← All works
Peshitta Ezekiel Peshitta (Syriac Old Testament) · 1,271 sections
Single column Two columns
Ezekiel 28:8 ܘܢܚܬܘܢܟ ܠܚܒܠܐ ܘܬܡܘܬ ܡܘܬܐ ܕܩ̈ܛܝܠܐ ܒܠܒܐ ܕܝܡ̈ܡܐ
Ezekiel 28:9 ܕܠܡܐ ܐܡ̇ܪ ܐܢܬ ܩܕܡ ܩܛܘ̈ܠܝܟ ܕܐܠܗܐ ܐܢܐ ܡܛܠ ܕܒܪܢܫܐ ܐܢܬ ܒܐܝܕܐ ܕܩ̈ܛܘܠܝܟ ܘܠܐ ܗܘܝܬ ܐܠܗܐ
Ezekiel 28:10 ܒܐܝܕܐ ܕܥܘܪ̈ܠܐ ܢܘܟܪ̈ܝܐ ܬܡܘܬ ܡܛܠ ܕܐܢܐ ܡܠ̇ܠܬ ܐܡ̇ܪ ܡܪܐ ܡܪ̈ܘܬܐ
Ezekiel 28:11 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 28:12 ܒܪ ܐܢܫܐ ܐܠܝ ܐܘܠܝܬܐ ܥܠ ܡܠܟܐ ܕܨܘܪ ܘܐܡܪ ܠܗ ܗܟܢܐ ܐܡ̇ܪ ܡܪܐ ܡܪ̈ܘܬܐ ܐܢܬ ܛܒܥܐ ܐܢܬ ܕܕܡܘܬܐ ܕܡܠܐ ܚܟܡܬܐ ܘܟܠܝܠܐ ܕܫܘܒܚܐ
Ezekiel 28:13 ܒܥܕܢ ܦܪܕܝܣܗ ܕܐܠܗܐ ܗܘܝܬ ܘܟܠܗܝܢ ܟܐ̈ܦܐ ܛܒ̈ܬܐ ܐܬܚܙܩܬ ܣܪܕܘܢ ܘܩܪܟܕܢܐ ܘܐܙܡܪܓܕܐ ܘܒܪܘܠܐ ܘܣܦܝܠܐ ܘܐܝܣܦܘܢ ܘܩܪܘܣܛܠܘܣ ܘܡܪ̈ܓܢܝܬܐ ܘܕܗܒܐ ܡܠܝܬ ܒܝܬ ܓܙܝ̈ܟ ܘܟܐ̈ܦܐ ܛܒ̈ܬܐ ܒܝܬ ܚ̈ܡܠܝܟ ܡܢ ܝܘܡܐ ܕܐܬܒܪܝܬ
Ezekiel 28:14 ܘܗܘܝܬ ܥܡ ܟܪܘܒܐ ܕܡܫܝܚ ܘܡܛܠ ܘܝܗܒ̇ܬܟ ܒܛܘܪܐ ܕܩܘܕܫܗ ܕܐܠܗܐ ܘܗܘܝܬ ܒܝܢܬ ܟܐ̈ܦܐ ܕܢܘܪܐ
Ezekiel 28:15 ܘܗܠܟܬ ܕܠܐ ܡܘܡ ܒܐܘܪ̈ܚܬܟ ܡܢ ܝܘܡܐ ܕܐܬܒܪܝܬ ܘܥܕܡܐ ܕܐܫܬܟܚ ܒܟ ܥܘ̣ܠܐ
Ezekiel 28:16 ܒܣܘܓܐܐ ܕܬܐܓܘܪܬܟ ܡܠܝܬ ܓܘܟ ܥܘ̣ܠܐ ܘܚܛܝܬ ܘܩܛܠ̇ܬܟ ܡܢ ܛܘܪܗ ܕܐܠܗܐ ܘܐܘܒܕܟ ܟܪܘܒܐ ܕܡܛܠ ܡܢ ܓܘ ܟܐ̈ܦܐ ܕܢܘܪܐ
Ezekiel 28:17 ܥܠ ܕܐܬܬܪܝܡ ܠܒܟ ܒܫܘܦܪܟ ܐܬܚܒܠܬ ܚܟܡܬܟ ܥܡ ܫܘܦܪܟ ܘܒܐܪܥܐ ܫܕܝ̇ܬܟ ܩܕܡ ܡ̈ܠܟܐ ܘܝܗܒ̇ܬܟ ܠܗܘܢ ܠܚܙܘܐ
Ezekiel 28:18 ܒܣܘܓܐܐ ܕܥܬܟ ܘܒܥܘ̣ܠܐ ܕܬܐܓܘܪܬܟ ܛܢܦܬ ܡܩܕܫܟ ܐ̇ܦܩ ܢܘܪܐ ܡܢ ܓܘܟ ܘܗܝ ܬܐܟܠܟ ܘܐܥܒܕܟ ܩܛܡܐ ܒܐܪܥܐ ܠܥܝܢ ܟܠ ܕܚܙ̇ܝܢ ܠܟ
Ezekiel 28:19 ܘܟܠ ܕܝܕܥ̇ܝܢ ܠܟ ܒܝܬ ܥܡ̈ܡܐ ܢܬܡܗܘܢ ܥܠܝܟ ܕܗ̇ܘܐ ܐܢܬ ܠܐܒܕܢܐ ܘܠܝܬ ܐܢܬ ܠܥܠܡ
Ezekiel 28:20 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 28:21 ܒܪܢܫܐ ܣܝܡ ܐ̈ܦܝܟ ܠܨܝܕܢ ܘܐܬܢܒܐ ܥܠܝܗ̇
Ezekiel 28:22 ܘܐܡܪ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠܝܟܝ ܨܝܕܢ ܘܐܫܬܒܚ ܒܟܝ ܘܢܕܥܘܢ ܕܐܢܐ ܐܢܐ ܡܪܝܐ ܡܐ ܕܥܒ̇ܕܬ ܒܗ̇ ܕܝܢ̈ܝ ܘܐܬܩܕܫ̇ܬ ܒܗ̇
Ezekiel 28:23 ܘܫ̇ܕܪܬ ܥܠܝܗ̇ ܡܘܬܢܐ ܘܕܡܐ ܒܫ̈ܘܩܝܗ̇ ܘܢܦܠܘܢ ܚܪ̈ܝܒܝܗ̇ ܒܓܘܗ̇ ܒܚܪܒܐ ܕܬܚܕܪܝܗ ܘܢܕܥܘܢ ܕܐܢܐ ܐܢܐ ܡܪܝܐ
Ezekiel 28:24 ܘܬܘܒ ܠܐ ܢܗܘܐ ܠܕܒܝܬ ܐܝܣܪܝܠ ܓ̈ܕܕܐ ܡܪ̈ܝܪܬܐ ܘܟܐܒܐ ܕܡܢܘܠ ܡܢ ܟܠܗܘܢ ܕܚܕܝܪ̈ܝܢ ܠܗܘܢ ܘܡܨܥܪܝܢ ܠܗܘܢ ܘܢܕܥܘܢ ܕܐܢܐ ܐܢܐ ܡܪܐ ܡܪ̈ܘܬܐ
Ezekiel 28:25 ܗܟܢܐ ܐܡ̇ܪ ܡܪܐ ܡܪ̈ܘܬܐ ܡܐ ܕܟܢܫ̇ܬ ܠܕܒܝܬ ܐܝܣܪܝܠ ܡܢ ܥܡ̈ܡܐ ܕܐܬܒܕܪܘ ܒܝܢܬܗܘܢ ܘܐܬܩܕܫ̇ܬ ܒܗܘܢ ܠܥܝܢ ܥܡ̈ܡܐ ܘܢܬܒܘܢ ܒܐܪܥܐ ܕܝܗ̇ܒܬ ܠܥܒ̣ܕܝ ܝܥܩܘܒ
Ezekiel 28:26 ܘܢܬܒܘܢ ܒܗ̇ ܒܫܠܝܐ ܘܢܒܢܘܢ ܒ̈ܬܐ ܘܢܨܒܘܢ ܟܪ̈ܡܐ ܘܢܬܒܘܢ ܒܣܒܪܐ ܡܐ ܕܥܒ̇ܕܬ ܕܝ̈ܢܐ ܡܢ ܟܠܗܘܢ ܥܡ̈ܡܐ ܕܚܕܪ̈ܝܗܘܢ ܕܡܗܪ̈ܝܢ ܠܗܘܢ ܘܢܕܥܘܢ ܕܐܢܐ ܐܢܐ ܡܪܝܐ ܐܠܗܗܘܢ
Ezekiel 29:1 ܒܫܢܬܐ ܥܣܝܪܝܬܐ ܒܝܪܚܐ ܕܥܣܪܐ ܒܬܪܥܣܪܐ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 29:2 ܒܪܢܫܐ ܣܝܡ ܐ̈ܦܝܟ ܥܠ ܦܪܥܘܢ ܡܠܟܐ ܕܡܨܪܝܢ ܘܐܬܢܒܐ ܥܠܘܗܝ ܘܥܠ ܟܠܗ̇ ܡܨܪܝܢ
Ezekiel 29:3 ܡܠܠ ܘܐܡܪ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠܝܟ ܦܪܥܘܢ ܡܠܟܐ ܕܡܨܪܝܢ ܬܢܝܢܐ ܪܒܐ ܕܪܒܝܥ ܒܓܘ ܢܗܪ̈ܘܬܐ ܘܐܡ̇ܪ ܕܕܝܠܝ ܗܘ ܢܗܪܐ ܘܐܢܐ ܥܒ̇ܕܬܗ
Ezekiel 29:4 ܐܢܐ ܐܪܡܐ ܒܠܡܐ ܒܦܟܝ̈ܟ ܘܐܕܒܩ ܒ̈ܓܦܝܟ ܢܘ̈ܢܐ ܕܢܗܪܟ ܘܐܣܩܟ ܡܢ ܓܘ ܢܗܪܟ ܘܟܠܗܘܢ ܢܘ̈ܢܐ ܕܢܗܪܟ ܒܓܦܝ̈ܟ ܢܕܒܩܘܢ
Ezekiel 29:5 ܘܐܪܡܝܟ ܒܡܕܒܪܐ ܠܟ ܘܠܟܠܗܘܢ ܢܘ̈ܢܐ ܕܢܗܪܟ ܘܥܠ ܐ̈ܦܝ ܚܩܠܐ ܬܦܠ ܘܠܐ ܬܬܟܢܫ ܘܠܐ ܬܬܚܡܠ ܠܚܝܘܬܐ ܕܕܒܪܐ ܘܠܦܪܚܬܐ ܕܫܡܝܐ ܝܗܒ̇ܬܟ ܠܡܐܟܘܠܬܐ
Ezekiel 29:6 ܘܢܕܥܘܢ ܟܠܗܘܢ ܥܡܘܪ̈ܝܗ̇ ܕܡܨܪܝܢ ܕܐܢܐ ܐܢܐ ܡܪܝܐ ܥܠ ܕܗܘܝܬ ܐܝܟ ܚܘܛܪܐ ܕܩܢܝܐ ܠܕܒܝܬ ܐܝܣܪܝܠ
Ezekiel 29:7 ܟܕ ܐܚܕܘܟ ܒܐ̈ܝܕܝܗܘܢ ܒܙܥܬ ܐ̈ܝܕܝܗܘܢ ܘܟܕ ܐܣܬܡܟܘ ܥܠܝܟ ܐܬܬܒܪܬ ܘܐܪܥܠܬ ܚܨ̈ܝܗܘܢ
Ezekiel 29:8 ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܡܝܬܐ ܐܢܐ ܥܠܝܟ ܚܪܒܐ ܘܐܘܒܕ ܡܢܟ ܒܢ̈ܝ ܐܢܫܐ ܘܒܥܝܪܐ
Ezekiel 29:9 ܘܬܗܘܐ ܐܪܥܐ ܕܡܨܪܝܢ ܠܚܒܠܐ ܘܠܚܘܪܒܐ ܘܢܕܥܘܢ ܕܐܢܐ ܐܢܐ ܡܪܝܐ ܥܠ ܕܐܡ̇ܪܬ ܕܕܝܠܝ ܗܘ ܢܗܪܐ ܘܐܢܐ ܥܒ̇ܕܬܗ
Ezekiel 29:10 ܡܛܠ ܗܢܐ ܗܐ ܐܢܐ ܥܠܝܟ ܘܥܠ ܢܗܪܟ ܘܐܬܠܝܗ̇ ܠܐܪܥܐ ܕܡܨܪܝܢ ܠܚܒܠܐ ܘܠܚܘܪܒܐ ܡܢ ܡܓܕܠܐ ܕܣܘܢܐ ܘܥܕܡܐ ܠܬܚܘܡܐ ܕܟܘܫ
Ezekiel 29:11 ܠܐ ܬܥܒܪ ܒܗ̇ ܪܓܠܐ ܕܒܪܢܫܐ ܘܐܦܠܐ ܦܪܣܬܐ ܕܒܥܝܪܐ ܘܠܐ ܬܬܒ ܐܪ̈ܒܥܝܢ ܫ̈ܢܝܢ
Ezekiel 29:12 ܘܐܬܠܝܗ̇ ܠܐܪܥܐ ܕܡܨܪܝܢ ܠܚܒܠܐ ܒܝܢܬ ܡܕܝܢ̈ܬܐ ܕܨ̈ܕܝܢ ܘܢܗ̈ܘܝܢ ܡܕܝܢ̈ܬܗ̇ ܠܚܒܠܐ ܐܪ̈ܒܥܝܢ ܫ̈ܢܝܢ ܒܝܢܬ ܡܕܝ̈ܢܬܐ ܕܚܪ̈ܒܢ ܘܐܒܕܪܝܗ̇ ܠܡܨܪܝܢ ܒܥܡ̈ܡܐ ܘܐܕܪܐ ܐܢܘܢ ܒܡ̈ܕܝܢܬܐ
Ezekiel 29:13 ܗܟܢܐ ܐܡ̇ܪ ܡܪܐ ܡܪ̈ܘܬܐ ܒܬܪ ܐܪ̈ܒܥܝܢ ܫܢ̈ܝܢ ܐܟܢܫ ܐܢܘܢ ܠܡܨܪ̈ܝܐ ܡܢ ܥܡ̈ܡܐ ܕܐܬܒܕܪܘ ܒܝܢܬܗܘܢ
Ezekiel 29:14 ܘܐܗܦܟ ܫܒܝܬܗ̇ ܕܡܨܪܝܢ ܘܐܘܬܒ ܐܢܘܢ ܒܐܪܥܐ ܕܦܬܪܘܣ ܒܐܪܥܐ ܕܐܙܕܒܢܘ ܡܢܗ̇ ܘܢܗܘܘܢ ܬܡܢ ܡܠܟܘܬܐ ܡܟܝܟܬܐ
Ezekiel 29:15 ܘܬܗܘܐ ܡܟܝܟܐ ܡܢ ܟܠܗܝܢ ܡ̈ܠܟܘܬܐ ܘܬܘܒ ܠܐ ܬܫܬܩܠ ܥܠ ܥܡ̈ܡܐ ܘܐܙܥܪ ܐܢܘܢ ܕܠܐ ܢܫܥܒܕܘܢ ܠܥܡ̈ܡܐ
Ezekiel 29:16 ܘܬܘܒ ܠܐ ܢܗܘܘܢ ܠܕܒܝܬ ܐܝܣܪܝܠ ܠܣܒܪܐ ܘܠܥܘܗܕܢܐ ܕܥܘ̣ܠܐ ܥܠ ܕܐܙܠܘ ܒܬܪܗܘܢ ܘܢܕܥܘܢ ܕܐܢܐ ܐܢܐ ܡܪܐ ܡܪ̈ܘܬܐ
Ezekiel 29:17 ܒܥܣܪ̈ܝܢ ܘܫܒܥ ܫ̈ܢܝܢ ܒܝܪܚܐ ܩܕܡܝܐ ܒܚܕ ܒܝܪܚܐ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 29:18 ܒܪܢܫܐ ܢܒܘܟܕܢܨܪ ܡܠܟܐ ܕܒܒܠ ܫܥܒܕ ܠܟܠܗ ܚܝܠܗ ܫܘܥܒܕܐ ܪܒܐ ܥܠ ܨܘܪ ܒܟܠ ܪܝܫ ܩܘ̈ܕܚܬܐ ܘܟܠ ܟܬܦ ܚܠܝܨܐ ܘܐܓܪܐ ܠܐ ܐܬܝܗܒ ܠܗ ܘܠܚܝܠܗ ܡܢ ܨܘܪ ܥܠ ܫܘܥܒܕܐ ܕܫܥܒܕܗ
Ezekiel 29:19 ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܝܗ̇ܒ ܐܢܐ ܠܢܒܘܟܕܢܨܪ ܡܠܟܐ ܕܒܒܠ ܐܪܥܐ ܕܡܨܪܝܢ ܘܢܫܩܘܠ ܩܢܝܢܗ̇ ܘܢܫܒܐ ܫܒܝܬܗ̇ ܘܢܒܘܙ ܒܙܬܗ̇ ܘܬܗܘܐ ܐܓܪܐ ܠܚܝܠܗ
Ezekiel 29:20 ܘܚܠܦ ܦܥܠܘܬܐ ܕܥܒܕ ܒܨܘܪ ܝܗ̇ܒܬ ܠܗ ܐܪܥܐ ܕܡܨܪܝܢ ܐܡ̇ܪ ܡܪܐ ܡܪ̈ܘܬܐ
Ezekiel 29:21 ܒܗ ܒܝܘܡܐ ܗ̇ܘ ܐ̇ܕܢܚ ܩܪܢܐ ܠܕܒܝܬ ܐܝܣܪܝܠ ܘܐܦܬܚ ܦܘܡܟ ܒܝܢܬܗܘܢ ܘܢܕܥܘܢ ܕܐܢܐ ܐܢܐ ܡܪܐ ܡܪ̈ܘܬܐ
Ezekiel 30:1 ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 30:2 ܒܪ ܐܢܫܐ ܐܬܢܒܐ ܘܐܡܪ ܗܟܢܐ ܐܡ̇ܪ ܡܪܐ ܡܪ̈ܘܬܐ ܐܝܠܠܘ ܘܐܡܪܘ ܐܘܗ̇ ܠܝܘܡܐ
Ezekiel 30:3 ܕܩܪܝܒ ܗܘ ܝܘܡܐ ܩܪܝܒ ܗܘ ܝܘܡܗ ܕܡܪܝܐ ܝܘܡܐ ܕܥܢܢܐ ܘܙܒܢܐ ܕܥܡ̈ܡܐ
Ezekiel 30:4 ܘܬܐܬܐ ܚܪܒܐ ܥܠ ܡܨܪܝܢ ܘܢܗܘܐ ܒܘܠܗܝܐ ܒܟܘܫ ܡܐ ܕܢܦܠܘ ܚܪ̈ܝܒܐ ܒܡܨܪܝܢ ܘܢܣܒܘܢ ܥܘܬܪܗ̇ ܘܢܥܩܪܘܢ ܫ̈ܬܐܣܝܗ̇
Ezekiel 30:5 ܘܟܘܫ̈ܝܐ ܘܦܘ̈ܛܝܐ ܘܠܘܒ̈ܝܐ ܘܟܠܗ̇ ܥܪܒܝܐ ܘܟܘܒ ܘܒܢ̈ܝ ܐܪܥܐ ܕܩܝܡܐ ܥܡܗܘܢ ܒܚܪܒܐ ܢܦܠܘܢ
Ezekiel 30:6 ܗܟܢܐ ܐܡ̇ܪ ܡܪܐ ܡܪ̈ܘܬܐ ܢܦܠܘܢ ܣܡ̈ܟܝܗ̇ ܕܡܨܪܝܢ ܘܢܬܬܒܪ ܚܝܠܐ ܕܥܘܫܢܗ̇ ܡܢ ܡܓܕܠܐ ܕܣܘܢܐ ܒܚܪܒܐ ܢܦܠܘܢ ܒܗ̇ ܐܡ̇ܪ ܡܪܐ ܡܪ̈ܘܬܐ
Ezekiel 30:7 ܘܢܚܪ̈ܒܢ ܒܝܢܬ ܐܪ̈ܥܬܐ ܕܚܪ̈ܒܢ ܘܡܕܝܢ̈ܬܗܝܢ ܒܝܢܬ ܡܕܝܢ̈ܬܐ ܚܪ̈ܒܬܐ ܢܗ̈ܘܝܢ
Ezekiel 30:8 ܘܢܕܥܘܢ ܕܐܢܐ ܐܢܐ ܡܪܝܐ ܕܫܒܩ̇ܬ ܢܘܪܐ ܒܡܨܪܝܢ ܘܐܬܬܒܪܘ ܟܘܠܗܘܢ ܡܥܕܪ̈ܢܝܗ̇
Ezekiel 30:9 ܒܗ ܒܝܘܡܐ ܗ̇ܘ ܢܦܩܘܢ ܡܠܐ̈ܟܐ ܡܢ ܩܕܡܝ ܡܣܪܗܒܐܝܬ ܠܡܚܒܠܘ ܠܟܘܫ ܕܝܬ̇ܒܐ ܒܫܠܝܐ ܘܢܗܘܐ ܒܗܘܢ ܕܠܘܚܝܐ ܒܝܘܡܗ̇ ܕܡܨܪܝܢ ܘܗܐ ܡܛܝ
Ezekiel 30:10 ܗܟܢܐ ܐܡ̇ܪ ܡܪܐ ܡܪ̈ܘܬܐ ܡܫܠܡ ܐܢܐ ܥܘܬܪܗ̇ ܕܡܨܪܝܢ ܒܝܕ ܢܒܘܟܕܢܨܪ ܡܠܟܐ ܕܒܒܠ
Ezekiel 30:11 ܠܗ ܘܠܥܫ̈ܝܢܐ ܕܥܡ̈ܡܐ ܕܐܬ̇ܝܢ ܠܡܚܒܠܘ ܠܐܪܥܐ ܘܢܫܡܛܘܢ ܣ̈ܝܦܝܗܘܢ ܥܠ ܡܨܪܝܢ ܘܢܡܠܘܢܗ̇ ܠܐܪܥܐ ܚܪ̈ܝܒܐ
Ezekiel 30:12 ܘܐܥܒܕ ܢܗܪ̈ܘܬܐ ܠܚܒܠܐ ܘܐܫܠܡܝܗ̇ ܠܐܪܥܐ ܒܐܝܕܐ ܕܒܝ̈ܫܐ ܘܐܚܪܒܝܗ̇ ܠܐܪܥܐ ܒܡܠܐܗ̇ ܒܐܝܕܐ ܕܢܘܟܪ̈ܝܐ ܐܢܐ ܡܪܝܐ ܡܠܠ̇ܬ
Ezekiel 30:13 ܗܟܢܐ ܐܡ̇ܪ ܡܪܐ ܡܪ̈ܘܬܐ ܡܘܒܕ ܐܢܐ ܦܬܟܪ̈ܐ ܘܡܒܛܠ ܐܢܐ ܕܚ̈ܠܬܐ ܡܢ ܡܦܣ ܘܬܘܒ ܪܒܐ ܠܐ ܢܗܘܐ ܒܐܪܥܐ ܕܡܨܪܝܢ
Ezekiel 30:14 ܘܐܒܛܠܝܗ̇ ܠܐܪܥܐ ܕܦܬܪܘܣ ܘܐܫܒܘܩ ܢܘܪܐ ܒܨܥܢ ܘܐܥܒܕ ܕܝܢܐ ܒܢܘ
Ezekiel 30:15 ܘܐܫܘܕ ܪܘܓܙܝ ܥܠ ܣܝܢ ܥܘܫܢܗ̇ ܕܡܨܪܝܢ ܘܐܘܒܕ ܥܘܬܪܗ̇ ܕܢܘ
Ezekiel 30:16 ܘܐܫܒܘܩ ܢܘܪܐ ܒܡܨܪܝܢ ܘܢܬܕܠܚ ܣܝܢ ܘܢܘ ܬܬܪܥ ܘܡܦܣ ܬܗܘܐ ܠܡܦܘܠܬܐ
Ezekiel 30:17 ܘܐܝܟ ܡ̈ܝܐ ܢܗܘܘܢ ܓܕܘ̈ܕܐ ܕܡܦܝܒܣܬ ܘܒܣܝܦܐ ܢܦܠܘܢ ܘܒܫܒܝܐ ܢܐܙܠܘܢ
Ezekiel 30:18 ܘܒܬܚܦܝܣ ܢܥܪܒ ܝܘܡܐ ܡܐ ܕܬܒ̇ܪܬ ܬܡܢ ܚܘܛܪܗ̇ ܕܡܨܪܝܢ ܘܒܛܠ ܡܢܗ̇ ܫܘܒܚܐ ܕܥܘܫܢܗ̇ ܘܬܟܣܝܗ̇ ܥܢܢܐ ܘܒܢ̈ܬܗ̇ ܢܐ̈ܙܠܢ ܒܫܒܝܐ
Ezekiel 30:19 ܘܐܥܒܕ ܕܝܢܐ ܒܡܨܪܝܢ ܘܢܕܥܘܢ ܕܐܢܐ ܐܢܐ ܡܪܝܐ
Ezekiel 30:20 ܒܫܢܬ ܚܕܥܣܪ̈ܐ ܒܫܒܥܬܐ ܒܝܪܚܐ ܩܕܡܝܐ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 30:21 ܒܪܢܫܐ ܕܪܥܗ ܕܦܪܥܘܢ ܡܠܟܐ ܕܡܨܪܝܢ ܬܒ̇ܪܬ ܘܠܐ ܡܬܥܨܒ ܕܬܗܘܐ ܠܗ ܐܣܝܘܬܐ ܘܠܐ ܢܬܬܣܝܡ ܥܠܘܗܝ ܡܠܓܡܐ ܘܠܐ ܢܬܥܨܒ ܘܠܐ ܢܬܚܠܡ ܕܢܐܚܘܕ ܣܝܦܐ
Ezekiel 30:22 ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠ ܦܪܥܘܢ ܡܠܟܐ ܕܡܨܪܝܢ ܘܐܬܒܪ ܕܪ̈ܥܘܗܝ ܥܫܝ̈ܢܐ ܘܐܪܡܐ ܣܝܦܐ ܡܢ ܐ̈ܝܕܘܗܝ
Ezekiel 30:23 ܘܐܒܕܪܝܗ̇ ܠܡܨܪܝܢ ܒܥܡ̈ܡܐ ܘܐܕܪܐ ܐܢܘܢ ܒܡ̈ܕܝܢܬܐ
Ezekiel 30:24 ܘܐܚܝܠ ܕܪ̈ܥܘܗܝ ܕܡܠܟܐ ܕܒܒܠ ܘܐܬܠ ܣܝܦܝ ܒܐܝ̈ܕܘܗܝ ܘܢܦܣܘܩ ܕܪ̈ܥܘܗܝ ܕܦܪܥܘܢ ܘܢܬܬܢܚ ܬܐ̈ܢܚܬܐ ܕܩ̈ܛܝܠܐ ܩܕܡܘܗܝ
Ezekiel 30:25 ܘܐܥܫܢ ܕܪ̈ܥܘܗܝ ܕܡܠܟܐ ܕܒܒܠ ܘܕܪ̈ܥܘܗܝ ܕܦܪܥܘܢ ܢܦܠܘܢ ܘܢܕܥܘܢ ܕܐܢܐ ܐܢܐ ܡܪܝܐ ܡܐ ܕܝܗܒ̇ܬ ܣܝܦܝ ܒܐ̈ܝܕܘܗܝ ܕܡܠܟܐ ܕܒܒܠ ܘܫܡܛܗ ܥܠ ܐܪܥܐ ܕܡܨܪܝܢ
Ezekiel 30:26 ܘܐܒܕܪܝܗ̇ ܠܡܨܪܝܢ ܒܥܡ̈ܡܐ ܘܐܕܪܐ ܐܢܘܢ ܒܡܕܝܢܬ̈ܐ ܘܢܕܥܘܢ ܕܐܢܐ ܐܢܐ ܡܪܝܐ
Ezekiel 31:1 ܒܫܢܬ ܚܕܥܣܪܐ ܒܝܪܚܐ ܬܠܝܬܝܐ ܒܚܕ ܒܝܪܚܐ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 31:2 ܒܪܢܫܐ ܐܡܪ ܠܦܪܥܘܢ ܡܠܟܐ ܕܡܨܪܝܢ ܘܠܥܘܫܢܗ ܠܡ̇ܢ ܕܡܝܬ ܒܪܒܘܬܟ
Ezekiel 31:3 ܗܐ ܐܬܘܪܝܐ ܐܪܙܐ ܕܠܒܢܢ ܕܫܦܝܪ̈ܢ ܣܘ̈ܟܘܗܝ ܘܥܒܝܛ ܛܠܠܗ ܘܪܡܐ ܩܘܡܬܗ ܘܒܝܢܬ ܥܒܝ̈ܛܐ ܗܘܬ ܡܘܥܝܬܗ
Ezekiel 31:4 ܡ̈ܝܐ ܪܒܝܘܗܝ ܘܬܗܘܡܐ ܐܪܝܡܗ ܘܥܠ ܢܗܪ̈ܘܬܐ ܚܕܪܬ ܢܨܒܬܗ ܘܣ̈ܘܟܘܗܝ ܐܪܡܝ ܥܠ ܟܠܗܘܢ ܐ̈ܝܠܢܐ ܕܕܒܪܐ
Ezekiel 31:5 ܡܛܘܠ ܗܢܐ ܐܬܬܪܝܡܬ ܩܘܡܬܗ ܛܒ ܡܢ ܟܠܗܘܢ ܐܝ̈ܠܢܐ ܕܕܒܪܐ ܘܣܓ̈ܝ ܣܪ̈ܥܦܝܬܗ ܘܐܝܪܟ ܣ̈ܘܟܘܗܝ ܡܢ ܣܘܓܐܐ ܕܡ̈ܝܐ ܕܪܒܝܘܗܝ
Ezekiel 31:6 ܒܣ̈ܘܟܘܗܝ ܐܩܢܬ ܟܠܗ̇ ܦܪܚܬܐ ܕܫܡܝܐ ܘܬܚܝܬ ܥܘ̈ܦܘܗܝ ܝܠܕܬ ܟܠܗ̇ ܚܝܘܬܐ ܕܕܒܪܐ ܘܒܛܠܠܗ ܝܬܒܘ ܥܡ̈ܡܐ ܣ̈ܓܝܐܐ
Ezekiel 31:7 ܘܫܦܝܪ ܗܘܐ ܒܪܒܘܬܗ ܘܒܣܘܓܐܐ ܕܣ̈ܘܟܘܗܝ ܡܛܠ ܕܗܘܘ ܥܩܪ̈ܘܗܝ ܒܡ̈ܝܐ ܣ̈ܓܝܐܐ
Ezekiel 31:8 ܐܪ̈ܙܐ ܠܐ ܥܒܪ̈ܘܗܝ ܒܦܪܕܝܣܗ ܕܐܠܗܐ ܘܥܪ̈ܩܐ ܠܐ ܕܡܘ ܠܣ̈ܘܟܘܗܝ ܘܕܘ̈ܠܒܐ ܠܐ ܗܘܘ ܐܝܟ ܥܘ̈ܦܘܗܝ ܘܟܘܠ ܐܝܠܢ ܒܦܪܕܝܣܗ ܕܐܠܗܐ ܠܐ ܕܡܐ ܠܗ ܒܫܘܦܪܗ
Ezekiel 31:9 ܫܦܝܪܐ ܥܒ̇ܕܬܗ ܒܣܘܓܐܐ ܕܣ̈ܘܟܘܗܝ ܘܛܢܘ ܒܗ ܟܠܗܘܢ ܐ̈ܝܠܢܐ ܕܥܕܢ ܦܪܕܝܣܗ ܕܐܠܗܐ
Ezekiel 31:10 ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܐܬܬܪܝܡ ܒܩܘܡܬܗ ܘܫܘܚܬ ܡܘܥܝܬܗ ܒܝܢܬ ܥܒܝ̈ܛܐ ܘܐܬܬܪܝܡ ܠܒܗ ܒܪܡܘܬܗ
Ezekiel 31:11 ܐܫܠܡܝܘܗܝ ܒܝܕ ܬܩܝܦܐ ܕܥܡ̈ܡܐ ܘܢܥܒܕ ܠܗ ܐܝܟ ܚܛܝܬܗ ܘܢܘܒܕܝܘܗܝ
Ezekiel 31:12 ܘܢܘܒܕܘܢܗ ܢܘܟܪ̈ܝܐ ܥܫܝ̈ܢܐ ܕܥܡ̈ܡܐ ܘܢܪܡܘܢܗ ܒܛܘܪ̈ܐ ܘܒܟܠܗܘܢ ܢܚ̈ܠܐ ܢ̈ܦܠܢ ܣ̈ܘܟܘܗܝ ܘܢܬܬܒܪ̈ܢ ܣܪ̈ܥܦܝܬܗ ܒܟܠܗܘܢ ܢܚ̈ܠܐ ܕܐܪܥܐ ܘܢܚܬܘܢ ܡܢ ܛܠܠܗ ܟܠܗܘܢ ܥܡ̈ܡܐ ܕܐܪܥܐ ܘܢܫܒܩܘܢܗ
Ezekiel 31:13 ܘܡܐ ܕܢܦܠ ܬܫܟܢ ܥܠܘܗܝ ܟܠܗ̇ ܦܪܚܬܐ ܕܫܡܝܐ ܘܬܚܝܬ ܣܪ̈ܥܦܝܬܗ ܬܗܘܐ ܟܠܗ̇ ܚܝܘܬܐ ܕܕܒܪܐ
Ezekiel 31:14 ܕܠܐ ܢܬܬܪܝܡܘܢ ܒܩ̈ܘܡܬܗܘܢ ܟܠܗܘܢ ܐ̈ܝܠܢܐ ܕܡ̈ܝܐ ܘܠܐ ܢܫ̈ܘܚܢ ܡܘ̈ܥܝܬܗܘܢ ܒܝܢܬ ܥܒ̈ܝܛܐ ܘܠܐ ܢܩܘܡܘܢ ܘܠܐ ܢܗܘܘܢ ܐܟܘܬܗܘܢ ܟܠ ܕܫܬ̇ܝܢ ܡ̈ܝܐ ܡܛܠ ܕܟܘܠܗܘܢ ܠܡܘܬܐ ܐܫܬܠܡܘ ܒܐܪܥܐ ܬܚܬܝܬܐ ܒܝܢܬ ܒܢܝܢܫ̈ܐ ܕܢܚ̇ܬܝܢ ܠܓܘܒܐ
Ezekiel 31:15 ܗܟܢܐ ܐܡ̇ܪ ܡܪܐ ܡܪ̈ܘܬܐ ܒܝܘܡܐ ܕܢܚܬ ܠܫܝܘܠ ܥܒ̇ܕܬ ܐܒܠܐ ܘܟܣ̇ܝܬ ܥܠܘܗܝ ܬܗܘܡܐ ܘܟܠܝ̇ܬ ܢܗܪ̈ܘܬܗ ܘܐܬܟܠܝܘ ܡ̈ܝܐ ܣ̈ܓܝܐܐ ܘܐܟܡ̇ܪܬ ܥܠܘܗܝ ܠܠܒܢܢ ܘܟܠܗܘܢ ܐ̈ܝܠܢܐ ܕܕܒܪܐ ܐܬܥܝܦܘ
Ezekiel 31:16 ܡܢ ܩܠܐ ܕܡܦܘܠܬܗ ܐܬܬܙܝܥܬ ܐܪܥܐ ܘܟܕ ܐܚܬ̇ܬܗ ܠܫܝܘܠ ܥܡ ܢܚ̈ܬܝ ܓܘܒܐ ܐܬܒܝܐܘ ܒܐܪܥܐ ܬܚܬܝܬܐ ܟܠܗܘܢ ܐ̈ܝܠܢܐ ܕܥܕܢ ܘ̈ܓܒܝܐ ܫܦܝܪ̈ܐ ܕܠܒܢܢ ܕܫܬ̇ܝܢ ܡ̈ܝܐ
Ezekiel 31:17 ܐܦ ܗܢܘܢ ܢܚܬܘ ܥܡܗ ܠܫܝܘܠ ܠܘܬ ܩ̈ܛܝܠܝ ܣܝܦܐ ܘܙܪܥܗ ܝܬܒܘ ܒܛܠܠܗ ܒܝܢܬ ܥܡ̈ܡܐ
Ezekiel 31:18 ܠܐܝܢܐ ܡܢ ܐܝ̈ܠܢܐ ܕܥܕܢ ܐܬܕܡܝܬ ܒܫܘܒܚܐ ܘܒܪܒܘܬܐ ܘܢܚܬܬ ܥܡ ܐ̈ܝܠܢܐ ܕܥܕܢ ܠܐܪܥܐ ܬܚܬܝܬܐ ܒܝܢܬ ܥܘܪ̈ܠܐ ܬܫܟܒ ܥܡ ܐܝܠܝܢ ܕܩܛܝܠܝܢ ܒܣܝܦܐ ܗܢܐ ܗܘ ܦܪܥܘܢ ܘܟܠܗ ܚܝܠܗ ܐܡ̇ܪ ܡܪܐ ܡܪ̈ܘܬܐ
Ezekiel 32:1 ܒܫܢܬ ܚܕܥܣܪܐ ܒܝܪܚܐ ܕܬܪܥܣܪ̈ ܒܚܕ ܒܝܪܚܐ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ
Ezekiel 32:2 ܒܪܢܫܐ ܐܠܝ ܐܘܠܝܬܐ ܥܠ ܦܪܥܘܢ ܡܠܟܐ ܕܡܨܪܝܢ ܘܐܡܪ ܠܗ ܠܐܪܝܐ ܕܥܡ̈ܡܐ ܐܬܕܡܝܬ ܘܐܢܬ ܐܝܟ ܬܢܝܢܐ ܐܢܬ ܕܝܡ̈ܡܐ ܕܩܪܬ ܒܢܗܪ̈ܘܬܟ ܘܕܠܚܬ ܡ̈ܝܐ ܒܪ̈ܓܠܝܟ ܘܕܫܬ ܢܗܪ̈ܘܬܗܘܢ
Ezekiel 32:3 ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܦܪܣ ܐܢܐ ܡܨܝܕܬܝ ܥܠܝܟ ܒܟܢܘܫܝܐ ܕܥܡܡ̈ܐ ܣ̈ܓܝܐܐ ܘܢܣܩܘܢܟ ܒܡܨܝܕܬܝ
Ezekiel 32:4 ܘܐܫܕܝܟ ܒܐܪܥܐ ܘܥܠ ܐ̈ܦܝ ܚܩܠܐ ܐܣܚܦܟ ܘܐܫܟܢ ܥܠܝܟ ܟܠܗ̇ ܦܪܚܬܐ ܕܫܡܝܐ ܘܐܣܒܥ ܡܢܟ ܟܠܗ̇ ܚܝܘܬܐ ܕܐܪܥܐ
Ezekiel 32:5 ܘܐܪܡܐ ܒܣܪܟ ܥܠ ܛܘܪ̈ܐ ܘܢܬܡܠܘܢ ܢܚ̈ܠܐ ܡܢ ܪ̈ܡܬܟ
Ezekiel 32:6 ܘܐܫܩܐ ܐܪܥܐ ܕܕܘܩ̈ܝܟ ܡܢ ܕܡܟ ܘܛܘܪ̈ܐ ܘܢܚ̈ܠܐ ܢܬܡܠܘܢ ܡܢܟ
Ezekiel 32:7 ܘܐܟܣܐ ܒܕܥܟܟ ܫܡܝܐ ܘܐܥܡܛ ܟܘ̈ܟܒܝܗܘܢ ܘܫܡܫܐ ܒܥܢ̈ܢܐ ܢܬܟܣܐ ܘܣܗܪܐ ܠܐ ܢܢܗܪ ܢܘܗܪܗ
Ezekiel 32:8 ܘܟܠܗܘܢ ܢܗܝܪ̈ܐ ܕܡܢܗܪ̈ܝܢ ܒܫܡܝܐ ܐܥܡܛ ܐܢܘܢ ܥܠܝܟ ܘܐܥܒܕ ܚܫܘܟܐ ܒܐܪܥܟ ܐܡ̇ܪ ܡܪܐ ܡܪ̈ܘܬܐ
Ezekiel 32:9 ܘܐܚܡܬ ܠܒܐ ܕܥܡ̈ܡܐ ܣ̈ܓܝܐܐ ܡܐ ܕܐܝܬܝܬ̇ ܬܒܪܟ ܒܝܬ ܥܡ̈ܡܐ ܘܒܡܕܝܢ̈ܬܐ ܕܠܐ ܝ̇ܕܥ ܐܢܬ ܠܗܝܢ
Ezekiel 32:10 ܘܐܬܡܗ ܥܠܝܟ ܥܡ̈ܡܐ ܣ̈ܓܝܐܐ ܘܡ̈ܠܟܝܗܘܢ ܢܕܚܠܘܢ ܡܐ ܕܐܒܪܩ̇ܬ ܣܝܦܝ ܥܠ ܐ̈ܦܝܗܘܢ ܘܢܕܚܠܘܢ ܘܢܬܪܗܒܘܢ ܐܢܫ ܒܢܦܫܗ ܒܝܘܡܐ ܕܡܦܘܠܬܟ
Ezekiel 32:11 ܗܟܢܐ ܐܡ̇ܪ ܡܪܐ ܡܪ̈ܘܬܐ ܚܪܒܗ ܕܡܠܟܐ ܕܒܒܠ ܬܐܬܐ ܥܠܝܟ
Ezekiel 32:12 ܒܚܪܒܐ ܕܓܢܒܪ̈ܐ ܐܪܡܐ ܥܘܫܢܟ ܘܕܟܠܗܘܢ ܥܫ̈ܝܢܐ ܕܥܡ̈ܡܐ ܘܢܒܙܘܢ ܥܘܫܢܗ̇ ܕܡܨܪܝܢ ܘܢܬܒܙܙ ܟܠܗ ܥܘܬܪܗ̇
Ezekiel 32:13 ܘܐܘܒܕ ܒܥܝܪܗ̇ ܡܢ ܡ̈ܝܐ ܣ̈ܓܝܐܐ ܘܬܘܒ ܪܓܠܐ ܕܒܪܢܫܐ ܠܐ ܬܕܠܚ ܐܢܘܢ ܐܦ ܠܐ ܦܪܣܬܐ ܕܒܥܝܪܐ
Ezekiel 32:14 ܗܝܕܝܢ ܐܬܩܢ ܡܝܝ̈ܗܘܢ ܘܢܗܪ̈ܘܬܗܘܢ ܐܪܕܐ ܐܝܟ ܡܫܚܐ ܐܡ̇ܪ ܡܪܐ ܡܪ̈ܘܬܐ
Ezekiel 32:15 ܡܐ ܕܥܒ̇ܕܬܗ̇ ܠܐܪܥܐ ܕܡܨܪܝܢ ܠܚܒܠܐ ܘܬܚܪܒ ܐܪܥܐ ܒܡܠܐܗ̇ ܡܐ ܕܡܚ̇ܝܬ ܠܟܠܗܘܢ ܥܡܘܪ̈ܝܗ̇ ܘܢܕܥܘܢ ܕܐܢܐ ܐܢܐ ܡܪܝܐ
Ezekiel 32:16 ܐܘܠܝܬܐ ܗܝ ܘܒܢ̈ܬܗܘܢ ܕܥܡ̈ܡܐ ܐ̈ܠܝܢ ܠܗ̇ ܥܠ ܡܨܪܝܢ ܘܥܠ ܟܠܗ ܥܘܬܪܗ̇ ܢܐ̈ܠܝܢܗ̇ ܐܡ̇ܪ ܡܪܐ ܡܪ̈ܘܬܐ
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .