Andria

Perseus Latin · Perseus Latin · 1,454 sections

1.5.250
Aliquid monstri alunt: ea quoniam nemini obtrudi potest,
1.5.251
Itur ad me.
1.5.251b
Oratio haec me miseram exanimavit metu.
1.5.252
Nam quid ego nunc dicam de patre? ah
1.5.253
Tantam rem tam neglegenter agere! praeteriens modo
1.5.254
Mihi apud forum, Uxor tibi ducenda est, Pamphile, hodie, inquit, para:
1.5.255
Abi domum. Id mi visus est dicere, Abi cito, et suspende te.
1.5.256
Obstipui: censen’ me verbum potuisse ullum proloqui? aut
1.5.257
Ullam causam, saltem ineptam, falsam, iniquam? Obmutui.
1.5.258
Quod si ego rescissem id prius quid facerem, si quis nunc me roget?
1.5.259
Aliquid facerem ut hoc ne facerem. Sed nunc quid primum exsequar?
1.5.260
Tot me impediunt curae, quae meum animum divorsae trahunt,
1.5.261
Amor, misericordia huius, nuptiarum sollicitatio,
1.5.262
Tum patris pudor qui me tam leni passus animo est usque adhuc
1.5.263
Quae meo quomque animo libitum est facere. Eine ego ut advorser? hei mihi!
1.5.264
Incertum est quid agam.
1.5.264b
Misera timeo incertum hoc quorsum accidat.
1.5.265
Sed nunc peropus est, aut hunc cum ipsa, aut me aliquid de illa adversum hunc loqui.
1.5.266
Dum in dubio est animus, paulo momento huc vel illuc impellitur.
1.5.267
Quis hic loquitur? Mysis? salve.
1.5.267b
O salve, Pamphile.
1.5.267c
Quid agit?
1.5.267d
Rogas?
1.5.268
Laborat e dolore; atque ex hoc misera sollicita est, diem
1.5.269
Quia olim in hunc sunt constitutae nuptiae: tum autem hoc timet,
1.5.270
Ne deseras se.
1.5.270b
Hem, egone istuc conari queam?
1.5.271
Ego propter me illam decipi miseram sinam
1.5.272
Quae mihi suum animum atque omnem vitam credidit,
1.5.273
Quam ego animo egregie caram pro uxore habuerim?
1.5.274
Bene et pudice eius doctum atque eductum sinam
1.5.275
Coactum egestate ingenium immutarier?
1.5.276
Non faciam.
1.5.276b
Haud vereor si in te solo sit situm;
1.5.277
Sed ut vim queas ferre.
1.5.277b
Adeone me ignavum putas,
1.5.278
Adeone porro ingratum, aut inhumanum, aut ferum,
1.5.279
Ut neque me consuetudo neque amor neque pudor
1.5.280
Commoveat neque commoneat ut servem fidem?
1.5.281
Unum hoc scio, esse meritam ut memor esses sui.
1.5.282
Memor essem? o Mysis Mysis, etiam nunc mihi
1.5.283
Scripta illa sunt in animo dicta Chrysidis
1.5.284
De Glycerio. Iam ferme moriens me vocat:
1.5.285
Accessi: vos semotae: nos soli: incipit:
1.5.286
Mi Pamphile, huius formam atque aetatem vides:
1.5.287
Nec clam te est quam illi utraeque res nunc utiles
1.5.288
Et ad pudicitiam et ad rem tutandam sient.
1.5.289
Quod ego te per hanc dextram oro et ingenium tuum,
1.5.290
Per tuam fidem, perque huius solitudinem,
1.5.291
Te obtestor, ne abs te hanc segreges neu deseras,
1.5.292
Si te in germani fratris dilexi loco,
1.5.293
Sive haec te solum semper fecit maximi,
1.5.294
Seu tibi morigera fuit in rebus omnibus.
1.5.295
Te isti virum do amicum tutorem patrem.
1.5.296
Bona nostra haec tibi permitto et tuae mando fidei.
1.5.297
Hanc mihi in manum dat: mors continuo ipsam occupat.
1.5.298
Accepi: acceptam servabo.
1.5.298b
Ita spero quidem.
1.5.299
Sed cur tu abis ab illa?
1.5.299b
Obstetricem arcesso.
1.5.299c
Propera, atque audin’?
1.5.300
Verbum unum cave de nuptiis, ne ad morbum hoc etiam.
1.5.300b
Teneo.
2.1.301
Quid ais Byrrhia? daturne illa Pamphilo hodie nuptum?
2.1.301b
Sic est.
2.1.302
Qui scis?
2.1.302b
Apud forum modo e Davo audivi.
2.1.302c
Vae misero mihi.
2.1.303
Ut animus in spe atque in timore usque antehac attentus fuit,
2.1.304
Ita postquam adempta spes est lassus cura confectus stupet.
2.1.305
Quaeso edepol, Charine, quoniam non potest id fieri quod vis,
2.1.306
Id velis quod possit.
2.1.306b
Nil volo aliud nisi Philumenam.
2.1.306c
Ah,
2.1.307
Quanto satius est te id dare operam qui istum amorem ex animo amoveas,
2.1.308
Quam id loqui quo magis libido frustra incendatur tua.
2.1.309
Facile omnes cum valemus recta consilia aegrotis damus.
2.1.310
Tu si hic sis aliter sentias.
2.1.310b
Age age, ut libet.
2.1.310c
Sed Pamphilum
2.1.311
Video: omnia experiri certum est prius quam pereo.
2.1.311b
Quid hic agit?
2.1.312
Ipsum hunc orabo: huic supplicabo: amorem huic narrabo meum:
2.1.313
Credo impetrabo ut aliquot saltem nuptiis prodat dies:
2.1.314
Interea fiet aliquid, spero.
2.1.314b
Id aliquid nihil est.
2.1.314c
Byrrhia,
2.1.315
Quid tibi videtur? adeon’ ad eum?
2.1.315b
Quidni? Si nihil impetres,
2.1.316
Ut te arbitretur sibi paratum moechum si illam duxerit?
2.1.317
Abin’ hinc in malam rem cum suspicione istac, scelus?
2.1.318
Charinum video: salve.
2.1.318b
O salve Pamphile.
2.1.319
Ad te advenio spem, salutem, auxilium, consilium expetens.
2.1.320
Neque pol consili locum habeo, neque auxili copiam.
2.1.321
Sed istuc quidnam est?
2.1.321b
Hodie uxorem ducis?
2.1.321c
Aiunt.
2.1.321d
Pamphile,
2.1.322
Si id facis hodie postremum me vides.

Perseus Latin. CTS URN phi0134.phi001.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.