Aulularia

Perseus Latin · Perseus Latin · 1,014 sections

1.2.99
volo intro mitti. atque etiam hoc praedico tibi,
1.2.100
si Bona Fortuna veniat, ne intro miseris.
1.2.101
Pol ea ipsa credo ne intro mittatur cavet,
1.2.102
nam ad aedis nostras numquam adit, quamquam prope est.
1.2.103
Tace atque abi intro.
1.2.103b
Taceo atque abeo.—
1.2.103c
Occlude sis
1.2.104
fores ambobus pessulis. iam ego hic ero.
1.2.105
discrucior animi, quía ab domo abeundum est mihi.
1.2.106
nimis hercle invitus abeo. sed quid agam scio.
1.2.107
nam noster nostrae qui est magister curiae
1.2.108
dividere argenti dixit nummos in viros;
1.2.109
id si relinquo ac non peto, omnes ilico
1.2.110
me suspicentur, credo, habere aurum domi.
1.2.111
nam non est veri simile, hominem pauperem
1.2.112
pauxillum parvi facere quin nummum petat.
1.2.113
nam nunc cum celo sedulo omnis, ne sciant,
1.2.114
omnes videntur scire et me benignius
1.2.115
omnes salutant quam salutabant prius;
1.2.116
adeunt, consistunt, copulantur dexteras,
1.2.117
rogitant me ut valeam, quid agam, quid rerum geram.
1.2.118
nunc quo profectus sum ibo; postidea domum
1.2.119
me rursum quantum potero tantum recipiam.
2.1.120
Velím te arbitrári med haéc verba, fráter,
2.1.121
meai fidei tuaique rei
2.1.122
causa facere, ut aequom est germanam sororem.
2.1.123
quamquam haud falsa sum nos odiosas haberi;
2.1.124
nam multum loquaces merito omnes habemur,
2.1.125
nec mutam profecto repertam ullam esse
2.1.126
aut hodie dicunt mulierem aut ullo in saeclo.
2.1.127
verum hoc, frater, unum tamen cogitato,
2.1.128
tibi proximam me mihique esse item te;
2.1.129
ita aequom est quod in rem esse utrique arbitremur
2.1.130
et mihi te et tibi me consulere et monere;
2.1.131
neque óccultum id habéri neque pér metúm mussári,
2.1.132
quin participem pariter ego te et tu me ut facias.
2.1.133
eo núnc ego secreto ted huc foras seduxi,
2.1.134
ut tuam rém ego tecum hic loquerer familiarem.
2.1.135
Da mi, optuma femina, manum.
2.1.136
Vbi ea est? quis ea est nam optuma?
2.1.137
Tu.
2.1.137b
Túne ais?
2.1.137c
Si négas, nego.
2.1.138
Decet te équidem vera próloqui;
2.1.139
nam optúma nullá potest eligi:
2.1.140
alia ália peior, fráter, est.
2.1.140b
Idem ego árbitror,
2.1.141
néc tibi advorsari certum est de istac ré umquam, soror.
2.1.142
Dá mihí óperam amabó.
2.1.142b
Tuast, útere atque
2.1.143
ímpera, si quíd vis.
2.1.144
Íd quod in rém tuam óptumum esse árbitror,
2.1.145
téd id monitum advénto.
2.1.146
Soror, móre tuo facis.
2.1.146b
Fáctum volo.
2.1.147
Quid ést id, sorór?
2.1.147b
Quod tibí sempitérnum
2.1.148
salútare sit: liberís procreándis
2.1.149
(ita dí faxint) volo te úxorem
2.1.150
domum dúcere.
2.1.150b
Ei occidí.
2.1.150c
Quid ita?
2.1.151
Quia míhi misero cerebrum éxcutiunt
2.1.152
tua dícta, soror: lapidés loqueris.
2.1.153
Heia, hoc face quod te iubet soror.
2.1.153b
Si lubeat, faciam.
2.1.154
In rem hoc tuam est.
2.1.154b
Vt quidem emoriar prius quam ducam.
2.1.155
sed hís legibús si quam dáre vis dúcam:
2.1.156
quae crás veniat, peréndie forás feratur;
2.1.157
his legibús dare vís? cedo: nuptiás adorna.
2.1.158
Cum máxima possúm tibi, fratér, dare dote;
2.1.159
sed ést grandiór natu: média est múlieris aetas.
2.1.160
eam sí iubes, fratér, tibi me póscere, poscam.
2.1.161
Núm non vis me intérrogare te?
2.1.161b
Ímmo, si quid vís, roga.
2.1.162
Post mediam aetatem qui media ducit uxorem domum,
2.1.163
si eam senex anum praegnatem fortuito fecerit,
2.1.164
quid dubitas, quin sit paratum nomen puero Postumus?
2.1.165
nunc ego istúm, soror, laborem demam et deminuam tibi.
2.1.166
ego virtute deum et maiorum nostrum dives sum satis.
2.1.167
istas magnas factiones, animos, dotes dapsiles,
2.1.168
clámores, impéria, eburata véhicla, pallas, púrpuram,
2.1.169
nil moror quae in servitutem sumptibus redigunt viros.
2.1.170
Dic mihi, quaeso, quis ea est, quam vis ducere uxorem?
2.1.170b
Eloquar.
2.1.171
nostin hunc senem Euclionem ex proximo pauperculum?
2.1.172
Novi, hominem haud malum mecastor.
2.1.172b
Eius cupio filiam
2.1.173
virginem mihi desponderi. verba ne facias, soror.
2.1.174
scio quid dictura es: hanc esse pauperem. haec pauper placet.
2.1.175
Di bene vortant.
2.1.175b
Idem ego spero.
2.1.175c
Quid me? num quid vis?
2.1.175d
Vale.
2.1.176
Et tu, frater.—
2.1.176b
Ego conveniam Eúclionem, si domi est.
2.1.177
sed eccum video. nescio unde sese homo recipit domum.
2.2.178
Praesagibat mi animus frustra me ire, quom exibam domo;
2.2.179
itaque abibam invitus; nam neque quisquam curialium

Perseus Latin. CTS URN phi0119.phi003.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.