← All works

Peshitta Deuteronomy

Peshitta (Syriac Old Testament) · 959 sections

1. Deuteronomy 3:18

   ܘܦ̇ܩܕܬܟܘܢ ܒܗ ܒܙܒܢܐ ܗ̇ܘ ܘܐܡܪܬ ܠܟܘܢ. ܡܪܝܐ ܐܠܗܟܘܢ ܝ̇ܗܒ ܠܟܘܢ ܐܪܥܐ ܗܕܐ ܠܡܐܪܬܗ̇. ܟܕ ܡܙܝܢܝܢ ܐܢܬܘܢ ܥܒܪܘ ܩܕܡ ܐ̈ܚܝܟܘܢ ܒܢ̈ܝ ܐܝܣܪܝܠ. ܟܠܟܘܢ ܓܢܒܪ̈ܝ ܚܝܠܐ.

2. Deuteronomy 3:19

   ܒܠܚܘܕ ܢܫ̈ܝܟܘܢ ܘܝܩܪܬܟܘܢ ܘܒܥܝܪܟܘܢ ܫܒܘܩܘ. ܝ̇ܕܥ ܐܢܐ ܓܝܪ ܕܩܢܝܢܐ ܣܓܝܐܐ ܐܝܬ ܠܟܘܢ. ܢܬܒܘܢ ܒܩܘܪ̈ܝܟܘܢ ܕܝܗ̇ܒܬ ܠܟܘܢ.

3. Deuteronomy 3:20

   ܥܕܡܐ ܕܢܢܝܚ ܡܪܝܐ ܠܐܚ̈ܝܟܘܢ ܐܟܘܬܟܘܢ. ܘܢܐܪܬܘܢ ܐܦ ܗܢܘܢ. ܐܪܥܐ ܕܝ̇ܗܒ ܠܟܘܢ ܡܪܝܐ ܐܠܗܟܘܢ ܒܥܒܪܐ ܕܝܘܪܕܢܢ. ܘܗ̇ܝ ܕܝܢ ܬܗܦܟܘܢ ܐܢܫ ܠܝܪܬܘܬܗ. ܕܝܗ̇ܒܬ ܠܟܘܢ.

4. Deuteronomy 3:21

   ܘܠܝܫܘܥ ܦ̇ܩܕܬ ܒܙܒܢܐ ܗ̇ܘ. ܘܐܡ̇ܪܬ ܥܝ̈ܢܝܟ ܚܙܝ ܟܠ ܕܥܒܕ ܡܪܝܐ ܐܠܗܟܘܢ ܠܗܠܝܢ ܬܪ̈ܝܢ ܡ̈ܠܟܝܢ. ܗܟܢܐ ܢܥܒܕ ܡܪܝܐ ܠܗܠܝܢ ܟܠܗܝܢ ܡ̈ܠܟܘܬܐ ܕܥ̇ܒܪܝܢ ܐܢܬܘܢ ܠܗܝܢ.

5. Deuteronomy 3:22

   ܠܐ ܬܕܚܠܘܢ ܡܢܗܘܢ. ܡܛܘܠ ܕܡܪܝܐ ܐܠܗܟܘܢ. ܗܘ ܡܬܟܬܫ ܥܠ ܐ̈ܦܝܟܘܢ .

6. Deuteronomy 3:23

   ܘܐܬܟܫܦܬ ܩܕܡ ܡܪܝܐ ܒܙܒܢܐ ܗ̇ܘ ܘܐܡ̇ܪܬ.

7. Deuteronomy 3:24

   ܒܒܥܘ ܡܪܝܐ ܐܠܗܐ. ܐܢܬ ܫܪܝܬ ܠܡܚܘܝܘ ܠܥܒܕܟ ܪܒܘܬܟ. ܘܐܝܕܟ ܬܩܝܦܬܐ ܘܕܪܥܟ ܪܡܐ. ܐܝܢܐ ܗܘ ܓܝܪ ܐܠܗܐ ܐܝܬ ܒܫܡܝܐ ܐܘ ܒܐܪܥܐ. ܕܢܥܒܕ ܐܝܟ ܥܒ̇ܕܝ̈ܟ ܘܐܝܟ ܓܢܒܪ̈ܘܬܟ .

8. Deuteronomy 3:25

   ܐܥܒܪ ܗܫܐ ܐܚܙܐ ܐܪܥܐ ܛܒܬܐ ܕܒܥܒܪܐ ܕܝܘܪܕܢܢ. ܛܘܪܐ ܗܢܐ ܛܒܐ ܘܠܒܢܢ.

9. Deuteronomy 3:26

   ܘܪܓܙ ܥܠܝ ܡܪܝܐ ܡܛܠܬܟܘܢ ܘܠܐ ܫܡܥܢܝ. ܘܐܡܪ ܠܝ ܡܪܝܐ ܣ̇ܦܩ ܠܟ. ܠܐ ܬܘܣܦ ܬܘܒ ܠܡܡܠܠܘ ܩܕܡܝ ܦܬܓܡܐ ܗܢܐ.

10. Deuteronomy 3:27

    ܣܩ ܠܪܝܫ ܪܡܬܐ. ܘܐܪܝܡ ܥܝ̈ܢܝܟ ܠܡܕܢܚܐ ܘܠܡܥܪܒܐ. ܘܠܓܪܒܝܐ ܘܠܬܝܡܢܐ. ܘܚܙܝܗ̇ ܒܥܝ̈ܢܝܟ. ܘܠܐ ܬܥܒܪ ܝܘܪܕܢܢ ܗܢܐ.

11. Deuteronomy 3:28

    ܘܦܩܕ ܠܝܫܘܥ ܘܚܝܠܝܗܝ ܘܥܫܢܝܗܝ. ܡܛܠ ܕܗܘ ܢܥܒܪ ܩܕܡ ܥܡܐ ܗܢܐ. ܘܗܘ ܢܘܪܬ ܐܢܘܢ ܐܪܥܐ ܕܬܚܙܐ .

12. Deuteronomy 3:29

    ܘܝܬܒܢ ܒܢܚܠܐ ܠܘܩܒܠ ܒܝܬ ܦܥܘܪ.

13. Deuteronomy 4:1

    ܡܟܝܠ ܐܝܣܪܝܠ ܫܡܥ ܢܡ̈ܘܣܐ ܘܕܝ̈ܢܐ ܕܡܠܦ ܐܢܐ ܠܟܘܢ ܝܘܡܢܐ ܠܡܥܒܕ. ܕܬܚܘܢ ܘܬܥܠܘܢ ܘܬܐܪܬܘܢ ܐܪܥܐ ܕܝ̇ܗܒ ܠܟܘܢ ܡܪܝܐ ܐܠܗܐ ܕܐ̈ܒܗܝܟܘܢ.

14. Deuteronomy 4:2

    ܠܐ ܬܘܣܦܘܢ ܥܠ ܦܘܩܕܢܐ ܕܡܦܩܕ ܐܢܐ ܠܟܘܢ. ܘܠܐ ܬܒܨܪܘܢ ܡܢܗ. ܐܠܐ ܛܪܘ ܦܘܩܕܢܗ ܕܡܪܝܐ ܐܠܗܟܘܢ ܕܡܦܩܕ ܐܢܐ ܠܟܘܢ.

15. Deuteronomy 4:3

    ܥܝ̈ܢܝܟܘܢ ܚܙ̈ܝ ܟܠ ܡܕܡ ܕܥܒܕ ܡܪܝܐ ܠܒܥܠ ܦܥܘܪ. ܡܛܠ ܕܟܠ ܓܒܪܐ ܕܐܙܠ ܒܬܪ ܒܥܠ ܦܥܘܪ ܐܘܒܕܗ ܡܪܝܐ ܐܠܗܟܘܢ ܡܢ ܒܝܢܬܟܘܢ.

16. Deuteronomy 4:4

    ܘܐܢܬܘܢ ܕܐܬܢܩܦܬܘܢ ܠܡܪܝܐ ܐܠܗܟܘܢ. ܗܐ ܚܝ̈ܝܢ ܐܢܬܘܢ ܟܠܟܘܢ ܥܕܡܐ ܠܝܘܡܢܐ.

17. Deuteronomy 4:5

    ܚܙܘ ܕܐܠܦܬܟܘܢ ܢܡ̈ܘܣܐ ܘܕܝ̈ܢܐ. ܐܝܟܢܐ ܕܦܩܕܢܝ ܡܪܝܐ ܐܠܗܝ. ܕܬܥܒܕܘܢ ܐܢܘܢ ܒܐܪܥܐ ܕܥ̇ܐܠܝܢ ܐܢܬܘܢ ܠܗ̇ ܠܡܐܪܬܗ̇.

18. Deuteronomy 4:6

    ܘܬܛܪܘܢ ܘܬܥܒܕܘܢ ܐܢܘܢ ܕܗܝ ܗܝ ܚܟܡܬܟܘܢ ܘܣܘܟܠܟܘܢ ܠܥܝܢ ܥܡ̈ܡܐ. ܕܢܫܡܥܘܢ ܗܠܝܢ ܟܠܗܘܢ ܢܡ̈ܘܣܐ. ܘܢܐܡܪܘܢ ܕܚܟܝܡ ܗܘ ܘܣܟܘܠܬܢ ܥܡܐ ܗܢܐ ܪܒܐ.

19. Deuteronomy 4:7

    ܐܝܢܘ ܓܝܪ ܥܡܐ ܪܒܐ ܕܩܪܝܒ ܠܗ ܐܠܗܗ. ܐܝܟ ܡܪܝܐ ܐܠܗܢ ܒܟܠ ܕܩ̇ܪܝܢܢ ܠܗ.

20. Deuteronomy 4:8

    ܘܐܝܢܘ ܥܡܐ ܪܒܐ ܕܐܝܬ ܠܗ ܢܡ̈ܘܣܐ ܘܕܝ̈ܢܐ ܙܕܝܩ̈ܐ. ܐܝܟ ܟܘܠܗ ܢܡܘܣܐ ܗܢܐ ܕܝ̇ܗܒ ܐܢܐ ܩܕܡܝܟܘܢ ܝܘܡܢܐ.

21. Deuteronomy 4:9

    ܒܠܚܘܕ ܐܙܕܗܪܘ ܛܒ. ܘܛܪܘ ܢܦܫ̈ܬܟܘܢ ܕܠܐ ܬܛܥܘܢ ܟܘܠ ܦܬ̈ܓܡܐ ܕܚ̈ܙܝ ܥܝ̈ܢܝܟܘܢ. ܘܠܐ ܢܥܒܪܘܢ ܡܢ ܠܒܟܘܢ ܟܠܗܘܢ ܝܘܡ̈ܝ ܚܝ̈ܝܟܘܢ. ܘܐܘܕܥܘ ܐܢܘܢ ܠܒܢܝ̈ܟܘܢ ܘܠܒܢ̈ܝ ܒ̈ܢܝܟܘܢ.

22. Deuteronomy 4:10

    ܝܘܡܐ ܕܩܡܬܘܢ ܩܕܡ ܡܪܝܐ ܐܠܗܟܘܢ ܒܚܘܪܝܒ. ܟܕ ܐܡܪ ܠܝ ܡܪܝܐ ܟܢܫ ܩܕܡܝ ܠܥܡܐ ܘܐܫܡܥ ܐܢܘܢ ܦܬ̈ܓܡܝ. ܘܢܐܠܦܘܢ ܠܡܕܚܠ ܩܕܡܝ ܟܠܗܘܢ ܝܘܡ̈ܬܐ ܕܚܝ̈ܝܢ ܒܐܪܥܐ ܘܠܒܢ̈ܝܗܘܢ ܢܠܦܘܢ.

23. Deuteronomy 4:11

    ܘܩܪܒܬܘܢ ܘܩܡܬܘܢ ܒܫܦܘ̈ܠܝ ܛܘܪܐ. ܘܛܘܪܐ ܡܬܓܘܙܠ ܗܘܐ ܒܢܘܪܐ. ܥܕܡܐ ܠܠܒܐ ܕܫܡܝܐ. ܘܚܫܘܟܐ ܘܥܢܢܐ ܘܥܪܦܠܐ.

24. Deuteronomy 4:12

    ܘܡܠܠ ܡܪܝܐ ܥܡܟܘܢ ܒܛܘܪܐ ܡܢ ܓܘ ܢܘܪܐ. ܩܠܐ ܕܡܡܠܠܐ ܫ̇ܡܥܝܢ ܗܘܝܬܘܢ. ܘܕܡܘܬܐ ܠܐ ܚ̇ܙܝܢ ܗܘܝܬܘܢ. ܐܠܐ ܐܢ ܩܠܐ ܒܠܚܘܕ.

25. Deuteronomy 4:13

    ܘܚܘܝܟܘܢ ܩܝܡܗ. ܘܦܩܕܟܘܢ ܕܬܥܒܕܘܢ ܥܣܪܐ ܦܬ̈ܓܡܝܢ. ܘܟܬܒ ܐܢܘܢ ܥܠ ܬܪ̈ܬܝܢ ܠܘܚ̈ܐ ܕܟܐܦܐ.

26. Deuteronomy 4:14

    ܘܠܝ ܦܩܕܢܝ ܡܪܝܐ ܒܙܒܢܐ ܗ̇ܘ. ܕܐܠܦܟܘܢ ܢܡ̈ܘܣܐ ܘܕܝ̈ܢܐ. ܕܬܥܒܕܘܢ ܐܢܘܢ ܒܐܪܥܐ ܕܥ̇ܒܪܝܢ ܐܢܬܘܢ ܠܬܡܢ ܠܡܐܪܬܗ̇.

27. Deuteronomy 4:15

    ܐܙܕܗܪܘ ܛܒ ܒܢܦܫܟܘܢ. ܡܛܠ ܕܠܐ ܚܙܝܬܘܢ ܕܡܘܬܐ ܒܝܘܡܐ ܕܡܠܠ ܡܪܝܐ ܥܡܟܘܢ ܒܚܘܪܝܒ ܡܢ ܓܘ ܢܘܪܐ.

28. Deuteronomy 4:16

    ܕܠܐ ܬܚܒܠܘܢ. ܘܬܥܒܕܘܢ ܠܟܘܢ ܨܠܡ̈ܐ ܘܕܡ̈ܘܬܐ ܕܟܠ ܓܢܣ . ܕܡܘܬܐ ܕܕܟܪܐ ܐܘ ܕܢܩܒܬܐ.

29. Deuteronomy 4:17

    ܕܡܘܬܐ ܕܟܠ ܒܥܝܪܐ ܕܐܝܬ ܒܐܪܥܐ. ܕܡܘܬܐ ܕܟܠ ܦܪܚܬܐ ܕܓܦܐ ܕܦ̇ܪܚܐ ܒܫܡܝܐ.

30. Deuteronomy 4:18

    ܕܡܘܬܐ ܕܟܠ ܪܚܫܐ ܕܐܪܥܐ . ܕܡܘܬܐ ܕܟܠ ܢܘ̈ܢܐ ܕܒܝܡܐ ܕܠܬܚܬ ܡܢ ܐܪܥܐ.

31. Deuteronomy 4:19

    ܘܕܠܐ ܬܪܝܡܘܢ ܥܝ̈ܢܝܟܘܢ ܠܫܡܝܐ. ܘܬܚܙܘܢ ܫܡܫܐ ܘܣܗܪܐ ܘܟ̈ܘܟܒܐ. ܘܟܠܗܘܢ ܚܝ̈ܠܘܬܐ ܕܫܡܝܐ. ܘܬܛܥܘܢ ܘܬܣܓܕܘܢ ܠܗܘܢ ܘܬܦܠܚܘܢ ܐܢܘܢ. ܕܦܠܓ ܐܢܘܢ ܡܪܝܐ ܐܠܗܟܘܢ. ܠܟܠܗܘܢ ܥܡ̈ܡܐ ܕܬܚܝܬ ܫܡܝܐ . . .

32. Deuteronomy 4:20

    ܘܠܟܘܢ ܩܪܒ ܡܪܝܐ. ܘܐܦܩܟܘܢ ܡܢ ܟܘܪܐ ܕܦܪܙܠܐ ܡܢ ܡܨܪܝܢ. ܕܬܗܘܘܢ ܠܗ ܥܡܐ ܘܝܪܬܘܬܐ ܐܝܟ ܕܝܘܡܢܐ.

33. Deuteronomy 4:21

    ܘܪܓܙ ܥܠܝ ܡܪܝܐ ܡܛܠ ܦܬ̈ܓܡܝܟܘܢ. ܘܝܡܐ ܕܠܐ ܐܥܒܪ ܝܘܪܕܢܢ ܗܢܐ. ܘܠܐ ܐܥܘܠ ܠܐܪܥܐ ܛܒܬܐ. ܕܝ̇ܗܒ ܠܟܘܢ ܡܪܝܐ ܐܠܗܟܘܢ ܝܘܪܬܢܐ.

34. Deuteronomy 4:22

    ܡܛܘܠ ܕܐܢܐ ܡ̇ܐܬ ܐܢܐ ܒܐܪܥܐ ܗܕܐ. ܘܠܐ ܥ̇ܒܪ ܐܢܐ ܝܘܪܕܢܢ ܗܢܐ. ܐܢܬܘܢ ܕܝܢ ܥ̇ܒܪܝܢ ܐܢܬܘܢ. ܘܝ̇ܪܬܝܢ ܐܢܬܘܢ ܐܪܥܐ ܗܕܐ ܛܒܬܐ .

35. Deuteronomy 4:23

    ܐܙܕܗܪܘ ܕܠܐ ܬܛܥܘܢ ܩܝܡܗ ܕܡܪܝܐ ܐܠܗܟܘܢ ܕܐܩܝܡ ܥܡܟܘܢ. ܘܬܥܒܕܘܢ ܠܟܘܢ ܨ̈ܠܡܐ ܘܕܡ̈ܘܬܐ. ܕܟܠ ܡܕܡ ܕܦܩܕܟܘܢ ܡܪܝܐ ܐܠܗܟܘܢ.

36. Deuteronomy 4:24

    ܡܛܠ ܕܡܪܝܐ ܐܠܗܟܘܢ ܢܘܪܐ ܗܘ ܐܟܠܬܐ. ܘܐܠܗܐ ܗܘ ܛܢܢܐ.

37. Deuteronomy 4:25

    ܘܟܕ ܬܘܠܕܘܢ ܒܢ̈ܝܐ ܐܘ ܒܢ̈ܝ ܒܢ̈ܝܐ. ܘܢܥܬܩܘܢ ܒܐܪܥܐ. ܘܬܚܒܠܘܢ ܘܬܥܒܕܘܢ ܨ̈ܠܡܐ ܘܕܡ̈ܘܬܐ ܕܟܠ ܡܕܡ. ܘܬܥܒܕܘܢ ܕܒܝܫ ܩܕܡ ܡܪܝܐ ܐܠܗܟܘܢ ܘܬܪܓܙܘܢܗ.

38. Deuteronomy 4:26

    ܣ̇ܗܕܬ ܒܟܘܢ ܝܘܡܢܐ ܫܡܝܐ ܘܐܪܥܐ. ܕܡܐܒܕ ܐ̇ܒܕܝܢ ܐܢܬܘܢ. ܒܥܓܠ ܡܢ ܐܪܥܐ ܕܥ̇ܒܪܝܢ ܐܢܬܘܢ ܝܘܪܕܢܢ ܠܡܐܪܬܗ̇. ܘܠܐ ܬܣܓܘܢ ܒܗ̇ ܝܘܡ̈ܬܐ. ܐܠܐ ܡܐܒܕ ܬܐܒܕܘܢ.

39. Deuteronomy 4:27

    ܘܢܒܕܪܟܘܢ ܡܪܝܐ ܒܝܬ ܥܡ̈ܡܐ. ܘܬܫܬܚܪܘܢ ܩܠܝܠ ܒܡܢܝܢܐ. ܒܝܬ ܥܡ̈ܡܐ ܕܢܒܕܪܟܘܢ ܡܪܝܐ ܐܠܗܟܘܢ ܠܬܡܢ.

40. Deuteronomy 4:28

    ܘܬܦܠܚܘܢ ܬܡܢ ܠܐ̈ܠܗܐ ܐܚܪ̈ܢܐ ܥܒ̇ܕ ܐ̈ܝܕܝܐ ܕܒܢ̈ܝ ܐܢܫܐ. ܕܩܝܣܐ ܘܕܟܐܦܐ. ܕܠܐ ܚ̇ܙܝܢ ܘܠܐ ܫ̇ܡܥܝܢ. ܘܠܐ ܐ̇ܟܠܝܢ ܘܠܐ ܡܪ̈ܝܚܝܢ.

41. Deuteronomy 4:29

    ܘܬܒܥܘܢܗ ܬܡܢ ܠܡܪܝܐ ܐܠܗܟܘܢ ܘܬܫܟܚܘܢܗ. ܟܕ ܬܥܩܒܘܢ ܥܠܘܗܝ ܡܢ ܟܠܗ ܠܒܟܘܢ. ܘܡܢ ܟܠܗ̇ ܢܦܫܟܘܢ.

42. Deuteronomy 4:30

    ܡܐ ܕܥܩܬ ܠܟܘܢ ܘܡܛܝܟܘܢ ܗܠܝܢ ܟܠܗܘܢ ܦܬ̈ܓܡܐ ܒܚܪܬܐ ܕܝܘܡ̈ܬܐ. ܘܬܬܦܢܘܢ ܠܘܬ ܡܪܝܐ ܐܠܗܟܘܢ ܘܬܫܡܥܘܢ ܒܩܠܗ.

43. Deuteronomy 4:31

    ܡܛܠ ܕܐܠܗܐ ܗܘ ܡܪܚܡܢܐ ܡܪܝܐ ܐܠܗܟܘܢ. ܠܐ ܢܚܒܠܟܘܢ ܘܠܐ ܢܫܒܘܩܟܘܢ. ܘܠܐ ܢܛܥܐ ܩܝܡܐ ܕܝܡܐ ܠܐ̈ܒܗܝܟܘܢ.

44. Deuteronomy 4:32

    ܐܠܐ ܫܐܠܘ ܥܠ ܝܘܡ̈ܬܐ ܩ̈ܕܡܝܐ ܕܗܘܘ ܩܕܡܝܟܘܢ. ܡܢ ܝܘܡܐ ܕܒܪܐ ܐܠܗܐ ܠܐܢܫܐ ܥܠ ܐܪܥܐ. ܡܢ ܣ̈ܘܦܝ ܫܡܝܐ ܘܥܕܡܐ ܠܣ̈ܘܦܝ ܫܡܝܐ. ܐܢ ܗܘܐ ܐܝܟ ܗܢܐ ܦܬܓܡܐ ܪܒܐ ܐܘ ܐܫܬܡܥ ܐܟܘܬܗ.

45. Deuteronomy 4:33

    ܐܢ ܫܡܥ ܥܡܐ ܐܚܪܢܐ ܩܠܗ ܕܐܠܗܐ ܕܡܡܠܠ ܡܢ ܓܘ ܢܘܪܐ. ܐܝܟ ܕܫܡܥܬܘܢ ܐܢܬܘܢ ܘܚܝܝܬܘܢ.

46. Deuteronomy 4:34

    ܐܘ ܢܣܝܘ ܠܐܠܗܐ ܕܐܙܠ ܘܢܣܒ ܠܗ ܥܡܐ ܡܢ ܓܘ ܥܡܐ. ܒܢ̈ܣܝܘܢܐ ܘܒܐ̈ܬܘܬܐ. ܘܒܬܕܡܪ̈ܬܐ ܘܒܩܪ̈ܒܐ. ܘܒܐܝܕܐ ܬܩܝܦܬܐ ܘܒܕܪܥܐ ܪܡܐ. ܘܒܚ̈ܙܘܢܐ ܪ̈ܘܪܒܐ. ܟܠ ܕܥܒܕ ܡܪܝܐ ܐܠܗܟܘܢ ܠܡܨܪ̈ܝܐ ܠܥܢ̈ܝܟܘܢ.

47. Deuteronomy 4:35

    ܐܢܬܘܢ ܚܙܝ̣ܬܘܢ ܘܝܕܥܬܘܢ ܕܡܪܝܐ ܗܘ ܐܠܗܐ. ܘܠܝܬ ܬܘܒ ܠܒܪ ܡܢܗ.

48. Deuteronomy 4:36

    ܡܢ ܫܡܝܐ ܐܫܡܥܟܘܢ ܩܠܗ ܠܡܠܦܘܬܟܘܢ. ܘܥܠ ܐܪܥܐ ܚܘܝܟܘܢ ܢܘܪܗ ܪܒܬܐ. ܘܦܬ̈ܓܡܘܗܝ ܐܫܡܥܟܘܢ ܡܢ ܓܘ ܢܘܪܐ.

49. Deuteronomy 4:37

    ܘܒܕܪܚܡ ܠܐ̈ܒܗܝܟܘܢ ܓܒܐ ܠܙܪܥܗܘܢ ܒܬܪܗܘܢ. ܘܐܦܩܟܘܢ ܒܦܪܨܘܦܗ ܒܚܝܠܐ ܪܒܐ ܡܢ ܡܨܪܝܢ.

50. Deuteronomy 4:38

    ܠܡܘܒܕܘ ܡܢ ܩܕܡܝܟܘܢ ܥܡ̈ܡܐ ܕܪ̈ܘܪܒܝܢ ܘܥܫܝ̈ܢܝܢ ܡܢܟܘܢ. ܕܢܥܠܟܘܢ ܘܢܬܠ ܠܟܘܢ ܐܪܥܗܘܢ ܝܘܪܬܢܐ ܐܝܟ ܕܝܘܡܢܐ.

51. Deuteronomy 4:39

    ܘܬܕܥܘܢ ܝܘܡܢܐ ܘܬܦܢܘܢ ܠܒܟܘܢ. ܡܛܠ ܕܡܪܝܐ ܗܘ ܐܠܗܐ ܒܫܡܝܐ ܡܢ ܠܥܠ. ܘܥܠ ܐܪܥܐ ܡܢ ܠܬܚܬ. ܘܠܝܬ ܬܘܒ ܠܒܪ ܡܢܗ.

52. Deuteronomy 4:40

    ܛܪܘ ܢܡ̈ܘܣܘܗܝ ܘܦܘܩ̈ܕܢܘܗܝ. ܕܡܦܩܕ ܐܢܐ ܠܟܘܢ ܝܘܡܢܐ. ܕܢܛܐܒ ܠܟܘܢ ܘܠܒܢ̈ܝܟܘܢ ܒܬܪܟܘܢ. ܘܬܣܓܘܢ ܝܘܡ̈ܬܐ ܒܐܪܥܐ ܕܝ̇ܗܒ ܠܟܘܢ ܡܪܝܐ ܐܠܗܟܘܢ ܟܠܗܘܢ ܝܘܡ̈ܬܐ.

53. Deuteronomy 4:41

    ܗ̇ܝ ܕܝܢ ܦܪܫ ܡܘܫܐ ܬܠܬ ܩܘܪ̈ܝܐ ܒܥܒܪܐ ܕܝܘܪܕܢܢ ܡܢ ܡܕܢܚ̈ܝ ܫܡܫܐ.

54. Deuteronomy 4:42

    ܕܢܥܪܘܩ ܠܬܡܢ ܩ̇ܛܘܠܐ ܕܢܩܛܘܠ ܠܚܒܪܗ ܕܠܐ ܒܨܒܝܢܗ. ܘܠܐ ܣ̇ܢܐ ܗܘܐ ܠܗ ܡܢ ܐܬܡܠܝ ܘܡܢ ܡܢܬܡܠܝ . ܘܢܥܪܘܩ ܠܚܕܐ ܡܢ ܗܠܝܢ ܩܘܪ̈ܝܐ ܘܢܚܐ.

55. Deuteronomy 4:43

    ܚܕܐ ܡܢܗܝܢ ܒܘܨܪ ܕܒܡܕܒܪܐ. ܒܐܪܥܐ ܕܦܩܥܬܐ ܕܪܘܒܝܠ. ܘܐܚܪܬܐ ܪܡܬ ܓܠܥܕ ܕܓܕ. ܘܓܘܠܢ ܕܒܡܬܢܝܢ ܕܡܢܫܐ.

56. Deuteronomy 4:44

    ܗܢܐ ܢܡܘܣܐ ܕܣܡ ܡܘܫܐ ܩܕܡ ܒܢ̈ܝ ܐܝܣܪܝܠ.

57. Deuteronomy 4:45

    ܗܠܝܢ ܣܗ̈ܕܘܬܐ ܘܢܡ̈ܘܣܐ ܘܕܝ̈ܢܐ ܕܡܠܠ ܡܘܫܐ ܥܡ ܒܢ̈ܝ ܐܝܣܪܝܠ. ܟܕ ܢܦܩܘ ܡܢ ܡܨܪܝܢ.

58. Deuteronomy 4:46

    ܒܥܒܪܐ ܕܝܘܪܕܢܢ. ܒܢܚܠܐ ܠܘܩܒܠ ܒܝܬ ܦܥܘܪ. ܒܐܪܥܐ ܕܣܝܚܘܢ ܡܠܟܐ ܕܐܡܘܪ̈ܝܐ ܕܝ̇ܬܒ ܗܘܐ ܒܚܫܒܘܢ. ܕܩܛܠܗ ܡܘܫܐ ܘܒܢ̈ܝ ܐܝܣܪܝܠ. ܟܕ ܢܦܩܘ ܡܢ ܡܨܪܝܢ.

59. Deuteronomy 4:47

    ܘܝܪܬܘ ܐܪܥܗ. ܘܐܪܥܐ ܕܥܘܓ ܡܠܟܐ ܕܡܬܢܝܢ. ܬܪ̈ܝܢ ܡ̈ܠܟܐ ܕܐܡܘܪ̈ܝܐ ܕܒܥܒܪܐ ܕܝܘܪܕܢܢ ܡܢ ܡܕܢܚ̈ܝ ܫܡܫܐ.

60. Deuteronomy 4:48

    ܡܢ ܥܕܘܥܝܪ ܕܥܠ ܣܦܬܐ ܕܢܚܠܐ ܕܐܪܢܘܢ. ܘܥܕܡܐ ܠܛܘܪܐ ܕܣܪܝܘܢ. ܕܗܘܝܘ ܚܪܡܘܢ.

61. Deuteronomy 4:49

    ܘܟܠܗ̇ ܥܪܒܐ ܕܒܥܒܪܐ ܕܝܘܪܕܢܢ ܡܢ ܡܕܢܚܐ. ܘܥܕܡܐ ܠܝܡܐ ܕܥܪܒܐ ܕܬܚܝܬ ܐܫܕܘܕ ܘܦܣܓܐ.

62. Deuteronomy 5:1

    ܘܩܪܐ ܡܘܫܐ ܠܟܠܗ ܐܝܣܪܝܠ ܘܐܡܪ ܠܗܘܢ. ܫܡܥ ܐܝܣܪܝܠ ܢܡ̈ܘܣܐ ܘܕܝ̈ܢܐ ܕܐ̇ܡܪ ܐܢܐ ܩܕܡܝܟܘܢ ܝܘܡܢܐ. ܕܬܐܠܦܘܢ ܐܢܘܢ. ܘܬܛܪܘܢ ܐܢܘܢ ܘܬܥܒܕܘܢ ܐܢܘܢ.

63. Deuteronomy 5:2

    ܡܪܝܐ ܐܠܗܢ ܐܩܝܡ ܥܡܢ ܩܝܡܐ ܒܚܘܪܝܒ.

64. Deuteronomy 5:3

    ܠܐ ܗܘܐ ܥܡ ܐ̈ܒܗܝܢ ܐܩܝܡ ܡܪܝܐ ܩܝܡܐ ܗܢܐ. ܐܠܐ ܥܡܢ. ܚܢܢ ܕܗܪܟܐ ܚܢܢ ܝܘܡܢܐ ܘܟܠܢ ܚܝ̈ܝܢ ܚܢܢ.

65. Deuteronomy 5:4

    ܐ̈ܦܝܢ ܠܘܩܒܠ ܐ̈ܦܝܢ ܡܠܠ ܡܪܝܐ ܥܡܟܘܢ ܒܛܘܪܐ ܡܢ ܓܘ ܢܘܪܐ.

66. Deuteronomy 5:5

    ܘܐܢܐ ܩ̇ܐܡ ܗܘ̇ܝܬ ܒܝܬ ܡܪܝܐ ܘܠܟܘܢ. ܒܙܒܢܐ ܗ̇ܘ. ܕܐܚܘܝܟܘܢ ܦ̈ܬܓܡܘܗܝ ܕܡܪܝܐ ܐܠܗܟܘܢ . ܟܕ ܕܚܠܬܘܢ ܡܢ ܩܕܡ ܢܘܪܐ. ܘܠܐ ܣܠܩܬܘܢ ܠܛܘܪܐ ܘܐܡܪ.

67. Deuteronomy 5:6

    ܐܢܐ ܐܢܐ ܡܪܝܐ ܐܠܗܟ ܕܐܦܩܬܟ ܡܢ ܐܪܥܐ ܕܡܨܪܝܢ ܡܢ ܒܝܬ ܥܒܕܘܬܐ.

68. Deuteronomy 5:7

    ܠܐ ܢܗܘܐ ܠܟ ܐܠܗ ܐܚܪܝܢ ܠܒܪ ܡܢܝ.

69. Deuteronomy 5:8

    ܠܐ ܬܥܒܕ ܠܟ ܟܠ ܨܠܡ ܘܟܠ ܕܡܘ. ܕܐܝܬ ܒܫܡܝܐ ܡܢ ܠܥܠ. ܘܕܐܝܬ ܒܐܪܥܐ ܡܢ ܠܬܚܬ . ܘܕܐܝܬ ܒܡ̈ܝܐ ܠܬܚܬ ܡܢ ܐܪܥܐ.

70. Deuteronomy 5:9

    ܠܐ ܬܣܓܘܕ ܠܗܘܢ ܘܠܐ ܬܦܠܘܚ ܐܢܘܢ. ܡܛܠ ܕܐܢܐ ܐܢܐ ܡܪܝܐ ܐܠܗܟ ܐܠܗܐ ܛܢܢܐ. ܦ̇ܪܥ ܚ̈ܘܒܐ ܕܐ̈ܒܗܐ ܥܠ ܒܢ̈ܝܐ . ܠܬܠܬܐ ܘܠܐܪ̈ܒܥܐ ܕܪ̈ܝܢ ܠܣ̈ܢܐܝ.

71. Deuteronomy 5:10

    ܘܥ̇ܒܕ ܐܢܐ ܛܝܒܘܬܐ ܠܐ̈ܠܦܝ ܕܪ̈ܐ . ܠܪ̈ܚܡܝ ܘܠܢ̇ܛܪ̈ܝ ܦܘܩ̈ܕܢܝ.

72. Deuteronomy 5:11

    ܠܐ ܬܐܡܐ ܒܫܡܗ ܕܡܪܝܐ ܐܠܗܟ ܒܕܓܠܘܬܐ. ܡܛܠ ܕܠܐ ܡܙܟܐ ܡܪܝܐ ܠܡ̇ܢ ܕܝܡ̇ܐ ܒܫܡܗ ܒܕܓܠܘܬܐ.

73. Deuteronomy 5:12

    ܛܪ ܝܘܡܐ ܕܫܒܬܐ ܘܩܕܫܝܗܝ. ܐܝܟ ܕܦܩܕܟ ܡܪܝܐ ܐܠܗܟ.

74. Deuteronomy 5:13

    ܫܬܐ ܝܘܡ̈ܝܢ ܬܦܠܘܚ ܘܬܥܒܕ ܟܠ ܥܒ̇ܕܟ.

75. Deuteronomy 5:14

    ܘܝܘܡܐ ܕܫܒܥܐ ܫܒܬܐ ܠܡܪܝܐ ܐܠܗܟ. ܠܐ ܬܥܒܕ ܒܗ̇ ܟܠ ܥܒ̇ܕ. ܐܢܬ ܘܒܪܟ ܘܒܪܬܟ ܘܥܒܕܟ ܘܐܡܬܟ ܘܬܘܪܟ ܘܚܡܪܟ ܘܟܘܠܗ̇ ܒܥܝܪܟ. ܘܥܡܘܪܐ ܕܐܝܬ ܒܩܘܪ̈ܝܟ ܕܢܬܬܢܝܚ ܥܒܕܟ ܘܐܡܬܟ ܐܟܘܬܟ.

76. Deuteronomy 5:15

    ܘܐܬܕܟܪ ܕܥܒܕܐ ܗܘܝܬ ܒܡܨܪܝܢ. ܘܐܦܩܟ ܡܪܝܐ ܐܠܗܟ ܡܢ ܬܡܢ. ܒܐܝܕܐ ܬܩܝܦܬܐ ܘܒܕܪܥܐ ܪܡܐ. ܡܛܠ ܗܢܐ ܦܩܕܟ ܡܪܝܐ ܐܠܗܟ. ܠܡܛܪ ܝܘܡܐ ܕܫܒܬܐ.

77. Deuteronomy 5:16

    ܝܩܪ ܠܐܒܘܟ ܘܠܐܡܟ. ܐܝܟ ܕܦܩܕܟ ܡܪܝܐ ܐܠܗܟ. ܕܢܣܓܘܢ ܝܘܡ̈ܝܟ ܘܢܛܐܒ ܠܟ ܒܐܪܥܐ ܛܒܬܐ ܕܝ̇ܗܒ ܠܟ ܡܪܝܐ ܐܠܗܟ.

78. Deuteronomy 5:17

    ܠܐ ܬܩܛܘܠ.

79. Deuteronomy 5:18

    ܠܐ ܬܓܘܪ.

80. Deuteronomy 5:19

    ܠܐ ܬܓܢܘܒ.

81. Deuteronomy 5:20

    ܠܐ ܬܣܗܕ ܥܠ ܚܒܪܟ ܣܗܕܘܬܐ ܕܓܠܬܐ.

82. Deuteronomy 5:21

    ܠܐ ܬܪܓ ܐܢܬܬܗ ܕܚܒܪܟ. ܠܐ ܬܪܓ ܒܝܬܗ ܕܚܒܪܟ. ܘܠܐ ܚܩܠܗ ܘܠܐ ܟܪܡܗ. ܘܠܐ ܥܒܕܗ ܘܠܐ ܐܡܬܗ. ܘܠܐ ܬܘܪܗ ܘܠܐ ܚܡܪܗ. ܘܠܐ ܟܠ ܡܕܡ ܕܐܝܬ ܠܚܒܪܟ.

83. Deuteronomy 5:22

    ܗܠܝܢ ܦܬ̈ܓܡܐ ܡܠܠ ܡܪܝܐ ܥܡ ܟܠܗ̇ ܟܢܘܫܬܐ ܒܛܘܪܐ. ܡܢ ܓܘ ܢܘܪܐ. ܒܥܢܢܐ ܘܒܥܪܦܠܐ. ܘܒܩܠܐ ܪܒܐ ܕܠܝܬ ܠܗ ܣܟܐ. ܘܟܬܒ ܐܢܘܢ ܥܠ ܬܪ̈ܬܝܢ ܠܘܚ̈ܐ ܕܟܐܦܐ. ܘܝܗܒ ܐܢܘܢ ܠܝ.

84. Deuteronomy 5:23

    ܘܟܕ ܫܡܥܬܘܢ ܩܠܐ ܡܢ ܓܘ ܚܫܘܟܐ. ܘܛܘܪܐ ܡܬܓܘܙܠ ܗܘܐ ܒܢܘܪܐ ܩܪܒܬܘܢ ܠܘܬܝ. ܟܠܟܘܢ ܪ̈ܫܐ ܕܫ̈ܒܛܝܟܘܢ ܘܣ̈ܒܝܟܘܢ.

85. Deuteronomy 5:24

    ܘܐܡܪܬܘܢ. ܗܐ ܚܘܝܢ ܡܪܝܐ ܐܠܗܢ ܫܘܒܚܗ ܘܪܒܘܬܗ. ܘܩܠܗ ܫܡܥܢ ܡܢ ܓܘ ܢܘܪܐ. ܝܘܡܢܐ ܚ̣ܙܝܢ ܕܡܠܠ ܐܠܗܐ ܥܡ ܐܢܫܐ ܘܚܝ̣ܐ.

86. Deuteronomy 5:25

    ܡܟܝܠ ܠܡܢܐ ܡ̇ܝܬܝܢܢ. ܘܬܐܟܠܢ ܢܘܪܐ ܗܕܐ ܪܒܬܐ. ܐܢ ܡܘܣܦܝܢܢ ܬܘܒ ܠܡܫܡܥ ܩܠܗ ܕܡܪܝܐ ܐܠܗܢ ܡ̇ܝܬܝܢܢ.

87. Deuteronomy 5:26

    ܡܢܘ ܓܝܪ ܒܪ ܒܣܪܐ ܕܐܟܘܬܢ ܕܫܡܥ ܩܠܗ ܕܐܠܗܐ ܚܝܐ ܕܡܡܠܠ ܡܢ ܓܘ ܢܘܪܐ ܘܚܝ̣ܐ.

88. Deuteronomy 5:27

    ܩܪܘܒ ܐܢܬ ܘܫܡܥ ܟܠܡܕܡ ܕܐ̇ܡܪ ܠܟ ܡܪܝܐ ܐܠܗܢ. ܘܐܢܬ ܐܡ̣ܪ ܠܢ . ܟܠ ܡܕܡ ܕܐܡܪ ܠܟ ܡܪܝܐ ܐܠܗܢ. ܘܢܫܡܥ ܘܢܥܒܕ.

89. Deuteronomy 5:28

    ܘܫܡܥ ܡܪܝܐ ܩܠܐ ܕܦܬ̈ܓܡܝܟܘܢ ܐܝܟ ܕܐܡܪܬܘܢ ܠܝ. ܘܐܡܪ ܠܝ ܡܪܝܐ. ܫܡ̇ܥܬ ܩܠܗ ܕܥܡܐ ܗܢܐ ܘܦܬ̈ܓܡܐ ܕܐܡܪܘ ܠܟ. ܫܦܝܪ ܟܠܡܕܡ ܕܡܠܠܘ.

90. Deuteronomy 5:29

    ܐܫܬܘܦ ܕܝܢ ܢܗܘܐ ܠܗܘܢ ܠܒܐ ܗܢܐ. ܠܡܕܚܠ ܩܕܡܝ. ܘܠܡܛܪ ܟܠܗܘܢ ܦܘܩ̈ܕܢܝ ܟܠܗܘܢ ܝܘܡ̈ܬܐ. ܕܢܛܐܒ ܠܗܘܢ ܘܠܒܢ̈ܝܗܘܢ ܠܥܠܡ.

91. Deuteronomy 5:30

    ܙܠ ܘܐܡܪ ܠܗܘܢ. ܐܬܦܢܘ ܠܟܘܢ ܠܡܫ̈ܟܢܝܟܘܢ.

92. Deuteronomy 5:31

    ܘܐܢܬ ܗܪܟܐ ܩܘܡ ܩܕܡܝ. ܘܐ̇ܡܪ ܠܟ ܟܠܗܘܢ ܦܘܩ̈ܕܢܝ ܘܢܡ̈ܘܣܝ ܘܕܝ̈ܢܝ. ܕܬܠܦ ܐܢܘܢ ܘܢܥܒܕܘܢ ܒܐܪܥܐ ܕܝ̇ܗܒ ܐܢܐ ܠܗܘܢ ܠܡܐܪܬܗ̇.

93. Deuteronomy 5:32

    ܛܪܘ ܘܥܒܕܘ ܐܝܟ ܕܦܩܕܟܘܢ ܡܪܝܐ ܐܠܗܟܘܢ. ܘܠܐ ܬܣܛܘܢ ܠܐ ܠܝܡܝܢܐ ܘܠܐ ܠܣܡܠܐ.

94. Deuteronomy 5:33

    ܒܟܠܗ̇ ܐܘܪܚܐ ܕܦܩܕܟܘܢ ܡܪܝܐ ܐܠܗܟܘܢ. ܙܠܘ ܕܬܚܘܢ ܘܢܛܐܒ ܠܟܘܢ. ܘܬܣܓܘܢ ܝܘܡ̈ܬܐ ܒܐܪܥܐ ܕܬܐܪܬܘܢ.

95. Deuteronomy 6:1

    ܗܠܝܢ ܦܘܩ̈ܕܢܐ ܘܢܡ̈ܘܣܐ ܘܕܝ̈ܢܐ. ܕܦܩܕܢܝ ܡܪܝܐ ܐܠܗܟܘܢ ܕܐܠܦܟܘܢ. ܕܬܥܒܕܘܢ ܒܐܪܥܐ ܕܥ̇ܐܠܝܢ ܐܢܬܘܢ ܠܗ̇ ܠܡܐܪܬܗ̇.

96. Deuteronomy 6:2

    ܘܬܕܚܠܘܢ ܡܢ ܡܪܝܐ ܐܠܗܟܘܢ. ܘܬܛܪܘܢ ܟܠܗܘܢ ܦܘܩ̈ܕܢܘܗܝ ܘܢܡ̈ܘܣܘܗܝ ܘܕܝ̈ܢܘܗܝ. ܕܡܦܩܕ ܐܢܐ ܠܟ. ܐܢܬ ܘܒܪܟ ܘܒܪ ܒܪܟ. ܟܠܗܘܢ ܝܘܡ̈ܝ ܚܝ̈ܝܟ ܕܢܣܓܘܢ ܝܘܡ̈ܬܟ.

97. Deuteronomy 6:3

    ܫܡܥ ܐܝܣܪܐܝܠ ܘܛܪ ܘܥܒܕ ܕܢܛܐܒ ܠܟ ܘܬܣܓܐ ܛܒ. ܐܝܟ ܕܐܡܪ ܠܟ ܡܪܝܐ ܐܠܗܐ ܕܐ̈ܒܗܝܟ. ܕܢܬܠ ܠܟ ܐܪܥܐ ܕܡܪܕܝܐ ܚܠܒܐ ܘܕܒܫܐ.

98. Deuteronomy 6:4

    ܫܡܥ ܐܝܣܪܝܠ. ܡܪܝܐ ܐܠܗܢ ܡܪܝܐ ܚܕ ܗܘ.

99. Deuteronomy 6:5

    ܪܚܡ ܠܡܪܝܐ ܐܠܗܟ. ܡܢ ܟܠܗ ܠܒܟ . ܘܡܢ ܟܠܗ̇ ܢܦܫܟ . ܘܡܢ ܟܠܗ ܩܢܝܢܟ.

100. Deuteronomy 6:6

     ܘܢܗܘܘܢ ܗܠܝܢ ܦܬ̈ܓܡܐ ܕܡܦܩܕ ܐܢܐ ܠܟ ܝܘܡܢܐ ܥܠ ܠܒܟ.

← Previous · Next → — showing 101–200 of 959

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.