Eclogarum Liber

Perseus Latin · Perseus Latin · 447 sections

1.1
CUI dono lepidum novum libellum? 1
1.2
Veronensis ait poeta quondam
1.3
inventoque dedit statim Nepoti.
1.4
at nos inlepidum, rudem libellum,
1.5
burras, quisquilias ineptiasque,
1.6
credemus gremio cui fovendum?
1.7
inveni, trepidae silete nugae,
1.8
nec doctum minus et magis benignum,
1.9
quam quem Gallia praebuit Catullo.
1.10
hoc nullus mihi carior meorum,
1.11
quem pluris faciunt novem sorores,
1.12
quam cunctos alios Marone dempto.
1.13
Pacatum haut dubie, poeta, dicis?
1.14
ipse est. intrepide volate, versus,
1.15
et nidum in gremio fovete tuto.
1.16
hic vos diligere, hic volet tueri;
1.17
ignoscenda teget, probata tradet:
1.18
post hunc iudicium timete nullum, vale.
2.1
QUOD vitae sectabor iter, si plena tumultu
2.2
sunt fora, si curis domus anxia, si peregrinos
2.3
cura domus sequitur, mercantem si nova semper
2.4
damna manent, cessare vetat si turpis egestas;
2.5
si vexat labor agricolam, mare naufragus horror
2.6
infamat, poenaeque graves in caelibe vita
2.7
et gravior cautis custodia vana maritis;
2.8
sanguineum si Martis opus, si turpia lucra
2.9
faenoris et velox inopes usura trucidat?
2.10
omne aevum curae, cunctis sua displicet aetas.
2.11
sensus abest parvis Iactantibus, et puerorum
2.12
dura rudimenta, et iuvenum temeraria pubes.
2.13
adflictat fortuna viros per bella, per aequor,
2.14
irasque insidiasque catenatosque labores 1
2.15
mutandos semper gravioribus. ipsa senectus
2.16
expectata diu votisque optata malignis
2.17
obicit innumeris corpus lacerabile morbis.
2.18
spernimus in commune omnes praesentia; quosdam
2.19
constat nolle deos fieri. Iuturna reclamat:
2.20
”quo vitam dedit aeternam? cur mortis adempta est
2.21
condicio?“ sic Caucasea sub rupe Prometheus
2.22
testatur Saturnigenam nec nomine cessat
2.23
incusare Iovem, data sit quod vita perennis.
2.24
respice et ad cultus animi, sic nempe pudicum
2.25
perdidit Hippolytum non felix cura pudoris.
2.26
e contra inlecebris maculosam degere vitam
2.27
quem iuvat, adspiciat poenas et crimina regum,
2.28
Tereos incesti vel mollis Sardanapalli.
2.29
perfidiam vitare monent tria Punica bella;
2.30
set prohibet servare fidem deleta Saguntos.
2.31
vive et amicitias semper cole.-Crimen ob istud
2.32
Pythagoreorum periit schola docta sophorum.- hoc
2.33
metuens igitur nullas cole.-Crimen ob istud
2.34
Timon Palladiis olim lapidatus Athenis,
2.35
dissidet ambiguis semper mens obvia votis,
2.36
nec voluisse homini satis est: optata recusat,
2.37
esse in honore placet, mox paenitet: et dominari
2.38
ut possint, servire volunt, idem auctus honore
2.39
invidiae obicitur, pernox est cura disertis;
2.40
set rudis ornatu vitae caret, esto patronus,
2.41
et defende reos: set gratia rara clientis,
2.42
esto cliens: gravis imperiis persona patroni,
2.43
xercent hunc vota patrum: mox aspera curis
2.44
sollicitudo subit, contemnitur orba senectus
2.45
et captatoris praeda est heredis egenus.
2.46
vitam parcus agas: avidi lacerabere fama,
2.47
et largitorem gravius censura notabit.
2.48
cuncta tibi adversis contraria casibus, ergo
2.49
optima Graiorum sententia: quippe homini aiunt
2.50
non nasci esse bonum aut natum cito morte potiri.
2.51
Haec quidem Pythagorica est apophasis secundum
2.52
tale quod subiectum est distichon:
2.53
πρῶτον μὲν μὴ φῦναι ἐν ἀνθρώποισιν ἄριστον,
2.54
δεύτερον ὅττι τάχιστα πύλασ Ἀίδαο περῆσαι. 2
2.55
Contra sed alterius sectator dogmatis ista
2.56
quid doceat reprobans, subdita disce legens:
2.57
“Ergo nihil quoniam vita est quod amemus in ista,
2.58
nec tamen incassum fas est nos credere natos,
2.59
auctorem vitae si iustum credimus esse,
2.60
vita alia est nobis illi vivendo paranda,
2.61
cum quo post istam possimus vivere vitam,
2.62
illi equidem stygias properent descendere ad umbras,
2.63
Pythagoreorum stolidum qui dogma secuti
2.64
non nasci sese quam natos vivere malint.”
3.1
VIR bonus et sapiens, qualem vix repperit unum
3.2
milibus e cunctis hominum consultus Apollo,
3.3
iudex ipse sui totum se explorat ad unguem.
3.4
quid proceres vanique levis quid opinio volgi
3.5
securus, mundi instar habens, teres atque rotundus,
3.6
externae ne quid labis per levia sidat.1
3.7
ille, dies quam longus erit sub sidere Cancri
3.8
quantaque nox tropico se porrigit in Capricorno,
3.9
cogitat et iusto trutinae se examine pendit,
3.10
ne quid luet, ne quid protuberet, angulus aequis
3.11
partibus ut coeat, nil ut deliret amussis,
3.12
sit solidum, quodcumque subest, nec inania subter
3.13
indicet .admotus digitis pellentibus ictus,
3.14
non prius in dulcem declinans lumina somnum,
3.15
omnia quam longi reputaverit acta diei:
3.16
quae praetergressus, quid gestum in tempore, quid non?
3.17
cur isti facto decus afuit aut ratio illi?
3.18
quid mihi praeteritum? cur haec sententia sedit,

Perseus Latin. CTS URN stoa0045.stoa007.perseus-lat2. Via the Perseus Digital Library / Open Greek and Latin TEI corpora. Licence: CC BY-SA 4.0. Source.