← All works
Peshitta Ezekiel Peshitta (Syriac Old Testament) · 1,271 sections
Single column Two columns
Ezekiel 32:17 ܒܫܢܬ ܚܕܥܣܪ̈ܐ ܒܚܡܫܥܣܪܐ ܒܝܪܚܐ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 32:18 ܒܪܢܫܐ ܐܠܝ ܐܘܠܝܬܐ ܥܠ ܚܝܠܗ̇ ܕܡܨܪܝܢ ܘܐܚܬܝܗܝ ܥܡܗ̇ ܠܒܝܬ ܥܡ̈ܡܐ ܥܫܝ̈ܢܐ ܠܐܪܥܐ ܬܚܬܝܬܐ ܥܡ ܢܚ̈ܬܝ ܓܘܒܐ
Ezekiel 32:19 ܡܢ ܡ̈ܝܐ ܒܣ̈ܝܡܐ ܚܘܬ ܘܕܡܟ ܥܡ ܥܘܪ̈ܠܐ
Ezekiel 32:20 ܘܥܡ ܩ̈ܛܝܠܝ ܣܝܦܐ ܢܦܠܘܢ ܘܢܢܥܓܘܢܗ ܘܠܟܠܗ ܚܝܠܗ
Ezekiel 32:21 ܢܡܠܠܘܢ ܥܡ ܓܕܘܕܝ̈ܗܘܢ ܫ̈ܠܝܛܢܐ ܕܥܡ̈ܡܐ ܡܢ ܓܘ ܫܝܘܠ ܘܢܚܬܘܢ ܘܢܫܟܒܘܢ ܥܘܪ̈ܠܐ ܥܡ ܩ̈ܛܝܠܝ ܣܝܦܐ
Ezekiel 32:22 ܬܡܢ ܐܬܘܪ ܘܟܠܗ ܟܢܫܗ̇ ܚܕܪ ܩܒܪܗ ܟܠܗܘܢ ܩ̈ܛܝܠܐ ܕܢܦܠܘ ܒܣܝܦܐ
Ezekiel 32:23 ܕܥܒܕܘ ܩܒܪܗ ܒܫ̈ܦܘܠܝ ܓܘܒܐ ܘܗܘܐ ܟܢܫܗ ܚܕܪ ܩܒܪܗ ܟܠܗܘܢ ܩܛܝ̈ܠܐ ܕܢܦܠܘ ܒܣܝܦܐ ܥܠ ܕܥܒܕܘ ܬܒܪܐ ܒܐܪܥܐ ܕܚ̈ܝܐ
Ezekiel 32:24 ܬܡܢ ܥܝܠܡ ܘܟܠܗ ܚܝܠܗ̇ ܚܕܪ ܩܒܪܗ ܟܠܗܘܢ ܩ̈ܛܝܠܐ ܕܢܦܠܘ ܒܣܝܦܐ ܘܢܚܬܘ ܥܘܪ̈ܠܐ ܠܐܪܥܐ ܬܚܬܝܬܐ ܥܠ ܕܥܒܕܘ ܬܒܪܐ ܒܐܪܥܐ ܕܚ̈ܝܐ ܘܩܒܠܘ ܨܥܪܗܘܢ ܥܡ ܢܚ̈ܬܝ ܓܘܒܐ
Ezekiel 32:25 ܘܒܝܢܬ ܩ̈ܛܝܠܐ ܥܒܕܘ ܠܗ ܡܫܟܒܐ ܡܨܥܬ ܚܝܠܗ ܘܚܕܝܪ̈ܝܢ ܠܩܒܪܗ ܟܘܠܗܘܢ ܥܘܪ̈ܠܐ ܕܩ̈ܛܝܠܝܢ ܒܣܝܦܐ ܥܠ ܕܥܒܕܘ ܬܒܪܐ ܒܐܪܥܐ ܕܚܝ̈ܐ ܘܩܒܠܘ ܨܥܪܗܘܢ ܥܡ ܢܚ̈ܬܝ ܓܘܒܐ ܘܒܝܢܬ ܩ̈ܛܝܠܐ ܐܬܚܫܒܘ
Ezekiel 32:26 ܬܡܢ ܡܫܟ ܘܬܘܒܝܠ ܘܟܘܠܗ ܚܝܠܗ̇ ܚܕܪ ܩܒܪܗ ܟܘܠܗܘܢ ܥܘܪ̈ܠܐ ܕܩܛܝ̈ܠܝܢ ܒܣܝܦܐ ܥܠ ܕܥܒܕܘ ܬܒܪܐ ܒܐܪܥܐ ܕܚܝ̈ܐ
Ezekiel 32:27 ܠܐ ܢܫܟܒܘܢ ܥܡ ܓܢܒܪ̈ܐ ܕܢܦܠܝܢ ܡܢ ܥܘܪ̈ܠܐ ܕܢܚܬܘ ܠܫܝܘܠ ܒܡܐ̈ܢܝ ܩܪܒܗܘܢ ܘܣܡܘ ܣܝ̈ܦܝܗܘܢ ܬܚܝܬ ܪ̈ܝܫܝܗܘܢ ܘܗܘܐ ܥܘ̣ܠܗܘܢ ܥܠ ܓܪ̈ܡܝܗܘܢ ܥܠ ܕܥܒܕܘ ܒܓܢܒܪܘܬܗܘܢ ܬܒܪܐ ܒܐܪܥܐ ܕܚܝ̈ܐ
Ezekiel 32:28 ܐܢܬ ܕܝܢ ܒܝܢܬ ܥܘܪ̈ܠܐ ܬܫܟܒ ܘܬܕܡܟ ܥܡ ܩ̈ܛܝܠܝ ܣܝܦܐ
