Captivi

Perseus Latin · Perseus Latin · 1,247 sections

3.5.687
meumque potius me caput periculo
3.5.688
praeoptavisse, quam is periret, ponere.
3.5.689
Facito ergo ut Acherunti clueas gloria.
3.5.690
Qui per virtutem, periit, at non interit.
3.5.691
Quando ego te exemplis pessumis cruciavero
3.5.692
atque ob sutelas tuas te morti misero,
3.5.693
vel te interiisse vel periisse praedicent;
3.5.694
dum pereas, nihil intererit: dicant vivere.
3.5.695
Pol si istuc faxis, haud sine poena feceris,
3.5.696
si ille huc rebitet, sicut confido affore.
3.5.697
Pro di immortales, nunc ego teneo, nunc scio
3.5.698
quid hoc sít negoti. meus sodalis Philocrates
3.5.699
in libertate est ad patrem in patria. bene est,
3.5.700
nec quisquam est mihi, aeque melius cui velim.
3.5.701
sed hoc mihi aegre est, me huic dedisse operam malam,
3.5.702
qui nunc propter me meaque verba vinctus est.
3.5.703
Votuin te quicquam mi hodie falsum proloqui?
3.5.704
Votuisti.
3.5.704b
Cur es ausus mentiri mihi?
3.5.705
Quia vera obessent illi quoi operam dabam:
3.5.706
nunc falsa prosunt.
3.5.706b
At tibi oberunt.
3.5.706c
Optumest.
3.5.707
at erum servavi, quem servatum gaudeo,
3.5.708
cui me custodem addiderat erus maior meus.
3.5.709
sed malene id factum árbitrare?
3.5.709b
Pessume.
3.5.710
At ego aio recte, qui abs te sorsum sentio.
3.5.711
nam cogitato, si quis hoc gnato tuo
3.5.712
tuos servos faxit, qualem haberes gratiam?
3.5.713
emitteresne necne eum servom manu?
3.5.714
essetne apud te is servos acceptissimus?
3.5.715
responde.
3.5.715b
Opinor.
3.5.715c
Cur ergo iratus mihi es?
3.5.716
Quia illi fuisti quam mihi fidelior.
3.5.717
Quid? tu una nocte postulavisti et die
3.5.718
recens captum hominem, nuperum novicium,
3.5.719
te perdocere ut melius consulerem tibi,
3.5.720
quam illi, quicum una a puero aetatem exegeram?
3.5.721
Ergo ab eo petito gratiam istam. ducite,
3.5.722
ubi ponderosas crassas capiat compedes.
3.5.723
inde ibis porro in latomias lapidarias.
3.5.724
ibi quom alii octonos lapides effodiunt, nisi
3.5.725
cotidiano sesquiopus confeceris,
3.5.726
Sescentoplago nomen indetur tibi.
3.5.727
Per deos atque homines ego te obtestor, Hegio,
3.5.728
ne tu istunc hominem perduis.
3.5.728b
Curabitur;
3.5.729
nam noctu nervo vinctus custodibitur,
3.5.730
interdius sub terra lapides eximet:
3.5.731
diu ego húnc cruciabo, non uno absolvam die.
3.5.732
Certumne est tíbi istuc?
3.5.732b
Non moriri certius.
3.5.733
abducite istum actutum ad Hippolytum fabrum,
3.5.734
iubete huic crassas compedes impingier;
3.5.735
inde extra portam ad meum libertum Cordalum
3.5.736
in lapicidinas facite deductus siet:
3.5.737
atque hunc me velle dicite ita curarier,
3.5.738
ne qui deterius huic sit quam cui pessume est.
3.5.739
Cur ego te invito me esse salvom postulem?
3.5.740
periclum vitae meae tuo stat periculo.
3.5.741
post mortem in morte nihil est quod metuam mali.
3.5.742
etsi pervivo usque ad summam aetatem, tamen
3.5.743
breve spatium est perferundi quae minitas mihi.
3.5.744
vale atque salve, etsi aliter ut dicam meres.
3.5.745
tu, Aristophontes, de me ut meruisti, ita vale;
3.5.746
nam mihi propter te hoc optigit.
3.5.746b
Abducite.
3.5.747
At unum hoc quaeso, si huc rebitet Philocrates,
3.5.748
ut mi eius facias conveniundi copiam.
3.5.749
Periistis, nisi hunc iam e conspectu abducitis.
3.5.750
Vis haec quidem hercle est, et trahi et trudi simul.—
3.5.751
Illic ést abductus recta in phylacam, ut dignus est.
3.5.752
ego illís captivis aliis documentum dabo,
3.5.753
ne tale quisquam facinus incipere audeat.
3.5.754
quod absque hoc esset, qui mihi hoc fecit palam,
3.5.755
usque offrenatum suis me ductarent dolis.
3.5.756
nunc certum est nulli posthac quicquam credere.
3.5.757
satis súm semel deceptus. speravi miser
3.5.758
ex servitute me exemisse filium:
3.5.759
ea spes elapsa est. perdidi unum filium,
3.5.760
puerum quadrimum quem mihi servos surpuit,
3.5.761
neque eum servom umquam repperi neque filium;
3.5.762
maior potitus hostium est. quod hoc ést scelus?
3.5.763
quasi in orbitatem liberos produxerim.
3.5.764
sequere hac. reducam te ubi fuisti. neminis
3.5.765
miserere certum est, quia mei miseret neminem.—
3.5.766
Exauspicavi ex vinclis. nunc intellego
3.5.767
redauspicandum esse in catenas denuo.—
4.1.768
Iúppiter supreme, servas me measque auges opes,
4.1.769
máximas opimitates opiparasque offers mihi,
4.1.770
laudém lucrum, ludum iocum, festivitatem ferias,
4.1.771
pompám penum, potationis saturitatem, gaudium,
4.1.772
néc cuiquam homini supplicare nunc certum est mihi;
4.1.773
nam vél prodesse amico possum vel inimicum perdere,
4.1.774
ita híc me amoenitate amoena amoenus oneravit dies.
4.1.775
síne sacris hereditatem sum aptus effertissimam.
4.1.776
nunc ád senem cursum capessam hunc Hegionem, cui boni
4.1.777
tantum affero quantum ipsus a dis optat, atque etiam amplius.

Perseus Latin. CTS URN phi0119.phi005.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.