܐܬܬܘܐ ܘܠܐ ܐܗܦܟ ܡܢܗ̇

10. Jeremiah 4:29

    ܡܢ ܩܠܐ ܕܦܪ̈ܫܐ ܘܕܫܕܝܢ ܒܩܫܬܐ ܥܪܩܬ ܟܠܗ̇ ܩܪܝܬܐ ܥܠܘ ܒܥܒ̈ܐ ܘܒܫܩ̈ܝܦܐ ܣܠܩܘ ܟܠܗܝܢ ܩܘܪ̈ܝܐ ܐܫܬܒܩ ܘܠܝܬ ܒܪ ܐܢܫ ܕܝܬܒ ܒܗܝܢ

11. Jeremiah 4:30

    ܘܐܢܬܝ ܒܙܝܙܬܐ ܡܢܐ ܬܥܒܕܝܢ ܟܕ ܬܠܒܫܝܢ ܙܚܘܪ̈ܝܬܐ ܟܕ ܬܨܛܒܬܝܢ ܒܬܨܒܝܬܐ ܕܕܗܒܐ ܟܕ ܬܟܚܠܝܢ ܒܨܕܝܕܐ ܥܝܢ̈ܝܟܝ ܠܣܪܝܩܘܬܐ ܗܘ ܡܨܛܒܬܐ ܐܢܬܝ ܫܒܩܘܟܝ ܚܒܪ̈ܝܟܝ ܘܢܦܫܟܝ ܒܥܝܢ

12. Jeremiah 4:31

    ܡܛܠ ܕܩܠܐ ܐܝܟ ܟܪܝܗܬܐ ܫܡܥܬ ܘܥܩܬܐ ܐܝܟ ܐܢܬܬܐ ܕܡܚ̇ܒܠܐ ܠܡܐܠܕ ܩܠܐ ܕܒܪܬ ܨܗܝܘܢ ܕܡܬܛܪܦܐ ܘܡܦܪܣܐ ܐ̈ܝܕܝܗ̇ ܘܐܡܪܐ ܘܝ ܠܝ ܕܐܬܛܪܦܬ ܢܦܫܝ ܥܠ ܩ̈ܛܝܠܝ

13. Jeremiah 5:1

    ܐܬܟܪܟܘ ܒܫ̈ܘܩܝܗ̇ ܕܐܘܪܫܠܡ ܘܚܙܘ ܘܕܥܘ ܘܒܥܘ ܒ̈ܦܠܛܘܬܗ̇ ܐܢ ܬܫܟܚܘܢ ܓܒܪܐ ܐܢ ܐܝܬ ܕܥܒܕ ܕܝܢܐ ܘܒܥܐ ܗܝܡܢܘܬܐ ܐܫܒܘܩ ܠܗ̇

14. Jeremiah 5:2

    ܘܐܢ ܚܝ ܡܪܝܐ ܢܐܡܪܘܢ ܫܪܝܪܐܝܬ ܒܕܓܠܘܬܐ ܝܡܝܢ

15. Jeremiah 5:3

    ܡܪܝܐ ܥܝܢ̈ܝܟ ܥܠ ܗܝܡܢܘܬܐ ܡܚܝܬ ܐܢܘܢ ܘܠܐ ܐܬܟܪܗܘ ܓܡܪܬ ܐܢܘܢ ܘܠܐ ܨܒܘ ܠܡܩܒܠܘ ܡܪܕܘܬܐ ܩܫܝܘ ܐ̈ܦܝܗܘܢ ܡܢ ܟܐܦܐ ܘܠܐ ܨܒܘ ܠܡܬܒ

16. Jeremiah 5:4

    ܘܐܢܐ ܐܡܪܬ ܡܛܠ ܕܡܣ̈ܟܝܢܝܢ ܐܢܘܢ ܣܛܘ ܡܛܠ ܕܠܐ ܝܕܥܘ ܐܘܪܚܗ ܕܡܪܝܐ ܘܕܝܢܐ ܕܐܠܗܗܘܢ

17. Jeremiah 5:5

    ܐܙܠ ܠܝ ܠܘܬ ܪ̈ܘܪܒܢܐ ܘܐܡܠܠ ܥܡܗܘܢ ܡܛܠ ܕܗܢܘܢ ܝܕܥܘ ܐܘܪܚܗ ܕܡܪܝܐ ܘܕܝܢܐ ܕܐܠܗܗܘܢ ܫܪܝܪܐܝܬ ܟܠܗܘܢ ܐܝܟ ܚܕܐ ܬܒܪܘ ܢܝܪܐ ܘܦܣܩܘ ܚ̈ܢܩܐ

18. Jeremiah 5:6

    ܡܛܠ ܗܢܐ ܢܬܒܪ ܐܢܘܢ ܐܪܝܐ ܡܢ ܥܒܐ ܘܕܐ̈ܒܝ ܪܡܫܐ ܢܒܙܥܘܢ ܐܢܘܢ ܢܡܪܐ ܢܟܡܢ ܥܠ ܩܘܪ̈ܝܗܘܢ ܟܠ ܕܢܦܘܩ ܡܢܗܘܢ ܢܬܬܒܪ ܡܛܠ ܕܣܓܝܘ ܚ̈ܘܒܝܗܘܢ ܘܥܫܢܘ ܕܠܐ ܢܬܘܒܘܢ

19. Jeremiah 5:7

    ܥܠ ܐܝܕܐ ܐܫܒܘܩ ܠܟܝ ܒܢܝ̈ܟܝ ܫܒܩܘܢܝ ܘܐܝܡܘ ܒܐܝܠܝܢ ܕܠܐ ܗܘܘ ܐ̈ܠܗܐ ܘܣܒܥܬ ܐܢܘܢ ܘܓܪܘ ܘܒܝܬ ܙܢܝ̈ܬܐ ܐܬܟܬܫܘ

20. Jeremiah 5:8

    ܐܝܟ ܪ̈ܟܫܐ ܐܘܫ̈ܢܐ ܥܗܪ̈ܐ ܗܘܘ ܓܒܪ ܥܠ ܐܢܬܬ ܚܒܪܗ ܨܗܠܝܢ ܗܘܘ

21. Jeremiah 5:9

    ܥܠ ܗܠܝܢ ܠܐ ܐܦܩܘܕ ܐܡܪ ܡܪܝܐ ܘܒܥܡܐ ܕܗܟܢܐ ܠܐ ܬܬܢܩܡ ܢܦܫܝ

22. Jeremiah 5:10

    ܣܩܘ ܒܫܘܪ̈ܝܗ̇ ܘܥܩܘܪܘ ܘܓܡܘܪܝܐ ܠܐ ܬܥܒܕܘܢ ܫܒܘܩܘ ܫܬܐ̈ܣܝܗ̇ ܡܛܠ ܕܕܡܪܝܐ ܐܢܝ̈ܢ

23. Jeremiah 5:11

    ܡܛܠ ܕܡܕܓܠܘ ܕܓܠܘ ܒܝ ܒܢ̈ܝ ܐܝܣܪܝܠ ܘܒ̈ܢܝ ܝܗܘܕܐ ܐܡܪ ܡܪܝܐ

24. Jeremiah 5:12

    ܕܓܠܘ ܒܡܪܝܐ ܘܐܡܪܝܢ ܠܐ ܗܘܐ ܗܘ ܠܐ ܬܐܬܐ ܥܠܝܢ ܒܝܫܬܐ ܘܚܪܒܐ ܘܟܦܢܐ ܠܐ ܢܚܙܐ

25. Jeremiah 5:13

    ܘܢܒ̈ܝܐ ܢܗܘܘܢ ܠܥܠܥܠܐ ܘܐܝܠܝܢ ܕܡܠܬܐ ܠܝܬ ܠܗܘܢ ܗܟܢܐ ܢܬܥܒܕ ܠܗܘܢ

26. Jeremiah 5:14

    ܡܛܠ ܗܢܐ ܗܟܢܐ ܐܡܪ ܡܪܝܐ ܐܠܗܐ ܚܝܠܬܢܐ ܚܠܦ ܕܡܠܠܬܘܢ ܡܠܬܐ ܗܕܐ ܗܐ ܝܗܒ ܐܢܐ ܦܬ̈ܓܡܝ ܒܦܘܡܟ ܢܘܪܐ ܘܥܡܐ ܗܢܐ ܩܝ̈ܣܐ ܘܬܐܟܘܠ ܐܢܘܢ

27. Jeremiah 5:15

    ܗܐ ܡܝܬܐ ܐܢܐ ܥܠܝܟܘܢ ܒܝܬ ܐܝܣܪܝܠ ܥܡܐ ܡܢ ܪܘܚܩܐ ܐܡܪ ܡܪܝܐ ܥܡܐ ܗܘ ܥܫܝܢܐ ܥܡܐ ܗܘ ܕܡܢ ܥܠܡܐ ܥܡܐ ܕܠܐ ܬܕܥ ܠܫܢܗ ܘܠܐ ܬܫܡܥ ܡܕܡ ܕܡܡܠܠ

28. Jeremiah 5:16

    ܓܓܪ̈ܬܗ ܐܝܟ ܩܒܪ̈ܐ ܦܬܝܚ̈ܢ ܘܟܠܗܘܢ ܓܢܒܪ̈ܝܢ

29. Jeremiah 5:17

    ܢܐܟܘܠ ܚܨܕܟ ܘܠܚܡܟ ܢܐܟܘܠ ܒ̈ܢܝܟ ܘܒܢ̈ܬܟ ܢܐܟܘܠ ܥܢܟ ܘܬܘܪ̈ܝܟ ܢܐܟܘܠ ܓܘܦܢ̈ܝܟ ܘܬܐ̈ܢܝܟ ܢܡܣܟܢ ܩܘܪ̈ܝܐ ܕܬܘܩܦܟ ܕܐܢܬ ܬܟܝܠ ܥܠܝܗܝܢ ܒܚܪܒܐ

