← All works
Peshitta Genesis Peshitta (Syriac Old Testament) · 1,533 sections
Single column Two columns
Genesis 46:14 ܘܒܢ̈ܝ ܙܒܘܠܘܢ . ܣܕܪ ܘܐܠܘܢ ܘܢܚܠܐܝܠ .
Genesis 46:15 ܗܠܝܢ ܒܢ̈ܝܗ̇ ܕܠܝܐ ܕܝܠ̣ܕܬ ܠܝܥܩܘܒ ܒܦܕܢ ܕܐܪܡ . ܘܠܕܝܢ̣ܐ ܒܪܬܗ . ܟܘܠ ܢܦܫ̈ܬܐ ܕܒܢ̈ܘܗܝ ܘܕܒܢ̈ܬܗ . ܬܠܬܝܢ ܘܬܠܬ .
Genesis 46:16 ܘܒܢ̈ܝ ܓܕ . ܨܦܝܘܢ ܘܚܓܝ . ܘܫܘܢܝ ܘܐܨܒܥܘܢ . ܘܥܕܝ ܘܐܪܘܕ ܘܐܕܪܝ .
Genesis 46:17 ܘܒܢ̈ܝ ܐܫܝܪ . ܝܡܢܐ ܘܝܫܘܐ . ܘܝܫܘܝ ܘܒܪܝܥܐ . ܘܣܪܚ ܚܬܗܘܢ . ܘܒܢ̈ܝ ܒܪܝܥܐ . ܚܒ̇ܪ ܘܡܠܟܝܠ .
Genesis 46:18 ܗܠܝܢ ܒܢ̈ܝܗ̇ ܕܙܠܦܐ ܕܝܗ̣ܒ ܠܒܢ ܠܠܝܐ ܒܪܬܗ . ܘܝܠ̣ܕܬ ܗܠܝܢ ܠܝܥܩܘܒ . ܢܦܫ̈ܬܐ ܫܬܬܥܣܪ̈ܐ .
Genesis 46:19 ܘܒܢ̈ܝܗ̇ ܕܪܚܝܠ ܐܢܬܬܗ ܕܝܥܩܘܒ . ܝܘܣܦ ܘܒܢܝܡܝܢ .
Genesis 46:20 ܘܐܬܝܠܕܘ ܠܝܘܣܦ ܒܐܪܥܐ ܕܡܨܪܝܢ . ܕܝܠ̣ܕܬ ܠܗ ܐܣܝܬ ܒܪܬ ܦܘܛܝܦܪܥ ܟܘܡܪܐ ܕܐܘܢ ܠܡܢܫܐ ܘܠܐܦܪܝܡ .
Genesis 46:21 ܘܒܢ̈ܝ ܒܢܝܡܝܢ . ܒ̇ܠܥ ܘܐܟܒܪ ܘܐܫܟܠ ܘܓ̣ܪܐ . ܘܢܥܡܢ ܘܐܚܝ ܘܐܪܘܫ . ܘܡܦܝܡ ܘܚܦܝܡ ܘܐܕܪ .
Genesis 46:22 ܗܠܝܢ ܒܢ̈ܝܗ̇ ܕܪܚܝܠ . ܕܝܠ̣ܕܬ ܠܝܥܩܘܒ . ܢܦܫ̈ܬܐ ܐܪܒܥܣܪܐ .
Genesis 46:23 Genesis 46:24 ܘܒܢ̈ܝ ܢܦܬܠܝ . ܢܚܨܐܝܠ ܘܓܘܢܝ . ܘܚ̇ܨܪ ܘܫܠܝܡ .
Genesis 46:25 ܗܠܝܢ ܒܢܝ̈ܗ̇ ܕܒܠܗܐ ܕܝܗ̣ܒ ܠܒܢ ܠܪܚܝܠ ܒܪܬܗ . ܘܝܠ̣ܕܬ ܗܠܝܢ ܠܝܥܩܘܒ . ܟܘܠ ܢܦܫ̈ܬܐ ܫܒܥ .
Genesis 46:26 ܟܠܗܝܢ ܢܦܫ̈ܬܐ ܕܥܠ ܥܡ ܝܥܩܘܒ ܠܡܨܪܝܢ . ܕܢܦ̣ܩ ܡܢ ܚܨܗ . ܣܛܪ ܡܢ ܢܫ̈ܐ ܕܒܢ̈ܘܗܝ ܕܝܥܩܘܒ . ܟܠ ܢܦܫ̈ܬܐ ܫܬܝܢ ܘܫܬ .
Genesis 46:27 ܘܒܢ̈ܝ ܝܘܣܦ ܕܐܬܝܠܕܘ ܠܗ ܒܡܨܪܝܢ . ܢܦܫ̈ܬܐ ܬܪ̈ܬܝܢ . ܟܠܗܝܢ ܢܦܫ̈ܬܐ ܕܒܝܬ ܝܥܩܘܒ ܕܥܠ ܠܡܨܪܝܢ ܫܒܥܝܢ .
Genesis 46:28 ܘܠܝܗܘܕܐ ܫܕܪ ܩܕܡܘܗܝ ܠܘܬ ܝܘܣܦ . ܠܡܬܚܙܝܘ ܩܕܡܘܗܝ ܠܓܫܢ . ܘܐܬܐ ܠܐܪܥܐ ܕܓܫܢ .
Genesis 46:29 ܘܦܓ̇ܕ ܝܘܣܦ ܡܪ̈ܟܒܬܗ . ܘܣ̣ܠܩ ܠܐܘܪܥܐ ܕܐܝܣܪܝܠ ܐܒܘܗܝ ܠܓܫܢ . ܘܐܬܚܙܝ ܠܗ ܘܢܦ̣ܠ ܥܠ ܨܘܪܗ . ܘܒܟ̣ܐ ܥܠ ܨܘܪܗ ܬܘܒ .
Genesis 46:30 ܘܐܡ̣ܪ ܐܝܣܪܝܠ ܠܝܘܣܦ . ܐܡܘܬ ܡܟܝܠ ܡܢ ܒܬܪ ܕܚ̇ܙܝܬ ܐ̈ܦܝܟ ܒܪܝ . ܕܥܕܟܝܠ ܚܝ ܐܢܬ .
Genesis 46:31 ܘܐܡ̣ܪ ܝܘܣܦ ܠܐ̈ܚܘܗܝ ܘܠܒܝܬ ܐܒܘܗܝ . ܐܣܩ ܐܚܘܐ ܠܦܪܥܘܢ ܘܐܡ̣ܪ ܠܗ . ܐܚ̈ܝ ܘܒܝܬ ܐܒܝ ܕܒܐܪܥܐ ܕܟܢܥܢ . ܐܬܘ ܠܘܬܝ .
Genesis 46:32 ܘܓܒܪ̈ܐ ܪ̈ܥܝܝ ܥܢܐ ܐܢܘܢ . ܡܛܠ ܕܓܒܪ̈ܐ ܩܢܝ̈ܝ ܩܢܝܢܐ ܐܢܘܢ ܘܥܢܗܘܢ ܘܬܘܪ̈ܝܗܘܢ ܘܟܠ ܕܐܝܬ ܠܗܘܢ ܐܝܬܝܘ .
Genesis 46:33 ܘܟܕ ܢܩܪܝܟܘܢ ܦܪܥܘܢ ܘܢܐܡܪ ܠܟܘܢ . ܡܢܘ ܥܒܕܟܘܢ .
Genesis 46:34 ܐܡܪܘ ܠܗ . ܡܪ̈ܝ ܩܢܝܢܐ ܗܘܘ ܥܒ̣̈ܕܝܟ ܡܢ ܛܠܝܘܬܗܘܢ ܘܥܕܡܐ ܠܗܫܐ . ܘܐܦ ܚܢܢ ܘܐܦ ܐܒ̈ܗܝܢ ܡܛܠ ܕܬܬܒܘܢ ܒܐܪܥܐ ܕܓܫܢ . ܡܛܠ ܕܡܣܠܝܢ ܐܢܘܢ ܠܡܨܪ̈ܝܐ ܟܠ ܪ̈ܥܝܝ ܥܢܐ .
Genesis 47:1 ܘܐܬ̣ܐ ܝܘܣܦ ܘܚܘܝ ܠܦܪܥܘܢ ܘܐܡ̣ܪ ܠܗ . ܐܒܝ ܘܐ̈ܚܝ ܘܥܢܗܘܢ ܘܬܘܪ̈ܝܗܘܢ ܘܟܠ ܕܐܝܬ ܠܗܘܢ . ܐܬܘ ܡܢ ܐܪܥܐ ܕܟܢܥܢ . ܘܗܐ ܫ̣ܪܝܢ ܒܐܪܥܐ ܕܓܫܢ .
Genesis 47:2 ܘܡܢ ܐ̈ܚܘܗܝ ܕܒ̣ܪ ܚܡܫܐ ܓܒܪ̈ܝܢ . ܘܐܩܝܡ ܐܢܘܢ ܩܕܡ ܦܪܥܘܢ .
Genesis 47:3 ܘܐܡ̣ܪ ܦܪܥܘܢ ܠܐܚ̈ܘܗܝ ܕܝܘܣܦ . ܡܢܘ ܥܒܕܟܘܢ . ܘܐܡܪܘ ܠܦܪܥܘܢ . ܪ̈ܥܝܝ ܥܢܐ ܐܢܘܢ ܥܒ̈ܕܝܟ . ܐܦ ܚܢܢ ܘܐܦ ܐ̈ܒܗܝܢ ܡܢ ܛܠܝܘܬܢ .
Genesis 47:4 ܘܐܡܪܘ ܠܦܪܥܘܢ ܠܡܥܡܪ ܒܐܪܥܐ ܐܬܝܢ . ܡܛܠ ܕܠܝܬ ܪܥܝܐ ܠܥܢܐ ܕܥܒ̈ܕܝܟ . ܡܛܠ ܕܥܫ̣ܢ ܟܦܢܐ ܒܐܪܥܐ ܕܟܢܥܢ . ܘܗܫܐ ܢܬܒܘܢ ܥܒ̈ܕܝܟ ܒܐܪܥܐ ܕܓܫܢ .
Genesis 47:5 ܘܐܡ̣ܪ ܦܪܥܘܢ ܠܝܘܣܦ . ܐܒܘܟ ܘܐܚ̈ܝܟ ܐܬܘ ܠܘܬܟ .
Genesis 47:6 ܐܪܥܐ ܕܡܨܪܝܢ ܩܕܡܝܟ ܗ̣ܝ . ܒܫܘܦܪܗ̇ ܕܐܪܥܐ ܐܘܬܒ ܠܐܒܘܟ ܘܠܐ̈ܚܝܟ . ܢܬܒܘܢ ܒܐܪܥܐ ܕܓܫܢ . ܘܐܢ ܝܕܥ̇ ܐܢܬ ܕܐܝܬ ܒܗܘܢ ܓܒܪ̈ܐ ܡܪ̈ܝ ܚܝܠܐ . ܥܒ̣ܕ ܐܢܘܢ ܡܪ̈ܝ ܩܢܝܢܐ ܥܠ ܟܠ ܕܐܝܬ ܠܝ .
Genesis 47:7 ܘܐܥܠ ܝܘܣܦ ܠܝܥܩܘܒ ܐܒܘܗܝ . ܘܐܩܝܡܗ ܩܕܡ ܦܪܥܘܢ . ܘܒ̇ܪܟ ܝܥܩܘܒ ܠܦܪܥܘܢ .
Genesis 47:8 ܘܐܡ̣ܪ ܦܪܥܘܢ ܠܝܥܩܘܒ . ܟܡܐ ܐܢܘܢ ܝܘܡ̈ܝ ܫ̈ܢܝ ܚܝ̈ܝܟ .
Genesis 47:9 ܘܐܡ̣ܪ ܝܥܩܘܒ ܠܦܪܥܘܢ . ܝܘܡ̈ܝ ܫ̈ܢܝ ܬܘܬܒܘܬܝ . ܡܐܐ ܘܬܠܬܝܢ ܫ̈ܢܝܢ . ܙܥܘܪ̈ܝܢ ܗܘܘ ܘܒܝܫ̈ܝܢ ܝܘܡ̈ܝ ܫ̈ܢܝ ܚ̈ܝܝ . ܘܠܐ ܡܛܝܘ ܠܫ̈ܢܝ ܚ̈ܝܝ ܐ̈ܒܗܝ . ܒܝ̈ܘܡܝ ܡܥܡܪܗܘܢ .
Genesis 47:10 ܘܒ̇ܪܟ ܝܥܩܘܒ ܠܦܪܥܘܢ . ܘܢܦ̣ܩ ܝܥܩܘܒ ܡܢ ܩܕܡ ܦܪܥܘܢ .
Genesis 47:11 ܘܐܘܬܒ ܝܘܣܦ ܠܐܒܘܗܝ ܘܠܐܚ̈ܘܗܝ . ܘܝܗ̣ܒ ܠܗܘܢ ܝܪܬܘܬܐ ܒܐܪܥܐ ܕܡܨܪܝܢ . ܒܫܘܦܪܗ̇ ܕܐܪܥܐ ܒܐܪܥܐ ܕܪܥܡܣܝܣ . ܐܝܟ ܕܦܩ̣ܕ ܦܪܥܘܢ .
Genesis 47:12 ܘܬܪܣܝ ܝܘܣܦ ܠܐܒܘܗܝ ܘܠܐܚ̈ܘܗܝ ܘܠܟܠܗ ܒܝܬ ܐܒܘܗܝ . ܒܥܒܘܪܐ ܠܦܘܬ ܝܩܪܬܐ .
Genesis 47:13 ܘܥܒܘܪܐ ܠܝܬ ܒܟܠܗ̇ ܐܪܥܐ . ܡܛܠ ܕܥ̣ܫܢ ܟܦܢܐ ܛܒ . ܘܚ̣ܪܒܬ ܟܠܗ̇ ܐܪܥܐ ܕܡܨܪܝܢ ܘܐܪܥܐ ܕܟܢܥܢ . ܡܢ ܩܕܡ ܟܦܢܐ .
Genesis 47:14 ܘܠܩ̇ܛ ܝܘܣܦ ܟܠܗ ܟܣܦܐ ܕܐܫܬܟܚ ܒܐܪܥܐ ܕܡܨܪܝܢ . ܘܒܐܪܥܐ ܕܟܢܥܢ ܒܥܒܘܪܐ ܕܙܒܢܝܢ ܗܘܘ . ܘܐܥܠ ܝܘܣܦ ܟܣܦܐ ܠܒܝܬ ܦܪܥܘܢ .
Genesis 47:15 ܘܟܣܦܐ ܓܡ̣ܪ ܡܢ ܐܪܥܐ ܕܡܨܪܝܢ ܘܡܢ ܐܪܥܐ ܕܟܢܥܢ . ܘܐܬܘ ܟܠܗܘܢ ܡܨܪ̈ܝܐ ܠܘܬ ܝܘܣܦ ܘܐܡܪ̈ܝܢ ܠܗ . ܗܒ ܠܢ ܥܒܘܪܐ ܘܠܐ ܢܡܘܬ ܩܕܡܝܟ . ܡܛܠ ܕܓܡ̣ܪ ܠܗ ܟܣܦܐ .
Genesis 47:16 ܐܡ̇ܪ ܠܗܘܢ ܝܘܣܦ . ܗܒܘ ܠܝ ܩܢܝܢܟܘܢ ܘܐܬܠ ܠܟܘܢ ܒܩܢܝܢܟܘܢ ܐܢ ܓܡ̣ܪ ܟܣܦܐ .
Genesis 47:17 ܘܐܝܬܝܘ ܠܗ ܩܢܝܢܗܘܢ . ܘܝܗ̣ܒ ܠܗܘܢ ܝܘܣܦ ܥܒܘܪܐ ܒܪ̈ܟܫܐ ܘܒܩܢܝܢܐ ܕܥܢܐ ܘܒܩܢܝܢܐ ܕܬܘܪ̈ܐ ܘܕܚܡܪ̈ܐ . ܘܬܪܣܝ ܐܢܘܢ ܒܠܚܡܐ ܒܗ̇ܝ ܫܢܬܐ . ܒܟܠܗ ܩܢܝܢܗܘܢ .
Genesis 47:18 ܘܫܠ̣ܡܬ ܫܢܬܐ ܗ̇ܝ . ܘܐܬܘ ܠܘܬܗ ܒܫܢܬܐ ܐܚܪܬܐ ܘܐܡܪܘ ܠܗ . ܠܐ ܡ̇ܛܫܝܢ ܚܢܢ ܡܢ ܡܪܢ . ܡܛܠ ܕܓܡ̣ܪ ܟܣܦܐ ܟܘܠܗ ܘܩܢܝܢܐ ܕܒܥܝܪ̈ܐ ܠܘܬ ܡܪܢ . ܘܠܐ ܐܫܬܚܪ ܩܕܡ ܡܪܢ . ܐܠܐ ܐܢ ܢܦܫ̈ܬܢ ܘܐܪ̈ܥܬܢ .
Genesis 47:19 ܠܡܢܐ ܡ̇ܝܬܝܢܢ ܩܕܡܝܟ . ܐܦ ܚܢܢ ܐܦ ܐܪ̈ܥܬܢ . ܙܒܢ ܠܢ ܘܠܐܪ̈ܥܬܢ ܒܠܚܡܐ . ܘܢܗܘܐ ܚܢܢ ܘܐܪ̈ܥܬܢ ܥܒ̈ܕܐ ܠܦܪܥܘܢ . ܘܗܒ ܠܢ ܙܪܥܐ ܘܢܚ̣ܐ ܘܠܐ ܢܡܘܬ . ܘܐܪܥܐ ܠܐ ܬܚ̣ܪܒ .
Genesis 47:20 ܘܙܒ̣ܢ ܝܘܣܦ ܟܠܗ̇ ܐܪܥܐ ܕܡܨܪܝܢ ܠܦܪܥܘܢ . ܡܛܠ ܕܙܒ̇ܢܘ ܡܨܪ̈ܝܐ ܓܒܪ ܚܩܠܗ . ܡܛܠ ܕܥܫ̣ܢ ܥܠܝܗܘܢ ܟܦܢܐ . ܘܗܘܬ ܐܪܥܐ ܕܦܪܥܘܢ .
Genesis 47:21 ܘܠܥܡܐ ܫ̇ܢܝ ܐܢܘܢ ܡܢ ܩ̣ܪܐ ܠܩܪܐ . ܡܢ ܣܘܦ ܬܚܘܡܗ̇ ܕܡܨܪܝܢ . ܘܥܕܡܐ ܠܣܘܦܗ̇ .
Genesis 47:22 ܒܠܚܘܕ ܐܪܥܐ ܕܟܘܡܪ̈ܐ ܕܠܐ ܙܒ̣ܢ . ܡܛܠ ܕܩ̇ܝܡܬܐ ܩܝܡܐ ܗܘܬ ܠܟܘܡܪ̈ܐ ܡܢ ܠܘܬ ܦܪܥܘܢ . ܘܐܟܠܝܢ ܗܘܘ ܩܝܡ̈ܬܗܘܢ . ܕܝܗ̇ܒ ܗܘܐ ܠܗܘܢ ܦܪܥܘܢ . ܡܛܠ ܗܢܐ ܠܐ ܙܒ̇ܢܘ ܐܪܥܗܘܢ .
Genesis 47:23 ܘܐܡ̣ܪ ܝܘܣܦ ܠܥܡܐ . ܗܐ ܙܒܢܬܟܘܢ ܝܘܡܢܐ ܠܟܘܢ ܘܠܐܪ̈ܥܬܟܘܢ ܠܦܪܥܘܢ . ܗܐ ܠܟܘܢ ܙܪܥܐ ܕܬܙܪܥܘܢ ܒܐܪܥܐ .
Genesis 47:24 ܘܡܐ ܕܥܐܠܐ ܥܠܠܬܐ . ܗܘܝܬܘܢ ܝܗܒܝܢ ܚܕ ܡܢ ܚܡܫܐ ܠܦܪܥܘܢ . ܘܐܪ̈ܒܥ ܡܢ̈ܘܢ ܢܗ̈ܘܝܢ ܠܟܘܢ ܠܙܪܥܐ ܕܚܩܠܐ . ܘܠܡܐܟܘܠܬܟܘܢ ܘܠܡܐܟܘܠܬܐ ܕܒܬ̈ܝܟܘܢ . ܘܠܡܐܟܘܠܬܐ ܕܝܩܪܬܟܘܢ .
Genesis 47:25 ܘܐܡܪܘ ܐܚܝܬܢ . ܢܫܟܚ ܪ̈ܚܡܐ ܒܥܝܢ̈ܝ ܡܪܢ . ܘܢܗܘܐ ܥܒ̈ܕܐ ܠܦܪܥܘܢ .
Genesis 47:26 ܘܣܡܗ ܝܘܣܦ ܢܡܘܣܐ ܥܕܡܐ ܠܝܘܡܢܐ . ܥܠ ܐܪܥܐ ܕܡܨܪܝܢ . ܠܦܪܥܘܢ ܚܕ ܡܢ ܚܡܫܐ . ܒܠܚܘܕ ܐܪܥܐ ܕܟܘܡܪ̈ܐ ܕܠܐ ܗܘܬ ܕܦܪܥܘܢ .
Genesis 47:27 ܘܝܬ̣ܒ ܐܝܣܪܝܠ ܒܐܪܥܐ ܕܡܨܪܝܢ . ܘܒܐܪܥܐ ܕܓܫܢ . ܘܥܫܢܘ ܒܗ̇ ܘܟܒܪܘ ܘܣܓܝܘ ܛܒ .
