Curculio

Perseus Latin · Perseus Latin · 995 sections

3.1.451
ita non potuere uno anno circumirier.
3.1.452
credo hercle te esse ab illo, ita nugas blatis.
3.1.453
Immo etiam porro, si vis, dicam.
3.1.453b
Nil moror.
3.1.454
sequere hac, te absolvam qua advenisti gratia.
3.1.455
atque eccum video. leno, salve.
3.1.455b
Di te ament.
3.1.456
Quid hoc quod ad te venio?
3.1.456b
Dicas quid velis.
3.1.457
Argentum accipias, cum illo mittas virginem.
3.1.458
Quid quod iuratus sum?
3.1.458b
Quid id refert tua,
3.1.459_460
dum argentum accipias?
3.1.459_460a
Qui monet quasi adiuvat.
3.1.461
sequimini.
3.1.461b
Leno, cave in té sit mora mihi.—
4.1.462
Edepol nugatorem lepidum lepide hunc nactust Phaedromus.
4.1.463
halapantam an sycophantam mágis esse dicam nescio.
4.1.464
ornamenta quae locavi metuo ut possim recipere;
4.1.465
quamquam cum istoc mihi negoti nihil est: ipsi Phaedromo
4.1.466
credidi; tamen asservabo. sed dum hic egreditur foras,
4.1.467
commonstrabo, quo in quemque hominem facile inveniatis loco,
4.1.468
ne nimio opere sumat operam si quem conventum velit,
4.1.469
vel vitiosum vel sine vitio, vel probum vel improbum.
4.1.470
qui periurum convenire volt hominem ito in comitium;
4.1.471
qui mendacem et gloriosum, ápud Cloacinae sacrum,
4.1.472
ditis damnosos maritos sub basilica quaerito.
4.1.473
ibidem erunt scorta exoleta quique stipulari solent,
4.1.474
symbolarum collatores apud forum piscarium.
4.1.475
in foro infimo boni homines atque dites ambulant,
4.1.476
in medio propter canalem, ibi ostentatores meri;
4.1.477
confidentes garrulique et malevoli supera lacum,
4.1.478
qui alteri de nihilo audacter dicunt contumeliam
4.1.479
et qui ipsi sat habent quod in se possit vere dicier.
4.1.480
sub veteribus, ibi sunt qui dant quique accipiunt faenore.
4.1.481
pone aedem Castoris, ibi sunt subito quibus credas male.
4.1.482
in Tusco vico, ibi sunt homines qui ipsi sese venditant,
4.1.483
in Velabro vel pistorem vel lanium vel haruspicem
4.1.484
vel qui ipsi vorsant vel qui aliis ubi vorsentur praebeant.
4.1.485
ditis damnosos maritos apud Leucadiam Oppiam.
4.1.486
sed interim fores crepuere: linguae moderandum est mihi.—
4.2.487
I tú prae, virgo: nón queo quod póne me est serváre.
4.2.488
et aurum et vestem omnem suam esse aiebat quam haec haberet.
4.2.489
Nemo it infitias.
4.2.489b
At tamen meliusculum est monere.
4.2.490
Memento promisisse te, si quisquam hanc liberali
4.2.491
causa manu assereret, mihi omne argentum redditum iri,
4.2.492
minas triginta.
4.2.492b
Meminero, de istoc quietus esto.
4.2.493
et nunc idem dico.
4.2.493b
Et quidem meminisse ego haec volam te.
4.2.494
Memini, et mancupio tibi dabo.
4.2.494b
Egon ab lenone quicquam
4.2.495
mancupio accipiam, quibus sui nihil est nisi una lingua,
4.2.496
qui abiurant si quid creditum est? alienos mancupatis,
4.2.497
alienos manu emittitis alienisque imperatis,
4.2.498
nec vobis auctor ullus est nec vosmet estis ulli.
4.2.499
item genus est lenonium inter homines meo quidem animo
4.2.500
ut muscae, culices, cimices pedesque pulicesque:
4.2.501
odio et malo et molestiae, bono usui estis nulli,
4.2.502
nec vobiscum quisquam in foro frugi consistere audet;
4.2.503
qui constitit, culpant eum, conspicitur vituperatur,
4.2.504
eum rem fidemque perdere, tam etsi nil fecit, aiunt.
4.2.505
Edepol lenones meo animo novisti, lusce, lepide.
4.2.506
Eodem hércle vos pono et paro: parissimi estis hibus:
4.2.507
hi saltem in occultis locis prostant, vos in foro ipso;
4.2.508
vos faenore homines, hi male suadendo et lustris lacerant.
4.2.509
rogitationis plurimas propter vos populus scivit,
4.2.510
quas vos rogatas rumpitis: aliquam reperitis rimam;
4.2.511
quasi aquam ferventem frigidam esse, ita vos putatis leges.
4.2.512
Tacuisse mavellem.
4.2.512b
Hau male meditate maledicax es.
4.2.513
Indignis si male dicitur, male dictum id esse dico,
4.2.514
verum si dignis dicitur, bene dictumst meo quidem animo.
4.2.515
ego mancupem te nil moror nec lenonem alium quemquam.
4.2.516
Lyco, numquid vis?
4.2.516b
Bene vale.
4.2.516c
Vale.
4.2.516d
Heus tu, tibi ego dico.
4.2.517
Eloquere, quid vis?
4.2.517b
Quaeso, ut hanc cures, ut bene sit isti.
4.2.518
bene ego istam eduxi meae domi et pudice.
4.2.518b
Si huius miseret,
4.2.519
ecquid das qui bene sit?
4.2.519b
Malúm.
4.2.519c
Opust hóc qui te procures.
4.2.520
Quid stulta ploras? ne time, bene hercle vendidi égo te;
4.2.521
fac sis bonae frugi sies, sequere istum bella belle.
4.2.522
Summane, numquid nunciam me vis?
4.2.522b
Vale atque salve,
4.2.523
nam et operam et pecuniam benigne praebuisti.
4.2.524
Salutem multam dicito patrono.
4.2.524b
Nuntiabo.—
4.2.525
Numquid vis, leno?
4.2.525b
Istas minas decem, qui me procurem,
4.2.526
dum melius sit mihi, des.
4.2.526b
Dabuntur, cras peti iubeto.—
4.2.527
Quando bene gessi rem, volo hic in fano supplicare.
4.2.528
nam illam minis olim decem puellam parvolam emi,
4.2.529
sed eum qui mi illam vendidit numquam postilla vidi;

Perseus Latin. CTS URN phi0119.phi008.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.