← All works
Peshitta Genesis Peshitta (Syriac Old Testament) · 1,533 sections
Single column Two columns
Genesis 43:10 ܘܐܦ ܐܠܘ ܠܐ ܐܫܬܘܚܪܢ . ܟܒܪ ܕܝܢ ܗܦܟܢ ܕܬܪ̈ܬܝܢ ܙܒ̈ܢܝܢ .
Genesis 43:11 ܘܐܡ̣ܪ ܠܗܘܢ ܐܝܣܪܝܠ ܐܒܘܗܘܢ . ܐܢ ܗܟܢܐ ܗܘ ܗܕܐ ܥܒܕܘ . ܣܒܘ ܡܢ ܛܘܒܗ̇ ܕܐܪܥܐ ܒܡܐ̈ܢܝܟܘܢ . ܘܐܚܬܘ ܠܓܒܪܐ ܩܘܪܒܢܐ . ܩܠܝܠ ܨܪܘܐ ܘܩܠܝܠ ܕܒܫܐ . ܘܐܪ̈ܗܛܢܐ ܘܠܛܡ̈ܐ . ܘܒܛܡ̈ܐ ܘܫܓܪ̈ܐ .
Genesis 43:12 ܘܟܣܦܐ ܐܥܦܐ ܣܒܘ ܒܐ̈ܝܕܝܟܘܢ . ܘܟܣܦܐ ܕܗ̣ܦܟ ܒܦܘܡ ܛܥܢܝ̈ܟܘܢ ܐܗܦܟܘ ܒܐ̈ܝܕܝܟܘܢ ܕܠܡܐ ܛܘܥܝܝ ܗܝ .
Genesis 43:13 ܘܠܐܚܘܟܘܢ ܕܒܪܘ . ܘܩܘܡܘ ܘܗܦܘܟܘ ܠܘܬ ܓܒܪܐ .
Genesis 43:14 ܘܐܝܠܫܕܝ ܢܬܠܟܘܢ ܠܪ̈ܚܡܐ ܩܕܡ ܓܒܪܐ . ܘܢܫܕܪ ܥܡܟܘܢ ܠܐܚܘܟܘܢ ܐܚܪܢܐ ܘܠܒܢܝܡܝܢ . ܘܐܢܐ ܐܝܟ ܕܓܙܝ̇ܬ ܓܙܝ̇ܬ .
Genesis 43:15 ܘܢܣܒܘ ܓܒܪ̈ܐ ܩܘܪܒܢܐ ܗܢܐ . ܘܐܥܦܐ ܕܟܣܦܐ ܢܣܒܘ ܒܐ̈ܝܕܝܗܘܢ . ܘܕܒ̣ܪܘ ܥܡܗܘܢ ܠܒܢܝܡܝܢ . ܘܩܡܘ ܘܢܚܬܘ ܠܡܨܪܝܢ . ܘܩܡܘ ܩܕܡ ܝܘܣܦ .
Genesis 43:16 ܘܚ̣ܙܐ ܝܘܣܦ ܥܡܗܘܢ ܠܒܢܝܡܝܢ . ܘܐܡ̣ܪ ܠܪܒܝܬܗ . ܐܥܠ ܓܒܪ̈ܐ ܠܒܝܬܐ . ܘܟܘܣ ܢܟܣܬܐ ܘܬ̇ܩܢ . ܡܛܠ ܕܥܡܝ ܐܟܠܝܢ ܓܒܪ̈ܐ ܒܛܗܪܐ .
Genesis 43:17 ܘܥܒ̣ܕ ܥܒ̣ܕܐ ܐܝܟ ܕܐܡ̣ܪ ܝܘܣܦ . ܘܐܥܠ ܐܢܘܢ ܠܓܒܪ̈ܐ ܠܒܝܬ ܝܘܣܦ .
Genesis 43:18 ܘܕܚܠܘ ܟܕ ܡܥܠܝܢ ܠܗܘܢ ܠܒܝܬ ܝܘܣܦ . ܘܐܡܪܘ ܡܛܠ ܟܣܦܐ ܕܗ̣ܦܟ ܒܛܥܢܝ̈ܢ ܒܩܕܡܝܬܐ . ܡܥܠܝܢ ܠܢ . ܠܡܬܪܘܪܒܘ ܥܠܝܢ ܘܠܡܬܢܟܠܘ ܥܠܝܢ . ܕܢܥܒܕܘܢܢ ܥܒ̈ܕܐ ܘܠܚܡܪܢ .
Genesis 43:19 ܘܩ̣ܪܒܘ ܠܘܬ ܓܒܪܐ ܪܒܝܬܗ ܕܝܘܣܦ . ܘܡܠܠܘ ܥܡܗ ܒܬܪܥܐ ܕܒܝܬܐ .
Genesis 43:20 ܘܐܡܪܘ ܠܗ . ܒܥܝܢܢ ܡܪܢ . ܡܚܬ ܢܚܬܢ ܒܩܕܡܝܬܐ ܠܡܡܪ ܥܒܘܪܐ .
