← All works

Peshitta Baruch

Peshitta (Syriac Old Testament) · 141 sections

1. Baruch 1:1

   ܘܗܠܝܢ ܡ̈ܠܝܗ̇ ܕܐܓܪܬܐ ܗܕܐ. ܕܟܬ̣ܒ ܒܪܘܟ ܒܪ. ܢܪܝܐ ܒܪ ܡܥܣܝܐ̇. ܒܪ ܨܕܩܝܐ ܒܪ ܫ̣ܪܝܐ ܒܪ ܚܠܩܝܐ. ܗܠܝܢ ܟܬ̣ܒ ܠܒܒܠ̇

2. Baruch 1:2

   ܒܫܢܬ ܚܡܫ ܒܫܒܥܬܐ ܒܝܪܚܐ. ܒܙܒܢܐ ܗ̇ܘ ܕܫܒܘ ܟ̈ܠܕܝܐ ܠܐܘܪܫܠܡ. ܘܐܘܩܕܘܗ̇ ܒܢܘܪܐ

3. Baruch 1:3

   ܘܩ̣ܪܐ ܒܪܘܟ ܦܬ̈ܓܡܐ ܗܠܝܢ ܕܟܬܝܒܝܢ ܒܟܪܟܐ ܗܢܐ̇. ܒܐ̈ܕܢܝ ܝܘܟܢܝܐ ܒܪ ܝܘܝܩܝܡ ܡ̇ܠܟܐ ܕܝܗܘܕܐ. ܘܒܐ̈ܕܢܝ ܟܠܗ ܥܡܐ ܕܐܬ̇ܝܢ ܠܡܫܡܥ ܠܗܢܐ ܟܪܟܐ

4. Baruch 1:4

   ܘܒܐ̈ܕܢܝ ܪ̈ܘܪܒܢܐ ܪ̈ܘܪܒܢܝ ܡ̇ܠܟܐ. ܘܒܐ̈ܕܢܝ ܣ̈ܒܐ. ܘܒܐ̈ܕܢܝ ܟܠܗ ܥܡܐ. ܡܢ ܙܥܘܪܐ̣ ܘܥܕܡܐ ܠܪܒܐ. ܟܠܗܘܢ ܐܝܠܝܢ ܕܥܡܪܝܢ ܒܒܒܠ. ܘܥܠ ܢܗܪܐ ܕܨܘܪ

5. Baruch 1:5

   ܘܒ̇ܟܝܢ ܗܘܘ̇ ܘܨܝܡܝ̣ܢ ܘܡܨܠܝܢ ܩܕܡ ܡܪܝܐ

6. Baruch 1:6

   ܘܟܢ̇ܫ ܟܣܦܐ ܐܢܫ ܐܝܟ ܕܡ̇ܛܐ ܗܘܐ ܒܐ̈ܝܕܘܗܝ. ܘܐܝܟ ܕܡܫܟܚܝ̣

7. Baruch 1:7

   ܘܫܕܪ ܠܐܘܪܫܠܡ ܠܝܘܝܩܝܡ ܒܪ ܚܠܩܝܐ ܒܪ ܫܠܘܡ ܟܗܢܐ. ܘܠܘܬ ܟܗ̈ܢܐ̣ ܘܠܘܬ ܟܠܗ ܥܡܐ̇. ܐܝܠܝܢ ܕܐܫܬܟ̣ܚܘ ܥܡܗ ܒܐܘܪܫܠܡ̇

8. Baruch 1:8

   ܟܕ ܫܩ̣ܠ ܡܐ̈ܢܐ ܕܒܝܬܗ ܕܡܪܝܐ ܐܝܠܝܢ ܕܐܦܩ ܡܢ ܗܝܟܠܐ̇. ܐܝܟ ܕܢܗܦܟ ܐܢܘܢ ܠܐܪܥܐ ܕܝܗܘܕܐ ܒܥܣܪܬܐ ܒܢܝܣܢ. ܡܐ̈ܢܐ ܕܥܒ̣ܕ ܨܕܩܝܐ ܒܪ ܝܘܫܝܐ ܡ̇ܠܟܐ ܕܝܗܘܕܐ

9. Baruch 1:9

   ܡܢ ܒܬܪ ܕܫܒ̣ܐ ܢܒܘܟܕܢܨܪ ܡ̇ܠܟܐ ܠܝܘܟܢܝܐ̇. ܘܠܪ̈ܘܪܒܢܐ ܘܠܕܚܫ̈ܐ̇. ܘܠܐܘ̈ܡܢܐ ܘܠܚ̈ܝܠܘܬܐ ܕܡܢ ܐܘܪܫܠܡ̇. ܘܐܘܒܠ̣ ܐܢܘܢ ܠܒܒܠ

10. Baruch 1:10

    ܘܐܡܪܝܢ. ܗܐ ܫܕܪܢ ܠܟܘܢ ܟܣܦܐ. ܙܒܢ̣ܘ ܒܟܣܦܐ ܝܩܕܐ ܫܠܡܐ ܚܠܦ ܚܛܗܐ ܘܠܒܘܢܬܐ̣. ܘܥܒܕܘ ܩܘܪܒܢܐ̣ ܘܐܣܩܘ ܥܠ ܡܕܒܚܗ ܕܡܪܝܐ ܐܠܗܢ

11. Baruch 1:11

    ܘܨܠܘ ܥܠ ܚ̈ܝܘܗܝ ܕܢܒܘܟܕܢܨܪ ܡ̇ܠܟܐ ܕܒܒܠ̣. ܘܥܠ ܚ̈ܝܘܗܝ ܕܒܠܛܫܨܪ ܒܪܗ̣. ܕܢܗܘܘܢ ܝܘܡ̈ܬܗܘܢ. ܥܠ ܐܪܥܐ̣ ܐܝܟ ܝܘܡ̈ܬܐ ܕܫܡܝܐ

12. Baruch 1:12

    ܘܢܬܠ ܠܢ ܡܪܝܐ ܚܝܠܐ ܕܢܦܠܚܝܘܗܝ̣ ܘܢܢܗܪ̈ܢ ܥܝܢ̈ܝܢ. ܘܢܚ̣ܐ ܬܚܝܬ ܛܠܠܗ ܕܢܒܘܟܕܢܨܪ ܡ̇ܠܟܐ ܕܒܒܠ̣ ܘܕܒܠܛܫܨܪ ܒܪܗ. ܘܕܢܦܠܘܚ ܐܢܘܢ ܝܘܡ̈ܬܐ ܣ̈ܓܝܐܐ̣. ܘܢܫܟ̣ܚ ܪ̈ܚܡ̣ܐ ܩܕܡܝܗܘܢ

13. Baruch 1:13

    ܘܨܠܘ̣ ܘܒܥ̣ܘ ܥܠܝܢ ܡܢ ܡܪܝܐ ܐܠܗܢ. ܡܛܠ ܕܚ̣ܛܝܢ ܩܕܡ ܡܪܝܐ ܐܠܗܢ̣. ܘܠܐ ܗܦ̣ܟܬ ܚܡܬܗ ܕܡܪܝܐ ܐ̇ܠܗܢ ܘܪܘܓܙܗ ܡܢܢ̇. ܥܕܡܐ ܠܝܘܡܐ ܕܝܘܡܢܐ

14. Baruch 1:14

    ܘܬܩܪܘܢ ܟܪܟܐ ܗܢܐ ܕܫܕܪܢ ܠܘܬܟܘܢ̣. ܘܬܘܕܘܢ ܚܠܦܝܢ ܒܒܝܬܗ ܕܡܪܝܐ ܩܕܡ ܡܪܝܐ̇. ܒܝܘܡܐ ܕܥܕܥܐܕܐ ܘܒܝ̈ܘܡܬܗ ܕܡܪܝܐ

15. Baruch 1:15

    ܘܬܐܡܪܘܢ ܕܕܡܪܝܐ ܗܝ ܐܠܗܢ ܙܕܝܩܘܬܐ. ܘܕܝܠܢ ܒܗܬܬ ܐ̈ܦܐ̣ ܐܝܟ ܝܘܡܐ ܗܢܐ ܕܝܘܡܢܐ. ܠܓܒܪ̈ܐ ܕܝܗܘܕܐ̣ ܘܠܥܡܘܪ̈ܝܗ̇ ܕܐܘܪܫܠܡ

16. Baruch 1:16

    ܘܠܡ̈ܠܟܝ̇ܢ ܘܠܪ̈ܘܪܒܢܝܢ. ܘܠܟܗ̈ܢܝ̇ܢ ܘܠܢܒ̈ܝܝ̣ܢ ܘܠܐܒ̈ܗܝܢ

17. Baruch 1:17

    ܐܝܠܝܢ ܕܚ̣ܛܝܢ ܩܕܡ ܡܪܝܐ ܐܠܗܢ

18. Baruch 1:18

    ܘܠܐ ܫܡܥܢܝܗܝ̣ ܘܫܛܢ ܦܘܩ̈ܕܢܘܗܝ. ܘܠܐ ܐܬܛܦܝܣܢ̣ ܘܠܐ ܫܡܥ̣ܢ ܒܩܠܗ ܕܡܪܝܐ ܐܠܗܢ̇. ܕܢܗ̇ܠܟ ܒܦܘܩ̈ܕܢܘܗܝ ܕܡܪܝܐ ܐܠܗܢ ܕܝܗ̣ܒ ܩܕܡ ܐ̈ܦܝܢ

19. Baruch 1:19

    ܡܛܠ ܕܡܢ ܝܘܡܐ ܕܐܦܩ ܡܪܝܐ ܠܐ̈ܒܗܝܢ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܐ ܗܢܐ̣. ܗܘ̣ܝܢ ܗܘܝ̣ܢ ܕܠܐ ܡܬܛܦܝܣܝܢ ܠܡܪܝܐ ܐܠܗܢ. ܘܡܪܕܢ̣ ܐܝܟ ܕܠܐ ܢܫܡ̣ܥ ܒܩܠܗ

20. Baruch 1:20

    ܘܐܬܬ ܥܠܝܢ ܒܝܫ̣ܬ̣ܐ ܘܠܘܛܬܐ̇. ܗ̇ܝ ܕܦܩ̇ܕ ܡܪܝܐ ܠܡܘܫܐ ܥܒܕܗ̇. ܒܝܘܡܐ ܕܐܦ̣ܩ ܠܐ̈ܒܗܬܢ ܡܢ ܐܪܥܐ ܕܡܨܪܝܢ̇. ܠܡܬܠ ܠܢ ܐܪܥܐ ܕܡܪܕܝܐ ܚܠܒܐ ܘܕܒܫܐ

21. Baruch 1:21

    ܘܠܐ ܫܡ̣ܥܢ ܒܩܠܗ ܕܡܪܝܐ ܐܠܗܢ̇. ܠܡܥܒܕ ܟܠܗܘܢ ܦܬ̈ܓܡܐ ܕܥܒ̣̈ܕܘܗܝ ܢܒ̈ܝܐ ܕܫܕܪ ܠܘܬܢ

22. Baruch 1:22

    ܘܗܠܟܢ ܐܢܫ ܐܢܫ ܒܨܒܝܢ̈ܝ ܠܒܗ ܒܝ̣ܫܐ̇. ܠܡ̇ܦܠܚ ܠܐ̈ܠܗܐ ܢܘܟܪ̈ܝܐ̇. ܕܢܥܒܕ ܒܝܫ̣ܬܐ ܩܕܡ ܥܝ̈ܢܘܗܝ ܕܡܪܝܐ ܐܠܗܢ.

23. Baruch 2:1

    ܘܐܩܝܡ ܡܪܝܐ ܦܬܓܡ̈ܘܗܝ ܡܕܡ ܕܡܠܠ ܥܠܝܢ ܘܥܠ ܕܝܢ̈ܝܢ̇. ܐܝܠܝܢ ܕܕܝܢܝܢ ܗܘܘ ܠܐܝܣܪܝܠ ܘܠܝܗܘܕܐ. ܘܠܡ̈ܠܟܝܢ ܘܠܪ̈ܘܪܒܢܝܢ. ܘܥܠ ܓܒܪ̈ܐ ܕܒܝܬ ܐܝܣܪܐܝܠ ܘܕܝܗܘܕܐ

24. Baruch 2:2

    ܘܐܝܬܝ ܥܠܝܢ ܡܪܝܐ ܒܝܫܬ̈ܐ ܪ̈ܘܪܒܬܐ̣. ܕܠܐ ܐܬܥܒܕ ܐܟܘܬܗܝܢ ܬܚܝܬ ܫܡܝܐ ܥܠ ܟܘܠܗ̇ ܐܪܥܐ̣̇. ܐܝܟ ܕܐܬܥ̣ܒܕ ܒܐܘܪܫܠܡ. ܐܝܟ ܡܐ ܕܟܬܝܒ ܒܢܡܘܣܗ ܕܡܘܫܐ̇

25. Baruch 2:3

    ܕܢܐܟܘܠ ܟܠ ܓܒܪ ܒܣܪܐ ܕܒܪܗ̇. ܘܢܐܟܘܠ ܟܠ ܓܒܪ ܒܣܪܐ ܕܒܪܬܗ

26. Baruch 2:4

    ܘܝܗ̣ܒ ܐܢܘܢ ܒܐܝܕܐ ܕܟܠܗܝܢ ܡ̈ܠܟܘܬܐ ܕܒܚܕܪ̈ܝ̣ܢ. ܠܚܣܕܐ ܘܠܚܪܒܐ ܒܟܠܗܘܢ ܥܡ̈ܡܐ ܕܒܚܕܪ̈ܝܢ. ܠܢ ܐܝܠܝܢ ܕܒ̇ܕܪ ܐܢܘܢ ܡܪܝܐ

27. Baruch 2:5

    ܘܗܘ̣ܝܢ ܠܢ ܠܬܚܬ ܠܬܚܬ ܘܠܐ ܠܥܠ ܠܥܠ. ܡܛܠ ܕܚܛܝܢ ܠܡܪܝܐ ܐܠܗܢ ܘܠܐ ܫܡ̣ܥܢ ܒܩܠܗ

28. Baruch 2:6

    ܕܡܪܝܐ ܗܝ̇ ܐܠܗܢ ܙܕܝܩܘܬܐ. ܕܝܠܢ ܕܝܢ ܘܕܐ̈ܒܗܝܢ ܒܗܬܬ ܐ̈ܦܐ̣ ܐܝܟ ܕܝܘܡܢܐ

29. Baruch 2:7

    ܡܛܠ ܕܡܠܠ ܥܠܝܢ ܡܪܝܐ ܐܠܗܢ ܟܠܗܝܢ ܒܝܫ̈ܬܐ ܗܠܝܢ ܕܐܝܬܝ ܥܠܝܢ

30. Baruch 2:8

    ܘܠܐ ܒܥܝܢ̣ ܡܢ ܡܪܝܐ ܕܢܗܦܘܟ ܟܠܢܫ ܡܢ ܨܒܝܢ̈ܝ ܠܒܗ ܒܝܫ̣ܐ

31. Baruch 2:9

    ܘܐܬܬܥܝܪ ܡܪܝܐ ܥܠ ܒܝܫ̈ܬܐ̣ ܘܐܝܬܝ ܐ̈ܢܝܢ ܥܠܝܢ. ܡܛܠ ܕܙܕܝܩ ܗܘ ܡܪܝܐ ܐܠܗܢ̇. ܒܟܠܗܘܢ ܥ̇ܒ̈ܕܘܗܝ ܕܦܩ̇ܕܢ ܡܪܝܐ̣

32. Baruch 2:10

    ܘܠܐ ܫܡ̣ܥܢ ܒܩܠܗ ܕܡܪܝܐ ܐܠܗܢ̇. ܕܢܗܠܟ ܒܦܘܩ̈ܕܢܘܗܝ ܕܡܪܝܐ̇. ܗܠܝܢ ܕܝܗ̣ܒ ܩܕܡ ܐ̈ܦܝܢ

33. Baruch 2:11

    ܘܗܫܐ ܡܪܝܐ ܐܠܗܐ ܕܐܝܣܪܝܠ̣. ܐܢܬ ܗܘ ܕܐܦܩܬ ܠܥܡܟ ܡܢ ܐܪܥܐ ܕܡܨܪܝܢ. ܒܐܝ̣ܕܐ ܥܫܝܢܬܐ̇. ܒܐ̈ܬܘܬܐ ܘܒܬܕܡܪ̈ܬܐ̇ ܒܚܝܠܐ ܪܒܐ ܘܒܕܪܥܐ ܪܡܐ̇. ܘܥܒ̣ܕܬ ܠܟ ܫܡܐ ܐܝܟ ܕܝܘܡܢܐ

34. Baruch 2:12

    ܚܛܝܢ ܘܐܣܟܠܢ̇ ܘܐܪܫܥܢ̇ ܡܪܝܐ ܐܠܗܢ. ܒܟܠܗܘܢ ܦܘܩ̈ܕܢܝܟ̣ ܘܒܟܠܗ̇ ܙܕܝܩܘܬܟ

35. Baruch 2:13

    ܐܗܦܟ ܚܡܬܟ ܡܢ̣ܢ. ܡܛܠ ܕܩܠܝܠ ܗܘ ܐܫܬܚܪܢ ܡܢ ܣܘܓܐܐ. ܘܐܝܬܝ̣ܢ ܙܥܘܪ̈ܐ ܒܝܬ ܥܡ̈ܡܐ. ܗܠܝܢ ܕܒܕܪܬܢ ܠܬܡ̇ܢ ܒܝܢܬܗܘܢ

36. Baruch 2:14

    ܐܠܐ ܫܡ̣ܥ ܡܪܝܐ ܨܠܘܬܢ ܘܒܥܘܬܢ̣. ܘܦܨܢ̣ ܡܛܠ ܫܡܟ. ܘܗܒܝܢ ܠܪ̈ܚܡ̣ܐ̇ ܩܕܡ ܫ̈ܒܝܢ

37. Baruch 2:15

    ܕܢܕܥܘܢ ܟܠܗ̇ ܐܪܥܐ̣. ܕܐܢܬ ܗܘ ܡܪܝܐ ܐܠܗܢ. ܡܛܠ̣ ܕܫܡܟ ܩܕܝܫܐ ܐܬܩܪܝ ܥܠ ܐܝܣܪܝܠ̣ ܘܥܠ ܫܪܒܬܗ

38. Baruch 2:16

    ܚܘܪ ܡܪܝܐ̣ ܘܚܙܝ ܡܢ ܡܥܡܪܟ ܩܕܝܫܐ. ܘܚܘܪ ܒܢ ܡܪܝܐ̈ ܘܐܪܟܢ ܐܕܢܟ̣ ܘܫܡ̣ܥܝܢ

39. Baruch 2:17

    ܦܬܚ̣ ܡܪܝܐ ܥܝܢ̈ܝܟ̣ ܘܚܙܝ. ܡܛܠ ܕܠܐ ܡܝ̈ܬܐ ܐܝܠܝܢ ܕܢܚܬܘ ܠܫܝܘܠ̇. ܐܝܠܝܢ ܕܐܫܬ̣ܩܠܬ ܪܘܚܗܘܢ ܡܢ ܪ̈ܚ̇ܡܝܗܘܢ̇ ܢܬܠܘܢ ܬܫܒܘܚܬܐ ܘܬܘܕܝܬܐ ܘܙܕܝܩܘܬܐ ܠܡܪܝܐ̣

40. Baruch 2:18

    ܐܠܐ ܢܦܫܐ ܡܥܩܬܐ ܕܟܪܝܐ ܠܗ̇ ܥܠ ܪܒܘܬܗ̇. ܕܡܗܠܟܐ ܒܡܟܝܟܘܬܐ ܘܒܟܘܪܗܢܐ̇ ܘܥܝܢ̈ܐ ܡܓܙܝ̈ܬܐ ܘܢܦܫܐ ܟܦܢܬܐ̇. ܢܬܠܘܢ ܠܟ ܬܫܒܘܚܬܐ ܘܙܕܝܩܘܬܐ ܡܪܝܐ

41. Baruch 2:19

    ܡܛܠ ܕܠܐ ܗܘ̣ܐ ܥܠ ܙܕܝܩܘܬܢ ܘܥܠ ܙܕܝܩܘܬܐ ܕܐ̈ܒܗܝܢ ܘܕܡ̈ܠܟܝܢ. ܬܟܝܠܝܢܢ ܘܒ̇ܥܝܢܢ ܪ̈ܚ̣ܡܐ ܡܢ ܩܕܡܝܟ̇. ܘܪܡ̇ܝܢܢ ܬܟܫܦ̇ܬܢ̇ ܩܕܡܝܟ ܡܪܝܐ ܐܠܗܢ

42. Baruch 2:20

    ܡܛܠ ܕܐܗ̣ܦܟܬ ܟܠܗ̇ ܚܡܬܟ ܘܪܘ̇ܓܙܟ ܥܠܝܢ. ܐܝܟ ܕܡܠܠܬ ܒܝܕ ܥܒ̣̈ܕܝܟ ܢܒ̈ܝܐ ܘܐܡ̣ܪܬ̇

43. Baruch 2:21

    ܕܐܪܟܢ̣ܘ ܟܬܦܟܘܢ ܘܦܠܘܚܘ ܠܡ̇ܠܟܐ ܕܒܒܠ̇. ܘܬܒܘ ܒܐܪܥܐ ܕܝܗ̇ܒܬ ܠܐ̈ܒܗܝܟܘܢ

44. Baruch 2:22

    ܘܐܠܐ ܬܫܡܥܘܢ ܒܩܠܗ ܕܡܪܝܐ ܠܡܦܠ̣ܚ ܠܡ̇ܠܟܐ ܕܒܒܠ̣

45. Baruch 2:23

    ܓܡܘܪܝܐ ܐܥܒܕ ܠܡܕܝܢ̈ܬܐ ܕܝܗܘܕܐ̣ ܘܒܚܕܪ̈ܝ ܐܘܪܫܠܡ. ܘܐܘܒܕ ܩܠܐ ܕܕܝܨܐ̣ ܘܩܠܐ ܕܚܕܘܬܐ. ܩܠܐ ܕܚܬܢܐ̣ ܘܩܠܐ ܕܟܠܬܐ. ܘܬܗܘܐ ܟܠܗ̇ ܐܪܥܐ̣ ܠܚܘܪܒܐ ܡܢ ܒܠܝ ܕܥܡ̇ܪ ܒܗ̇

46. Baruch 2:24

    ܘܠܐ ܫܡ̣ܥܢ ܒܩܠܟ ܠܡܦܠܚ ܠܡ̇ܠܟܐ ܕܒܒܠ. ܘܐܩܝܡܬ ܦܬ̈ܓܡܝܟ ܕܡܠ̣ܠܬ ܒܐܝܕܐ ܕܥܒ̣̈ܕܝܟ ܢܒ̈ܝܐ. ܕܢܦܩܘܢ ܓܪ̈ܡܐ ܕܡ̈ܠܟܝܢ ܘܓܪ̈ܡܐ ܕܐ̈ܒܗܝܢ ܡܢ ܐܬܪܗܘܢ. ܘܡܢ ܩܒܪ̈ܝܗܘܢ

47. Baruch 2:25

    ܘܗܐ ܫ̣ܕܝܢ ܒܫܘܒܐ ܒܐܝܡܡܐ̣ ܘܒܐܓܠܝܕܐ ܒܠܠܝܐ. ܘܡܝܬܘ̣ ܒܟܐ̈ܒܐ ܒܝ̣ܫ̈ܐ. ܒܚܪܒܐ ܘܒܟܦܢܐ ܘܒܣܝܦܐ̣ ܘܒܫܒܝܐ

48. Baruch 2:26

    ܘܥܒܕܬܝܗܝ ܠܒܝܬܐ ܕܐܬܩܪܝ ܫܡܟ ܥܠܘܗܝ ܠܚܘܪܒܐ̣ ܐܝܟ ܕܝܘܡܢܐ. ܡܛܠ ܒܝܫܘܬܐ ܕܒܝܬ ܐܝܣܪܝܠ ܘܕܒܝܬ ܝܗܘܕܐ

49. Baruch 2:27

    ܘܥܒ̣ܕܬ ܠܢ ܡܪܝܐ ܐܠܗܢ ܐܝܟ ܟܘܠܗ̇ ܒܣܝܡܘܬܟ̣ ܘܐܝܟ ܟܘܠܗ ܨܒܝܢܟ. ܘܐܝܟ ܪ̈ܚܡܝ̇ܟ ܣ̈ܓܝܐܐ

50. Baruch 2:28

    ܐܝܟܢܐ ܕܡܠܠ̣ܬ ܒܝܕ ܥܒ̣ܕܟ ܡܘܫܐ̇. ܒܝܘܡܐ ܕܦܩܕܬܝܗܝ ܠܡܟܬܒ ܢܡܘܣܟ ܠܥܝܢ ܐܝܣܪܝܠ ܠܡܐܡܪ

51. Baruch 2:29

    ܐܠܐ ܬܫܡܥܘܢ ܒܩܠܝ̣. ܐܠܐ ܥܡܐ ܣܓܝܐܐ ܘܪܒܐ ܗܢܐ̣ ܢܗ̣ܦܟܘܢ ܠܙܥܘܪܘܬܐ ܘܢܬ̇ܒܨܪܘܢ ܒܝܢ̈ܬ ܥܡ̈ܡܐ ܕܒ̇ܕܪܬ ܐܢܘܢ ܠܬܡ̇ܢ

52. Baruch 2:30

    ܡܛܠ ܕܝܕܥ̇ ܐܢܐ̣ ܕܠܐ ܫ̇ܡܥܝܢ ܠܝ. ܡܛܠ ܕܥܡܐ ܗ̇ܘ ܩܫ̣ܐ ܩܕܠܐ. ܘܢܬܦ̣ܢܘܢ ܒܠܒܗܘܢ ܠܐܪܥܐ ܕܫܒܝ̣ܬܗܘܢ

53. Baruch 2:31

    ܘܢܕܥܘܢ̣ ܕܐܢܐ ܐܢܐ ܡܪܝܐ ܐܠܗܗܘܢ. ܘܐܬܠ ܠܗܘܢ ܠܒܐ ܣܟܘܠܬܢܐ̣ ܘܐ̈ܕܢܐ ܕܢܫܡܥܘܢ ܒܗܝܢ

54. Baruch 2:32

    ܘܢܫܒܚܘܢܢܝ ܒܐܪܥܐ ܕܫܒܝܬܗܘܢ. ܘܢܬܕܟܪܘܢ ܫܡܝ̣

55. Baruch 2:33

    ܘܢܬܘܒܘܢ ܡܢ ܩܫܝܘܬ ܠܒܗܘܢ. ܘܡܢ ܥܒ̈ܕܝܗܘܢ ܒܝܫ̣̈ܐ. ܡܛܘܠ ܕܢܬ̇ܕܟܪܘܢ ܐܘܪܚܐ ܕܐ̈ܒܗܝܗܘܢ. ܐܝܠܝܢ ܕܚ̣ܛܘ ܩܕܡ ܡܪܝܐ

56. Baruch 2:34

    ܘܐܗ̣ܦܟ ܐܢܘܢ̇ ܠܐܪܥܐ ܗ̇ܝ. ܕܝܡܝܬ ܠܐ̈ܒܗܝܗܘܢ̇. ܠܐܒܪܗܡ ܘܠܐܝܣܚܩ ܘܠܝܥܩܘܒ̣. ܘܢܫܬܠܛܘܢ ܒܗ̇. ܘܐܣܓܐ ܐܢܘܢ̣ ܘܠܐ ܢܙܥ̣ܪܘܢ

57. Baruch 2:35

    ܘܐ̇ܩܝܡ ܠܗܘܢ ܩܝ̇ܡܐ ܠܥܠܡ. ܘܐܗܘܐ ܠܗܘܢ ܐܠܗܐ. ܘܗ̣ܢܘܢ̣ ܢܗܘܘܢ ܠܝ ܥܡܐ. ܘܠܐ ܐܙܝ̣ܥ ܬܘܒ ܠܥܡܝ ܐܝܣܪܝܠ̇. ܡܢ ܐܪܥܐ ܗ̇ܝ ܕܝܗ̇ܒܬ ܠܗܘܢ.

58. Baruch 3:1

    ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ̣. ܢܦܫܐ ܕܒܐܘܠܨܢܐ ܘܪܘܚܐ ܕܒܟܪܝܘܬܐ. ܘܦܓܪܐ ܡܥܩܐ̣ ܓܥܘ ܠܘܬܟ

59. Baruch 3:2

    ܫܡ̣ܥ ܡܪܝܐ ܐܠܗܐ̣ ܘܐܬ̇ܪܚܡ. ܡܛܠ ܕܡܪܚܡܢܐ ܐܢܬ ܘܡܪܚܦܢܐ. ܘܪܚ̇ܡ ܥܠܝ̣ܢ ܡܛܠ ܕܚ̣ܛܝܢ ܩܕܡܝܟ

60. Baruch 3:3

    ܡܛܠ ܕܐܢܬ ܩܝ̇ܡ ܐܢܬ̣ ܠܥܠܡ ܘܚܢܢ ܐܒܕܝܢܢ̣ ܠܥܠܡ

61. Baruch 3:4

    ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ. ܫܡܥ ܨܠܘܬܐ ܕܐܝܠܝܢ ܕܡܝܬܘ ܒܐܝܣܪܝܠ̣. ܐܦ ܕܒܢܝ̈ܗܘܢ ܐܝܠܝܢ ܕܚܛܘ ܩܕܡܝܟ̇. ܘܠܐ ܫܡܥܘ ܒܩܠܗ ܕܡܪܝܐ. ܘܕܒܩ ܒܢ ܠܘ̈ܛܬܐ̣ ܘܒܝ̣ܫ̈ܬܐ

62. Baruch 3:5

    ܠܐ ܬܬ̣ܕܟܪ ܥܘ̣ܠܐ̣ ܘܣ̈ܟܠܘܬܐ ܕܐ̈ܒܗܝܢ. ܐܠܐ ܐܬ̣ܕܟܪ ܐܝܕܟ. ܘܠܫܡ̇ܟ ܒܙܒܢܐ ܗ̇ܢܐ

63. Baruch 3:6

    ܡܛܠ ܕܐܢܬ ܗܘ ܡܪܝܐ ܐܠܗܢ. ܘܢܫܒܚܘܢܟ ܡܪܝܐ̈ ܰ •

64. Baruch 3:7

    ܡܛܠ ܗܢܐ ܝܗ̣ܒܬ ܕܚܠܬܟ ܒܠܒܢ ܕܢܩܪܐ ܠܫܡܟ ܩܕܝܫܐ ܘܢܫܒܚܟ ܒܫܒܝܬܢ. ܡܛܠ ܕܐܗܦ̣ܟܢ ܥܠ ܠܒܢ ܟܠܗܝܢ ܒܝܫ̣̈ܬܐ܇ ܘܥܘ̣ܠܐ ܕܐ̈ܒܗܝܢ ܗܠܝܢ ܕܚܛ̣ܘ ܩܕܡܝܟ

65. Baruch 3:8

    ܘܗܐ ܚܢܢ ܝܘܡܢ̣ܐ ܒܫܒܝܬܢ܇ ܕܒܕܪܬܢ ܠܠܘܛܬܐ ܘܠܚܣܕܐ܇ ܘܠܚܘܣܕܐ ܘܠܚܝܒܘܬܐ ܐܝܟ ܟܠܗܝܢ ܣ̈ܟܠܘܬܐ ܘܥܘ̣ܠܐ ܕܐ̈ܒܗܝܢ܇ ܐܝܠܝܢ ܕܡܪܕܘ ܡܢܟ ܡܪܝܐ ܐܠܗܢ

66. Baruch 3:9

    ܫܡ̣ܥ ܐܝܣܪܝܠ. ܦܘܩܕܢܐ ܕܚ̈ܝܐ. ܘܨܘܬܘ ܠܡܕܥ ܣܘܟܠܐ ܘܚܟܡܬܐ

67. Baruch 3:10

    ܡܢ̣ܘ ܐܝܣܪܐܝܠ. ܡܛܠ ܕܒܐܪܥܐ ܕܒ̈ܥܠܕܒܒܐ̣ ܒܠܝ̣ܬ. ܘܒܐܪܥܐ ܢܘܟܪܝܬܐ ܐܬܛܢ̣ܦܬ̣ ܥܡ ܡ̈ܝܬܐ

68. Baruch 3:11

    ܐܬܚ̣ܫܒܬ̣ ܘܥܡ ܢܚ̈ܬܝ ܫܝܘܠ

69. Baruch 3:12

    ܕܫܒ̣ܩܬ ܡܒܘܥܐ ܕܚܟܡܬܐ

70. Baruch 3:13

    ܐܠܘ ܗܠ̣ܟܬ ܒܐܘܪܚܗ ܕܐܠܗܐ̣. ܥܡ̇ܪ ܗܘܝܬ ܒܫܠܡܐ ܙܒܢܐ ܕܠܥܠܡ ܥܠܡܝܢ

71. Baruch 3:14

    ܐܝܠܦ ܐܝܟܐ ܗܝ ܚܟܡܬܐ̇. ܘܐܝܟܘ ܚܝܠܐ ܘܐܝܟܘ ܣܘܟܠܐ. ܕܬܕܥ ܐܝܟ ܚܕܐ̇. ܐܝܟܘ ܢܘܓܪ̈ܐ ܕܝܘܡ̈ܬܐ ܕܚ̈ܝܐ. ܐ̇ܝܟܐ ܐܢܘܢ ܚ̈ܝܐ. ܐܝܟܘ ܢܘܗܪܐ ܕܚ̈ܝܐ ܘܫܠܡܐ

72. Baruch 3:15

    ܡ̇ܢܘ ܐܫܟܚ ܐܬܪܗ. ܐܘ ܡܢ̣ܘ ܥܠ̣ ܠܐܘܨܪܗ ܘܠܒܝܬ ܓܙܗ

73. Baruch 3:16

    ܐܝܟܐ ܐܢܘܢ ܫ̈ܠܝܛܐ ܕܥܠܡܐ. ܘܐܝܠܝܢ ܕܡܫ̇ܬܠܛܝܢ ܥܠ ܚܝܘܬܐ ܕܐܪܥܐ̇

74. Baruch 3:17

    ܘܐܝܠܝܢ ܕܒܦܪܚܬܐ ܕܫܡܝܐ ܡܫ̇ܬܥܝܢ̇. ܘܟܣܦܐ ܣܝܡܝܢ ܠܗܘܢ ܒܣ̈ܝܡܬܐ̇. ܘܕܗܒܐ ܗ̇ܘ ܕܬܟܝܠܝܢ ܥܠܘܗܝ ܒܢ̈ܝ ܐܢܫܐ. ܘܠܝܬ ܣܘܦܐ ܠܩܢܝܢܗܘܢ

75. Baruch 3:18

    ܐܝܠܝܢ ܕܟܣܦܐ ܩ̣ܢܝ̣ܢ ܘܫܩܝܠܝܢ ܨܦܬܗ. ܘܠܝܬ ܡܢܝܢܐ ܠܥܒܝ̈ܕܬܗܘܢ̇

76. Baruch 3:19

    ܐܬܚ̇ܒܠܘ̣ ܘܢܚ̣ܬܘ ܠܫܝܘܠ. ܘܐܚܪ̈ܢܐ̣ ܩ̇ܡܘ ܚܠܦܝܗܘܢ

77. Baruch 3:20

    ܥ̈ܠܝܡܐ ܚܙܘ ܢܘܗܪܐ̣ ܘܥܡ̣ܪܘ ܒܐܪܥܐ. ܘܐܘܪܚܐ ܕܣܘܟܠܐ ܘܕܚܟܡܬܐ̣ ܠܐ ܝܕܥ̣ܘ

78. Baruch 3:21

    ܘܠܐ ܐܣ̇ܬܟܠܘ ܫܒܝ̈ܠܝܗ̣̇ ܐܦ ܠܐ ܐܚܡܣܘܗ̇. ܘܒܢ̈ܝܗܘܢ ܡܢ ܐܘܪܚܗ̣̇ ܐܪܚܩܘ ܢܦܫܗܘܢ̣ ܘܡܪܕܘ ܰ •

79. Baruch 3:22

    ܠܐ ܐܫܬܡ̣ܥܬ̣ ܒܟܢܥܢ. ܐܦ ܠܐ ܐܬܚ̣ܙܝܬ ܒܬܝܡܢ

80. Baruch 3:23

    ܐܦ ܠܐ ܒܢ̈ܝ ܗܓܪ ܗ̣ܢܘܢ ܗܠܝܢ ܕܒ̇ܥܝܢ ܣܘܟܠܐ ܕܥܠ ܐܪܥܐ̇. ܬܓܪ̈ܝܗ̇ ܕܡܘ̣ܪܬ̣ ܘܕܬܝܡܢ. ܘܐܝܠܝܢ ܕܡܫܬ̇ܥܝܢ ܫ̈ܘܥܝܬܐ. ܘܐܝܠܝܢ ܕܡܥܩ̇ܒܝܢ ܘܒ̇ܥܝܢ ܣܘܟܠܐ. ܐܘܪܚܐ ܕܝܢ ܕܚܟܡܬܐ̣ ܠܐ ܝܕܥ̣ܘ. ܐܦܠܐ ܐܕܪܟܘ ܫܒ̈ܝܠܝܗ̇

81. Baruch 3:24

    ܐܘ ܐܝܣܪܝܠ̇̈ ܟܡܐ ܪܒ ܒܝܬܗ ܕܡܪܝܐ ܐܠܗܐ. ܘܐܪܝܟ̣ ܘܐܪܘܝܚ ܐܬܪܐ ܕܩܢܝܢܗ

82. Baruch 3:25

    ܘܠܝܬ ܠܗ ܣܘܦܐ. ܘܪܡ ܗ̣ܘ ܘܠܝܬ ܠܗ ܡܘܫܚܐ

83. Baruch 3:26

    ܬܡ̇ܢ ܐܬܝܠܕܘ ܓܢܒܪ̈ܐ ܗܠܝܢ ܕܫܡܗ̈ܬܐ ܕܡܢ ܒܪܫܝܬ̇. ܗܠܝܢ ܕܗ̇ܘ̣ܘ ܪ̈ܘܪܒܐ ܛܒ̣ ܘܝܕܥܝܢ ܩܪܒܐ

84. Baruch 3:27

    ܠܐ ܗܘܐ ܠܗܠܝܢ ܓܒ̣ܐ ܐܠܗܐ. ܐܦ ܠܐ ܐܘܪܚܐ ܕܚܟܡܬܐ ܝܗ̣ܒ ܠܗܘܢ

85. Baruch 3:28

    ܘܐܒܕܘ̣ ܡܛܠ ܕܠܝܬ ܗܘܐ ܒܗܘܢ ܚܟܡܬܐ ܘܣܘܟܠܐ. ܘܐܒܕܘ̣ ܡܢ ܒܠܝ ܡܚܫܒܬܐ. ܡܛܠ ܕܠܝܬ ܗܘܐ ܒܗܘܢ ܬܪܥܝܬܐ

86. Baruch 3:29

    ܡ̇ܢ ܣܠ̣ܩ ܠܫܡܝܐ. ܘܢܣܒܗ̇ ܘܐܚܬܗ̇ ܡܢ ܥܢ̈ܢܐ

87. Baruch 3:30

    ܐܘ ܡܢܘ ܥܒ̣ܪ ܥܒ̣ܪ̈ܘܗܝ ܘܚܪܬܗ ܕܝܡܐ̇. ܘܐܫܟܚܗ̇ ܘܐܣܩܗ̇ ܐܝܟ ܕܠܕܗܒܐ ܓܒܝ̣ܐ

88. Baruch 3:31

    ܠܝܬ ܕܝܕܥ̇ ܐܘܪܚܗ̇. ܐܦܠܐ ܕܡܬ̇ܪܥܐ ܫܒܝ̈ܠܝܗ̇

89. Baruch 3:32

    ܐܠܐ ܗ̇ܘ ܕܝܕܥ̇ ܟܠ̣ ܗܘܝܘ ܝ̇ܕܥ ܠܗ̇. ܐܫܟܚܗ̇ ܒܚܟܡܬܗ. ܗ̇ܘ ܕܐܬ̣̇ܩܢ ܐܪܥܐ̣ ܠܥܠܡ ܥܠܡܝܢ. ܡܠ̣ܗ̇ ܒܥܝܪܐ ܕܐܪ̈ܒܥܬ ܪ̈ܓܠܝܗ̇

90. Baruch 3:33

    ܗ̇ܘ ܕܡܫܕܪ ܢܘܗܪܐ ܘܐ̇ܙܠ̇. ܘܩܪܝܗܝ ܘܐܫܬ̣ܡܥ ܠܗ ܘܥܢܝܗ̣ܝ ܒܐܪܬܝܬܐ̣

91. Baruch 3:34

    ܟܘ̈ܟܒܐ ܕܝܢ ܐܢܗܪܘ̇ ܒܕܘܟܝ̈ܬܗܘܢ̣ ܘܐܬ̇ܒܣ̣ܡܘ

92. Baruch 3:35

    ܘܩ̇ܪܐ ܠܗܘܢ ܘܐܡܪܝܢ̣ ܗܐ ܚܢܢ. ܐܢܗܪܘ ܒܚܕܘܬܐ ܠܗ̇ܘ ܡ̇ܢ ܕܥܒ̣ܕ ܐܢܘܢ.ܰ ܰ •

93. Baruch 3:36

    ܗܢܘ ܐܠܗܐ ܘܠܝܬ ܐܚܪܝܢ ܠܒܪ ܡܢܗ. ܘܠܐ ܢܬܚ̣ܫܒ ܠܒܪ ܡܢܗ ܐܚܪܝܢ

94. Baruch 3:37

    ܗܢܘ ܕܐܫܟܚ ܟܠܗ ܐܘܪܚܐ ܕܚܟܡܬܐ̇. ܘܝܗܒܗ̇ ܠܝܥܩܘܒ ܥܒ̣ܕܗ̣ ܘܠܐܝܣܪܝܠ ܚܒܝܒܗ

95. Baruch 3:38

    ܘܡܢ ܒܬܪ ܗܠܝܢ. ܥܠ ܐܪܥܐ ܐܬܓܠܝ̣ ܘܐܬܚܙܝ. ܘܒܝܬ ܒܢ̈ܝ ܐܢܫܐ ܐ̇ܬܗ̇ܦܟ.

96. Baruch 4:1

    ܗܢܘ ܟܬܒܐ ܕܕܘܟܪܢܐ ܕܦܘܩ̈ܕܢܘܗܝ ܕܐܠܗܐ̇. ܘܢܡܘܣܐ ܕܐܝܬܘܗܝ ܠܥܠܡ. ܠܟܠܗܘܢ ܐܝܠܝܢ ܕܡܚܡܣܢܝܢ ܒܗ ܬܗܘܐ ܠܗܘܢ̣ ܠܚܝ̈ܐ. ܘܐܝܠܝܢ ܕܫܒܩܝܢ ܠܗܘܢ̣ ܢܡܘܬܘܢ

97. Baruch 4:2

    ܐܬ̣ܦܢܝ̣ ܘܐ̇ܬܝܠܦ ܝܥܩܘܒ̇̈ ܘܚܡܣܢ̣ ܘܗ̇ܠܟ ܒܐܘܪܚܗ̇. ܠܘܩܒܠ ܙܗܪܐ ܕܢܘܗܪܗ

98. Baruch 4:3

    ܠܐ ܬܬܠ ܠܐܚܪܝܢ ܬܫܒܘܚܬܟ ܘܐܝܩܪܟ̇. ܘܡܕܡ ܕܛܒ ܠܟ̇ ܘܦܩܚ ܠܟ ܠܥܡܐ ܢܘܟܪܝܐ

99. Baruch 4:4

    ܛܘܒ̈ܢܐ ܚܢܢ. ܘܛܘܒܝܟ ܐܝܣܪܝܠ.. ܡܛܠ ܕܡܕܡ ܕܫܦܝܪ ܠܐܠܗܢ̣ ܝܕܥܝܢܢ

100. Baruch 4:5

     ܐ̣ܬܒܝܐܘ̇ ܥܡܗ܈ ܕܐܠܗܐ. ܕܘܟܪܢܐ ܠܐܝܣܪܝܠ

Next → — showing 1–100 of 141

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.