← All works

Peshitta Jeremiah

Peshitta (Syriac Old Testament) · 1,366 sections

1. Jeremiah 1:1

   ܦܬ̈ܓܡܘܗܝ ܕܐܪܡܝܐ ܒܪ ܚܠܩܝܐ ܡܢ ܟܗ̈ܢܐ ܕܒܥܢܬܘܬ ܕܒܐܪܥܐ ܕܒܢܝܡܝܢ

2. Jeremiah 1:2

   ܕܗܘܐ ܦܬܓܡܗ ܕܡܪܝܐ ܥܠܘܗܝ ܒܝ̈ܘܡܘܗܝ ܕܝܘܫܝܐ ܒܪ ܐܡܘܢ ܡܠܟܐ ܕܝܗܘܕܐ ܒܬܠܬܥܣܪܐ ܫܢܝ̈ܢ ܠܡܠܟܘܬܗ

3. Jeremiah 1:3

   ܘܗܘܐ ܒܝ̈ܘܡܘܗܝ ܕܝܘܝܩܝܡ ܒܪ ܝܘܫܝܐ ܡܠܟܐ ܕܝܗܘܕܐ ܥܕܡܐ ܕܫܠܡ ܚܕܥܣܪ̈ܐ ܫ̈ܢܝܢ ܠܨܕܩܝܐ ܒܪ ܝܘܫܝܐ ܡܠܟܐ ܕܝܗܘܕܐ ܥܕܡܐ ܕܐܫܬܒܝܬ ܐܘܪܫܠܡ ܒܝܪܚܐ ܚܡܝܫܝܐ

4. Jeremiah 1:4

   ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

5. Jeremiah 1:5

   ܥܕܠܐ ܐܨܘܪܟ ܒܟܪܣܐ ܐܝܕܥܬܟ ܘܥܕܠܐ ܬܦܘܩ ܡܢ ܡܪܒܥܐ ܩܕܫܬܟ ܘܢܒܝܐ ܠܥܡ̈ܡܐ ܝܗܒܬܟ

6. Jeremiah 1:6

   ܘܐܡܪܬ ܒܒܥܘ ܡܪܝܐ ܐܠܗܐ ܗܐ ܠܐ ܝܕܥ ܐܢܐ ܠܡܡܠܠܘ ܡܛܠ ܕܛܠܐ ܐܢܐ

7. Jeremiah 1:7

   ܘܐܡܪ ܠܝ ܡܪܝܐ ܠܐ ܬܐܡܪ ܕܛܠܐ ܐܢܐ ܡܛܠ ܕܥܠ ܟܠ ܕܐܫܕܪܟ ܬܐܙܠ ܘܟܠ ܕܐܦܩܕܟ ܬܡܠܠ

8. Jeremiah 1:8

   ܠܐ ܬܕܚܠ ܡܢ ܩܕܡܝܗܘܢ ܡܛܠ ܕܥܡܟ ܐܢܐ ܠܡܦܨܝܘܬܟ ܐܡܪ ܡܪܝܐ

9. Jeremiah 1:9

   ܘܐܘܫܛ ܡܪܝܐ ܐܝܕܗ ܘܩܪܒ ܠܦܘܡܝ ܘܐܡܪ ܠܝ ܡܪܝܐ ܗܐ ܝܗܒܬ ܦܬ̈ܓܡܝ ܒܦܘܡܟ

10. Jeremiah 1:10

    ܚܙܝ ܕܐܫܠܛܬܟ ܝܘܡܢܐ ܥܠ ܥܡ̈ܡܐ ܘܥܠ ܡ̈ܠܟܘܬܐ ܠܡܥܩܪ ܘܠܡܣܬܪ ܘܠܡܣܚܦܘ ܘܠܡܘܒܕܘ ܘܠܡܒܢܐ ܘܠܡܨܒ

11. Jeremiah 1:11

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ ܡܢܐ ܚܙܝܬ ܐܪܡܝܐ ܘܐܡܪܬ ܚܘܛܪܐ ܕܠܘܙܐ ܚܙܐ ܐܢܐ

12. Jeremiah 1:12

    ܘܐܡܪ ܠܝ ܡܪܝܐ ܫܦܝܪ ܚܙܝܬ ܡܛܠ ܕܡܣܪܗܒ ܐܢܐ ܥܠ ܦܬܓܡܝ ܠܡܥܒܕܗ

13. Jeremiah 1:13

    ܘܗܘܐ ܥܠܝ ܦܬܓܡܗ ܕܡܪܝܐ ܕܬܪ̈ܬܝܢ ܙܒ̈ܢܝܢ ܘܐܡܪ ܡܢܐ ܚܙܐ ܐܢܬ ܘܐܡܪܬ ܩܕܣܐ ܕܬܦܐ ܚܙܐ ܐܢܐ ܘܐ̈ܦܘܗܝ ܡܢ ܐܦ̈ܝ ܓܪܒܝܐ

14. Jeremiah 1:14

    ܘܐܡܪ ܠܝ ܡܪܝܐ ܡܢ ܓܪܒܝܐ ܬܬܦܬܚ ܒܝܫܬܐ ܥܠ ܟܠܗܘܢ ܝܬ̈ܒܝ ܐܪܥܐ

15. Jeremiah 1:15

    ܡܛܠ ܕܗܐ ܡܫܕܪ ܐܢܐ ܘܩܪܐ ܐܢܐ ܠܟܠܗܝܢ ܫܪ̈ܒܬܐ ܕܡ̈ܠܟܘܬܐ ܕܓܪܒܝܐ ܐܡܪ ܡܪܝܐ ܘܢܐܬܘܢ ܘܢܪܡܘܢ ܓܒܪ ܟܘܪܣܝܗ ܒܡܥܠܢܐ ܕܬܪ̈ܥܐ ܕܐܘܪܫܠܡ ܘܥܠ ܟܠܗܘܢ ܫܘܪ̈ܝܗ ܟܕ ܚܕܪܐ ܘܥܠ ܟܠܗܝܢ ܩܘܪ̈ܝܐ ܕܝܗܘܕܐ

