Asinaria

Perseus Latin · Perseus Latin · 1,185 sections

3.3.657
hic pone, hic istam colloca cruminam in collo plane.
3.3.658
Nolo ego te, quí erus sis, mihi onus istuc sustinere.
3.3.659
Quin tu labore liberas te atque istam imponis in me?
3.3.660
Ego baiulabo, tu, ut decet dominum, ante me ito inanis.
3.3.661
Quid nunc?
3.3.661b
Quid est?
3.3.661c
Quin tradis huc cruminam pressatum umerum?
3.3.662
Hanc, cui daturu's hancdaturus es, iube petere atque orare mecum.
3.3.663
nam istuc proclive est, quo iubes me plane collocare.
3.3.664
Da, meus ocellus, mea rosa, mi ánime, mea voluptas,
3.3.665
Leonida, argentum mihi, ne nos diiunge amantis.
3.3.666
Dic me igitur tuom passerculum, gallinam, coturnicem,
3.3.667
agnellum, haedillum me tuom dic esse vel vitellum,
3.3.668
prehende auriculis, compara labella cum labellis.
3.3.669
Ten osculetur, verbero?
3.3.669b
Quam vero indignum visum est?
3.3.670
at qui pol hodie non feres, ni genua confricantur.
3.3.671
Quidvis egestas imperat: fricentur. dan quod oro?
3.3.672
Age, mi Leonida, obsecro, fer amanti ero salutem,
3.3.673
redime istoc benefició te ab hoc, et tibi eme hunc isto argento.
3.3.674
Nimis bélla es atque amabilis, et si hoc meum esset, hodie
3.3.675
numquam me orares quin darem: illum te orare meliust,
3.3.676
illic hánc mihi servandam dedit. ei sane bella belle.
3.3.677
cape hoc sis, Libane.
3.3.677b
Furcifer, etiam me delusisti?
3.3.678
Numquam hercle facerem, genua ni tam nequiter fricares.
3.3.679
age sis tu in partem nunciam hunc delude atque amplexare hanc.
3.3.680
Taceas, me spectes.
3.3.680b
Quin ad hunc, Philaenium, adgredimur,
3.3.681
virum quidem pol optimum et non similem furis huius?
3.3.682
Inambulandum est: nunc mihi vicissim supplicabunt.
3.3.683
Quaeso hercle, Libane, sis erum tuis factis sospitari,
3.3.684
da mi istas viginti minas. vides me amantem egere.
3.3.685
Videbitur. factum volo. redito huc conticinno.
3.3.686
nunc istanc tantisper iube petere atque orare mecum.
3.3.687
Amandone exorarier vis ted an osculando?
3.3.688
Enim véro utrumque.
3.3.688b
Ergo, obsecro, ét tu utrumque nostrum serva.
3.3.689
O Libane, mi patrone, mi trade istuc. magis decorumst
3.3.690
libertum potius quam patronum onus in via portare.
3.3.691
Mi Libane, ocellus aureus, donum decusque amoris,
3.3.692
amabo, faciam quod voles, da istuc argentum nobis.
3.3.693
Dic igitur med aniticulam, columbam vel catellum,
3.3.694
hirundinem, monerulam, passerculum putillum,
3.3.695
fac proserpentem bestiam me, duplicem ut habeam linguam,
3.3.696
circumda torquem brachiis, meum collum circumplecte.
3.3.697
Ten complectatur, carnufex?
3.3.697b
Quam vero indignus videor?
3.3.698
ne istuc nequiquam dixeris tam indignum dictum in me,
3.3.699
vehes pól hodie me, si quidem hoc argentum ferre speres.
3.3.700
Ten ego veham?
3.3.700b
Tun hoc feras argentum áliter a me?
3.3.701
Perii hercle. si verum quidem et decorum erum vehere servom,
3.3.702
inscende.
3.3.702b
Sic isti solent superbi subdomari.
3.3.703
asta igitur, ut consuetus es puer olim. scin ut dicam?
3.3.704
em sic. abi, laúdo, nec te equo magis est equos ullus sapiens.
3.3.705
Inscende actutum.
3.3.705b
Ego fecero. hem quid istúc est? ut tu incedis?
3.3.706
demam hercle iam de hórdeo, tolutim ni badizas.
3.3.707
Amabo, Libane, iam sat est.
3.3.707b
Numquam hercle hodie exorabis.
3.3.708
nam iam calcari quadrupedo agitabo advorsum clivom,
3.3.709
postidea ad pistores dabo, ut ibí cruciere currens.
3.3.710
asta ut descendam nunciam in proclivi, quamquam nequam es.
3.3.711
Quid nunc, amabo? quoniam, ut est libitum, nos delusistis,
3.3.712
datisne argentum?
3.3.712b
Si quidem mihi statuam et aram statuis
3.3.713
atque ut deo mi hic immolas bovem: nam ego tibi Salus sum.
3.3.714
Etiam tu, ere, istunc amoves abs te atque † ipse me adgredere
3.3.715
atque illa, sibi quae hic iusserat, mihi statuis supplicasque?
3.3.716
Quem te autem divom nominem?
3.3.716b
Fortunam, atque Obsequentem.
3.3.717
Iam istoc es melior.
3.3.717b
An quid est homini Salute melius?
3.3.718
Licet laúdem Fortunam, tamen ut ne Salutem culpem.
3.3.719
Ecastor ambae sunt bonae.
3.3.719b
Sciam ubi boni quid dederint.
3.3.720
Opta id quod ut cóntingat tibi vis.
3.3.720b
Quid si optaro?
3.3.720c
Eveniet.
3.3.721
Opto annum hunc perpetuom mihi huius operas.
3.3.721b
Impetrasti.
3.3.722
Ain vero?
3.3.722b
Certe inquam.
3.3.722c
Ad me adi vicissim atque experire.
3.3.723
exopta id quod vis maxime tibi evenire: fiet.
3.3.724
Quid ego aliud exoptem amplius nisi illud cuius inópiast,
3.3.725
viginti argenti commodas minas, huius quas dem matri.
3.3.726
Dabuntur, animo sis bono face, exoptata optingent.
3.3.727
Vt consuevere, homines Salus frustratur et Fortuna.
3.3.728
Ego caput huic argento fui hodie reperiundo.
3.3.729
Ego pes fui.
3.3.729b
Quin nec caput nec pes sermoni apparet.
3.3.730
nec quid dicatis scire nec me cur ludatis possum.
3.3.731
Satis iám delusum censeo. nunc rém ut est eloquamur.
3.3.732
animum, Argyrippe, advorte sis. pater nos ferre hoc iussit
3.3.733
argentum ad ted.
3.3.733b
Vt temperi opportuneque attulistis.
3.3.734
Hic inerunt viginti minae bonae, mala opera partae;

Perseus Latin. CTS URN phi0119.phi002.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.