30. Jeremiah 5:18

    ܘܐܦ ܒܝ̈ܘܡܬܐ ܗܢܘܢ ܐܡܪ ܡܪܝܐ ܠܐ ܐܣܝܦܟܘܢ

31. Jeremiah 5:19

    ܘܢܗܘܐ ܟܕ ܬܐܡܪܘܢ ܡܛܠ ܡܢܐ ܥܒܕ ܠܢ ܡܪܝܐ ܐܠܗܢ ܗܠܝܢ ܟܠܗܝܢ ܬܐܡܪ ܠܗܘܢ ܗܟܢܐ ܐܡܪ ܡܪܝܐ ܥܠ ܕܫܒܩܬܘܢܢܝ ܘܦܠܚܬܘܢ ܠܐ̈ܠܗܐ ܢܘܟܪ̈ܝܐ ܒܐܪܥܟܘܢ ܗܟܢܐ ܬܦܠܚܘܢ ܠܢܘܟܪ̈ܝܐ ܒܐܪܥܐ ܕܠܐ ܕܝܠܟܘܢ

32. Jeremiah 5:20

    ܚܘܘ ܗܕܐ ܒܒܝܬ ܝܥܩܘܒ ܘܐܫܡܥܘܗ̇ ܒܝܗܘܕܐ ܘܐܡܪܘ

33. Jeremiah 5:21

    ܫܡܥܘ ܗܕܐ ܥܡܐ ܣܟܠܐ ܕܠܝܬ ܒܗ ܠܒܐ ܕܥܝ̈ܢܐ ܐܝܬ ܠܗܘܢ ܘܠܐ ܚܙܝܢ ܘܐ̈ܕܢܐ ܐܝܬ ܠܗܘܢ ܘܠܐ ܫܡܥܝܢ

34. Jeremiah 5:22

    ܡܢܝ ܠܐ ܬܕܚܠܘܢ ܐܡܪ ܡܪܝܐ ܘܡܢ ܩܕܡܝ ܠܐ ܬܙܘܥܘܢ ܕܣܡܬ ܚܠܐ ܬܚܘܡܐ ܠܝܡܐ ܢܡܘܣܐ ܠܥܠܡ ܘܠܐ ܥܒܪ ܠܗ ܘܡܬܟܬܫ ܘܠܐ ܡܫܟܚ ܘܡܬܬܪ̈ܝܡܝܢ ܓܠܠܘ̈ܗܝ ܘܠܐ ܥܒܪܝܢ ܠܗ

35. Jeremiah 5:23

    ܘܠܥܡܐ ܗܢܐ ܗܘܐ ܠܒܐ ܡܪܘܕܐ ܘܡܡܪܡܪܢܐ ܣܛܘ ܘܐܙܠܘ

36. Jeremiah 5:24

    ܘܠܐ ܐܡܪܘ ܒܠܒܗܘܢ ܕܢܕܚܠ ܠܡܪܝܐ ܐܠܗܢ ܕܝܗܒ ܡܛܪܐ ܒܟܝܪܝܐ ܘܠܩܝܫܝܐ ܒܙܒܢܗ ܘܥ̈ܠܠܬܐ ܕܩܝܛܐ ܠܣܬܘܐ ܢܛܪ ܠܢ

37. Jeremiah 5:25

    ܚ̈ܘܒܝܟܘܢ ܨܠܘ ܥܠܝܟܘܢ ܗܠܝܢ ܘܚ̈ܛܗܝܟܘܢ ܟܠܘ ܛܒ̈ܬܐ ܡܢܟܘܢ

38. Jeremiah 5:26

    ܡܛܠ ܕܐܫܬܟܚܘ ܒܥܡܝ ܚ̈ܛܝܐ ܘܐܩܝܡܘ ܦܚ̈ܐ ܐܝܟ ܣܝܓ̈ܐ ܕܢܬܬܚܕܘܢ ܒܗܘܢ ܒܢ̈ܝ ܐܢܫܐ

39. Jeremiah 5:27

    ܘܐܝܟ ܐܩܠܘܒܝܐ ܕܡܠܐ ܦܪܚܬܐ ܗܟܢܐ ܒܬ̈ܝܗܘܢ ܡܠܝܢ ܢܟܠܐ ܡܛܠ ܗܢܐ ܝܪܒܘ ܘܥܬܪܘ

40. Jeremiah 5:28

    ܘܥܒܪܘ ܥܠ ܕܝܢܐ ܕܝܢܐ ܠܐ ܕܢܘ ܘܕܝܢܐ ܕܝܬܡ̈ܐ ܠܐ ܬܪܨܘ ܘܕܝܢܐ ܕܒܝܫ̈ܐ ܠܐ ܕܢܘ

41. Jeremiah 5:29

    ܥܠ ܗܠܝܢ ܠܐ ܐܦܩܘܕ ܐܡܪ ܡܪܝܐ ܘܒܥܡܐ ܕܗܟܢܐ ܠܐ ܬܬܢܩܡ ܢܦܫܝ

42. Jeremiah 5:30

    ܬܡܗܐ ܘܫܛܝܘܬܐ ܗܘܐ ܒܐܪܥܐ

43. Jeremiah 5:31

    ܢܒ̈ܝܐ ܐܬܢܒܝܘ ܫܘܩܪܐ ܘܟܗ̈ܢܐ ܐܚܕܘ ܐ̈ܝܕܝܗܘܢ ܘܥܡܝ ܪܚܡܘ ܗܟܢܐ ܘܡܢܐ ܬܥܒܕܘܢ ܠܚܪܬܐ

44. Jeremiah 6:1

    ܓܙܘ ܒܢ̈ܝ ܒܢܝܡܝܢ ܡܢ ܓܘ ܐܘܪܫܠܡ ܘܒܩܠܐ ܩܪܘ ܫܝܦܘܪܐ ܘܥܠ ܒܝܬ ܟܪܡ ܫܩܠܘ ܐܬܐ ܡܛܠ ܕܒܝܫܬܐ ܡܝܬܐ ܐܢܐ ܡܢ ܓܪܒܝܐ ܘܬܒܪܐ ܪܒܐ

45. Jeremiah 6:2

    ܠܡܥܕܢܬܐ ܘܠܡܦܢܩܬܐ ܕܡܝܬܝ ܒܪܬ ܨܗܝܘܢ

46. Jeremiah 6:3

    ܥܠܝܗ̇ ܢܐܬܘܢ ܪ̈ܥܘܬܐ ܘܓܙܪ̈ܝܗܘܢ ܐܝܟ ܚܕܐ ܘܢܩܫܘܢ ܥܠܝܗ̇ ܡܫ̈ܟܢܝܗܘܢ ܟܕ ܚܕܪܐ ܘܢܪܥܘܢ ܓܒܪ ܠܓܒܗ

47. Jeremiah 6:4

    ܛܝܒܘ ܥܠܝܗ̇ ܩܪܒܐ ܘܢܐܡܪܘܢ ܩܘܡܘ ܢܣܩ ܒܛܗܪܐ ܘܝ ܠܢ ܕܦܢܐ ܝܘܡܐ ܘܪܟܢܘ ܛ̈ܠܠܝ ܪܡܫܐ

48. Jeremiah 6:5

    ܩܘܡܘ ܢܣܩ ܥܠܝܗ̇ ܒܠܠܝܐ ܘܢܚܒܠ ܣܚܪ̈ܬܗ

49. Jeremiah 6:6

    ܡܛܠ ܕܗܟܢܐ ܐܡܪ ܡܪܝܐ ܚܝܠܬܢܐ ܦܣܘܩܘ ܩܝܣ̈ܝܗ̇ ܘܐܟܡܢܘ ܥܠ ܐܘܪܫܠܡ ܟܡܐ̈ܢܐ ܗܝ ܩܪܝܬܐ ܕܐܬܦܩܕܬ ܘܟܠܗ ܥܘܫܩܗ̇ ܒܓܘܗ̇

50. Jeremiah 6:7

    ܐܝܟ ܕܟܢܫ ܓܘܒܐ ܡ̈ܘܗܝ ܗܟܢܐ ܟܢܫܬ ܒܝܫܬܗ̇ ܚܛܘܦܝܐ ܘܒܙܬܐ ܡܫܬܡܥ ܒܗ̇ ܩܕܡ ܐ̈ܦܝ ܐܡܝܢܐܝܬ ܒܟܐ̈ܒܐ ܘܒܡܚ̈ܘܬܐ

51. Jeremiah 6:8

    ܐܬܪܕܝ ܐܘܪܫܠܡ ܕܠܡܐ ܬܢܕ ܢܦܫܝ ܡܢܟܝ ܕܠܡܐ ܐܥܒܕܟܝ ܠܚܘܪܒܐ ܐܝܟ ܐܪܥܐ ܕܠܐ ܐܬܝܬܒܬ

52. Jeremiah 6:9

    ܗܟܢܐ ܐܡܪ ܡܪܝܐ ܚܝܠܬܢܐ ܡܬܒܥܪܘ ܢܬܒܥܪܘܢ ܐܝܟ ܓܦܬܐ ܫܪܟܗ ܕܐܝܣܪܝܠ ܐܗܦܟ ܐܝܕܟ ܐܝܟ ܩܛܘܦܐ ܥܠ ܒܘܥܪܐ

53. Jeremiah 6:10

    ܠܡ̇ܢ ܐܡܪ ܘܐܣܗܕ ܕܢܫܡܥܘܢ ܗܐ ܐ̈ܕܢܝܗܘܢ ܥܘܪ̈ܠܢ ܘܠܐ ܡܫܟܚܝܢ ܠܡܨܬ ܗܐ ܦܬܓܡܗ ܕܡܪܝܐ ܗܘܐ ܠܗܘܢ ܠܚܣܕܐ ܘܠܐ ܨܒܝܢ ܒܗ

54. Jeremiah 6:11

    ܘܐܢܬܝ ܚܡܬܗ ܕܡܪܝܐ ܐܬܡܠܝܬܝ ܘܠܐܝܬܝ ܐܟܝܠܝ ܘܐܫܘܕܝ ܥܠ ܛ̈ܠܝܐ ܒܫ̈ܘܩܐ ܘܥܠ ܟܢ̈ܘܫܬܐ ܕܓܕܘ̈ܕܐ ܐܟܚܕܐ ܡܛܠ ܕܐܦ ܓܒܪ̈ܐ ܥܡ ܢܫ̈ܐ ܢܬܬܚܕܘܢ ܘܣܒܐ ܥܡ ܛܠܐ ܝܘܡ̈ܬܐ

55. Jeremiah 6:12

    ܢܬܝܗܒܘܢ ܒܬ̈ܝܗܘܢ ܠܐܚܪ̈ܢܐ ܘܚ̈ܩܠܬܐ ܘܢܫ̈ܐ ܐܟܚܕܐ ܡܛܠ ܕܡܪܝܡ ܐܢܐ ܐܝܕܝ ܥܠ ܥܡܘܪ̈ܝܗ̇ ܕܐܪܥܐ ܐܡܪ ܡܪܝܐ

56. Jeremiah 6:13

    ܡܛܠ ܕܡܢ ܙܥܘܪܗܘܢ ܘܥܕܡܐ ܠܪܒܗܘܢ ܟܠܗܘܢ ܢܟܠܝܢ ܢܟܠܐ ܘܡܢ ܢ̈ܒܝܐ ܕ̈ܓܠܐ ܘܥܕܡܐ ܠܟܗ̈ܢܐ ܟܠܗܘܢ ܥܒܕܝܢ ܫܘܩܪܐ

57. Jeremiah 6:14

    ܘܡܐܣܝܢ ܬܒܪܗ̇ ܕܒܪܬ ܥܡܝ ܒܒܙܚܐ ܘܐܡܪܝܢ ܫܠܡܐ ܫܠܡܐ ܘܠܝܬ ܫܠܡܐ

58. Jeremiah 6:15

    ܒܗܬܘ ܡܛܠ ܕܛܢܦܘܬܐ ܥܒܕܘ ܘܒܗ̈ܝܬܐ ܠܐ ܒܗܬܝܢ ܘܠܡܬܬܟܣܘ ܠܐ ܝܕܥܝܢ ܡܛܠ ܗܢܐ ܢܦܠܘܢ ܥܡ ܢ̈ܦܠܐ ܘܒܙܒܢܐ ܕܡܬܦܩܕܝܢ ܢܣܬܚܦܘܢ ܐܡܪ ܡܪܝܐ

59. Jeremiah 6:16

    ܗܟܢܐ ܐܡܪ ܡܪܝܐ ܩܘܡܘ ܥܠ ܐܘܪ̈ܚܬܐ ܘܚܙܘ ܘܫܐܠܘ ܥܠ ܫܒܝ̈ܠܝ ܥܠܡܐ ܘܚܙܘ ܐܝܕܐ ܐܘܪܚܐ ܫܦܝܪܐ ܙܠܘ ܒܗ̇ ܘܐܫܟܚܘ ܢܝܚܐ ܠܢܦܫ̈ܬܟܘܢ ܘܐܡܪܘ ܠܐ ܐܙܠܝܢ ܚܢܢ

60. Jeremiah 6:17

    ܘܐܩܝܡܬ ܥܠܝܟܘܢ ܕܘܩ̈ܐ ܕܬܫܡܥܘܢ ܠܩܠ ܫܝܦܘܪܐ ܘܐܡܪܝܢ ܐܢܬܘܢ ܠܐ ܫܡܥܝܢ ܚܢܢ

61. Jeremiah 6:18

    ܡܛܠ ܗܢܐ ܫܡܥܘ ܥܡ̈ܡܐ ܘܕܥܝ ܥܕܬܐ ܕܒܗܘܢ

62. Jeremiah 6:19

    ܫܡܥܝ ܐܪܥܐ ܗܐ ܡܝܬܐ ܐܢܐ ܒܝܫܬܐ ܥܠ ܥܡܐ ܗܢܐ ܐܝܟ ܦܐܪ̈ܝ ܡܚܫ̈ܒܬܗܘܢ ܕܠܦܬ̈ܓܡܝ ܠܐ ܫܡܥܘ ܘܠܢܡܘܣܝ ܐܣܠܝܘ

63. Jeremiah 6:20

    ܠܡܢܐ ܗܘܝܐ ܠܝ ܠܒܘܢܬܐ ܕܡܝܬܝܢ ܐܢܬܘܢ ܡܢ ܫܒܐ ܘܩܢܝܐ ܕܒܣܡܐ ܡܢ ܐܪܥܐ ܪܚܝܩܬܐ ܒ̈ܥܠܘܬܟܘܢ ܠܐ ܨܒܝܬ ܘܕܒܚܝ̈ܟܘܢ ܠܐ ܒܣܡܘ ܠܝ

64. Jeremiah 6:21

    ܡܛܠ ܗܢܐ ܗܟܢܐ ܐܡܪ ܡܪܝܐ ܗܐ ܝܗܒ ܐܢܐ ܠܥܡܐ ܗܢܐ ܬܘ̈ܩܠܬܐ ܘܢܬܬܩܠܘܢ ܒܗܝܢ ܐ̈ܒܗܐ ܘܒ̈ܢܝܐ ܐܟܚܕܐ ܘܫܒܒܐ ܘܪܚܡܗ ܢܐܒܕܘܢ

65. Jeremiah 6:22

    ܗܟܢܐ ܐܡܪ ܡܪܝܐ ܗܐ ܥܡܐ ܐܬܐ ܡܢ ܐܪܥܐ ܕܓܪܒܝܐ ܘܥܡܐ ܪܒܐ ܢܕܘܠ ܡܢ ܣ̈ܘܦܝܗ̇ ܕܐܪܥܐ

66. Jeremiah 6:23

    ܒܩܫ̈ܬܬܐ ܘܒ̈ܢܝܙܟܐ ܡܙܝܢ̈ܝܢ ܒܝܫܝܢ ܐܢܘܢ ܘܠܐ ܡܪܚܡܢܝܢ ܩܠܗܘܢ ܐܝܟ ܝܡܐ ܕܡܬܟܬܫ ܘܥܠ ܪ̈ܟܫܐ ܪ̈ܟܝܒܝܢ ܘܡܛܝܒܝܢ ܐܝܟ ܓܢܒܪ̈ܐ ܠܩܪܒܐ ܥܠܝܟܝ ܒܪܬ ܨܗܝܘܢ

67. Jeremiah 6:24

    ܫܡܥܢ ܫܡܥܗܘܢ ܘܐܬܪܦܝ ܐܝ̈ܕܝܢ ܘܥܩܬܐ ܐܚܕܬܢ ܘܚܒ̈ܠܐ ܐܝܟ ܕܝܠܕܬܐ

68. Jeremiah 6:25

    ܠܐ ܬܦܩܘܢ ܠܚܩܠܐ ܘܒܐܘܪܚܐ ܠܐ ܬܐܙܠܘܢ ܡܛܠ ܚܪܒܐ ܕܒ̈ܥܠܕܒܒܐ ܕܟܪܝܟܐ ܡܢ ܚܕܪ̈ܝܟܝ

69. Jeremiah 6:26

    ܒܪܬ ܥܡܝ ܐܬܟܒܢܝ ܣܩ̈ܐ ܘܐܬܦܝܠܝ ܒܩܛܡܐ ܐܒܠܐ ܐܝܟ ܕܥܠ ܐܝܚܝܕܝܐ ܥܒܕܝ ܠܟܝ ܘܡܪܩܘܕܬܐ ܡܪܝܪܬܐ ܡܛܠ ܕܡܢ ܫܠܝܐ ܢܐܬܘܢ ܥܠܝܟܝ ܒܙܘ̈ܙܐ

70. Jeremiah 6:27

    ܒܚܘܪܐ ܝܗܒܬܟ ܒܥܡܝ ܥܫܝܢܐ ܕܬܕܥ ܘܬܒܚܢ ܐܘܪ̈ܚܬܗܘܢ

71. Jeremiah 6:28

    ܟܠܗܘܢ ܫ̈ܠܝܛܢܝܗܘܢ ܡܪ̈ܘܕܝܢ ܘܡ̈ܗܠܟܝܢ ܒܢܟܠܐ ܘܐܝܟ ܢܚܫܐ ܘܦܪܙܠܐ ܟܠܗܘܢ ܡܚܒܠܢܝܢ

72. Jeremiah 6:29

    ܓܪܕܝ ܡܦܘܚܐ ܡܢ ܢܘܪܗܘܢ ܘܐܒܪܐ ܘܣܪܝܩܐܝܬ ܨܪܦ ܨܪܘܦܐ ܘܒܝܫܬܗܘܢ ܠܐ ܓܡܪܐ

73. Jeremiah 6:30

    ܟܣܦܐ ܡܣܠܝܐ ܩܪܘ ܐܢܘܢ ܡܛܠ ܕܐܣܠܝ ܐܢܘܢ ܡܪܝܐ

74. Jeremiah 7:1

    ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ ܠܡܐܡܪ

75. Jeremiah 7:2

    ܩܘܡ ܒܬܪܥ ܒܝܬܗ ܕܡܪܝܐ ܘܩܪܝ ܬܡܢ ܦܬܓܡܐ ܗܢܐ ܘܐܡܪ ܫܡܥܘ ܦܬܓܡܗ ܕܡܪܝܐ ܟܠܗܘܢ ܕܒܝܬ ܝܗܘܕܐ ܕܥܐܠܝܢ ܒܬܪ̈ܥܐ ܗܠܝܢ ܠܡܣܓܕ ܠܡܪܝܐ

76. Jeremiah 7:3

    ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܐܛܐܒܘ ܐܘܪ̈ܚܬܟܘܢ ܘܥܒ̈ܕܝܟܘܢ ܘܐܫܪܝܟܘܢ ܒܐܬܪܐ ܗܢܐ

77. Jeremiah 7:4

    ܘܠܐ ܬܬܟܠܘܢ ܠܟܘܢ ܥܠ ܦܬ̈ܓܡܐ ܕܫܘܩܪܐ ܕܐܡܪܝܢ ܠܟܘܢ ܗܝܟܠܗ ܕܡܪܝܐ ܗܝܟܠܗ ܕܡܪܝܐ ܗܝܟܠܗ ܐܢܬܘܢ ܕܡܪܝܐ

78. Jeremiah 7:5

    ܐܢ ܬܫܦܪܘܢ ܐܘܪ̈ܚܬܟܘܢ ܘܥܒ̈ܕܝܟܘܢ ܘܐܢ ܬܥܒܕܘܢ ܕܝܢܐ ܒܝܬ ܓܒܪܐ ܠܚܒܪܗ

79. Jeremiah 7:6

    ܘܠܥܡܘܪ̈ܐ ܘܠܝ̈ܬܡܐ ܘܠܐܪ̈ܡܠܬܐ ܠܐ ܬܥܠܒܘܢ ܘܠܐ ܬܛܠܡܘܢ ܘܕܡܐ ܙܟܝܐ ܠܐ ܬܐܫܕܘܢ ܒܐܬܪܐ ܗܢܐ ܘܒܬܪ ܐ̈ܠܗܐ ܐܚܪ̈ܢܐ ܠܐ ܬܐܙܠܘܢ ܕܢܒܐܫ ܠܟܘܢ

80. Jeremiah 7:7

    ܘܐܫܪܝܟܘܢ ܒܐܬܪܐ ܗܢܐ ܒܐܪܥܐ ܕܝܗܒܬ ܠܐ̈ܒܗܝܟܘܢ ܡܢ ܥܠܡ ܘܥܕܡܐ ܠܥܠܡ

81. Jeremiah 7:8

    ܘܗܐ ܐܢܬܘܢ ܡܬܬܟܠܝܢ ܥܠ ܦܬ̈ܓܡܐ ܕܫܘܩܪܐ ܕܠܐ ܡܘܬܪܝܢ

82. Jeremiah 7:9

    ܓܢܒ̈ܝܢ ܐܢܬܘܢ ܘܩ̈ܛܘܠܝܢ ܐܢܬܘܢ ܘܓܝܪ̈ܝܢ ܐܢܬܘܢ ܘܝܡܝܢ ܐܢܬܘܢ ܒܫܡܝ ܒܫܘܩܪܐ ܘܣܝܡܝܢ ܐܢܬܘܢ ܒܣ̈ܡܐ ܠܒܥܠܐ ܘܐܙܠܝܢ ܐܢܬܘܢ ܒܬܪ ܐ̈ܠܗܐ ܐܚܪ̈ܢܐ ܕܠܐ ܝܕܥܬܘܢ

83. Jeremiah 7:10

    ܘܐܬ̇ܝܢ ܐܢܬܘܢ ܘܩܝ̇ܡܝܢ ܐܢܬܘܢ ܩܕܡܝ ܒܒܝܬܐ ܗܢܐ ܕܐܬܩܪܝ ܫܡܝ ܥܠܘܗܝ ܘܐܡܪܝܢ ܐܢܬܘܢ ܦܨܢ ܘܥܒܕܝܢ ܐܢܬܘܢ ܗܠܝܢ ܟܠܗܝܢ ܒܝܫ̈ܬܐ

84. Jeremiah 7:11

    ܕܠܡܐ ܡܥܪܬܐ ܕܓܢܒ̈ܐ ܗܘܐ ܒܝܬܐ ܗܢܐ ܕܐܬܩܪܝ ܫܡܝ ܥܠܘܗܝ ܒܥܝܢ̈ܝܟܘܢ ܘܐܦ ܐܢܐ ܗܐ ܚܙܝܬ ܐܡܪ ܡܪܝܐ

85. Jeremiah 7:12

    ܡܛܠ ܗܢܐ ܙܠܘ ܠܐܬܪܝ ܕܒܫܝܠܘ ܕܐܫܪܝܬ ܫܡܝ ܬܡܢ ܒܩܕܡܝܬܐ ܘܚܙܘ ܡܕܡ ܕܥܒܕܬ ܠܗ ܡܛܠ ܒܝܫܘܬܗ ܕܥܡܝ ܐܝܣܪܐܝܠ

86. Jeremiah 7:13

    ܘܗܫܐ ܚܠܦ ܕܥܒܕܬܘܢ ܥ̇ܒ̈ܕܐ ܗܠܝܢ ܟܠܗܘܢ ܐܡܪ ܡܪܝܐ ܘܩܕܡ̇ܬ ܘܐܡܪܬ ܠܟܘܢ ܘܠܐ ܫܡܥܬܘܢ ܘܩܪܝܬ ܠܟܘܢ ܘܠܐ ܥܢܝܬܘܢ

87. Jeremiah 7:14

    ܐܥܒܕܝܘܗܝ ܠܒܝܬܐ ܗܢܐ ܕܐܬܩܪܝ ܫܡܝ ܥܠܘܗܝ ܕܐܢܬܘܢ ܬܟܝܠܝܢ ܥܠܘܗܝ ܘܠܩܪܝܬܐ ܕܝܗܒܬ ܠܟܘܢ ܘܠܐ̈ܒܗܝܟܘܢ ܐܝܟ ܕܥܒܕܬ ܠܫܝܠܘ

88. Jeremiah 7:15

    ܘܐܫܕܝܟܘܢ ܡܢ ܩܕܡ ܐ̈ܦܝ ܐܝܟ ܕܫܕܝܬ ܠܟܠܗܘܢ ܐ̈ܚܝܟܘܢ ܠܟܠܗ ܙܪܥܗ ܕܐܦܪܝܡ

89. Jeremiah 7:16

    ܘܐܢܬ ܠܐ ܬܨܠܐ ܥܠ ܥܡܐ ܗܢܐ ܘܠܐ ܬܒܥܐ ܥܠܝܗܘܢ ܘܠܐ ܬܒܥܐ ܡܢܝ ܡܛܠ ܕܠܐ ܫܡܥ ܐܢܐ ܠܟ

90. Jeremiah 7:17

    ܠܐ ܚܙܐ ܐܢܬ ܡܕܡ ܕܥܒܕܝܢ ܒܩܘܪ̈ܝܐ ܕܝܗܘܕܐ ܘܒܫ̈ܘܩܝܗ̇ ܕܐܘܪܫܠܡ

91. Jeremiah 7:18

    ܒܢ̈ܝܐ ܡܠܩܛܝܢ ܩܝ̈ܣܐ ܘܐܒܗ̈ܐ ܡܘܩܕܝܢ ܢܘܪܐ ܘܢܫ̈ܐ ܠܝܫ̈ܢ ܠܝܫܐ ܠܡܥܒܕ ܙܘܬܪ̈ܐ ܠܦܘܠܚܢ ܫܡܝܐ ܘܠܡܢܩܝܘ ܢܘܩ̈ܝܐ ܠܐ̈ܠܗܐ ܐܚܪ̈ܢܐ ܕܢܪܓܙܘܢܢܝ

92. Jeremiah 7:19

    ܠܐ ܗܘܐ ܠܝ ܡܪܓܙܝܢ ܐܡܪ ܡܪܝܐ ܐܠܐ ܠܢܦܫܗܘܢ ܕܢܒܗܬܢ ܐ̈ܦܝܗܘܢ

93. Jeremiah 7:20

    ܡܛܠ ܗܢܐ ܗܟܢܐ ܐܡܪ ܡܪܝܐ ܐܠܗܐ ܗܐ ܪܘܓܙܝ ܘܚܡܬܝ ܡܬܬܢܝܚܝܢ ܥܠ ܐܬܪܐ ܗܢܐ ܥܠ ܒܢ̈ܝ ܐܢܫܐ ܘܥܠ ܒܥܝܪܐ ܘܥܠ ܐ̈ܝܠܢܐ ܕܕܒܪܐ ܘܥܠ ܦܐܪ̈ܐ ܕܐܪܥܐ ܘܬܘܩܕ ܘܠܐ ܬܕܥܟ

94. Jeremiah 7:21

    ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܥ̈ܠܘܬܗܘܢ ܐܘܣܦܘ ܥܠ ܕܒܚܝܗܘܢ ܘܐܟܠܘ ܒܣܪܐ

95. Jeremiah 7:22

    ܕܠܐ ܐܡܪܬ ܠܐ̈ܒܗܝܗܘܢ ܘܠܐ ܦܩܕܬ ܐܢܘܢ ܒܝܘܡܐ ܕܐܣܩܬ ܐܢܘܢ ܡܢ ܐܪܥܐ ܕܡܨܪܝܢ ܠܐ ܥܠ ܥܠܬܐ ܘܠܐ ܥܠ ܕܒ̈ܚܐ

96. Jeremiah 7:23

    ܐܠܐ ܐܢܐ ܗܢܐ ܦܬܓܡܐ ܦܩܕܬ ܐܢܘܢ ܘܐܡܪܬ ܫܡܥܘ ܒܩܠܝ ܘܐܗܘܐ ܠܟܘܢ ܐܠܗܐ ܘܐܢܬܘܢ ܬܗܘܘܢ ܠܝ ܥܡܐ ܘܗܠܟܘ ܒܟܠ ܐܘܪܚܐ ܕܡܦܩܕ ܐܢܐ ܠܟܘܢ ܕܢܛܐܒ ܠܟܘܢ

97. Jeremiah 7:24

    ܘܠܐ ܫܡܥܘ ܘܠܐ ܐܪܟܢܘ ܐܕܢܗܘܢ ܠܡܫܡܥ ܐܠܐ ܐܙܠܘ ܒܬܪ ܬܪ̈ܥܝܬܗܘܢ ܘܒܬܪ ܨܒܝ̈ܢܝ ܠܒܗܘܢ ܒܝܫܐ ܘܗܦܟܘ ܠܒܣܬܪܗܘܢ ܘܠܐ ܠܩܕܡܝܗܘܢ

98. Jeremiah 7:25

    ܡܢ ܝܘܡܐ ܕܢܦܩܘ ܐ̈ܒܗܝܗܘܢ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܢܐ ܘܫܕܪܬ ܠܘܬܗܘܢ ܟܠܗܘܢ ܥܒ̈ܕܝ ܢܒ̈ܝܐ ܒܟܠܝܘܡ ܩܕܡܬ ܘܫܕܪܬ

99. Jeremiah 7:26

    ܘܠܐ ܫܡܥܘ ܘܠܐ ܐܪܟܢܘ ܐܕܢܗܘܢ ܠܘܬܝ ܘܩܫܝܘ ܩܕܠܗܘܢ ܛܒ ܡܢ ܐܒ̈ܗܝܗܘܢ

100. Jeremiah 7:27

     ܘܬܐܡܪ ܠܗܘܢ ܗܠܝܢ ܟܠܗܘܢ ܦܬ̈ܓܡܐ ܘܠܐ ܢܫܡܥܘܢܟ ܘܩܪܐ ܐܢܬ ܠܗܘܢ ܘܠܐ ܥܢܝܢ ܠܟ

← Previous · Next → — showing 101–200 of 1,366

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.