Ezekiel 32:29 ܬܡܢ ܐܕܘܡ ܘܡ̈ܠܟܝܗ̇ ܘܟܠܗܘܢ ܪ̈ܘܪܒܢܝܗ̇ ܕܐܬܚܫܒܘ ܒܓܢܒܪܘܬܗܘܢ ܥܡ ܩ̈ܛܝܠܝ ܣܝܦܐ ܥܡ ܥܘܪ̈ܠܐ ܢܕܡܟܘܢ ܘܥܡ ܢܚ̈ܬܝ ܓܘܒܐ
Ezekiel 32:30 ܬܡܢ ܫ̈ܠܝܛܢܐ ܕܓܪܒܝܐ ܘܟܠܗܘܢ ܨܝ̈ܕܢܝܐ ܕܢܚܬܘ ܥܡ ܩ̈ܛܝܠܝ ܣܝܦܐ ܟܕ ܒܗܬܘ ܘܐܬܬܒܪܘ ܡܢ ܓܢܒܪܘܬܗܘܢ ܘܕܡܟܘ ܥܘܪ̈ܠܐ ܥܡ ܩ̈ܛܝܠܝ ܣܝܦܐ ܘܩܒܠܘ ܒܗܬܬܗܘܢ ܥܡ ܢܚ̈ܬܝ ܓܘܒܐ
Ezekiel 32:31 ܠܗܠܝܢ ܢܚܙܐ ܦܪܥܘܢ ܘܢܬܒܝܐ ܥܠ ܟܠܗ ܚܝܠܗ ܩ̈ܛܝܠܝ ܣܝܦܐ ܦܪܥܘܢ ܗܘ ܘܟܠܗ ܚܝܠܗ ܐܡ̇ܪ ܡܪܐ ܡܪ̈ܘܬܐ
Ezekiel 32:32 ܥܒ̇ܕܬ ܓܝܪ ܬܒܪܗ ܒܐܪܥܐ ܕܚ̈ܝܐ ܘܐܕܡ̇ܟܬܗ ܒܝܢܬ ܥܘܪ̈ܠܐ ܥܡ ܩ̈ܛܝܠܝ ܣܝܦܐ ܦܪܥܘܢ ܗܘ ܘܟܠܗ ܚܝܠܗ ܐܡ̇ܪ ܡܪܐ ܡܪ̈ܘܬܐ
Ezekiel 33:1 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 33:2 ܒܪܢܫܐ ܡܠܠ ܥܡ ܒܢ̈ܝ ܥܡܟ ܘܐܡܪ ܠܗܘܢ ܐܪܥܐ ܡܐ ܕܡܝ̇ܬܐ ܐܢܐ ܥܠܝܗ̇ ܚܪܒܐ ܢܕܒܪܘܢ ܥܡܐ ܕܐܪܥܐ ܓܒܪܐ ܚܕ ܡܢܗܘܢ ܘܢܥܒܕܘܢܗ ܠܗܘܢ ܕܘܩܐ
Ezekiel 33:3 ܘܡܐ ܕܚܙܐ ܚܪܒܐ ܕܐܬ̇ܝܐ ܥܠܝܗܘܢ ܢܩܪܐ ܒܩܪܢܐ ܘܢܙܗܪ ܠܥܡܐ
Ezekiel 33:4 ܘܡ̇ܢ ܕܫܡ̇ܥ ܩܠܐ ܕܩܪܢܐ ܘܠܐ ܡܙܕܗܪ ܘܐܬ̇ܝܐ ܚܪܒܐ ܘܢܣ̇ܒܐ ܠܗ ܕܡܗ ܒܪܝܫܗ
Ezekiel 33:5 Ezekiel 33:6 ܕܘܩܐ ܕܝܢ ܡܐ ܕܚܙܐ ܚܪܒܐ ܕܐܬ̇ܝܐ ܘܠܐ ܩܪܐ ܒܩܪܢܐ ܘܠܥܡܐ ܠܐ ܙܗܪ ܘܐܬܬ ܚܪܒܐ ܘܢܣܒܬ ܡܢܗܘܢ ܢܦܫܐ ܗ̇ܝ ܢܦܫܐ ܒܚ̈ܛܗܝܗ̇ ܐܬܢܣܒܬ ܘܕܡܗ̇ ܡܢ ܐ̈ܝܕܘܗܝ ܕܕܘܩܐ ܐܬܒܥ
Ezekiel 33:7 ܐܢܬ ܕܝܢ ܒܪ ܐܢܫܐ ܕܘܩܐ ܝܗ̇ܒܬܟ ܠܕܒܝܬ ܐܝܣܪܝܠ ܕܬܫܡܥ ܡܢ ܦܘܡܝ ܡܠܬܐ ܘܬܙܗܪ ܐܢܘܢ ܡܢܝ
Ezekiel 33:8 ܡܐ ܕܐܡ̇ܪܬ ܠܥܘ̇ܠܐ ܕܡܡܬ ܬܡܘܬ ܘܠܐ ܐܡ̣ܪܬ ܠܗ ܠܥܘ̇ܠܐ ܕܢܙܕܗܪ ܡܢ ܐܘܪܚܗ ܗ̇ܘ ܥܘ̇ܠܐ ܒܥܘ̣ܠܗ ܢܡܘܬ ܘܕܡܗ ܡܢ ܐ̈ܝܕܝܟ ܐܬܒܥ
Ezekiel 33:9 ܐܢܬ ܕܝܢ ܐܢ ܙܗܪܬܝܗܝ ܠܥܘ̇ܠܐ ܕܢܗܦܘܟ ܡܢ ܐܘܪܚܗ ܘܠܐ ܗܦܟ ܗܘ ܒܥܘ̣ܠܗ ܢܡܘܬ ܘܐܢܬ ܢܦܫܟ ܦܨܝܬ
Ezekiel 33:10 ܐܢܬ ܕܝܢ ܒܪܢܫܐ ܐܡܪ ܠܕܒܝܬ ܐܝܣܪܝܠ ܗܟܢܐ ܐܡܪܬܘܢ ܕܥܘ̣ܠܢ ܘܚ̈ܛܗܝܢ ܥܠܝܢ ܐܢܘܢ ܘܒܗܘܢ ܡܬܡܣܝܢܢ ܐܝܟܢܐ ܚܐ̇ܝܢ ܚܢܢ