Genesis 43:21 ܘܟܕ ܐܙܠܢ ܠܒܝܬ ܒܘܬܐ ܦܬܚܢ ܛܥܢܝ̈ܢ . ܘܗܐ ܟܣܦܗ ܕܓܒܪܐ ܒܦܘܡ ܛܥܢܗ . ܟܣܦܢ ܒܡܬܩܠܗ ܐܗܦܟܢܝܗܝ ܒܐܝܕܢ .
Genesis 43:22 ܘܟܣܦܐ ܐܚܪܢܐ ܐܚܬܢ ܒܐܝܕܢ ܠܡܡܪ ܥܒܘܪܐ . ܠܐ ܝܕܥܢ ܡܢܘ ܣܡ ܟܣܦܢ ܒܦܘܡ ܛܥܢܝ̈ܢ .
Genesis 43:23 ܐܡܪ ܠܗܘܢ ܫ̣ܠܡ ܠܟܘܢ ܠܐ ܬܕܚܠܘܢ . ܐܠܗܟܘܢ ܐܠܗܐ ܕܐܒܘܟܘܢ ܣܡ ܠܟܘܢ ܣܝܡܬܐ ܒܛܥܢܝ̈ܟܘܢ . ܟܣܦܟܘܢ ܥܠ ܠܘܬܝ . ܘܐܦܩ ܠܘܬܗܘܢ ܠܫܡܥܘܢ .
Genesis 43:24 ܘܐܥܠ ܥܒ̣ܕܐ ܓܒܪ̈ܐ ܠܒܝܬ ܝܘܣܦ . ܘܝܗ̣ܒ ܡ̈ܝܐ ܘܐܫܝܓܘ ܪ̈ܓܠܝܗܘܢ . ܘܐܪܡܝ ܟܣܬܐ ܠܒܥܝܪܗܘܢ .
Genesis 43:25 ܘܬ̇ܩܢܘ ܩܘܪܒܢܐ ܥܕ ܥܐܠ ܝܘܣܦ ܒܛܗܪܐ . ܡܛܠ ܕܫܡܥܘ ܕܬܡ̇ܢ ܐ̇ܟܠܝܢ ܠܚܡܐ .
Genesis 43:26 ܘܥܠ ܝܘܣܦ ܠܒܝܬܐ . ܘܐܝܬܝܘ ܠܗ ܩܘܪܒܢܐ ܕܒܐ̈ܝܕܝܗܘܢ ܠܒܝܬܐ . ܘܣ̣ܓܕܘ ܠܗ ܥܠ ܐܪܥܐ .
Genesis 43:27 ܘܫܐ̣ܠ ܒܫܠܡܗܘܢ ܘܐܡ̣ܪ ܠܗܘܢ . ܫܠ̣ܡ ܗ̣ܘ ܐܒܘܟܘܢ ܣܒܐ ܕܐܡܪܬܘܢ ܠܝ . ܥܕܟܝܠ ܚܝ ܗܘ .
Genesis 43:28 ܘܐܡܪܘ ܫܠܡ ܗܘ ܥܒܕܟ ܐܒܘܢ . ܘܐܡ̣ܪܘ ܠܗ ܥܕܟܝܠ ܚܝ ܗ̣ܘ . ܘܩܥܕܘ ܘܣܓܕܘ .
Genesis 43:29 ܘܐܪܝܡ ܥܝܢ̈ܘܗܝ ܘܚ̣ܙܐ ܠܒܢܝܡܝܢ ܐܚܘܗܝ ܒܪ ܐܡܗ ܘܐܡ̣ܪ ܠܗܘܢ . ܗܢܘ ܐܚܘܟܘܢ ܙܥܘܪܐ ܕܐܡܪܬܘܢ ܠܝ . ܘܐܡ̣ܪ ܐܠܗܐ ܢܪܚܡ ܥܠܝܟ ܒܪܝ .
Genesis 43:30 ܘܐܣܬܪܗܒ ܝܘܣܦ ܡܛܠ ܕܓܠܘ ܪ̈ܚܡܘܗܝ ܥܠ ܐܚܘܗܝ . ܘܒܥ̣ܐ ܠܡܒܟܐ . ܘܥܠ ܠܬܘܢܐ ܘܒܟ̣ܐ ܬܡܢ .
Genesis 43:31 ܘܐܫܝܓ ܐ̈ܦܘܗܝ ܘܢܦ̣ܩ ܘܚܡܣܢ . ܘܐܡ̣ܪ ܕܢܣܝܡܘܢ ܠܗܘܢ ܠܚܡܐ .
Genesis 43:32 ܘܣܡܘ ܠܗ ܒܠܚܘܕܘܗܝ ܘܠܗܘܢ ܒܠܚܘܕܝܗܘܢ . ܘܠܡܨܪ̈ܝܐ ܕܐܟܠܝܢ ܥܡܗ ܒܠܚܘܕܝܗܘܢ . ܡܛܠ ܕܠܐ ܡܫܟܚܝܢ ܡܨܪ̈ܝܐ ܠܡܐܟܠ ܠܚܡܐ ܥܡ ܥܒܪ̈ܝܐ . ܡܛܠ ܕܛܡܐܘܬܐ ܗܝ ܠܡܨܪ̈ܝܐ .
Genesis 43:33 ܘܐܣܬܡܟܘ ܩܕܡܘܗܝ . ܩܫܝܫܐ ܐܝܟ ܩܫܝܫܘܬܗ . ܘܙܥܘܪܐ ܐܝܟ ܙܥܘܪܘܬܗ . ܘܬܡܗܘ ܓܒܪ̈ܐ ܓܒܪ ܒܚܒܪܗ .
