Curculio

Perseus Latin · Perseus Latin · 995 sections

4.2.530
periisse credo. quíd id mea refert? ego argentum habeo.
4.2.531
quoi hómini di sunt propitii, lucrum ei profecto obiciunt.
4.2.532
nunc rei divinae operam dabo. certumst bene me curare.—
4.3.533
Nón ego nunc medíocri incedo irátus iracúndia,
4.3.534
sed eapse illa qua excidionem facere condidici oppidis.
4.3.535
nunc nisi tu mihi propere properas dare iam triginta minas,
4.3.536
quas ego apud te deposivi, vitam propera ponere.
4.3.537
Non edepol nunc ego te mediocri macto infortunio,
4.3.538
sed eopse illo quo mactare soleo quoi nil debeo.
4.3.539
Ne te mi facias ferocem aut supplicare censeas.
4.3.540
Nec tu me quidem umquam subiges, redditum ut reddam tibi,
4.3.541
nec daturus súm.
4.3.541b
Idem ego istuc quom credebam credidi,
4.3.542
te nihil esse redditurum.
4.3.542b
Quor nunc a me igitur petis?
4.3.543
Scire volo quoi reddidisti.
4.3.543b
Lusco liberto tuo,
4.3.544
is Summanum se vocari dixit, éi reddidi.
4.3.545
qui has tabellas obsignatas attulit.
4.3.545b
Quas tu mihi tabellas?
4.3.546
quos tu mihi luscos libertos, quos Summanos somnias?
4.3.547
nec mihi quidém libertus ullust.
4.3.547b
Fácis sapientius
4.3.548
quam pars † lenonum, libertos quí habent et eos deserunt.
4.3.549
Quid feci †
4.3.549b
Quod mandasti feci, túi honoris gratia,
4.3.550
tuom qui signum ad me attulisset, nuntium ne spernerem.
4.3.551
Stultior stulto fuisti, qui tabellis crederes.
4.3.552
Quis res publica et privata geritur, nonne eis crederem?
4.3.553
ego abeo, tibi res solutast recte. bellator, vale.
4.3.554
Quid valeam?
4.3.554b
Aut tu aegrota aetatem, si lubet, per me quidem.—
4.3.555
Quid ego nunc faciam? quid refert me fecisse regibus
4.3.556
ut mi oboedirent, si hic me hodie umbraticus deriserit?
4.4.557
Quoi homini di sunt propitii, ei non esse iratos puto.
4.4.558
postquam rem divinam feci, venit in mentem mihi,
4.4.559
ne trapezita exulatum abierit, argentum ut petam,
4.4.560
ut ego potius comedim quam ille.
4.4.560b
Iusseram salvere te.
4.4.561
Therapontigone Platagidore, salve; salvos quom advenis
4.4.562
in Epidaurum, hic hodie apud me—numquam delinges salem.
4.4.563
Bene vocas, verum locata res est—ut male sit tibi.
4.4.564
sed quid agit meum mercimonium ápud te?
4.4.564b
Nil apud mé quidem,
4.4.565
ne facias testis, neque equidem debeo quicquam.
4.4.565b
Quid est?
4.4.566
Quod fui iuratus feci.
4.4.566b
Reddin an non virginem,
4.4.567
prius quam te huic meae machaerae óbicio, mastigia?
4.4.568
Vapulare ego te vehementer iubeo: ne me territes.
4.4.569
illa abductast, tu auferere hinc a me, si perges mihi
4.4.570
male loqui, profecto, cuí ego nisi malum nil debeo.
4.4.571
Mihin malum minitare?
4.4.571b
Atque edepol non minitabor, sed dabo,
4.4.572
mihi si perges mólestus esse.
4.4.572b
Leno minitatur mihi,
4.4.573
meaeque pugnae proeliares plurimae optritae iacent?
4.4.574
at ita me machaera et clupeus
4.4.575
bene iuvent pugnantem in acie: nisi mi virgo redditur,
4.4.576
iam ego te faciam ut hic formicae frustillatim differant.
4.4.577
At ita me volsellae, pecten, speculum, calamistrum meum
4.4.578
bene me amassint meaque axitia linteumque extersui,
4.4.579
ut ego tua magnifica verba néque istas tuas magnas minas
4.4.580
non pluris facio quam ancillam meam quae latrinam lavat.
4.4.581
ego illam reddidi qui argentum a te attulit.
4.4.581b
Quis is est homo?
4.4.582
Tuom libertum ésse aiebat sese Summanum.
4.4.582b
Meum?
4.4.583
attat, Curculio hercle verba mihi dedit, cum cogito.
4.4.584
is mihi anulum subripuit.
4.4.584b
Perdidistin tu anulum?
4.4.585
miles pulchre centuriatus est expuncto in manipulo.
4.4.586
Vbi nunc Curculionem inveniam?
4.4.586b
In tritico facillume,
4.4.587
vel quingentos curculiones pro uno faxo reperias.
4.4.588
ego abeo, vale atque salve.—
4.4.588b
Male vale, male sit tibi.
4.4.589
quid ego faciam? maneam an abeam? sicin mi esse os oblitum?
4.4.590
cupio dare mercedem qui illunc ubi sit commonstret mihi.
5.1.591
Antiquom poëtam audivi scripsisse in tragoedia,
5.1.592
mulieres duas peiores esse quam unam. res itast.
5.1.593
verum mulierem peiorem quam haec amica est Phaedromi
5.1.594
non vidi aut audivi, neque pol dici nec fingi potest
5.1.595
peior quam haec est: quae ubi me habere hunc conspicatast anulum,
5.1.596
rogat unde habeam. quid id tu quaeris? quia mi quaesitost opus.
5.1.597
nego me dicere. ut eum eriperet, manum arripuit mordicus.
5.1.598
vix foras me abripui atque effugi. apage istanc canículam.
5.2.599
Phaedrome, propera.
5.2.599b
Quid properem?
5.2.599c
Parasitum ne amiseris.
5.2.600
magna res est.
5.2.600b
Nulla est mihi, nam quam habui absumpsi celeriter.
5.2.601
Teneo.
5.2.601b
Quid negotist?
5.2.601c
Rogita unde istunc habeat anulum.
5.2.602
pater istum meus gestitavit
5.2.602b
At mea matertera.
5.2.603
Mater ei utendum dederat.
5.2.603b
Pater † uois rusum tibi.
5.2.604
Nugas garris.

Perseus Latin. CTS URN phi0119.phi008.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.