Genesis 47:28 ܘܚ̣ܝܐ ܝܥܩܘܒ ܒܐܪܥܐ ܕܡܨܪܝܢ ܫܒܥܣܪܐ ܫ̈ܢܝܢ . ܘܗܘܘ ܝܘܡ̈ܘܗܝ ܕܝܥܩܘܒ ܫ̈ܢܝ ܚܝ̈ܘܗܝ . ܡܐܐ ܘܐܪ̈ܒܥܝܢ ܘܫܒܥ ܫ̈ܢܝܢ .
Genesis 47:29 ܘܩܪܒܘ ܝܘܡ̈ܘܗܝ ܕܐܝܣܪܝܠ ܠܡܡܬ . ܘܩ̣ܪܐ ܠܝܘܣܦ ܒܪܗ ܘܐܡ̣ܪ ܠܗ . ܐܢ ܐ̇ܫܟܚܬ ܪ̈ܚܡܐ ܒܥܝܢ̈ܝܟ . ܣܝܡ ܐܝܕܟ ܬܚܝܬ ܚܨܝ . ܘܐܘܡܝܟ ܒܡܪܝܐ . ܘܥܒܕ ܥܡܝ ܛܝܒܘܬܐ ܘܩܘܫܬܐ . ܘܠܐ ܬܩܒܪܢܝ ܒܡܨܪܝܢ .
Genesis 47:30 ܘܐܫܟܒ ܥܡ ܐܒ̈ܗܝ . ܘܫܩܘܠܝܢܝ ܡܢ ܡܨܪܝܢ ܘܩܒܘܪܝܢܝ ܒܩܒܪܗܘܢ . ܘܐܡ̣ܪ ܝܘܣܦ . ܐܢܐ ܐܥܒܕ ܐܝܟ ܡܠܬܟ .
Genesis 47:31 ܘܐܡ̣ܪ ܝܡܝ ܠܝ . ܘܝܡ̣ܐ ܠܗ ܘܣܓ̣ܕ ܐܝܣܪܝܠ ܥܠ ܪܝܫ ܚܘܛܪܗ .
Genesis 48:1 ܘܗܘ̣ܐ ܡܢ ܒܬܪ ܦܬ̈ܓܡܐ ܗܠܝܢ . ܐܬܐܡܪ ܠܝܘܣܦ ܕܗܐ ܐܒܘܟ ܐܬܟܪܗ . ܘܕܒ̣ܪ ܠܬܪ̈ܝܢ ܒܢ̈ܘܗܝ ܥܡܗ . ܠܡܢܫܐ ܘܠܐܦܪܝܡ .
Genesis 48:2 ܘܚܘܝܘ ܠܝܥܩܘܒ ܘܐܡ̣ܪܘ ܠܗ . ܗܐ ܒܪܟ ܝܘܣܦ ܐܬ̣ܐ ܠܘܬܟ . ܘܐܬܚܝܠ ܐܝܣܪܝܠ ܘܝܬ̣ܒ ܥܠ ܥܪܣܐ .
Genesis 48:3 ܘܐܡ̣ܪ ܐܝܣܪܝܠ ܠܝܘܣܦ . ܐܝܠܫܕܝ ܐܬܓܠܝ ܥܠܝ ܒܠܘܙ ܒܐܪܥܐ ܕܟܢܥܢ ܘܒܪܟܢܝ .
Genesis 48:4 ܘܐܡ̣ܪ ܠܝ . ܗܐ ܡܒܪܟ ܐܢܐ ܠܟ ܘܡܣ̇ܓܐ ܐܢܐ ܠܟ . ܘܐܬܠܟ ܠܟܢܫܐ ܕܥܡ̈ܡܐ . ܘܐܬܠ ܐܪܥܐ ܗܕܐ ܠܙܪܥܟ ܡܢ ܒܬܪܟ . ܝܪܬܘܬܐ ܠܥܠܡ .
Genesis 48:5 ܘܗܫܐ ܬܪ̈ܝܢ ܒܢܝ̈ܟ ܕܐܬܝܠܕܘ ܠܟ ܒܐܪܥܐ ܕܡܨܪܝܢ . ܥܕܠܐ ܐܬܐ ܠܘܬܟ ܠܐܪܥܐ ܕܡܨܪܝܢ ܕܝܠܝ ܐܢܘܢ . ܐܦܪܝܡ ܘܡܢܫܐ ܕܝܠܝ ܢܗܘܘܢ . ܐܝܟ ܪܘܒܝܠ ܘܐܝܟ ܫܡܥܘܢ ܢܗܘܘܢ ܠܝ .
Genesis 48:6 ܘܒ̈ܢܝܐ ܕܬܘܠܕ ܒܬܪܗܘܢ ܠܟ ܢܗܘܘܢ . ܥܠ ܫܡܐ ܕܐ̈ܚܝܗܘܢ ܢܬܩܪܘܢ ܒܝܪܬܘܬܗܘܢ .
Genesis 48:7 ܘܐܢܐ ܟܕ ܐܬ̇ܐ ܐܢܐ ܡܢ ܦܕܢ ܕܐܪܡ . ܡܝܬܬ ܥܠܝ ܪܚܝܠ ܒܐܪܥܐ ܕܟܢܥܢ ܒܐܘܪܚܐ . ܐܝܟ ܡܪܕܐ ܦܪܣܚܐ ܕܐܪܥܐ ܠܡܥܠ ܠܐܦܪܬ . ܘܩܒܪܬܗ̇ ܬܡ̇ܢ ܒܐܘܪܚܐ ܕܐܦܪܬ . ܗ̣ܝ ܗܝ ܒܝܬ ܠܚܡ .
Genesis 48:8 ܘܚ̣ܙܐ ܐܝܣܪܝܠ ܠܒ̈ܢܘܗܝ ܕܝܘܣܦ ܘܐܡ̣ܪ ܠܗ . ܡ̇ܢ ܐܢܘܢ ܗܠܝܢ .
Genesis 48:9 ܘܐܡ̣ܪ ܝܘܣܦ ܠܐܒܘܗܝ . ܒܢ̈ܝ ܐܢܘܢ ܕܝܗ̣ܒ ܠܝ ܐܠܗܐ ܗܪܟܐ . ܘܐܡ̣ܪ ܩ̇ܪܒ ܐܢܘܢ ܠܘܬܝ ܘܐܒܪܟ ܐܢܘܢ .
Genesis 48:10 ܘܥܝܢ̈ܘܗܝ ܕܐܝܣܪܝܠ ܝܩܪ ܡܢ ܣܝܒܘܬܐ . ܘܠܐ ܡܫܟܚ ܗܘܐ ܕܢܚܙܐ ܫܦܝܪ . ܘܩ̇ܪܒ ܐܢܘܢ ܠܘܬܗ . ܘܢܫ̇ܩ ܐܢܘܢ ܘܥܦ̇ܩ ܐܢܘܢ .
Genesis 48:11 ܘܐܡ̣ܪ ܐܝܣܪܝܠ ܠܝܘܣܦ . ܠܚܙܘܐ ܕܐ̈ܦܝܟ ܠܐ ܣܒ̇ܪܬ . ܘܗܐ ܚܘܝܢܝ ܐܠܗܐ ܐܦ ܙܪܥܟ .
Genesis 48:12 ܘܐܦܪܩ ܐܢܘܢ ܡܢ ܩܕܡ ܒܘܪ̈ܟܘܗܝ . ܘܣܓܕܘ ܩܕܡܘܗܝ ܥܠ ܐ̈ܦܝܗܘܢ ܥܠ ܐܪܥܐ .
Genesis 48:13 ܘܕܒ̣ܪ ܝܘܣܦ ܠܬܪ̈ܝܗܘܢ ܒܢ̈ܘܗܝ ܠܐܦܪܝܡ ܒܝܡܝܢܗ ܡܢ ܣܡܠܗ ܕܐܝܣܪܝܠ . ܘܠܡܢܫܐ ܒܣܡܠܗ ܡܢ ܝܡܝܢܗ ܕܐܝܣܪܝܠ . ܘܩ̇ܪܒ ܐܢܘܢ ܠܘܬܗ .
Genesis 48:14 ܘܐܘܫܛ ܐܝܣܪܝܠ ܝܡܝܢܗ . ܘܣܡܗ̇ ܥܠ ܪܫܗ ܕܐܦܪܝܡ . ܗܘܝܘ ܙܥܘܪܐ . ܘܣܡܠܗ ܥܠ ܪܫܗ ܕܡܢܫܐ . ܫܚ̇ܠܦ ܐܢܝ̈ܢ ܐ̈ܝܕܘܗܝ . ܡܛܠ ܕܡܢܫܐ ܗܘܐ ܒܘܟܪܐ .
Genesis 48:15 ܘܒܪܟ ܝܥܩܘܒ ܠܝܘܣܦ ܒܪܗ . ܘܐܡ̣ܪ ܐܠܗܐ ܕܫܦܪܘ ܩܕܡܘܗܝ ܐ̈ܒܗܝ . ܐܒܪܗܡ ܘܐܝܣܚܩ . ܐܠܗܐ ܕܬܪܣܝܢܝ ܡܢ ܛܠܝܘܬܝ ܘܥܕܡܐ ܠܝܘܡܢܐ .
Genesis 48:16 ܡܠܐܟܐ ܕܦܪܩܢܝ ܡܢ ܟܠ ܒܝܫܐ ܢܒܪܟ ܠܛܠܝ̈ܐ . ܘܢܬܩܪܐ ܫܡܝ ܒܗܘܢ . ܘܫܡܐ ܕܐܒ̈ܗܝ ܐܒܪܗܡ ܘܐܝܣܚܩ . ܘܢܟܒܪܘܢ ܘܢܣܓܘܢ ܒܓܘܗ̇ ܕܐܪܥܐ .
Genesis 48:17 ܘܚ̣ܙܐ ܝܘܣܦ ܕܣܡ ܐܒܘܗܝ ܐܝܕܗ ܕܝܡܝܢܐ ܥܠ ܪܝܫܗ ܕܐܦܪܝܡ . ܘܐܬܐܒܫ ܒܥܝܢ̈ܘܗܝ ܘܣܡ̣ܟ ܠܗ̇ ܠܐܝܕܗ ܕܐܒܘܗܝ . ܠܡܥܒܪܘܬܗ̇ ܡܢ ܪܫܗ ܕܐܦܪܝܡ ܘܢܣܝܡܝܗ̇ ܥܠ ܪܫܗ ܕܡܢܫܐ .
Genesis 48:18 ܘܐܡ̣ܪ ܝܘܣܦ ܠܐܒܘܗܝ ܠܐ ܗܘ̣ܐ ܗܟܢܐ ܐܒܝ . ܐܠܐ ܗܢܘ ܒܘܟܪܐ . ܣܝܡ ܝܡܝܢܟ ܥܠ ܪܫܗ .