Genesis 43:34 ܘܫܩܠܘ ܠܗܘܢ ܫܩ̈ܠܐ ܡܢ ܩܕܡܘܗܝ . ܘܣܓܝ ܫܩܠܗ ܕܒܢܝܡܝܢ ܡܢ ܫܩ̈ܠܐ ܕܟܠܗܘܢ ܚܡܫ ܡ̈ܢܘܢ . ܘܐܫܬܝܘ ܘܪܘܝܘ ܥܡܗ .
Genesis 44:1 ܘܦܩ̇ܕ ܠܪܒ ܒܝܬܗ ܘܐܡ̣ܪ . ܡܠ̣ܝ ܛܥܢܝ̈ܗܘܢ ܕܓܒܪ̈ܐ ܥܒܘܪܐ ܟܡܐ ܕܡܫܟܚܝܢ ܠܡܫܩܠ . ܘܣܝܡ ܟܣܦܗ ܕܓܒܪܐ ܒܦܘܡ ܛܥܢܗ .
Genesis 44:2 ܘܣܒ ܐܣܩܦܐ ܕܝܠܝ ܕܣܐܡܐ . ܘܣܝܡ ܒܦܘܡ ܛܥܢܗ ܕܙܥܘܪܐ ܘܟܣܦ ܡܝܪܗ . ܘܥܒ̣ܕ ܥܒ̣ܕܐ ܐܝܟ ܡܠܬܗ ܕܝܘܣܦ .
Genesis 44:3 ܘܟܕ ܗܘ̣ܐ ܫܦܪܐ . ܐܫܬܪܝܘ ܓܒܪ̈ܐ ܠܡܐܙܠ ܗ̣ܢܘܢ ܘܚܡܪܗܘܢ .
Genesis 44:4 ܗ̣ܢܘܢ ܢܦܩܘ ܡܢ ܩܪܝܬܐ ܘܠܐ ܐܪܚܩܘ . ܘܝܘܣܦ ܐܡ̣ܪ ܠܪܒܝܬܗ . ܩܘܡ ܪܕܘܦ ܒܬܪ ܓܒܪ̈ܐ ܘܐܕܪܟ ܐܢܘܢ . ܘܐܡ̣ܪ ܠܗܘܢ . ܠܡܢܐ ܦܪܥܬܘܢ ܒܝܫܬܐ ܚܠܦ ܛܒܬܐ .
Genesis 44:5 ܗܢܐ ܐܣܩܦܐ ܕܫ̇ܬܐ ܒܗ ܡܪܝ . ܘܐܦ ܡ̇ܢܚܫܘ ܡ̇ܢܚܫ ܒܗ . ܐܒܐܫܬܘܢ ܒܡܕܡ ܕܥܒܕܬܘܢ .
Genesis 44:6 ܘܐܕܪܟ ܐܢܘܢ ܘܐܡ̣ܪ ܠܗܘܢ ܐܝܟ ܡ̈ܠܐ ܗܠܝܢ .
Genesis 44:7 ܐܡܪܝܢ ܠܗ . ܠܐ ܢܐܡܪ ܡܪܢ ܡ̈ܠܐ ܗܠܝܢ . ܚܣ ܠܥܒ̈ܕܝܟ ܠܡܥܒܕ ܦܬܓܡܐ ܗܢܐ .
Genesis 44:8 ܗܐ ܟܣܦܐ ܕܐܫܟܚܢ ܒܦܘܡ ܛܥܢܝ̈ܢ . ܐܗܦܟܢܝܗܝ ܡܢ ܐܪܥܐ ܕܟܢܥܢ . ܐܝܟܢܐ ܓܢܒܝܢ ܗܘܝܢ ܡܢ ܒܝܬ ܡܪܟ ܕܗܒܐ ܐܘ ܣܐܡܐ .
Genesis 44:9 ܡ̇ܢ ܕܢܫܬܟܚ ܠܘܬܗ ܡܢ ܥܒ̈ܕܝܟ ܢܡܘܬ . ܘܚܢܢ ܢܗܘܐ ܥܒ̣̈ܕܐ ܠܡܪܢ .
Genesis 44:10 ܐܡ̇ܪ ܠܗܘܢ . ܐܦ ܗܫܐ ܐܝܟ ܡܠܬܟܘܢ ܗܟܢܐ . ܡ̇ܢ ܕܢܫܬܟܚ ܠܘܬܗ . ܗ̣ܘ ܢܗܘܐ ܠܝ ܥܒ̣ܕܐ . ܘܐܢܬܘܢ ܬܗܘܘܢ ܙܟܝ̈ܝܢ .
Genesis 44:11 ܘܐܣܬܪܗܒܘ ܘܐܚܬܘ ܓܒܪ ܛܥܢܗ ܥܠ ܐܪܥܐ . ܘܦܬܚܘ ܓܒܪ ܛܥܢܗ .
Genesis 44:12 ܘܒܨܘ ܡܢ ܪܒܐ ܫ̇ܪܝ ܘܒܙܥܘܪܐ ܫ̇ܠܡ . ܘܐܫܬܟܚ ܐܣܩܦܐ ܒܛܥܢܗ ܕܒܢܝܡܝܢ .
Genesis 44:13 ܘܨܪܝܘ ܠܒ̈ܘܫܝܗܘܢ . ܘܫܩܠܘ ܓܒܪ ܥܠ ܚܡܪܗ ܘܗܦܟܘ ܠܩܪܝܬܐ .
Genesis 44:14 ܘܥܠ ܝܗܘܕܐ ܘܐ̈ܚܘܗܝ ܠܘܬ ܝܘܣܦ . ܘܗ̣ܘ ܥܕܟܝܠ ܬܡܢ . ܘܢܦܠ̣ܘ ܩܕܡܘܗܝ ܥܠ ܐܪܥܐ .
Genesis 44:15 ܐܡ̇ܪ ܠܗܘܢ ܝܘܣܦ . ܡ̇ܢܘ ܥܒ̇ܕܐ ܗܢܐ ܕܥܒܕܬܘܢ . ܠܐ ܝܕܥܝܢ ܐܢܬܘܢ ܕܡ̇ܢܚܫܘ ܡ̇ܢܚܫ ܓܒܪܐ ܕܐܟܘܬܝ .
Genesis 44:16 ܘܐܡ̣ܪ ܝܗܘܕܐ . ܡܢܐ ܢܐܡܪ ܠܡܪܝ ܘܡܢܐ ܢܡܠܠ ܘܒܡܢܐ ܢܙܟ̣ܐ . ܡܢ ܩܕܡ ܐܠܗܐ ܐܫܬܟܚ ܚܛܗܐ ܠܥܒ̣̈ܕܝܟ . ܗܐ ܚܢܢ ܥܒ̣̈ܕܐ ܠܡܪܝ . ܐܦ ܚܢܢ ܐܦ ܡ̇ܢ ܕܐܫܬܟܚ ܐܣܩܦܐ ܒܐܝܕܗ .
Genesis 44:17 ܐܡ̇ܪ ܠܗܘܢ . ܚܣ ܠܝ ܕܐܥܒܕ ܗܕܐ . ܓܒܪܐ ܕܐܫܬܟܚ ܐܣܩܦܐ ܠܘܬܗ ܗ̣ܘ ܢܗܘܐ ܠܝ ܥܒ̣ܕܐ . ܘܐܢܬܘܢ ܣܩܘ ܒܫܠܡܐ ܠܘܬ ܐܒܘܟܘܢ .
Genesis 44:18 ܘܩ̣ܪܒ ܠܘܬܗ ܝܗܘܕܐ ܘܐܡ̣ܪ . ܒܥ̇ܐ ܐܢܐ ܡܢܟ ܡܪܝ . ܢܡܠܠ ܥܒ̣ܕܟ ܡܠܬܐ ܩܕܡܝܟ ܡܪܝ . ܘܠܐ ܢܬܚܡܬ ܪܘܓܙܟ ܥܠ ܥܒ̣ܕܟ . ܡܛܠ ܕܐܢܬ ܐܝܟ ܦܪܥܘܢ .
Genesis 44:19 ܡܪܝ ܫܐ̇ܠ ܠܥܒ̣̈ܕܘܗܝ ܘܐܡ̣ܪ . ܐܝܬ ܠܟܘܢ ܐܒܐ ܐܘ ܐܚܐ .
Genesis 44:20 ܘܐܡܪܢ ܠܡܪܝ . ܐܝܬ ܠܢ ܐܒܐ ܣܒܐ . ܘܒܪܐ ܒܪ ܣܝܒܘܬܐ ܙܥܘܪܐ . ܘܐܚܘܗܝ ܡܝܬ . ܘܗ̣ܘ ܒܠܚܘܕܘܗܝ ܐܫܬܚܪ ܠܐܡܗ . ܘܐܒܘܗܝ ܪܚܡ ܠܗ .
Genesis 44:21 ܘܐܡ̣ܪܬ ܠܥܒ̣̈ܕܝܟ . ܐܚܬܘܗܝ ܠܘܬܝ ܘܐܣܝܡ ܥܝܢܝ ܥܠܘܗܝ .
Genesis 44:22 ܘܐܡܪܢ ܠܡܪܝ . ܠܐ ܡܫܟܚ ܛܠܝܐ ܠܡܫܒܩ ܠܐܒܘܗܝ . ܘܐܢ ܫܒ̇ܩ ܠܐܒܘܗܝ ܡܐ̇ܬ .
Genesis 44:23 ܘܐܡ̣ܪܬ ܠܥܒ̣̈ܕܝܟ . ܕܐܢ ܠܐ ܢܚ̇ܬ ܐܚܘܟܘܢ ܙܥܘܪܐ ܥܡܟܘܢ . ܠܐ ܬܘܣܦܘܢ ܠܡܚܙܐ ܐ̈ܦܝ .
Genesis 44:24 ܘܟܕ ܣܠܩܢ ܠܘܬ ܥܒ̣ܕܟ ܐܒܘܢ . ܘܚܘܝܢܝܗܝ ܦܬ̈ܓܡ̇ܘܗܝ ܕܡܪܝ .
Genesis 44:25 ܐܡ̣ܪ ܠܢ ܥܒ̣ܕܟ ܐܒܘܢ . ܗܦܘܟܘ ܡܘܪܘ ܠܢ ܩܠܝܠ ܥܒܘܪܐ .
Genesis 44:26 ܘܐܡܪܢ ܠܐܒܘܢ ܠܐ ܡܫܟܚܝܢܢ ܠܡܚܬ . ܐܢ ܢܚ̇ܬ ܐܚܘܢ ܙܥܘܪܐ ܥܡܢ ܢܚܬܝܢܢ . ܡܛܠ ܕܠܐ ܡܫܟܚܝܢܢ ܠܡܚܙܐ ܐ̈ܦܘܗܝ ܕܓܒܪܐ . ܟܕ ܐܚܘܢ ܙܥܘܪܐ ܠܐ ܗܘ̣ܐ ܥܡܢ .
Genesis 44:27 ܘܐܡ̣ܪ ܠܢ ܥܒ̣ܕܟ ܐܒܘܢ . ܐܢܬܘܢ ܝܕܥܝܢ ܐܢܬܘܢ ܕܬܪ̈ܝܢ ܝܠ̣ܕܬ ܠܝ ܐܢܬܬܝ .
Genesis 44:28 ܘܢܦ̣ܩ ܚܕ ܡܢ ܠܘܬܝ . ܘܐܡ̇ܪܬ ܕܡܩܛܠ ܩܛܝܠ . ܘܠܐ ܚܙܝܬܗ ܥܕܡܐ ܠܗܫܐ .
Genesis 44:29 ܘܕܒܪܝܢ ܐܢܬܘܢ ܐܦ ܠܗܢܐ ܡܢ ܠܘܬܝ . ܘܐ̇ܪܥ ܠܗ ܣܩܘܒܠܐ . ܘܡܚܬܝܢ ܐܢܬܘܢ ܣܝܒܘܬܝ ܒܒܝܫܬܐ ܠܫܝܘܠ .
Genesis 44:30 ܘܗܫܐ ܡܐ ܕܐܙܠܢ ܠܘܬ ܥܒ̣ܕܟ ܐܒܘܢ . ܘܛܠܝܐ ܠܐ ܗܘܐ ܥܡܢ . ܘܢܦܫܗ ܚܒܝܒܐ ܠܗ ܐܝܟ ܢܦܫܗ .
Genesis 44:31 ܘܡܐ ܕܚ̣ܙܐ ܕܠܝܬ ܛܠܝܐ ܥܡܢ ܡܐ̇ܬ . ܘܡܚܬܝܢ ܥܒ̈ܕܝܟ ܣܝܒܘܬܗ ܕܥܒ̣ܕܟ ܐܒܘܢ ܒܕܘܘܐܢܐ ܠܫܝܘܠ .
Genesis 44:32 ܡܛܠ ܕܥܒ̣ܕܟ ܥ̣ܪܒ ܒܛܠܝܐ ܡܢ ܠܘܬ ܐܒܘܢ . ܘܐܡ̇ܪܬ . ܐܢ ܠܐ ܐܝܬܝܘܗܝ ܠܟ ܐܚܛܐ ܠܐܒܝ ܟܠܗܘܢ ܝܘܡ̈ܬܐ .
Genesis 44:33 ܘܗܫܐ ܢܦܘܫ ܥܒ̣ܕܟ ܚܠܦ ܛܠܝܐ ܥܒ̣ܕܐ ܠܡܪܝ . ܘܛܠܝܐ ܢܣܩ ܥܡ ܐܚ̈ܘܗܝ .
Genesis 44:34 ܡܛܠ ܕܐܝܟܢܐ ܐܣܩ ܠܘܬ ܐܒܝ . ܘܛܠܝܐ ܠܐ ܗܘܐ ܥܡܝ . ܕܠܡܐ ܐܚܙܐ ܒܒܝܫܬܐ ܕܬܓ̣ܕܫ ܠܐܒܝ .
Genesis 45:1 ܘܠܐ ܐܫܟܚ ܝܘܣܦ ܠܡܚܡܣܢܘ ܡܢ ܟܠ ܕܩܝܡܝܢ ܗܘܘ ܩܕܡܘܗܝ . ܘܐܡܪ ܐܦܩܘ ܠܟܠܢܫ ܡܢ ܠܘܬܝ . ܘܠܐ ܩܘܝ ܐܢܫ ܠܘܬܗ . ܟܕ ܐܬܓܠܝ ܝܘܣܦ ܠܐܚ̈ܘܗܝ .
Genesis 45:2 ܘܐܪܝܡ ܩܠܗ ܒܒܟܬܐ . ܘܫܡܥܘ ܡܨܪ̈ܝܐ . ܘܐܫܬܡܥ ܒܝܬ ܦܪܥܘܢ .
Genesis 45:3 ܘܐܡ̣ܪ ܝܘܣܦ ܠܐܚ̈ܘܗܝ . ܐܢܐ ܐܢܐ ܝܘܣܦ ܐܚܘܟܘܢ . ܥܕܟܝܠ ܐܒܝ ܚܝ ܗܘ . ܘܠܐ ܐܫܟܚܘ ܐܚ̈ܘܗܝ ܠܡܬܠ ܠܗ ܦܬܓܡܐ . ܡܛܠ ܕܕܚܠܘ ܡܢ ܩܕܡܘܗܝ .
