Asinaria

Perseus Latin · Perseus Latin · 1,185 sections

3.2.589
nimis véllem habere perticam.
3.2.589b
Quoi rei?
3.2.589c
Qui verberarem
3.2.590
asinos, si forte occeperint clamare hinc ex crumina.
3.3.591
Cur me retentas?
3.3.591b
Quia tui amans abeuntis egeo.
3.3.592
Vale.
3.3.592b
Aliquanto ámplius valerem, si hic maneres.
3.3.593
Salve.
3.3.593b
Salvere me iubes, quoi tu abiens offers morbum.
3.3.594
Mater supremam mihi tua dixit, domum ire iussit.
3.3.595
Acerbum funus filiae faciet, si te carendum est.
3.3.596
Homo hercle hinc exclusust foras.
3.3.596b
Ita res est.
3.3.596c
Mitte quaeso.
3.3.597
Quo nunc abis? quin tu hic manes?
3.3.597b
Nox, si voles, manebo.
3.3.598
Audin hunc opera ut largus est nocturna? nunc enim esse
3.3.599
negotiosum interdius videlicet Solonem,
3.3.600
leges ut conscribat, quibus se populus teneat. gerrae!
3.3.601
qui sese parere apparent huius légibus, profecto
3.3.602
numquam bonae frugi sient, dies noctesque potent.
3.3.603
Ne iste hercle ab ista non pedem discedat, si licessit,
3.3.604
qui nunc festinat atque ab hac minatur sese abire.
3.3.605
Sermoni iam finem face tuo, huius sermonem accipiam.
3.3.606
Vale.
3.3.606b
Quo properas?
3.3.606c
Bene vale, apud Orcum te videbo.
3.3.607
nam equidem me iam quantum potest a vita abiudicabo.
3.3.608
Cur tu, obsecro, immerito meo me morti dedere optas?
3.3.609
Ego te? quam si intellegam deficere vita, iam ipse
3.3.610
vitam meam tibi largiar et de mea ad tuam addam.
3.3.611
Cur ergo minitaris mihi, te vitam esse amissurum?
3.3.612
nam quid me facturam putas, si istuc quod dicis faxis?
3.3.613
mihi certum est facere in me omnia eadem quae tu in te faxis.
3.3.614
Oh melle dulci dulcior tu es.
3.3.614b
Certe enim tú vita es mi.
3.3.615
complectere.
3.3.615b
Facio lubens.
3.3.615c
Vtinam sic efferamur.
3.3.616
O Libane, uti miser est homo qui amat.
3.3.616b
Immo hercle vero,
3.3.617
qui pendet multo est miserior.
3.3.617b
Scio qui periclum feci.
3.3.618
circum sistamus, alter hinc, hinc alter appellemus.
3.3.619
ere, salve. sed num fumus est haec mulier quam amplexare?
3.3.620
Quidum?
3.3.620b
Quia oculi sunt tibi lacrumantes, eo rogavi.
3.3.621
Patronus qui vobis fuit futurus, perdidistis.
3.3.622
Equidem hercle nullum perdidi, ideo quia numquam ullum habui.
3.3.623
Philaenium, salve.
3.3.623b
Dabunt di quae velitis vobis.
3.3.624
Noctem tuam et vini cadum velim, si optata fiant.
3.3.625
Verbum cave fáxis, verbero.
3.3.625b
Tibi equidem, non mihi opto.
3.3.626
Tum tu igitur loquere quod lubet.
3.3.626b
Hunc hercle verberare.
3.3.627
Quisnam istuc adcredat tibi, cinaede calamistrate?
3.3.628
tun verberes, qui pro cibo habeas te verberari?
3.3.629
Vt vostrae fortunae meis praecedunt, Libane, longe,
3.3.630
qui hódie numquam ad vesperum vivam.
3.3.630b
Quapropter, quaeso?
3.3.631
Quia ego hanc amó et haec me amat, huic quod dem nusquam quicquam est,
3.3.632
hinc med amantem ex aedibus eiecit huius mater.
3.3.633
argenti viginti minae me ad mórtem appulerunt,
3.3.634
quas hodie aduléscens Diabolus ipsi daturus dixit,
3.3.635
ut hanc ne quoquam mitteret nisi ad se hunc annum totum.
3.3.636
videtin viginti minae quid pollent quidve possunt?
3.3.637
ille qui íllas perdit salvos est, ego qui non perdo pereo.
3.3.638
Iam dedit argentum?
3.3.638b
Non dedit.
3.3.638c
Bono animo es, ne formida.
3.3.639
Secede huc, Libane, te volo.
3.3.639b
Si quid vis.
3.3.639c
Obsecro vos,
3.3.640
eadem istac opera suaviust complexos fabulari.
3.3.641
Non omnia eadem aeque omnibus, ere, suavia esse scito:
3.3.642
vobis est suave amantibus complexos fabulari,
3.3.643
ego complexum huius nil moror, meum autem hic aspernatur.
3.3.644
proinde istud facias ipse quod faciamus nobis suades.
3.3.645
Ego vero, et quidem edepol lubens. interea, si videtur,
3.3.646
concedite istuc.
3.3.646b
Vin erum deludi?
3.3.646c
Dignust sane.
3.3.647
Vin faciam ut te Philaenium praesente hoc amplexetur?
3.3.648
Cupio hercle.
3.3.648b
Sequere hac.
3.3.648c
Ecquid est salutis? satis locuti.
3.3.649
Auscultate atque operam date et mea dicta devorate.
3.3.650
primum omnium servos tuos nos esse non negamus;
3.3.651
sed tibi si viginti minae argenti proferentur,
3.3.652
quo nos vocabis nomine?
3.3.652b
Libertos.
3.3.652c
Non patronos?
3.3.653
Id potius.
3.3.653b
Viginti minae hic insunt in crumina,
3.3.654
has ego, si vis, tibi dabo.
3.3.654b
Di te servassint semper,
3.3.655
custos erilis, decus popli, thensaurus copiarum,
3.3.656
salus interioris † corporis amorisque imperator.

Perseus Latin. CTS URN phi0119.phi002.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.