← All works

Peshitta Baruch

Peshitta (Syriac Old Testament) · 141 sections

1. Baruch 4:6

   ܡܛܠ ܕܐܙܕܒ̇ܢܬܘܢ ܠܥܡ̈ܡܐ̣ ܠܐ ܗܘܐ ܠܐܒܕܢܐ. ܐܠܐ ܡܛܠ ܕܐܪܓܙܬܘܢ ܠܐܠܗܐ ܐܫܬܠܡܬܘܢ ܠܒ̈ܥܠܕܒܒܝܟܘܢ

2. Baruch 4:7

   ܐܪܓܙܬܘܢ ܓܝܪ̣ ܠܗ̇ܘ ܕܥܒܕܟܘܢ ܠܐܠܗܐ ܕܠܥܠܡ. ܥܠ ܕܕܒܚ̇ܬܘܢ ܠܫܐ̈ܕܐ ܘܠܐ ܠܐܠܗܐ̇

3. Baruch 4:8

   ܘܛܥܝܬܘܢ ܠܡܪܒܝܢܟܘܢ ܠܐܠܗܐ ܕܠܥܠܡ. ܐܟ̣ܪܝܬܘܢ ܕܝ̣ܢ ܐܦ ܠܡܪܒ̇ܝܢܝܬܟܘܢ ܐܘܪܫܠܡ

4. Baruch 4:9

   ܚ̇ܙܝܬ ܓܝܪ ܕܐܬ̣ܐ ܥܠܝܟܘܢ ܪܘܓܙܐ ܘܚܡܬܐ̇ ܡܢ ܩܕܡ ܡܪܝܐ ܘܐ̇ܡܪܬ. ܫܘܡܥܘܢܝ̇ ܥܡܘܪ̈ܐ݃ ܕܨܗܝܘܢ. ܐܝܬܝ ܓܝܪ ܥܠܝ ܡܪܝܐ ܐܠܗܐ̣. ܐܒܠܐ ܪܒܐ ܕܠܥܠܡ

5. Baruch 4:10

   ܚ̇ܙܝܬ ܓܝܪ ܒܫܒܝܐ ܕܒܢ̈ܝ ܘܕܒܢ̈ܬܝ ܕܐܝܬܝ ܥܠܝܗܘܢ ܡܪܐ ܥ̈ܠܡܐ

6. Baruch 4:11

   ܪܒ̇ܝܬ ܐܢܘܢ ܓܝܪ ܒܚܕܘܬܐ̣ ܘܫ̇ܕܪܬ ܐܢܘܢ ܒܒܟܬܐ̇ ܘܒܐܒܠܐ̣ ܘܒܬܐ̈ܢܚܬܐ

7. Baruch 4:12

   ܠܐ ܐܢܫ ܢܚܕܐ ܠܐܪܡܠܘܬܝ ܕܐܫܬܒܩܬ̇. ܘܨ̇ܕܝܬ ܡܢ ܥܡܐ ܣܓܝܐܐ. ܡܛܠ ܚ̈ܛܗܐ ܕܒܢ̈ܝ. ܡܛܠ ܕܣ̣ܛܘ ܡܢ ܐܘܪܚܗ ܕܡܪܝܐ ܐܠܗܐ̣

8. Baruch 4:13

   ܘܦܘܩ̈ܕܢܘܗܝ ܘܕܝܢ̣̈ܘܗܝ ܠܐ ܝܕܥܘ. ܐܦ ܠܐ ܗܠܟܘ ܒܐܘܪܚܐ ܕܦܘܩ̈ܕܢܘܗܝ ܕܐܠܗܐ. ܐܦ ܠܐ ܒܫܒܝܠܐ ܕܡܪܕܘܬܐ ܕܩܘܫܬܐ̇ ܒܙܕܝܩܘܬܐ

9. Baruch 4:14

   ܕܪܟܘ ܐܘ ܐ̣ܬܛܦܝܣܘ. ܐܢܬܘܢ ܥܡܘܪ̈ܐ ܕܨܗܝܘܢ̣. ܐܬ̣ܕܟܪܘ ܫܒܝܬܐ ܕܒܢ̈ܝ ܘܕܒܢ̈ܬܝ ܕܐܝܬܝ ܥܠܝܗܘܢ ܡܪܐ ܥ̈ܠܡܐ

10. Baruch 4:15

    ܐܝܬܝ ܓܝܪ ܥܠܝܗܘܢ ܥܡܐ̣ ܡܢ ܪܘܚܩܐ. ܥܡܐ ܚܨܝܦܐ ܘܡܡܠܠ ܒܠܫܢܐ ܐܚܪܢܐ. ܘܠܐ ܒܗܬܘ ܡܢ ܣܒ̈ܐ. ܘܥܠ ܥ̈ܠܝܡܐ̣ ܠܐ ܐܬܪܚ̇ܡܘ

11. Baruch 4:16

    ܘܫܒ̣ܘ ܘܕܒ̣ܪܘ ܠܚܒ̈ܝܒܝܗ̇ ܕܐܪܡܠܬܐ̣ ܘܠܒܢ̈ܬܗ̇. ܘܠܝܚܝܕܬܐ̇ ܘܠܡܫܘܚܕܬܐ̣ ܐܚܪܒܘ

12. Baruch 4:17

    ܐܢܐ ܓܝ̣ܪ ܠܐ ܡܫܟܚܐ ܐܢܐ ܕܐܥܕܪܟܘܢ

13. Baruch 4:18

    ܗ̇ܘ ܓܝܪ ܡ̇ܢ ܕܐܝܬܝ ܥܠܝܟܘܢ ܒܝܫܬܐ̣. ܗ̣ܘ ܦܪܩ̇ ܠܟܘܢ ܡܢ ܐܝܕܐ ܕܒ̈ܥܠܕܒܒܝܟܘܢ

14. Baruch 4:19

    ܙܠܘ ܒ̈ܢܝ̈ ܙܠܘ. ܐܢܐ ܓܝܪ ܐܫܬܒ̇ܩܬ ܚܪܒܬܐ̣ ܘܨ̇ܕܝܬܐ

15. Baruch 4:20

    ܫ̇ܠܚܬ ܐܣܛܠܐ ܕܫ̇ܠܡܐ̣. ܘܠܒܫܬ ܣܩܐ ܒܒܥܘܬܝ. ܐܓܥܐ ܠܘܬܟ ܚܝ ܥ̈ܠܡܐ݃ ܒܝ̈ܘܡܬܐ

16. Baruch 4:21

    ܐܬܬܥܝܪܘ ܒܢܝ̣̈ ܘܓܥܘ ܠܘܬ ܡܪܝܐ. ܘܢܦܨܝܟܘܢ ܡܢ ܐ̈ܝܕܝ ܥܫܝ̈ܢܐ. ܘܡܢ ܐܝ̈ܕܝ ܫ̈ܠܝܛܢܐ. ܘܡܢ ܐ̈ܝܕܝ ܒ̈ܥܠܕܒܒܐ

17. Baruch 4:22

    ܐܢܐ ܓܝܪ ܣܒ̇ܪܬ ܥܠ ܚܝ ܥ̈ܠܡܐ ܠܦܘܪܩܢܟܘܢ. ܘܐܬܬ ܠܝ ܚܕܘܬܐ ܡܢ ܩܕܡ ܡܪܝܐ ܐܠܗܐ ܕܠܥܠܡ. ܡܛܠ ܕܒܥܓܠ ܐܬ̇ܪܚܡ ܥܠܝܗܘܢ. ܡܛܠ ܪ̈ܚܡܘܗܝ ܕܐܠܗܐ ܦܪܘܩܗܘܢ ܕܠܥܠܡ

18. Baruch 4:23

    ܫܕܪܬܟܘܢ ܓܝܪ ܒܐܒܠܐ̣ ܘܒܒܟܬܐ. ܘܢܦܢܝܟܘܢ ܠܝ ܐܠܗܐ ܘܐܩ̇ܒܠܟܘܢ ܡܢܗ. ܒܚܕܘܬܐ̇ ܘܒܒܘܣܡܐ ܕܠܥܠܡ

19. Baruch 4:24

    ܕܐܝܟܢܐ ܕܗܫܐ ܚܙܘ ܥܡܘܪ̈ܝܗ̇ ܕܨܗܝܘܢ ܫܒܝܬ̣ܟܘܢ̣. ܗܟܢܐ ܒܥܓܠ ܢܚܙܘܢ ܦܘܪܩܢܟܘܢ ܕܡܢ ܠܘܬ ܡܪܝܐ̣ ܐܠܗܢ̇. ܘܢܝܬܟܘܢ ܒܚܕܘܬܐ ܪܒܬܐ̇. ܘܒܬܫܒܘܚܬܐ ܘܒܢܘܗܪܗ ܕܡܪܐ ܥ̈ܠܡܐ

20. Baruch 4:25

    ܒ̈ܢܝ̣ ܐܓܪܘ ܪܘܚܟܘܢ. ܘܣܝ̇ܒܪܘ ܪܘܓܙܐ ܕܡܢ ܡܪܝܐ ܐܠܗܐ ܐܬ̣ܐ ܥܠܝܟܘܢ. ܪܕܦܟ ܒܥܠܕܒܒܟ. ܡܛܠ ܗܢܐ̣ ܒܥܓܠ ܬܚܙܐ ܒܐܒܕܢܗ. ܘܥܠ ܨܘܪܗܘܢ ܬܕܪܘܟ

21. Baruch 4:26

    ܡܦܢ̈ܩܝ̣ ܐܙܠ̣ܘ ܒܫܒܝܐ. ܘܗܠܟܘ ܒܐܘܪ̈ܚܬܐ ܩܫܝ̈ܬܐ ܕܥܪ̈ܡܐ. ܘܐ̇ܬܒܕܪܘ ܒܐܘܪ̈ܚܬܐ ܥܣ̈ܩܬܐ. ܘܐܬ̇ܒܕܪܘ̣ ܐܝܟ ܓܙܪܐ ܕܐܬܚ̣ܛܦ ܡܢ ܐ̈ܝܕܝ ܒ̈ܥܠܕܒܒܐ

22. Baruch 4:27

    ܐܬܒܝܐܘ ܒ̈ܢܝ̈ ܘܐܙܥܩܘ ܠܘܬ ܡܪܝܐ ܐܠܗܐ. ܢܗܘܐ ܠܟܘܢ ܓܝܪ ܠܘܬ ܡܪܝܐ ܕܘܟܪܢܐ̇. ܡܢ ܗ̇ܘ ܕܐܝܬܝ ܥܠܝܟܘܢ ܗܠܝܢ

23. Baruch 4:28

    ܡܛܠ ܕܐܝܟܢܐ ܕܛܥ̇ܐ ܗܘܐ ܪܥܝܢܟܘܢ ܡܢ ܡܪܝܐ̣. ܚܕ ܒܥܣܪ̈ܐ ܬܘܒܘ̣ ܘܐܬܦܢܘ ܠܘܬ ܡܪܝܐ. ܘܬܒܥܘܢܗ ܠܐܠܗܐ

24. Baruch 4:29

    ܗ̇ܘ ܓܝܪ ܡ̇ܢ ܕܐܝܬܝ ܥܠܝܟܘܢ ܒܝ̣ܫܬܐ̣. ܗ̣ܘ ܢܝܬܐ ܥܠܝܟܘܢ ܚܕܘܬܐ̣ ܠܥܠܡ ܥܡ ܦܘܪܩܢܟܘܢ

25. Baruch 4:30

    ܐܬܒܝܐ ܐܘܪܫܠܡ.. ܡܒܝܐ ܗܘ ܠܟܝ ܗ̇ܘ ܡ̇ܢ ܕܣܡ ܠܟܝ ܫܡܐ

26. Baruch 4:31

    ܢܕܚ̈ܠܢ ܡܕܝܢ̈ܬܐ ܐܝܠܝܢ ܕܐܒܐܫ ܠܟܝ ܘܚܕܝ ܥܠ ܡܦܘܠܬܟܝ

27. Baruch 4:32

    ܢܬܪ̈ܗܒܢ ܡܕܝܢ̈ܬܐ ܐܝܠܝܢ ܕܫܥ̣ܒܕ ܠܒܢܝ̈ܟܝ. ܬܚܕܝܢ ܥܠ ܡܦܘܠܬܗܝܢ. ܢܕܚܠܘܢ ܐܝܠܝܢ ܕܐܒܐܫܘ ܠܟܝ. ܬܬ̣ܪܗܒ ܗ̇ܝ ܕܩܒ̣ܠܬ ܠܒܢܝ̈ܟܝ

28. Baruch 4:33

    ܐܝܟܢܐ ܓܝܪ ܕܚ̇ܕ̣ܝܬ ܥܠ ܡܦܘܠܬܟܝ̣. ܗܟܢܐ ܬܬܥܝܩ ܘܬ̇ܟܪܐ ܠܗ̇ ܥܠ ܚܘܪܒܗ̇

29. Baruch 4:34

    ܘܐܫܩܘܠ ܡܢܗ̇ ܓܠܝ̈ܦܐ. ܘܕܝܨ̇ܐ ܕܟܢ̈ܫܐ ܣ̈ܓܝܐܐ ܘܚܕܘܬܗ̇ ܬܗܘܐ ܠܐܒܠܐ

30. Baruch 4:35

    ܢܘܪܐ ܓܝܪ ܬܫܬܕܪ ܥܠܝܗ̇ ܡܢ ܠܘܬ ܚܝ ܥ̈ܠܡܐ̣ ܢܘܓܪܐ̣ ܕܝܘ̈ܡܬܐ. ܘܢܥܡ̣ܪܘܢ ܒܗ̇ ܫܐ̈ܕܐ ܟܠܗ ܙܒܢܐ

31. Baruch 4:36

    ܚܘܪܝ ܠܡ̣ܕܢܚܐ ܐܘܪܫܠܡ.. ܘܚܙܝ ܚܕܘܬܐ ܕܡܢ ܠܘܬ ܐܠܗܐ ܐܬܝܐ ܠܟܝ

32. Baruch 4:37

    ܗܐ ܓܝܪ ܐܬ̇ܝܢ ܠܟܝ ܒܢܝ̈ܟܝ ܐܝܠܝܢ ܕܫܕܪܬܝ. ܐܬ̇ܝ̣ܢ ܘܡܬ̇ܟܢܫܝܢ. ܡܢ ܡܕܢܚ̈ܘܗܝ ܕܫܡܫܐ ܘܥܕܡܐ ܠܡܥܪ̈ܒܘܗܝ. ܒܡܠܬܗ ܕܡܪܝܐ ܐܠܗܐ ܩܕܝܫܐ. ܘܚ̇ܕܝܢ ܒܬܫܒܘܚܬܗ ܕܐܠܗܐ.

33. Baruch 5:1

    ܫܠܚ̣ܝ ܐܘܪܫܠܡ̇̈ ܐܣܛܠܐ ܕܐܒܠܟܝ. ܘܕܒܝܫܬܟܝ̇ ܘܕܚܫܟܝ. ܘܠܒܫܝ ܓܐܝܘܬܐ ܗ̇ܝ ܕܡܢ ܠܘܬ ܡܪܝܐ ܐܠܗܐ ܠܬܫܒܘܚܬܐ ܕܠܥܠܡ

34. Baruch 5:2

    ܘܐܬܥ̣ܛܦܝ ܥܛܝܦܘܬܐ ܕܙܕܝܩܘܬܐ ܕܡܢ ܠܘܬ ܐܠܗܐ. ܣܝܡܝ ܒܪܫܟܝ ܣܢܘܪܬܐ ܕܬܫܒܘܚܬܗ ܕܡܪܐ ܥ̈ܠܡܐ

35. Baruch 5:3

    ܡܛܠ ܕܗ̣ܘ ܐܠܗܐ ܢܚܘܐ ܠܟܠ ܐܢܫ̣. ܕܥܠ ܟܠܗ̇ ܐܪܥܐ ܢܘܗܪܟܝ

36. Baruch 5:4

    ܢܬܩ̣ܪܐ ܠܟܝ ܓܝܪ ܫܡܐ ܡܢ ܠܘܬ ܐܠܗܐ̣ ܠܥܠܡ. ܫܠܡܐ ܕܙܕܝܩܘܬܐ̣ ܘܬܫܒܘܚܬܐ ܕܕܚܠܬܗ ܕܐܠܗܐ

37. Baruch 5:5

    ܐܬܬܥܝܪܝ̇ ܐܬܬܥܝܪܝ̇ ܐܘܪܫܠܡ܈ ܘܩܘܡܝ ܥܠ ܝܪ̈ܝܥܬܐ. ܘܚܘܪܝ ܠܐ̈ܦܝ ܡܕܢܚܐ̣ ܘܠܡܥܪܒܐ. ܘܚܙܝ ܠܒܢܝ̈ܟܝ ܕܡܬܟ̇ܢܫܝܢ ܠܟܝ. ܡܢ ܡܕܢܚ̈ܘܗܝ ܕܫܡܫܐ̣ ܘܥܕܡܐ ܠܡܥܪ̈ܒܘܗܝ ܒܡܠܬܗ ܕܩܕܝܫܐ. ܟܕ ܚ̇ܕܝܢ ܒܕܘܟܪܢܗ ܕܐܠܗܐ

38. Baruch 5:6

    ܢܦܩܘ ܓܝܪ ܡܢܟܝ ܒܪܓܠ̣ ܟܕ ܡܬ̇ܕܒܪܝܢ ܡܢ ܒܥܠܕܒܒܐ. ܡܥܠ ܠܗܘܢ ܕܝܢ ܐܠܗܐ ܠܘܬܟܝ̣. ܟܕ ܡܬܬܪܝܡܝܢ ܒܬܫܒܘܚܬܐ ܥܠ ܟܘܪܣܝܐ ܕܡܠܟܘܬܐ

39. Baruch 5:7

    ܦܩ̇ܕ ܓܝܪ ܐܠܗܐ ܠܟܠ ܛܘܪ ܕܪܡ̣ ܕܢܬܡ̇ܟܟ. ܘܥܪܡ̣ܐ ܢܗܘܐ ܠܫܦܝܐ̣ ܘܠܫܘܝܘܬܐ. ܟܠܗܘܢ ܢܚ̈ܠܐ̣ ܢ̇ܬܡܠܘܢ. ܘܬܫܬܘܐ ܐܪܥܐ ܕܢܗܠܟ ܐܝܣܪܐܝܠ ܬܟܝܠܐܝܬ ܒܫܪܪܐ̇. ܒܬܫܒܘܚܬܗ ܕܐܠܗܐ

40. Baruch 5:8

    ܛܠܠܘ ܟܠ ܐܝ̈ܠܢܝ ܥܒܐ̇. ܘܟܠ ܩܝܣ ܕܒܣܡܐ̇ ܥܠ ܐܝܣܪܐܝܠ ܒܦܘܩܕܢܗ ܕܐܠܗܐ

41. Baruch 5:9

    ܢܡܠܟ ܓܝܪ ܥܠܝܟܘܢ ܐܠܗܐ ܕܐܝܣܪܝܠ̣. ܒܚܕܘܬܐ ܘܒܢܘܗܪܐ ܕܬܫܒܘܚܬܗ. ܥܡ ܡܪܚܡܢܘܬܐ ܘܙܕܝܩܘܬܐ ܕܡܢ ܠܘܬܗ ܕܐܠܗܢ.

← Previous — showing 101–141 of 141

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.