Genesis 45:4 ܘܐܡ̣ܪ ܝܘܣܦ ܠܐܚ̈ܘܗܝ . ܩܪܘܒܘ ܠܘܬܝ . ܘܩܪܒܘ ܠܘܬܗ . ܘܐܡ̣ܪ ܠܗܘܢ . ܐܢܐ ܐܢܐ ܝܘܣܦ ܐܚܘܟܘܢ ܕܙܒܢܬܘܢܢܝ ܠܡܨܪ̈ܝܐ .
Genesis 45:5 ܘܗܫܐ ܠܐ ܬܟܪܐ ܠܟܘܢ . ܘܠܐ ܢܬܐܒܫ ܒܥܝܢ̈ܝܟܘܢ ܕܙܒܢܬܘܢܢܝ ܠܗܪܟܐ . ܡܛܠ ܕܠܬܘܪܣܝܐ ܗܘ ܫܕܪܢܝ ܐܠܗܐ ܩܕܡܝܟܘܢ .
Genesis 45:6 ܡܛܠ ܕܗܐ ܬܪ̈ܬܝܢ ܫ̈ܢܝܢ ܟܦܢܐ ܒܓܘܗ̇ ܕܐܪܥܐ . ܘܬܘܒ ܚܡܫ ܫܢܝ̈ܢ ܕܠܝܬ ܕܙܪܥ̇ ܘܕܚ̇ܨܕ .
Genesis 45:7 ܘܫܕܪܢܝ ܐܠܗܐ ܩܕܡܝܟܘܢ ܠܡܣܡ ܠܟܘܢ ܫܪܟܢܐ . ܘܠܡܚܝܘ ܠܟܘܢ ܡܫܘܙܒܘܬܐ ܪܒܬܐ ܒܐܪܥܐ .
Genesis 45:8 ܘܗܫܐ ܠܐ ܗܘ̣ܐ ܐܢܬܘܢ ܫܕܪܬܘܢܢܝ ܠܗܪܟܐ . ܐܠܐ ܐܠܗܐ . ܘܥܒܕܢܝ ܐܒܐ ܠܦܪܥܘܢ . ܘܡܪܐ ܥܠ ܟܠܗ ܒܝܬܗ . ܘܫܠܝܛܐ ܒܟܠܗ̇ ܐܪܥܐ ܕܡܨܪܝܢ .
Genesis 45:9 ܒܥܓܠ ܣܩܘ ܠܘܬ ܐܒܝ ܘܐܡܪܘ ܠܗ . ܗܟܢܐ ܐܡ̇ܪ ܒܪܟ ܝܘܣܦ . ܥܒܕܢܝ ܐܠܗܐ ܡܪܐ ܥܠ ܟܠܗ̇ ܡܨܪܝܢ . ܚܘܬ ܠܘܬܝ ܘܠܐ ܬܫܬܘܚܪ .
Genesis 45:10 ܘܬܒ ܒܐܪܥܐ ܕܓܫܢ . ܘܗܘ̣ܝܬ ܩܪܝܒ ܠܝ ܐܢܬ ܘܒ̈ܢܝܟ ܘܒ̈ܢܝ ܒܝܬܟ . ܘܥܢܟ ܘܬܘܪ̈ܝܟ ܘܟܠ ܕܐܝܬ ܠܟ .
Genesis 45:11 ܘܐܬܪܣܝܟܘܢ ܬܡܢ ܡܛܠ ܕܬܘܒ ܚܡܫ ܫ̈ܢܝܢ ܩ̇ܝܡ ܟܦܢܐ . ܕܠܡܐ ܬܐܒܕ ܐܢܬ ܘܒܝܬܟ ܘܟܠ ܕܐܝܬ ܠܟ .
Genesis 45:12 ܘܗܐ ܥܝܢ̈ܝܟܘܢ ܚ̈ܙܝܢ ܘܥܝܢ̈ܘܗܝ ܕܐܚܝ ܒܢܝܡܝܢ . ܕܦܘܡܝ ܡܡܠܠ ܥܡܟܘܢ .
Genesis 45:13 ܘܚܘܘ ܠܐܒܝ ܟܠܗ ܐܝܩܪܝ ܕܒܡܨܪܝܢ . ܘܟܠ ܕܚܙܝܬܘܢ . ܘܣܪܗܒܘ ܐܚܬܘ ܠܐܒܝ ܠܗܪܟܐ .
Genesis 45:14 ܘܢܦ̣ܠ ܥܠ ܨܘܪܗ ܕܒܢܝܡܝܢ ܐܚܘܗܝ ܘܒܟ̣ܐ . ܘܒܢܝܡܝܢ ܒܟ̣ܐ ܥܠ ܨܘܪܗ .
Genesis 45:15 ܘܢܫ̇ܩ ܠܟܠܗܘܢ ܐܚ̈ܘܗܝ ܘܒܟ̣ܐ ܥܠܝܗܘܢ . ܘܒܬܪܟܢ ܡܠܠܘ ܐ̈ܚܘܗܝ ܥܡܗ .