16. Jeremiah 1:16

    ܘܐܡܠܠ ܕܝܢ̈ܝ ܥܡܗܘܢ ܡܛܠ ܟܠܗܝܢ ܒܝܫ̈ܬܗܘܢ ܕܫܒܩܘܢܝ ܘܣܡܘ ܒܣ̈ܡܐ ܠܐ̈ܠܗܐ ܐܚܪ̈ܢܐ ܘܣܓܕܘ ܠܥܒܕ ܐ̈ܝܕܝܗܘܢ

17. Jeremiah 1:17

    ܘܐܢܬ ܐܣܘܪ ܚܨ̈ܝܟ ܘܩܘܡ ܐܡܪ ܠܗܘܢ ܟܠܡܕܡ ܕܡܦܩܕ ܐܢܐ ܠܟ ܠܐ ܬܕܚܠ ܡܢܗܘܢ ܕܠܡܐ ܐܬܒܪܟ ܩܕܡܝܗܘܢ

18. Jeremiah 1:18

    ܘܐܢܐ ܗܐ ܥܒܕܬܟ ܝܘܡܢܐ ܐܝܟ ܩܪܝܬܐ ܬܩܝܦܬܐ ܘܐܝܟ ܥܡܘܕܐ ܕܦܪܙܠܐ ܘܐܝܟ ܫܘܪܐ ܕܢܚܫܐ ܥܠ ܟܠܗ ܐܪܥܐ ܥܠ ܡ̈ܠܟܐ ܕܝܗܘܕܐ ܘܥܠ ܪ̈ܘܪܒܢܝܗܘܢ ܘܥܠ ܟܗ̈ܢܝܗܘܢ ܘܥܠ ܢܒܝ̈ܝܗܘܢ ܘܥܠ ܟܠܗ ܥܡܐ ܕܐܪܥܐ

19. Jeremiah 1:19

    ܘܢܬܟܬܫܘܢ ܥܡܟ ܘܠܐ ܢܙܟܘܢܟ ܡܛܠ ܕܥܡܟ ܐܢܐ ܠܡܦܨܝܘܬܟ ܐܡܪ ܡܪܝܐ

20. Jeremiah 2:1

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

21. Jeremiah 2:2

    ܙܠ ܘܐܟܪܙ ܒܐ̈ܕܢܝ ܐܘܪܫܠܡ ܘܐܡܪ ܗܟܢܐ ܐܡܪ ܡܪܝܐ ܐܬܕܟܪܬ ܠܟܝ ܛܝܒܘܬܐ ܕܛܠܝܘܬܟܝ ܪܚܡܬܐ ܕܡܣܝܒܪܢܘܬܟܝ ܕܗܠܟܬܝ ܒܬܪܝ ܒܡܕܒܪܐ ܒܐܪܥܐ ܕܠܐ ܡܙܕܪܥܐ

22. Jeremiah 2:3

    ܩܕܫ ܐܝܣܪܝܠ ܠܡܪܝܐ ܪܝܫ ܥ̈ܠܠܬܗ ܟܘܠ ܐ̈ܟܘܠܝܗܘܢ ܢܬܚܝܒܘܢ ܒܝܫܬܐ ܬܐܬܐ ܥܠܝܗܘܢ ܐܡܪ ܡܪܝܐ

23. Jeremiah 2:4

    ܫܡܥܘ ܦܬܓܡܗ ܕܡܪܝܐ ܒܝܬܗ ܕܝܥܩܘܒ ܘܟܠܗܝܢ ܫܪ̈ܒܬܐ ܕܒܝܬ ܐܝܣܪܝܠ

24. Jeremiah 2:5

    ܗܟܢܐ ܐܡܪ ܡܪܝܐ ܡܢܐ ܗܘ ܥܘܠܐ ܐܫܟܚܘ ܒܝ ܐܒ̈ܗܝܟܘܢ ܕܐܪܚܩܘ ܡܢܝ ܘܐܙܠܘ ܒܬܪ ܠܐ ܡܕܡ ܘܡܕܡ ܠܐ ܝܬܪܘ

25. Jeremiah 2:6

    ܘܠܐ ܐܡܪܘ ܐܝܟܐ ܗܘ ܡܪܝܐ ܕܐܣܩܢ ܡܢ ܐܪܥܐ ܕܡܨܪܝܢ ܕܕܒܪܢ ܒܡܕܒܪܐ ܒܐܪܥܐ ܚܪܒܬܐ ܘܫܗܝܬܐ ܒܐܪܥܐ ܨܕܝܬܐ ܕ̈ܛܠܠܝ ܡܘܬܐ ܒܐܪܥܐ ܕܠܐ ܥܒܪ ܒܗ ܓܒܪ ܘܠܐ ܝܬܒ ܒܪ ܐܢܫ ܬܡܢ

26. Jeremiah 2:7

    ܘܐܝܬܝܬܟܘܢ ܠܐܪܥܐ ܕܟܪܡܠܐ ܠܡܐܟܠ ܦܐܪ̈ܝܗ ܘܛܒ̈ܬܗ ܘܐܬܝܬܘܢ ܘܛܡܐܬܘܢ ܐܪܥܝ ܘܝܪܬܘܬܝ ܣܡܬܘܢ ܠܛܢܦܘܬܐ

27. Jeremiah 2:8

    ܟܗ̈ܢܐ ܠܐ ܐܡܪܘ ܐܝܟܐ ܗܘ ܡܪܝܐ ܘܐܚ̈ܝܕܝ ܢܡܘܣܐ ܠܐ ܝܕܥܘܢܝ ܘܪ̈ܥܘܬܐ ܕܓܠܘ ܒܝ ܘܢܒܝ̈ܐ ܐܬܢܒܝܘ ܒܒܥܠܐ ܘܒܬܪ ܡܕܡ ܕܠܝܬ ܒܗ ܝܘܬܪܢ ܐܙܠܘ

28. Jeremiah 2:9

    ܡܛܠ ܗܢܐ ܐܬܕܝܢ ܥܡܟܘܢ ܐܡܪ ܡܪܝܐ ܘܥܡ ܒܢ̈ܝ ܒܢܝ̈ܟܘܢ ܐܬܕܝܢ

29. Jeremiah 2:10

    ܥܒܪܘ ܠܓܙܪ̈ܬܐ ܕܟܬ̈ܝܐ ܘܚܙܘ ܘܠܩܕܪ ܫܕܪܘ ܘܛܒ ܐܣܬܟܠܘ ܘܚܙܘ ܐܢ ܗܘܬ ܐܝܟ ܗܕܐ

30. Jeremiah 2:11

    ܐܢ ܡܚܠܦܝܢ ܥܡ̈ܡܐ ܐ̈ܠܗܝܗܘܢ ܐܝܠܝܢ ܕܠܐ ܗܘܘ ܐ̈ܠܗܐ ܘܥܡܝ ܚ̇ܠܦ ܐܝܩܪܗ ܒܕܠܐ ܝܘܬܪܢ

31. Jeremiah 2:12

    ܬܡܗܘ ܫܡܝܐ ܥܠ ܗܕܐ ܘܙܘܥܘ ܘܕܚܠܘ ܛܒ ܐܡܪ ܡܪܝܐ

32. Jeremiah 2:13

    ܡܛܠ ܕܬܪ̈ܬܝܢ ܒܝܫ̈ܢ ܥܒܕܘ ܥܡܝ ܠܝ ܫܒܩܘ ܡܒܘܥܐ ܕܡ̈ܝܐ ܚ̈ܝܐ ܘܐܙܠܘ ܚܦܪܘ ܠܗܘܢ ܓܘܒ̈ܐ ܓܘܒ̈ܐ ܐܪ̈ܥܝܥܐ ܕܠܐ ܡܫܟܚܝܢ ܠܡܩܒܐ ܒܗܘܢ ܡ̈ܝܐ

33. Jeremiah 2:14

    ܕܠܡܐ ܥܒܕܐ ܗܘ ܐܝܣܪܝܠ ܐܢ ܝܠܝܕ ܒܝܬܐ ܗܘ ܡܛܠ ܡܢܐ ܗܘܐ ܠܒܙܬܐ

34. Jeremiah 2:15

    ܥܠܘܗܝ ܢܢܗܡܘܢ ܐܪ̈ܝܘܬܐ ܘܢܪܝܡܘܢ ܩܠܗܘܢ ܘܢܥܒܕܘܢ ܐܪܥܗ ܠܚܘܪܒܐ ܘܩܘܪ̈ܝܗ ܢܨܕܝܢ ܡܢ ܒܠܝ ܕܝܬ̇ܒ

35. Jeremiah 2:16

    ܐܦ ܒܢ̈ܝ ܡܦܣ ܘܬܚܦܝܣ ܢܪܥܘܢܟܝ ܪܝܫܐ ܪܝܫܐ

36. Jeremiah 2:17

    ܗܐ ܗܟܢܐ ܢܬܥܒܕ ܠܟܝ ܥܠ ܕܫܒܩܬܝ ܠܡܪܝܐ ܐܠܗܟܝ ܒܙܒܢܐ ܕܡܕܒܪ ܗܘܐ ܠܟܝ ܒܐܘܪܚܐ

37. Jeremiah 2:18

    ܘܗܫܐ ܡܐ ܠܟܝ ܠܡܐܙܠ ܠܐܘܪܚܐ ܕܡܨܪܝܢ ܠܡܫܬܐ ܡ̈ܝܐ ܕܫܝܚܘܪ ܘܡܐ ܠܟܝ ܠܡܐܙܠ ܠܐܘܪܚܐ ܕܐܬܘܪ ܠܡܫܬܐ ܡ̈ܝܐ ܕܢܗܪܐ

38. Jeremiah 2:19

    ܬܪܕܝܟܝ ܒܝܫܬܟܝ ܘܬܝܒܘܬܟܝ ܬܟܣܟܝ ܘܕܥܝ ܘܚܙܝ ܕܒܝܫ ܘܡܪܝܪ ܥܠ ܕܫܒܩܬܝ ܠܡܪܝܐ ܐܠܗܟܝ ܘܠܐ ܕܚܠܬܝ ܡܢܝ ܐܡܪ ܡܪܝܐ ܐܠܗܐ ܚܝܠܬܢܐ

39. Jeremiah 2:20

    ܡܛܠ ܕܡܢ ܥܠܡ ܬܒܪܬ ܢܝܪܟܝ ܘܦܣܩܬ ܚܢܩ̈ܝܟܝ ܘܐܡ̣ܪܬܝ ܕܬܘܒ ܠܐܠܗ ܐܚܪܝܢ ܠܐ ܐ̇ܦܠܘܚ ܘܗܐ ܥܠ ܟܘܠ ܪܡܬܐ ܕܪܡܐ ܘܬܚܝܬ ܟܠ ܐܝܠܢ ܕܥܒܝܛ ܐܢܬܝ ܛܥܝܐ ܘܡܙܢܝܐ

40. Jeremiah 2:21

    ܘܐܢܐ ܢܨܒܬܟܝ ܫܒܘܩܐ ܕܟܠܗ ܙܪܥܐ ܕܩܘܫܬܐ ܘܐܝܟܢܐ ܐܬܗܦܟܬܝ ܥܠܝ ܘܡܪܕܬܝ ܐܝܟ ܓܦܬܐ ܢܘܟܪܝܬܐ

41. Jeremiah 2:22

    ܘܐܢ ܬܬܚܘܪܝܢ ܒܢܬܪܐ ܘܬܣܓܝܢ ܠܟܝ ܟܒܪܝܬܐ ܟܬܡܘ ܠܗܘܢ ܒܟܝ ܚ̈ܛܗܝܟܝ ܩܕܡܝ ܐܡܪ ܡܪܝܐ ܐܠܗܐ

42. Jeremiah 2:23

    ܐܝܟܢܐ ܬܐܡܪܝܢ ܕܠܐ ܐܬܛܡܐܬ ܘܒܬܪ ܒܥܠܐ ܠܐ ܐܙܠܬ ܚܙܝ ܐܘܪ̈ܚܬܟܝ ܒܢܚ̈ܠܐ ܘܕܥܝ ܡܢܐ ܥܒܕܬܝ ܐܪܝܡܬܝ ܒܩܠܟܝ ܡܥܩܡܬ ܐܘܪ̈ܚܬܐ

43. Jeremiah 2:24

    ܐܝܟ ܥܪܕܐ ܕܡܬܝܠܦ ܒܡܕܒܪܐ ܒܨܒܝܢ̈ܝ ܢܦܫܗ ܣܩܬܝ ܪܘܚܐ ܐܝܟ ܝܪܘܪܐ ܡ̇ܢ ܢܗܦܟܝܗ̇ ܟܠ ܡ̇ܢ ܕܒܥܐ ܠܗ̇ ܠܐ ܢܬܛܪܦ ܒܐܘܪ̈ܚܬܗ̇ ܢܫܟܚܝܗ

44. Jeremiah 2:25

    ܟܠܝ ܪ̈ܓܠܝܟܝ ܡܢ ܚܦܝܝܘܬܐ ܘܓܓܪܬܟܝ ܡܢ ܨܗܝܐ ܘܐܡܪܬܝ ܐܬܚܝܠܬ ܠܐ ܨܒܝܐ ܐܢܐ ܡܛܠ ܕܪܚܡܬ ܢܘܟܪ̈ܝܐ ܘܒܬܪܗܘܢ ܐܙܠ

45. Jeremiah 2:26

    ܐܝܟ ܒܗܬܬ ܓܢܒܐ ܟܪ ܕܡܫܬܟܚ ܗܟܢܐ ܒܗܬܘ ܒܢ̈ܝ ܐܝܣܪܝܠ ܗܢܘܢ ܘܡ̈ܠܟܝܗܘܢ ܘܪ̈ܘܪܒܢܝܗܘܢ ܘܟܗ̈ܢܝܗܘܢ ܘܢܒܝ̈ܝܗܘܢ

46. Jeremiah 2:27

    ܕܐܡܪܝܢ ܠܩܝܣܐ ܐܒܘܢ ܐܢܬ ܘܠܟܐܦܐ ܕܐܢܬܝ ܝܠܕܬܝܢ ܡܛܠ ܕܐܦܢܝܘ ܠܝ ܩܕܠܗܘܢ ܘܠܐ ܐ̈ܦܝܗܘܢ ܘܒܙܒܢܐ ܕܒܝܫܬܗܘܢ ܐܡܪ̈ܝܢ ܩܘܡ ܥܕܪܝܢܝ ܘܦܪܘܩܝܢܝ

47. Jeremiah 2:28

    ܘܐܝܟܐ ܐܢܘܢ ܐ̈ܠܗܝܟ ܕܥܒܕܬ ܠܟ ܢܩܘܡܘܢ ܢܦܪܩܘܢܟ ܒܙܒܢ ܒܝܫܬܟ ܡܛܠ ܕܐܝܟ ܡܢܝܢܐ ܕܩܘܪܝܝܟ ܗܘܘ ܐ̈ܠܗܝܟ ܝܗܘܕܐ

48. Jeremiah 2:29

    ܠܡܢܐ ܕܝܢܝܢ ܐܢܬܘܢ ܥܡܝ ܟܠܟܘܢ ܕܓܠܬܘܢ ܒܝ ܐܡ̇ܪ ܡܪܝܐ

49. Jeremiah 2:30

    ܣܪܝܩܐܝܬ ܡܚܝܬ ܠܒ̈ܢܝܟܘܢ ܘܡܪܕܘܬܐ ܠܐ ܩܒܠܘ ܐܟܠܬ ܚܪܒܐ ܠܢܒܝ̈ܝܟܘܢ ܐܝܟ ܐܪܝܐ ܡܚܒܠܢܐ

50. Jeremiah 2:31

    ܐܢܬܘܢ ܕܪܐ ܫܡܥܘ ܦܬܓܡܗ ܕܡܪܝܐ ܕܠܡܐ ܡܕܒܪܐ ܗܘܝܬ ܠܐܝܣܪܝܠ ܐܘ ܐܝܟ ܐܪܥܐ ܚܪܒܬܐ ܡܛܠ ܡܢܐ ܐܡܪܘ ܥܡܝ ܢܚܬܢ ܠܐ ܢܐܬܐ ܬܘܒ ܠܘܬܟ

51. Jeremiah 2:32

    ܕܠܡܐ ܛܥܝܐ ܒܬܘܠܬܐ ܥܘܕܢܗ̇ ܘܟܠܬܐ ܬܨܒܝܬܗ̇ ܥܡܝ ܕܝܢ ܛܥܐܘܢܝ ܝܘܡ̈ܬܐ ܕܠܝܬ ܠܗܘܢ ܡܢܝܢ

52. Jeremiah 2:33

    ܡܢܐ ܬܘܒ ܡܬܩܢܬܝ ܐܘܪ̈ܚܬܟܝ ܠܡܒܥܐ ܪܚܡܬܐ ܕܗܐ ܐܦ ܒܝܫܬܐ ܝܠܦܬܝ ܒܐܘܪ̈ܚܬܟܝ

53. Jeremiah 2:34

    ܘܐܦ ܒܐ̈ܝܕܝܟܝ ܐܫܬܟܚ ܕܡܐ ܕܢܦܫܬܐ ܕܡܣ̈ܟܢܐ ܙܟ̈ܝܐ ܠܐ ܗܘܐ ܒܦܘܠܫܬܐ ܐܫܟܚܬ ܐܢܘܢ ܐܠܐ ܬܚܝܬ ܟܠ ܐܝܠܢ

54. Jeremiah 2:35

    ܘܐܡܪܬܝ ܕܡܚܣܝܐ ܐܢܐ ܡܛܠ ܗܢܐ ܐܗܦܟ ܪܘܓܙܗ ܡܢܝ ܗܐ ܕܐܢ ܐܢܐ ܠܟܝ ܥܠ ܕܐܡܪܬܝ ܕܠܐ ܚܛܝܬ

55. Jeremiah 2:36

    ܡܢܐ ܡܙܕܠܠܐ ܐܢܬܝ ܛܒ ܠܡܬܢܐ ܐܘܪ̈ܚܬܟܝ ܐܦ ܡܢ ܡܨܪܝܢ ܬܒܗܬܝܢ ܐܝܟ ܕܒܗܬܬܝ ܡܢ ܐܬܘܪ

56. Jeremiah 2:37

    ܐܦ ܡܢ ܠܘܬ ܗܢܐ ܬܦܩܝܢ ܟܕ ܐ̈ܝܕܝܟܝ ܥܠ ܪܝܫܟܝ ܕܪܓܙ ܡܪܝܐ ܥܠ ܡܬܟܠܢܝܟܝ ܘܠܐ ܬܨܠܚܝܢ ܒܗܘܢ

57. Jeremiah 3:1

    ܐܢ ܢܫܒܘܩ ܓܒܪܐ ܐܢܬܬܗ ܘܬܐܙܠ ܡܢ ܠܘܬܗ ܘܬܗܘܐ ܠܓܒܪܐ ܐܚܪܢܐ ܐܢ ܡܬܦܢܐ ܠܘܬܗ̇ ܬܘܒ ܗܐ ܡܬܛܢܦܘ ܬܬܛܢܦ ܐܪܥܐ ܗ̇ܝ ܘܐܢܬܝ ܙܢܝܬܝ ܒܪ̈ܥܘܬܐ ܣ̈ܓܝܐܐ ܬܘܒܝ ܠܘܬܝ ܐܡܪ ܡܪܝܐ

58. Jeremiah 3:2

    ܐܪܝܡܝ ܥܝܢ̈ܝܟܝ ܥܠ ܫ̈ܒܝܠܐ ܘܚܙܝ ܐܝܟܐ ܠܐ ܐܬܛܢܦܬܝ ܥܠ ܐܘܪ̈ܚܬܐ ܝܬܒܬܝ ܠܗܘܢ ܐܝܟ ܢܥܒܐ ܒܡܕܒܪܐ ܘܛܢܦܬܝ ܐܪܥܐ ܒܙܢܝܘܬܟܝ ܘܒܒܝܫܘܬܟܝ

59. Jeremiah 3:3

    ܐܬܟܠܝܘ ܐܪ̈ܣܝܣܐ ܘܐܪܒܝܥܐ ܠܐ ܗܘܐ ܘܒܝܬ ܥܝ̈ܢܐ ܕܐܢܬܬܐ ܙܢܝܬܐ ܗܘܐ ܠܟܝ ܘܠܐ ܨܒܝܬܝ ܠܡܬܬܟܣܘ

60. Jeremiah 3:4

    ܗܐ ܡܟܝܠ ܩܪܝܐ ܐܢܬܝ ܠܝ ܐܒܝ ܘܡܪܒܝܢܝ ܕܡܢ ܛܠܝܘܬܝ ܐܢܬ

61. Jeremiah 3:5

    ܕܠܡܐ ܢܬܢܛܪ ܠܥܠܡ ܐܘ ܢܬܢ̣ܛܪ ܠܥܠܡܝܢ ܗܐ ܡܠܠܬܝ ܘܥܒܕܬܝ ܒܝܫܬܐ ܘܐܬܚܝܠܬܝ

62. Jeremiah 3:6

    ܘܐܡܪ ܠܝ ܡܪܝܐ ܒܝ̈ܘܡܘܗܝ ܕܝܘܫܝܐ ܡܠܟܐ ܚܙܝܬ ܡܕܡ ܕܥܒܕܬ ܥܡܘܪܬܐ ܕܐܝܣܪܝܠ ܐܙܠܬ ܗܝ ܠܟܠ ܛܘܪ ܕܪܡ ܘܬܚܝܬ ܟܠ ܐܝܠܢ ܕܥܒܝܛ ܘܙܢܝܬ ܬܡܢ

63. Jeremiah 3:7

    ܘܐܡܪܬ ܡܢ ܒܬܪ ܕܥܒܕܬ ܗܠܝܢ ܟܘܠܗܝܢ ܕܬܬܘܒ ܠܘܬܝ ܘܠܐ ܬܒܬ ܘܚܙܬ ܫܘܩܪܗ ܚܬܗ ܝܗܘܕܐ

64. Jeremiah 3:8

    ܘܚܙܬ ܟܠܗܝܢ ܨ̈ܒܘܬܗ̇ ܘܥܠ ܕܓܪܬ ܥܡܘܪܬܐ ܕܐܝܣܪܝܠ ܫܒܩܬܗ ܘܝܗܒܬ ܠܗ̇ ܟܬܒܐ ܕܫܘܒܩܢܐ ܘܠܐ ܕܚܠܬ ܫܩܪܬܐ ܚܬܗ̇ ܝܗܘܕܐ ܘܐܙܠܬ ܘܙܢܝܬ ܐܦ ܗܝ

65. Jeremiah 3:9

    ܘܡܛܠ ܕܙܠܝܠܐ ܗܘܬ ܙܢܝܘܬܗ̇ ܛܢܦܬ ܐܪܥܐ ܘܓܪܬ ܒܟܐ̈ܦܐ ܘܒܩܝܣ̈ܐ

66. Jeremiah 3:10

    ܘܐܦ ܡܢ ܒܬܪ ܗܠܝܢ ܟܠܗܝܢ ܠܐ ܬܒܬ ܠܘܬܝ ܫܩܪܬܐ ܚܬܗ ܝܗܘܕܐ ܡܢ ܟܠܗ ܠܒܗ̇ ܐܠܐ ܐܢ ܒܕܓܠܘܬܐ ܐܡܪ ܡܪܝܐ

67. Jeremiah 3:11

    ܘܐܡܪ ܠܝ ܡܪܝܐ ܙܕܩܬ ܢܦܫܗ̇ ܥܡܘܪܬܐ ܕܐܝܣܪܝܠ ܡܢ ܫܩܪܬܐ ܚܬܗ̇ ܝܗܘܕܐ

68. Jeremiah 3:12

    ܙܠ ܘܐܟܪܙ ܦܬ̈ܓܡܐ ܗܠܝܢ ܒܓܪܒܝܐ ܘܐܡܪ ܬܘܒܝ ܥܡܘܪܬܐ ܕܐܝܣܪܝܠ ܐܡܪ ܡܪܝܐ ܘܠܐ ܐܩܫܐ ܐ̈ܦܝ ܒܟܘܢ ܡܛܠ ܕܛܒ ܐܢܐ ܐܡܪ ܡܪܝܐ ܘܠܐ ܐܠܡ ܐܢܐ ܠܥܠܡ

69. Jeremiah 3:13

    ܒܪܡ ܕܥܝ ܚ̈ܛܗܝܟܝ ܕܒܡܪܝܐ ܐܠܗܟܝ ܚܛܝܬܝ ܘܒܕܪܬܝ ܐܘܪ̈ܚܬܟܝ ܠܢܘܟܪ̈ܝܐ ܬܚܝܬ ܟܠ ܐܝܠܢ ܕܥܒܝܛ ܘܒܩܠܝ ܠܐ ܫܡܥܬܘܢ ܐܡܪ ܡܪܝܐ

70. Jeremiah 3:14

    ܬܘܒܘ ܒܢ̈ܝܐ ܬܝܒ̈ܐ ܐܡܪ ܡܪܝܐ ܕܐܢܐ ܨܒܝܬ ܒܟܘܢ ܘܕܒܪܬܟܘܢ ܚܕ ܡܢ ܩܪܝܬܐ ܘܬܪ̈ܝܢ ܡܢ ܫܪܒܬܐ ܘܐܝܬܝܬܟܘܢ ܠܨܗܝܘܢ

71. Jeremiah 3:15

    ܘܐܬܠ ܠܟܘܢ ܪ̈ܥܘܬܐ ܐܝܟ ܠܒܝ ܘܢܪܥܘܢܟܘܢ ܒܝܕܥܬܐ ܘܒܣܘܟܠܐ

72. Jeremiah 3:16

    ܘܢܗܘܐ ܟܕ ܬܦܪܘܢ ܘܬܣܓܘܢ ܒܐܪܥܐ ܒܝ̈ܘܡܬܐ ܗܢܘܢ ܐܡܪ ܡܪܝܐ ܠܐ ܢܐܡܪܘܢ ܬܘܒ ܩܒܘܬܐ ܕܕܝܬܩܐ ܕܡܪܝܐ ܘܠܐ ܬܣܩ ܥܠ ܠܒܐ ܘܠܐ ܢܬܕܟܪܘܢܗ̇ ܘܠܐ ܢܦܩܕܘܢܗ̇ ܘܠܐ ܬܬܥܒܕ ܬܘܒ

73. Jeremiah 3:17

    ܒܗ ܒܙܒܢܐ ܗ̇ܘ ܢܩܪܘܢܗ̇ ܠܐܘܪܫܠܡ ܟܘܪܣܝܗ ܕܡܪܝܐ ܘܢܣܟܘܢ ܟܠܗܘܢ ܥܡ̈ܡܐ ܠܫܡܗ ܕܡܪܝܐ ܘܠܐ ܢܐܙܠܘܢ ܬܘܒ ܒܬܪ ܨܒܝܢ̈ܝ ܠܒܗܘܢ ܒܝܫ̣ܐ·

74. Jeremiah 3:18

    ܒܝ̈ܘܡܬܐ ܗܢܘܢ ܢܐܙܠܘܢ ܕܒܝܬ ܝܗܘܕܐ ܥܡ ܕܒܝܬ ܐܝܣܪܝܠ ܘܢܐܬܘܢ ܐܟܚܕܐ ܡܢ ܐܪܥܐ ܕܓܪܒܝܐ ܠܐܪܥܐ ܕܐܘܪܬܬ ܠܐ̈ܒܗܝܗܘܢ

75. Jeremiah 3:19

    ܘܐܢܐ ܐܡܪܬ ܕܐܚܫܒܟ ܒܒ̈ܢܝܐ ܘܐܬܠ ܠܟ ܐܪܥܐ ܓܒܝܬܐ ܘܝܪܬܘܬܐ ܕܚ̈ܝܠܐ ܕܚ̈ܝܠܘܬܐ ܕܥܡ̈ܡܐ ܘܐܡܪܬ ܐܒܝ ܬܩܪܘܢܢܝ ܘܡܢ ܒܬܪܝ ܠܐ ܬܗܦܟܘܢ

76. Jeremiah 3:20

    ܫܪܝܪܐܝܬ ܐܝܟ ܕܡܕܓܠܐ ܐܢܬܬܐ ܒܚܒܪܗ̇ ܗܟܢܐ ܕܓܠܘ ܒܝ ܒܢ̈ܝ ܐܝܣܪܝܠ ܐܡܪ ܡܪܝܐ

77. Jeremiah 3:21

    ܩܠܐ ܥܠ ܫܒ̈ܝܠܐ ܐܫܬܡܥ ܒܟܬܐ ܘܒܥܘܬܐ ܕܒܝܬ ܐܝܣܪܝܠ ܕܥܩܡܘ ܐܘܪ̈ܚܬܗܘܢ ܘܛܥܘ ܠܡܪܝܐ ܐܠܗܗܘܢ

78. Jeremiah 3:22

    ܬܘܒܘ ܒ̈ܢܝܐ ܬܝܒ̈ܐ ܘܐܣܐ ܬܝܒܘܬܟܘܢ ܘܐܡܪܘ ܗܢܘܢ ܗܐ ܚܢܢ ܕܝܠܟ ܡܛܠ ܕܐܢܬ ܗܘ ܡܪܝܐ ܐܠܗܢ

79. Jeremiah 3:23

    ܫܪܝܪܐܝܬ ܠܕܓܠܘܬܐ ܪܡܬܐ ܘܥܘܫܢܐ ܕܛܘܪ̈ܐ ܫܪܝܪܐܝܬ ܒܡܪܝܐ ܐܠܗܢ ܦܘܪܩܢܗ ܕܐܝܣܪܝܠ

80. Jeremiah 3:24

    ܘܒܗܬܬܐ ܐܟܠܬ ܠܐܘܬ ܐ̈ܒܗܝܢ ܡܢ ܛܠܝܘܬܗܘܢ ܘܠܥܢܗܘܢ ܘܠܬܘܪ̈ܝܗܘܢ ܘܠܒܢܝ̈ܗܘܢ ܘܠܒܢ̈ܬܗܘܢ

81. Jeremiah 3:25

    ܢܕܡܟ ܒܒܗܬܬܢ ܘܢܟܣܝܢ ܚܦܪܢ ܡܛܠ ܕܠܡܪܝܐ ܐܠܗܢ ܚܛܝܢ ܚܢܢ ܘܐ̈ܒܗܝܢ ܡܢ ܛܠܝܘܬܢ ܘܥܕܡܐ ܠܝܘܡܢܐ ܘܠܐ ܫܡܥܢ ܒܩܠܗ ܕܡܪܝܐ ܐܠܗܢ

82. Jeremiah 4:1

    ܐܢ ܬܬܘܒ ܐܝܣܪܝܠ ܐܡܪ ܡܪܝܐ ܠܘܬܝ ܬܬܘܒ ܘܐܢ ܬܥܒܪ ܛܢܦܘܬܟ ܡܢ ܩܕܡܝ ܠܐ ܬܙܘܥ

83. Jeremiah 4:2

    ܘܬܐܡܐ ܚܝ ܗܘ ܡܪܝܐ ܒܩܘܫܬܐ ܘܒܕܝܢܐ ܘܒܙܕܝܩܘܬܐ ܘܢܬܒܪܟܘܢ ܒܗ ܥܡ̈ܡܐ ܘܒܗ ܢܫܬܒܚܘܢ

84. Jeremiah 4:3

    ܡܛܠ ܕܗܟܢܐ ܐܡܪ ܡܪܝܐ ܠܓܒܪ̈ܐ ܕܝܗܘܕܐ ܘܠܥܡܘܪ̈ܝܗ ܕܐܘܪܫܠܡ ܐܢܗܪܘ ܠܟܘܢ ܫܪܓܐ ܘܠܐ ܬܙܪܥܘܢ ܥܠ ܟܘ̈ܒܐ

85. Jeremiah 4:4

    ܓܙܘܪܘ ܠܡܪܝܐ ܘܐܥܒܪܘ ܥܘܪܠܘܬܐ ܕܠܒܟܘܢ ܓܒܪ̈ܐ ܕܝܗܘܕܐ ܘܥܡܘܪ̈ܝܗ̇ ܕܐܘܪܫܠܡ ܕܠܡܐ ܬܦܘܩ ܐܝܟ ܢܘܪܐ ܚܡܬܝ ܘܬܘܩܕ ܘܠܝܬ ܕܡܕܥܟ ܡܛܠ ܒܝܫܘܬܐ ܕܥ̈ܒܕܝܟܘܢ

86. Jeremiah 4:5

    ܚܘܘ ܒܝܗܘܕܐ ܘܒܐܘܪܫܠܡ ܐܫܡܥܘ ܘܐܡܪܘ ܩܪܘ ܫܝܦܘܪܐ ܒܐܪܥܐ ܩܪܘ ܒܩܠܐ ܪܡܐ ܘܐܡܪܘ ܐܬܟܢܫܘ ܘܢܥܘܠ ܠܩܘܪ̈ܝܐ ܥܫ̈ܝܢܬܐ

87. Jeremiah 4:6

    ܫܩܘܠܘ ܐܬܐ ܠܨܗܝܘܢ ܐܬܥܫܢܘ ܘܠܐ ܬܩܘܡܘܢ ܡܛܠ ܕܒܝܫܬܐ ܡܝܬܐ ܐܢܐ ܡܢ ܓܪܒܝܐ ܘܬܒܪܐ ܪܒܐ

88. Jeremiah 4:7

    ܡܠܟ ܬܩܝܦ ܣ̇ܠܩ ܐܝܟ ܐܪܝܐ ܡܢ ܥܒܗ ܘܡܚܒܠ ܥܡ̈ܡܐ ܫܩܠ ܘܢܦܩ ܡܢ ܐܬܪܗ ܠܡܥܒܕ ܐܪܥܟ ܠܚܘܪܒܐ ܘܩܘܪ̈ܝܟ ܢܨܕܝܢ ܡܢ ܒܠܝ ܕܝܬ̇ܒ

89. Jeremiah 4:8

    ܥܠ ܗܕܐ ܐܬܟܒܢܘ ܣܩ̈ܐ ܘܐܪܩܕܘ ܘܐܝܠܠܘ ܡܛܠ ܕܠܐ ܗܦܟܬ ܚܡܬܐ ܕܪܘܓܙܗ ܕܡܪܝܐ ܡܢܟܘܢ

90. Jeremiah 4:9

    ܘܢܗܘܐ ܒܝܘܡܐ ܗ̇ܘ ܐܡܪ ܡܪܝܐ ܢܐܒܕ ܠܒܐ ܕܡ̈ܠܟܐ ܘܠܒܐ ܕܫ̈ܠܝܛܢܐ ܘܢܬܡܗܘܢ ܟܗ̈ܢܐ ܘܢܒ̈ܝܐ ܢܬܕܡܪܘܢ

91. Jeremiah 4:10

    ܘܐܡܪܬ ܒܒܥܘ ܡܪܝܐ ܐܠܗܐ ܫܪܝܪܐܝܬ ܡܛܥܝܘ ܐܛܥܝܬ ܠܥܡܐ ܗܢܐ ܘܠܐܘܪܫܠܡ ܕܐܡܪܬ ܫܠܡܐ ܢܗܘܐ ܠܟܘܢ ܘܗܐ ܩܪܒܬ ܚܪܒܐ ܥܕܡܐ ܠܢܦܫܐ

92. Jeremiah 4:11

    ܒܗ ܒܙܒܢܐ ܗ̇ܘ ܢܬܐܡܪ ܠܥܡܐ ܗܢܐ ܘܠܐܘܪܫܠܡ ܐܝܟ ܪܘܚܐ ܛܥܝܬܐ ܕܒܫ̈ܒܝܠܐ ܕܡܕܒܪܐ ܐܘܪܚܗ̇ ܕܒܪܬ ܥܡܝ ܠܐ ܠܡܕܪܐ ܘܠܐ ܠܡܚܡܠ

93. Jeremiah 4:12

    ܪܘܚܐ ܕܡܠܝܐ ܡܢ ܗܠܝܢ ܬܐܬܐ ܠܝ ܡܟܝܠ ܐܦ ܐܢܐ ܐܡܠܠ ܕܝܢ̈ܝ ܥܡܗܘܢ

94. Jeremiah 4:13

    ܗܐ ܐܝܟ ܥܢܢܐ ܢܣܩ ܘܐܝܟ ܥܠܥܠܐ ܡܪܟܒܬܗ ܩܠܝܠܝܢ ܡܢ ܢܫܪ̈ܐ ܪ̈ܟܫܗ ܘܝ ܠܢ ܕܐܬܒܙܙܢ

95. Jeremiah 4:14

    ܐܫܝܓܝ ܠܒܟܝ ܡܢ ܒܝܫܬܐ ܐܘܪܫܠܡ ܡܛܘܠ ܕܬܬܦܪܩܝܢ ܥܕܡܐ ܠܐܡܬܝ ܢܒܘܬܢ ܒܓܘܟܝ ܡܚܫ̈ܒܬܟܝ ܒܝܫ̈ܬܐ

96. Jeremiah 4:15

    ܡܛܠ ܕܩܠܐ ܕܡܚܘܐ ܡܢ ܕܢ ܘܡܫܡܥ ܟܐܒܐ ܡܢ ܛܘܪܐ ܕܐܦܪܝܡ

97. Jeremiah 4:16

    ܐܕܟܪܘ ܠܥܡ̈ܡܐ ܘܐܫܡܥܘ ܠܐܘܪܫܠܡ ܗܐ ܟܢܫ̈ܐ ܐܬܝܢ ܡܢ ܐܪܥܐ ܪܚܝܩܬܐ ܘܢܪܝܡܘܢ ܩܠܗܘܢ ܥܠ ܩܘܪ̈ܝܐ ܕܝܗܘܕܐ

98. Jeremiah 4:17

    ܐܝܟ ܢܛܪ̈ܝ ܚܩ̈ܠܬܐ ܗܘܘ ܥܠܝܗ̇ ܡܢ ܚܕܪ̈ܝܗ̇ ܡܛܠ ܕܠܝ ܡܪܡܪܬ ܐܡܪ ܡܪܝܐ

99. Jeremiah 4:18

    ܐܘܪ̈ܚܬܟܝ ܘܥ̇ܒ̈ܕܝܟܝ ܥܒ̣ܕܘ ܠܟܝ ܗܠܝܢ. ܗܕܐ ܗܝ ܒܝܫܬܟܝ ܕܡܪܬ ܘܩܪܒܬ ܥܕܡܐ ܠܠܒܟܝ

100. Jeremiah 4:19

     ܡ̈ܥܝ ܡ̈ܥܝ ܟܝܒܝܢ ܠܝ ܘܬ̈ܠܘܬܝ ܠܒܝ ܡܫܘܪ ܠܝ ܠܒܝ ܘܠܐ ܫܬܩ ܡܛܠ ܕܩܠܐ ܕܫܝܦܘܪܐ ܫܡܥܬ ܢܦܫܝ ܘܝܘܒܒܐ ܕܩܪܒܐ

Next → — showing 1–100 of 1,366

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.