Genesis 48:19 ܘܠܐ ܨܒ̣ܐ ܐܒܘܗܝ . ܘܐܡ̣ܪ ܝܕܥ̇ ܐܢܐ ܒܪܝ ܝܕܥ̇ ܐܢܐ . ܐܦ ܗ̣ܘ ܢܗܘܐ ܠܥܡܐ . ܐܦ ܗ̣ܘ ܢܐܪܒ . ܒܪܡ ܐܚܘܗܝ ܙܥܘܪܐ ܢܐܪܒ ܡܢܗ . ܘܙܪܥܗ ܢܗܘܐ ܡܠ̣ܐ ܥܡ̈ܡܐ .
Genesis 48:20 ܘܒ̇ܪܟ ܐܢܘܢ ܒܝܘܡܐ ܗ̇ܘ ܘܐܡ̣ܪ . ܒܟ ܢܬܒܪܟ ܐܝܣܪܝܠ ܘܢܐܡܪܘܢ . ܢܥܒ̣ܕܟ ܐܠܗܐ ܐܝܟ ܐܦܪܝܡ ܘܐܝܟ ܡܢܫܐ . ܘܥܒ̣ܕ ܠܐܦܪܝܡ ܩܕܡ ܡܢܫܐ .
Genesis 48:21 ܘܐܡ̣ܪ ܐܝܣܪܝܠ ܠܝܘܣܦ . ܗܐ ܐܢܐ ܡܐܬ ܐܢܐ . ܘܢܗܘܐ ܐܠܗܐ ܥܡܟܘܢ . ܘܢܗܦܟܟܘܢ ܠܐܪܥܐ ܕܐ̈ܒܗܝܟܘܢ .
Genesis 48:22 ܘܐܢܐ ܗܐ ܝܗ̇ܒܬ ܠܟ ܡܢܬܐ ܚܕܐ ܝܬܝܪܬܐ ܥܠ ܐ̈ܚܝܟ . ܕܢܣ̇ܒܬ ܡܢ ܐܝܕܐ ܕܐܡܘܪ̈ܝܐ ܒܣܝܦܝ ܘܒܩܫܬܝ .
Genesis 49:1 ܘܩ̣ܪܐ ܝܥܩܘܒ ܠܒܢ̈ܘܗܝ ܘܐܡ̣ܪ ܠܗܘܢ . ܐܬ̇ܟܢܫܘ ܘܐܚܘܝܟܘܢ ܡܕܡ ܕܓܕܫ̇ ܠܟܘܢ ܒܚܪܬܐ ܕܝܘܡ̈ܬܐ .
Genesis 49:2 ܐܬ̇ܟܢܫܘ ܘܫܡ̣ܥܘ ܒܢ̈ܘܗܝ ܕܝܥܩܘܒ . ܫܡܥܘ ܠܐܝܣܪܐܝܠ ܐܒܘܟܘܢ .
Genesis 49:3 ܪܘܒܝܠ ܒܘܟܪܝ ܐܢܬ . ܚܝܠܝ ܘܪܝܫ ܬܘܩܦܝ . ܫܪܟܐ ܕܫܩܘܠܬܐ ܘܫܪܟܐ ܕܥܘܫܢܐ .
Genesis 49:4 ܛܥ̣ܝܬ ܐܝܟ ܡ̈ܝܐ ܠܐ ܬܦܘܫ ܕܣܠܩ̣ܬ ܠܡܫܟܒܗ ܕܐܒܘܟ . ܫܪܝܪܐܝܬ ܛܘܫ̣ܬ ܬܫܘܝܬܝ ܘܣ̣ܠܩܬ .
Genesis 49:5 ܫܡܥܘܢ ܘܠܘܝ ܐ̈ܚܐ ܡܐ̈ܢܐ ܕܪܘܓܙܐ ܡܢ ܟܝܢܗܘܢ .
Genesis 49:6 ܒܐܪܙܗܘܢ ܠܐ ܥܠ̣ܬ ܢܦܫܝ . ܘܒܟܢܫܗܘܢ ܠܐ ܢܚܬܬ ܡܢ ܐܝܩܪܝ . ܡܛܠ ܕܒܪܘܓܙܗܘܢ ܩ̣ܛܠܘ ܓܒܪ̈ܐ . ܘܒܚܡܬܗܘܢ ܥܩܪܘ ܫܘܪܐ .
Genesis 49:7 ܠܝܛ ܗ̣ܘ ܪܘܓܙܗܘܢ ܡܛܠ ܕܥܫܝܢ . ܘܚܡܬܗܘܢ ܡܛܠ ܕܩܫܝܐ . ܐܦ̇ܠܓ ܐܢܘܢ ܒܝܥܩܘܒ . ܘܐܒܕܪ ܐܢܘܢ ܒܐܝܣܪܝܠ .
Genesis 49:8 ܝܗܘܕܐ ܠܟ ܢܘܕܘܢ ܐ̈ܚܝܟ . ܐܝܕܟ ܥܠ ܩܕܠܐ ܕܒ̈ܥܠܕܒܒܝܟ . ܢܣܓܕܘܢ ܠܟ ܒܢ̈ܘܗܝ ܕܐܒܘܟ .
Genesis 49:9 ܓܘܪܝܐ ܕܐܪܝܐ ܝܗܘܕܐ . ܡܢ ܩܛܠܐ ܒܪܝ ܣܠܩ̣ܬ . ܒ̣ܪܟ ܘܪܒ̣ܥ ܐܝܟ ܐܪܝܐ . ܘܐܝܟ ܓܘܪܝܐ ܕܐܪܝܐ ܘܡܢܘ ܢܩܝܡܝܘܗܝ .
Genesis 49:10 ܠܐ ܢܥܢܕ ܫܒܛܐ ܡܢ ܝܗܘܕܐ . ܘܡܒܕܩܢܐ ܡܢ ܒܝܬ ܪ̈ܓܠܘܗܝ . ܥܕܡܐ ܕܢܐܬܐ ܡ̇ܢ ܕܕܝܠܗ ܗ̣ܝ . ܘܠܗ ܢܣ̇ܟܘܢ ܥܡ̈ܡܐ .
Genesis 49:11 ܢܐܣܘܪ ܒܓܦܬܐ ܥܝܠܗ . ܘܒܫܒܘܩܐ ܒܪ ܐܬܢܗ . ܢܚܘܪ ܒܚܡܪܐ ܠܒܘܫܗ . ܘܒܕܡܐ ܕܥܢ̈ܒܐ ܬܟܣܝܬܗ .
Genesis 49:12 ܙܪܓܢ ܥܝܢ̈ܘܗܝ ܡܢ ܚܡܪܐ . ܘܚܘܪ̈ܢ ܫ̈ܢܘܗܝ ܡܢ ܚܠܒܐ .
Genesis 49:13 ܙܒܘܠܘܢ ܥܠ ܣܦܪ̈ܝ ܝܡ̈ܡܐ ܢܫܪܐ . ܘܗ̣ܘ ܥܠ ܫܘܦܪܐ ܕܣܦܝ̈ܢܐ . ܘܬܚܘܡܗ ܥܕܡܐ ܠܨܝܕܢ .
Genesis 49:14 ܐܝܣܟܪ ܓܒܪܐ ܓܢܒܪܐ . ܕܪܒܝܥ ܒܝܬ ܫܒܝ̈ܠܐ .
Genesis 49:15 ܘܚ̣ܙܐ ܡܫܪܝܗ ܕܫܦܝܪ . ܘܐܪܥܗ ܕܛܒܐ . ܘܐܪܟܢ ܟܬܦܗ ܠܫܘܥܒܕܐ . ܘܗܘ̣ܐ ܠܡܕܐܬܐ .
Genesis 49:16 ܕܢ ܢܕܘܢ ܠܥܡܗ . ܐܝܟ ܚܕ ܡܢ ܫܒ̈ܛܐ ܕܐܝܣܪܝܠ .
Genesis 49:17 ܢܗܘܐ ܕܢ ܚܘܝܐ ܕܥܠ ܐܘܪܚܐ . ܘܚܪܡܢܐ ܕܥܠ ܫܒܝ̈ܠܐ . ܕܢܟܬ ܠܣܘܣܝܐ ܒܥܩܒܗ . ܘܡܪܡܐ ܠܪܟܒܗ ܠܒܣܬܪܗ .
Genesis 49:18 Genesis 49:19 ܓܕ ܒܓܝܣܐ ܢܦܘܩ . ܘܗ̣ܘ ܢܓܕ ܥܩܒܐ .
Genesis 49:20 ܐܫܝܪ ܛܒܐ ܐܪܥܗ . ܘܗ̣ܘ ܢܬܠ ܬܘܪܣܝܐ ܠܡ̈ܠܟܐ .
Genesis 49:21 ܢܦܬܠܝ ܐܝܙܓܕܐ ܩܠܝܠܐ . ܝܗ̇ܒ ܡܐܡܪܐ ܫܦܝܪܐ .
Genesis 49:22 ܒܪܐ ܕܬܪܒܝܬܐ ܝܘܣܦ . ܒܪܐ ܕܬܪܒܝܬܐ . ܣܩܝ ܥܝܢܐ ܒܢܝܢܐ ܣܡܝܟܐ . ܕܣ̇ܠܩ ܒܫܘܪܐ .
Genesis 49:23 ܘܐܬܚܪܝܘ ܥܡܗ ܘܣܓܝܘ . ܘܣܩܪܘܗܝ ܡܪ̈ܝ ܓܘ̈ܕܐ .
Genesis 49:24 ܘܗܦ̣ܟܬ ܒܥܘܫܢܐ ܩܫܬܗ . ܘܐ̣ܬܒܕܪܘ ܕܪ̈ܥܐ ܕܐ̈ܝܕܘܗܝ . ܡܢ ܐ̈ܝܕܝ ܥܫܝܢܐ ܕܝܥܩܘܒ . ܘܡܢ ܫܡ ܪܥܝܐ ܕܟܐܦܐ ܕܐܝܣܪܝܠ .
Genesis 49:25 ܐܠܗܗ ܕܐܒܘܟ ܢܥܕܪܟ ܘܐܝܠܫܕܝ ܢܒܪܟܟ . ܒܘܪܟܬܐ ܕܫܡܝܐ ܡܢ ܠܥܠ . ܒܘܪܟܬܐ ܕܬܗܘܡܐ ܕܪܒܝܥܐ ܡܢ ܠܬܚܬ . ܒܘܪܟܬܐ ܕܬܕ̈ܝܐ ܘܕܪ̈ܚܡܐ .
Genesis 49:26 ܒܘܪ̈ܟܬܗ ܕܐܒܘܟ ܥܫ̣ܢ ܥܠ ܒܘܪ̈ܟܬܐ ܕܡܘ̈ܠܕܢܝ . ܥܕܡܐ ܠܣܒܪܐ ܕܪ̈ܡܬܐ ܕܥܠܡ . ܢܗܘܝܢ ܥܠ ܪܝܫܗ ܕܝܘܣܦ ܘܥܠ ܪܝܫ ܟܠܝܠܐ ܕܐ̈ܚܘܗܝ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .