Ex Ponto
- 1.6.34
naufragus in mediis brachia iactet aquis.
- 1.6.35
saepe aliquem sollers medicorum cura reliquit,
- 1.6.36
nec spes huic vena deficiente cadit.
- 1.6.37
carcere dicuntur clausi sperare salutem,
- 1.6.38
atque aliquis pendens in cruce vota facit.
- 1.6.39
haec dea quam multos laqueo sua colla ligantis
- 1.6.40
non est proposita passa perire nece!’
- 1.6.41
me quoque conantem gladio finire dolorem
- 1.6.42
arguit iniecta continuitque manu,
- 1.6.43
quid que facis? lacrimis opus est, non sanguine dixit,
- 1.6.44
‘saepe per has flecti principis ira solet.
- 1.6.45
quamvis est igitur meritis indebita nostris,
- 1.6.46
magna tamen spes est in bonitate dei.
- 1.6.47
qui ne difficilis mihi sit, Graecine, precare,
- 1.6.48
confer et in votum tu quoque verba meum.
- 1.6.49
inque Tomitana iaceam tumulatus harena,
- 1.6.50
si te non nobis ista vovere liquet.
- 1.6.51
nam prius incipient turris vitare columbae,
- 1.6.52
antra ferae, pecudes gramina, mergus aquas,
- 1.6.53
quam male se praestet veteri Graecinus amico,
- 1.6.54
non ita sunt fatis omnia versa meis.’
- 1.7.1
Littera pro verbis tibi, Messaline, salutem
- 1.7.2
quam legis, a saevis attulit usque Getis,
- 1.7.3
indicat auctorem locus? an, nisi nomine lecto,
- 1.7.4
haec me Nasonem scribere verba latet?
- 1.7.5
ecquis in extremo positus iacet orbe tuorum,
- 1.7.6
me tamen excepto, qui precor esse tuus?
- 1.7.7
di procul a cunctis, qui te venerantur amantque
- 1.7.8
huius notitiam gentis habere velint,
- 1.7.9
nos satis est inter glaciem Scythicasque sagittas
- 1.7.10
vivere, si vita est mortis habenda genus,
- 1.7.11
nos premat aut bello tellus, aut frigore caelum,
- 1.7.12
truxque Getes armis, grandine pugnet hiems .
- 1.7.13
nos habeat regio nec pomo feta nec uvis,
- 1.7.14
et cuius nullum cesset ab hoste latus.
- 1.7.15
cetera sit sospes cultorum turba tuorum,
- 1.7.16
in quibus, ut populo, pars ego parva fui.
- 1.7.17
me miserum, si tu verbis offenderis istis
- 1.7.18
nosque negas ulla parte fuisse tuos!
- 1.7.19
idque sit ut verum, mentito ignoscere debes:
- 1.7.20
nil demit laudi gloria nostra tuae.
- 1.7.21
quis se Caesaribus notus non fingit amicum?
- 1.7.22
da veniam lasso: tu mihi Caesar eras.
- 1.7.23
nec tamen inrumpo quo non licet ire, satisque est
- 1.7.24
atria si nobis non patuisse negas.
- 1.7.25
utque tibi fuerit mecum nihil amplius, uno
- 1.7.26
nempe salutaris, quam prius, ore minus,
- 1.7.27
nec tuus est genitor nos infitiatus amicos,
- 1.7.28
hortator studii causaque faxque mei:
- 1.7.29
cui nos et lacrimas, supremum in funere munus,
- 1.7.30
et dedimus medio scripta canenda foro.
- 1.7.31
adde quod est frater, tanto tibi iunctus amore,
- 1.7.32
quantus in Atridis Tyndaridisque fuit:
- 1.7.33
is me nec comitem nec dedignatus amicum est :
- 1.7.34
si tamen haec illi non nocitura putas.
- 1.7.35
si minus, hac quoque me mendacem parte fatebor:
- 1.7.36
clausa mihi potius tota sit ista domus,
- 1.7.37
sed neque claudenda est, et nulla potentia vires
- 1.7.38
praestanda ne quid peccet amicus, habet.
- 1.7.39
et tamen ut cuperem culpam quoque posse negari,
- 1.7.40
sic facinus nemo nescit abesse mihi.
- 1.7.41
quod nisi delicti pars excusabilis esset,
- 1.7.42
parva relegari poena futura fuit.
- 1.7.43
ipse sed hoc vidit, qui pervidet omnia. Caesar,
- 1.7.44
stultitiam dici crimina posse mea:
- 1.7.45
quaque ego permisi, quaque est res passa, pepercit,
- 1.7.46
usus et est modice fulminis igne sui.
- 1.7.47
nec vitam nec opes nec ademit posse reverti,
- 1.7.48
si sua per vestras victa sit ira preces,
- 1.7.49
at graviter cecidi, quid enim mirabile, si quis
- 1.7.50
a Iove percussus non leve vulnus habet?
- 1.7.51
ipse suas etiam vires inhiberet Achilles,
- 1.7.52
missa gravis ictus Pelias hasta dabat,
- 1.7.53
iudicium nobis igitur cum vindicis adsit,
- 1.7.54
non est cur tua me ianua nosse neget.
- 1.7.55
culta quidem, fateor, citra quam debuit, illa est;
- 1.7.56
sed fuit in fatis hoc quoque, credo, meis.
- 1.7.57
nec tamen officium sensit domus altera nostrum
- 1.7.58
sic: illic vestro sub Lare semper eram.
- 1.7.59
quaeque tua est pietas, ut te non excolat ipsum,
- 1.7.60
ius aliquod tecum fratris amicus habet.
- 1.7.61
quid quod, ut emeritis referenda est gratia semper,
- 1.7.62
sic est fortunae promeruisse tuae?
- 1.7.63
quod si permittis nobis suadere quid optes,
- 1.7.64
ut des quam reddas plura precare deos.
- 1.7.65
idque facis, quantumque licet meminisse, solebas
- 1.7.66
officii causae pluribus esse datis.
- 1.7.67
quo libet in numero me, Messaline, repone,
- 1.7.68
sim modo pars vestrae non aliena domus :
- 1.7.69
et mala Nasonem, quoniam meruisse videtur,
- 1.7.70
si non ferre doles, at meruisse dole.
- 1.8.1
A tibi dilecto missam Nasone salutem
- 1.8.2
accipe, pars animae magna, Severe, meae.
- 1.8.3
neve roga quid agam. si persequar omnia, flebis;
- 1.8.4
summa satis nostri si tibi nota mali.
- 1.8.5
vivimus assiduis expertes pacis in armis,
- 1.8.6
dura pharetrato bella movente Geta.
- 1.8.7
deque tot expulsis sum miles in exule solus :
- 1.8.8
tuta, neque invideo, cetera turba latet,
- 1.8.9
quoque magis nostros venia dignere libellos,
← Previous · Next → — showing 501–600 of 3,192
Perseus Latin. CTS URN phi0959.phi009.perseus-lat2. Via the Perseus Digital Library / Open Greek and Latin TEI corpora. Licence: CC BY-SA 4.0. Source.