Ezekiel 33:11 ܐܡܪ ܠܗܘܢ ܚܝ ܐܢܐ ܐܡ̇ܪ ܡܪܐ ܡܪ̈ܘܬܐ ܕܠܐ ܨ̇ܒܐ ܐܢܐ ܒܡܘܬܗ ܕܥܘ̇ܠܐ ܐܠܐ ܕܢܬܘܒ ܥܘ̇ܠܐ ܡܢ ܥܘ̣ܠܗ ܘܢܚܐ ܬܘܒܘ ܘܐܬܦܢܘ ܡܢ ܐܘܪ̈ܚܬܟܘܢ ܒܝ̈ܫܬܐ ܘܠܐ ܬܡܘܬܘܢ ܕܒܝܬ ܐܝܣܪܝܠ
Ezekiel 33:12 ܐܢܬ ܕܝܢ ܒܪܢܫܐ ܐܡܪ ܠܒ̈ܢܝ ܥܡܟ ܙܕܝܩܘܬܗ ܕܙܕܝܩܐ ܠܐ ܡܦܨܝܐ ܠܗ ܒܝܘܡܐ ܕܚܛ̇ܐ ܘܥܘ̇ܠܐ ܠܐ ܡܬܬܩܠ ܒܥܘ̣ܠܗ ܒܝܘܡܐ ܕܡܬܦܢܐ ܡܢ ܥܘ̣ܠܗ ܘܙܕܝܩܐ ܠܐ ܚܝ̇ܐ ܒܝܘܡܐ ܕܚܛ̇ܐ
Ezekiel 33:13 ܡܐ ܕܐܡ̇ܪܬ ܠܙܕܝܩܐ ܕܡܚܐ ܢܚܐ ܘܐܬܬܟܠ ܥܠ ܙܕܝܩܘܬܗ ܘܒܬܪܟܢ ܥܒܕ ܥܘ̣ܠܐ ܟܘܠܗ̇ ܙܕܝܩܘܬܗ ܕܥܒܕ ܠܐ ܬܬܕܟܪ ܠܗ ܐܠܐ ܒܥܘ̣ܠܐ ܕܥܒܕ ܢܡܘܬ
Ezekiel 33:14 ܘܡܐ ܕܐܡ̇ܪܬ ܠܥܘ̇ܠܐ ܕܡܡܬ ܬܡܘܬ ܘܢܗܦܘܟ ܡܢ ܚ̈ܛܗܘܗܝ ܘܢܥܒܕ ܕܝܢܐ ܘܙܕܝܩܘܬܐ
Ezekiel 33:15 ܘܡܫܟܢܐ ܕܢܣܒ ܢܦܢܐ ܘܡܕܡ ܕܛܠܡ ܢܦܪܘܥ ܘܒܦܘ̈ܩܕܢܐ ܕܚ̈ܝܐ ܢܗܠܟ ܘܠܐ ܢܥܒܕ ܥܘ̣ܠܐ ܡܚܐ ܢܚܐ ܘܠܐ ܢܡܘܬ
Ezekiel 33:16 ܘܚ̈ܛܗܐ ܟܠܗܘܢ ܕܥܒܕ ܠܐ ܢܬܕܟܪܘܢ ܠܗ ܐܠܐ ܒܕܝܢܐ ܘܒܙܕܝܩܘܬܐ ܕܥܒܕ ܢܚܐ
Ezekiel 33:17 ܘܐܡ̇ܪܝܢ ܒ̈ܢܝ ܥܡܟ ܠܐ ܫܦܝܪܐ ܐܘܪܚܗ ܕܡܪܝܐ ܐܘܪ̈ܚܬܗܘܢ ܗܘ ܕܝܠܗܘܢ ܠܐ ܫܦܝܪ̈ܢ
Ezekiel 33:18 ܘܟܕ ܢܗܦܘܟ ܙܕܝܩܐ ܡܢ ܙܕܝܩܘܬܗ ܘܢܥܒܕ ܥܘ̣ܠܐ ܒܥܘܠܗ ܢܡܘܬ
Ezekiel 33:19 ܘܟܕ ܢܗܦܘܟ ܥܘ̇ܠܐ ܡܢ ܥܘܠܘܬܗ ܘܢܥܒܕ ܕܝܢܐ ܘܙܕܝܩܘܬܐ ܒܗܘܢ ܢܚܐ
Ezekiel 33:20 ܘܐܡ̇ܪܝܢ ܐܢܬܘܢ ܠܐ ܫܦܝܪܐ ܐܘܪܚܗ ܕܡܪܝܐ ܐܢܫ ܐܝܟ ܐܘܪ̈ܚܬܗ ܐܕܘܢܟܘܢ ܒܝܬ ܐܝܣܪܝܠ
Ezekiel 33:21 ܒܫܢܬ ܚܕܥܣܪ̈ܐ ܒܚܡܫܬܐ ܒܝܪܚܐ ܕܥܣܪܐ ܕܫܒܝܬܢ ܐܬܐ ܠܘܬܝ ܕܐܬܦܨܝ ܡܢ ܐܘܪܫܠܡ ܘܐܡܪ ܠܝ ܐܬܚܪܒܬ ܡܕܝܢܬܐ
Ezekiel 33:22 ܘܥܕ ܠܐ ܢܐܬܐ ܠܘܬܝ ܗ̇ܘ ܕܐܬܦܨܝ ܗܘܬ ܐܝܕܗ ܕܡܪܝܐ ܥܠܝ ܒܪܡܫܐ ܘܦܬܚ ܦܘܡܝ ܥܕܡܐ ܕܐܬܐ ܠܘܬܝ ܗ̇ܘ ܕܐܬܦܨܝ ܒܨܦܪܐ ܘܟܕ ܐܬܦܬܚ ܦܘܡܝ ܬܘܒ ܠܐ ܐܬܬܚܕ
