Digest23

Latin Library (medieval and later) · Justinian · The Latin Library · 1,208 sections

301
Quae in adulterio deprehensa est, quasi publico iudicio damnata est. proinde si adulterii condemnata esse proponatur, non tantum quia deprehensa est erit notata, sed quia et publico iudicio damnata est. quod si non sit deprehensa, damnata autem, idcirco notetur, quia publico iudicio damnata est, at si deprehensa quidem sit, damnata autem non sit, notata erit? ego puto, etsi absoluta sit post deprehensionem, adhuc tamen notam illi obesse debere, quia verum est eam in adulterio deprehensam, quia factum lex, non sententiam notaverit.
302
Dig. 23.2.43.13
303
Ulpianus 1 ad l. iul. et pap.
304
Non adicitur hic ut in lege iulia de adulteriis a quo vel ubi deprehensam: proinde sive maritus sive quis alius deprehendisse proponatur, videtur notata: sed et si non in domo mariti vel patris sui deprehensa sit, erit notata secundum verba legis.
305
Dig. 23.2.44pr.
306
Paulus 1 ad l. iul. et pap.
307
Lege iulia ita cavetur: " qui senator est quive filius neposve ex filio proneposve ex filio nato cuius eorum est erit, ne quis eorum sponsam uxoremve sciens dolo malo habeto libertinam aut eam, quae ipsa cuiusve pater materve artem ludicram facit fecerit. neve senatoris filia neptisve ex filio proneptisve ex nepote filio nato nata libertino eive qui ipse cuiusve pater materve artem ludicram facit fecerit, sponsa nuptave sciens dolo malo esto neve quis eorum dolo malo sciens sponsam uxoremve eam habeto".
308
Dig. 23.2.44.1
309
Paulus 1 ad l. iul. et pap.
310
Hoc capite prohibetur senator libertinam ducere eamve, cuius pater materve artem ludicram fecerit: item libertinus senatoris filiam ducere.
311
Dig. 23.2.44.2
312
Paulus 1 ad l. iul. et pap.
313
Non obest avum et aviam artem ludicram fecisse.
314
Dig. 23.2.44.3
315
Paulus 1 ad l. iul. et pap.
316
Nec distinguitur, pater in potestate habeat filiam nec ne: tamen iustam patrem intellegendum octavenus ait, matrem etiam si volgo conceperit.
317
Dig. 23.2.44.4
318
Paulus 1 ad l. iul. et pap.
319
Item nihil refert, naturalis sit pater an adoptivus.
320
Dig. 23.2.44.5
321
Paulus 1 ad l. iul. et pap.
322
An et is noceat, qui antequam adoptaret artem ludicram fecerit? atque si naturalis pater antequam filia nasceretur fecerit? et si huius notae homo adoptaverit, deinde emancipaverit, an non possit duci? ac si talis pater naturalis decessisset? sed de hoc casu contrariam legis sententiam esse pomponius recte putat, ut eis non connumerentur.
323
Dig. 23.2.44.6
324
Paulus 1 ad l. iul. et pap.
325
Si postea ingenuae uxoris pater materve artem ludicram facere coeperit, iniquissimum est dimittere eam debere, cum nuptiae honeste contractae sint et fortasse iam liberi procreati sint.
326
Dig. 23.2.44.7
327
Paulus 1 ad l. iul. et pap.
328
Plane si ipsa artem ludicram facere coeperit, utique dimittenda erit.
329
Dig. 23.2.44.8
330
Paulus 1 ad l. iul. et pap.
331
Eas, quas ingenui ceteri prohibentur ducere uxores, senatores non ducent.
332
Dig. 23.2.45pr.
333
Ulpianus 3 ad l. iul. et pap.
334
In eo iure, quod dicit invito patrono libertam, quae ei nupta est, alii nubere non posse, patronum accipimus ( ut rescripto imperatoris nostri et divi patris eius continetur) et eum qui hac lege emit, ut manumittat, quia manumissa liberta emptoris habetur.
335
Dig. 23.2.45.1
336
Ulpianus 3 ad l. iul. et pap.
337
Qui autem iuravit se patronum, hoc idem non habebit.
338
Dig. 23.2.45.2
339
Ulpianus 3 ad l. iul. et pap.
340
Ne is quidem debet habere, qui non suis nummis comparavit.
341
Dig. 23.2.45.3
342
Ulpianus 3 ad l. iul. et pap.
343
Plane si filius familias miles esse proponatur, non dubitamus, si castrensis peculii ancillam manumiserit, competere ei hoc ius: est enim patronus secundum constitutiones nec patri eius hoc ius competit.
344
Dig. 23.2.45.4
345
Ulpianus 3 ad l. iul. et pap.
346
Hoc caput ad nuptam tantum libertam pertinet, ad sponsam non pertinet: et ideo invito patrono nuntium sponsa liberta si miserit, cum alio conubium habet.
347
Dig. 23.2.45.5
348
Ulpianus 3 ad l. iul. et pap.
349
Deinde ait lex " invito patrono": invitum accipere debemus eum, qui non consentit ad divortium: idcirco nec a furioso divertendo solvit se huius legis necessitate nec si ab ignorante divorterit: rectius enim hic invitus dicitur quam qui dissensit.
350
Dig. 23.2.45.6
351
Ulpianus 3 ad l. iul. et pap.
352
Si ab hostibus patronus captus esse proponatur, vereor ne possit ista conubium habere nubendo, quemadmodum haberet, si mortuus esset. et qui iuliani sententiam probant, dicerent non habituram conubium: putat enim iulianus durare eius libertae matrimonium etiam in captivitate propter patroni reverentiam. certe si in aliam servitutem patronus sit deductus, procul dubio dissolutum esset matrimonium.
353
Dig. 23.2.46
354
Gaius 8 ad l. iul. et pap.
355
Illud dubitationis est, an et qui communem libertam uxorem duxerit ad hoc ius admittatur. iavolenus negavit, quia non proprie videtur eius liberta, quae etiam alterius sit: aliis contra visum est, quia libertam eius esse negari non potest, licet alterius quoque sit liberta: quam sententiam plerique recte probaverunt.
356
Dig. 23.2.47
357
Paulus 2 ad l. iul. et pap.
358
Senatoris filia, quae corpore quaestum vel artem ludicram fecerit aut iudicio publico damnata fuerit, impune libertino nubit: nec enim honos ei servatur, quae se in tantum foedus deduxit.
359
Dig. 23.2.48pr.
360
Clementius 8 ad l. iul. et pap.
361
Filio patroni in libertam paternam eandemque uxorem idem iuris, quod ipsi patrono daretur, ex sententia legis accommodatur. idemque dicendum erit et si alterius patroni filius vivo altero libertam eorum uxorem duxerit.
362
Dig. 23.2.48.1
363
Clementius 8 ad l. iul. et pap.
364
Si ignominiosam libertam suam patronus uxorem duxerit, placet, quia contra legem maritus sit, non habere eum hoc legis beneficium.
365
Dig. 23.2.48.2
366
Clementius 8 ad l. iul. et pap.
367
Si uni ex filiis adsignatam alter uxorem duxerit, non idem ius quod in patrono tribuendum: nihil enim iuris habebit, quia senatus omne ius libertorum adsignatorum ad eum transtulit, cui id pater tribuit.
368
Dig. 23.2.49
369
Marcellus 1 ad l. iul. et pap.
370
Observandum est, ut inferioris gradus homines ducant uxores eas, quas hi qui altioris dignitatis sunt ducere legibus propter dignitatem prohibentur: at contra antecedentis gradus homines non possunt eas ducere, quas his qui inferioris dignitatis sunt ducere non licet.
371
Dig. 23.2.50
372
Marcellus 3 ad l. iul. et pap.
373
Proxime constitutum dicitur, ut, cum quis libertam suam duxerit uxorem, quam ex fideicommissi causa manumiserit, liceat libertae invito eo nuptias contrahere: puto, quia non erat ferendus is qui ex necessitate manumisit, non suo arbitrio: magis enim debitam libertatem praestitit quam ullum beneficium in mulierem contulit.
374
Dig. 23.2.51pr.
375
Licinius 1 reg.
376
Matrimonii causa ancilla manumissa a nullo alio uxor duci potest quam a quo manumissa est, nisi patronus matrimonio eius renuntiaverit.
377
Dig. 23.2.51.1
378
Licinius 1 reg.
379
Si autem filius familias matrimonii causa iussu patris ancillam manumiserit, iulianus putat perinde eam haberi atque si a patre eius manumissa esset: et ideo potest eam uxorem ducere.
380
Dig. 23.2.52
381
Paulus 6 ad sab.
382
Incestae nuptiae neque dotem habent et ideo omne quod perceptum est licet fructuum nomine auferetur.
383
Dig. 23.2.53
384
Gaius 11 ad ed. provinc.
385
Nuptiae consistere non possunt inter eas personas quae in numero parentium liberorumve sunt, sive proximi sive ulterioris gradus sint usque ad infinitum.
386
Dig. 23.2.54
387
Scaevola 1 reg.
388
Et nihil interest, ex iustis nuptiis cognatio descendat an vero non: nam et volgo quaesitam sororem quis vetatur uxorem ducere.
389
Dig. 23.2.55pr.
390
Gaius 11 ad ed. provinc.
391
Quin etiam nefas existimatur eam quoque uxorem ducere, quae per adoptionem filia neptisve esse coeperit, in tantum, ut et, si per emancipationem adoptio dissoluta sit, idem iuris maneat.
392
Dig. 23.2.55.1
393
Gaius 11 ad ed. provinc.
394
Patris adoptivi mei matrem aut materteram aut neptem ex filio uxorem ducere non possum, scilicet si in familia eius sim: alioquin si emancipatus fuero ab eo, sine dubio nihil impedit nuptias, scilicet quia post emancipationem extraneus intellegor.
395
Dig. 23.2.56
396
Ulpianus 3 disp.
397
Etiam si concubinam quis habuerit sororis filiam, licet libertinam, incestum committitur.
398
Dig. 23.2.57
399
Marcianus 2 inst.
400
Qui in provincia officium aliquid gerit, prohibetur etiam consentire filio suo uxorem ducenti.

The Latin Library (thelatinlibrary.com), via CLTK's latin_text_latin_library mirror. Public Domain Mark 1.0: no copyright. Licence: Public Domain Mark 1.0. Source.