← All works

Peshitta Deuteronomy

Peshitta (Syriac Old Testament) · 959 sections

1. Deuteronomy 1:1

   ܘܗܠܝܢ ܦܬ̈ܓܡܐ ܕܐܡܪ ܡܘܫܐ ܠܟܠܗ ܐܝܣܪܝܠ. ܒܥܒܪܐ ܕܝܘܪܕܢܢ ܒܡܕܒܪܐ. ܒܥܪܒܐ ܠܘܩܒܠ ܣܘܦ. ܒܝܬ ܦܪܢ ܘܒܝܬ ܬܦܠ. ܘܠܒܢܢ ܘܚܨܪܘܬ ܘܪܙܗܒ .

2. Deuteronomy 1:2

   ܡܪܕܐ ܚܕܥܣܪ ܝܘܡ̈ܝܢ ܡܢ ܚܘܪܝܒ ܠܛܘܪܐ ܕܣܥܝܪ. ܘܥܕܡܐ ܠܪܩܡ ܕܓܝܐ.

3. Deuteronomy 1:3

   ܘܗܘܐ ܒܫܢܬ ܐܪ̈ܒܥܝܢ ܒܝܪܚܐ ܕܚܕܥܣܪ ܒܚܕ ܒܝܪܚܐ. ܡܠܠ ܡܘܫܐ ܥܡ ܒܢ̈ܝ ܐܝܣܪܝܠ. ܟܠ ܡܕܡ ܕܦܩܕܗ ܡܪܝܐ ܥܠܝܗܘܢ.

4. Deuteronomy 1:4

   ܡܢ ܒܬܪ ܕܩܛܠ ܠܣܝܚܘܢ ܡܠܟܐ ܕܐܡܘܪ̈ܝܐ ܕܝ̇ܬܒ ܗܘܐ ܒܚܫܒܘܢ. ܘܠܥܘܓ ܡܠܟܐ ܕܡܬܢܝܢ ܕܝ̇ܬܒ ܗܘܐ ܒܥܣܬܪܘܬ ܘܒܐܪܕܥܝ.

5. Deuteronomy 1:5

   ܒܥܒܪܐ ܕܝܘܪܕܢܢ ܒܐܪܥܐ ܕܡܘܐܒ. ܫ̇ܪܝ ܡܘܫܐ ܡܦܫܩ ܢܡܘܣܐ ܗܢܐ ܘܐ̇ܡܪ.

6. Deuteronomy 1:6

   ܡܪܝܐ ܐܠܗܢ ܐܡܪ ܠܢ ܒܚܘܪܝܒ. ܣܓܝ ܠܟܘܢ ܕܝܬܒܬܘܢ ܒܛܘܪܐ ܗܢܐ.

7. Deuteronomy 1:7

   ܐܬܦܢܘ ܘܫܩܘܠܘ ܠܟܘܢ. ܘܥܘܠܘ ܠܛܘܪܐ ܕܐܡܘܪ̈ܝܐ ܘܠܟܠ ܚܕܪ̈ܘܗܝ. ܠܥܪܒܐ ܘܠܛܘܪܐ. ܘܠܫܦܠܐ ܘܠܬܝܡܢܐ ܘܠܣܦܪ̈ܝ ܝܡܐ. ܐܪܥܐ ܕܟܢ̈ܥܢܝܐ ܘܠܒܢܢ. ܥܕܡܐ ܠܢܗܪܐ ܪܒܐ ܢܗܪܐ ܦܪܬ.

8. Deuteronomy 1:8

   ܚܙܘ ܕܝܗ̇ܒܬ ܩܕܡܝܟܘܢ ܐܪܥܐ. ܥܘܠܘ ܘܝܪܬܘ ܐܪܥܐ ܕܝܡܐ ܡܪܝܐ ܠܐ̈ܒܗܝܟܘܢ. ܠܐܒܪܗܡ ܘܠܐܝܣܚܩ ܘܠܝܥܩܘܒ ܠܡܬܠ ܠܗܘܢ ܘܠܙܪܥܗܘܢ ܒܬܪܗܘܢ.

9. Deuteronomy 1:9

   ܘܐܡ̇ܪܬ ܠܟܘܢ ܒܗ ܒܙܒܢܐ ܗ̇ܘ. ܠܐ ܡܫܟܚ ܐܢܐ ܒܠܚܘܕܝ ܕܐܣܝܒܪܟܘܢ.

10. Deuteronomy 1:10

    ܡܪܝܐ ܐܠܗܟܘܢ ܐܣܓܝܟܘܢ. ܘܐܝܬܝܟܘܢ ܝܘܡܢܐ ܣܘܓܐܐ ܐܝܟ ܟ̈ܘܟܒܐ ܕܒܫܡܝܐ.

11. Deuteronomy 1:11

    ܡܪܝܐ ܐܠܗܐ ܕܐ̈ܒܗܝܟܘܢ ܢܘܣܦ ܥܠܝܟܘܢ ܐܟܘܬܟܘܢ ܐܠܦ ܙܒ̈ܢܝܢ. ܘܢܒܪܟܟܘܢ ܐܝܟܢܐ ܕܐܡܪ ܠܟܘܢ.

12. Deuteronomy 1:12

    ܐܝܟܢܐ ܗܟܝܠ ܡܫܟܚ ܐܢܐ ܕܐܣܝܒܪ ܒܠܚܘܕܝ. ܐܝܩܪܬܟܘܢ ܘܛܥܢܝ̈ܟܘܢ ܘܕܝ̈ܢܝܟܘܢ.

13. Deuteronomy 1:13

    ܓܒܘ ܠܟܘܢ ܓܒܪ̈ܐ ܕܚ̈ܟܝܡܝܢ ܘܣ̈ܟܘܠܬܢܝܢ ܘܝܕܝ̈ܥܝܢ ܠܫܒ̈ܛܝܟܘܢ. ܘܐܩܝܡ ܐܢܘܢ ܒܪܝܫܟܘܢ .

14. Deuteronomy 1:14

    ܘܥܢܝܬܘܢ ܘܐܡܪܬܘܢ ܠܝ. ܫܦܝܪ ܦܬܓܡܐ ܕܐܡܪܬ ܠܡܥܒܕ.

15. Deuteronomy 1:15

    ܘܕܒ̇ܪܬ ܪ̈ܫܐ ܕܫ̈ܒܛܝܟܘܢ ܓܒܪ̈ܐ ܚ̈ܟܝܡܐ ܘܝ̈ܕܝܥܐ. ܘܥܒܕܬ ܐܢܘܢ ܪ̈ܫܐ ܥܠܝܟܘܢ. ܪ̈ܫܝ ܐ̈ܠܦܐ ܘܪ̈ܫܝ ܡܐ̈ܘܬܐ. ܘܪ̈ܫܝ ܚܡܫܝܢ ܘܪ̈ܫܝ ܥܣܪܐ. ܘܣܦܪ̈ܐ ܠܫ̈ܒܛܝܟܘܢ.

16. Deuteronomy 1:16

    ܘܦ̇ܩܕܬ ܠܕܝ̇ܢ̈ܝܟܘܢ ܒܙܒܢܐ ܗ̇ܘ ܘܐܡ̇ܪܬ ܠܗܘܢ. ܗܘܝܬܘܢ ܫ̇ܡܥܝܢ ܒܝܬ ܐܚ̈ܝܟܘܢ ܘܕܝ̇ܢ̈ܝܢ ܩܘܫܬܐ. ܒܝܬ ܓܒܪܐ ܠܐܚܘܗܝ ܘܠܬܘܬܒܗ.

17. Deuteronomy 1:17

    ܠܐ ܬܣܒܘܢ ܒܐ̈ܦܐ ܒܕܝܢܐ. ܠܙܥܘܪܐ ܐܝܟ ܪܒܐ ܗܘܝܬܘܢ ܫ̇ܡܥܝܢ. ܠܐ ܬܕܚܠܘܢ ܡܢ ܩܕܡ ܓܒܪܐ. ܡܛܠ ܕܕܝܢܐ ܕܐܠܗܐ ܗܘ. ܘܦܬܓܡܐ ܕܗ̇ܘܐ ܩܫܐ ܡܢܟܘܢ. ܩܪܒܘܗܝ ܠܘܬܝ ܘܐܫܡܥܝܘܗܝ.

18. Deuteronomy 1:18

    ܘܦ̇ܩܕܬܟܘܢ ܒܙܒܢܐ ܗ̇ܘ ܟܠ ܦܬ̈ܓܡܐ ܕܬܥܒܕܘܢ .

19. Deuteronomy 1:19

    ܘܫܩܠܢ ܡܢ ܚܘܪܝܒ. ܘܗܠܟܢ ܒܟܠܗ ܗ̇ܘ ܡܕܒܪܐ ܪܒܐ ܘܕܚܝܠܐ. ܕܚܙܝܬܘܢ ܒܐܪܥܐ ܕܛܘܪܐ ܕܐܡܘܪ̈ܝܐ. ܐܝܟ ܕܦܩܕܢ ܡܪܝܐ ܐܠܗܢ. ܘܐܬܝܢ ܥܕܡܐ ܠܪܩܡ ܕܓܝܐ.

20. Deuteronomy 1:20

    ܘܐܡ̇ܪܬ ܠܟܘܢ. ܐܬܝܬܘܢ ܥܕܡܐ ܠܛܘܪܐ ܕܐܡܘܪ̈ܝܐ. ܕܡܪܝܐ ܐܠܗܢ ܝܗܒ ܠܢ.

21. Deuteronomy 1:21

    ܚܙܘ ܕܝܗܒ ܡܪܝܐ ܐܠܗܟܘܢ ܩܕܡܝܟܘܢ ܐܪܥܐ. ܣܩܘ ܘܝܪܬܘ ܐܪܥܐ. ܐܝܟܢܐ ܕܐܡܪ ܠܟܘܢ ܡܪܝܐ ܐܠܗܐ ܕܐ̈ܒܗܝܟܘܢ. ܠܐ ܬܕܚܠܘܢ ܘܠܐ ܬܬܪܗܒܘܢ.

22. Deuteronomy 1:22

    ܘܩܪܒܬܘܢ ܠܘܬܝ ܟܠܟܘܢ ܘܐܡܪܬܘܢ . ܢܫܕܪ ܓܒܪ̈ܐ ܩܕܡܝܢ ܢܓܫܘܢ ܠܢ ܐܪܥܐ. ܘܢܬܠܘܢ ܠܢ ܦܬܓܡܐ ܘܢܚܘܘܢܢ ܐܘܪܚܐ ܕܢܐܙܠ ܒܗ̇. ܘܩܘܪ̈ܝܐ ܕܢܥܘܠ ܠܗܝܢ.

23. Deuteronomy 1:23

    ܘܫܦܪ ܦܬܓܡܐ ܒܥܝܢ̈ܝ. ܘܕܒ̇ܪܬ ܡܢܟܘܢ ܬܪ̈ܥܣܪ ܓܒܪ̈ܝܢ. ܚܕ ܚܕ ܓܒܪܐ ܡܢ ܫܒܛܐ.

24. Deuteronomy 1:24

    ܘܐܬܦܢܝܘ ܘܣܠܩܘ ܠܛܘܪܐ. ܘܣܠܩܘ ܥܕܡܐ ܠܢܚܠܐ ܕܣܓܘܠܐ. ܘܓܫܘܗ̇ ܠܐܪܥܐ.

25. Deuteronomy 1:25

    ܘܢܣܒܘ ܒܐ̈ܝܕܝܗܘܢ ܡܢ ܦܐܪ̈ܐ ܕܐܪܥܐ ܘܐܝܬܝܘ ܠܢ. ܘܐܬܝܒܘܢ ܦܬܓܡܐ ܘܐܡܪܘ ܠܢ. ܛܒܐ ܗܝ ܐܪܥܐ ܕܝ̇ܗܒ ܠܢ ܡܪܝܐ ܐܠܗܢ.

26. Deuteronomy 1:26

    ܘܠܐ ܨܒܝܬܘܢ ܠܡܣܩ. ܐܠܐ ܡܪܡܪܬܘܢ ܡܠܬ ܦܘܡܗ ܕܡܪܝܐ ܐܠܗܢ.

27. Deuteronomy 1:27

    ܘܪܛܢܬܘܢ ܡܢ ܡܫ̈ܟܢܝܟܘܢ ܘܐܡܪܬܘܢ. ܡܛܠ ܕܣ̇ܢܐ ܗܘ ܠܢ ܡܪܝܐ ܐܦܩܢ ܡܢ ܐܪܥܐ ܕܡܨܪܝܢ . ܕܢܫܠܡܢ ܒܐܝܕܐ ܕܐܡܘܪ̈ܝܐ ܕܢܘܒܕܘܢܢ .

28. Deuteronomy 1:28

    ܠܐܝܟܐ ܣ̇ܠܩܝܢܢ. ܐ̈ܚܝܢ ܬܒܪܘ ܠܒܢ. ܘܐܡܪܘ ܠܢ. ܕܥܡܐ ܪܒ ܘܪܡ ܘܥܫܝܢ ܡܢܢ. ܘܩܘܪ̈ܝܐ ܪ̈ܘܪܒܢ ܘܟܪ̈ܝܟܢ ܥܕܡܐ ܠܫܡܝܐ. ܐܦ ܒܢ̈ܝ ܓܢܒܪ̈ܐ ܚܙܝܢ ܬܡܢ.

29. Deuteronomy 1:29

    ܘܐܡ̇ܪܬ ܠܟܘܢ ܠܐ ܬܕܚܠܘܢ ܘܠܐ ܬܙܘܥܘܢ ܡܢܗܘܢ.

30. Deuteronomy 1:30

    ܡܪܝܐ ܐܠܗܟܘܢ ܐ̇ܙܠ ܩܕܡܝܟܘܢ. ܘܗܘ ܡܬܟܬܫ ܚܠܦܝܟܘܢ. ܟܠ ܕܥܒܕ ܥܡܟܘܢ ܒܡܨܪܝܢ ܠܥܢܝ̈ܟܘܢ.

31. Deuteronomy 1:31

    ܘܒܡܕܒܪܐ ܕܚܙܝܬܘܢ ܕܬܪܣܝܟܘܢ ܡܪܝܐ ܐܠܗܟܘܢ. ܐܝܟ ܕܡܬܪܣܐ ܓܒܪܐ ܠܒܪܗ. ܒܟܠܗ̇ ܐܪܥܐ ܕܐܙܠܬܘܢ ܥܕܡܐ ܕܐܬܝܬܘܢ ܠܐܬܪܐ ܗܢܐ.

32. Deuteronomy 1:32

    ܘܒܦܬܓܡܐ ܗܢܐ ܠܐ ܡܗܝܡܢܝܢ ܐܢܬܘܢ ܒܡܪܝܐ ܐܠܗܟܘܢ.

33. Deuteronomy 1:33

    ܕܐ̇ܙܠ ܩܕܡܝܟܘܢ ܒܐܘܪܚܐ. ܠܡܬܩܢܘ ܠܟܘܢ ܐܬܪܐ ܕܬܫܪܘܢ ܒܗ. ܒܢܘܪܐ ܒܠܠܝܐ ܚܘܝܟܘܢ ܐܘܪܚܐ ܕܬܐܙܠܘܢ ܒܗ̇. ܘܒܥܢܢܐ ܒܐܝܡܡܐ.

34. Deuteronomy 1:34

    ܘܫܡܥ ܡܪܝܐ ܩܠܐ ܕܡ̈ܠܝܟܘܢ. ܘܪܓܙ ܘܐܝܡܐ ܘܐܡܪ.

35. Deuteronomy 1:35

    ܕܠܐ ܢܚܙܘܢ ܚܕ ܡܢ ܓܒܪ̈ܐ ܗܠܝܢ ܕܪܐ ܗܢܐ ܒܝܫܐ. ܐܪܥܐ ܛܒܬܐ ܕܝܡ̇ܝܬ ܠܡܬܠ ܠܐܒ̈ܗܝܟܘܢ.

36. Deuteronomy 1:36

    ܐܠܐ ܐܢ ܟܠܒ ܒܪ ܝܘܦܢܐ ܗܘ ܢܚܙܝܗ̇. ܘܠܗ ܐܬܠ ܐܪܥܐ ܕܗܠܟ ܒܗ̇ ܘܠܒܢ̈ܘܗܝ. ܚܠܦ ܕܫܡܠܝ ܒܬܪ ܡܪܝܐ.

37. Deuteronomy 1:37

    ܘܐܦ ܥܠܝ ܪܓܙ ܡܪܝܐ ܡܛܘܠܬܟܘܢ. ܘܐܡܪ ܠܝ. ܘܐܦ ܐܢܬ ܠܐ ܬܥܘܠ ܠܬܡܢ.

38. Deuteronomy 1:38

    ܐܠܐ ܐܢ ܝܫܘܥ ܒܪܢܘܢ ܕܩ̇ܐܡ ܩܕܡܝܟ ܗܘ ܢܥܘܠ ܠܬܡܢ. ܠܗ ܚܝܠ ܡܛܠ ܕܗܘ ܢܘܪܬܝܗ̇ ܠܐܝܣܪܝܠ.

39. Deuteronomy 1:39

    ܘܝܩܪܬܟܘܢ ܕܐܡܪܬܘܢ ܠܒܙܬܐ ܬܗܘܐ. ܘܒܢܝ̈ܟܘܢ ܕܠܐ ܝܕܥܘ ܝܘܡܢܐ ܛܒܬܐ ܘܒܝܫܬܐ. ܗܢܘܢ ܢܥܠܘܢ ܠܬܡܢ. ܘܠܗܘܢ ܐܬܠܝܗ̇ ܘܗܢܘܢ ܢܐܪܬܘܢܗ̇.

40. Deuteronomy 1:40

    ܘܐܢܬܘܢ ܐܬܦܢܘ ܠܟܘܢ. ܘܫܩܘܠܘ ܠܡܕܒܪܐ ܠܐܘܪܚܐ ܕܝܡܐ ܕܣܘܦ.

41. Deuteronomy 1:41

    ܘܥܢܝܬܘܢ ܘܐܡܪܬܘܢ ܠܝ. ܚܛܝܢ ܩܕܡ ܡܪܝܐ ܐܠܗܢ. ܚܢܢ ܢܣܩ ܘܢܬܟܬܫ ܐܝܟ ܕܦܩܕܢ ܡܪܝܐ ܐܠܗܢ. ܘܐܙܕܝܢܬܘܢ ܓܒܪ ܒܡܐ̈ܢܝ ܩܪܒܗ. ܘܐܬܓܪܓܬܘܢ ܠܡܣܩ ܠܛܘܪܐ.

42. Deuteronomy 1:42

    ܘܐܡܪ ܠܝ ܡܪܝܐ. ܐܡܪ ܠܗܘܢ. ܠܐ ܬܣܩܘܢ ܘܠܐ ܬܬܟܬܫܘܢ. ܡܛܠ ܕܠܐ ܗ̇ܘܝܬ ܒܝܢܬܟܘܢ. ܕܠܐ ܬܬܒܪܘܢ ܩܕܡ ܒ̈ܥܠܕܒܒܝܟܘܢ.

43. Deuteronomy 1:43

    ܘܐܡ̇ܪܬ ܠܟܘܢ ܘܠܐ ܫܡܥܬܘܢ. ܘܡܪܡܪܬܘܢ ܡܠܬ ܦܘܡܗ ܕܡܪܝܐ. ܘܐܡܪܚܬܘܢ ܘܣܠܩܬܘܢ ܠܛܘܪܐ.

44. Deuteronomy 1:44

    ܘܢܦܩܘ ܐܡܘܪ̈ܝܐ ܕܥ̇ܡܪܝܢ ܒܛܘܪܐ ܗ̇ܘ ܠܐܘܪܥܟܘܢ. ܘܪܕܦܘܟܘܢ ܐܝܟ ܕܒܘܪ̈ܐ ܡܬܢܢ̈ܐ. ܘܛܪܕܘܟܘܢ ܡܢ ܣܥܝܪ ܘܥܕܡܐ ܠܚܪܡܐ.

45. Deuteronomy 1:45

    ܘܝܬܒܬܘܢ ܘܒܟܝܬܘܢ ܩܕܡ ܡܪܝܐ. ܘܠܐ ܫܡܥ ܡܪܝܐ ܒܩܠܟܘܢ ܘܠܐ ܨܬܟܘܢ.

46. Deuteronomy 1:46

    ܘܝܬܒܬܘܢ ܒܪܩܡ ܝܘܡ̈ܬܐ ܣ̈ܓܝܐܐ. ܐܝܟ ܝܘܡ̈ܬܐ ܕܝܬܒܬܘܢ.

47. Deuteronomy 2:1

    ܘܐܬܦܢܝܢ ܘܫܩܠܢ ܠܡܕܒܪܐ ܒܐܘܪܚܐ ܕܝܡܐ ܕܣܘܦ. ܐܝܟ ܕܐܡܪ ܠܝ ܡܪܝܐ. ܘܐܬܟܪܟܢܝܗܝ ܠܛܘܪܐ ܕܣܥܝܪ ܝܘܡ̈ܬܐ ܣ̈ܓܝܐܐ.

48. Deuteronomy 2:2

    ܘܐܡܪ ܠܝ ܡܪܝܐ.

49. Deuteronomy 2:3

    ܣܓܝ ܠܟܘܢ ܗܐ ܡܢ ܕܡܬܟܪܟܝܢ ܐܢܬܘܢ ܛܘܪܐ ܗܢܐ. ܐܬܦܢܘ ܠܟܘܢ ܠܓܪܒܝܐ.

50. Deuteronomy 2:4

    ܘܠܥܡܐ ܦܩܕ ܘܐܡܪ ܠܗܘܢ. ܐܢܬܘܢ ܥ̇ܒܪܝܢ ܐܢܬܘܢ ܒܬܚܘܡܐ ܕܐ̈ܚܝܟܘܢ ܒܢ̈ܝ ܥܣܘ ܕܝ̇ܬܒܝܢ ܒܣܥܝܪ. ܘܢܕܚܠܘܢ ܡܢܟܘܢ. ܐܙܕܗܪܘ ܛܒ.

51. Deuteronomy 2:5

    ܘܠܐ ܬܬܓܪܘܢ ܒܗܘܢ. ܡܛܠ ܕܠܐ ܝ̇ܗܒ ܐܢܐ ܠܟܘܢ ܝܘܪܬܢܐ ܡܢ ܐܪܥܗܘܢ ܒܝܬ ܡܕܪܟ ܦܣܬܐ ܕܪܓܠܐ. ܡܛܠ ܕܝܘܪܬܢܐ ܠܥܣܘ ܝܗ̇ܒܬ ܛܘܪܐ ܕܣܥܝܪ.

52. Deuteronomy 2:6

    ܥܒܘܪܐ ܙܒܢܘ ܡܢܗܘܢ ܒܟܣܦܐ ܘܐܟܘܠܘ. ܘܐܦ ܡ̈ܝܐ ܙܒܢܘ ܡܢܗܘܢ ܒܟܣܦܐ ܘܐܫܬܘ.

53. Deuteronomy 2:7

    ܡܛܠ ܕܡܪܝܐ ܐܠܗܟܘܢ ܒܪܟܟܘܢ. ܒܟܠܗ ܥܒܕܐ ܕܐ̈ܝܕܝܟܘܢ. ܘܝܕܥ ܠܡܕܒܪܘܬܟܘܢ ܒܡܕܒܪܐ ܗܢܐ ܗܐ ܐܪ̈ܒܥܝܢ ܫ̈ܢܝܢ. ܡܪܝܐ ܐܠܗܟܘܢ ܥܡܟܘܢ. ܘܠܐ ܚܣܪ ܠܟܘܢ ܡܕܡ.

54. Deuteronomy 2:8

    ܘܥܒܪܢ ܡܢ ܠܘܬ ܐ̈ܚܝܢ ܒܢ̈ܝ ܥܣܘ ܕܝ̇ܬܒܝܢ ܒܣܥܝܪ. ܘܡܢ ܐܘܪܚܐ ܕܥܪܒܐ ܘܡܢ ܐܝܠܬ ܘܡܢ ܥܨܝܢܘܓܒܪ. ܘܐܬܦܢܝܢ ܘܥܒܪܢ ܠܢ ܠܐܘܪܚܐ ܕܡܕܒܪܐ ܕܡܘܐܒ.

55. Deuteronomy 2:9

    ܘܐܡܪ ܠܝ ܡܪܝܐ. ܠܐ ܬܐܠܘܨ ܠܡܘܐ̈ܒܝܐ. ܘܠܐ ܬܬܓܪܐ ܥܡܗܘܢ ܠܩܪܒܐ. ܡܛܠ ܕܠܐ ܝ̇ܗܒ ܐܢܐ ܠܟ ܡܢ ܐܪܥܗܘܢ ܝܘܪܬܢܐ. ܡܛܠ ܕܠܒܢ̈ܝ ܠܘܛ ܝܗܒܬܗ̇ ܝܘܪܬܢܐ.

56. Deuteronomy 2:10

    ܐ̈ܡܢܐ ܡܢ ܠܘܩܕܡ ܝܬܒܘ ܒܗ̇. ܥܡܐ ܕܪܒ ܘܣܓܝ. ܘܪܡ ܐܝܟ ܓܢܒܪ̈ܐ.

57. Deuteronomy 2:11

    ܓܢܒܪ̈ܐ ܐܢܘܢ. ܘܡܬܚܫܒܝܢ ܐܦ ܗܢܘܢ ܐܝܟ ܓܢܒܪ̈ܐ. ܘܡܘܐ̈ܒܝܐ ܩ̇ܪܝܢ ܠܗܘܢ ܐܡ̈ܢܐ.

58. Deuteronomy 2:12

    ܘܒܣܥܝܪ ܝܬܒܘ ܚܘܪ̈ܝܐ ܡܢ ܠܘܩܕܡ. ܘܒܢ̈ܝ ܥܣܘ ܝܪܬܘ ܐܢܘܢ. ܘܐܘܒܕܘ ܐܢܘܢ ܡܢ ܩܕܡܝܗܘܢ. ܘܝܬܒܘ ܒܐܪܥܗܘܢ. ܐܝܟ ܕܥܒܕ ܐܝܣܪܝܠ ܠܐܪܥܐ ܕܝܪܬܘܬܗ. ܕܝܗܒ ܠܗܘܢ ܡܪܝܐ.

59. Deuteronomy 2:13

    ܡܟܝܠ ܩܘܡܘ ܥܒܪܘ ܢܚܠܐ ܕܙܪܕ. ܘܥܒܪܢ ܢܚܠܐ ܕܙܪܕ.

60. Deuteronomy 2:14

    ܘܝܘ̈ܡܬܐ ܕܗܠܟܢ ܡܢ ܪܩܡ ܕܓܝܐ ܥܕܡܐ ܕܥܒܪܢ ܢܚܠܐ ܕܙܪܕ. ܬܠܬܝܢ ܘܬܡܢܐ ܫ̈ܢܝܢ. ܥܕܡܐ ܕܣܦ ܟܘܠܗ ܕܪܐ ܕܓܒܪ̈ܐ ܩܪ̈ܒܬܢܐ ܡܢ ܓܘ ܡܫܪܝܬܐ. ܐܝܟ ܕܝܡܐ ܠܗܘܢ ܡܪܝܐ.

61. Deuteronomy 2:15

    ܐܦ ܐܝܕܗ ܕܡܪܝܐ ܗܘܬ ܒܗܘܢ. ܕܬܘܒܕ ܐܢܘܢ ܡܢ ܓܘ ܡܫܪܝܬܐ ܥܕܡܐ ܕܓܡܪܘ.

62. Deuteronomy 2:16

    ܘܟܕ ܓܡܪܘ ܟܠܗܘܢ ܓܒܪ̈ܐ ܥ̇ܒ̈ܕܝ ܩܪܒܐ ܠܡܡܬ ܡܢ ܓܘ ܥܡܐ.

63. Deuteronomy 2:17

    ܡܠܠ ܥܡܝ ܡܪܝܐ ܘܐܡܪ ܠܝ.

64. Deuteronomy 2:18

    ܐܢܬ ܥܒܪ ܐܢܬ ܝܘܡܢܐ ܠܬܚܘܡܐ ܕܡܘܐܒ ܘܠܥܕ .

65. Deuteronomy 2:19

    ܘܬܬܩܪܒ ܠܘܩܒܠ ܒܢ̈ܝ ܥܡܘܢ. ܠܐ ܬܐܠܘܨ ܐܢܘܢ. ܘܠܐ ܬܬܓܪܐ ܒܗܘܢ. ܡܛܠ ܕܠܐ ܝ̇ܗܒ ܐܢܐ ܠܟ ܝܘܪܬܢܐ ܡܢ ܐܪܥܐ ܕܒܢ̈ܝ ܥܡܘܢ. ܡܛܠ ܕܠܒܢ̈ܝ ܠܘܛ ܝܗܒܬܗ̇ ܝܘܪܬܢܐ.

66. Deuteronomy 2:20

    ܐܪܥܐ ܕܓܢܒܪ̈ܐ ܡܬܚܫܒܐ ܐܦ ܗܝ. ܓܢܒܪ̈ܐ ܐܝܬܒܘ ܒܗ̇ ܡܢ ܠܘܩܕܡ. ܘܥܡܘ̈ܢܝܐ ܩ̇ܪܝܢ ܠܗܘܢ ܙܡܙܡܝܢ.

67. Deuteronomy 2:21

    ܥܡܐ ܕܪܒ ܘܣܓܝ. ܘܪܡ ܐܝܟ ܓܢܒܪ̈ܐ. ܘܐܘܒܕ ܐܢܘܢ ܡܪܝܐ ܡܢ ܩܕܡܝܗܘܢ. ܘܝܪܬܘ ܐܢܘܢ ܘܝܬܒܘ ܒܐܪܥܗܘܢ.

68. Deuteronomy 2:22

    ܐܝܟ ܕܥܒܕܘ ܒܢ̈ܝ ܥܣܘ ܕܝ̇ܬܒܝܢ ܒܣܥܝܪ. ܕܐܘܒܕܘ ܠܚܘܪ̈ܝܐ ܡܢ ܩܕܡܝܗܘܢ. ܘܝܪܬܘ ܐܢܘܢ ܘܝܬܒܘ ܒܐܪܥܗܘܢ ܥܕܡܐ ܠܝܘܡܢܐ.

69. Deuteronomy 2:23

    ܘܥܘ̈ܝܐ ܕܝ̇ܬܒܝܢ ܒܚܨܪܝܡ ܘܥܕܡܐ ܠܥܐܙܐ. ܩ̈ܦܘܕܩܝܐ ܕܢܦܩܘ ܡܢ ܩܦܘܕܩܝ ܐܘܒܕܘ ܐܢܘܢ. ܘܝܬܒܘ ܒܐܪܥܗܘܢ.

70. Deuteronomy 2:24

    ܡܟܝܠ ܩܘܡܘ ܫܩܘܠܘ ܘܥܒܪܘ ܢܚܠܐ ܕܐܪܢܘܢ. ܚܙܝ ܕܐܫܠܡܬ ܒܐ̈ܝܕܝܟ ܠܣܝܚܘܢ ܡܠܟܐ ܕܚܫܒܘܢ ܐܡܘܪܝܐ ܘܠܐܪܥܗ. ܫܪܐ ܠܡܘܒܕܘܬܗ ܘܐܬܓܪܐ ܥܡܗ ܠܩܪܒܐ.

71. Deuteronomy 2:25

    ܝܘܡܢܐ ܐܫܪܐ ܠܡܬܠ ܕܚܠܬܟ ܘܙܘܥܬܟ ܥܠ ܐ̈ܦܝ ܥܡ̈ܡܐ ܕܬܚܝܬ ܫܡܝܐ. ܕܢܫܡܥܘܢ ܫܡܥܟ ܘܢܙܘܥܘܢ. ܘܢܕܚܠܘܢ ܡܢ ܩܕܡܝܟ.

72. Deuteronomy 2:26

    ܘܫ̇ܕܪܬ ܐܝ̈ܙܓܕܐ ܡܢ ܡܕܒܪܐ ܕܩܪܡܘܬ ܠܘܬ ܣܝܚܘܢ ܡܠܟܐ ܕܚܫܒܘܢ. ܒܡ̈ܠܐ ܕܫܠܡܐ ܠܡܐܡܪ ܠܗ.

73. Deuteronomy 2:27

    ܢܥܒܪ ܒܐܪܥܟ. ܒܐܘܪܚܐ ܐܘܪܚܐ ܢܐܙܠ. ܘܠܐ ܢܣܛܐ ܠܝܡܝܢܐ ܘܠܣܡܠܐ.

74. Deuteronomy 2:28

    ܥܒܘܪܐ ܒܟܣܦܐ ܙܒܢܘ ܠܢ ܘܢܐܟܘܠ. ܘܡ̈ܝܐ ܒܟܣܦܐ ܙܒܢܘ ܠܢ ܘܢܫܬܐ ܒܠܚܘܕ ܒܪ̈ܓܠܝܢ ܢܥܒܪ.

75. Deuteronomy 2:29

    ܐܝܟ ܕܥܒܕܘ ܠܢ ܒܢ̈ܝ ܥܣܘ ܕܝ̇ܬܒܝܢ ܒܣܥܝܪ. ܘܡܘܐ̈ܒܝܐ ܕܝ̇ܬܒܝܢ ܒܥܕ ܥܕܡܐ ܕܢܥܒܪ ܝܘܪܕܢܢ ܠܐܪܥܐ ܕܝ̇ܗܒ ܠܢ ܡܪܝܐ ܐܠܗܢ.

76. Deuteronomy 2:30

    ܘܠܐ ܨܒܐ ܣܝܚܘܢ ܡܠܟܐ ܕܚܫܒܘܢ ܕܢܥܒܪܢ ܒܬܚܘܡܗ. ܡܛܠ ܕܩܫܝ ܡܪܝܐ ܐܠܗܟܘܢ ܪܘܚܗ. ܘܐܥܫܢ ܠܒܗ ܕܢܫܠܡܝܘܗܝ ܒܐ̈ܝܕܝܟܘܢ ܐܝܟ ܕܝܘܡܢܐ.

77. Deuteronomy 2:31

    ܘܐܡܪ ܠܝ ܡܪܝܐ. ܚܙܝ ܕܫܪܝܬ ܠܡܫܠܡܘ ܒܐ̈ܝܕܝܟ ܠܣܝܚܘܢ ܘܠܐܪܥܗ. ܫܪܐ ܠܡܘܒܕܘܬܗ ܘܠܡܐܪܬ ܐܪܥܗ.

78. Deuteronomy 2:32

    ܘܢܦܩ ܣܝܚܘܢ ܠܐܘܪܥܢ. ܗܘ ܘܟܠܗ ܥܡܗ ܠܩܪܒܐ ܠܝܗܨ.

79. Deuteronomy 2:33

    ܘܐܫܠܡܗ ܡܪܝܐ ܐܠܗܢ ܩܕܡܝܢ. ܘܚܪܒܢܝܗܝ ܠܗ ܘܠܒܢ̈ܘܗܝ ܘܠܟܠܗ ܥܡܗ.

80. Deuteronomy 2:34

    ܘܟܒܫܢ ܟܠܗܝܢ ܩܘܪ̈ܝܗ ܒܙܒܢܐ ܗ̇ܘ. ܘܐܘܒܕܢ ܟܠܗܝܢ ܩܘܪ̈ܝܐ ܠܓܡܪ. ܘܢܫ̈ܐ ܘܝܩܪܬܐ. ܘܠܐ ܫܒܩܢ ܡܢܗܘܢ ܣܪܝܕܐ.

81. Deuteronomy 2:35

    ܒܠܚܘܕ ܒܥܝܪ̈ܐ ܒܙܢ ܠܢ. ܘܒܙܬܐ ܕܩܘܪ̈ܝܐ ܕܟܒܫܢ.

82. Deuteronomy 2:36

    ܡܢ ܥܕܘܥܝܪ ܕܥܠ ܣܦܬܐ ܕܢܚܠܐ ܕܐܪܢܘܢ. ܘܩܪܝܬܐ ܕܒܢܚܠܐ. ܘܥܕܡܐ ܠܓܠܥܕ. ܠܐ ܗܘܬ ܩܪܝܬܐ ܕܥܫܢܬ ܡܢܢ. ܟܠܗܝܢ ܐܫܠܡ ܐ̈ܢܝܢ ܡܪܝܐ ܐܠܗܢ ܩܕܡܝܢ.

83. Deuteronomy 2:37

    ܒܠܚܘܕ ܠܐܪܥܐ ܕܒܢ̈ܝ ܥܡܘܢ ܕܠܐ ܐܬܩܪܒܬܘܢ. ܟܠ ܝܕ ܢܚܠܐ ܕܝܒܩ. ܘܩܘܪ̈ܝܐ ܕܛܘܪ̈ܐ ܘܟܠ ܕܦܩܕܢ ܡܪܝܐ ܐܠܗܢ.

84. Deuteronomy 3:1

    ܘܐܬܦܢܝܢ ܘܣܠܩܢ ܠܐܘܪܚܐ ܕܡܬܢܝܢ. ܘܢܦܩ ܥܘܓ ܡܠܟܐ ܕܡܬܢܝܢ ܠܐܘܪܥܢ. ܗܘ ܘܟܠܗ ܥܡܗ ܠܩܪܒܐ ܒܐܪܕܥܝ.

85. Deuteronomy 3:2

    ܘܐܡܪ ܠܝ ܡܪܝܐ. ܠܐ ܬܕܚܠ ܡܢܗ. ܡܛܠ ܕܒܐ̈ܝܕܝܟ ܐܫܠܡܬܗ ܘܠܟܠܗ ܥܡܗ ܘܠܐܪܥܗ. ܘܥܒܕ ܠܗ ܐܝܟ ܕܥܒܕܬ ܠܣܝܚܘܢ ܡܠܟܐ ܕܐܡܘܪ̈ܝܐ. ܕܝ̇ܬܒ ܗܘܐ ܒܚܫܒܘܢ.

86. Deuteronomy 3:3

    ܘܐܫܠܡ ܡܪܝܐ ܐܠܗܢ ܒܐܝܕܢ ܐܦ ܠܥܘܓ ܡܠܟܐ ܕܡܬܢܝܢ. ܘܠܟܠܗ ܥܡܗ. ܘܚܪܒܢܝܗܝ ܘܠܐ ܫܒܩܢ ܠܗ ܣܪܝܕܐ.

87. Deuteronomy 3:4

    ܘܟܒܫܢ ܟܠܗܝܢ ܩܘܪ̈ܝܗ ܒܙܒܢܐ ܗ̇ܘ. ܘܠܐ ܫܒܩܢ ܩܪܝܬܐ ܕܠܐ ܢܣܒܢܗ̇ ܡܢܗܘܢ. ܫܬܝܢ ܩܘܪ̈ܝܐ ܟܠܗ ܚܒܠ ܐܪܓܘܒ. ܒܝܬ ܡܠܟܘܬܗ ܕܥܘܓ ܕܒܡܬܢܝܢ.

88. Deuteronomy 3:5

    ܟܠܗܝܢ ܗܠܝܢ ܩܘܪ̈ܝܐ ܕܥܫܝ̈ܢܝܢ ܫܘܪ̈ܝܗܝܢ. ܘܪܡܝܢ ܬܪ̈ܥܝܗܝܢ ܘܡܘܟ̈ܠܝܗܝܢ. ܣܛܪ ܡܢ ܩܘܪ̈ܝܐ ܕܫ̈ܛܚܐ ܕܛܒ ܣ̈ܓܝܐܢ.

89. Deuteronomy 3:6

    ܘܚܪ̈ܒܢ ܐܢܝ̈ܢ. ܐܝܟ ܕܥܒܕܢ ܠܣܝܚܘܢ ܡܠܟܐ ܕܚܫܒܘܢ. ܕܚܪ̈ܒܢ ܟܠܗܝܢ ܩܘܪ̈ܝܗ ܠܓܡܪ. ܘܢܫ̈ܐ ܘܝܩܪܬܐ.

90. Deuteronomy 3:7

    ܘܟܠܗ̇ ܒܥܝܪܐ. ܘܒܙܬܐ ܕܩܘܪ̈ܝܐ ܒܙܢ ܠܢ.

91. Deuteronomy 3:8

    ܘܢܣܒܢܗ̇ ܒܙܒܢܐ ܗ̇ܘ ܠܐܪܥܐ ܡܢ ܐܝܕܐ ܕܬܪ̈ܝܗܘܢ ܡ̈ܠܟܐ ܕܐܡܘܪ̈ܝܐ ܕܒܥܒܪܐ ܕܝܘܪܕܢܢ. ܡܢ ܢܚܠܐ ܕܐܪܢܘܢ ܘܥܕܡܐ ܠܛܘܪܐ ܕܚܪܡܘܢ.

92. Deuteronomy 3:9

    ܨܝ̈ܕܢܝܐ ܩ̇ܪܝܢ ܠܚܪܡܘܢ ܣܪܝܘܢ. ܘܐܡܘܪ̈ܝܐ ܩ̇ܪܝܢ ܠܗ ܣܢܝܪ .

93. Deuteronomy 3:10

    ܘܟܠܗܝܢ ܩܘܪ̈ܝܐ ܕܦܩܥܬܐ. ܘܟܠܗ̇ ܓܠܥܕ ܘܟܠܗ̇ ܡܬܢܝܢ ܥܕܡܐ ܠܣܠܟܐ ܘܠܐܪܕܥܝ. ܟܘܠܗܝܢ ܩܘܪ̈ܝܐ ܕܡܠܟܘܬܗ ܕܥܘܓ ܕܒܡܬܢܝܢ.

94. Deuteronomy 3:11

    ܡܛܠ ܕܥܘܓ ܡܠܟܐ ܕܡܬܢܝܢ. ܒܠܚܘܕܘܗܝ ܐܫܬܚܪ ܡܢ ܫܪܟܐ ܕܓܢܒܪ̈ܐ. ܥܪܣܗ ܥܪܣܐ ܗܝ ܕܦܪܙܠܐ. ܘܗܐ ܒܪܒܬ ܗܝ ܕܒܢ̈ܝ ܥܡܘܢ. ܬܫܥ ܐ̈ܡܝܢ ܐܘܪܟܗ̇. ܘܐܪ̈ܒܥ ܐܡ̈ܝܢ ܦܬܝܗ̇ ܒܐܡܬܐ ܕܓܢܒܪ̈ܐ.

95. Deuteronomy 3:12

    ܘܐܪܥܐ ܗܕܐ ܝܪܬܢ ܒܙܒܢܐ ܗ̇ܘ ܡܢ ܥܕܘܥܝܪ ܕܥܠ ܣܦܬܐ ܕܢܚܠܐ ܕܐܪܢܘܢ. ܘܦܠܓܗ ܕܛܘܪܐ ܕܓܠܥܕ ܘܩܘܪ̈ܝܗ. ܝܗ̇ܒܬ ܠܪܘܒܝܠ ܘܠܓܕ.

96. Deuteronomy 3:13

    ܘܫܪܟܐ ܕܓܠܥܕ ܘܟܠܗ̇ ܡܬܢܝܢ. ܒܝܬ ܡܠܟܘܬܗ ܕܥܘܓ ܝܗ̇ܒܬ ܠܦܠܓܗ ܕܫܒܛܐ ܕܡܢܫܐ. ܟܠܗ ܚܒܠ ܐܪܓܘܒ ܘܟܠܗ̇ ܡܬܢܝܢ. ܗܝ ܗܝ ܡܬܩܪܝܐ ܐܪܥ ܓܢܒܪ̈ܐ.

97. Deuteronomy 3:14

    ܘܝܐܝܪ ܒܪ ܡܢܫܐ ܢܣܒ ܠܗ ܟܠܗ ܚܒܠ ܐܪܓܘܒ. ܥܕܡܐ ܠܬܚܘܡܐ ܕܓܫܘܪ ܘܕܡܥܟܬ. ܘܩܪܐ ܐ̈ܢܝܢ ܥܠ ܫܡܗ. ܡܬܢܝܢ ܘܟܦܪ̈ܘܢܐ ܕܝܐܝܪ ܥܕܡܐ ܠܝܘܡܢܐ.

98. Deuteronomy 3:15

    ܘܠܡܟܝܪ ܝܗܒܬ ܓܠܥܕ.

99. Deuteronomy 3:16

    ܘܠܪܘܒܝܠ ܘܠܓܕ ܝܗ̇ܒܬ ܡܢ ܓܠܥܕ. ܘܥܕܡܐ ܠܢܚܠܐ ܕܐܪܢܘܢ. ܘܓܘܗ ܕܢܚܠܐ ܘܬܚܘܡܗ. ܘܥܕܡܐ ܠܝܒܩ ܕܢܚܠܐ ܕܬܚܘܡܐ ܕܒܢ̈ܝ ܥܡܘܢ.

100. Deuteronomy 3:17

     ܘܥܪܒܐ ܘܝܘܪܕܢܢ. ܘܬܚܘܡܐ ܡܢ ܟܢܪܬ. ܘܥܕܡܐ ܠܝܡܐ ܕܥܪܒܐ. ܝܡܐ ܕܡܠܚܐ ܕܬܚܝܬ ܐܫܕܘܕ ܘܦܣܓܐ ܕܒܪܡܬܐ ܡܢ ܡܕܢܚܐ.

Next → — showing 1–100 of 959

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.