Genesis 45:16 ܘܩܠܐ ܐܫܬܡܥ ܒܝܬ ܦܪܥܘܢ ܕܐܡܪܝܢ . ܐܬܘ ܐ̈ܚܘܗܝ ܕܝܘܣܦ . ܘܫ̣ܦܪ ܦܬܓܡܐ ܒܥܝܢ̈ܝ ܦܪܥܘܢ ܘܒܥܝܢ̈ܝ ܥܒ̣̈ܕܘܗܝ .
Genesis 45:17 ܘܐܡ̣ܪ ܦܪܥܘܢ ܠܝܘܣܦ . ܐܡ̣ܪ ܠܐ̈ܚܝܟ ܗܟܢܐ ܥܒܕܘ . ܐܛܥܢܘ ܒܥܝܪܟܘܢ ܥܒܘܪܐ . ܘܙܠܘ ܐܘܒܠܘ ܠܐܪܥܐ ܕܟܢܥܢ .
Genesis 45:18 ܘܕܒ̣ܪܘ ܠܐܒܘܟܘܢ ܘܠܐܢܫ̈ܝ ܒܬ̈ܝܟܘܢ ܘܐܝܬܘ ܠܘܬܝ . ܘܐܬܠ ܠܟܘܢ ܛܘܒܗ̇ ܕܐܪܥܐ ܕܡܨܪܝܢ . ܘܐܟܘܠܘ ܫܘܡܢܗ̇ ܕܐܪܥܐ .
Genesis 45:19 ܘܐܢܬ ܗܐ ܡܫܠܛ ܐܢܬ . ܐܡ̣ܪ ܠܐ̈ܚܝܟ ܗܟܢܐ ܥܒܕܘ . ܕܒܪܘ ܠܟܘܢ ܡܢ ܐܪܥܐ ܕܡܨܪܝܢ ܥ̈ܓܠܬܐ ܠܢܫ̈ܝܟܘܢ ܘܠܝܩܪܬܟܘܢ . ܘܫܩܘܠܘ ܠܐܒܘܟܘܢ ܘܬܘ .
Genesis 45:20 ܘܥܝܢ̈ܝܟܘܢ ܠܐ ܢܚܘܣܢ ܥܠ ܡܐ̈ܢܝܟܘܢ . ܡܛܠ ܕܛܘܒܐ ܕܟܠܗ̇ ܐܪܥܐ ܕܡܨܪܝܢ ܕܝܠܟܘܢ ܗܘ .
Genesis 45:21 ܘܥܒܕܘ ܗܟܢܐ ܒܢ̈ܝ ܐܝܣܪܝܠ . ܘܝܗ̣ܒ ܠܗܘܢ ܝܘܣܦ ܥ̈ܓܠܬܐ ܥܠ ܡܠܬ ܦܘܡܗ ܕܦܪܥܘܢ . ܘܝܗ̣ܒ ܠܗܘܢ ܙܘ̈ܕܐ ܠܐܘܪܚܐ .
Genesis 45:22 ܠܟܠܗܘܢ ܘܝܗ̣ܒ ܠܟܠ ܓܒܪ ܙܘܓܐ ܕܢܚ̈ܬܐ . ܘܠܒܢܝܡܝܢ ܝܗ̣ܒ ܬܠܬܡܐܐ ܕܟܣܦܐ . ܘܚܡܫܐ ܙܘ̈ܓܝܢ ܕܢܚ̈ܬܐ .
Genesis 45:23 ܘܠܐܒܘܗܝ ܫܕܪ ܗܟܢܐ ܘܥܣܪܐ ܚܡܪ̈ܝܢ . ܟܕ ܛܥܝܢ̈ܝܢ ܡܢ ܛܘܒܗ̇ ܕܐܪܥܐ ܕܡܨܪܝܢ . ܘܥܣܪ ܐܬܢܝ̈ܢ ܛܥܝܢ̈ܢ ܥܒܘܪܐ ܘܚܡܪܐ ܘܙܘ̈ܕܐ ܠܐܒܘܗܝ ܠܐܘܪܚܐ .
Genesis 45:24 ܘܫܕܪ ܐܢܘܢ ܘܐܙܠܘ . ܘܐܡ̣ܪ ܠܗܘܢ ܠܐ ܬܨܘܢ ܒܐܘܪܚܐ .
Genesis 45:25 ܘܣܠܩܘ ܡܢ ܡܨܪܝܢ . ܘܐܬܘ ܠܐܪܥܐ ܕܟܢܥܢ ܠܘܬ ܝܥܩܘܒ ܐܒܘܗܘܢ .
Genesis 45:26 ܘܚܘܝܘܗܝ ܘܐܡܪܘ ܠܗ . ܥܕܟܝܠ ܝܘܣܦ ܚܝ . ܘܗܘܝܘ ܫܠܝܛ ܒܟܠܗ̇ ܐܪܥܐ ܕܡܨܪܝܢ . ܘܐܗܡܝ ܒܠܒܗ ܡܛܠ ܕܠܐ ܗܝܡܢ ܐܢܘܢ .
Genesis 45:27 ܘܚܘܝܘܗܝ ܟܠܗܝܢ ܡ̈ܠܐ ܕܐܡ̣ܪ ܠܗܘܢ ܝܘܣܦ . ܘܚ̣ܙܐ ܝܥܩܘܒ ܥ̈ܓܠܬܐ ܕܫܕܪ ܝܘܣܦ ܠܡܫܩܠܗ . ܘܐܬܢܝܚܬ ܪܘܚܗ ܕܝܥܩܘܒ ܐܒܘܗܘܢ .
Genesis 45:28 ܘܐܡ̣ܪ ܪܒܐ ܗܝ ܠܝ ܗܕܐ ܕܥܕܟܝܠ ܝܘܣܦ ܒܪܝ ܚܝ . ܐܙܠ ܐܚܙܝܘܗܝ ܥܕܠܐ ܐܡܘܬ .
Genesis 46:1 ܘܫܩ̣ܠ ܐܝܣܪܝܠ ܗ̣ܘ ܘܟܘܠ ܕܐܝܬ ܠܗ ܘܐܬ̣ܐ ܠܒܪܫܒܥ . ܘܕܒ̣ܚ ܕܒܚܬܐ ܠܐܠܗܐ ܕܐܒܘܗܝ ܐܝܣܚܩ .
Genesis 46:2 ܘܐܡ̣ܪ ܐܠܗܐ ܠܐܝܣܪܝܠ ܒܚܙܘܐ ܕܠܠܝܐ . ܘܐܡ̣ܪ ܝܥܩܘܒ ܝܥܩܘܒ . ܘܐܡ̣ܪ ܗܐ ܐܢܐ .
Genesis 46:3 ܘܐܡ̣ܪ ܠܗ . ܐܢܐ ܐܢܐ ܐܝܠ ܐܠܗܗ ܕܐܒܘܟ . ܠܐ ܬܕܚܠ ܠܡܚܬ ܠܡܨܪܝܢ . ܡܛܠ ܕܠܥܡܐ ܪܒܐ ܐܥܒܕܟ ܬܡܢ .
Genesis 46:4 ܐܢܐ ܐܚܘܬ ܥܡܟ ܘܐܢܐ ܐܣܩܟ . ܘܝܘܣܦ ܢܣܝܡ ܐ̈ܝܕܘܗܝ ܥܠ ܥܝܢ̈ܝܟ .
Genesis 46:5 ܘܩܡ ܝܥܩܘܒ ܡܢ ܒܪܫܒܥ . ܘܫܩ̣ܠܘ ܒܢ̈ܝ ܐܝܣܪܝܠ ܠܝܥܩܘܒ ܐܒܘܗܘܢ ܘܠܝܩܪܬܗܘܢ ܘܠܢܫܝ̈ܗܘܢ . ܒ̈ܥܓܠܬܐ ܕܫܕܪ ܦܪܥܘܢ ܠܡܫܩܠܗ .
Genesis 46:6 ܘܕܒܪܘ ܒܥܝܪܗܘܢ ܘܩܢܝܢܗܘܢ ܕܩܢܘ ܒܐܪܥܐ ܕܟܢܥܢ . ܘܐܬܘ ܠܡܨܪܝܢ . ܝܥܩܘܒ ܘܟܠܗ ܙܪܥܗ ܥܡܗ .
Genesis 46:7 ܒܢ̈ܘܗܝ ܘܒܢ̈ܝ ܒܢ̈ܘܗܝ ܥܡܗ . ܒܢ̈ܬܗ ܘܒܢ̈ܬ ܒܢ̈ܘܗܝ . ܘܟܠܗ ܙܪܥܗ ܐܥܠ ܥܡܗ ܠܡܨܪܝܢ .
Genesis 46:8 ܘܗܠܝܢ ܫܡ̈ܗܐ ܕܒܢ̈ܝ ܐܝܣܪܝܠ ܕܥܠܘ ܠܡܨܪܝܢ . ܝܥܩܘܒ ܘܒܢ̈ܘܗܝ . ܒܘܟܪܗ ܕܝܥܩܘܒ ܪܘܒܝܠ .
Genesis 46:9 ܒܢ̈ܝ ܪܘܒܝܠ . ܚܢܘܟ ܘܦܠܘ . ܘܚܨܪܘܢ ܘܟܪܡܝ .
Genesis 46:10 ܘܒܢ̈ܝ ܫܡܥܘܢ . ܝܡܘܐܝܠ ܘܝܡܝܢ . ܘܐܗܪ ܘܝܟܝܢ . ܘܨܚܪ ܘܫܐܘܠ ܒܪ ܟܢܥܢܝܬܐ .
Genesis 46:11 ܘܒܢܝ̈ ܠܘܝ . ܓܪܫܘܢ ܘܩܗܬ ܘܡܪܪܝ .
Genesis 46:12 ܘܒܢ̈ܝ ܝܗܘܕܐ . ܥܝܪ ܘܐܘܢܢ . ܘܫܠܐ ܘܦܪܨ ܘܙܪܚ . ܘܡܝܬܘ ܥܝܪ ܘܐܘܢܢ ܒܐܪܥܐ ܕܟܢܥܢ . ܘܗܘܘ ܒܢ̈ܝ ܦܪܨ . ܚܨܪܘܢ ܘܚܡܘܠ .
Genesis 46:13 ܘܒ̈ܢܝ ܐܝܣܟܪ . ܬܘܠܥ ܘܦܘܐܐ . ܘܐܘܝܒ ܘܫܡܪܘܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .