Adelphi

Perseus Latin · Perseus Latin · 1,407 sections

3.2.318
Adolescenti ipsi eriperem oculos; posthaec praecipitem darem;
3.2.319
Caeteros ruerem, agerem, raperem, tunderem, et prosternerem.
3.2.320
Sed cesso heram hoc malo impertiri propere?
3.2.320b
Revocemus. Geta.
3.2.321
Hem, quisquis es, sine me.
3.2.321b
Ego sum Sostrata.
3.2.321c
Ubi ea est? te ipsam quaerito,
3.2.322
Te expecto: oppido opportune te obtulisti mihi obviam,
3.2.323
Hera.
3.2.323b
Quid est? quid trepidas?
3.2.323c
Hei mihi!
3.2.323d
Quid festinas, mi Geta?
3.2.324
Animam recipe.
3.2.324b
Prorsus—
3.2.324c
Quid istuc prorsus ergo est.
3.2.324d
Periimus:
3.2.325
Actum est.
3.2.325b
Eloquere ergo, obsecro te, quid sit.
3.2.325c
Iam—
3.2.325d
Quid iam, Geta?
3.2.326
Aeschinus—
3.2.326b
Quid is ergo?
3.2.326c
alienus est ab nostra familia.
3.2.326d
Hem,
3.2.327
Perii: quare?
3.2.327b
Amare occepit aliam.
3.2.327c
Vae miserae mihi!
3.2.328
Neque id occulte fert: ab lenone ipsus eripuit palam.
3.2.329
Satin hoc certum est?
3.2.329b
Certum: hisce oculis egomet vidi, Sostrata.
3.2.329c
Ah,
3.2.330
Me miseram! quid credas iam? aut cui credas? Nostrumne Aeschinum;
3.2.331
Nostram vitam omnium, in quo nostrae spes omnesque opes sitae
3.2.332
Erant; qui sine hac iurabat se unum nunquam victurum diem;
3.2.333
Qui se in sui gremio positurum puerum dicebat patris;
3.2.334
Ita obsecraturum ut liceret sibi hanc uxorem ducere?
3.2.335
Hera, lacrimas mitte, ac potius quod ad hanc rem opus est porro consule;
3.2.336
Patiamurne, an narremus cuipiam?
3.2.336b
Au, mi homo, sanusne es?
3.2.337
An hoc proferendum tibi videtur usquam esse?
3.2.337b
Mihi quidem non placet.
3.2.338
Iam primum illum alieno animo a nobis esse res ipsa indicat.
3.2.339
Nunc si hoc palam proferimus ille infitias ibit, sat scio.
3.2.340
Tua fama et gnatae vita in dubium veniet. Tum si maxime
3.2.341
Fateatur, quum amet aliam, non est utile hanc illi dari:
3.2.342
Quapropter quoquo pacto tacito est opus.
3.2.342b
Ah, minime gentium:
3.2.343
Non faciam.
3.2.343b
Quid ages?
3.2.343c
Proferam.
3.2.343d
Hem, mea Sostrata, vide quam rem agas.
3.2.344
Peiore res loco non potest esse quam in quo nunc sita est.
3.2.345
Primum indotata est: tum praeterea quae secunda ei dos erat
3.2.346
Periit: pro virgine dari nuptum non potest. Hoc reliquum est:
3.2.347
Si infitias ibit, testis mecum est annulus quem amiserat.
3.2.348
Postremo, quando ego conscia mihi sum a me culpam esse hanc procul,
3.2.349
Neque pretium neque rem ullam intercessisse illa aut me indignam, Geta,
3.2.350
Experiar.
3.2.350b
Quid ista? accedo, ut melius dicas.
3.2.350c
Tu, quantum potes,
3.2.351
Abi, atque Hegioni cognato huius rem omnem narrato ordine;
3.2.352
Nam is nostro Simulo fuit summus, et nos coluit maxime.
3.2.353
Nam hercle alius nemo respicit nos.
3.2.353b
Propera tu, mea Canthara,
3.2.354
Curre: obstetricem arcesse, ut cum opus sit ne in mora nobis siet.
3.3.355
Disperii! Ctesiphonem audivi filium
3.3.356
Una affuisse in raptione cum Aeschino.
3.3.357
Id misero restat mihi mali, si illum potest
3.3.358
Qui alicui rei est etiam eum ad nequitiam abducere.
3.3.359
Ubi ego illum quaeram? credo abductum in ganeum
3.3.360
Aliquo: persuasit ille impurus, sat scio.
3.3.361
Sed eccum Syrum ire video: hinc scibo iam ubi siet;
3.3.362
Atque hercle hic de grege illo est: si me senserit
3.3.363
Eum quaeritare, nunquam dicet carnifex.
3.3.364
Non ostendam me id velle.
3.3.364b
Omnem rem modo seni
3.3.365
Quo pacto se haberet enarramus ordine:
3.3.366
Nihil vidi quicquam laetius.
3.3.366b
Pro Iupiter,
3.3.367
Hominis stultitiam!
3.3.367b
Collaudavit filium:
3.3.368
Mihi qui id dedissem consilium egit gratias.
3.3.369
Disrumpor.
3.3.369b
Argentum annumeravit ilico:
3.3.370
Dedit praeterea in sumtum dimidium minae:
3.3.371
Id distributum sane est ex sententia.
3.3.371b
Hem!
3.3.372
Huic mandes, si quid recte curatum velis.
3.3.373
Hem, Demea, haud aspexeram te. Quid agitur?
3.3.374
Quid agatur? Vestram nequeo mirari satis
3.3.375
Rationem.
3.3.375b
Est hercle inepta, ne dicam dolo,
3.3.376
Atque absurda. Pisces ceteros purga, Dromo:
3.3.377
Congrum istum maximum in aqua sinito ludere
3.3.378
Paulisper: ubi ego venero, exossabitur;
3.3.379
Prius nolo.
3.3.379b
Haecine flagitia!
3.3.379c
Mihi quidem non placent;
3.3.380
Et clamo saepe. Salsamenta haec, Stephanio,
3.3.381
Fac macerentur pulchre.

Perseus Latin. CTS URN phi0134.phi006.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.