Ezekiel 33:23 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 33:24 ܒܪܢܫܐ ܐܝܠܝܢ ܕܥܡ̇ܪܝܢ ܒܚܪ̈ܒܬܐ ܗܠܝܢ ܕܐܪܥܐ ܕܐܝܣܪܝܠ ܐܡ̇ܪܝܢ ܐܒܪܗܡ ܕܚܕ ܗܘܐ ܝܪܬ ܐܪܥܐ ܚܢܢ ܕܣ̈ܓܝܐܐ ܚܢܢ ܠܐ ܝܪܬܝܢܢ ܠܗ̇
Ezekiel 33:25 ܡܛܠ ܗܢܐ ܐܡܪ ܠܗܘܢ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܡܐ ܐܟ̇ܠܝܢ ܐܢܬܘܢ ܘܥܝܢ̈ܝܟܘܢ ܠܦܬܟܪ̈ܝܟܘܢ ܡܪܝܡܝܢ ܐܢܬܘܢ ܘܕܡܐ ܫܬ̇ܝܢ ܐܢܬܘܢ ܘܨܒ̇ܝܢ ܐܢܬܘܢ ܠܡܐܪܬ ܐܪܥܐ
Ezekiel 33:26 ܩܝ̇ܡܝܢ ܐܢܬܘܢ ܥܠ ܣܝ̈ܦܝܟܘܢ ܘܥܒ̇ܕܝܢ ܐܢܬܘܢ ܛܢܦܘܬܐ ܘܐܢܫ ܐܢܬܬ ܚܒܪܗ ܡܛܢܦܝܢ ܐܢܬܘܢ ܘܨܒ̇ܝܢ ܐܢܬܘܢ ܠܡܐܪܬ ܐܪܥܐ
Ezekiel 33:27 ܐܡܪ ܠܗܘܢ ܗܟܢܐ ܐܡ̇ܪ ܡܪܐ ܡܪ̈ܘܬܐ ܚܝ ܐܢܐ ܕܟܠ ܕܒܚܪ̈ܒܬܐ ܐܢܘܢ ܒܚܪܒܐ ܢܦܠܘܢ ܘܟܠ ܕܒܚܩܠܐ ܡܐܟܘܠܬܐ ܠܚܝܘܬܐ ܐܬܠ ܐܢܘܢ ܘܟܘܠ ܕܒܦܥܪ̈ܐ ܘܒܡܥܪ̈ܐ ܒܡܘܬܢܐ ܢܡܘܬܘܢ
Ezekiel 33:28 ܘܐܥܒܕܝܗ̇ ܠܐܪܥܐ ܠܚܒܠܐ ܘܠܬܡܗܐ ܘܢܒܛܠ ܡܢܗ̇ ܫܘܒܚܐ ܕܥܘܫܢܗ̇ ܘܢܨܕܘܢ ܛܘܪ̈ܐ ܕܐܝܣܪܝܠ ܡܢ ܒܠܝ ܕܥܒܪ
Ezekiel 33:29 ܘܢܕܥܘܢ ܕܐܢܐ ܐܢܐ ܡܪܝܐ ܡܐ ܕܥܒ̇ܕܬܗ̇ ܠܐܪܥܐ ܠܚܒܠܐ ܘܠܬܡܗܐ ܡܛܠ ܟܠܗ̇ ܛܢܦܘܬܐ ܕܥܒܕܘ
Ezekiel 33:30 ܐܢܬ ܕܝܢ ܒܪܢܫܐ ܒ̈ܢܝ ܥܡܟ ܕܪܢ̇ܝܢ ܒܟ ܥܠ ܓܢܒ ܐ̈ܣܐ ܘܒܬܪ̈ܥܐ ܕܒ̈ܬܐ ܘܡܡܠܠܝܢ ܚܕ ܥܡ ܚܕ ܓܒܪܐ ܥܡ ܐܚܘܗܝ ܘܐܡ̇ܪܝܢ ܬܘ ܫܡܥܘ ܡܢܐ ܦܬܓܡܐ ܢܦܩ ܡܢ ܩܕܡ ܡܪܝܐ
Ezekiel 33:31 ܘܐܬ̇ܝܢ ܠܘܬܟ ܥܡܐ ܘܝܬ̇ܒܝܢ ܩܕܡܝܟ ܘܫܡ̇ܥܝܢ ܦܬ̈ܓܡܝܟ ܘܠܐ ܥܒ̇ܕܝܢ ܠܗܘܢ ܡܛܠ ܕܕܓܠܘܬܐ ܒܦܘܡܗܘܢ ܘܒܬܪ ܬܪ̈ܥܝܬܐ ܗܘ ܕܠܒܗܘܢ ܐܙ̇ܠܝܢ
Ezekiel 33:32 ܘܚܫܝܒ ܐܢܬ ܠܗܘܢ ܐܝܟ ܙܡܝܪܬܐ ܘܐܝܟ ܩܠܐ ܫܦܝܪܐ ܘܐܝܟ ܟܢܪܐ ܚܠܝܐ ܘܫܡ̇ܥܝܢ ܦܬ̈ܓܡܝܟ ܘܠܐ ܥܒ̇ܕܝܢ ܠܗܘܢ
Ezekiel 33:33 ܡܐ ܕܗܘܘ ܕܝܢ ܦܬܓܡ̈ܝܟ ܗܝܕܝܢ ܢܕܥܘܢ ܕܢܒܝܐ ܐܢܬ ܒܝܢܬܗܘܢ
Ezekiel 34:1 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 34:2 ܒܪ ܐܢܫܐ ܐܬܢܒܐ ܥܠ ܪ̈ܥܘܬܐ ܕܐܝܣܪܝܠ ܐܬܢܒܐ ܘܐܡܪ ܠܗܘܢ ܪ̈ܥܘܬܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܐܘ ܪ̈ܥܘܬܐ ܕܐܝܣܪܝܠ ܕܪܥ̇ܝܢ ܠܗܘܢ ܠܐ ܗܘܐ ܠܥܢܐ ܪܥ̇ܝܢ ܪ̈ܥܘܬܐ
Ezekiel 34:3 ܫܡܝ̈ܢܐ ܐܟ̇ܠܝܢ ܐܢܬܘܢ ܘܥܡ̇ܪܗܘܢ ܠܒ̇ܫܝܢ ܐܢܬܘܢ ܘܡ̈ܦܛܡܐ ܕܒ̇ܚܝܢ ܐܢܬܘܢ ܘܥܢܐ ܠܐ ܪܥ̇ܝܢ ܐܢܬܘܢ
Ezekiel 34:4 ܠܕܟܪܝܗܐ ܠܐ ܚܝܠܬܘܢ ܘܕܡܪܥܐ ܠܐ ܐܣܝܬܘܢ ܘܕܬܒܝܪܐ ܠܐ ܥܨܒܬܘܢ ܘܕܛܥܝܐ ܠܐ ܐܗܦܟܬܘܢ ܘܕܐܒܝܕܐ ܠܐ ܒܥܝܬܘܢ ܐܠܐ ܒܩܛܝܪܐ ܫܥܒܕܬܘܢ ܐ̈ܢܝܢ
Ezekiel 34:5 ܘܐܬܒܕܪ ܥܢܝ ܡܢ ܒܠܝ ܪܥܝ̇ܐ ܘܗ̈ܘܝ ܡܐܟܘܠܬܐ ܠܟܘܠܗ̇ ܚܝܘܬܐ ܕܕܒܪܐ
Ezekiel 34:6 ܘܛܥܬ ܥܢܝ ܒܟܠܗܘܢ ܛܘܪ̈ܐ ܘܥܠ ܟܘܠ ܪܡܬܐ ܕܪܡܐ ܘܒܟܠܗ̇ ܐܪܥܐ ܐܬܒܕܪܬ ܥܢܝ ܘܠܝܬ ܕܬܒ̇ܥ ܐܦ ܠܐ ܕܡܟܢܫ
Ezekiel 34:7 ܡܛܠ ܗܢܐ ܫܡܥܘ ܪ̈ܥܘܬܐ ܦܬܓܡܗ ܕܡܪܝܐ
Ezekiel 34:8 ܚܝ ܐܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܗܘܬ ܥܢܝ ܠܒܙܬܐ ܘܗܘܬ ܥܢܝ ܡܐܟܘܠܬܐ ܠܟܠܗ̇ ܚܝܘܬܐ ܕܕܒܪܐ ܡܢ ܒܠܝ ܪܥܝ̇ܐ ܘܠܐ ܪܥܘ ܪ̈ܥܘܬܐ ܠܥܢܝ ܐܠܐ ܪܥܘ ܪ̈ܥܘܬܐ ܢܦܫܗܘܢ ܘܠܥܢܝ ܠܐ ܪܥܘ
Ezekiel 34:9 ܡܛܠ ܗܢܐ ܪ̈ܥܘܬܐ ܫܡܥܘ ܦܬܓܡܗ ܕܡܪܝܐ
Ezekiel 34:10 ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠ ܪ̈ܥܘܬܐ ܘܐܬܒܥ ܥܢܝ ܒܐ̈ܝܕܝܗܘܢ ܘܐܒܛܠ ܐܢܘܢ ܕܠܐ ܢܪܥܘܢ ܬܘܒ ܠܥܢܝ ܘܐܦܨܐ ܠܥܢܝ ܡܢ ܦܘܡܗܘܢ ܘܬܘܒ ܠܐ ܢܗ̈ܘܝܢ ܠܗܘܢ ܠܡܐܟܘܠܬܐ
Ezekiel 34:11 ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܬܒ̇ܥ ܐܢܐ ܥܢܝ ܘܣܥ̇ܪ ܐܢܐ ܠܗܝܢ
Ezekiel 34:12 ܐܝܟ ܕܣܥ̇ܪ ܪܥ̇ܝܐ ܠܓܙܪܗ ܒܝܘܡܐ ܕܙܝܩܐ ܗܟܢܐ ܐܣܥܪܝܗ̇ ܠܥܢܝ ܘܐܟܢܫ ܐܢܘܢ ܡܢ ܟܘܠܗܘܢ ܐܬܪ̈ܘܬܐ ܕܐܬܒܕܪܘ ܒܗܘܢ ܒܝܘܡܐ ܕܥܢܢܐ ܘܕܥܪܦܠܐ
Ezekiel 34:13 ܘܐܦܩ ܐ̈ܢܝܢ ܡܢ ܥܡ̈ܡܐ ܘܐܟܢܫ ܐܢܝ̈ܢ ܡܢ ܡ̈ܕܝܢܬܐ ܘܐܝܬܐ ܐ̈ܢܝܢ ܠܐܪܥܗܝܢ ܘܐܪܥܐ ܐ̈ܢܝܢ ܒܛܘܪ̈ܐ ܕܐܝܣܪܝܠ ܘܒܢܚ̈ܠܐ ܘܒܟܠܗ ܝܬܒܐ ܕܐܪܥܐ
Ezekiel 34:14 ܒܝܬ ܪܥܝ̣ܐ ܛܒܐ ܐܪܥܐ ܐ̈ܢܝܢ ܘܒܛܘܪ̈ܐ ܪ̈ܡܐ ܕܐܝܣܪܝܠ ܢܗܘܐ ܕܝܪܗܝܢ ܬܡܢ ܢܪ̈ܒܥܢ ܒܕܝܪܐ ܛܒܐ ܘܪܥܝ̣ܐ ܫܡܝܢܐ ܢܪ̈ܥܝܢ ܒܛܘܪ̈ܐ ܕܐܝܣܪܝܠ
Ezekiel 34:15 ܐܢܐ ܐܪܥܐ ܠܥܢܝ . ܘܐܢܐ ܐܪܒܥ ܐ̈ܢܝܢ ܐܡ̇ܪ ܡܪܐ ܡܪ̈ܘܬܐ
Ezekiel 34:16 ܕܐܒܝܕܐ ܐܒܥܐ ܘܕܛܥܝܐ ܐܗܦܟ ܘܕܬܒܝܪܐ ܐܥܨܘܒ ܘܕܟܪܝܗܐ ܐܚܝܠ ܘܕܫܡܝܢܐ ܘܕܥܫܝܢܐ ܐܛܪ ܘܐܪܥܐ ܐ̈ܢܝܢ ܒܕܝܢܐ
Ezekiel 34:17 ܠܟܝܢ ܕܝܢ ܥܢܝ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܕܐ̇ܢ ܐܢܐ ܒܝܬ ܢܩܝܐ ܠܢܩܝܐ ܘܒܝܬ ܕܟܪܐ ܠܕܟܪܐ
Ezekiel 34:18 ܠܐ ܣ̇ܦܩ ܠܟܘܢ ܪ̈ܥܘܬܐ ܪܥܝ̣ܐ ܛܒܐ ܕܪܥ̇ܝܢ ܐܢܬܘܢ ܘܫܪܟܐ ܕܪܥܝܟܘܢ ܕܝܫ̇ܝܢ ܐܢܬܘܢ ܒܪ̈ܓܠܝܟܘܢ ܘܡ̈ܝܐ ܫܬ̇ܝܢ ܐܢܬܘܢ ܘܫܪܟܐ ܕܡܘܬܪܝܢ ܐܢܬܘܢ ܕܠܚ̇ܝܢ ܐܢܬܘܢ ܒܪ̈ܓܠܝܟܘܢ
Ezekiel 34:19 ܘܥܢܝ ܪ̈ܥܝ ܕܘܫܐ ܕܪ̈ܓܠܝܟܘܢ ܘܐܫܬܝ ܡ̈ܝܐ ܕܕܠܚ ܪ̈ܓܠܝܟܘܢ
Ezekiel 34:20 ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܕܐ̇ܢ ܐܢܐ ܒܝܬ ܢܩܝܐ ܫܡܝܢܬܐ ܠܢܩܝܐ ܡܚܝܠܬܐ
Ezekiel 34:21 ܥܠ ܕܣܚ̈ܦܢ ܗ̈ܘܝ ܒ̈ܓܒܝܗܝܢ ܘܒܟܬ̈ܦܬܗܝܢ ܘܒܩܪ̈ܢܬܗܝܢ ܡܕܩܪ̈ܢ ܗ̈ܘܝ ܠܟܠܗܝܢ ܟܪ̈ܝܗܬܐ ܥܕܡܐ ܕܒܕܪ ܐܢܝ̈ܢ ܠܒܪ
Ezekiel 34:22 ܘܐܦܪܩܝܗ̇ ܠܥܢܝ ܘܬܘܒ ܠܐ ܬܗܘܐ ܠܗܘܢ ܠܒܙܬܐ ܘܐܕܘܢ ܒܝܬ ܢܩܝܐ ܠܢܩܝܐ ܘܒܝܬ ܕܟܪܐ ܠܕܟܪܐ
Ezekiel 34:23 ܘܐܩܝܡ ܥܠܝܗܝܢ ܪܥ̇ܝܐ ܘܢܪܥܐ ܐ̈ܢܝܢ ܕܘܝܕ ܥܒ̣ܕܝ ܗܘ ܢܪܥܐ ܐ̈ܢܝܢ ܘܗܘ ܢܗܘܐ ܠܗܝܢ ܪܥ̇ܝܐ
Ezekiel 34:24 ܘܐܢܐ ܡܪܝܐ ܐܗܘܐ ܠܗܘܢ ܐܠܗܐ ܘܕܘܝܕ ܥܒ̣ܕܝ ܢܗܘܐ ܫܠܝܛܐ ܒܝܢܬܗܘܢ
Ezekiel 34:25 ܘܐܩܝܡ ܠܗܘܢ ܩܝܡܐ ܕܫܠܡܐ ܘܐܒܛܠ ܚܝܘܬܐ ܒܝܫܬܐ ܡܢ ܐܪܥܐ ܘܢܥܡܪܘܢ ܒܡܕܒܪܐ ܒܫܠܝܐ ܘܢܕܡܟܘܢ ܒܥܒܐ
Ezekiel 34:26 ܘܐܬܠ ܠܗܘܢ ܒܘܪܟܬܝ ܚܕܪ ܪܡܬܝ ܘܐܚܬ ܡܛܪܐ ܒܙܒܢܗ ܘܢܗܘܐ ܡܛܪܐ ܕܒܘܪܟܬܐ
Ezekiel 34:27 ܘܐܝ̈ܠܢܐ ܕܐܪܥܐ ܢܥܒܕܘܢ ܦܐܪ̈ܐ ܘܐܪܥܐ ܬܬܠ ܥ̈ܠܠܬܗ̇ ܘܢܬܒܘܢ ܒܐܪܥܗܘܢ ܒܣܒܪܐ ܘܢܕܥܘܢ ܕܐܢܐ ܐܢܐ ܡܪܝܐ ܡܐ ܕܬܒ̇ܪܬ ܢܝܪܗܘܢ ܘܦܨܝ̇ܬ ܐܢܘܢ ܡܢ ܐܝܕܐ ܕܡܫ̈ܥܒܕܢܝܗܘܢ
Ezekiel 34:28 ܘܬܘܒ ܠܐ ܢܗܘܘܢ ܒܙܬܐ ܠܥܡ̈ܡܐ ܐܦ ܠܐ ܬܐܟܘܠ ܐܢܘܢ ܚܝܘܬ ܒܪܐ ܘܢܬܒܘܢ ܒܣܒܪܐ ܘܠܐ ܢܗܘܐ ܠܗܘܢ ܡܗܪܢܐ
Ezekiel 34:29 ܘܐܩܝܡ ܠܗܘܢ ܢܨܒܬܐ ܕܫܠܡܐ ܘܬܘܒ ܠܐ ܢܫܬܢܩܘܢ ܒܟܦܢܐ ܒܐܪܥܐ ܘܬܘܒ ܠܐ ܢܩܒܠܘܢ ܚܣܕܐ ܕܥܡ̈ܡܐ
Ezekiel 34:30 ܘܢܕܥܘܢ ܕܐܢܐ ܐܢܐ ܡܪܝܐ ܐܠܗܗܘܢ ܘܗܢܘܢ ܐܢܘܢ ܥܡܝ ܕܒܝܬ ܐܝܣܪܝܠ ܐܡ̇ܪ ܡܪܐ ܡܪ̈ܘܬܐ
Ezekiel 34:31 ܐܢܬܝܢ ܕܝܢ ܥܢܝ ܥܢܐ ܕܡܪܥܝܬܝ ܒܢ̈ܝ ܐܢܫܐ ܐܢܬܝܢ ܘܐܢܐ ܐܢܐ ܡܪܝܐ ܐܠܗܟܝܢ ܐܡ̇ܪ ܡܪܐ ܡܪ̈ܘܬܐ
Ezekiel 35:1 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 35:2 ܒܪܢܫܐ ܣܝܡ ܐ̈ܦܝܟ ܠܛܘܪܐ ܕܣܥܝܪ ܘܐܬܢܒܐ ܥܠܘܗܝ
Ezekiel 35:3 ܘܐܡܪ ܠܗ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠܝܟ ܛܘܪܐ ܕܣܥܝܪ ܘܐܪܝܡ ܐܝܕܝ ܥܠܝܟ ܘܐܥܒܕܟ ܠܚܒܠܐ ܘܠܬܡܗܐ
Ezekiel 35:4 ܘܡܕܝ̈ܢܬܟ ܐܥܒܕ ܠܚܘܪܒܐ ܘܐܢܬ ܬܗܘܐ ܠܚܒܠܐ ܘܬܕܥ ܕܐܢܐ ܐܢܐ ܡܪܝܐ
Ezekiel 35:5 ܥܠ ܕܗܘܬ ܠܟ ܒܥܠܕܒܒܘܬܐ ܠܥܠܡ ܘܐܫܠܡܬ ܠܒܢ̈ܝ ܐܝܣܪܝܠ ܠܐܝܕܐ ܕܣܝܦܐ ܒܙܒܢܐ ܕܥܩܬܗܘܢ ܘܒܙܒܢܐ ܕܥܘ̣ܠܐ ܕܩܨܗܘܢ
Ezekiel 35:6 ܡܛܠ ܗܢܐ ܚܝ ܐܢܐ ܐܡ̇ܪ ܡܪܐ ܡܪ̈ܘܬܐ ܕܠܕܡܐ ܐܥܒܕܟ ܘܕܡܐ ܢܪܕܦܟ ܕܡܐ ܕܣܢܝܬ ܗܘ ܕܡܐ ܢܪܕܦܟ
Ezekiel 35:7 ܘܐܥܒܕܝܘܗܝ ܠܛܘܪܐ ܕܣܥܝܪ ܠܚܒܠܐ ܘܠܬܡܗܐ ܘܐܘܒܕ ܡܢܗ ܕܥܒ̇ܪ ܘܕܬܐ̇ܒ
Ezekiel 35:8 ܘܐܡܠܐ ܛܘܪ̈ܘܗܝ ܡܢ ܚܪ̈ܝܒܘܗܝ ܫܩ̈ܝܦܝܟ ܘܪ̈ܡܬܟ ܘܢܚ̈ܠܝܟ ܚܪ̈ܝܒܐ ܕܣܝܦܐ ܢܦܠܘܢ ܒܗܘܢ
Ezekiel 35:9 ܘܐܥܒܕܟ ܚܘܪܒܐ ܠܥܠܡ ܘܡܕܝ̈ܢܬܟ ܠܐ ܢܬܝ̈ܬܒܢ ܘܬܕܥ ܕܐܢܐ ܐܢܐ ܡܪܝܐ
Ezekiel 35:10 ܥܠ ܕܐܡܪܬ ܕܬܪ̈ܝܢ ܥܡ̈ܡܝܢ ܘܬܪ̈ܬܝܢ ܡ̈ܠܟܘܢ ܕܝܠܝ ܐ̈ܢܝܢ ܘܐܢܐ ܐܪܬ ܐ̈ܢܝܢ ܘܡܪܝܐ ܬܡܢ ܗܘܐ
Ezekiel 35:11 ܡܛܠ ܗܢܐ ܚܝ ܐܢܐ ܐܡ̇ܪ ܡܪܐ ܡܪ̈ܘܬܐ ܕܐܥܒܕ ܠܟ ܐܝܟ ܪܘܓܙܟ ܘܐܝܟ ܒܥܠܕܒܒܘܬܟ ܕܥܒܕܬ ܘܣܢܝܬ ܐܢܘܢ ܘܐܬܓܠܐ ܒܗܘܢ ܡܐ ܕܕܐ̇ܢ ܐܢܐ ܠܟ
Ezekiel 35:12 ܘܬܕܥ ܕܐܢܐ ܐܢܐ ܡܪܝܐ ܫ̇ܡܥܬ ܟܘܠܗ ܓܘܕܦܟ ܕܐܡܪܬ ܥܠ ܛܘܪ̈ܐ ܕܐܝܣܪܝܠ ܕܚܪܒܝܢ ܐܢܘܢ ܘܡܐܟܘܠܬܐ ܐܢܘܢ ܕܝܠܢ
Ezekiel 35:13 ܘܐܘܪܟܬܘܢ ܥܠܝ ܦܘܡܟܘܢ ܘܐܣܓܝܬܘܢ ܥܠܝ ܡ̈ܠܝܟܘܢ ܘܐܢܐ ܫܡܥ̇ܬ
Ezekiel 35:14 ܗܟܢܐ ܐܡ̇ܪ ܡܪܐ ܡܪ̈ܘܬܐ ܠܛܘܪܐ ܕܣܥܝܪ ܕܫܪܐ ܒܚܕܘܬܐ ܕܟܠܗ̇ ܐܪܥܐ ܠܚܒܠܐ ܐܥܒܕܟ
Ezekiel 35:15 ܥܠ ܕܚܕܝܬ ܠܝܪܬܘܬܐ ܕܒܝܬ ܐܝܣܪܝܠ ܕܚܪܒܬ ܗܟܢܐ ܐܥܒܕ ܠܟ ܠܚܒܠܐ ܬܗܘܐ ܛܘܪܐ ܕܣܥܝܪ ܘܐܕܘܡ ܟܠܗ̇ ܘܢܕܥܘܢ ܕܐܢܐ ܐܢܐ ܡܪܝܐ
Ezekiel 36:1 ܘܐܢܬ ܒܪ ܐܢܫܐ ܐܬܢܒܐ ܥܠ ܛܘܪ̈ܐ ܕܐܝܣܪܝܠ ܘܐܡܪ ܠܛܘܪ̈ܐ ܕܐܝܣܪܐܝܠ ܫܡܥܘ ܦܬܓܡܗ ܕܡܪܐ ܡܪ̈ܘܬܐ
Ezekiel 36:2 ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܐܡܪ ܥܠܝܟܘܢ ܒܥܠܕܒܒܐ ܐܚܢܝ ܘܐܡܪ ܕܪ̈ܡܬܐ ܕܡܢ ܥܠܡ ܕܝܠܢ ܐ̈ܢܝܢ ܝܘܪܬܢܐ
Ezekiel 36:3 ܡܛܠ ܗܢܐ ܐܬܢܒܐ ܘܐܡܪ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܐܨܛܥܪܬܘܢ ܘܐܬܚܪܒܬܘܢ ܘܐܬܓܕܦܬܘܢ ܡܢ ܐܝܠܝܢ ܕܚܕܝܪ̈ܝܢ ܠܟܘܢ ܘܗܘܝܬܘܢ ܝܘܪܬܢܐ ܠܫܪܟܐ ܕܥܡ̈ܡܐ ܘܢܦܠܬܘܢ ܒܡܡܠܠܐ ܕܠܫ̈ܢܐ ܘܒܪܢܝܐ ܕܥܡ̈ܡܐ
Ezekiel 36:4 ܡܛܠ ܗܢܐ ܫܡܥܘ ܦܬܓܡܗ ܕܡܪܐ ܡܪ̈ܘܬܐ ܛܘܪ̈ܐ ܕܐܝܣܪܐܝܠ ܗܟܢܐ ܐܡ̇ܪ ܡܪܐ ܡܪ̈ܘܬܐ ܠܛܘܪ̈ܐ ܘܠܪ̈ܡܬܐ ܘܠܢܚ̈ܠܐ ܘܠܥܘܡ̈ܩܐ ܘܠܚܪ̈ܒܬܐ ܕܨ̈ܕܝܢ ܘܠܡܕܝܢ̈ܬܐ ܕܐܫܬܒܩ ܘܗ̈ܘܝ ܠܒܙܬܐ ܘܠܡܘܝܩܐ ܠܫܪܟܐ ܕܥܡ̈ܡܐ ܕܚܕܝܪ̈ܝܢ ܠܗܘܢ
Ezekiel 36:5 ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܒܢܘܪܐ ܕܛܢܢܝ ܡܠ̇ܠܬ ܥܠ ܫܪܟܐ ܕܥܡ̈ܡܐ ܘܥܠ ܟܠܗ̇ ܐܕܘܡ ܥܠ ܕܥܒܕܘ ܠܗܘܢ ܐܪܥܝ ܠܝܘܪܬܢܐ ܒܚܕܘܬܐ ܕܠܒܗܘܢ ܨܥܪܘ ܢܦܫ̈ܬܐ ܕܢܫܒܘܢ ܐ̈ܢܝܢ ܘܢܒܙܘܢ ܐ̈ܢܝܢ
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .