Asinaria

Perseus Latin · Perseus Latin · 1,185 sections

2.2.274
Aetatem velim servire, Libanum ut conveniam modo.
2.2.275
Mea quidem hercle ópera liber numquam fies ocius.
2.2.276
Etiam de tergo ducentas plagas praegnatis dabo.
2.2.277
Largitur peculium, omnem in tergo thensaurum gerit.
2.2.278
Nam si huic sése occasioni tempus supterduxerit,
2.2.279
numquam edepol quadrigis albis indipiscet postea;
2.2.280
erum in óbsidione linquet, inimicum animos auxerit.
2.2.281
sed si mecum occasionem opprimere hanc, quae obvenit, studet,
2.2.282
maximas opimitates, gaudio exfertissimas
2.2.283
suis eris ille una mecum pariet, gnatoque et patri,
2.2.284
adeo ut aetatem ambo ambobus nobis sint obnoxii,
2.2.285
nostro devincti beneficio.
2.2.285b
Vinctos nescio quos ait;
2.2.286
non placet: metuo, in commune ne quam fraudem frausus sit.
2.2.287
Perii ego oppido, nisi Libanum invenio iam, ubiubi est gentium.
2.2.288
Illic homó socium ad malam rem quaerit quem adiungat sibi.
2.2.289
non placet: pro monstro extemplo est, quando qui sudat tremit.
2.2.290
Sed quid ego hic properans concesso pedibus, lingua largior?
2.2.291
quin ego hanc iubeo tacere, quae loquens lacerat diem?
2.2.292
Edepol hominem ínfelicem, qui patronam comprimat.
2.2.293
nam si quid sceleste fecit, lingua pro illo perierat.
2.2.294
Adproperabo, ne post tempus praedae praesidium parem.
2.2.295
Quae illaec praeda est? ibo advorsum atque electabo, quidquid est.
2.2.296
iubeo te salvere voce summa, quo ad vires valent.
2.2.297
Gymnasium flagri, salveto.
2.2.297b
Quid agis, custos carceris?
2.2.298
O catenarum colone.
2.2.298b
O virgarum lascivia.
2.2.299
Quot pondo ted esse censes nudum?
2.2.299b
Non edepol scio.
2.2.300
Scibam ego te nescire, at pol ego, qui ted expendi, scio:
2.2.301
nudus vinctus centum pondo es, quando pendes per pedes.
2.2.302
Quo argumento istuc?
2.2.302b
Ego dicam, quo argumento et quo modo.
2.2.303
ad pedes quando adligatumst aequom centumpondium,
2.2.304
ubi manus manicae complexae sunt atque adductae ad trabem,
2.2.305
nec dependes nec propendes—quin malus nequamque sis.
2.2.306
Vae tibi.
2.2.306b
Hoc testamento Servitus legat tibi.
2.2.307
Verbivelitationem fieri compendi volo.
2.2.308
Quid istud est negoti?
2.2.308b
Certum est credere.
2.2.308c
Audacter licet.
2.2.309
Sis amanti subvenire familiari filio,
2.2.310
tantum adest boni improviso, verum commixtum malo:
2.2.311
omnes de nobis carnificum concelebrabuntur dies.
2.2.312
Libane, nunc audacia usust nobis inventa et dolis.
2.2.313
tantum facinus modo invéni ego, ut nos dicamur duo
2.2.314
omnium dignissumi esse, quo cruciatus confluant.
2.2.315
Ergo mirabar quod dudum scapulae gestibant mihi,
2.2.316
hariolari quae occeperunt, sibi esse in mundo malum.
2.2.317
quidquid est, eloquere.
2.2.317b
Magna est praeda cum magno malo.
2.2.318
Si quidem omnes coniurati cruciamenta conferant,
2.2.319
habeo opinor familiare tergum, ne quaeram foris.
2.2.320
Si istam firmitudinem animi óptines, salvi sumus.
2.2.321
Quin si tergo res solvenda est, rapere cupio publicum:
2.2.322
pernegabo atque obdurabo, periurabo denique.
2.2.323
Em ista virtus est, quando usust qui malum fert fortiter;
2.2.324
fortiter malum qui patitur, idem post potitur bonum.
2.2.325
Quin rem actutum edisseris? cupio malum nanciscier.
2.2.326
Placide ergo unum quidquid rogita, ut adquiescam. non vides
2.2.327
me ex cursura anhelitum etiam ducere?
2.2.327b
Age, age, mansero
2.2.328
tuo arbitratu, vel adeo usque dum peris.
2.2.328b
Vbinam est erus?
2.2.329
Maior apud forumst, minor hic est intus.
2.2.329b
Iam satis est mihi.
2.2.330
Túm igitur tu dives es factus?
2.2.330b
Mitte ridicularia.
2.2.331
Mitto. istuc quod adfers aures exspectant meae.
2.2.332
Animum adverte, ut aeque mecum haéc scias.
2.2.332b
Taceo.
2.2.332c
Beas.
2.2.333
meministin asinos Arcadicos mercatori Pellaeo
2.2.334_335
nostrum vendere atriensem?
2.2.334_335b
Memini. quid tum postea?
2.2.336
Em ergo is argentum huc remisit, quod daretur Saureae
2.2.337
pró asinis. adulescens venit modo, qui id argentum attulit.
2.2.338
Vbi is homost?
2.2.338b
Iam devorandum censes, si conspexeris?
2.2.339
Ita enim vero. sed tamen, tu nempe eos asinos praedicas
2.2.340
vetulos, claudos, quibus subtritae ad femina iám erant ungulae?
2.2.341
Ipsos, qui tibi subvectabant rure huc virgas ulmeas.
2.2.342
Teneo, atque idem te hinc vexerunt vinctum rus.
2.2.342b
Memor es probe.
2.2.343
verum in tonstrina ut sedebam, me infit percontarier,
2.2.344
ecquem filium Stratonis noverim Demaenetum.
2.2.345
dico me novisse extemplo et me eius servom praedico
2.2.346
esse, et aedis demonstravi nostras.
2.2.346b
Quid tum postea?
2.2.347
Ait se ob asinos ferre argentum átriensi Saureae,
2.2.348
viginti minas, séd eum sese non nosse hominem qui siet,
2.2.349
ipsum vero se novisse callide Demaenetum.
2.2.350
quoniam ille elocutus haec sic—
2.2.350b
Quid tum?
2.2.350c
Ausculta ergo, scies.
2.2.351
extemplo facio facetum me atque magnificum virum,
2.2.352
dico med esse atriensem. sic hoc respondit mihi:
2.2.353
“ego pol Sauream non novi neque qua facie sit scio.

Perseus Latin. CTS URN phi0119.phi002.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.